1. ?Ngue ti yɛ srɛ kwla kun e cɛn kunngun-ɔn?

 SRƐ kun e kwlakwla cɛn kunngun. Biblu’n nun like nga e suannin’n ti’n, e sroman be nga be wuli mun’n kun. E sroman sa sroesroe nga mmusu’m be yo be’n be kun. Yɛ kɛ e bu e ɲrun lɔ sa nga bé wá jú’n be akunndan’n srɛ kunman e kun. Sanngɛ blɛ nga e o nun yɛ’n nun’n, e wun sa “sroesroe mun.” Sa sɔ’m be wie yɛle alɛ mun, nin sran mɔ be kun be’n, ɔ nin tukpacɛ mun. (Lik. 21:11) Asa’n, awa i janunfuɛ wie mun annzɛ e osufuɛ nga be tanndan e ɲrun’n be ti’n, srɛ kwla kun e. Aniaan wie’m be liɛ’n, be bu i kɛ be su kwlá jranman sa kun m’ɔ o be su dɔ nga su’n, annzɛ sa wie m’ɔ kwla tɔ be su be ɲrun lɔ’n i ɲrun kekle. I sɔ’n ti’n srɛ kun be.

2. ?I nun mɔ Davidi o Gati lɔ’n sa benin yɛ ɔ tɔli i su-ɔ?

² Blɛ wie nun’n srɛ kunnin Davidi. I wie yɛle kɛ, kɛ Famiɛn Saili kunndɛli kɛ ɔ́ kún i’n, ɔ wanndi ko fiali Filistifuɛ’m be klɔ nga be flɛ i kɛ Gati’n su lɔ. I sin’n Gati lɔ famiɛn mɔ be flɛ i kɛ Akisi’n tili i kɛ Davidi ti safuɲrɛn dan kpa naan be kɛnnin i ndɛ jue kun nun. Jue sɔ’n nun’n, be seli kɛ Davidi kunnin Filistifuɛ “akpiakpi” tra su. Ɔ maan ‘srɛ wa kunnin Davidi dan kpa.’ (1 Sam. 21:​10-12) Afin ɔ siman like nga Akisi wá fá yó i’n. ?Sanngɛ ngue yɛ Davidi yoli naan i wla w’a gua ase-ɔ?

3. ?Kɛ nga Jue Mun 56:​1-3, 11 fa kan’n sa’n, ngue yɛ Davidi yoli naan i wla w’a gua ase-ɔ?

³ I nun mɔ Davidi o Gati lɔ’n, wafa nga i wun yoli i’n, ɔ kɛnnin  i ndɛ Jue Mun 56 nun. Jue sɔ’n nun’n, ɔ kannin srɛ m’ɔ kunnin i’n, ɔ nin like ng’ɔ yoli naan i wla w’a gua ase’n be ndɛ. Kɛ srɛ kunnin Davidi’n, ɔ fɛli i wla’n guali Zoova su. (An kanngan Jue Mun 56:​1-3, 11 nun.) I sɔ m’ɔ yoli’n w’a kaman ngbɛn. Zoova fanngan nun’n, ɔ fali ajalɛ kun ngwlɛlɛ su. Yɛle kɛ ɔ yoli i wun kɛ fiaunfuɛ sa. Kɛ ɔ yoli sɔ’n, Akisi w’a seman kɛ be kun Davidi. Ɔ maan Davidi fiteli nun.—1 Sam. 21:13–22:1.

4. ?Ngue yɛ e kwla yo naan y’a fa e wla y’a gua Zoova su kpa-ɔ? An fa sunnzun ase kun yiyi nun.

