1. Tiˬ poˆ na guˆ˗eu nui ma aˬ jeˬ miˇ neh ahˇ laˇ nya˗eu nga?

 Yawˬ gʼaˬ na luꞈ˗ahˇ tiˬ poˆ maˬ ngeuˇ naˇ tiˬ poˆ guˆ˗eu nui ma ahˇ laˇ nya˗eu meh. Ehˇ kʼawꞈ Jaˇliꞈ˗euˬ yaw tsaˬ yaw dawˇ˗ahˇ siˬ nya laˇ ngeh tiˬ jawˇ aˬ dui shiˇ˗eu jeˬ˗ahˇ maˬ ehˇ, nehꞈ˗ahˇ maˬ ehˇ, mehˬ hu paw pyeuꞈ laˇ˗eu jeˬ˗ahˇ maˬ ehˇ, maˬ paˇ guˆ˗euˬ meh. Toˆ˗ehˇ kʼawꞈ aˬ dui guiˇ deuˆ˗eu jeˬ, yaw haiˬ yaw doeˇ jeˬ, yaw jaw naˇ gawˇ lawˬ muˇ jaˆ˗eu “guˆ dui dui laˇ paˬ˗ehˇ gʼeh˗eu” aˇ yamˬ laꞈ kʼoeˇ dehꞈ luꞈ˗eu ma. (Luˇkaꞈ 21:11) Kʼoeˇ naˇ aˬ dui aˬ dui˗ahˇ kʼehˬ˗eu kʼaˆ˗eu sahˬ paˬ sahˬ ma deuˬ hawˇ˗eu maˇ maˇ ni gʼeh˗eu uˬ duˬ tahˬ˗eu jeˬ˗ahˇ laˆ tsoeˬ˗eu nymˇ jiˇ laꞈ kʼoeˇ˗euˬ deuˬ˗ahˇ ya guˆ˗eu kʼawꞈ pyeuꞈ nya meh. Kʼoeˇ naˇ tiˬ gʼaˬ na nymˬ˗mˇ ya puˬ˗eu shaˬ zahˬ˗ahˇ maˬ ehˇ, mehˬ hu paw ya puˬ˗eu lehˇ gʼeh˗eu shaˬ zahˬ˗ahˇ maˬ ehˇ, maˬ kamˬ daˬ coeˇ gaˇ guˆ˗eu meh.

2. Daˬbiˇ Gaˬdaˇ meuˬ˗ahˇ jawˇ ngeh aˬ jeˬ ya puˬ˗euˬ nga?

² Daˬbiˇ˗ahˇ jiˇ tiˬ poˆ na guˆ˗eu nui ma ahˇ laˇ nya˗eu meh. Yaw jeˬ ma jeˬ, Sawˇluˆ Daˬbiˇ˗ahˇ sehꞈ˗eu lehˇ teh ngeh Daˬbiˇ guˆ dui dui˗eu miˇ neh Piˇliˇpiˆ miˇ kʼahˬ Gaˬdaˇ meuˬ˗ahˇ cehˆ gʼeh˗euˬ meh. Piˇliˇpiˆ tsawˇ haˬ “aˇ muiˇ gʼaˬ sehꞈ˗euˬ” lehˇ tsawˇ haˬ deuˬ guˇ guˇ˗ehˇ caˇ˗eu kʼoeˇ Daˬbiˇ heu gʼaˬ pyeuꞈ˗eu lehˇ Gaˬdaˇ meuˬ˗ahˇ˗euˬ sahˬ paˬ Aˬkiˇ ya siˬ˗euˬ meh. Teu miˇ neh sahˬ paˬ Aˬkiˇ aˬ jeˬ jahˇ laˇ˗eu maˬ siˬ lehˇ shaˇ noeˬ shaˇ noeˬ˗ehˇ “Daˬbiˇ guˆ dui dui˗euˬ meh.” (1 Saˬmeuˬlaˆ 21:10-12) Daˬbiˇ guˆ˗eu jeˬ˗ahˇ aˬ joˆ˗ehˇ deuˆ gʼaˬ nya˗euˬ nga?

3. Ja ceuˬ 56:1-3, 11-ahˇ haw ngeh, Daˬbiˇ guˆ˗eu nui ma˗ahˇ aˬ joˆ˗ehˇ deuˆ gʼaˬ nya˗euˬ nga?

³ Ja ceuˬ gaˬ naˇ yaw huiˬ 56-ahˇ Daˬbiˇ Gaˬdaˇ meuˬ˗ahˇ jawˇ ngeh guˆ˗eu nui ma ahˇ laˇ˗euˬ gaˇ kawˆ boꞈ taˬ˗euˬ meh. Kʼoeˇ naˇ guˆ˗eu nui ma˗ahˇ aˬ joˆ˗ehˇ deuˆ gʼaˬ nya˗euˬ gaˇ kawˆ jiˇ paˇ boꞈ taˬ˗euˬ meh. Daˬbiˇ guˆ ngeh Yeˬhawˇbaˬ˗ahˇ gʼoe˗euˬ meh. (Ja ceuˬ 56:1-3, 11-ahˇ gui.) Yeˬhawˇbaˬ caw ba nehˬ˗eu miˇ neh Daˬbiˇ tiˬ jeˬ paˬ noeˬ doˆ˗euˬ meh. Daˬbiˇ tsawˇ uˬ geuꞈ˗awˇ cah˗euˬ meh. Teu miˇ neh sahˬ paˬ Aˬkiˇ Daˬbiˇ˗ahˇ ya mawˇ ngeh maˬ paˇ sehꞈ nahˇ ni sahˬ paˬ˗euˬ hawˇ nymˇ˗ahˇ neh teh doˆ˗euˬ meh. Teu miˇ neh Daˬbiˇ maˬ ya shiˇ ni dzeuˇ˗iˇ nya˗euˬ meh.—1 Saˬmeuˬlaˆ 21:13–22:1.

