1. Нәләр бизи горхуја сала биләр?

 ГОРХУ һисси һәр кәсдә олур. Лакин Мүгәддәс Китабы өјрәндијимиз үчүн биз артыг өлүләрдән, фөвгәлтәбии гүввәләрдән, ҝәләҹәкдән горхмуруг. Бунунла белә, јашадығымыз бу дөврдә биз «дәһшәтли мәнзәрәләрин» — мүһарибәләрин, хәстәликләрин вә ҹинајәткарлығын шаһиди олуруг (Лука 21:11). Һәмчинин биздә инсан горхусу да олур, мәсәлән, ибадәтимизә гаршы чыхдыглары үчүн һөкумәтдән вә ја аилә үзвләримиздән горхуруг. Бәзиләри исә индики, ја да ҝәләҹәкдәки сынаглара таб ҝәтирә билмәјәҹәјиндән горхур.

2. Давудун Ҹатда башына ҝәләнләри тәсвир един.

² Горхунун нә олдуғуну Давуд пејғәмбәр дә јахшы билирди. Мәсәлән, Талут падшаһ онун изинә дүшүб өлдүрмәк истәјирди. Буна ҝөрә дә Давуд ҹаныны ҝөтүрүб филиштлиләрин Ҹат шәһәринә гачмышды. Чох кечмәмиш орада да Ҹат падшаһы Ахыш өјрәнмишди ки, Давуд иҝид дөјүшчүдүр, һәтта он минләрлә филиштлини гырмасы илә бағлы онун адына нәғмә бәстәләниб. Давуд бундан бәрк горхмушду, чүнки Ахышын она нә едәҹәјини билмирди (1 Ишм. 21:10—12). Бәс Давуд горхуларына неҹә галиб ҝәлди?

3. Зәбур 56:1—3, 11 ајәләринә әсасән Давуд горхуларына неҹә галиб ҝәлди?

³ 56-ҹы мәзмурда Давуд Ҹатда оларкән кечирдији һиссләри ифадә едир. О бу мәзмурда горхусунун сәбәбини вә буна неҹә үстүн ҝәлдијини ачыглајыр. Давудун үрәјиндә горху олса да, о, Јеһоваја етибар едирди. (Зәбур 56:1—3, 11 ајәләрини  охујун.) Бу, әбәс јерә дејилди. Јеһованын көмәји илә о, гејри-ади, амма ишә јарајан бир фәнд ишләтди: өзүнү дәлилијә вурду. Бајаг Давуду өлдүрмәк истәјән Ахыш инди ону өнүндән говур, беләҹә, Давуд ҹаныны гуртарыр (1 Ишм. 21:13—22:1).

4. Јеһоваја етибарымызы неҹә мөһкәмләндирә биләрик? Нүмунә чәкин.

⁴ Јеһоваја етибар етмәјин сајәсиндә биз дә горхуја галиб ҝәлә биләрик. Бәс хүсусилә дә горхдуғумуз анларда Јеһоваја етибарымызы неҹә мөһкәмләндирә биләрик? Белә бир нүмунәјә бахаг: Һансыса хәстәлијә тутулдуғунузу билсәниз, бәлкә дә әввәл-әввәл горхарсыныз. Амма һәкиминизә етибар едирсинизсә, бир аз сакитләшәҹәксиниз. Ола билсин, һәкиминиз сизин кими чох пасијенти сағалдыб. Ҝөрүрсүнүз ки, о сизә диггәтлә гулаг асыр, һиссләринизи баша дүшүр вә сизә сынагдан кечмиш бир мүалиҹә үсулу тәклиф едир. Ејнилә биз дә Јеһоваја етибарымызы мөһкәмләндирмәк истәјириксә, Онун кечмишдә вә инди ҝөрдүјү ишләр, һәмчинин ҝәләҹәкдә ҝөрәҹәји ишләр барәдә дүшүнмәлијик. Давуд мәһз белә етмишди. Ҝәлин сизинлә 56-ҹы мәзмурдан Давудун Јеһованын илһамы илә јаздығы бәзи фикирләри арашдыраг. Давуддан өрнәк алараг Јеһоваја етибарынызы артырыб горхуларыныза үстүн ҝәлә биләрсиниз. Ҝәлин ҝөрәк неҹә.

