1. Kisa ki pé fè nou santi pè délè?

 NOU tout ka santi pè délè. Kanmenm, paski nou konnèt sa Bib-la ka di, nou pa ni pèwèz konsèné bagay tèl kon, lé mò, sé vyé lèspwi-a, ében sa ki kay fèt an tan pou vini. Mé a menm di tan, nou ka viv adan on tan ki byen difisil, konsa, nou pé pè bagay tèl kon ladjè, kwim, ében maladi. (Louk 21:11) Osi, nou pé pè moun tèl kon, moun ki an lotowité, ében jis manm fanmi nou ki ka éséyé anpéché nou adowé Jéhova. Èk an plis di sa, pitèt adan di nou ka pè nou pa kay sa tjébé fò anba on pwoblenm nou ka èspéyansé apwézan, ében on difikilté nou kay ni an tan pou vini.

2. Kisa ki té wivé David an Gaf?

² La té ni sitiwasyon koté David té vwéman pè. Pou ègzanp, lè Wa Sòl té ka chaché David pou tjwé’y, David kouwi alé Gaf, sa sété yon vil sé jan Filistin-lan. Kanmenm, wa Gaf vin’ wéyalizé ki, David sété menm sòlda-a ki té wèskonsab pou lanmò plizyè dis mil (10,000) sòlda sé Filistin-lan. Lè David wéyalizé wa Gaf té konnèt ki moun i yé, i vin’ pè an chay. (1 Sm 21:10-12) Wi, David té vwéman pè sa Wa Ékich té kay fè’y. Kanmenm, kisa ki wédé David pou konnèt sa pou fè menm si i té pè?

3. Silon Sam 56:1-3, 11, kisa David té fè pou ganyen a bout pèwèz li?

³ An Sam 56, David ka èspliké mannyè i té ka santi lè’y té an Gaf, èk poutji i té pè. Èk osi, sa i té fè pou ganyen a bout pèwèz li. Bon. Lè David té santi pè, i mété konfyans li an Jéhova. (Li Sam 56:1-3, 11.) Wi, David té mété tout konfyans li an Jéhova, èk Jéhova pa té dézapwenté’y. Anfen, épi èd Jéhova, David désidé pou fè on bagay ki té byen dwòl, i fè konmsi i té fou. Èk ou sav plan’y twavay? Alò, pito Wa Ékich tjwé’y, i pa té menm vlé wè’y douvan’y. Konsa, David té sa chapé.​—1 Sm 21:13–22:1.

4. Ki mannyè nou sa fòtifyé konfyans nou an Jéhova? Ba yon ègzanp.

⁴ Menm kon David, nou osi sa wèsté kam èk fè bon disizyon, si nou mété konfyans nou an Jéhova. Kanmenm, ki mannyè nou sa fòtifyé konfyans nou an Jéhova, èspwèsman lè nou pè? Ében, konsidiwé ègzanp sala. Si’w apwann ou ni on mové maladi, sa pé fè’w santi pè. Ès pa? Kanmenm, si’w ka konfyé dòktè’w sa kay édé’w pou santi kam. Pitèt dòktè’w ja édé an chay moun ki té ni menm maladi sala. Èk mannyè i ka kouté’w lè’w ka èspliké wézon-an ou pè, ka fè’w wè i vwéman mélé épi’w. I pé jis ankouwajé’w pou aksèpté sèten twètman ki ja twavay byen pou lézòt moun. Alò, an menm mannyè-a nou sa fòtifyé konfyans nou an Jéhova lè nou mèdité asou sa’y ja fè ban nou an tan pasé, sa’y ka fè ban nou apwézan, èk sa’y pwonmèt pou fè ban nou an tan pou vini. Èk sé sa David té fè. Alò, kon nou ka konsidiwé pawòl David an liv Samz 56, katjilé asou mannyè ou osi sa fòtifyé konfyans ou an Jéhova, pou’w sa wèsté kam èk ganyen a bout pèwèz ou.