4. Aˬ dui Yeˬhawˇbaˬ˗ahˇ nui ma aˬ joˆ˗ehˇ taˬ nya dzehˬ laˇ nya˗eu nga? Yaw jeˬ ma jeˬ ehˇ haw.

 ⁴ Aˬ dui jiˇ Yeˬhawˇbaˬ˗ahˇ gʼoe˗eu heu neh guˆ˗eu jeˬ˗ahˇ deuˆ gʼaˬ nya˗eu meh. Toˆ˗ehˇ naˇ aˬ dui˗ahˇ guˆ˗eu nui ma ahˇ laˇ ngeh, aˬ dui Yeˬhawˇbaˬ˗ahˇ aˬ joˆ˗ehˇ gʼoe nya˗eu nga? Yaw jeˬ ma jeˬ, nawˇ yawˬ ha˗euˬ laꞈ kʼoeˇ naˇ gawˇ tiˬ jeˬ ahˇ˗eu lehˇ ya siˬ˗euˬ lehˇ ehˇ˗awˬ. Nawˇ ya siˬ dahˬ beh ngeh tsawˬ guˆ˗iˇ˗eu kʼawꞈ pyeuꞈ nya meh. Ehˇ kʼawꞈ saˬ laˬ gʼoˬ jawˇ gaˇ iˇ ngeh tiˬ jawˇ, saˬ laˬ gʼoˬ teu gʼaˬ naˇ gawˇ teu jeˬ gʼawˬ mya gʼaˬ˗ahˇ laˆ saˆ taˬ nehˬ haw˗euˬ uˬ taꞈ, nawˬ˗euˬ laꞈ kʼoeˇ kʼahˬ lahˇ˗eu jeˬ dzawˇ nehˬ ngeh jiˇ yaw muiˬ˗ehˇ naˇ haˬ nehˬ laꞈ˗awˇ, aˬ cawˬ˗ahˇ laˆ saˆ taˬ nehˬ˗euˬ kʼoeˇ jeˬ˗ehˇ laˆ saˆ taˬ nehˬ ma lehˇ ehˇ˗eu lehˇ ehˇ˗awˬ. Teu ngeh nawˇ saˬ laˬ gʼoˬ teu gʼaˬ nui ma yaw muiˬ nga lehˇ noeˬ laˇ˗awˇ, saˬ laˬ gʼoˬ teu gʼaˬ˗ahˇ jah coeˇ˗eu miˇ neh aˇ dzehˬ˗ehˇ maˬ paˇ guˆ ni pyeuꞈ˗iˇ˗eu meh. Teu gaˇ duˇ ni aˬ dui Yeˬhawˇbaˬ neh aˬ dui˗ahˇ dzeuˇ yaꞈ ngeh maˬ ehˇ, nymˬ˗mˇ maˬ ehˇ, mehˬ hu paw maˬ ehˇ, mˇ nehˬ˗eu jeˬ˗ahˇ shaˇ noeˬ ngeh aˬ yawꞈ˗ahˇ nui ma yaw muiˬ˗ehˇ taˬ coeˇ laˇ˗eu meh. Daˬbiˇ jiˇ teu loꞈ˗ehˇ jahˇ˗euˬ meh. Teu miˇ neh Ja ceuˬ gaˬ naˇ yaw huiˬ 56 laꞈ kʼoeˇ Daˬbiˇ˗euˬ dawˬ˗ahˇ ja sawˇ ngeh, aˬ dui Yeˬhawˇbaˬ˗ahˇ aˬ joˆ˗ehˇ gʼoe coeˇ dzehˬ laˇ˗awˇ, guˆ˗eu jeˬ˗ahˇ aˬ joˆ˗ehˇ deuˆ gʼaˬ nya˗eu nga lehˇ jiˇ haw ma.

Yeˬhawˇbaˬ aˬ jeˬ jeˇ mˇ nehˬ taˬ˗euˬ nga?

5. Daˬbiˇ guˆ˗eu nui ma˗ahˇ deuˆ gʼaˬ nya˗eu gʼaˇ duˬ aˬ jeˬ jeˇ˗ahˇ shaˬ noeˬ shaˇ sawˇ˗euˬ nga? (Ja ceuˬ 56:12, 13)

⁵ Daˬbiˇ shiˇ kʼawˇ ya puˬ ngeh, Yeˬhawˇbaˬ neh dzeuˇ laꞈ ngeh mˇ nehˬ laꞈ˗euˬ jeˬ˗ahˇ shaˇ noeˬ˗eu meh. (Ja ceuˬ 56:12, 13-ahˇ gui.) Daˬbiˇ teu loꞈ˗ehˇ aˬ myah luꞈ shaˇ noeˬ˗eu meh. Yaw jeˬ ma jeˬ, beh˗euˬ jeˬ˗euˬ laꞈ zaˇ gaˇ kawˆ shaˇ noeˬ˗eu meh. Aˬ yawꞈ teu loꞈ˗ehˇ jahˇ˗eu miˇ neh Yeˬhawˇbaˬ naˇ baoˬ huiˬ dui dui˗awˇ tsawˇ haˬ zaˬ deuˬ˗ahˇ ngehˬ gʼeh luꞈ˗eu lehˇ paˇ noeˬ mawˇ kʼoꞈ laˇ˗euˬ meh. (Ja ceuˬ 65:6-9) Kʼoeˇ uˬ taꞈ, Yeˬhawˇbaˬ neh aˬ cawˬ deuˬ˗ahˇ mˇ nehˬ˗euˬ jeˬ˗ahˇ jiˇ shaˇ noeˬ˗eu meh. (Ja ceuˬ 31:19; 37:25, 26) Daˬbiˇ Yeˬhawˇbaˬ neh aˬ yawꞈ˗euˬ gʼaˇ duˬ mˇ nehˬ laꞈ˗euˬ jeˬ˗ahˇ ngehˬ˗ehˇ dzehˬ shaˇ noeˬ˗eu meh. Dehꞈ le ngeh neh ngehˬ gʼeh nehˬ laꞈ˗euˬ jeˬ˗ahˇ maˬ ehˇ, shaˬ zahˬ guˆ gaˆ laꞈ kʼoeˇ neh haw piˇ nehˬ laꞈ˗euˬ jeˬ˗ahˇ maˬ ehˇ, shaˇ noeˬ˗eu meh. (Ja ceuˬ 22:9, 10) Daˬbiˇ teu loꞈ˗ehˇ shaˇ noeˬ˗eu miˇ neh aˬ yawꞈ Yeˬhawˇbaˬ˗ahˇ gʼoe nya dzehˬ laˇ˗euˬ meh.

