1. Taano ta kun minsan nakakamati kita nin takot?

 GABOS kita nakakamati nin takot kun minsan. Totoo, huli sa pag-adal ta kan Bibliya, napatalingkas kita sa pagkatakot sa mga gadan, sa maraot na mga espiritu, asin sa mangyayari sa maabot. Pero nabubuhay pa kita sa panahon na may nangyayaring “makatatakot na mga tanawon,” arog kan giyera, krimen, asin hilang. (Luc. 21:11) Puwedeng makamati man kita nin pagkatakot sa tawo, arog kan pagkatakot sa gobyerno na nagpepersegir sa sato o dawa ngani sa mga kapamilyang nagkokontra sa tunay na pagsamba. Nahahadit man an iba na tibaad dai ninda matagalan an inaagihan nindang problema sa presente o sa maabot.

2. Ano an sitwasyon ni David kan yaon siya sa Gat?

² May mga panahon kaidto na natakot si David. Sarong beses kan pighahanting siya ni Hading Saul para gadanon, nagdesisyon si David na magdulag sa Gat na siyudad kan mga Filisteo. Dai nahaloy, naaraman kan hadi kan Gat na si Akis na si David iyo su matibay na parapakilaban na pig-uumaw sa sarong kanta na nagpatumba nin “manampulong ribo” na mga Filisteo. ‘Natakot na marhay’ si David. (1 Sam. 21:10-12) Nahadit siya sa puwedeng gibuhon saiya ni Hading Akis. Paano nadaog ni David an saiyang takot?

3. Sigun sa Salmo 56:1-3, 11, paano nadaog ni David an saiyang takot?

³ Sa Salmo 56, ipinahayag ni David an namamatian niya mantang nasa Gat. Ihinayag kan salmong iyan an mga ikinakatakot ni David, pati man kun paano niya iyan napaglabanan. Kan makamati siya nin takot, nagtiwala siya ki Jehova. (Basahon an Salmo 56:1-3, 11.) May masarig na basehan an pagtitiwala niya ki Jehova. Sa tabang ni Jehova, nakaisip si David nin kakaiba pero epektibong estratehiya: Nagsagin-sagin siyang bua! Kaya imbes na sarong huma, an hiling na saiya ni Hading Akis sarong tawong nakakairitar, kaya nakadulag si David.​—1 Sam. 21:13–22:1.

4. Paano ta mapapakusog an pagtitiwala ta ki Jehova? Iilustrar.

 ⁴ Madadaog ta man an satong takot paagi sa pagtitiwala ki Jehova. Pero paano ta mapapakusog an satong pagtitiwala ki Jehova, lalo na pag natatakot kita? Pag-isipan an sarong ilustrasyon. Pag naaraman mong may hilang ka, sa inot tibaad matakot ka. Pero mababawasan an takot mo kun may tiwala ka sa saimong doktor. Tibaad dakul na siyang nabulong na may arog kaiyan na hilang. Tibaad nagdadangog siyang marhay sa saimo, kaya kumbinsido ka na talagang nasasabutan niya an namamatian mo. Asin tibaad irekomendar niya saimo an sarong paagi nin pagbulong na nakatabang na marhay sa iba. Sa kaagid na paagi, mapapakusog ta an satong pagtitiwala ki Jehova paagi sa pagkonsiderar kun ano na an ginibo niya, kun ano an ginigibo niya ngunyan, asin kun ano pa an gigibuhon niya para sato. Iyan an ginibo ni David. Mantang pinag-uulayan ta an nagkapira sa ipinasabong na mga tataramon na isinurat niya sa Salmo 56, pag-isipan kun paano mo man mapapakusog an pagtitiwala mo ki Jehova asin madadaog an saimong takot.

ANO NA AN GINIBO NI JEHOVA?