KATJILÉ ASOU SA JÉHOVA JA FÈ

5. Kisa David té ka katjilé asou pou édé’y lè’y té pè? (Sam 56:12, 13)

⁵ Magwé lavi David té an danjé èk i té pè, i kontiné katjilé asou sé bon bagay-la Jéhova té fè an tan pasé. (Li Sam 56:12, 13.) Èvèk diwan tout lavi’y sa sété labitid li. Pou ègzanp, délè David té ka katjilé asou kwéyasyon Bondyé. Èk sa té ka édé’y chonjé ki otan pouvwa Jéhova ni, èk mannyè Bondyé enmen lézòm an chay. (Sam 65:6-9) Osi, David té ka katjilé asou sa Jéhova ja fè ba lòt moun. (Sam 31:19; 37:25, 26) An plis di sa, i té ka katjilé asou sa Jéhova ja fè ba li. Wi, dépi David té ti manmay Jéhova té ka otjipé’y èk pwotèkté’y. (Sam 22:9, 10) Vwéman, lè David té katjilé asou tout sa, sa té édé’y pou mété konfyans li an Jéhova!

6. Lè nou ka santi pè, kisa ki kay édé nou pou mété konfyans nou an Jéhova?

⁶ Alò lè ou ka santi pè, ou sa mandé kò’w: ‘Kisa Jéhova ja fè?’ Wi, katjilé asou kwéyasyon Bondyé. Pou ègzanp, Jéhova pa té fè sé jibyé-a èk sé flè-a an imaj li, èk yo pa ka adowé’y, mé i ka pwan ka yo. Konsa, lè nou mèdité asou kwéyasyon, sa kay bati konfyans nou ki, Jéhova kay vwéman otjipé nou. (Maf. 6:25-32) Osi ou sa katjilé asou sa Jéhova ja fè pou sé sèvant li-a. Pou ègzanp, ou sa étidyé konsèné an moun an Bib-la ki té ni an chay lafwa, ében ou sa li konsèné èspéyans yonn a sé sèvant Bondyé-a an tan nou. Wi si’w wéfléchi asou mannyè Jéhova té sipòté yo, sa kay bati konfyans ou an Jéhova. a An plis di sa, katjilé asou mannyè Jéhova ja otjipé’w. Pou ègzanp, i bon pou mandé kò’w kwèsyon tèl kon: ‘Ki mannyè Jéhova té édé mwen pou konnèt li? (Jan 6:44) Ki mannyè i ja wéponn sé lapwiyè mwen-an? (1 Jan 5:14) Ki bennéfis mwen ka wisivwè touléjou paski Jéhova voyé gason’y pou mò ban mwen?’ Wi, lè nou mèdité asou bagay kon sa, sa kay édé nou pou konfyé Jéhova lè nou ka santi pè.​—Èfés. 1:7; Hib. 4:14-16.

7. Ki mannyè èspéyans pwofèt Dannyèl té édé Vanessa pou pa santi pè?

⁷ Vanessa, b an sé sè ki ka viv an péyi Haiti, té èspéyansé an sitiwasyon ki té fè’y pè an chay. An nonm an konmin li ki té vlé ni an wilasyon épi’y té ka kwiyé’y èk tèks li touléjou. Alò Vanessa di nonm-lan fwanchman i pa antéwésé adan’y. Mé nonm-lan lévé faché èk i jis mennasé sè-a. Sè-a di, “mwen té santi pè.” Alò kisa Vanessa té fè? Sè-a fè sa’y té pé pou pwotéjé kò’y. Èk yon ansyen édé’y pou kwiyé polis-la. Mé i osi katjilé asou mannyè Jéhova té pwotéjé sèvant li an tan pasé. Vanessa di: “Pwèmyé moun-lan mwen té katjilé asou sété pwofèt Dannyèl. Magwé Dannyèl té inosan yo jété’y adan an twou épi lyon ki té fen. Mé Jéhova fèmé djòl sé lyon-an. Alò, mwen mandé Jéhova pou fè nonm-lan kité mwen bat mizè mwen, èk pou wanjé pwoblenm-lan ban mwen. Sa sé paski la pa té ni anyen mwen té sa fè ankò. Èk apwé sa, mwen pa té pè ankò.”​—Dann. 6:12-22.