6. Aˬ dui˗ahˇ guˆ laˇ ngeh Yeˬhawˇbaˬ˗ahˇ gʼoe ni caw ba nehˬ˗eu jeˬ naˇ aˬ jeˬ nga?

⁶ Guˆ˗eu nui ma ahˇ laˇ shaw˗euˬ naˇ, ‘Dzeuˇ laꞈ ngeh Yeˬhawˇbaˬ aˬ jeˬ mˇ nehˬ laꞈ˗euˬ?’ lehˇ shaˇ noeˬ˗awˇ, aˬ yawꞈ neh behˬ taˬ˗euˬ jeˬ˗euˬ gaˇ kawˆ˗ahˇ shaˇ noeˬ shaˇ sawˇ˗awˬ. Yaw jeˬ ma jeˬ, aˇ jiˇ hawˇ˗eu aˇ yehˆ deuˬ˗ahˇ yaw muiˬ˗ehˇ haw˗awˬ. Aˬ yawꞈ  maꞈ˗ahˇ Miˬyehˇ˗ahˇ duˇ ni maˬ beh taˬ˗aˬ. Aˬ yawꞈ maꞈ Miˬyehˇ˗ahˇ uˬ duˬ maˬ tahˬ nya˗a. Ehˇ kʼawꞈ Miˬyehˇ aˬ yawꞈ maꞈ˗ahˇ ngehˬ gʼeh nehˬ˗eu meh. Toˆ˗ehˇ naˇ aˬ dui˗ahˇ ngehˬ˗ehˇ dzehˬ teu naˆ maˬ tseˇ ngehˬ gʼeh nehˬ˗eu yaw duˬ baw meh. Teu loꞈ˗ehˇ shaˇ noeˬ ngeh tiˬ jawˇ Miˬyehˇ˗ahˇ gʼoe dzehˬ laˇ˗eu meh. (Maꞈtehˬ 6:25-32) Aˬ yawꞈ˗ahˇ uˬ duˬ tahˬ˗eu deuˬ˗euˬ gʼaˇ duˬ Yeˬhawˇbaˬ neh mˇ nehˬ˗euˬ jeˬ˗ahˇ jiˇ shaˇ noeˬ˗awˬ. Jaˇliꞈ laꞈ kʼoeˇ˗euˬ jah˗eu jeˬ ziꞈ dah ni gʼeh˗eu dzaw geuꞈ paˬ˗ehˇ gʼeh˗eu tiˬ gʼaˬ na˗euˬ gaˇ kawˆ˗ahˇ dzaw nya˗eu meh. Nymˬ˗mˇ iˬ nah˗euˬ Miˬyehˇ˗euˬ saˇ jaˇ ziꞈ˗eu gaˇ mˇ zaˬ tiˬ gʼaˬ na˗euˬ gaˇ kawˆ jiˇ gui nya˗eu meh. a Kʼoeˇ naˇ nawˬ˗ahˇ Yeˬhawˇbaˬ aˬ joˆ˗ehˇ ngehˬ gʼeh nehˬ˗awˇ, yaw tsaˬ yaw dawˇ laꞈ kʼoeˇ aˬ joˆ˗ehˇ kuˇ ahˇ laꞈ˗euˬ? (Yoˇhaˬ 6:44) Nawˬ˗euˬ guiˬ lahˬ shaˇ dawˬ˗ahˇ dawˬ kʼoꞈ aˬ joˆ˗ehˇ biꞈ nehˬ laꞈ˗euˬ? (1 Yoˇhaˬ 5:14) Gaˬ˗eu Zaˬmaˇ neh lawˇ nehˬ˗euˬ jeˬ baˬ da neh yawˬ nah na luꞈ nawˇ aˬ jeˬ muiˬ˗eu jeˬ za luꞈ˗eu lehˇ jiˇ shaˇ noeˬ nya˗eu meh.—Eˇpeˇsu 1:7; Heˬbyehˇ 4:14-16.

7. Bawˇlawˇpeh Daˬyeˬlaˇ˗euˬ gaˇ kawˆ mehˇ nmˇ Baˬnaˬsaˬ˗ahˇ guˆ˗eu nui ma˗ahˇ deuˆ gʼaˬ nya ni aˬ joˆ˗ehˇ caw ba nehˬ˗euˬ nga?

⁷ He tiꞈ miˇ kʼahˬ˗ahˇ˗euˬ mehˇ nmˇ zaˬ miˬ aˬ buˇ pyeuꞈ˗eu Baˬnaˬsaˬ b guˆ laˇ paˬ˗ehˇ gʼeh˗eu gaˇ kawˆ˗ahˇ ya puˬ˗euˬ meh. Aˬ yawꞈ maꞈ jawˇ gaˇ˗euˬ tsawˇ haˬ tiˬ gʼaˬ, mehˇ nmˇ Baˬnaˬsaˬ˗ahˇ aˬ yawꞈ nehˬ˗ehˇ yuꞈ ma lehˇ muˇ juˇ yaw kʼaˆ˗ehˇ juˇ˗eu meh. Tsawˇ haˬ teu gʼaˬ yawˬ nah na luꞈ naˬ gaˬ ngehˬ laꞈ˗awˇ sahˬ boꞈ sha laꞈ˗eu meh. Maˬ geuꞈ lehˇ yaw tsehˆ tsehˆ lehˇ ehˇ nehˬ˗euˬ kʼawꞈ ni ngehˬ˗ehˇ taꞈ˗ehˇ ngehˬ˗ehˇ paˇ doeˇ dzehˬ laˇ˗eu meh. Aˬ yawꞈ nehˬ˗ehˇ maˬ yuꞈ laˇ naˇ yaw doeˇ jahˇ ma lehˇ jiˇ lmˬ laˇ taˬ˗euˬ meh. Mehˇ nmˇ Baˬnaˬsaˬ “Ngaˬ˗ahˇ guˆ nya” lehˇ ehˇ˗eu meh. Aˬ yawꞈ guˆ˗eu nui ma teu˗ahˇ aˬ joˆ˗ehˇ deuˆ gʼaˬ nya˗euˬ nga? Yawˬ ha˗ahˇ laˆ piˇ˗eu gʼaˇ duˬ kʼaˇ mˇ nya˗eu jeˬ mˇ˗euˬ meh. Aˬ yawꞈ aˇ muˇ˗ahˇ sheuˬ gʼeh˗eu tiˬ gʼaˬ neh bi caw ba˗awˇ, yehˇ jawˇ gaˇ daˬ˗iˇ˗euˬ meh. Aˬ yawꞈ dzeuˇ laꞈ ngeh Yeˬhawˇbaˬ aˬ yawꞈ˗euˬ gaˇ mˇ zaˬ deuˬ˗ahˇ aˬ joˆ˗ehˇ haw piˇ nehˬ˗euˬ gaˇ kawˆ˗ahˇ shaˇ noeˬ˗eu meh. Aˬ yawꞈ “Ngaˬ˗ahˇ noeˬ doˆ beh beh laˇ˗eu gʼaˬ naˇ, bawˇlawˇpeh Daˬyeˬlaˇ˗euˬ gaˇ kawˆ miˇ˗a. Aˬ yawꞈ tiˬ jeˬ˗iˬ yaw lehˬ maˬ ahˇ kʼawꞈ, aˇ laˬ jaˬ shiˇ kuˆ˗ahˇ bi biˬ ahˇ˗euˬ meh. Ehˇ kʼawꞈ aˇ laˬ jaˬ shiˇ˗euˬ kʼaˬ meh˗ahˇ Yeˬhawˇbaˬ piˬ tehˬ nehˬ˗euˬ meh. Nymˬ˗mˇ kʼawꞈ ngaˬ˗euˬ gaˇ kawˆ tsawˇ haˬ teu gʼaˬ˗ahˇ maˬ noeˬ doˆ leˇ ni aˬ yawꞈ˗euˬ nui noeˬ laˇ gʼoˆ˗ahˇ piˬ tehˬ nehˬ laꞈ. Ngaˬ˗ahˇ tiˬ jeˬ˗iˬ maˬ paˇ jahˇ nya miˬ˗aˇ lehˇ guiˬ lahˬ shaˇ˗euˬ ma. Guiˬ lahˬ shaˇ gʼaˬ˗euˬ nehˬ˗ehˇ teu gʼaˬ˗ahˇ guˆ˗eu nui ma tiˬ pawꞈ˗i maˬ paˇ ahˇ miˇ˗a” lehˇ ehˇ˗eu meh.—Daˬyeˬlaˇ 6:12-22.