ЈЕҺОВАНЫН КЕЧМИШДӘ ҜӨРДҮЈҮ ИШЛӘР

5. Горхуларына үстүн ҝәлмәк үчүн Давуд нә барәдә дүшүнүрдү? (Зәбур 56:12, 13).

⁵ Давудун һәјаты тәһлүкә алтында олса белә, о, диггәтини Јеһованын кечмишдә ҝөрдүјү ишләрә ҹәмләјирди. (Зәбур 56:12, 13 ајәләрини охујун.) Бу, Давудда артыг вәрдишә чеврилмишди. Мәсәлән, һәрдән о, Јараданын әл ишләри барәдә фикрә далырды. Беләҹә, Онун нә гәдәр гүдрәтли олдуғуна вә бәшәријјәти севдијинә бир даһа әмин олурду (Зәб. 65:6—9). Һәмчинин о, Аллаһын башга инсанлар үчүн ҝөрдүјү ишләр барәдә дә дүшүнүрдү (Зәб. 31:19; 37:25, 26). Ән әсасы исә Давуд Јеһованын шәхсән онун үчүн нәләр етдији һагда фикирләширди. Јеһова ону көрпә вахтындан горумушду, она дајаг олмушду (Зәб. 22:9, 10). Сөзсүз ки, бу  ҹүр дүшүнҹәләр Давудун Јеһоваја етибарыны даһа да артырырды.

6. Биздә горху һисси баш галдыранда Јеһоваја етибар етмәјә бизә нә көмәк едәҹәк?

⁶ Сизи горху бүрүјәндә бу суал үзәриндә дүшүнүн: «Јеһова кечмишдә һансы ишләри ҝөрүб?» Онун јаратдыгларына нәзәр салын. Мәсәлән, ҝүлләрә, гушлара «фикир верин». Онлар Јеһованын бәнзәриндә јарадылмасалар да, Она ибадәт едә билмәсәләр дә, Јеһова онларын гајғысына галыр. Мәҝәр Јеһова сизин гејдинизә даһа чох галмаз? Бу барәдә дүшүнмәк Аллаһа етибарынызы артыраҹаг (Мәт. 6:25—32). Һәмчинин Јеһованын Өз хидмәтчиләри үчүн нәләр етдији барәдә дә дүшүнә биләрсиниз. Бунун үчүн ҝүҹлү иман ҝөстәрән һансыса персонаж барәдә, јахуд Јеһованын мүасир дөврдә јашамыш хидмәтчиләри барәдә охумаг олар a. Бундан башга, Јеһованын шәхсән сизин гејдинизә неҹә галдығыны јадыныза салын. О сизин һәгигәтә ҝәлмәјинизә неҹә көмәк едиб? (Јәһ. 6:44). Дуаларыныза неҹә ҹаваб вериб? (1 Јәһ. 5:14). Әзиз Оғлунун фидјә гурбанлығы сајәсиндә һәр ҝүн һансы немәтләри әлдә едирсиниз? (Ефес. 1:7; Ибр. 4:14—16).

7. Дәнјал пејғәмбәрин башына ҝәләнләр Ванессаја горхусуна үстүн ҝәлмәјә неҹә көмәк етди?

⁷ Һаитидә јашајан Ванесса b баҹы үзләшдији бир вәзијјәтдә чох горхмушду. Јашадығы әразидә бир киши һәр ҝүн она зәнҝ едирди, месаж јазырды, баҹыны онунла ҹинси мүнасибәтдә олмаға мәҹбур едирди. Ванесса она конкрет «јох» демишди. Амма киши ондан әл чәкмирди, даһа да агрессивләшмишди вә Ванессаны һәдәләјирди. Баҹы дејир: «Чох горхурдум». Бәс Ванесса горхуларына неҹә үстүн ҝәлди? О өзүнү горумаг үчүн мүәјјән тәдбирләр ҝөрдү. Баҹы ағсаггалларын көмәји илә мәсәләни полисин нәзәринә чатдырды. Бундан әлавә, баҹы Јеһованын кечмишдә Өз хидмәтчиләрини неҹә горудуғуну јадына салды. Ванесса дејир: «Ағлыма илк ҝәлән Дәнјал пејғәмбәр олду. О, ҝүнаһсыз ола-ола аҹ ширләрин олдуғу гујуја атылмышды, амма Јеһова ону горумушду. Јеһоваја дедим ки, “мән аҹизәм, Сән өзүн бу мәсәләни јолуна гој. Гој о адам даһа мәним һагда фикирләшмәсин”. Бундан сонра артыг үрәјимдә горху һисси олмады» (Дән. 6:12—22).