⁴ E kusu sɛ srɛ kun e naan e fa e wla e gua Zoova su’n, e wla gúa ase. ?Sanngɛ kɛ srɛ kun e’n, é yó sɛ naan y’a fa e wla y’a guɛ i Zoova su kpa? Maan e fa sunnzun ase kun naan y’a wun i wlɛ. Wienun-ɔn, b’a se wɔ kɛ tukpacɛ kun o ɔ wun. I klikli’n nun’n, srɛ kwla kun wɔ. Sanngɛ sɛ a lafi dɔɔtrɔ bian’n su kpa’n, ɔ wla kwla gua ase kan. Atrɛkpa’n w’a yo sran wie mɔ tukpacɛ kunngba sɔ’n yoli be’n be ayre le. Asa’n kɛ á kán ndɛ’n, ɔ sie i su kpa, kpɛkun ɔ se wɔ kɛ ɔ wun wafa nga ɔ wun yo wɔ’n i wlɛ. Yɛ ɔ man wɔ ayre kpa kun m’ɔ yoli sran uflɛ wie’m be juejue’n. I kunngba’n yɛle Zoova liɛ’n. Ɔ maan sɛ e bu like nga Zoova yoli i laa’n, ɔ nin like ng’ɔ su yo i dɔ nga su’n, ɔ nin ng’ɔ́ wá yó mán e’n be akunndan’n, i sɔ’n úka e naan y’a fa e wla y’a guɛ i su kpa. I sɔ yɛ Davidi yoli-ɔ. I sɔ’n ti’n, é wá fá e ɲin é síe i ndɛ ng’ɔ o Jue Mun 56 nun’n su. Kɛ é yó sɔ’n, maan e bu wafa nga e kwla fa e wla e guɛ i Zoova su kpa naan e wla w’a gua ase’n i akunndan.

LIKE NGA ZOOVA YOLI I LAA’N

5. ?Ngue su yɛ Davidi fɛli i ɲin sieli naan i wla w’a gua ase-ɔ? (Jue Mun 56:​12, 13)

⁵ Blɛ mɔ Davidi i nguan o wie nuan’n, ɔ fɛli i ɲin sieli i like nga Zoova yoli i laa’n su. (An kanngan Jue Mun 56:​12, 13 nun.) Blɛ sunman’n i sɔ yɛ Davidi yoli-ɔ. I wie yɛle kɛ Davidi buli ninnge nga Zoova yili be’n be su akunndan. Kɛ ɔ yo sɔ’n i wla kpɛnnin su kɛ Zoova kwla sa kwlaa yo naan klɔ sran’m be ndɛ lo i dan. (Jue. 65:​6-9) Asa’n ɔ buli like nga Zoova yo mannin sran uflɛ’n i su akunndan wie. (Jue. 31:19; 37:​25, 26) Like ng’ɔ buli su akunndan kpa’n yɛle like nga Zoova yo mɛnnin i bɔbɔ’n. Kɛ ɔ fɛ i Davidi i kaan nun lele’n,  Zoova suɛnnin i bo yɛ ɔ sɛsɛli i. (Jue. 22:​9, 10) Ninnge sɔ’m be su akunndan bulɛ’n, ɔ ukɛli i naan w’a fɛ i wla w’a guɛ i Zoova su kpa.

6. ?Kɛ srɛ kun e’n, ngue yɛ ɔ kwla uka e naan y’a fa e wla y’a gua Zoova su-ɔ?

⁶ Kɛ srɛ kun wɔ’n, bu ninnge nga Zoova yoli be laa’n be akunndan. A kwla bu ninnge ng’ɔ yili be’n be su akunndan. I lɛ nun’n, “nian” anunman mun nin waka nɲrɛ’m “be kpa.” Zoova w’a yiman be kɛ i bɔbɔ sa yɛ be kwlá sumɛn i. Sanngɛ sɛ a bu wafa nga Zoova nian be lika’n i su akunndan’n, i sɔ’n úka wɔ naan w’a lafi su kpa kɛ ɔ́ nían ɔ lika wie. (Mat. 6:​25-32) Asa’n fa ɔ ɲin sie i like nga Zoova yo mɛnnin i sufuɛ mun’n i su wie. I lɛ nun’n, a kwla suan sran kun mɔ Biblu’n kɛn i ndɛ m’ɔ kleli kɛ ɔ lafi Ɲanmiɛn su kpa’n i su like. Sɛ a klo kusu’n, a kwla kanngan Zoova i sufuɛ kun mɔ be kɛn i ndɛ’n e fluwa’m be nun’n i su ndɛ’n nun. a Asa ekun’n, bu wafa nga Zoova niannin ɔ bɔbɔ ɔ lika’n i su akunndan. I wie yɛle wafa ng’ɔ ukali wɔ naan w’a si ndɛ nanwlɛ’n. (Zan 6:44) Annzɛ wafa ng’ɔ tɛli ɔ srɛlɛ wie’m be su’n. (1 Zan 5:14) Annzɛ i Wa’n i tɛ m’ɔ fɛli i wun yili’n i su ye nga a ɲɛn i cɛn kwlakwla’n.—Efɛ. 1:7; Ebr. 4:​14-16.