5. Para madaog an saiyang takot, ano an hinurop-hurop ni David? (Salmo 56:12, 13)

⁵ Minsan ngani nasa peligro pa an buhay ni David, nagpokus siya sa kun ano na an ginibo ni Jehova. (Basahon an Salmo 56:12, 13.) Arog kaiyan an pirming ginigibo ni David sa bilog niyang buhay. Halimbawa, may mga pagkakataon na hinurop-hurop niya an makangangalas na mga gibo ni Jehova, na nagpapagirumdom sa saiya kan dakulang kapangyarihan ni Jehova asin kun gurano Niya kanamumutan an mga tawo. (Sal. 65:6-9) Hinurop-hurop man ni David kun ano na an ginibo ni Jehova para sa iba. (Sal. 31:19; 37:25, 26) Asin lalo nang hinurop-hurop niya kun ano na an ginibo ni Jehova para sa saiya. Tinabangan asin prinotektaran ni Jehova si David puon pagkaumboy. (Sal. 22:9, 10) Siguradong an siring na paghurop-hurop nagpakusog kan pagtitiwala ni David ki Jehova!

6. Pag nakakamati kita nin takot, ano an makakatabang sato na magtiwala ki Jehova?

⁶ Pag natatakot ka, haputon an saimong sadiri, ‘Ano na an ginibo ni Jehova?’ Pag-isipan an manungod sa mga linalang niya. Halimbawa,  kun ‘pagmamasdan tang marhay’ kun paano ni Jehova inaataman an mga gamgam saka an mga burak—na dai man linalang uyon saiyang ladawan saka mayo man nin kakayahan na magsamba sa saiya—mapapakusog ta an satong pagtitiwala na aatamanon niya man kita. (Mat. 6:25-32) Pag-isipan man kun ano an ginibo ni Jehova para sa saiyang mga parasamba. Puwede mong pag-adalan an sarong karakter sa Bibliya na nagpahiling nin makusog na pagtubod, o puwede mong basahon an eksperyensiya nin sarong lingkod ni Jehova sa modernong panahon. a Saro pa, hurop-hurupon kun paano ka inataman ni Jehova kaidto. Paano ka niya tinabangan na maaraman an katotoohan? (Juan 6:44) Paano niya sinimbag an mga pamibi mo? (1 Juan 5:14) Paano ka nakikinabang sa aroaldaw huli sa sakripisyo kan saiyang namumutan na Aki?​—Efe. 1:7; Heb. 4:14-16.

7. Paano an eksperyensiya ni Daniel nakatabang ki Vanessa na madaog an saiyang takot?

⁷ Si Vanessa, b sarong sister sa Haiti, napaatubang sa nakakatakot na sitwasyon. Sarong lalaki sa saindang komunidad an nag-aapod saiya aroaldaw saka nagpapadara nin mensahe asin pinipirit siya kaini na makipagrelasyon saiya. Marigon na nagsayuma si Vanessa. Pero lalo pang nagin agresibo an lalaki asin tinakot pa ngani siya kaini. “Natakot ako,” an sabi ni Vanessa. Paano niya nalabanan an saiyang takot? Naggibo siya nin praktikal na mga lakdang para protektaran an sadiri niya. Sarong elder an nagtabang saiya para kontakon an awtoridad. Pero isinaisip man ni Vanessa kun paano ni Jehova prinotektaran an mga lingkod niya kaidto. “An inot na tawong naisip ko iyo si propeta Daniel,” an sabi ni Vanessa. “Inapon siya sa lungib nin gutom na mga leon dawa ngani inosente siya. Alagad, prinotektaran siya ni Jehova. Nakiulay ako ki Jehova asin ipinabaya ko na sa saiya an gabos. Pagkatapos kaiyan, nawara na an takot ko.”​—Dan. 6:12-22.

ANO AN GINIGIBO NI JEHOVA NGUNYAN?