KATJILÉ ASOU SA JÉHOVA KA FÈ APWÉZAN

8. Kisa David té asiwé? (Sam 56:8)

⁸ Magwé lavi David té an danjé lè’y té an Gaf, i pa té fiksé asou sé bagay-la ki té ka fè’y pè. Pito, i désidé pou katjilé asou sa Jéhova té ka fè ba li a lè-a. Wi, David té sa wè sé Jéhova ki té ka djidé’y èk ka pwotéjé’y. Èvèk i té sav Jéhova té ka konpwann santiman’y. (Li Sam 56:8.) Osi David té ni bon jan, tèl kon Jonatann èk Chèf Pwèt Ahimalèk, ki té enkouwajé’y èk édé’y. (1 Sm 20:41, 42; 21:6, 8, 9) Èk magwé Wa Sòl té vlé tjwé’y, David chapé. Wi, David té asiwé Jéhova té ka wè tout sa ki té ka wivé’y èk mannyè i té ka santi.

9. Lè nou ka èspéyansé difikilté, kisa nou toujou ni pou chonjé?

⁹ Alò, lè’w ka èspéyansé difikilté ki ka fè’w pè, toujou chonjé Jéhova ka wè sa’w ka èspéyansé èk mannyè sa’w ka èspéyansé-a ka fè’w santi. Pou ègzanp, padan jan Izwayèl té an péyi Éjip, Jéhova té ka wè pa sèlman mannyè yo té ka maltwété pèp li, mé osi i té ‘konnèt penn yo èk soufwans yo byen’. (Ègz. 3:7) David té chanté konsèné Jéhova èk i di: ‘Ou ja wè soufwans mwen, èk ou konnèt tout sa ki ka ban mwen an chay tèt cho.’ (Sam 31:7) Anfen, lè pèp Bondyé té ka soufè a kòz di mové disizyon yo menm té fè, ‘sa té fè [Jéhova] lapenn’. (Izay. 63:9) Alò, lè ou ka santi pè, Jéhova ka konpwann mannyè ou ka santi èk i pawé pou édé’w ganyen a bout sa ki ka fè’w pè.

10. Pouki ou asiwé Jéhova mélé épi’w èk i kay édé’w pou aji épi népòt difikilté ou èspéyansé?

¹⁰ Si’w ka èspéyansé difikilté ki ka fè’w santi pè, ou pitèt pa sa wè mannyè-a Jéhova ka édé’w. Mé kisa ou sa fè? Ében, ou sa mandé’y pou édé’w wè mannyè-a i ka sipòté’w. (2 Wa 6:15-17) Èk apwé konsidiwé sé kwèsyon sala: ‘Ès an diskou ében an wépons on moun bay an yon an sé mitin-lan té fòtifyé’w? Ès yonn an sé piblikasyon nou-an, an vidiyo, ében yonn an sé chanson spésyal-la ja enkouwajé’w? Ès on moun ja patajé an lévanjil épi’w, ében di’w kéchòy ki konsolé’w?’ Wi, i ézé pou nou obliyé sé fwè èk sè nou-an enmen nou an chay, èk mannyè enkouwajman-an nou wisivwè hòd Pawòl Bondyé ja édé nou. Mé tout sa sé bon kado Jéhova ka ban nou. (Izay. 65:13; Mak 10:29, 30) Èk i ka moutwé Jéhova mélé épi’w. (Izay. 49:14-16) Alò, tout sa ka bay pwèv ki ou sipozé mété konfyans ou an Jéhova.