ЈЕҺОВАНЫН ИНДИ ҜӨРДҮЈҮ ИШЛӘР

8. Давуд нәјә әмин иди? (Зәбур 56:8).

⁸ Ҹатда оларкән Давудун һәјаты тәһлүкә алтында олса да, о, тәлаша дүшмәди, диггәтини Јеһованын һәмин ан онун үчүн нәләр етдијинә ҹәмләди. Давуд Јеһованын она јол ҝөстәрдијини, ону мүдафиә етдијини, ону баша дүшдүјүнү һисс едирди. (Зәбур 56:8 ајәсини охујун.) Һәмчинин Давудун Јонатан, баш каһин Әхимәлик кими достлары вар иди. Онлар она үрәк-дирәк верир, лазыми көмәји ҝөстәрирдиләр (1 Ишм. 20:41, 42; 21:6, 8, 9). Үстәлик, Талут падшаһ Давуду өлдүрмәјә нә гәдәр ҹәһд етсә дә, Давуд онун әлиндән гуртула билмишди. Давуд әмин иди ки, Јеһова онун үзләшдији сынаглардан, кечирдији һиссләрдән аҝаһдыр.

9. Јеһова һәр биримизлә бағлы нәләри билир?

⁹ Сизи горхуја салан сынагла үзләшәндә јадда сахлајын ки, Јеһова сизин һал-һазырда нәләр јашадығынызы, һансы һиссләри кечирдијинизи ҝөрүр. Мәсәлән, Јеһова исраиллиләрин Мисирдә  тәкҹә һансы һагсызлыгларла үзләшдикләриндән јох, «нә чәкдикләриндән» дә аҝаһ иди (Чых. 3:7). Давуд охудуғу мәзмурда демишди ки, Аллаһ онун һәм әзаб-әзијјәтини ҝөрүр, һәм дә гәлбиндәки дәрди билир (Зәб. 31:7). Халг һәтта өз сәһвләринә ҝөрә әзаб чәкәндә Јеһова да онларла бирҝә әзаб чәкирди (Әшј. 63:9). Сиз горху кечирәндә Јеһова сизи баша дүшүр, О, горхуларыныза галиб ҝәлмәјинизә көмәк етмәјә һазырдыр.

10. Јеһованын сизин гејдинизә галдығына вә истәнилән чәтинлијә таб ҝәтирмәјә көмәк едәҹәјинә нәјә ҝөрә әминсиниз?

¹⁰ Амма сиздә суал јарана биләр: «Ҝөрәсән, мәни горхуја салан сынагла үзләшәндә Јеһова мәнә неҹә дајаг олур?» Јеһованын дәстәјини ҝөрмәк үчүн Ондан көмәк истәјин (2 Пад. 6:15—17). Сонра исә дүшүнүн: «Јығынҹагда һансыса нитг вә ја шәрһ сизи мөһкәмләндириб? Һансыса нәшр, видео вә ја маһны сизи руһландырыб? Кимсә сизинлә руһландырыҹы фикир вә ја ајә бөлүшүб?» Баҹы-гардашларын севҝисини, алдығымыз руһани гиданын дәјәрини бәзән унудуруг. Амма бунлар Јеһованын вердији бәнзәрсиз бәхшишләрдир (Әшј. 65:13; Марк 10:29, 30). Бунлар Јеһованын бизим гајғымыза галдығыны сүбут едир (Әшј. 49:14—16). Һәмчинин Онун етибара лајиг олдуғуну ҝөстәрир.

11. Аидә баҹыја ҹәсур олмаға нә көмәк етди?

