Samting i Stret na i No Stret: Baibel—Buk Yu Ken Trastim
Sapos yumi larim filings bilong yumi yet o bilong ol narapela i stiaim yumi long wokim ol disisen long wanem pasin i stret o i no stret, yumi no inap save sapos dispela bai kamapim gutpela samting o nogat. Baibel i stori long wai na i olsem, na tu, i no dispela tasol. Em i gat ol tok yumi ken trastim we i stori long ol pasin i stret yumi ken bihainim—em rot bilong i stap amamas na i stap gut.
YUMI NIDIM TOK BILONG GOD LONG STIAM YUMI
Long Baibel, Jehova a God i tok em i wokim ol man long lukluk long em long stiaim ol, i no long ol i ken stiaim wokabaut bilong ol yet. (Jeremaia 10:23) Olsem na long Baibel em i putim ol tok bilong em long wanem ol pasin i stret em ol man i ken bihainim. Em i laikim yumi na em i no laik bai yumi wokim ol disisen nogut we bai bagarapim yumi na givim hevi long yumi. (Lo 5:29; 1 Jon 4:8) Bikpela samting moa, em Krieta bilong yumi, na em i gat savetingting na save, olsem na em inap givim yumi gutpela edvais long wanem ol pasin i stret long bihainim. (Buk Song 100:3; 104:24) Maski i olsem, God i no save fosim ol man long bihainim ol lo bilong em.
Jehova i givim namba wan man na meri, Adam na Iv, olgeta samting ol i nidim bilong i stap amamas tru. (Stat 1:28, 29; 2:8, 15) Em i givim tu ol lo i no hatwok we em i laik tupela i mas bihainim. Tasol em i larim tupela yet i makim olsem tupela bai bihainim ol dispela lo o nogat. (Stat 2:9, 16, 17) Sori tru, Adam na Iv i wokim disisen long bihainim lo bilong ol yet na i no bilong God. (Stat 3:6) Wanem samting i kamap? Yu ting ol man i stap amamas taim ol i wokim disisen bilong ol yet long wanem pasin i stret o i no stret long bihainim? Nogat. Kirap long bipo yet na i kam, ol samting i kamap i soim olsem taim ol man i sakim ol lo bilong God, dispela i no mekim ol i stap bel isi na amamas.—Eklisiastis 8:9.
Baibel i gat ol tok bilong stiaim yumi long wokim ol gutpela disisen we inap helpim yumi, maski yumi stap long wanem hap o yumi kamap bikpela insait long wanem kain famili. (2 Timoti 3:16, 17; lukim blok “ Wanpela Buk Bilong Olgeta Man.”) Skelim olsem wanem Baibel i helpim yumi long mekim olsem.
Kisim sampela save moa long as na yumi kolim Baibel olsem “tok bilong God.”—1 Tesalonaika 2:13. Lukim vidio Husat i Kamapim Ol Tok Bilong Baibel? long jw.org/tpi.
BAIBEL I GAT TOK BILONG GOD LONG STIAIM YUMI
Baibel i kamapim stret stori bilong ol samting Jehova i mekim long ol man. Ol tok i stap long Baibel i helpim yumi long kliagut long tingting bilong God long wanem pasin i stret na i no stret, na wanem samting inap helpim yumi na wanem samting inap givim hevi long yumi. (Buk Song 19:7, 11) Ol stiatok yumi lainim bai helpim yumi long wokim ol gutpela disisen long ol samting yumi mekim long olgeta de.
Olsem, skelim edvais i stap long Provep 13:20: “Man i wokabaut wantaim ol man i gat savetingting, em bai gat savetingting, tasol man i poroman wantaim ol longlong man, trabel bai painim em.” Dispela stiatok i stret long nau wankain olsem long bipo. Baibel i gat planti gutpela stiatok bilong helpim yumi.—Lukim blok “ Tok Bilong Baibel i Helpim Yumi Long Nau Tu.”
Tasol ating yu laik save, ‘Olsem wanem mi ken save ol tok bilong Baibel inap helpim mi long nau?’ Neks atikol bai stori long hau Baibel i helpim sampela manmeri.
a Jehova em i nem bilong God.—Buk Song 83:18.