8. Sa ano kumbinsido si David? (Salmo 56:8)

⁸ Dawa ngani namemeligrong marhay si David kan yaon siya sa Gat, dai siya nagpadara sa saiyang takot. Imbes, nagpokus siya sa kun ano an ginigibo ni Jehova para sa saiya kan panahon na iyan. Aram ni David na ginigiyahan saka pinoprotektaran siya ni Jehova asin na nasasabutan Niya an saiyang mga namamatian. (Basahon an Salmo 56:8.) Igwa man nin mga amigo si David, arog ni Jonathan asin an Halangkaw na Saserdoteng si Ahimelec, na maimbod na nagsuportar sa saiya asin nagtao nin praktikal na tabang. (1 Sam. 20:41, 42; 21:6, 8, 9) Asin dawa ngani gusto siyang gadanon ni Hading Saul, nakadulag si David. Kumbinsido si David na aram na marhay ni Jehova an inaagihan niyang pagbalo asin kun ano an namamatian niya huli kaiyan.

9. Ano an nahihiling ni Jehova sa kada saro sa sato?

⁹ Pag napaatubang ka sa sarong pagbalo asin dahil diyan makamati ka nin takot, tandaan na nahihiling ni Jehova an inaagihan mo asin kun ano an namamatian mo huli kaiyan. Halimbawa, nahiling ni Jehova bako lang an pagmaltrato sa mga Israelita sa Ehipto kundi pati man “kun gurano kakulog kan pig-aagihan ninda.” (Exo. 3:7) Sa saiyang kanta, sinabi ni David na nahiling ni Jehova an saiyang “kasakitan” asin an saiyang “grabeng kapurisawan.” (Sal. 31:7) Asin pag nagsasakit an banwaan nin Diyos—dawa pa huli iyan sa saindang salang mga desisyon—“[si Jehova] nasasakitan man.” (Isa. 63:9) Pag natatakot ka, nasasabutan ni Jehova kun ano an namamatian mo asin gustong-gusto niyang tabangan kang malabanan an mga ikinakatakot mo.   

10. Taano ta kumbinsido ka na nahihiling ka ni Jehova asin na tatabangan ka niya na makayanan an ano man na kasakitan?

 ¹⁰ Pero tibaad maisip mo kun paano ka tinatabangan ni Jehova mantang nag-aagi ka nin grabeng pagbalo. Kaya hagadon saiya na tabangan kang mahiling kun paano ka niya sinusuportaran. (2 Ha. 6:15-17) Dangan pag-isipan: An sarong pahayag daw o komento sa pagtiripon kan kongregasyon nakapakusog sa saimo? Nadagka ka daw kan sarong publikasyon, video, o sarong orihinal na kanta? May naghiras daw saimo nin sarong nakakapakusog sa buot na mga tataramon o teksto? Tibaad madali ta sanang mabaliwala an satong mamumuton na kasararuan nin magturugang asin an espirituwal na kakanon na nareresibi ta. Alagad ekstraordinaryong mga regalo iyan hali ki Jehova. (Isa. 65:13; Mar. 10:29, 30) Patunay an mga iyan na namumutan ka niya. (Isa. 49:14-16) Patunay man iyan na maninigo siya sa saimong pagtitiwala.