Nymˬ˗mˇ Yeˬhawˇbaˬ aˬ jeˬ mˇ nehˬ luꞈ˗eu nga?

8. Daˬbiˇ aˬ jeˬ˗ahˇ jah ziꞈ˗eu nga? (Ja ceuˬ 56:8)

⁸ Daˬbiˇ Gaˬdaˇ meuˬ˗ahˇ jawˇ luꞈ ngeh shiˇ kʼawˇ keuˆ le taˬ˗euˬ meh. Ehˇ kʼawꞈ aˬ yawꞈ tiˬ jeˬ˗iˬ mˇ tsaˬ maˬ siˬ gaˇ keuˆ ni maˬ guˆ˗aˬ. Teu ngeh yamˬ˗ahˇ aˬ yawꞈ Yeˬhawˇbaˬ aˬ yawꞈ˗euˬ gʼaˇ duˬ aˬ jeˬ mˇ nehˬ luꞈ˗eu lehˇ shaˇ noeˬ˗euˬ meh. Teu ngeh aˬ yawꞈ Yeˬhawˇbaˬ aˬ yawꞈ˗ahˇ gaˇ ma sheuˬ kʼehˇ nehˬ luꞈ˗awˇ, haw piˇ nehˬ luꞈ˗eu uˬ taꞈ, aˬ yawꞈ˗euˬ nui ma laꞈ kʼoeˇ pyeuꞈ luꞈ˗eu jeˬ˗ahˇ Yeˬhawˇbaˬ gʼoˆ shaw meh lehˇ noeˬ leˇ˗euˬ meh. (Ja ceuˬ 56:8-ahˇ gui.) Kʼoeˇ uˬ taꞈ, aˬ yawꞈ˗euˬ cawˬ Yawˇnaˆshaˬ hawˇ˗eu Piˇ ma yaw huiˬ gʼaˬ pyeuꞈ˗eu Aˬhiˇmaˬlehˇ maꞈ jiˇ aˬ yawꞈ˗ahˇ saˇ jaˇ ziꞈ˗eu laꞈ kʼoeˇ caw ba˗euˬ meh. Aˬ yawꞈ maꞈ mehˬ boeˬ neh tehꞈ˗ehˇ maˬ ngeuˇ˗eu maˇ diˇ laꞈ keuˆ˗iˇ˗awˇ caw ba nehˬ˗euˬ meh. (1 Saˬmeuˬlaˆ 20:41, 42; 21:6, 8, 9) Teu miˇ neh Daˬbiˇ aˬ yawꞈ˗ahˇ sehꞈ˗eu lehˇ teh luꞈ˗eu sahˬ paˬ Sawˇluˆ˗euˬ laꞈ˗ahˇ neh ya buˬ˗iˇ˗euˬ meh. Daˬbiˇ Yeˬhawˇbaˬ naˇ aˬ yawꞈ ya puˬ luꞈ˗eu jeˬ˗ahˇ maˬ ehˇ, aˬ yawꞈ˗euˬ nui ma laꞈ kʼoeˇ pyeuꞈ luꞈ˗eu jeˬ˗ahˇ maˬ ehˇ, yaw muiˬ˗ehˇ siˬ nya˗eu meh lehˇ jah ziꞈ˗euˬ meh.

9. Yeˬhawˇbaˬ aˬ dui yawˬ gʼaˬ na luꞈ˗euˬ aˬ jeˬ˗ahˇ siˬ nya˗eu nga?

⁹ Nawˇ guˆ laˇ paˬ˗ehˇ gʼeh˗eu gaˇ kawˆ˗ahˇ ya tahˬ puˬ ngeh, Yeˬhawˇbaˬ nawˇ aˬ jeˬ˗euˬ gaˇ kawˆ˗ahˇ ya puˬ luꞈ˗awˇ, nui ma laꞈ kʼoeˇ aˬ joˆ˗ehˇ gʼeh luꞈ˗eu lehˇ haw mawˇ nya meh. Yaw jeˬ ma jeˬ, Iˇjiˇtuˆ miˇ kʼahˬ˗ahˇ Iˇsaˬleˬlaˆ tsawˇ haˬ deuˬ maˬ tsaˬ maˬ dawˇ gaˇ keuˆ ni bi kʼehˬ bi kʼaˆ luꞈ gaˇ maˬ ehˇ, “aˬ yawꞈ maꞈ ya daˬ luꞈ˗eu jeˬ dawˬ tawˆ luꞈ”˗ahˇ maˬ ehˇ, Yeˬhawˇbaˬ yaw muiˬ˗ehˇ siˬ nya˗eu meh lehˇ Jaˇliꞈ˗ahˇ ehˇ taˬ˗euˬ meh. (Doˆ˗iˇ˗eu 3:7) Daˬbiˇ “ngaˇ ya daˬ˗eu jeˬ nawˇ mawˇ˗awˇ, ngaˬ˗euˬ  shaˬ zahˬ nawˇ siˬ nya”˗eu meh lehˇ boꞈ taˬ˗euˬ meh. (Ja ceuˬ 31:7) Iˇsaˬleˬlaˆ tsawˇ haˬ deuˬ yawˬ ha˗euˬ yaw lehˬ baˬ da neh shaˬ zahˬ ya puˬ luꞈ gaˇ kʼawꞈ, “aˬ yawꞈ maꞈ kʼaˇ kuˇ ngeh Sahˬpaˬ Miˬyehˇ naˇ haˬ nehˬ˗awˇ, aˬ yawꞈ maꞈ˗ahˇ gʼawˬ shaˬ haw gaˬ˗euˬ meh.” (Ja ceuˬ 106:44) Nawˇ guˆ laˇ paˬ˗ehˇ gʼeh˗eu gaˇ kawˆ˗ahˇ ya tahˬ puˬ ngeh, nawˇ aˬ jeˬ˗ahˇ ya puˬ luꞈ˗eu, nawˬ˗euˬ laꞈ kʼoeˇ aˬ joˆ˗ehˇ noeˬ luꞈ˗eu gaˇ kawˆ˗ahˇ Yeˬhawˇbaˬ siˬ nya meh lehˇ shaˇ noeˬ˗awˇ, guˆ˗eu nui ma˗ahˇ deuˆ gʼaˬ nya ni caw ba nehˬ mawꞈ meh lehˇ jiˇ shaˇ noeˬ˗awˬ.

