Tama Ngan Sayop: An Biblia—Masasarigan nga Giya
Diri kita makakasiguro kon magigin maopay an resulta han aton mga desisyon parte ha kon ano an tama ngan sayop kon ibase la naton ito ha aton inaabat o inaabat han iba. Iginpapakita han Biblia kon kay ano, pero diri la ito. Mahibabaroan liwat naton ha Biblia kon ano an tama ngan sayop, nga nabulig ha aton nga magin malipayon.
GIYA NGA ATON GINKIKINAHANGLAN
Ha Biblia, iginsaysay ni Jehova a nga Dios nga kinahanglan han mga tawo an iya bulig ngan waray hira mahihimo ha ira la kalugaringon. (Jeremias 10:23) Ito an rason kon kay ano nga nagtagana hiya hin mga giya parte ha kon ano an tama ngan sayop nga mababasa ha Biblia. Hinigugma niya an mga tawo ngan diri niya karuyag nga makahimo kita hin sayop nga mga desisyon nga makakasakit ha aton ngan makakapakuri ha aton kinabuhi. (Deuteronomio 5:29; 1 Juan 4:8) Labaw pa hito, sugad nga aton Maglalarang, aada ha iya an ginkikinahanglan nga kinaadman ngan kahibaro ha paghatag ha aton han pinakamaopay nga sagdon ha pagdesisyon ha kon ano an tama ngan sayop. (Salmo 100:3; 104:24) Pero waray gud pirita han Dios an mga tawo nga magkinabuhi uyon ha iya mga suruklan.
Ginhatag ni Jehova ha siyahan nga lalaki ngan babaye, kanda Adan ngan Eva, an ngatanan nga ira ginkikinahanglan basi tinuod nga magin malipayon. (Genesis 1:28, 29; 2:8, 15) Naghatag liwat hiya ha ira hin simple nga mga instruksyon nga iya ginlalaoman nga susundon nira. Pero gintugotan niya hira nga magdesisyon para ha ira kalugaringon kon susundon ba nira ito nga mga instruksyon o diri. (Genesis 2:9, 16, 17) Makasurubo, ginpili nira Adan ngan Eva nga magkinabuhi uyon ha ira kalugaringon nga mga suruklan imbes ha mga suruklan han Dios. (Genesis 3:6) Ano an nagin resulta? Nagin mas maopay ba para ha mga tawo nga magdesisyon para ha ira kalugaringon ha kon ano an tama ngan sayop? Waray. Ginpapamatud-an han kasaysayan nga an pagbalewaray han mga suruklan han Dios diri naghahatag hin nagpapadayon nga kamurayawan ngan kalipay.—Eclesiastes 8:9.
An Biblia naghahatag hin giya nga aton ginkikinahanglan basi makahimo hin maaramon nga mga desisyon parte ha kon ano an tama ngan sayop, anoman an aton gintikangan. (2 Timoteo 3:16, 17; kitaa an kahon nga “ Usa nga Libro Para ha Ngatanan nga Tawo.”) Pansina kon paonan-o ini ginbubuhat han Biblia.
Mahibaro hin dugang kon kay ano nga angayan la nga gintatawag an Biblia nga “pulong han Dios.”—1 Tesalonica 2:13. Kitaa an video nga Hin-o an Awtor han Biblia? ha jw.org.
KON PAONAN-O IGINPAPAKITA HAN BIBLIA AN GIYA HAN DIOS
An Biblia nagsusumat ha aton parte ha relasyon han Dios ha mga tawo tikang pa ha tinikangan. An sulod hito mabulig ha aton nga masabtan an mga butang nga ginhuhunahuna han Dios nga tama ngan sayop, mapulsanon ngan nakakadaot. (Salmo 19:7, 11) Mahibabaroan naton an diri nadadaan nga mga prinsipyo nga mabulig ha aton nga makahimo hin maaramon nga mga desisyon ha kon ano an tama ngan sayop ha aton adlaw-adlaw nga pagkinabuhi.
Pananglitan, pansina an sagdon nga mababasa ha Proberbios 13:20: “An tawo nga naglalakat upod han mga maaramon magigin maaramon, pero an tawo nga nakikig-upod ha mga lurong maghihikaraot.” Ito nga prinsipyo aplikado liwat ha aton moderno nga panahon sugad la nga naaplikar ito hadto. An Biblia puno hin puropariho hito nga praktikal ngan mapulsanon nga mga prinsipyo.—Kitaa an kahon nga “ An Diri Nadadaan nga Kinaadman han Biblia.”
Pero bangin mahunahuna mo, ‘Paonan-o ko masisiguro nga an sagdon han Biblia makakabulig ha akon?’ Hihisgotan han sunod nga artikulo an pipira nga eksperyensya.
a Jehova an personal nga ngaran han Dios.—Salmo 83:18.
