Arali ni tshi khou fara lwendo ni tshi khou ya fhethu hune a ni athu vhuya na hu ya, ndi mini zwine na nga zwi ita?

1. 1. Naa ni ḓo fara nḓila ine na vhona u nga ndi yone ine ya ḓo ni swikisa hune na khou ṱoḓa u ya hone?

2. 2. Naa ni ḓo tevhela vhaṅwe ni tshi fhulufhela uri vha a ḓivha nḓila?

3. 3. Naa ni ḓo shumisa GPS, mapa kana na vhudzisa khonani ine na i fhulufhela ine ya ḓivha nḓila?

Arali ra khetha ya u thoma kana ya vhuvhili, zwi nga kha ḓi itea ra si swike he ra vha ri khou ṱoḓa u ya hone. Fhedzi arali ra khetha ya vhuraru, ri nga lavhelela u swika he ra vha ri tshi khou ṱoḓa u ya hone.

Vhutshilo ndi lwendo nahone ri lavhelela uri lwonolwo lwendo lune ra vha khalwo lu ri swikise kha vhumatshelo vhu takadzaho. Uri ri swike hune ra khou ya hone, zwi ḓo ḓitika nga uri ri wana ngafhi nyeletshedzo musi ri tshi ita phetho.

Naho vhunzhi ha phetho dzine ra dzi ita dzi tshi vha dzi ṱhukhu, dziṅwe dzadzo dzi vha dzi dza ndeme vhukuma. Dzenedzi phetho dzi sumbedza uri ndi zwifhio zwine ra tenda uri zwo luga na uri ndi zwifhio zwi songo lugaho. Phetho dzine ra dzi ita dzi ḓo ri kwama na u kwama vhane ra vha funa lwa tshifhinga tshilapfu, nga nḓila yavhuḓi kana i si yavhuḓi. Dzenedzi phetho dzi katela mafhungo a ngaho sa:

• Zwa vhudzekani na mbingano

• U fhulufhedzea, mushumo na tshelede

• Nḓila ya u alusa vhana

• Nḓila ine ra tea u fara ngayo vhaṅwe vhathu

Ni nga vha hani na vhungoho ha uri phetho dzine na dzi ita kha enea mafhungo dzi ḓo ita uri inwi na vha muṱa waṋu ni vhe na vhumatshelo vhu takadzaho?

Mbudziso ine muṅwe na muṅwe washu a tea u ḓivhudzisa yone ndi heyi: Ndi mini zwine zwa ḓo nthusa u ita phetho ya uri zwo lugaho na zwi songo lugaho ndi zwifhio?

Uno magazini u ḓo ṱalutshedza uri ndi ngani ri tshi nga fhulufhela zwine Bivhili ya zwi amba nga ha zwo lugaho na zwi songo lugaho na uri i nga ni thusa hani.