11. Ano an nakatabang ki Aida na madaog an saiyang takot?

¹¹ Si Aida, na nakaistar sa Senegal, nagpokus sa kun paano siya tinabangan ni Jehova kan nag-agi siya nin sarong pagbalo. Huling siya an panganay, inaasahan kan mga magurang niya na magkakaigwa siya nin marahay na trabaho para masustentuhan an sadiri niya saka an saiyang pamilya. Pero pagkatapos niyang pasimplehon an buhay niya para makapagpayunir, nasakitan sa pinansiyal si Aida. Kaya naanggot saiya an pamilya niya saka pigkritikar siya. “Natakot ako na ’baad dai ko matabangan an mga magurang ko saka ’baad maanggot sako an gabos,” an sabi niya. “Binasol ko pa ngani si Jehova ta tinugutan niyang maggrabe an sitwasyon.” Dangan nadangog niya an sarong pahayag sa pagtiripon. “Ipinagirumdom kan ispiker na ano man na kulog an namamatian ta sa satong puso, aram an mga iyan ni Jehova. Padiit-diit, paagi sa sadol kan mga elder saka kan iba pa, napakusog giraray an pagtitiwala ko na namumutan ako ni Jehova. Nagpuon akong mamibi ki Jehova na may mas makusog na kumpiyansa, saka nakamati ako nin urog na katuninungan mantang nahihiling na sinisimbag Niya an mga pamibi ko.” Kan huri, nakahanap si Aida nin trabaho na nakatabang bako lang para masuportaran an pagpapayunir niya kundi pati man sa pinansiyal na pangangaipo kan mga magurang niya saka kan iba. “Nanudan kong lubos na magtiwala ki  Jehova,” an sabi niya. “Sa ngunyan, pakatapos na mamibi, sa parati nawawara an mga ikinakatakot ko.”

ANO AN GIGIBUHON NI JEHOVA SA MAABOT?

12. Uyon sa Salmo 56:9, sa ano kumbinsido si David?

¹² Basahon an Salmo 56:9. Mababasa sa bersikulong ini an saro pang paagi kun paano nadaog ni David an takot niya. Dawa ngani nasa peligro pa an buhay niya, hinurop-hurop niya kun ano an gigibuhon ni Jehova sa maabot para sa saiya. Aram ni David na ililigtas siya ni Jehova sa tamang panahon. Kun sabagay, ihinayag na ni Jehova na si David an sunod na magigin hadi kan Israel. (1 Sam. 16:1, 13) Para ki David, pag nanuga si Jehova garo man sana iyan nautob na.

13. Sa ano kita makakapagtiwala ki Jehova?

¹³ Ano an ipinanuga ni Jehova na gigibuhon niya para saimo? Dai ta inaasahan na ililikay niya kita sa gabos na problema. c Minsan siring, ano man na kasakitan an tibaad mapaatubang saimo ngunyan sa sistemang ini nin mga bagay, hahalion ni Jehova an mga iyan sa maabot na bagong kinaban. (Isa. 25:7-9) Makapangyarihan na marhay an satong Kaglalang kaya kayang-kaya niyang buhayon an mga gadan, paumayan an satong mga hilang, asin paraon an gabos na nagkokontra.​—1 Juan 4:4.

14. Ano an puwede tang hurop-hurupon?

¹⁴ Pag nakakamati ka nin takot, hurop-hurupon an gigibuhon ni Jehova sa maabot. Isipon kun ano an mamamati mo pag mayo na si Satanas, pag an mga maraot nasalidahan na nin matanos na mga tawo, asin pag padikit-dikit nang nawawara kada aldaw an pagkabakong perpekto. Ipinahiling sa sarong dramatization sa pangrehiyon na kumbensiyon kan 2014 kun paano ta puwedeng hurop-hurupon an satong paglaom. Ipinahiling kan sarong ama sa saiyang pamilya kun paano puwedeng basahon sa ibang paagi an mga tataramon sa 2 Timoteo 3:1-5 kun an magigin buhay sa Paraiso an ihinula sa mga bersikulong iyan: “Sa bagong kinaban, magigin maugmang marhay na panahon iyan. Huli ta an mga tawo magigin mamumuton sa kapwa, mamumuton sa espirituwal na mga kayamanan, hababa an buot, mapakumbaba, mga paraumaw sa Diyos, masinunod sa mga magurang, mapagpasalamat, maimbod, mapagpadangat na marhay sa saindang pamilya, bukas sa kasunduan, pirming nagtataram nin positibo dapit sa iba, may pagpupugol sa sadiri, mahuyo, mamumuton sa karahayan, mapagkakatiwalaan, mapagpahunod, may kababaan an pag-iisip, mamumuton sa Diyos imbes na sa pagpasiram-siram, totoong may debosyon sa Diyos; asin magin dayupot ka sa mga tawong ini.” Ipinapakipag-ulay mo daw sa saimong pamilya o sa saimong mga kapagtubod kun ano an magigin buhay sa bagong kinaban?

