Leswinene Ni Leswi Hoxeke: Bibele I Nkongomiso Lowu Tshembekaka

TLANGA

Hi nge swi tivi leswaku leswi hi swi hlawulaka evuton’wini swi ta hi fambela kahle loko hi swi hlawula hi ku ya hi ndlela leyi hina kumbe van’wana va titwaka hayona. Bibele yi hlamusela xivangelo xa kona kambe yi tlhela yi hlamusela swo tala. Yi hi pfuna ku tiva leswinene ni leswi hoxeke ku nga leswi endlaka hi tsaka.

NKONGOMISO LOWU HI WU LAVAKA

EBibeleni Yehovha a Xikwembu u hlamusela leswaku vanhu va lava ku kongomisiwa hi yena ni leswaku a va nge swi koti ku tiendlela swilo hinkwaswo. (Yeremiya 10:23) Leswi hi swona swi endleke a hi nyika milawu ya mahanyelo leyi nga eBibeleni. Wa hi rhandza tanihi vanhu naswona a nga lavi hi endla swiboho leswi hoxeke leswi nga ta hi vavisa ni ku hi tikisela vutomi. (Deteronoma 5:29; 1 Yohane 4:8) Ku engetela kwalaho, leswi a nga Muvumbi wa hina u ni vutlhari ni vutivi leswi lavekaka leswaku swi hi nyika xitsundzuxo lexinene xa mahanyelo. (Pisalema 100:3; 104:24) Hambiswiritano, Xikwembu a xi sindzisi munhu leswaku a hanya hi milawu ya xona.

Yehovha u nyike wanuna ni wansati wo sungula ku nga Adamu na Evha hinkwaswo leswi a va swi lava leswaku va tsaka. (Genesa 1:28, 29; 2:8, 15) U tlhele a va nyika swileriso swo olova leswi a lava va swi landzela. Hambiswiritano, u va pfumelerile ku tihlawulela loko va ta landzela swileriso sweswo kumbe va nga swi landzeli. (Genesa 2:9, 16, 17) Lexi twisaka ku vava, Adamu na Evha va hlawule ku hanya hi milawu ya vona ku ri ni ku hanya hi ya Xikwembu. (Genesa 3:6) Vuyelo byi ve byihi? Xana vanhu va tsaka loko va tihlawulela ku endla leswi va swi rhandzaka? Doo. Matimu ma kombisa leswaku ku honisa milawu ya Xikwembu a swi ku tisi ku rhula ni ntsako lowu nga heriki.—Eklesiasta 8:9.

Bibele yi hi nyika nkongomiso lowu hi wu lavaka leswaku hi teka swiboho swa vutlhari swa mahanyelo swi nga khathariseki leswaku hi huma kwihi. (2 Timotiya 3:16, 17; vona bokisi leri nge, “ Buku Ya Vanhu Hinkwavo.”) Vona leswaku Bibele yi swi endla njhani leswi.

Dyondza swo tala leswi endlaka Bibele yi faneleka ku va yi vitiwa “rito ra Xikwembu.” —1 Vatesalonika 2:13. Hlalela vhidiyo leyi nge, I Mani Mutsari Wa Bibele? eka jw.org.

LEXI ENDLAKA VAN’WANA VA NGA YI LAVI BIBELE

Vanhu van’wana va vula leswaku Bibele a yi nge vi nkongomiso lowunene wa mahanyelo. Hi leswi swilo swin’wana leswi va nga ha swi vulaka.

Va kaneta va ku: “Bibele ya tikaneta.”

Ntiyiso: Eku sunguleni swi nga ha vonaka onge matsalwa man’wana ma Bibele ma kanetana kambe loko u dyondza hi ndlela leyi matsariweke hayona ni nkarhi lowu matsariweke ha wona u ta swi vona leswaku a ma kanetani.

Leswaku u kuma swikombiso swin’wana, hlaya nhlokomhaka leyi nge, “Xana Bibele Ya Tikaneta?” eka jw.org.

Va kaneta va ku: “Vanhu lava vulaka leswaku va landzela Bibele va endla swilo swo biha, hikwalaho a yi nge vi nkongomiso lowunene wa mahanyelo.”

Ntiyiso: Bibele a yi fanelangi yi soriwa hikwalaho ka mahanyelo yo biha ya lava nga ti tirhisiki tidyondzo ta yona. Yi vula leswaku vanhu vo tala ku katsa ni varhangeri va vukhongeri lava vulaka leswaku va landzela Bibele a va ta endla swilo leswi nga pfumelelaniki na yona. Yi tlhela yi vula leswaku hikwalaho ka sweswo tidyondzo ta Bibele a ti ta ‘vulavuriwa ku biha.’—2 Petro 2:1, 2.