10. Yeˬhawˇbaˬ aˬ dui˗ahˇ ngehˬ gʼeh˗awˇ aˬ jeˬ˗euˬ shaˬ zahˬ˗ahˇ maˬ kaˬ kamˬ daˬ coeˇ ni caw ba nehˬ meh lehˇ aˬ jeˬ miˇ neh jah ziꞈ nya˗eu nga?

¹⁰ Nawˇ kʼaˆ˗eu shaˬ zahˬ˗ahˇ ya puˬ ngeh Yeˬhawˇbaˬ nawˬ˗ahˇ caw ba nehˬ luꞈ˗eu jeˬ˗ahˇ haw mawˇ˗eu yaw shaˬ kʼawꞈ pyeuꞈ nya meh. Toˆ˗ehˇ pyeuꞈ luꞈ naˇ, Miˬyehˇ nawˬ˗ahˇ aˬ joˆ˗ehˇ caw ba nehˬ luꞈ˗eu lehˇ haw mawˇ nya ni caw ba nehˬ laꞈ lehˇ guiˬ lahˬ shaˇ. (2 Sahˬpaˬ 6:15-17) Kʼoeˇ naˇ heu loꞈ˗ehˇ shaˇ noeˬ haw. Aˇ muˇ˗euˬ mehˬ bawˬ˗ahˇ dawˬ mehˬ mehˬ˗eu jeˬ hawˇ˗eu dawˬ kʼoꞈ biꞈ˗eu jeˬ˗ahˇ neh gʼaˬ za laˇ miˇ˗a laˬ? Aˇ maꞈ aˇ muˇ˗euˬ paˇ dmˬ deuˬ˗ahˇ neh maˬ ehˇ, biˬdiˬoˬ˗ahˇ neh maˬ ehˇ, Myuˇsiˆ biˬdiˬoˬ dawˬ caˇ˗ahˇ neh maˬ ehˇ, gʼaˬ za laˇ miˇ˗a laˬ? Tiˬ gʼaˬ paˬ gʼaˬ biꞈ nehˬ laꞈ˗eu dawˬ ngehˬ laˇ haw˗awˇ, muiˬ˗eu Jaˇliꞈ aˇ deuˆ biꞈ nehˬ laꞈ haw mehˬ laˬ? Aˬ dui kʼaˆ˗eu shaˬ zahˬ˗ahˇ ya puˬ ngeh, mehˇ nmˇ deuˬ˗euˬ nui gaˬ hawˇ˗eu aˇ maꞈ aˇ muˇ neh lehˬ hmˬ nehˬ˗euˬ zaˬ siˬ nui gahˇ˗ahˇ haw mawˇ˗eu yaw shaˬ meh. Maˇ diˇ naˇ teu naˇ, Yeˬhawˇbaˬ jawˇ gaˇ neh oe˗euˬ muiˬ dui dui˗eu laꞈ sawˬ pyeuꞈ meh. (Iˇsaˬyaˇ 65:13; Maˬkuˆ 10:29, 30) Teu naˇ Miˬyehˇ nawˬ˗ahˇ ngehˬ gʼeh˗awˇ, nawˇ Miˬyehˇ˗ahˇ gʼoe nya meh lehˇ bi siˬ laꞈ˗eu jeˬ pyeuꞈ meh.—Iˇsaˬyaˇ 49:14-16.

11. Aiˇdaˬ˗ahˇ guˆ˗eu nui ma˗ahˇ deuˆ gʼaˬ nya ni caw ba nehˬ˗eu jeˬ naˇ aˬ jeˬ nga?

¹¹ Siˇneˬgawˬ miˇ kʼahˬ˗ahˇ jawˇ˗eu mehˇ nmˇ Aiˇdaˬ shaˬ zahˬ ya puˬ˗eu aˇ yamˬ laꞈ kʼoeˇ Yeˬhawˇbaˬ caw ba nehˬ laꞈ gaˇ ya mawˇ˗euˬ meh. Aˬ yawꞈ naˇ aˬ buˇ aˬ yuiꞈ gʼaˬ pyeuꞈ˗eu miˇ neh nymˇ jiˇ˗ahˇ caw ba gaˇ aˬ da aˬ ma noeˬ tmˬ˗eu meh. Ehˇ kʼawꞈ aˬ yawꞈ huˬ mehˬ mehˬ˗eu gʼaˬ geuꞈ laˇ gʼaˬ ngeh, pyuˇ gaˇ kawˆ shaˬ laˇ˗euˬ meh. Aˬ yawꞈ˗euˬ nymˇ jiˇ laꞈ kʼoeˇ˗euˬ deuˬ nui ma pehˇ laˇ˗awˇ, aˬ yawꞈ˗ahˇ yaw myaˬ jeˬ lehˇ ehˇ˗awˇ dehˬ˗eu meh. Aiˇdaˬ “Ngaˇ aˬ da aˬ ma˗ahˇ maˬ caw ba nehˬ nya˗eu miˇ neh nymˇ jiˇ laꞈ kʼoeˇ˗euˬ deuˬ ngaˬ˗ahˇ byehˇ dzeh nehˬ laꞈ gaˇ guˆ nya. Ngaˬ˗ahˇ heu naˆ naˆ˗ehˇ doeˇ˗eu jeˬ˗ahˇ aˬ jeˬ miˇ neh bi puˬ le˗eu nga lehˇ Yeˬhawˇbaˬ˗ahˇ iˬ baˇ taˬ˗euˬ ma” lehˇ ehˇ˗eu meh. Aˇ nah naˇ aˬ yawꞈ mehˬ bawˬ˗ahˇ dawˬ mehˬ mehˬ˗eu gaˇ kawˇ tiˬ kawˆ ya gaˬ˗euˬ meh. Aˬ yawꞈ “Dawˬ mehˬ mehˬ˗eu gʼaˬ Yeˬhawˇbaˬ aˬ dui noeˬ shaˬ kʼahˬ lahˇ˗eu jeˬ dawˬ tawˆ luꞈ˗ahˇ yaw muiˬ˗ehˇ siˬ nya˗eu meh lehˇ saˇ tiˇ biꞈ˗eu meh. Aˇ muˇ˗ahˇ sheuˬ gʼeh˗eu deuˬ hawˇ˗eu mehˇ nmˇ nui deuˬ neh biꞈ laꞈ˗euˬ nui noeˬ nui duˇ teu naˇ ngaˬ˗ahˇ Miˬyehˇ˗euˬ nui gaˬ˗ahˇ bi jah ziꞈ dzehˬ laˇ˗euˬ meh. Miˬyehˇ caw ba nehˬ meh lehˇ jah ziꞈ˗eu laꞈ kʼoeˇ guiˬ lahˬ paˇ shaˇ kʼoꞈ laˇ˗euˬ ma.  Ngaˬ˗ahˇ Miˬyehˇ guiˬ lahˬ shaˇ dawˬ˗ahˇ dawˬ kʼoꞈ biꞈ gaˇ ya mawˇ˗euˬ miˇ neh nui ma saˇ laˇ nyaˬ” lehˇ ehˇ˗eu meh. Aˇ nah naˇ aˬ yawꞈ gaˇ yaw shuiꞈ tiˬ hmˬ za˗euˬ miˇ neh huˬ mehˬ mehˬ˗eu gaˇ mˇ daˆ leꞈ nya˗awˇ, aˬ da aˬ ma˗ahˇ jiˇ caw ba nehˬ nya˗euˬ meh. Aiˇdaˬ heu loꞈ˗ehˇ ehˇ˗eu meh. “Ngaˇ Yeˬhawˇbaˬ˗ahˇ tiˬ byah tiˬ loꞈ ya gʼoe˗eu lehˇ ya siˬ˗euˬ ma. Nymˬ˗mˇ naˇ ngaˬ˗ahˇ guiˬ lahˬ shaˇ naˇ guˆ˗eu nui ma maˬ paˇ ahˇ miˇ˗a.”

