1. Quiñeque mu, ¿chemu llücalaabüiñ?

 FENTREN che llicaniefi tati pu la, pu huesaque püllü ca ñi chem rupayal cüpalechi antü mu. Iñchiñ quimiyiñ chem pin ta Biblia, feimu llicaquelafiyiñ feichi dungu. Huelu quiñeque mu, com iñchiñ llicaqueiñ. Fantepu mülei ta llicafalchi dungu, hueichan, huesaque che ca huesaque cutran (Luc. 21:11). Ca llicalcayafeiñmu pu che. Ñi poyeniefiel ta Jehová caiñetuafeiñmu pu gobierno ca taiñ pu familia. Quiñeque llicaleafui tañi chem rupamequen ca tañi chem rupayal tañi mongen mu.

2. Aculu David, Gad huariba mu, ¿chem upai?

² Quiñeque mu, ti lonco ülmen David llicafui. Ti rey Saúl ayüniefui ñi langümafiel, feimu David lefmahui. Pu Filistea che ñi huaria mu puhui, Gad pingefui. Gad huaria ñi lonco ülmen Akís pingefui. Akís feipingei feiti David quiñe fütra hueichafe tati, langümfi fentren Filistea huentru. Fei “David rume llicafi ta Akís” (1 Sam. 21:10-12). Llicalefui ñi chem femaeteu tati lonco ülmen, ¿chem quellueyu ñi nehuen piuquecünuhual?

3. Salmo 56:1-3 ca 11 tañi eipin, ¿chem dungu quellueyu (incaeyu) David tañi llücanoal?

³ David huirintucui tañi chum duamcülen Salmo 56 mu. Tüfa mu, feipi chumngelu llicalefui ca chumngechi tañi maneluucülen Jehová mu quellueyu (papeltunge Salmo 56:1-3, 11). Jehová ñi quellun mu, David quimürpui tañi chem chumal: hueluduamcülechi che reque femfaluhui. Feimu ti lonco ülmen cüpa langümlafi, ayüfui tañi amutual müten ta David. Fei David lefmahui (1 Sam. 21:13–22:1).

4. ¿Chumngechi nehuentuabüiñ taiñ maneluuquebel Jehová? Eipinge quiñe inayentun.

 ⁴ Llicaleliyiñ maneluuqueaiñ Jehová mu, fei nehuen piuquecünuhuaiñ. Huelu ¿chumngechi doi maneluhuafuiñ Jehová mu rupaliyiñ llican dungu? Raquiduamnge tüfa: contuelmu quiñe cutran, llicaleafuimi. ¿Chem quelluafeimu? Maneluhulmi ti doctor mu, cüme duamcüleaimi. Ti doctor deu tremoltufi femngechi cutran. Cafei cüme allcütueimu tami chum duamcülen ca eluaimu cüme lahuen. Feimu maneluucüleimi ti doctor mu. Ca femngechi iñchiñ raquiduamaiñ ñi femün Chau Jehová cuifi, ñi femmequen fantepu mu ca tañi femal cüpalechi antü mu, fei doi maneluhuafuiñ Chau Jehová mu. Femngechi raquiduami David. Ngüneduamaiñ ñi chem pin Salmo 56. Tüfa ta quelluaiñmu maneluhual Jehová mu ca taiñ llicalenoal.

CUIBI MU, ¿CHUMI JEHOVÁ?

5. Tañi llücanoal, ¿chem dungu mu ngüneduami David? (Salmo 56:12, 13).

⁵ Cuñihun-ngechi dungu rupafulu rume ta David, fei raquiduami com tañi femün ta Jehová cuifi (papeltunge Salmo 56:12, 13). David com tañi mongen mu femquefui tüfa. Quiñeque mu, raquiduamquefui Jehová tañi deuman mu, feita quimeltueyu Jehová fente tañi nehuen-ngen ca ñi fente piuqueyefiel tati pu che (Sal. 65:6-9). David ca raquiduami chumngechi Jehová quellufi caquelu che (Sal. 31:19; 37:25, 26). Ca raquiduami ñi chumün ta Jehová quisu mu. David choyüngelu müten, Jehová cuñiutucuqueyu ca quellueyu (Sal. 22:9, 10). Com tañi raquiduamel ta David quellueyu ñi maneluhual ta Jehová com tañi piuque mu.