¹¹ Сенегалда јашајан Аидә баҹы сынаг вахты Јеһованын дајағыны дујуб. Аиләнин бөјүк ушағы олдуғуна ҝөрә валидејнләри онун пул газаныб һәм өзүнү, һәм дә онлары доландырмасыны ҝөзләјирди. Амма Аидә өнҹүл хидмәтинә ҝөрә һәјатыны садәләшдирди, она ҝөрә дә мадди ҹәһәтдән сыхынты чәкмәјә башлады. Аиләси она чох әсәби иди, она олмазын сөзләр дејирди. Аидә дејир: «Горхурдум ки, валидејнләрими доландыра билмәјәҹәјәм вә һамы мәндән үз дөндәрәҹәк. Һәтта вәзијјәтин бу јерә ҝәлиб чатдығына ҝөрә Јеһованы ҝүнаһландырырдым». Сонра Аидә јығынҹагда бир нитгә гулаг асды. О, сөзүнә әлавә едир: «Натиг вурғулады ки, Јеһова гәлбимизин бүтүн јараларындан аҝаһдыр. Ағсаггалларын вә баҹы-гардашларын мәсләһәтинин көмәји илә ҝет-ҝедә Јеһованын мәһәббәтинә әминлијим  мөһкәмләнди. Артыг Јеһоваја дуа едәндә үрәјимдә ҝүҹлү әминлик олурду. Дуаларыма ҹаваб аланда исә гәлбимә раһатлыг чөкүрдү». Заманла Аидә јахшы бир иш тапды. Беләҹә, һәм өнҹүллүјә давам едә билди, һәм дә өзүнү вә аиләсини мадди ҹәһәтдән тәмин едә билди. О дејир: «Јеһоваја там шәкилдә ҝүвәнмәји өјрәндим. Инди Она дуа едәндән сонра үрәјимдә горхудан әсәр-әламәт галмыр».

ЈЕҺОВАНЫН ҜӘЛӘҸӘКДӘ ҜӨРӘҸӘЈИ ИШЛӘР

12. Зәбур 56:9 ајәсинә әсасән Давуд нәјә әмин иди?

¹² Зәбур 56:9 ајәсини охујун. Бу ајәдә Давуда горхуларына үстүн ҝәлмәјә көмәк едән башга амил вурғуланыр. Һәјаты тәһлүкәдә олан вахт о, Јеһованын ҝәләҹәкдә онун үчүн ҝөрәҹәји ишләр барәдә дүшүнүрдү. Давуд билирди ки, Јеһова дүз вахтында ону хилас едәҹәк. Һәр шејдән әввәл Јеһова онун Исраилин нөвбәти падшаһы олаҹағыны бәјан етмишди (1 Ишм. 16:1, 13). Давуд әмин иди ки, Јеһованын бүтүн вәдләри мүтләг ҝерчәкләшәҹәк.

13. Јеһованын нә едәҹәјиндән архајыныг?

¹³ Бәс Јеһова бизә нә вәд едиб? Билирик ки јашадығымыз бу дүнјада Јеһова үзләшдијимиз бүтүн проблемләри арадан галдырмыр c. Бу шәр дүнјада һансы сынагла үзләшириксә үзләшәк, Јеһова ҝәләҹәкдә јени дүнјада онларын һамысыны јох едәҹәк (Әшј. 25:7—9). Јараданымыз өлүләри дирилтмәјә, хәстәликләримизи, емосионал јараларымызы сағалтмаға вә бизә гаршы чыханлары мәһв етмәјә гадирдир (1 Јәһ. 4:4).

14. Нәләр барәдә дүшүнә биләрик?

¹⁴ Сизи горху бүрүјәндә Јеһованын ҝәләҹәкдә сизин үчүн едәҹәји ишләр барәдә дүшүнүн. Артыг Шејтан олмајаҹаг, пис инсанларын әвәзинә салеһ инсанлар јашајаҹаг, ҝүнү-ҝүндән камиллијә јахынлашаҹағыг. Һәмин вахт кечирәҹәјиниз һиссләри тәсәввүр един. 2014-ҹү илин реҝионал топлантысында үмидимиз барәдә дүшүнмәјин јолуну ҝөстәрән бир сәһнәҹик ҝөстәрилмишди. Һәмин сәһнәҹикдә ата 2 Тимутијә 3:1—5 ајәләрини аиләси илә мүзакирә етмишди. О бу ајәләрин Ҹәннәтә аид ишләнсә, неҹә фәргли сәсләнәҹәји илә бағлы демишди: «Јени дүнја ән хошбәхт бир дөвр олаҹаг. Чүнки инсанлар бир-бирини севән, руһани шејләри дәјәрләндирән, садә, һәлим, Аллаһа алгыш охујан, валидејнләринә итаәт едән, миннәтдар, вәфалы, доғмаларыны севән, үзүјола, башгалары һагда јахшы шејләр данышан, өзүнә һаким олан, мүлајим, јахшылығы севән, етибарлы, ҝүзәштә ҝедән, тәвазөкар, ејш-ишрәтдән чох Аллаһы севән, һәгигәтән мөмин олаҹаг. Беләләриндән бәрк јапыш». Бәс сиз аиләнизлә вә ја диндашларынызла јени дүнјада һәјатын неҹә олаҹағыны мүзакирә едирсиниз?