Leswaku u kuma xikombiso xa tindlela leti varhangeri vo tala va vukhongeri va hambukeke ha yona eka leswi Bibele yi swi dyondzisaka, hlaya nhlokomhaka leyi nge, “Is Religion Just Another Big Business?” eka jw.org.

Va kaneta va ku: “Bibele yi endla leswaku vanhu va nga tiyiselelani.”

Ntiyiso: Bibele yi khutaza ku hanyisana ni vanhu van’wana hi xichavo. A yi swi amukeli. .

ku titeka u tlakukile ku tlula vanhu van’wana.—Vafilipiya 2:3.
ku delela vanhu lava nga ni mahanyelo kumbe tidyondzo leti hambaneke.—1 Petro 2:17.
ku sindzisa van’wana ku landzela mavonelo ya munhu un’wana. —Matewu 10:14.

Bibele yi komba leswaku Xikwembu mikarhi hinkwayo xi khoma vanhu hi musa ni ku twisisa ni leswaku xi lava hi endla leswi fanaka.—Varhoma 9:14.

Leswaku u kuma rungula leri engetelekeke, hlaya nhlokomhaka leyi nge, “Tolerance—How the Bible Can Help” eka jw.org.

NDLELA LEYI BIBELE YI HLAMUSELAKA NKONGOMISO WA XIKWEMBU

Bibele i rhekhodo leyi pakanisaka ya ndlela leyi Yehovha a hanyisanaka ni vanhu hayona. Leswi yi vulavulaka ha swona swi hi pfuna ku tiva leswi Xikwembu xi swi tekaka swi ri leswinene ni leswi hoxeke, leswi pfunaka ni leswi vavisaka. (Pisalema 19:7, 11) Hi dyondza milawu leyi nga pimiwiki leyi hi pfunaka ku endla swiboho swa vutlhari swa mahanyelo evuton’wini bya hina bya siku ni siku.

Hi xikombiso, ehleketa hi xitsundzuxo lexi kumekaka eka Swivuriso 13:20: “Loyi a fambaka ni lavo tlhariha u ta tlhariha, kambe loyi a tirhisanaka ni swiphukuphuku swilo a swi nge n’wi fambeli kahle.” Nawu wolowo wa tirha ninamuntlha ku fana ni le mikarhini ya khale. Bibele yi tele hi milawu leyi tirhaka ni ya nkoka.—Vona bokisi leri nge, “ Vutlhari Lebyi Nga Pimiwiki Bya Bibele.”

Kambe u nga ha ku, ‘Ndzi nga tiyiseka njhani leswaku nkongomiso wa mahanyelo lowu kumekaka eBibeleni wa tirha ninamuntlha?’ Nhlokomhaka leyi landzelaka yi ta tlhuvutsa swikombiso swin’wana swa xiviri.

a Yehovha i vito ra Xikwembu.—Pisalema 83:18.

VUTLHARI LEBYI NGA PIMIWIKI BYA BIBELE

Hambileswi Bibele yi hetiweke kwalomu ka malembe ya 2 000 lama hundzeke, ya ha ya emahlweni yi tirha ninamuntlha. Ntumbuluko wa vanhu a wu si cinca, ha ha lava ku eneriseka ni ntsako. (Eklesiasta 1:9) Vutlhari lebyi nga pimiwiki bya Bibele byi nga hi pfuna leswaku hi fikelela sweswo.

Ku tshembeka

‘Hi navela ku tikhoma hi ku tshembeka eka swilo hinkwaswo.’—Vaheveru 13:18.
“Loyi a yivaka a nga ha tlheli a yiva; kambe a a tirhe hi matimba.”—Vaefesa 4:28.

Ndlela yo hanyisana ni van’wana

“Un’wana ni un’wana a a endle leswi pfunaka ni van’wana, ku nga ri leswi pfunaka yena ntsena.”—1 Vakorinto 10:24.
“Yanani emahlweni mi lehiselana mbilu ni ku rivalelana hi ku tshunxeka.”—Vakolosa 3:13.

Ku teka swiboho

“Munhu loyi a nga riki na ntokoto u tshemba rito rin’wana ni rin’wana, kambe lowo tlhariha u anakanyisisa hi leswi a nga ta swi endla.”—Swivuriso 14:15.
“Lowo tlhariha u vona khombo kutani a tumbela, kambe loyi a nga riki na ntokoto u ya emahlweni a famba kutani a langutana ni vuyelo bya swiendlo swakwe.”—Swivuriso 22:3.

XIHONDZO XO RINDZA