6. Llücaliiñ, ¿chem dungu quelluaiñmu taiñ maneluhual Jehová mu?

⁶ Llicaleliyiñ, ¿chem quelluafeiñmu? Raquiduamafuiñ ñi chumün Jehová cuifi mu. Biblia feipi “cüme ngüneduamfimün” Jehová tañi deuman mu. Inaduamaiñ tüfa: tati pu pichique üñüm ca tati rayen poyequelafi ta Jehová, huelu ¿chumquei Jehová? Cuidaquefi llemai.  Raquiduamliyiñ feita mu, doi maneluhuaiñ Jehová taiñ cuidayaeteu (Mat. 6:25-32). Cafei cümeafui taiñ raquiduamal Jehová ñi chumün tañi pu che mu. Papeltufiliyiñ Biblia, peafuiñ ñi femün quiñeque che feyentulu Jehová mu. Ca papeltuafuiñ taiñ pu peñi ca lamngen ñi rupan famülque mu. a Cafei raquiduamaiñ chumngechi taiñ cuidaqueteu ta Jehová fachantü. Ramtuhuafuiñ: Jehová, ¿chumngechi quellueiñmu ñi quimal ti rüf dungu? (Juan 6:44). Jehová, ¿chumngechi huiñoldunguqueiñmu taiñ llellipufiel? (1 Juan 5:14). Jesús ñi hulün tañi mongen com iñchiñ mu, ¿chumngechi cümelcaqueiñmu? (Efes. 1:7; Heb. 4:14-16).

7. David tañi upan, ¿chumngechi quellubi Vanesa?

⁷ Ngüneduamaiñ ñi rupan taiñ lamngen Vanessa, Haití mapu mülelu. b Quiñe huentru cheu ñi mülen taiñ lamngen ayüniefeyu. Feimu fill antü mütrümquefeyu telefono mu ca huercülelqueyu mensaje, cudumuhuayu piquefi. Huelu ti lamngen fentecünuen pieyu. Pinolu taiñ lamngen, ti huentru rume illcutueyu ca aneltueyu. ¿Chumi taiñ lamngen Vanessa tañi chaftuafiel feitachi cuñihun-ngechi dungu? Nütramcafi quiñe loncolelu trahunche mu. Fei quellueyu ñi feipintucuafiel pu autoridad ñi femün tüfachi huentru. Huelu taiñ lamngen ca acordafi chumngechi Jehová ñi quellufiel tañi pu che cuifi mu. Quisu feipi: “Raquiduamfemün ñi rupan ta Daniel. Quisu chem huesa dungu rume femlafui. Huelu ütrüftucungei cheu ñi mülen pu trapial. Fei Jehová montuleyu llemai. Iñche com elcünufiñ Jehová mu ca feipifiñ tañi quelluaeteu. Femlu, iñche llicalehuelan” (Dan. 6:12-22).

¿CHUMQUI JEHOVÁ?

8. ¿Chem dungu cüme quimni David? (Salmo 56:8).

⁸ David cuñihun-ngechi dungu rupai Gad pingechi mapu mu, huelu fente llicalehuelai. Doi mai eluucülefui ñi inaduamal chumngechi ñi quellunieteu Jehová feichi mu. David cüme quimniefui Jehová tañi quellueteu, tañi cuñiutucunieteu ca quimniefui ñi chum duamcülefel (papeltunge Salmo 56:8). Cafei elueyu cümeque hueni tañi quellueteu. Fei tüfa ta Jonatán ca tati hunen lonco sacerdote Ahimélec (1 Sam. 20:41, 42; 21:6, 8, 9). Ti lonco ülmen Saúl ayüfulu rume tañi langümafiel ta David, huelu David lefmahui, fei montui tañi mongen. Feimu David cüme quimniefui Jehová ñi quimün chem huesa dungu tañi rupamequen ca ñi chum duamcülen.

9. ¿Chem dungu cüme quimni Jehová caque quiñeque iñchiñ mu?

⁹ Rupaliyiñ cuñihun-ngechi dungu mu, fei llicaleliyiñ ¿chumaiñ? Loncontucuaiñ Jehová quimniei chem taiñ rupamequen ca taiñ chum duamcülen. Pu Israel che esclavongefulu Egipto mu, Jehová cüme quimniefui tañi cutrancaumequen engün (Éx. 3:7). Ülcantun mu David feipi Jehová quimniefui tañi hueñancülen ca tañi “fütra cutrantupiuquelen” (Sal. 31:7). Pu Israel che tañi huesa femün mu cutrantupiuquefuingün, fei Jehová ca cutrantupiuquei (Is. 63:9). Llicalen mu iñchiñ, Jehová entendequeiñmu ca ayüquei taiñ quelluaeteu taiñ llicalenoal.

