Saʻo ma le Sesē: Le Tusi Paia—Se Taʻiala Maufaatuatuaina

PLAY

E lē mafai ona tatou faatalitalia o le a taulau manuia a tatou filifiliga, pe afai e pau le mea e faavae mai ai, o o tatou lava manatu ma manatu o isi. E lē gata o loo taʻua i le Tusi Paia le māfuaaga e lē taulau ai, ae o loo taʻua ai foʻi ni taʻiala tauamio maufaatuatuaina, lea e maua ai se olaga fiafia ma faamalieina.

TAʻIALA E TATOU TE MANAʻOMIA

I le Tusi Paia, o loo faamatala ai e Ieova a le Atua le manaʻomia e le tagata o lana taʻitaʻiga, ma e lē mafai e le tagata ona faia mea uma i lana ia lava auala. (Ieremia 10:23) O le māfuaaga lenā ua ia aumaia ai taʻiala tauamio o loo i le Tusi Paia. E alofa o ia i tagata, ma e lē finagalo ina ia tatou faia ni filifiliga sesē, lea e iʻu ai i tigā ma faigatā. (Teuteronome 5:29; 1 Ioane 4:8) E lē gata i lea, ona o ia o Lē na foafoaina i tatou, o loo iā te ia la le malamalama ma le atamai e saunia mai ai taʻiala tauamio e sili ona lelei mo i tatou. (Salamo 100:3; 104:24) Peitaʻi, e lē taitai faamalosia e le Atua i tatou ina ia ola e tusa ai ma ana taʻiala.

Na foaʻi mai e Ieova i le uluaʻi tane ma le fafine o Atamu ma Eva, mea uma na la manaʻomia ina ia maua ai le fiafia moni. (Kenese 1:28, 29; 2:8, 15) Na ia tuuina mai foʻi iā i laʻua ni faatonuga faigofie, lea na ia faatalitalia i laʻua e usitaʻia. Peitaʻi, na ia tuu mai iā i laʻua le saʻolotoga e filifili ai pe usitaʻi i na faatonuga pe leai. (Kenese 2:9, 16, 17) O le mea e faanoanoa ai, na filifili Atamu ma Eva e ola e tusa ai ma laʻua lava tapulaa nai lo o tapulaa a le Atua. (Kenese 3:6) O le ā ua iʻu i ai? Po o maua e tagata le fiafia mai i le faia o mea e latou te manatu e saʻo? E leai. A o faagasolo tausaga, ua tatou iloa ai o le teena o tapulaa a le Atua, e lē iʻu atu i le mauaina o le filemu ma le fiafia e tumau.—Failauga 8:9.

Ua aumaia i le Tusi Paia ni taʻiala e fesoasoani iā i tatou e faia ai filifiliga lelei, e tusa lava po o ā o tatou talaaga. (2 Timoteo 3:16, 17; tagaʻi i le pusa “ Se Tusi mo Tagata Uma.”) Mātau le auala o loo faia ai faapea i le Tusi Paia.

Ia iloilo atili le māfuaaga ua talafeagai ai ona taʻua le Tusi Paia “o le Afioga a le Atua.”—1 Tesalonia 2:13. Maimoa i le vitiō O Ai le Tusitala o le Tusi Paia? i le jw.org.

MĀFUAAGA E TEENA AI E ISI LE TUSI PAIA

E manatu nisi tagata e lē o iai i le Tusi Paia ni fautuaga po o ni taʻiala aogā tauamio. O nisi nei o o latou manatu.

Manatu o isi: “E feteenaʻi faamatalaga o loo i le Tusi Paia.”

Faamatalaga moni: E foliga mai e feteenaʻi nisi faamatalaga o loo i le Tusi Paia. Peitaʻi, pe a e iloiloina le siʻomaga o na mau ma le vaitaimi na tusia ai, o le a e iloa ai e lē feteenaʻi.

Mo nisi faataʻitaʻiga, tagaʻi i le jw.org i le mataupu “Pe e Feteenaʻi le Tusi Paia?”

Manatu o isi: “O loo faia e tagata o ē faapea mai e usitaʻi i le Tusi Paia mea leaga. O lona uiga la, e lē o iai i le Tusi Paia ni fautuaga aogā.”