7. ?Wafa sɛ yɛ Daniɛli i su ndɛ’n ukali Vanesa naan i wla w’a gua ase-ɔ?

⁷ Be flɛ aniaan bla kun m’ɔ tran Aiti’n kɛ Vanesa. b Sa wie ti’n, srɛ kunnin i kpa. Yɛle kɛ bian kun m’ɔ o be asa’n su lɔ’n ɔ flɛ i, yɛ ɔ klɛ ndɛ mun telefɔnun’n nun ko mɛn i cɛn kwlakwla. Ɔ jin i wun kɛ ɔ nin i bé sán nun. Vanesa w’a kplinman su. Sanngɛ bian’n w’a yacimɛn i diin. I waan ɔ́ yó i like yaya bɔbɔ. Vanesa seli kɛ: “Nanwlɛ, srɛ kunnin min.” ?Ngue yɛ Vanesa yoli naan srɛ w’a kunmɛn i kun-ɔn? Ɔ fali ajalɛ trele wie mun naan w’a sɛsɛ i wun. Asɔnun kpɛnngbɛn kun ukɛli i naan w’a bo su w’a kle be asa’n su lɔ kpɛnngbɛn mun. Sanngɛ like kun ekun m’ɔ yoli’n yɛle kɛ ɔ fɛli i ɲin sieli i wafa nga Zoova sɛsɛli i sufuɛ mun laa’n i su. Vanesa seli kɛ: “Sran klikli nga n buli i akunndan’n yɛle Ɲanmiɛn nuan ijɔfuɛ Daniɛli. W’a yoman sa tɛ fi, sanngɛ be to i yili i asɔmɔli mɔ awe kun be’n be kunman’n nun. Sanngɛ Zoova niɛnnin i lika. I sɔ’n ti’n, n fali sa sɔ’n n wlɛli i Zoova sa nun. Kɛ ɔ yoli sɔ’n, srɛ w’a kunman min kun.”—Dan. 6:​12-22.

LIKE NGA ZOOVA YO I DƆ NGA SU’N

8. ?Ngue yɛ Davidi wunnin i wlɛ-ɔ? (Jue Mun 56:8)

⁸ I nun mɔ Davidi o Gati lɔ mɔ i nguan o wie nuan’n, w’a fɛmɛn i ɲin w’a siemɛn i ninnge nga be kun i srɛ’n be su. Sanngɛ like nga Zoova su yo mɛn i blɛ sɔ’n nun’n, i su yɛ ɔ fɛli i ɲin sieli-ɔ. Davidi wunnin i wlɛ kɛ Zoova kle i atin, ɔ sɛsɛ i yɛ ɔ wun wafa nga i wun yo i’n i wlɛ. (An kanngan Jue Mun 56:8 nun.) Asa’n Davidi i janvuɛ kpa’m be suɛnnin i bo. I wie yɛle Zonatan, ɔ nin Aimelɛki m’ɔ ti Ɲanmiɛn ɲrun jranfuɛ dan’n. (1 Sam. 20:​41, 42; 21:​6, 8, 9) Kannzɛ bɔbɔ Famiɛn Saili fuali kpa kɛ ɔ́ kún i’n, sanngɛ ɔ fiteli nun. Davidi si kɛ Zoova wun i su sa’n ɔ nin wafa nga sa sɔ’n ti’n i wun yo i’n i wlɛ.