10. ¿Chemu maneluuquimi Chau Jehová inaduametu ca moll quelluatu?

 ¹⁰ Rupaliyiñ huesa dungu mu, inaduamlayafuiñ chumngechi Jehová taiñ quellumequeteu. Fei, ¿chumafuiñ? Pengelelen mai chumngechi tami quellumequeteu piafiyiñ ta Chau Jehová (2 Rey. 6:15-17). Fei ramtuhuaiñ: ¿Nehuentucuqueiñmu quiñeque hueupin, comentario hulngequelu trahun mu? ¿Cam quiñeque publicacion, video, ülcantun yafültucuqueiñmeu? ¿Quiñe peñi tañi feipin mu, quiñe texto mu yafültucuqueiñmu? Quiñeque mu, ngoimayafuiñ chi Jehová taiñ quelluqueteu taiñ pu peñi ca pu lamngen mu, ca chumngechi yafültucuqueiñmu Chau Dios tañi Dungu meu (Is. 65:13; Mar. 10:29, 30). Com taiñ eluqueteu mu Jehová pengelquei taiñ duamtunieteu. Feimu maneluuqueiñ quisu mu (Is. 49:14-16).

11. ¿Chem dungu quellubi Aida tañi llücanoal?

¹¹ Peaiñ ñi rupan quiñe lamngen Aida pingelu, Senegal mapu tuulu. Quisu hunencülefui tañi pu lamngen mu, feimu tañi pu chau feipieyu tañi cüdahual, femngechi ñi quelluafiel engu. Huelu Aida ayüquefui tañi precursorangeal, feimu fente cüdauquelafui ca pichin plata niefui. Tañi familia illcutueyu ca huesa pieyu. Aida feipi: “Iñche llicalequefun pepi quellunoafiel tañi chau ca tañi ñuque. Llicalequefun tañi famentungeal iñche. Culpatufiñ ta Jehová tañi huesa rupamequen mu”. Huelu Aida ngüneduami chumngechi Jehová tañi quellunieteu. Quiñe antü allcütui quiñe hueupin, fei rume quellueneu pi. “Ti hueupife feipi Jehová cüme quimüñmaeiñmu taiñ hueñancülen taiñ piuque. Tati pu loncolelu ca pu lamngen trahunche mu feipiqueneu Jehová tañi piuqueyenieteu. Femngechi doi cüme duamürpun, doi maneluhunquechi llellipufiñ ta Jehová. Quimnielu iñche Jehová tañi huiñoldungueteu tañi llellipun, doi tüngduamcületun”. Rupachi antü mu, taiñ lamngen pei quiñe cüdau, femngechi quellurpufi tañi chau ca ñuque ca quellueyu ñi precursorangeal. Quisu feipi: “Doi maneluhurpun ta Jehová mu.  Llellipufiel mu ta Jehová quelluqueneu tañi llicahuenoal”.

¿CHUMAI JEHOVÁ?

12. Salmo 56:9 tañi eipin, ¿chem dungu cüme quimni David?

¹² (Papeltunge Salmo 56:9). David, ¿ca chumi tañi llicalenoal? Cuñihun mu mülelu tañi mongen, raquiduami ñi chumal ta Jehová cüpalechi antü mu. Jehová feipifi ta David tañi lonco ülmencünuafiel. Feimu maneluucülefui Jehová tañi montulaeteu (1 Sam. 16:1, 13). David quimniefui Jehová ñi femürpual tañi feipicünuel.

13. ¿Chumai Jehová?

¹³ Iñchiñ cai, ¿chem feipicünueiñmu Jehová? Jehová feipilaeiñmu taiñ rupanoal huesaque dungu ta fachantü. c Doi mai ti hue mapu mu, Jehová feipieiñmu ñi ngehuenoal huesaque dungu (Is. 25:7-9). Jehová niei com nehuen ñi huiñomongeltuafiel com pu layelu, ñi tremoltuafiel com tati pu cutrancülelu ca ñi apümcayafiel com taiñ pu caiñe (1 Juan 4:4).

14. ¿Chem dungu ngüneduamabüiñ?

