1. Pakayni maanan a demakan mamatalaw kita alatek?

 KAHACECAY tamdaw nolatekay iraay ko katalawan. Soˈliˈlin minanamayto kita to Fangcalay Cudad, caayto ka talaw to kaloykoy ato mapatayay tamdaw, caayto pakidem calemcem to noikoran, nikawrira pakayniayho kita i pina a demak a matalawen. Tinakoen, tonini kaˈoripan ita a lintad matomesay ko lalood, o mararaway ato lifong masakenakenaay ‘kakokiˈan a demak.’ (Luka 21:11) Alatek micadaay kita to pisafelit no sifo, paro no lomaˈ anca romaroma tamdaw. O roma salikaka calemcemay to cowa ko tatomeseng ko niyah misiˈayaw to aniniay anoca noikoran a sapalifet.

2. Sowalen ko malifaay ni Tafiti itini niyaroˈ no Kat.

² Ci Tafiti na makokiˈay cingra. Tinakoen, tiya sapipatayaw ko Hongti ci Sawlo milepel cingranan i, milaliway tayra i niyaroˈ no Filistin a tamdaw i Kat. Kawra, o hongti no Kat ci Akis kalikiay a pakahapinang, ci Tafiti i, oya ciˈicelay a sofitay no Israil tamdaw, samanen na mipatayay ci Tafiti to ˈalomanay Filistin a tamdaw. Telocto ci Tafiti ‘tada matalaway to hongti no Kat ci Akisan,’ caay ka fanaˈ to sasamaan ci Akis micada cingranan. (1 Samuil 21:​10-​12) Mihaenay haw i, samaanay ci Tafiti milowid to makokiˈay a falocoˈ hani?

3. Mikitini ˈOlic 56:​1-3,11, samaanay ci Tafiti milowid to ˈangi no falocoˈ hani?

³ Itini ˈOlic saka 56 fedengan, mihadakay ci Tafiti to nafalocoˈan ningra tiya itini i Kat cingra. Ihkalay pasowal to tada matalaway cingra itiya, kawra somowalay to samaanay miremo cingra to ˈangi. Ta matalaw cingra i, mitiˈeray ci Yihofaan. (ˈOsien ko ˈOlic 56:​1-3, 11.) Cowa ka patoleden ni Yihofa cingra. Itini sakayat ni Yihofa, maharatengay ni Tafiti ko cecay mikiriwiˈay a hapakayraan, misasingkisingkiay cingra. Nohatini, tada o kaˈesaman ni Akis minengneng ci Tafiti, awaay ko katalawan sanay cingra. Telocto i, milaliwayto ci Tafiti.​​—⁠1 Samuil 21:⁠13–​22:⁠1.

4. Sasamaan kita paˈicel to pakasoˈlinay falocoˈ ci Yihofaan hani? Tano tinakoen a mitadtad.

 ⁴ Matira ci Tafitian, mitiˈer kita ci Yihofaan o mamalowid ko ˈangi. Mahaenay i, sasamaan kita paˈicel to nika pakasoˈlin ci Yihofaan hani? Mangalefay ano matalaw kita, sasamaan ko pidemak hani? Nengnengen ko cecay sapatinako. Ano mafanaˈay kiso to adadaay ko tireng no niyah, satapang saho i, tada matalaway kiso alatek. Kawra mafanaˈay kiso, na adihayay ko miadahan no ising iso malecaday ko adada a tamdaw. Ano pasowal to adada kiso i, misongilaˈay cingra mitengil, hato masayaran nanay ko falocoˈ iso. Somowalay cingra to ciepocay a sapiadah a hapakayraan. Onini a demak pairaay to pakasoˈlin iso to ising, oranto cowato ka tada marawraw kiso. Malecaday, ano misongilaˈ kita miharateng to nano midemakan ni Yihofa, ato midemakan nohatini ato dadademaken Ningra noikor i, mamatongal ko nika pakasoˈlin Cingranan. Mikayatan no Kawas ci Tafiti mitilid to ˈOlic saka 56 fedengan, ngaˈayay mahapinang ita to mahaenay ko demak ni Tafiti. Itini pifolfol to pina sowal nonini ˈOlic i, saharateratengen sasamaan kiso matira ci Tafitian paˈicel to nika pakasoˈlin ci Yihofaan, miremo to ˈangi no falocoˈ.

NA MIDEMAKAY CI YIHOFA TO MAANAN A DEMAK HANI?