9. ?Kɛ sa’m be tɔ e su’n, ngue su yɛ ɔ fata kɛ e wla kpɛn-ɔn?

⁹ Kɛ sa wie ti’n srɛ kun wɔ’n, maan ɔ wla kpɛn su kɛ Zoova wun sa sɔ’n naan ɔ wun wafa nga ɔ wun yo wɔ’n i wlɛ. Biblu’n se kɛ Izraɛlifuɛ’m be blɛ su’n, Zoova wunnin wafa nga sran’m be yo be tɛtɛ Ezipti lɔ’n. Sanngɛ nɛ́n i ngba-ɔ. Ɔ se ekun kɛ ɔ si “afɛ ng’ɔ o be su’n” i kpa. (Tul. 3:7) Davidi i jue kun nun’n, ɔ seli kɛ Zoova wunnin “ɲrɛnnɛn’n” nin “awlabɔɛ dan” m’ɔ o i su’n. (Jue. 31:7) Kɛ Ɲanmiɛn i sufuɛ’m  be fali ajalɛ tɛ bɔbɔ mɔ be wunnin i su afɛ’n, “i wla boli i wun.” (Eza. 63:9) Kɛ srɛ kun wɔ’n, Zoova wun wafa nga ɔ wun yo wɔ’n i wlɛ. Yɛ ɔ kunndɛ kpa kɛ ɔ́ úka wɔ naan ɔ wla gua ase.

10. ?Ngue yɛ ɔ kle wɔ kɛ ɔ ndɛ lo Zoova naan ɔ́ úka ɔ sa kwlaa nun-ɔn?

¹⁰ Wie liɛ’n, kɛ sa kekle wie o ɔ su’n, a wunman wafa nga Zoova suan ɔ bo’n. I lɛ nun’n, srɛ i kɛ ɔ uka wɔ naan a wun wafa ng’ɔ suan ɔ bo’n i wlɛ. (2 Fam. 6:​15-17) I sin’n fa ɔ ɲin sie i sa wie’m be su. ?Kɛ aniaan kun íjɔ nzra nun’n annzɛ ɔ́ tɛ́ kosan wie su aɲia’n i bo lɔ’n, ɔ kannin ndɛ wie m’ɔ wlali ɔ fanngan-ɔn? ?E fluwa annzɛ e video annzɛ e jue uflɛuflɛ kun i nun ndɛ’n wlali ɔ fanngan? ?Annzɛ kusu aniaan kun kannin ndɛ wie, annzɛ ɔ boli Biblu’n nun ndɛ mma kun su fa wlali ɔ fanngan? Nanwlɛ, e ɲan klolɛ mɔ aniaan’m be klo e’n, ɔ nin like nga anuannzɛ’n kle e’n, be su ye dan. Ninnge kpakpa kwlaa sɔ’m be fin Zoova. Sanngɛ e wla kwla fi ye sɔ mɔ e ɲɛn i’n i su ndɛndɛ. (Eza. 65:13; Mar. 10:​29, 30) Kusu nn ninnge sɔ’m be kle kɛ Zoova nian e lika. (Eza. 49:​14-16) Asa’n be kle kɛ e kwla fa e wla’n e guɛ i su.

11. ?Ngue yɛ ɔ ukali Aida naan i wla w’a gua ase-ɔ?