Yeˬhawˇbaˬ aˬ jeˬ paˇ mˇ nehˬ˗eu nga?

12. Ja ceuˬ 56:9-ahˇ ehˇ taˬ˗euˬ loꞈ˗ehˇ Daˬbiˇ aˬ jeˬ˗ahˇ jah ziꞈ˗eu nga?

¹² Ja ceuˬ 56:9-ahˇ gui. Heu deuˆ˗ahˇ Daˬbiˇ˗ahˇ guˆ˗eu jeˬ˗ahˇ deuˆ gʼaˬ nya ni caw ba nehˬ˗euˬ dzaˇ˗i tiˬ jeˬ˗ahˇ paˇ ngehˬ keuˆ taˬ˗euˬ meh. Daˬbiˇ shiˇ kʼawˇ keuˆ le taˬ˗euˬ kʼawꞈ, Yeˬhawˇbaˬ aˬ yawꞈ˗euˬ gʼaˇ duˬ mˇ nehˬ˗eu lehˇ gʼeh˗eu jeˬ˗ahˇ shaˇ noeˬ˗eu meh. Aˇ yamˬ tsaˬ laˇ ngeh Yeˬhawˇbaˬ ka kʼoꞈ nehˬ laꞈ meh lehˇ Daˬbiˇ siˬ nya˗eu meh. Aˬ jeˬ miˇ neh ehˇ naˇ, Yeˬhawˇbaˬ Daˬbiˇ˗ahˇ Iˇsaˬleˬlaˆ˗euˬ sahˬ paˬ bi geuꞈ ma lehˇ ehˇ taˬ dzeuˇ˗euˬ miˇ neh meh. (1 Saˬmeuˬlaˆ 16:1, 13) Daˬbiˇ Yeˬhawˇbaˬ neh saˇ jaˇ dzaˬ taˬ˗euˬ yawˬ jeˬ na luꞈ byah laˇ meh lehˇ jah ziꞈ˗eu meh.

13. Aˬ dui Yeˬhawˇbaˬ aˬ jeˬ jahˇ nehˬ meh lehˇ jah ziꞈ nya˗eu nga?

¹³ Yeˬhawˇbaˬ nawˬ˗euˬ gʼaˇ duˬ aˬ jeˬ jeˇ jahˇ nehˬ˗eu lehˇ saˇ jaˇ dzaˬ taˬ˗euˬ nga? Aˬ dui Yeˬhawˇbaˬ aˬ dui˗ahˇ shaˬ zahˬ tiˬ pawꞈ˗iˬ maˬ bi jaˆ ni laˆ piˇ nehˬ gaˇ maˬ noeˬ tmˬ. c Aˬ dui haiˬ˗eu miˇ tsaˬ heu˗ahˇ aˬ joˆ˗ehˇ gʼeh˗eu shaˬ zahˬ˗ahˇ ya tahˬ puˬ˗eu maˬ kaˬ, miˇ shuiꞈ˗ahˇ Miˬyehˇ shaˬ zahˬ heu deuˬ dawˬ tawˆ luꞈ˗ahˇ laˆ byoˆ nehˬ jiˇ meh. (Iˇsaˬyaˇ 25:7-9) Yeˬhawˇbaˬ naˇ Beh˗euˬ yaw sahˇ pyeuꞈ˗eu miˇ neh baoˬ ahˇ huiˬ dui dui˗eu meh. Aˬ yawꞈ shiˇ˗euˬ deuˬ˗ahˇ kʼawꞈ bi gʼoꞈ dehꞈ laˇ nya˗awˇ, naˇ˗eu gawˇ˗eu yawˬ jeˬ na luꞈ˗ahˇ laˆ saˆ taˬ nehˬ nya˗eu uˬ taꞈ, muiˇ˗eu deuˬ dawˬ tawˆ luꞈ˗ahˇ laˆ byoˆ jiˇ nehˬ nya˗eu meh.—1 Yoˇhaˬ 4:4.

