Kon karuyag mo magbiyahe ha lugar nga waray ka pa makakadto, ano an imo bubuhaton?

1. 1. Sunda an direksyon nga para ha imo tama.

2. 2. Sunda an iba, kay naglalaom ka nga maaram hira han dalan.

3. 3. Pagbiling hin masasarigan nga giya, sugad han GPS, mapa, o masasarigan nga sangkay nga maaram han dalan.

Kon pilion naton an siyahan o ikaduha, may makakadtoan kita pero bangin diri ha karuyag naton kadtoan. Pero kon pilion naton an ikatulo, makakasarig kita nga makakaabot kita ha aton destinasyon.

An aton kinabuhi pariho hin pagbiyahe—nga ginlalaoman naton nga magtutugway ha maopay nga kabubuwason. Makaabot man kita o diri ha aton destinasyon nakadepende gud kon diin kita namimiling hin giya kon naghihimo hin mga desisyon.

Bisan kon kadam-an han aton desisyon nga ginhihimo may gutiay nga epekto ha aton kinabuhi, may pipira nga daku an epekto. Iginpapakita hito an aton mga suruklan ha kon ano an tama ngan sayop. An sugad nga mga desisyon makakaapekto ha aton ngan ha aton mga hinigugma hin maiha nga panahon, maopay man ito o maraot. Ini nga mga desisyon nag-uupod han mga butang sugad han:

• Pakig-sex ngan pag-asawa

• Pagin tangkod, trabaho, ngan kwarta

• Kon paonan-o magpapadaku hin anak

• Kon paonan-o tatrataron an iba

Paonan-o ka makakasiguro nga an imo mga desisyon hini nga mga butang magriresulta hin malipayon nga kabubuwason para ha imo ngan ha imo pamilya?

Ini an pakiana nga gin-aatubang han tagsa ha aton: Ano an mabulig ha akon nga makagdesisyon hin maopay ha kon ano an tama ngan sayop?

Igsasaysay hini nga magasin kon kay ano nga masasarigan an Biblia mahitungod ha tama ngan sayop ngan kon paonan-o ito makakabulig ha imo.