¹¹ Be flɛ aniaan bla kun kɛ Aida, ɔ tran Senegali. Ɔ fɛli i ɲin sieli i wafa nga Zoova ukɛli i blɛ kekle nun’n i su. Kɛ mɔ i yɛ ɔ ti ba kpɛn’n ti’n, i si nin i nin be seli be wun kɛ ɔ́ dí junman naan ɔ́ ɲán sika kpanngban naan w’a niɛn i bɔbɔ nin be lika. Sanngɛ kɛ Aida yacili ninnge wie’m be yolɛ naan w’a kwla yo atin bofuɛ’n, sika ndɛ’n wa yoli kekle i su. Kɛ ɔ yoli sɔ’n, i awlofuɛ’m be fɛli i wun ya, kpɛkun be kɛnnin i wun ndɛ tɛtɛ. Aida seli kɛ: “N seli min wun kɛ n su kwlá ukaman min baba nin min manmin naan sran’m be kwlaa be nin min kpɛ́ duo nun. I sɔ’n ti’n srɛ kunnin min. I kpa bɔbɔ’n n fali Zoova i wun ya. Afin n seli min wun kɛ w’a ukaman min.” Cɛn kun’n ɔ tieli nzra nun ijɔlɛ kun. I waan: “Nzra nun ijɔfuɛ’n seli kɛ sɛ sa wie ti’n e awlɛn’n w’a kpɔtɔ’n, Zoova si nun. Afɔtuɛ nga asɔnun kpɛnngbɛn mun nin aniaan onga’m be mannin min’n ti’n, n ma wunnin i wlɛ blɛblɛblɛ kɛ Zoova klo min. N ma boli Zoova i srɛlɛ bo ekun. Kpɛkun n ma wunnin i wlɛ kɛ ɔ́ úka min. Kɛ n wunnin wafa nga Zoova tɛli min srɛlɛ’m be su’n, min wla guali  ase.” Kɛ ɔ́ kɔ́ i ɲrun’n, Aida wa ɲannin junman. Ɔ maan ɔ ɲannin sika naan w’a kwla niɛn i si nin i nin nin sran wie mun ekun be lika. Yɛ ɔ kwla dili i atin bolɛ junman’n. Ɔ seli kɛ: “N ma wunnin wafa nga n kwla fa min wla kwlaa n guɛ i Zoova su’n i wlɛ. Siɛn’n kɛ sa wie ti’n srɛ kun min mɔ n srɛ Zoova’n, blɛ sunman’n srɛ kunman min kun.”

LIKE NGA ZOOVA WÁ YÓ’N

12. ?Kɛ nga Jue Mun 56:9 fa kan’n sa’n, ngue su yɛ Davidi lafi-ɔ?

¹² An kanngan Jue Mun 56:9 nun. Ndɛ mma sɔ’n kle e like kun ekun mɔ Davidi yoli naan w’a fɛmɛn i ɲin w’a siemɛn i ninnge nga be kun i srɛ’n be su kun’n. Yɛle kɛ kannzɛ bɔbɔ Davidi i nguan o wie nuan’n, sanngɛ ɔ buli like nga Zoova wá yó mɛ́n i’n i su akunndan. Davidi si kɛ Zoova dé i blɛ ng’ɔ ti su’n i nun. Afin Zoova seli kɛ i yɛ ɔ́ sín Saili i osu káci famiɛn-ɔn. (1 Sam. 16:​1, 13) Davidi lafili su kɛ ndɛ kwlaa nga Zoova kan’n saan ɔ́ kpɛ́n su.

13. ?Ngue yɛ e kwla lafi su kɛ Zoova wá yó-ɔ?

¹³ ?Ngue yɛ Zoova seli kɛ ɔ́ yó mán wɔ-ɔ? E si kɛ Zoova w’a seman kɛ ɔ́ yó naan sa w’a tɔman e su. c Kannzɛ sa nga be o e su dɔ nga su’n be ti sɛ ti sɛ’n, Zoova wá yó maan be su tranman lɛ kun mɛn uflɛ’n nun lɔ. (Eza. 25:​7-9) E Si Ɲanmiɛn m’ɔ yili e’n i tinmin’n cɛnnin. Ɔ kwla cɛn be nga be wuli’n, ɔ kwla yo e juejue, yɛ ɔ kwla nunnun be kwlaa nga be tanndan e ɲrun’n.—1 Zan 4:4.

14. ?Ngue yɛ e kwla bu su akunndan-ɔn?