14. Aˬ dui aˬ jeˬ jeˇ˗euˬ gaˇ kawˆ˗ahˇ ya shaˇ noeˬ ya shaˇ sawˇ˗eu nga?

¹⁴ Nawˬ˗ahˇ guˆ˗eu nui ma ahˇ laˇ naˇ, mehˬ hu paw Yeˬhawˇbaˬ mˇ nehˬ˗eu lehˇ gʼeh˗eu jeˬ˗ahˇ shaˇ noeˬ. Miˇ shuiꞈ˗ahˇ Saˬdaˬ hawˇ˗eu yaw haiˬ yaw doeˇ deuˬ bi laˆ cawˆ˗awˇ, yaw muiˬ deuˬ tehꞈ˗ehˇ dzeˇ laˇ˗awˇ, tiˬ nah saˇ˗i tiˬ nah muiˬ daˆ laˇ˗awˇ, byah kuꞈ laˇ˗eu aˇ yamˬ˗ahˇ shaˇ noeˬ. 2014 kʼoꞈ˗euˬ huiˬ˗eu mehˬ bawˬ˗ahˇ aˇ baˇ jahˇ byaˬ˗eu tiˬ hmˬ aˬ dui mehˬ hu paw˗euˬ noeˬ tmˬ˗eu jeˬ gaˇ kawˆ˗ahˇ aˬ joˆ˗ehˇ shaˇ noeˬ shaˇ sawˇ nya˗eu nga lehˇ siˬ laˇ ni caw ba nehˬ˗eu meh. Aˇ baˇ jahˇ byaˬ˗eu teu laꞈ kʼoeˇ aˬ da pyeuꞈ˗eu gʼaˬ nymˇ jiˇ laꞈ kʼoeˇ˗euˬ yawˬ gʼaˬ na luꞈ˗ahˇ miˇ shuiꞈ˗ahˇ aˬ dui˗euˬ dehꞈ ziˇ aˬ joˆ˗ehˇ gʼeh˗eu nga lehˇ ya siˬ˗eu gʼaˇ duˬ, 2 Tiˆmoˇseˬ 3:1-5 laꞈ kʼoeˇ ahˇ˗eu dawˬ˗ahˇ tahˬ poˆ˗ehˇ shaˇ noeˬ haw lehˇ ehˇ nehˬ˗euˬ meh. “Miˇ shuiꞈ˗ahˇ tsawˇ haˬ zaˬ˗euˬ dehꞈ ziˇ laˬ kʼaˬ cehˇ dui dui laˇ paˬ˗ehˇ gʼeh˗eu meh lehˇ siˬ nya˗awˬ. Aˬ jeˬ miˇ neh ehˇ naˇ, tsawˇ haˬ deuˬ˗aˬ aˬ cawˬ˗ahˇ gaˬ˗eu, yaw tsaˬ yaw dawˇ jeˬ˗ahˇ gaˬ˗eu, dui dui baw˗eu siˬ nya˗eu, taˬ aw˗eu, Yeˬhawˇbaˬ˗ahˇ ciˬ huiˬ ciˬ mahˇ˗eu, aˬ da aˬ ma˗euˬ ehˇ dawˬ naˇ haˬ˗eu, guiˬ lahˬ˗ahˇ siˬ nya˗eu, saˇ jaˇ ziꞈ˗eu, nymˇ jiˇ laꞈ kʼoeˇ deuˬ˗ahˇ gaˬ˗eu, aˬ cawˬ nehˬ˗ehˇ tsaˬ leˇ dzoeˇ leˇ˗eu, aˬ cawˬ˗euˬ yaw muiˬ gaˇ kawˆ tehꞈ˗ehˇ ja˗eu, yawˬ ha˗euˬ nui ma˗ahˇ gʼaˬ leˇ˗eu, nahˬ yu ni gʼeh˗eu, muiˬ˗eu jeˬ˗eu jeˬ˗ahˇ gaˬ˗eu, nui ma taˬ nya˗eu, laꞈ oˆ awˬ˗eu siˬ nya˗eu, kʼahˬ sehˇ maˬ jehˆ˗eu, byawˬ gʼa muˆ gʼa˗eu jeˬ˗ahˇ naˆ maˬ tseˇ Miˬyehˇ˗ahˇ gaˬ˗eu, Miˬyehˇ˗ahˇ nui ma laꞈ kʼoeˇ neh gaˬ˗eu, heu loꞈ˗ehˇ gʼeh˗eu tsawˇ haˬ deuˬ nehˬ˗ehˇ yaw gʼoeˇ gʼoeˇ lehˇ jawˇ˗awˬ.” Nawˇ yawˬ ha˗euˬ nymˇ jiˇ laꞈ kʼoeˇ˗euˬ deuˬ hawˇ˗eu mehˇ nmˇ deuˬ nehˬ˗ehˇ miˇ shuiꞈ˗euˬ gaˇ kawˆ ja ja˗ehˇ jawˇ ma laˬ?

15. Tahˇnyaˬ guˆ kʼawꞈ, guˆ˗eu nui ma˗ahˇ deuˆ gʼaˬ nya ni caw ba nehˬ˗eu jeˬ naˇ aˬ jeˬ nga?

¹⁵ Laꞈ taˆ paw˗euˬ Maˬgeˬdawˇniˆ miˇ kʼahˬ˗ahˇ jawˇ˗eu mehˇ nmˇ Tahˇnyaˬ mehˬ hu paw za˗eu guiˬ lahˬ deuˬ˗euˬ gaˇ kawˆ˗ahˇ shaˇ noeˬ˗awˇ, guˆ˗eu nui ma˗ahˇ deuˆ gʼaˬ nya˗euˬ meh. Tahˇnyaˬ Jaˇliꞈ dzaw ngeh, aˬ da aˬ ma maˬ ya leˇ˗eu miˇ neh laˆ tsoeˬ dui dui˗eu meh. Tahˇnyaˬ heu loꞈ˗ehˇ ehˇ˗eu meh. “Ngaˇ zawˇ˗ehˇ guˆ˗eu tiˬ jeˬ ngaˬ˗ahˇ maˇ diˇ keuˆ le˗euˬ meh. Yawˬ poˆ na luꞈ ngaˇ mehˬ bawˬ˗ahˇ iˇ ngeh, ngaˬ ma ngaˬ˗ahˇ diˬ laˇ˗eu meh. Aˬ da aˬ ma ngaˬ˗ahˇ Yeˬhawˇbaˬ˗euˬ Saˇ kiˇ geuꞈ naˇ sehꞈ dzeh ma lehˇ lmˬ˗eu meh.” Aˇ nah naˇ aˬ yawꞈ iˇ kahˇ˗ahˇ neh bi teh doˆ˗euˬ meh. Aˬ yawꞈ aˬ joˆ˗ehˇ jahˇ˗euˬ nga? Tahˇnyaˬ “Ngaˇ Yeˬhawˇbaˬ˗ahˇ saˇ jaˇ ziꞈ naˇ, aˬ yawꞈ ngaˬ˗ahˇ mˬ maˬ maˬ byaˆ zaˇ ziˇ laˬ kʼaˬ cehˇ˗eu jeˬ biꞈ meh lehˇ leh jeh˗awˇ shaˇ noeˬ˗eu ma. Ngaˬ neh haiˬ˗eu  miˇ tsaˬ˗ahˇ ya smˇ˗iˇ˗euˬ jeˬ dawˬ tawˆ luꞈ˗euˬ gʼaˇ duˬ miˇ shuiꞈ˗ahˇ Yeˬhawˇbaˬ teu naˆ maˬ tseˇ muiˬ˗eu laˆ sawˬ biꞈ˗eu meh. Ya puˬ˗euˬ shaˬ zahˬ dawˬ tawˆ luꞈ˗ahˇ maˬ paˇ noeˬ meh lehˇ shaˇ noeˬ˗eu ma” lehˇ ehˇ˗eu meh. Tahˇnyaˬ maˇ diˇ saˇ jaˇ ziꞈ˗euˬ meh. Yeˬhawˇbaˬ aˬ yawꞈ˗ahˇ caw ba nehˬ˗eu miˇ neh jawˇ duˬ jiˇ poˆ mawˇ nya˗euˬ meh. Nymˬ˗mˇ naˇ aˬ yawꞈ saˇ jaˇ ziꞈ˗eu mehˇ nmˇ tiˬ gʼaˬ nehˬ˗ehˇ sheuˬ dahˬ dzaˬ˗awˇ, Miˬyehˇ˗euˬ gaˇ˗ahˇ aˇ yamˬ tiˬ byah ni laˬ kʼaˬ tiˬ cehˇ mˇ luꞈ˗eu meh.