15. Танја горхса да, нәјин сајәсиндә сәдагәтини горуду?

¹⁵ Ҝәләҹәкдә алаҹағымыз немәтләр барәдә дүшүнмәк Шимали Македонијада јашајан Танја баҹыја горхуларына галиб ҝәлмәјә көмәк едиб. Валидејнләри онун Мүгәддәс Китабы өјрәнмәсинин гәти әлејһинә идиләр. Танја дејир: «Горхдуғум шејләр башыма ҝәлди. Һәр јығынҹаг ҝөрүшүндән сонра анам мәни дөјүрдү. Валидејнләрим мәни тәһдид едирдиләр ки, Јеһованын Шаһиди олсам, мәни өлдүрәҹәкләр». Ахырда онлар Танјаны евдән говдулар. Бәс Танја нә етди? О дејир: «Билирдим ки, садиг галсам, әбәдијјән хошбәхт олаҹағам. Јеһова инди итирдијим һәр шејин әвәзини јени дүнјада артыгламасы илә верәҹәк вә бүтүн пис хатирәләрими унудаҹағам. Чалышырдым, әсас бу барәдә дүшүнүм». Танја сәдагәтини  горуду. Јеһованын көмәји илә өзүнә галмаға јер тапды. О, руһән јеткин бир гардашла аилә гурду вә инди икиси дә тамвахтлы хидмәтдә Јеһоваја севинҹлә гуллуг едирләр.

ИНДИ ЈЕҺОВАЈА ЕТИБАРЫ МӨҺКӘМЛӘНДИРМӘЈИН ВАХТЫДЫР

16. Лука 21:26—28 ајәләриндә јазылан һадисәләрин баш вердијини ҝөрәндә бизә ҹәсур олмаға нә көмәк едәҹәк?

¹⁶ Бөјүк мүсибәт заманы инсанлар «горхудан... һушуну итирәҹәк». Амма Аллаһын халгы мәтин, ҹәсур дајанаҹаг. (Лука 21:26—28 ајәләрини охујун.) Нәјә ҝөрә онлар горхуја гапылмајаҹаг? Чүнки артыг Јеһоваја етибар етмәји өјрәнмиш олаҹаглар. Бајаг ады чәкилән Танја баҹыја кечмишдә јашадыгларынын бу ҝүн үзләшдији чәтинликләр заманы бөјүк көмәји дәјир. Танја дејир: «Елә бир вәзијјәт јохдур ки, Јеһова ону бизим хејримизә чевирә билмәсин. Бәзән бизә елә ҝәлә биләр ки, вәзијјәт башгаларынын ихтијарындадыр. Амма әслиндә онлар Јеһованын јол вердији гәдәр ихтијар саһибидирләр. Үзләшдијимиз сынаг нә гәдәр чәтин олса да, бир ҝүн сона чатаҹаг».

17. 2024-ҹү илин ајәси бизә һансы саһәдә көмәк едәҹәк? (Үз габығындакы шәклә бахын.)

¹⁷ Бу ҝүн бизи горхуја салан чох шеј вар. Амма Давуд кими биз дә горху һиссинә үстүн ҝәлә биләрик. 2024-ҹү илин ајәси Давудун Јеһоваја етдији дуадыр: «Мәни горху бүрүјәндә Сәнә ҝүвәнирәм» (Зәб. 56:3). Бир Мүгәддәс Китаб алими бу ајә илә бағлы белә сөзләр демишди: «Давуд ону горхудан вәзијјәтләр, үзләшдији проблемләр барәдә чох дүшүнмүрдү. О, Хиласкары Аллаһа бел бағлајырды». Гаршыдакы ајлар әрзиндә, хүсусилә дә сизи горхуја салан вәзијјәтләрлә үзләшәндә илин ајәси барәдә дүшүнүн. Вахт ајырыб Јеһованын кечмишдә вә инди ҝөрдүјү, һәмчинин ҝәләҹәкдә ҝөрәҹәји ишләр барәдә фикирләшин. Онда Давуд пејғәмбәр кими сиз дә дејәҹәксиниз: «Аллаһа бел бағламышам, горхмурам» (Зәб. 56:4).