Duga tan Aliwa: Say Makatulong ya Giya
Minilyon lan totoo so atulongan na Biblia diad sarayan apatiran aspekto na bilay tayo.
1. Panangasawa
Nandurumay iisipen na totoo tungkol ed panangasawa tan no antoy dapat ya gawaen na sanasawa pian magmaliw iran maliket.
IBABAGA NA BIBLIA: “Kada asawan laki ed sikayo et nepeg ton aroen so asawa to a singa ed dilin laman to; ontan met, say asawan bii et nepeg a walaan na aralem a respeto ed asawa to.”—Efeso 5:33.
SAY LABAY TON IBAGA: Say uksoyan na panangasawa et nanlapud Dios kanian amta to no panon ya magmaliw ya maliket so sanasawa. (Marcos 10:6-9) Magmaliw ya maliket so sanasawa no say sankanonot da et say pankaabigan na kada sakey, imbes ya say sarili labat na sakey so iisipen to. Nipanengneng ya inar-aro na asawan laki so asawa to no maong so panagtrato tod sikato tan no aasikasoen to. Nipanengneng met na asawan bii so respeto ed asawa to diad saray ibabaga tan gagawaen to.
MAKATULONG SO PANANGIGIYA NA BIBLIA: Inisip nen Quang tan Thi, ya tagad Vietnam, ya imposible nin magmaliw ya maliket so ulopan da bilang sanasawa. Ansakit so panagsalita nen Quang. Kuan to: “Anggapoy pibabalik ed liknaan nen Thi, tan lanang kon papabaingan.” Kanian labay la nen Thi so midiborsyo. Oniay imbaga to: “Abalang lay tiwalak ed si asawak tan agko la narespeto.”
Ag-abayag, naaralan nen Quang tan Thi no antoy ibabangat na Biblia tan inyaplika da so Efeso 5:33. Oniay imbaga nen Quang: “Akatulong iyan bersikulo pian nauman koy ugalik, tan nipaliknak ed si Thi ya inar-arok tan nitaryak so pankaukolan to diad materyal, pisikal, tan emosyonal ya paraan. Kanian pinmawil so panangaro tan respeto tod siak.” Oniay imbaga met nen Thi: “Nen iyaaplikak lay Efeso 5:33 tan nipapanengneng ko lamet so respetok ed si asawak, naliliknak so panangaro tan proteksion to tan mas mareen lay liknaan ko.”
Parad kaaruman ya impormasyon tungkol ed panangasawa, basaen so Onliing! No. 2 2018 ya say title to et “12 Sekreto na Maliket ya Pamilya” diad jw.org/pag.
2. No Panon ya Tratoen so Arum
Kaslakan et aliwliway panagtrato na arum ed saramay duma so lahi ra, bansa, itsura, relihyon, odino ed saray homoseksual.
IBABAGA NA BIBLIA: “Igalang yoy amin a klase na totoo.”—1 Pedro 2:17.
SAY LABAY TON IBAGA: Agkokonsintien na Biblia so diskriminasyon tan agto ipapaseseg so pambusol ed saray homoseksual. Imbes, papasesegen itayo na Biblia ya respetoen tayo so amin ya klase na totoo, antokaman so lahi, bansa, odino estado dad bilay. (Gawa 10:34) Anggano duma ed sikatayo iray papanisiaan tan gagawaen na arum, siansia nin ipanengneng tayoy kamaongan tan respeto ed sikara.—Mateo 7:12.
MAKATULONG SO PANANGIGIYA NA BIBLIA: Inturing nen Daniel iray taga Asia ya kalaban na bansa ra ta atan so imbangat ed sikato. Kanian kabusol toy siopaman ya walay lahi ton Asian tan naynay to ran papabaingan. Oniay imbaga to: “Say amtak, duga tan ya gagawaen ko pian nasuportaan koy bansa mi, aliwa manaya.”
Ag-abayag et nanaral na Biblia si Daniel. “Talagan inuman koy paraan na panagnonot ko,” so kuan to. “Dapat kon tratoen iray totoo ya singa ed panagtrato na Dios ed sikara ta parepareho so pakanengneng to ed amin.” Imbaga met nen Daniel no anto lay nalilikna to natan ed saray totoon nakakabat to. Kuan to: “Agla importante ed siak no iner so nanlapuan da. Inar-arok la natan so amin ya klase na totoo tan wala ray nagmaliw ya kakaarok ed nanduruman parte na mundo.”
Parad kaaruman ya impormasyon, basaen so Onliing! No. 3 2020, ya say title to et “Naandi ni Kasi so Diskriminasyon?” diad jw.org/pag.