15. Dawa ngani nakamati nin takot si Tanja, ano an nakatabang saiya na madaog iyan?

¹⁵ Sarong sister sa North Macedonia na an pangaran Tanja an nagibong madaog an saiyang takot paagi sa paghurop-hurop sa maabot na mga bendisyon. Kontrang marhay an mga magurang niya sa pag-adal niya nin Bibliya. Inistorya niya: “An nagkapira sa mga bagay na ikinakatakot ko talagang nangyari. Binubugbog ako ni Mama kada pagpuli ko haling pagtiripon. Tinakot ako kan mga magurang ko na gagadanon ninda ako pag nagin Saksi ni Jehova ako.” Kan huri, pinalayas si Tanja kan mga magurang niya. Ano an nagin reaksiyon niya? Sinabi niya: “Nagpokus ako sa dakulang kaugmahan na mamamatian ko nin daing katapusan huli sa pagpapadanay ko kan sakong integridad. Inisip ko man kun paano ako babalusan ni Jehova sa bagong kinaban para sa ano man na puwedeng mawara sako sa sistemang ini asin kun paano an gabos na maraot na bagay malilingawan na.” Pinagdanay ni Tanja an saiyang integridad. Asin sa tabang  ni Jehova, nakahanap siya nin maiistaran. Sa ngunyan, maugmang naglilingkod si Tanja nin bilog na panahon kaiba an saiyang agom na sarong maimbod na brother.

PAKUSUGON AN SAIMONG PAGTITIWALA NGUNYAN

16. Ano an makakatabang sa sato na magdanay na makusog an buot pag nahihiling na niyato an mga pangyayari na ihinula sa Lucas 21:26-28?

¹⁶ Sa panahon nin dakulang kasakitan, an mga tawo sa pangkagabsan “magkakadirismayo . . . sa takot.” Pero an banwaan nin Diyos magdadanay na marigon asin makusog an buot. (Basahon an Lucas 21:26-28.) Taano ta dai kita mapadara sa takot? Huling nanudan na niyato na magtiwala ki Jehova. Si Tanja, na sinambit kasubago, nagsabi na nakakatabang saiya an mga eksperyensiya niya kaidto para maatubang an iba pang masakit na mga sitwasyon. “Nanudan ko na sa ano man na sitwasyon, kaya kitang tabangan ni Jehova para mapangganahan iyan,” an sabi niya. “Kun minsan garo baga nagigibo kan iba na kontrulon an mga bagay-bagay, pero an totoo, sagkod lang sa kun ano an itinutugot ni Jehova an magigibo ninda. Asin dawa ngani masakit an sarong pagbalo, may katapusan iyan.”

17. Paano makakatabang sa sato an teksto ta para sa taon 2024? (Hilingon an ritrato sa cover.)

¹⁷ Dakul kitang puwedeng ikatakot ngunyan. Pero arog ni David, magigibo ta na dai magpadaog sa takot. An satong teksto para sa taon 2024 sarong pamibi ni David ki Jehova: “Pag natatakot ako, nagtitiwala ako sa saimo.” (Sal. 56:3) Arog kan sinabi nin sarong reperensiya sa Bibliya manungod sa bersikulong ini, “dai pigparaisip [ni David] an saiyang mga ikinakatakot asin dai man siya nagparapokus sa saiyang mga problema kundi nagsarig siya sa saiyang Paratubos na iyo an maligtas sa saiya.” Sa maabot na mga bulan, pag-isipan an satong teksto kan taon lalo na pag napapaatubang ka sa nakakatakot na mga sitwasyon. Magtao nin panahon para hurop-hurupon an mga ginibo ni Jehova kaidto, sa ngunyan, asin sa maabot. Dangan, arog ni David, masasabi mo: “Sa Diyos ako nagtitiwala; dai ako natatakot.”​—Sal. 56:4.