5. Sapiremoaw to ˈangi no falocoˈ, midotimay ci Tafiti to maanan? (ˈOlic 56:​12, 13)

⁵ Soˈlin tahalifa ci Tafiti to katalawan, kawra misongilaˈay cingra misinanot to na midemakay to maanan ci Yihofa. (ˈOsien ko ˈOlic 56:​12, 13.) Hakelong no ˈorip ni Tafiti iraay ko mahaenay a pinangan. Tinakoen, nolatekay midotimay cingra to nisangaˈan ni Yihofa a maamaan, itiniay mahapinang ningra to awaay ko tolas no ˈicel ni Yihofa, hanaca misasoˈlinay a ciharateng to tamdamdaw. (ˈOlic 65:​6-9) Misongilaˈay ci Tafiti midotim to nano demak ni Yihofa saki romaroma tamdaw. (ˈOlic 31:19; 37:​25, 26) Roma sa i, mikiriwiˈay ci Tafiti miharateng to nano demak ni Yihofa saki cingranan. Mahapinangay ningra nano ˈengaengaho a wawa cingra i, midimokosanto ni Yihofa cingra ato midipot cingranan. (ˈOlic 22:​9, 10) Midotim ci Tafiti tonini a demak ikor, maedeng matongalayto ko nika pakasoˈlin ningra ci Yihofaan.

6. Ano matalaw kita i, mamisamaan ko pidemak ita ngaˈ matongal ko pitiˈer ci Yihofaan?

⁶ Ano matalawen kiso i, ngaˈayay saharateratengen: “Na midemakay ci Yihofa to maanan?” Haratengen ko misangaˈan ni Yihofa a maamaan. Tinakoen,  ‘songilaˈen a mihapinang’ samaanay ci Yihofa midimokos to maeferay ˈayam ato hana. Soˈlin cowa ka parinien no Kawas Cingranan misangaˈ to ˈayam ato hana, cowa ka pidoko Cingranan, kawra kamayan songilaˈen ni Yihofa a midimokos cangra. Misaharaterateng tonini a demak, o mamatongal ko pakasoˈlin no mita to dadimokosen ni Yihofa kita. (Matay 6:​25-​32) Ngaˈayayho haratengen iso, ci Yihofa pakayni midokoay Cingranan a tamdaw midemakay to maanan. Ngaˈayay kingkiwen iso ko cecay tanektekay ko pakasoˈlin no falocoˈ a tamdaw i Fangcalay Cudad, anoca miˈosi to nalifetan no aniniay lintad a sikawdan ni Yihofa. a Roma i, haratengenho iso to samaanay ci Yihofa midimokos tisowanan. Isaˈayaw samaanay Cingra misolot tisowanan mafanaˈ to soˈlinay kimad hani? (Yohani 6:​44) Samaanay Cingra pacaˈof to satolon no miso? (1 Yohani 5:​14) To romiˈamiˈad, mikitiniay kiso i sapatefoc no kanonoˈan a Wawa Ningra milifok to maanan a haepoc hani?​​—⁠Ifiso 1:7; Hipray 4:​14-​16.

7. O nalifetan no pairasolay ci Taniil samaanay padama ci Wanisaan miremo to ciˈangiay a falocoˈ hani?

⁷ Itiniay i Hayti a fafahiyan salikaka ci Wanisa b tahalifaay to cecay tada katalawan a demak. Ingata no lomaˈ ningra iraay ko cecay faˈinayan, to romiˈamiˈad patingwa palihaf cingranan a mikalisangaˈ, sapidiˈiaw cingranan. Misetekan ni Wanisa a minaˈay cingra, ˈarawhan mangalef sanay kora faˈinayan, hanaca patalaway to kakariˈangen ci Wanisa. Sowal sa ci Wanisa: “Tada matalaway kako.” Ikor samaanay ci Wanisa miremo to kokiˈ hani? Midemakay cingra to ciepocay a demak a midipot to niyahan. Itini pipadama no cecay malohemay malitengay, mipadimengan ningra. O roma sa i, miharatengay cingra to samaanay ci Yihofa midipot to sikawdan no Niyah itiyaho. Sanay ko sowal ni Wanisa: “O saka cecay a maharatengay ako a tamdaw i, ci Taniil. Soˈlin cowa ka pidemak cingra to maanan a mararaway demak, kawra mifahkolan tayni i refong no layong. Kawra midipotan ni Yihofa cingra. Oranto i, micangacangan ako ci Yihofa padama takowanan a misaysay tonini a demak. Maherekto kako mitolon i, caayto ka talaw kako.”​​—⁠Taniil 6:​12-​22.

MIDEMAKAY CI YIHOFA TO MAANAN A DEMAK NOHATINI?