¹⁴ Llicalelmi, raquiduamaimi tañi chumal Jehová cüpalechi antü mu. Raquiduamaimi ñi chumletual ta mongen mülehuetunole ta Huecüfü ca ngehuenole ta huesaque che. Feichi mu re cümeque che mületuai ca amuleai taiñ doi cüme chengerpual ca culpan chengehuenoal. Ti fütra trahun 2014 tripantu mu pengelngei chumngechi raquiduamafuiñ Jehová tañi chumal. Quiñe chau papeltulelfi tañi familia 2 Timoteo 3:1-5. Huelu cacünutui ñi feipin ñi pengelal chumletuai ta mongen hue mapu mu. Feipi: “Ti hue mapu mu müleai re cümeque dungu ca ayühun-ngeai ta mongen. Tati pu che huelucontu piuqueyehuai, piuqueyeafi tati rüf dungu, checahun-ngelayaingün, doi falin che troquiulayaingün, poyeafingün ta Chau Dios, feyentuafi tañi fütaqueche, mañum chefengeaingün, quisucünulayafi tañi pu chafche, piuqueyeafi com tañi pu che, eluucüleaingün tañi cümelcautual caquelu che engün, cüme dunguaingün caquelu che mu, quim ngünehuaingün, illcufe chengelayaingün, piuqueyeafi ti cümeque dungu engün, manelfal chengeaingün, inayaingün chem pin ta Jehová, ñom piuquengeaingün. Fülmanieafimi feichi che”. Iñchiñ cai, ¿nütramcaquefiyiñ taiñ pu familia, trahunche mu chumletuaiñ ti hue mapu mu?

15. Tañi llücanoal, ¿chem dungu quellubi Tanja?

¹⁵ Peaiñ ñi rupan Tanja, Macedonia del Norte mapu mu. Fei raquiduami Jehová ñi feipicünuel ñi llicahuenoal. Eluulu tañi chillcatual Biblia, tañi pu chau rume illcutueyu. Quisu feipi: “Rupan tati doi llicafalchi dungu. Amun mu trahun mu, huiñotulu ta ruca tañi ñuque hulelcaquefeneu. Testigongerpulmi, iñchiu langümuhuayiñ pieneu tañi chau ca tañi ñuque”. Rupachi antü mu, Tanja quechanentungei tañi ruca mu. ¿Chumi Tanja? Quisu feipi: “Raquiduamün püntütripanoli Jehová mu, rumel ayüucüleafun pin. Chem dungu rume ñamümfuli fachantü, ti hue mapu mu Jehová cümelcatuaeneu pilefun. Com ngoimanentuafiñ tati huesaque dungu tañi rupafel”. Tanja püntütripalai Jehová mu. Jehová tañi quellueteu pei quiñe ruca tañi müleam. Fei  fütayefi quiñe cüme peñi, trür poyenierpufingu ta Jehová fill antü ca rume ayüucüleingu.

BEI HULA NEHUENTUAIÑ TAIÑ MENULUHUN JEHOVÁ MU

16. Bemtripale Lucas 21:26-28 tañi eipin ¿chem quelluaiñmu taiñ bütra piuquecünoal?

¹⁶ Acule ti fütra cutrancahun, fentren pu che rume llicaleai. Huelu Jehová tañi pu che com nehuencüleai (papeltunge Lucas 21:26-28). ¿Chumngelu llicalelayaiñ? Maneluucülelu am Jehová mu iñchiñ. Tanja com tañi rupan ta cuifi quellueyu ñi chaftuafiel huesaque dungu ñi rupamequen. Feipi: “Quimürpun chem rupaliyiñ rume, Jehová quelluafeiñmu ca cümelcayaiñmu. Caquelu che doi nehuen-ngelu ta iñchiñ mu troquiafuiñ, huelu Chau Jehová doi nehuen niei. Tunte huesaque dungu rupaliyiñ ta fachantü, afai llemai”.

17. Versiculo 2024 tripantu ngelu, ¿chumngechi quelluaiñmu? (Pebinge adentun hunen pagina mu).

¹⁷ Fachantü, fentren dungu llicalcayafeiñmu. Huelu David reque, eluulayaiñ taiñ llicayal. David llellipufilu ta Jehová, feipifi: “Llican mu iñche, maneluuquen eimi mu” (Sal. 56:3). Feitachi texto loncontucuaiñ 2024 tripantu mu. Quiñe quimche feipi David rume raquiduamquelafui huesaque dungu ñi rupan, ca chem tañi llicalcaqueteu. Doi mai raquiduamquefui inei tañi montulaeteu müten. Tüfa ta Jehová. Loncontucuafimi ñi feipin Salmo 56:3 tüfachi tripantu, doyelchi mai rupafulmi huesaque dungu. Raquiduamaimi Jehová tañi chumün cuifi, tañi chummequen ca ñi chumal cüpalechi antü. Feimu David reque, feipiaimi: “Chau Ngünechen mu iñche maneluuquen, fei llicaquelan” (Sal. 56:4).