Tonú mo e Halá: Tohi Tapú—Ko ha Tataki Alafalalaʻanga
ʻOku ʻikai lava ke tau fakapapauʻi ʻe ola lelei ʻetau ngaahi fili fakaeʻulungāngá kapau ʻoku makatuʻunga pē ia ʻi he anga ʻetau ongoʻí pe ko e ongoʻi ʻa e kakai kehé. ʻOku fakaeʻa mai ʻe he Tohi Tapú ʻa e ʻuhingá, ka ʻokú ne toe ʻomai ʻa e meʻa lahi ange. ʻOku maʻu ai ʻa e tataki fakaeʻulungaanga alafalalaʻanga—ʻa e kī ki hono maʻu ha moʻui fiefia mo fiemālie.
TATAKI ʻOKU TAU FIEMAʻÚ
ʻI he Tohi Tapú, ʻoku fakamatalaʻi ai ʻe Sihova a ko e ʻOtuá naʻá ne fakataumuʻa ki he faʻahinga ʻo e tangatá ke nau hanga kiate ia ki ha tataki, kae ʻikai ke nau tataki pe fakahinohinoʻi pē kinautolu. (Selemaia 10:23) Ko e ʻuhinga ia kuó ne tokonaki mai ai ʻa e ngaahi tataki fakaeʻulungaanga ʻi he Tohi Tapú. ʻOkú ne ʻofa ʻi he fāmili fakaetangatá pea loto ke tau hao mei ngaahi nunuʻa fakatupu maumau mo feifeitamaki ʻo hono fai ʻa e ngaahi fili mahuʻinga ʻo e moʻuí makatuʻunga ʻi hono toutou ʻahiʻahiʻi ʻa e ngaahi founga kehekehé. (Teutalōnome 5:29; 1 Sione 4:8) Mahulu atu aí, ʻi he tuʻunga ko hotau Tokotaha-Fakatupú, ʻokú ne maʻu ʻa e poto mo e ʻilo ʻoku fiemaʻú ke ne ʻomai kiate kitautolu ʻa e faleʻi fakaeʻulungaanga lelei tahá. (Saame 100:3; 104:24) Neongo ia, ʻoku ʻikai ʻaupito fakamālohiʻi ʻe he ʻOtuá ʻa e kakaí ke nau moʻuiʻaki ʻene ngaahi tuʻungá.
Naʻe ʻoange ʻe Sihova ki he ʻuluaki tangatá mo e fefiné, ʻa ʻĀtama mo ʻIvi, ʻa e meʻa kotoa naʻá na fiemaʻu ke hoko ʻo fiefia moʻoní. (Sēnesi 1:28, 29; 2:8, 15) Naʻá ne toe ʻoange mo e ngaahi fakahinohino faingofua peá ne ʻamanekina te na talangofua ki ai. Kae kehe, naʻá ne fakaʻatā ke na fili pē maʻanaua pe te na muimui ki he ngaahi fakahinohino ko iá pe ʻikai. (Sēnesi 2:9, 16, 17) Ko e meʻa fakamamahí, naʻe fili ʻa ʻĀtama mo ʻIvi ke na moʻuiʻaki ʻena ngaahi tuʻunga pē ʻa kinaua kae ʻikai ko e ngaahi tuʻunga ʻa e ʻOtuá. (Sēnesi 3:6) Ko e hā ʻa e olá? ʻOku lelei ange ki he fāmili fakaetangatá ke nau fili pē maʻanautolu ʻa e meʻa ʻoku tonú mo e meʻa ʻoku halá? ʻIkai. ʻOku fakamoʻoniʻi ʻe he hisitōliá ko hono tukunoaʻi ʻa e ngaahi tuʻunga ʻa e ʻOtuá ʻoku ʻikai ke maʻu ai ʻa e melino mo e fiefia tuʻuloá.—Tangata Malanga 8:9.
ʻOku tokonaki mai ʻe he Tohi Tapú ʻa e tataki ʻoku tau fiemaʻú koeʻuhi ke fai ʻa e ngaahi fili fakaeʻulungaanga fakapotopoto, neongo pe ko e hā hotau puipuituʻá. (2 Tīmote 3:16, 17; sio ki he puha “ Ko ha Tohi Maʻá e Kakai Kotoa.”) Fakakaukau ki he founga ʻoku fakahoko ai eni ʻe he Tohi Tapú.
Ako lahi ange fekauʻaki mo e ʻuhinga ʻoku feʻungamālie ai hono ui ʻa e Tohi Tapú “ko e folofola ia ʻa e ʻOtuá.” —1 Tesalonaika 2:13. Sio ʻi he vitiō Ko Hai ʻa e Faʻutohi ʻo e Tohi Tapú? ʻi he jw.org.
FOUNGA ʻOKU FAKAEʻA MAI AI ʻE HE TOHI TAPÚ ʻA E TATAKI ʻA E ʻOTUÁ
Ko e Tohi Tapú ko ha lēkooti tonu mātē ia ʻo e ngaahi fakafeangai ʻa Sihova ki he faʻahinga ʻo e tangatá. Ko e meʻa ʻoku maʻu aí ʻokú ne tokoniʻi kitautolu ke ʻiloʻi ʻa e meʻa ʻoku vakai ki ai ʻa e ʻOtuá ʻoku tonu mo halá pe ʻaonga mo fakatupu maumaú. (Saame 19:7, 11) ʻOku tau ako ʻa e ngaahi tefitoʻi moʻoni tuʻuloa ʻa ia te ne tokoniʻi kitautolu ke fai ʻa e ngaahi fili fakaeʻulungaanga fakapotopoto ʻi heʻetau moʻui fakaʻahó.
Ko e fakatātaá, fakakaukau ki he faleʻi ʻi he Palōveepi 13:20: “Ko e tokotaha ʻoku ʻaʻeva mo e potó ʻe hoko ai ʻo poto, ka ko e tokotaha ʻokú ne feohi mo e valé ʻe hoko ai ʻa e kovi kiate ia.” Ko e tefitoʻi moʻoni ko iá ʻoku tatau pē ʻene ʻaonga ʻi he ʻahó ni mo ʻene ʻaonga ʻi he kuonga muʻá. Ko e Tohi Tapú ʻoku fonu ʻi he ngaahi tefitoʻi moʻoni ʻaonga mo mahuʻinga.—Sio ki he puha “ Ko e Poto Tuʻuloa ʻo e Tohi Tapú.”
Ka te ke fifili nai, ‘ʻE lava fēfē ke u fakapapauʻi ko e tataki fakaeʻulungaanga ʻa e Tohi Tapú ʻoku ʻaonga ʻi he ʻahó ni?’ Ko e kupu hono hokó ʻe lāulea ai ki he ngaahi faʻifaʻitakiʻanga moʻoni ʻe niʻihi.
a Ko e Sihová, ko e huafa fakafoʻituitui ia ʻo e ʻOtuá.—Saame 83:18.