8. Pakasoˈlinay ci Tafiti to maanan? (ˈOlic 56:⁠8)

⁸ Soˈlin tahalifa ci Tafiti to katalawan no ˈorip itini i Kat, kawra cowa ka mapaˈekel no ˈangi. Misongilaˈay cingra miharateng samaanay ci Yihofa midemak itiya saki cingranan. Mahapinangay ni Tafiti, cowa ko pikayat aca ni Yihofa ato midipot cingranan, tada cipinangay Cingra to nafalocoˈan ningra. (ˈOsien ko ˈOlic 56:⁠8.) Malifokayho ni Tafiti ko pipadama no widang, tinakoen ci Yonatan ato Sakakaay Saysi ci Ahimilik madimadiay midama cingranan, pafeli to ciepocay a sapadama cingranan. (1 Samuil 20:​41, 42; 21:​6, 8, 9) Soˈlin misamacayay ko Hongti ci Sawlo milepel ci Tafitian, kawra malaliway ni Tafiti ko pipatay ningra. Pakasoˈlinay ci Tafiti, to mafanaˈay ci Yihofa to malifaay ningra a sapalifet, cipinangayho to samaanay mifiyor konini a sapalifet to falocoˈ ningra.

9. Ihkalay ci Yihofa mafanaˈ to maanan?

⁹ Ano pakayniay i malifaay a sapalifet a makokiˈen kiso, haratengen mafanaˈay ci Yihofa to malifaay iso ko maanan nohatini, hanaca ihkalay mafanaˈ to samaanay ko falocoˈ iso. Tinakoen itini Icip ko Israil tamdaw i, maˈaraway ni Yihofa ko macadaay nangra a saroero, hanaca ‘ihkalay mafanaˈ to roray nangra.’ (Kasadakan 3:⁠7) Ci Tafiti itini ˈOlic miˈolicay, maˈaraway ni Yihofa ko ‘pisemsem’ ningra sanay, hanaca mafanaˈay to ‘roray no kemod no falocoˈ ’ ningra. (ˈOlic 31:⁠7) Maˈaraw no Kawas ko pisemsem no finawlan  Ningra i, ‘mararomay ko falocoˈ Ningra.’ Soˈlinto o nano raraw nangra ko saka ira nonini a roray, kawra kamayan mararomay ko falocoˈ no Kawas. (Isaya 63:⁠9) Mankora, ano matalawen kiso i, haratengen mafanaˈay ci Yihofa to nafalocoˈan iso, ciharatengayho to sapipadamaaw tisowanan milowid to kokiˈ.

10. Hano pakasoˈlin kiso ciharatengay ci Yihofa tisowanan, papadama Cingra tisowanan miremo to masakenakenaay a sapalifet hani?

¹⁰ Nikawrira, ano tahalifa kiso to katalawan a sapalifet i, alatek cowa ka hapinang to midamaay ci Yihofa tisowanan. Mankora, tolonen Cingra padama tisowanan pakahapinang toninian. (2 Hongti 6:​15-​17) Ikor saharateratengen: Iraay ko maanan a kimad i saˈopo anoca sapacaˈof no salikaka paˈicelay tisowanan han? Iraay ko maanan a mitepangan a cudad, maanan a ika anoca maanan a JW Tilifi Radiw pakalalokay to falocoˈ iso han? Iraay ko cima pasowalay tisowanan anca paladaˈay to cecay sinael, masayaren ko falocoˈ iso han? Alatek malawaay ita ko patalahkalan no salikaka kitanan a olah, ato malawaay ko naitiniay i sapahaled to pakasoˈlinay falocoˈ a kakaenen a sapakalalok. Kawrira, onini sahtoay o nipafelian ni Yihofa kitanan a kalimlaan a sapatelong. (Isaya 65:13; Marko 10:​29, 30) Onini a sapatelong misawacayay to tada ciharatengay ci Yihofa tisowanan, o ngangaˈay a tadiˈecen no miso.​​—⁠Isaya 49:​14-​16.