¹⁴ Sɛ srɛ kun wɔ’n, bu like nga Zoova wá yó i e ɲrun lɔ’n, i su akunndan. Ɔ́ wá yó maan Satan su tranman lɛ kun. Ɔ́ wá núnnún klunwifuɛ mun kpɛkun sran kpa’m be ngunmin yɛ bé ká lɛ-ɔ. Yɛ ɔ́ wá yó naan fɔ m’ɔ o e nun’n ɔ wie blɛblɛblɛ. Kɛ sa kwlaa sɔ’m bé wá jú’n, wafa nga ɔ wun wá yó wɔ’n, bu i akunndan nian. Afuɛ 2014 nun nvle kun aɲia’n i bo’n, ninnge’m be nglo yilɛ kun nun’n, be fali e ɲin sieli i wafa nga e kwla bu like nga e wla o su kɛ é ɲɛ́n i’n i akunndan’n i su. Siɛ kun nin i awlofuɛ’m be kokoli ndɛ ng’ɔ o 2 Timote 3:​1-5 nun’n i su yalɛ. Be seli be wun kɛ sɛ ɔ ti kɛ ndɛ mma sɔ’m be kan mɛn uflɛ’n i ndɛ’n, wafa nga bé kánngan nun’n yɛ: “Cɛn wie lele’n, kɛ é wá trán mɛn uflɛ’n nun’n, lika’n ɔ́ yó ɲɛnmɛn dan. Afin sran’m bé bú be wiengu akunndan, bé yó Ɲanmiɛn klofuɛ, be su diman be nuan, be su tuman be wun, bé mánmán Ɲanmiɛn, be ɲin yí be si nin be nin mun, bé sí ye, be ɲin yí Ɲanmiɛn, bé kló sran, be yo be sa-ɔ bé yáci cɛ́, be su diman abla, bé sí be wun su nian, be su yoman wlɛ, be su kpɔman sran kpa mun, bé sró Ɲanmiɛn, bé láfi su kɛ ɔ kwla sa yo. Be su yiman be janvuɛ mun manman, bé yó like-ɔ bé bú i akunndan, be su diman tutre, bé kló Ɲanmiɛn trá mɛn dilɛ’n. Fa ɔ wun mantan sran sɔ mun.” ?Yɛ ɔ li? ?A nin ɔ awlofuɛ mun nin ɔ wiengu Klisifuɛ’m be koko wafa nga mɛn uflɛ’n nun lɔ tranlɛ’n wá yó’n i su yalɛ?

15. ?Kannzɛ bɔbɔ srɛ kunnin Tanja’n, ngue yɛ ɔ ukɛli i naan w’a jran kekle-ɔ?

¹⁵ Be flɛ aniaan bla kun m’ɔ tran Maseduanin lɔ’n kɛ Tanja. Sɛ sa wie ti’n srɛ kun i’n, ɔ bu ninnge nga Ɲanmiɛn wá yó be e ɲrun lɔ’n be su akunndan. Kɛ ɔ yo sɔ’n i wla gua ase. I si nin i nin be kunndɛman kaan sa kɛ ɔ suan Biblu’n nun like. Ɔ seli kɛ: “Sa nga n buli i kɛ be kwla tɔ min su mɔ i ti yɛ srɛ kun min’n, be tɔli min su sakpasakpa. Kɛ n kɔ aɲia’m be bo mɔ n ba’n, min manmin bo min. Min si nin min nin be waan sɛ n kaci Zoova i Lalofuɛ’n bé kún min.” I agualiɛ su’n, be kannin Tanja bo awlo’n nun. ?Blɛ sɔ’n nun’n, ngue yɛ ɔ yoli-ɔ? Ɔ seli kɛ: “Sɛ n nanti seiin’n, aklunjɔɛ nga cɛn wie lele’n ń má dí m’ɔ su wieman le’n, i su yɛ n  fali min ɲin n sieli-ɔ. Asa’n n bu ye nga Zoova wá yó min mɛn uflɛ’n nun lɔ’n i akunndan. N si kɛ blɛ sɔ’n nun’n, ń ɲán ninnge nga be fili min sa’n, yɛ min wla fí sa tɛtɛ kwlaa nga be tɔli min su’n be su.” Tanja nantili seiin. Yɛ Zoova fanngan nun’n, ɔ ɲannin tranwlɛ. Kɛ é sé yɛ’n, Tanja w’a ja bian, yɛ ɔ nin i wun’n be ti blɛ kwlaa nun Ɲanmiɛn junman difuɛ.

