Faanra ga baadag ni ngam milekag nga bang ndawor mu un ngay biid, ma mang e ga ra rin’?

1. 1. Ngam man ko gin ga be lemnag nsusun e ngam man ngay.

2. 2. Ngam lek yugu boch e girdi’.

3. 3. Ngam fanay e map ara nge pow’iyem reb e fager rom ni manang e kanawo’.

Faan gad ra mel’eg e bin taareb ara bin l’agruw, ma sana dab da tawgad ko gin gad baadag ni ngad sorgad ngay. Machane faan gad ra mel’eg e bin dalip, mab mudugil ni gad ra taw ko gin gad be nameg.

Yafos rodad e bod ba milekag ni gad be un ngay ni gad be athapeg nra yibnag e felfelan’ ngodad boch nga m’on. Machane re n’ey e be yan u rogon e gin gad ma sap ngay ni ngan pi’ e ayuw ngodad u nap’an ni ngad dugliyed boch ban’en.

Yugu aram rogon ni yooren ban’en ni gad ma dugliy e gathi rib ga’ fan, machane bay boch riy nrib ga’ fan. Ya pi n’ey e ma m’ug riy e n’en ni ir e gad be lemnag nib fel’ nge n’en gad be lemnag nib kireb. Tin gad ma dugliy e ku ra yib angin ara wenegan ngodad nge piin nib t’uf rodad me par nib n’uw nap’an. Pi n’ey e bay rogon ko:

• Par ko pumoon nge ppin nge mabgol

• Yul’yul’, maruwel, nge salpiy

• Chugol bitir

• Ngongol rodad ko girdi’

Uw rogon nrayog ni ngam nang ni n’en kam dugliy e ra yibnag e felfelan’ ngomed chon e tabinaw rom boch nga m’on?

Ra bagadad ma thingari fith ir ni nge gaar: Mang e ra ayuwegeg ni nggu dugliy e n’en nggu rin’ ni bay rogon ko tin nib fel’ nge tin nib kireb?

Be weliy e re ke babyor ney fan nrayog ni nge pagan’dad ko n’en be yog e Bible u murung’agen e tin nib fel’ nge tin nib kireb nge rogon nrayog ni nge ayuwegem.