1. ?From wanem samtaem yumi fraet?

 YUMI evriwan i fraet samtaem. I tru, taem yumi stadi Baebol, yumi no moa fraet long ol dedman, ol rabis spirit, mo samting we bambae i hapen long fiuja. Be yumi laef yet long wan taem we “plante samting i mekem [man i] fraet,” olsem wo, fasin blong brekem loa, mo ol sik. (Luk 21:11) Maet yumi fraet tu long ol man, olsem ol haeman blong gavman we oli spolem yumi o ol memba blong famle we oli agensem tru wosip. Sam oli wari se bambae oli no stanap strong long wan trabol we oli fesem naoia, o wan we oli save fesem long fiuja.

2. Tokbaot situesen blong Deved taem hem i stap long Gat.

² I gat sam taem we Deved tu i fraet. Eksampol, taem Sol i stap ronem Deved blong kilim hem, hem i ronwe i go long Gat we i wan taon blong ol man Filistia. I no longtaem afta, king blong Gat hemia Akis, i faenemaot se Deved i wan strong man blong faet we i kilim “plante taosen” man Filistia oli ded. Taswe Deved “i fraet tumas.” (1 Saml. 21:​10-12) Hem i wari long samting we Akis bambae i mekem long hem. ?Wanem i halpem Deved blong winim fraet ya?

3. Folem Ol Sam 56:​1-3, 11, ?olsem wanem Deved i winim fraet blong hem?

³ Long Ol Sam 56, Deved i tokbaot ol filing we hem i gat, taem hem i stap long Gat. Long sam ya, Deved i talemaot klia samting we i mekem hem i fraet, be tu hem i eksplenem samting we i halpem hem blong winim fraet ya. Taem Deved i fraet, hem i  trastem Jehova. (Ridim Ol Sam 56:​1-3, 11.) Hem i gat gudfala risen blong trastem Jehova. Taswe wetem help blong Jehova, Deved i plan blong mekem wan samting we i narakaen. !Hem i mekem olsem se hem i krangke! Mo plan blong hem i wok. Ale, Akis i no moa gat plan blong kilim hem, be hem i wantem se Deved i mas aot, taswe Deved i naf blong ronwe.—1 Saml. 21:13–22:1.

4. ?Olsem wanem yumi save trastem Jehova moa? Talem wan pijatok.

⁴ Yumi tu, yumi save winim fraet taem yumi trastem Jehova. ?Be olsem wanem blong trastem moa Jehova, speseli taem yumi fraet? Tingbaot pijatok ya. Sipos yu faenemaot se yu gat wan sik, fastaem maet yu fraet. Be yu save winim fraet ya sipos yu trastem dokta blong yu. Maet hem i bin halpem plante man finis we oli gat sem sik olsem yu. Hem i lesin gud long yu mo i soemaot se i kasemsave long filing blong yu. Mo maet hem i talem wan tritmen long yu we i wok gud finis long ol narafala. Long sem fasin, yumi save trastem moa Jehova, taem yumi tingbaot samting we hem i mekem finis, samting we hem i stap mekem naoia, mo samting we bambae hem i mekem long fiuja. Hemia nao samting we Deved i mekem. Naoia bambae yumi tokbaot sam long ol tok blong Deved long Ol Sam 56, mo luk olsem wanem yu tu yu save trastem moa Jehova, mo winim fraet we yu gat.

?JEHOVA I MEKEM WANEM FINIS?

5. ?Deved i mekem wanem blong winim fraet blong hem? (Ol Sam 56:​12, 13)

⁵ Nating se laef blong Deved i stap yet long denja, be hem i gohed blong tingbaot ol samting we Jehova i mekem finis. (Ridim Ol Sam 56:​12, 13.) Hemia samting we Deved i stap mekem long ful laef blong hem. Eksampol, samtaem hem i tingting dip long ol nambawan wok blong Jehova, mo hemia i rimaenem hem se Jehova i gat bigfala paoa mo intres bigwan long ol man. (Sam 65:​6-9) Mo tu, hem i tingting dip long ol samting we Jehova i mekem blong givhan long ol narafala. (Sam 31:19; 37:​25, 26) Antap long hemia, hem i tingting dip long samting we Jehova i mekem finis blong givhan long hem. Jehova i sapotem mo i protektem Deved stat taem hem i pikinini.  (Sam 22:​9, 10) I sua se taem Deved i tingting dip long ol samting ya, hemia i mekem hem i trastem Jehova moa.