11. Kisa ki té édé sè Aida pou ganyen a bout pèwèz li?

¹¹ Aida, sé an sè ki ka viv an péyi Senegal, èk i té òbzòvé mannyè Jéhova té sipòté’y lè’y té ka èspéyansé an pwoblenm. Aida sé pli gwan ich-la, èk pawan’w té kwè i té kay fè asé lajan pou otjipé yo épi kò’y. Mé lè Adia fè lavi’y pli senp pou’y sa piyonnè, i pa té ni djè lajan. Konsa fanmi’y té faché épi’y èk yo té ka kwititjé’y. Sè Aida di: “Mwen té pè mwen pa té kay sa otjipé pawan mwen, èk tout moun té kay widjèkté mwen. Mwen jik blanmé Jéhova, paski i kité bagay vini otan mové.” Alò, kisa ki té édé sè Aida pou ganyen a bout pèwèz li? Ében, i té tann an diskou an yonn an sé mitin-lan. Sè-a di: “Fwè-a ki bay diskou-a fè nou chonjé, Jéhova konnèt sé bagay-la ki ka fè nou santi pè ében antjèt. Èvèk piti an piti konsèy sé ansyen-an èk lòt moun té ban mwen, fè mwen wéyalizé Jéhova vwéman enmen mwen. Èk lè mwen té pwédyé ba Jéhova, mwen koumansé ni pli konfyans i té kay édé mwen. Osi mwen té santi an chay lapé lè mwen wè Jéhova wéponn lapwiyè mwen.” Wi, apwé an tan, Aida jwenn an twavay ki té ka ba li asé lajan pou’y kontiné piyonnè, édé pawan’y, èk édé lézòt. Aida di: “Mwen apwann pou mété konfyans mwen an Jéhova épi tout tjè mwen. Apwézan, apwé mwen pwédyé, népòt lapèwèz mwen pé ni ka annèk dispawèt.”

KATJILÉ ASOU SA JÉHOVA KAY FÈ AN TAN POU VINI

12. Silon Sam 56:9, ki konfyans David té ni?

¹² Li Sam 56:9. Vèwsé sala ka fè nou konnèt an lòt bagay ki té édé David lè i té ka santi pè. Anfen, menm si lavi’y té an danjé toujou, David té ka mèdité asou sa Jéhova té kay fè ba li an tan pou vini. Wi, David té sav Jéhova té kay délivwé’y a lè-a ki bon. Chonjé, apwé Jéhova té widjèkté Wa Sòl, i di sé David ki té kay vini lòt wa-a an Izwayèl. (1 Sm 16:1, 13) Konsa, David té ni konfyans-lan ki, tout sa Jéhova té pwonmèt pou fè ba li i té kay fè’y.

13. Kisa nou sa asiwé Jéhova kay fè?

¹³ Alò, kisa Jéhova pwonmèt pou fè ba ou? Bon, nou pa sipozé èspéyé Jéhova kay pwotéjé nou hòd tout pwoblenm nou. c Mé chonjé, népòt difikilté nou ni an latè sala, Jéhova kay tiwé yo tout an latè nèf-la ki ka vini-an. (Izay. 25:7-9) An plis di sa, Kwéyatè nou Jéhova ni an chay pouvwa, alò nou sa ni asiwans-lan ki, i kay wésisité lé mò, djéwi tout maladi, tiwé tout bagay ki ka annékòz lapenn, èk détwi tout lèlmi nou.​—1 Jan 4:4.

14. Kisa nou sa mèdité asou?

¹⁴ Lè nou ka santi pè, mèdité asou sa Jéhova kay fè an tan ki ka vini. Anfen, katjilé asou mannyè ou kay santi lè Satan èk mové moun pa kay la ankò. Èvèk lè sé sèlman bon moun ki kay la, èk lè nou chak kay vini pawfé. Alò pou édé nou mèdité asou èspwa nou, ann’ konsidiwé yon pa asou pwogwanm konvansyon-an pou lanné 2014. Yon papa té ka diskité 2 Timòfi 3:1-5 épi fanmi’y. I di si sé vèwsé sala té ka dékwi lavi an Pawadi-a, mi sé sa nou té kay li an sé vèwsé sala: “An latè nèf-la sé djèwté tousèl nou kay èspéyansé, moun enmen lézòt an chay, yo enmen lavéwité-a, yo konnèt limit yo, yo ka abésé ko yo, yo ka glowifyé Bondyé, yo ka kouté manman yo èk papa yo, yo ka apwésyé sa lézòt fè ba yo, yo fidèl, yo ni an chay natiwèl bay fanmi yo, yo ka pawdonnen lézòt, yo ka palé bon bagay konsèné lézòt, yo ka konpòté ko yo byen, yo dous, yo ni wèspé pou sa ki bon, yo pa twèt, yo ka abésé ko yo, yo enmen Bondyé pasé yo enmen plézi latè-a, mannyè yo ka viv ka moutwé sé Bondyé ki ka kondwi lavi yo, èk wèsté pwé sé moun sala.” Bon, ès ou ka palé épi fanmi’w èk sé fwè-a èk sè-a konsèné mannyè lavi kay yé an latè nèf-la?