FA Ɔ WLA GUƐ I ƝANMIƐN SU KPA DƆ NGA SU

16. ?Kɛ e bu sa nga be kan be ndɛ Liki 21:​26-28 nun’n be akunndan’n, ngue yɛ ɔ kwla uka e naan y’a yo yakpafuɛ-ɔ?

¹⁶ Ɲrɛnnɛn dan’n nun’n, “srɛ kún sran mun dan kpa.” Sanngɛ Ɲanmiɛn i sufuɛ’m be liɛ’n bé jrán kekle yɛ bé yó yakpafuɛ. (An kanngan Liki 21:​26-28 nun.) Afin be fa be wla gua Zoova su. Tanja mɔ e kɛnnin i ndɛ’n, ɔ seli kɛ sa nga be tɔli i su laa’n be ukɛli i maan ɔ kwla jrannin sa kekleekle wie’m be ɲrun kekle. Ɔ seli kɛ: “N wunnin kɛ kannzɛ sa nga be tɔ e su’n be ti sɛ ti sɛ’n, Zoova kwla uka e naan y’a jran kekle yɛ ɔ yra e su. Ɔ ju wie’n, ɔ kwla yo e kɛ e wiengu’m be le kwlalɛ dan naan e su kwlá jranman be ɲrun sa. Sanngɛ Zoova le kwlalɛ tra be lele. Yɛ kannzɛ sa ng’ɔ o e su’n ti kekle bɔbɔ’n, saan ɔ́ wíe cɛn kun.”

17. ?Wafa sɛ yɛ afuɛ 2024 nun Biblu’n nun ndɛ mma’n wá úka e-ɔ? (An nian foto ng’ɔ o fluwa’n i bui’n su’n.)

¹⁷ Andɛ’n sa wie’m be ti’n srɛ kwla kun e. Sanngɛ kɛ Davidi sa’n e kwla yo naan e akunndan’n w’a tranman ninnge nga be kun e srɛ’n be su. Kɛ Davidi srɛ́ Zoova’n, ɔ seli kɛ: “Kɛ srɛ kun min’n, n fa min wla n gua ɔ su.” (Jue. 56:3) Ndɛ sɔ m’ɔ kɛnnin i i srɛlɛ’n nun’n, yɛ ɔ ti e afuɛ 2024 nun Biblu’n nun ndɛ mma’n niɔn. Biblu’n i su like suanfuɛ kun kannin Biblu’n nun ndɛ mma sɔ’n i ndɛ seli kɛ: “Davidi w’a fɛmɛn i ɲin w’a sieman sa nga be kun i srɛ’n, ɔ nin sa nga be o i su’n be su. Sanngɛ ɔ fɛli i wla guali Sran ng’ɔ Kwla De i’n su.” Anglo nga bé bá lɛ’n be nun’n, bu e afuɛ’n nun Biblu’n nun ndɛ mma’n i su akunndan. I li kɛ sa kekle wie’m be tɔ ɔ su’n yɛ ɔ fata kɛ a yo i sɔ kpa-ɔ. Bu ninnge nga Zoova yoli be laa’n, nin ng’ɔ yo be dɔ nga su’n, ɔ nin ng’ɔ́ wá yó be e ɲrun lɔ’n be akunndan. Sɛ a yo sɔ’n, á kán ndɛ kunngba nga Davidi kannin’n wie. Ɔ seli kɛ: “N fa min wla n gua Ɲanmiɛn su, srɛ kunman min.”—Jue. 56:4.