Faamatalaga moni: E lē tuuaʻia le Tusi Paia ona o amioga leaga a i latou e lē o faatatauina fautuaga o loo iai. Ua valoia mai i le Tusi Paia, e toʻatele tagata e aofia ai ma taʻitaʻi lotu, o le a faapea mai e usitaʻi i le Tusi Paia, ae e feteenaʻi ma a latou gaoioiga. O loo taʻua ai foʻi, o le a “upuleagaina” aʻoaʻoga a le Tusi Paia ona o na tagata.—2 Peteru 2:1, 2.

Ina ia iloa se faataʻitaʻiga o le lē mulimuli o le toʻatele o taʻitaʻi lotu i aʻoaʻoga a le Tusi Paia, faitau i le jw.org i le mataupu “Po o se Pisinisi Lotu?”

Manatu o isi: “O tagata e mulimuli i le Tusi Paia, e latou te lē faaaloalogia isi e ese mai iā i latou.”

Faamatalaga moni: O loo fautuaina i le Tusi Paia le faaaloalo i isi. E lē lagolagoina e le Tusi Paia amioga e pei o le. . .

manatu ua sili atu le tagata lava ia nai lo o isi.—Filipi 2:3.
lē faaaloalo i tagata e ese o latou manatu ma talitonuga.—1 Peteru 2:17.
faamalosia o isi e talia o tatou manatu.—Mataio 10:14.

Ua faailoa mai i le Tusi Paia, e tonu ma agalelei le auala e feutagaʻi ai le Atua ma tagata i taimi uma, ma e finagalo o ia iā i tatou ina ia faia foʻi faapea.—Roma 9:14.

Mo nisi faamatalaga, faitau i le jw.org i le mataupu “Magafagafa—Le Vaaiga Paleni a le Tusi Paia.”

UA FAAILOA MAI I LE TUSI PAIA TAʻIALA A LE ATUA

O loo taʻua i le Tusi Paia feutagaʻiga a le Atua ma tagata mai lava i le amataga. O loo iai faamatalaga e fesoasoani iā i tatou e iloa ai le silafaga a le Atua i le mea e saʻo ma le mea e sesē, faapea mea e aogā ma mea e afāina ai. (Salamo 19:7, 11) E aogā i taimi uma mea e tatou te aʻoaʻoina mai i le Tusi Paia, ma e fesoasoani iā i tatou e faia ai filifiliga atamai i le olaga i aso faisoo.

O se faataʻitaʻiga, o le taʻiala o loo i le Faataoto 13:20: “O lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.” O loo aogā pea lenā taʻiala i aso nei, e pei ona sa iai i aso anamua. E tele taʻiala aogā faapena o loo iai i le Tusi Paia.—Tagaʻi i le pusa “ O Loo Aogā Pea Taʻiala a le Tusi Paia.”

Ae e te ono tomānatu, ʻPe e aogā moni lava fautuaga ma taʻiala a le Tusi Paia iā te aʻu?’ O le a talanoaina i le mataupu o loo sosoo mai nisi o mea moni na tutupu.

a O Ieova, o le suafa lea o le Atua.—Salamo 83:18.

O LOO AOGĀ PEA TAʻIALA A LE TUSI PAIA

E ui na tusia le Tusi Paia i le pe ā o le 2,000 tausaga talu ai, ae o loo aogā pea i aso nei. O loo moomoo pea tagata ia maua se olaga fiafia ma faamalieina. (Failauga 1:9) E mafai ona fesoasoani fautuaga aogā a le Tusi Paia iā i tatou e ausia lenā sini.

Faamaoni

“E matou te mananaʻo ina ia faia mea uma ma le faamaoni.”—Eperu 13:18.
“O lē e gaoi, aua neʻi toe gaoi; ae ia galue mamafa o ia.”—Efeso 4:28.

Feutagaʻiga ma Isi

“Aua neʻi saʻilia e se tasi lona lava lelei, ae ia faaauau ona saʻili le lelei o isi.”—1 Korinito 10:24.
“Ia faaauau ona faapalepale le tasi i le isi, ma ia fefaamagaloaʻi ma le lotoatoa.”—Kolose 3:13.

Faia o Filifiliga

“E talitonu le tagata ua leai se poto masani i upu uma, a o le tagata e iai le utaga mamao, e manatunatu i ona laasaga uma.”—Faataoto 14:15.
“O lē ua iai le utaga mamao e na te iloa atu le lamatiaga ma lafi ai, a o lē ua leai se poto masani e alu atu pea o ia ma mafatia ai i āuga.”—Faataoto 22:3.

LE OLOMATAMATA