15. Magwé Tanja té santi pè, kisa ki édé’y pou ganyen a bout pèwèz li?

¹⁵ Annou konsidiwé èspéyans Tanja, yon sè ki ka viv an North Macedonia. Pawan Tanja té ka opozé’y lè’y koumansé étidyé Bib-la, èk sa té ka fè’y pè an chay. Alò, kisa ki wédé’y pou ganyen a bout pèwèz li? Ében, Tanja mèdité asou sa Jéhova kay fè an tan pou vini, èk sa wédé’y pou tjenn fidèlité’y èk ganyen a bout pèwèz li. Tanja di: “Adan sé bagay-la mwen té pè ki té kay wivé mwen té fèt pou vwé. Pou ègzanp, apwé chak mitin manman mwen té ka bat mwen. Osi, pawan mwen jis di yo té kay tjwé mwen si mwen vini on Témwen Jéhova.” Finalman, yo fosé Tanja pou kité kay yo. Alò, ki mannyè Tanja débat épi sitiwasyon’y? Ében, Tanja di: “Mwen mèdité asou lajwa-a mwen kay èspéyansé pou létèwnité paski mwen wèsté fidèl pou Jéhova. Mwen osi katjilé asou mannyè Jéhova kay péyé mwen déviwé pou tout sa mwen pèd an latè sala, èk mannyè mwen pa kay menm chonjé sé mové bagay-la ki wivé mwen.” Wi, Tanja wèsté fidèl pou Jéhova, èk épi èd Jéhova i twapé an plas pou wèsté. Èk jòdi, Tanja mayé on fwè ki fidèl pou Jéhova menm kon li, èk yo ni an chay lakontantman kon yo ka wann sèvis an plen ansanm.

FÒTIYÉ KONFYANS OU AN JÉHOVA APWÉZAN

16. Kisa ki kay édé nou pou pa vini pè lè nou wè sé bagay-la an Louk 21:26-28 ka fèt vwé?

¹⁶ Diwan gwan twibilasyon-an pwèskè tout moun kay vini “tèlman pè yo kay kon yon fèy ki fennen”. Mé pèp Jéhova pa kay pè èk yo kay wèsté fò. (Li Louk 21:26-28.) Alò, pouki nou pa kay pè? Ében, sa sé paski nou ja apwann mannyè pou mété konfyans nou an Jéhova. Tanja nou té palé konsèné pli bonnè-a di, sé bagay-la i ja èspéyansé ka édé’y aji épi sitiwasyon ki difisil. I di: “Jéhova sa édé nou tjébé fò anba népòt sitiwasyon, èk benni nou. Délè i ka sanm lézòt moun ka kontwolé bagay, mé Jéhova otan pli fò pasé yo. Èk magwé on sitiwasyon pitèt wèd pou nou aji épi, i kay doubout.”

17. Ki mannyè lévanjil-la pou lanné 2024 sa édé nou? (Gadé pòtwé-a ki asou kouvèti-a.)

¹⁷ Jòdi jou, la ni an chay bagay ki sa fè nou santi pè. Mé menm kon David, nou sa anpéché pèwèz kontwolé lavi nou. Lévanjil nou pou lanné 2024, sé lapwiyè David pou Jéhova koté i di: ‘Népòt lè mwen pè, sé an ou mwen ka mété konfyans mwen.’ (Sam 56:3) Noté sa yon moun ki ka étidyé manniskwit Bib di konsèné vèwsé sala. I di: “David pa té ka katjilé konsèné sé bagay-la ki té ka fè’y pè, ében konsèné pwoblenm li. Pito sa, i té ka dépan asou Moun-lan ki té kay sové’y-la.” Konsa, diwan sé mwa-a ki ka vini-a katjilé asou lévanjil-la pou lanné-a, sitou lè’w ka aji épi sitiwasyon ki ka fè’w pè. Osi, pwan tan pou mèdité asou sa Jéhova ja fè an tan pasé, sa’y ka fè apwézan, épi sa’y kay fè an tan pou vini. Wi si’w fè sé bagay sala, menm kon David ou osi kay di: ‘Mwen ka mété konfyans mwen an Bondyé. Mwen pa kay pè.’​—Sam 56:4.