11. O maanan ko padamaay ci Aytaan miremo to kaciˈangi?

¹¹ Itiniay i Senikal fafahiyan salikaka ci Ayta misarocoday mihapinang samaanay ci Yihofa padama cingranan misiˈayaw to sapalifet. O sakakaay a fafahiyan wawa cingra, mansa halamhamay ko wama wina cingranan mietan to payci paririˈ cangranan. Kawra ci Ayta sapisakafahaw a misadolo to kaˈorip ikor, cangoˈotayto ko sakaˈorip. Tada maketeray ko paro no lomaˈ cingranan, mapoˈiho cingranan. Sanay ci Ayta: “Tada matalaway kako eca ka mapaririˈ ko wama wina no niyah, calemcemayho mapiliˈ ko paro no lomaˈ takowanan. Hanaca pakayni i noka tatiih no kaˈorip ngaliwngiway kako ci Yihofaan.” Ikor, itini i kasaˈopoan matengilay ni Ayta ko cecay kimad. Sanay cingra: “O mikimaday patalipaˈelalay tamiyanan, ano masamaanto ko somad no falocoˈ, cipinangay ci Yihofa. Roma i, o malohemay malitengay ato salikaka pafeliay takowanan to pina sapaini. Palidlid sato, pakasoˈlinay kako kamayan maolah ci Yihofa takowanan, pakasoˈlinho Cingranan to papacaˈof to satolon ako. Mahapinangto ako to samaanay ci Yihofa pacaˈof takowanan ikor, tada rihadayayto ko falocoˈ ako.” Ikor, mahelaayto ni Ayta ko matatodongay  a katayalan, ngaˈayto cingra padadotoc a misakafah, ngaˈayho padama to wama wina. Sanay cingra: “Mananamayto ako misarocod mitadiˈec ci Yihofaan. Nohatini, maherek kako mitolon i, caayto ka matalaw.”

MAMIDEMAK CI YIHOFA TO MAANAN NOIKOR?

12. Mikitini ˈOlic 56:​9, pakasoˈlinay ci Tafiti to maanan?

¹² ˈOsien ko ˈOlic 56:⁠9. Mikitini toniya sinael wa ngaˈay mahapinang ita ko roma pakayraan ni Tafiti pakalowid to kokiˈ no falocoˈ. Itini katalawan a pakayraan misarocoday cingra midotim mamidemak ci Yihofa noikor to maanan pakayni cingranan. Mafanaˈay ci Tafiti aitini i matatodongay tatokian milidong ci Yihofa cingranan, samanen na somowalayto ci Yihofa, o mamidotoc a mala hongti no Israil ci Tafiti. (1 Samuil 16:​1, 13) Pakaynien ci Tafitian ko sowal, o mikiˈokanho ni Yihofa a demak, mahecaday o malaˈosiayto maemin.

13. Pakasoˈlinay kita to mamidemak ci Yihofa to maanan hani?

¹³ Pakayni tisowanan mikiˈokay ci Yihofa mamidemak to maanan hani? Soˈlin nohatini wa tahalifaho kita to sapalifet, kawra itini faelohay hekal wa palahdawen ni Yihofa ko kihcod a pasangaray. c (Isaya 25:​7-9) Misangaˈay a Tatapangan ita ci Yihofa o ˈicel Ningra awaay ko tolas, wa ngaˈay patikol paˈorip to mapatayay a tamdaw, miadah to adada ita, hanaca palahdaw to kihcod misafelitay kitanan a tamdaw.​​—⁠1 Yohani 4:⁠4.

14. Mamisongilaˈ kita miharateng to maanan?

¹⁴ Ano makokiˈen kiso i, ngaˈayay saharateratengen to mamidemak ci Yihofa to maanan a demak noikor. Haratengen hena, ano malahdawto ci Satan i, o mariˈangay tamdaw caayto ko mamifodifod to hekal, edengan o moecelay ko falocoˈ a tamdaw aitini i hekal, hanaca o tamdaw papalidlid sato malo malefotay ko ˈorip. Itiyato i, sasamaan ko harateng iso hani? 2014 miheca kasapala taykay iraay ko cecay kapotoˈay ika patiriˈay kitanan to sasamaan a misaharateng to noikoran a makapahay kaˈorip. Itira tora ika, o cecay wama tiya malalengo to paro no lomaˈ to 2 Timoti 3:​1-5 i, malacafayay misaharaterateng to paliˈayawan nora sinael a faelohay hekal, wa samaan pasowal ko sinael hani. Alatek wa saan ko sowal: “Tahirato i faelohay hekal i, o raraheker ko kaˈorip iso. Itiyato, caciharateng ko tamdaw to tao, maolah to noˈadingoan a hafay, misapoener ko falocoˈ, mikangodo to Kawas, mikangodo to wama wina, ira ko miakoˈiday falocoˈ, madimadi, siniˈada, makahi a malakangaˈay ato tao, somowal to kangaˈayan no tao, miˈimer to tireng, damsay, maolah to makapahay, madimadi ngaˈayay pakasoˈlinen, makahi pacaˈi, caay ka misatakaraw, maolahay to Kawas cowa ka haliacang, mitiˈenecay to soˈlinay falocoˈ a malatamdaw. O kakalacafayen iso a micawmaˈ ko mahaenay tamdaw.” To kalo a romiˈad mamihaen kiso a malalengo to paro no lomaˈ anoca salikaka to kaˈorip i faelohay hekal han?