Nymˬ˗mˇ neh Yeˬhawˇbaˬ˗ahˇ nui ma yaw muiˬ˗ehˇ taˬ nya laˇ ni leh jeh

16. Luˇkaꞈ 21:26-28-ahˇ ngehˬ keuˆ taˬ˗euˬ gaˇ kawˆ deuˬ maˇ diˇ pyeuꞈ laˇ ngeh, aˬ dui˗ahˇ kʼaˬ duˬ ni gʼeh ni caw ba nehˬ˗eu jeˬ naˇ aˬ jeˬ nga?

¹⁶ Huiˬ dui dui˗eu shaˬ zahˬ aˇ yamˬ laꞈ kʼoeˇ tsawˇ haˬ deuˬ aˇ dzehˬ˗ehˇ tsawˬ guˆ˗iˇ˗awˇ, “myaꞈ leˇ tehꞈ˗a.” Ehˇ kʼawꞈ Miˬyehˇ˗euˬ tsawˇ haˬ deuˬ naˇ kʼaˬ duˬ ni yawꞈ luꞈ˗eu meh. (Luˇkaꞈ 21:26-28-ahˇ gui.) Aˬ dui aˬ jeˬ miˇ neh maˬ guˆ˗eu nga? Aˬ dui Yeˬhawˇbaˬ˗ahˇ gʼoe dzaw taˬ˗euˬ miˇ neh meh. Uˬ soe ngehˬ keuˆ taˬ˗euˬ Tahˇnyaˬ ya puˬ˗eu shaˬ zahˬ deuˬ naˇ, mehˬ hu paw keuˆ le˗eu shaˬ zahˬ deuˬ˗ahˇ ciˬ daˬ peuˬ ni caw ba nehˬ nya lehˇ ehˇ˗eu meh. Aˬ yawꞈ “Yeˬhawˇbaˬ aˬ dui˗ahˇ aˬ jeˬ˗euˬ shaˬ zahˬ laꞈ kʼoeˇ neh maˬ kaˬ ka doˆ nehˬ nya˗eu meh. Tiˬ poˆ na gaˇ kawˆ deuˬ˗ahˇ aˬ cawˬ nyehꞈ tehˬ˗eu laꞈ kʼoeˇ ya jawˇ luꞈ gaˇ duˇ˗eu meh. Ehˇ kʼawꞈ Yeˬhawˇbaˬ baoˬ huiˬ dzehˬ˗eu meh. Aˇ naˆ ni huiˬ˗eu shaˬ zahˬ kʼawꞈ tiˬ nah aˇ saˬ ya saˬ meh” lehˇ ehˇ˗eu meh.

17. 2024 kʼoꞈ˗euˬ, Kʼoꞈ lah˗euˬ Jaˇliꞈ aˇ deuˆ aˬ dui˗ahˇ aˬ joˆ˗ehˇ caw ba nehˬ˗eu nga? (Sahˬ boꞈ baˆ kʼoˆ˗euˬ aˇ baˇ˗ahˇ haw.)

¹⁷ Guˆ laˇ paˬ˗ehˇ gʼeh˗eu jeˬ gʼawˬ mya ni jaˆ˗eu meh. Ehˇ kʼawꞈ guˆ˗eu jeˬ neh nawˬ˗ahˇ taˬ bi uˆ lahˇ. 2024 kʼoꞈ˗euˬ Kʼoꞈ lah˗euˬ Jaˇliꞈ aˇ deuˆ naˇ, “Guˆ˗eu gaˆ˗eu jeˬ ngaˬ˗euˬ kʼoeˇ taˆ keuˆ le ngeh, nawˬ˗ahˇ ngaˇ gʼoe˗eu ma” lehˇ ehˇ˗eu Daˬbiˇ˗euˬ guiˬ lahˬ shaˇ dawˬ pyeuꞈ meh. (Ja ceuˬ 56:3) Jaˇliꞈ nehˬ˗ehˇ taꞈ leˇ˗awˇ dawˬ tsuiꞈ puiˇ kʼawˬ˗eu paˇ dmˬ tiˬ dmˬ˗ahˇ, Jaˇliꞈ aˇ deuˆ teu deuˆ nehˬ˗ehˇ taꞈ leˇ˗awˇ “Aˇ dzehˬ˗ehˇ maˬ guˆ dzeuˇ˗eu gʼaˇ duˬ Daˬbiˇ shaˬ zahˬ guˆ gaˆ˗ahˇ tehꞈ˗ehˇ maˬ haw tsoˆ taˬ ni ka kʼoꞈ˗eu yaw sahˇ gʼaˬ˗ahˇ tehꞈ˗ehˇ haw tsoˆ taˬ˗euˬ meh” lehˇ ehˇ taˬ˗euˬ meh. Jaˇliꞈ aˇ deuˆ heu deuˆ˗ahˇ kʼoꞈ lah ni shaˇ noeˬ luꞈ˗uˇ. Shaˬ zahˬ guˆ gaˆ˗ahˇ ya puˬ ngeh ngehˬ˗ehˇ dzehˬ shaˇ noeˬ luꞈ˗uˇ. Yeˬhawˇbaˬ neh dzeuˇ laꞈ ngeh mˇ nehˬ˗euˬ jeˬ˗ahˇ maˬ ehˇ, nymˬ˗mˇ mˇ nehˬ luꞈ˗eu jeˬ˗ahˇ maˬ ehˇ, mehˬ hu paw mˇ nehˬ˗eu lehˇ gʼeh˗eu jeˬ˗ahˇ maˬ ehˇ, aˇ yamˬ yuˇ˗awˇ shaˇ noeˬ luꞈ˗uˇ. Toˆ˗ehˇ jahˇ naˇ aˬ dui Daˬbiˇ neh ‘Miˬyehˇ˗ahˇ ngaˇ gʼoe˗eu miˇ neh guˆ˗eu nui ma maˬ ahˇ’ lehˇ ehˇ˗euˬ loꞈ˗ehˇ ehˇ nya˗eu meh.—Ja ceuˬ 56:4.