3. Kuarta
Dakel so manpapayaman pian magmaliw ira kunon maliket tan walay maong ya arapen da.
IBABAGA NA BIBLIA: “Say karunongan et sakey a proteksion no panon a say kuarta et sakey a proteksion, balet saya so kaabigan na kakabatan: Say karunongan et pansiasiansiaen ton mabilay iramay walaan na satan.”—Eclesiastes 7:12.
SAY LABAY TON IBAGA: Kaukolan tayoy kuarta, balet aliwan garantiya itan pian magmaliw tayon maliket tan nawalaan tayoy maong ya arapen. (Proverbio 18:11; 23:4, 5) Pero magmaliw tayon tuan maliket tan maong so arapen tayo no iyaplika tayoy karunongan na Dios ya manlalapud Biblia.—1 Timoteo 6:17-19.
MAKATULONG SO PANANGIGIYA NA BIBLIA: Si Cardo ya tagad Indonesia et nampokus ed pananap toy kayamanan. “Wala lad siak iray papangarapen na halos amin ya totoo,” so kuan to. “Makakaonla ak ed nanduruman lugar, makakasaliw ak na mabmabli iran gamit, luluganan, tan akapangipundar ak met na saray abung.” Pero abalang lanlamang iratan ya amin. Oniay imbaga nen Cardo: “Aloko ak, tan aminpinsan ya naandin amin so kuartan pinan-irapan ko diad dakel ya taon. Inusar koy interon bilay ko pian manpayaman balet adismaya ak labat tan pakaliknak et anggapo lay kuentak.”
Pero inyaplika nen Cardo so bilin na Biblia tungkol ed kuarta. Agla natan akapokus ed pananap toy kayamanan noagta pinasimpli toy bilay to. Oniay imbaga to: “Nibagak ya walad siak so tua tan agnabalang ya kayamanan ta walay maong ya relasyon kod Dios. Masamit met lay ugip ko kada labi, tan talagan malikeliket ak.”
Parad kaaruman ya impormasyon ed ibabaga na Biblia tungkol ed kuarta, basaen so artikulon “Kasin Niiter na Edukasyon tan Kuarta so Seguradon Maong ya Bilay ed Arapen?” diad Say Panag-bantayan No. 3 2021 diad jw.org/pag.
4. Sex
Nanduruma so opinyon na totoo tungkol ed sex.
IBABAGA NA BIBLIA: “Paliisan yoy seksual ya imoralidad. Nepeg ya amtaen na kada sakey ed sikayo no panon ton kontrolen so dilin laman to unong ed kasantosan tan kagalangan, ya aliwan diad maagum tan agnakontrol a pantintindek ed sekso a singa ed saray nasyon ya agda kabat so Dios.”—1 Tesalonica 4:3-5.
SAY LABAY TON IBAGA: Ibabaga na Biblia ya walay limitasyon na pangibalikas tayod seksual ya pilalek tayo. Kaiba ed “seksual ya imoralidad” so pikakalugoran, prostitusyon, pan-sex na duaran agsanasawa, homoseksualidad, tan pi-sex ed ayayep. (1 Corinto 6:9, 10) Say sex et regalo ya nanlapud Dios tan para labat itan ed laki tan bii ya sanasawa.—Proverbio 5:18, 19.
MAKATULONG SO PANANGIGIYA NA BIBLIA: Oniay imbaga nen Kylie, sakey ya biin single ya tagad Australia: “Say amtak no mi-sex ak, naliknak ya inar-aro ak tan magmaliw ya panatag so liknaan ko. Balet kabaliktaran so agawa. Maer-ermen ak tan abalang so respetok ed sarilik.”
Ag-abayag, naaralan nen Kylie no antoy ibabangat na Biblia tungkol ed sex tan inyaplika to itan. Oniay imbaga to: “Inter na Dios ed sikatayo iray ganggan to ta agto labay ya nasakitan tayo. Natan et panatag lay liknaan ko tan naliliknak ya inar-aro ak ta gagawaen ko la ray panlabayan nen Jehova. Lapud tutumboken ko lay panangigiya na Biblia, napapaliisan ko lan gawaen iray nayarin makasakit ed siak!”
Parad kaaruman ya impormasyon, basaen so artikulo ya “Antoy Ibabaga na Biblia Nipaakar ed Pan-live In?” diad jw.org/pag.
Tutulongan itayo na Amalsa no antoy gawaen tayo pian naamtaan tayoy duga tan aliwa. Anggano aliwan naynay ya mainomay ya unoren iray bilin to, sulit so pansagpot tayo. Tan makaseguro tayo ya lanang ya maong so resulta na satan tan magmaliw ya maliket so bilay tayo.