15. Samaanay ko pidemak ni Taniya miremo to kaciˈangi hani?

¹⁵ Itiniay i Kaˈamisan no Makitoniya fafahiyan salikaka ci Taniya pakayniay pisarocod misimsim to noikoran a sapalemed, maremoayto ko ˈangi no falocoˈ. Minanam cingra to Fangcalay Cudad i, macadaay ko pakidemay a pisafelit no wama wina. Sanay cingra: “O katalawan ako a pina demak soˈlinayto a mifekad. Minokayto masaˈopo i, misetiˈay ko wina takowanan. Patalaway ko wama wina takowanan pasowal, ano mala Misawacayay Tamdaw ni Yihofa kako i, o papatayen kako sanay.” Ikor, milaplapan ci Taniya i lomaˈ. Samaanay cingra misiˈayaw to mahaenay a pakayraan hani? Sanay cingra: “Miharatengay kako, ano mitiˈenec kako to madimadi i, anoikor tatahadaˈoc a raheker lipahak ko kaˈorip. Maharatengayho ako, itini i faelohay hekal o papalifonen ni Yihofa kako to malahdaway a kihcod nohatini. Itiyato, polong a tatiihay demak o mamataˈlifto.” Mitiˈenecay to madimadi ci Taniya.  Itini sapadama ni Yihofa, mahelaayto ningra ko kamaroˈan a kitiraan. Ikor, cifaˈinayay ci Taniya to cecay madimadiay a salikaka. Nohatini, malacafayay cangra lipahak a dademak to mieminay to toki matayal saki Kawas.

NOHATINIHO TONGALEN KO PITADIˈEC CI YIHOFAAN

16. Malaˈosi ko sapairasol no Luka 21:​26-​28 i, hano ngangaˈay kita timolo caka ciˈangi?

¹⁶ Itini taˈangayay padiing a tatokian, ˈalomanay tamdaw ‘halileng wa sako fongoh a matalaw,’ kawra o finawlan no Kawas wa tanektek a timolo, caka ngiyangi. (ˈOsien ko Luka 21:​26-​28.) Misamaanay hano timolo caka ciˈangi kita hani? Samanen itiya i, mananamayto kita mitadiˈec ci Yihofaan. Ya masowalay i fafekang a fafahiyan salikaka ci Taniya sanay ko sowal, pakayni to isaˈayaway a nalifetan, ngaˈayayto cingra timolo misiˈayaw to romaroma pasangaray. Sanay cingra: “Mananamay ako, ano o mananto ko mafekaday a demak, papadamaen ni Yihofa kita, salikor mamilifok to sapalemed. Latekay ano nengnengen ko demak i, hato maˈimeray no papina tamdaw, soˈlinay haw i, ano cowa ko ci Yihofa ko mihayiay, ano mananto a demakan cowa ko papakaˈimer cangra. Soˈlin nengnengen ko sapalifet hato tada pasangaray, kawra onini a sapalifet mamahererek to cecay a romiˈad.”

17. 2024 miheca pakamihecaay a sinael papadama kitanan to maanan hani? (Nengnengen ko papotalay coka.)

¹⁷ Anini soˈlinay adihayay ko katalawan ita a demak. Kawra malecad ci Tafitian, cowa ko mamihayi kita malowid no kokiˈ ko niyah. 2024 pakamihecaay a sinael o satolon ni Tafiti, sanay cingra: “Yo matalaw kako i, mitiˈer kako i Tisowanan.” (ˈOlic 56:⁠3) Pakayni tonini a sinael, cecay piˈarawan to Fangcalay Cudad a lalakaw sanay: “Cowa ka haharateng sa ci Tafiti to katalawan a demak, cowa ka pisamacay to pasangaray no niyah, ao misarocoday ko falocoˈ mitadiˈec to mamilidong cingranan a Kawas.” Toniya mihecaan, mangalef ano matalawen kiso i, haratengen ko pakamihecaay a sinael. Palaken ko toki misongilaˈ miharateng, na midemakay ci Yihofa to maanan, midemakay to maanan nohatini, ato mamidemak to maanan noikor. Mihaen, mamalecadto kiso ci Tafitian mikifalocoˈ a somowal: ‘Mitiˈer kako to Kawas, cowa ko mamatalaw.’​​—⁠ˈOlic 56:⁠4.