6. ?Taem yumi fraet, yumi save mekem wanem blong trastem Jehova?

⁶ Taem yu harem se yu fraet, askem yu wan se, ‘?Jehova i mekem wanem finis?’ I gud yu tingbaot ol samting we hem i krietem. Eksampol, Jehova i no wokem ol pijin mo ol flaoa long pija blong hem, mo oli no save wosipim hem. Be taem yumi “lukluk gud” olsem wanem Jehova i kea long olgeta, bambae yumi trastem moa se hem i naf blong lukaot gud long yumi tu. (Mat. 6:​25-32) Mo tu, tingbaot samting we Jehova i mekem finis long ol man we oli wosipim hem. Maet yu stadi long eksampol blong wan man long Baebol we i soemaot strong bilif, o yu ridim ekspiriens blong wan man blong Jehova long taem blong yumi tede. a Antap moa, tingting dip long samting we Jehova i mekem finis blong lukaot gud long yu. Tingbaot olsem wanem hem i pulum yu yu kam long trutok. (Jon 6:44) Tingbaot olsem wanem hem i stap ansarem ol prea blong yu. (1 Jon 5:14) Mo tingbaot olsem wanem sakrefaes blong Pikinini blong hem i stap givhan long yu evri dei.—Efes. 1:7; Hib. 4:​14-16.

7. ?Olsem wanem stori blong profet Daniel i halpem Vanesa blong winim fraet blong hem?

⁷ Vanessa, b wan sista long Haiti, i fesem wan situesen we i mekem hem i fraet. Wan man long komuniti blong hem i stap kolem hem mo teksem hem evri dei, blong traem fosem hem blong tufala i fren. Be Vanessa i talem stret se hem i no wantem. Nao man ya i kros tumas mo i talem se bambae i kilim hem. Vanessa i talem se: “Mi fraet we mi fraet.” ?Olsem wanem Vanesa i winim fraet ya? Hem i mekem sam samting blong protektem hem. Mo wan elda i halpem hem blong toktok wetem ol haeman. Mo tu, hem i tingbaot olsem wanem Jehova i bin protektem ol man blong hem bifo. Vanessa i se: “Faswan man we mi tingbaot, hemia profet Daniel. Oli sakem hem i go long wan hol we i fulap long ol laeon we oli hanggri, nating se hem i no mekem wan samting we i rong. Be yet, Jehova i lukaot gud long hem. Taswe, mi askem Jehova blong i lukluk long situesen blong mi tu. Nao biaen, mi no moa fraet.”—Dan. 6:​12-22.

?JEHOVA I STAP MEKEM WANEM NAOIA?

8. ?Deved i sua long wanem? (Ol Sam 56:8)

⁸ Nating se laef blong Deved i stap long denja taem hem i stap long Gat, be hem i no tingting tumas long samting ya. Hem i jusum blong tingbaot samting we Jehova i stap mekem long hem long taem ya. Deved i haremsave se Jehova i stap lidim mo protektem hem, mo i kasemsave long ol filing blong hem. (Ridim Ol Sam 56:8.) Mo tu, Deved i gat ol fren, olsem Jonatan mo Hae Pris Ahimelek, we oli stap sapotem hem oltaem mo halpem hem. (1 Saml. 20:​41, 42; 21:​6, 8, 9) Mo nating se King Sol i wantem kilim Deved i ded, be hem i ronwe. Deved i sua se Jehova i save samting we i stap hapen long hem, mo i kasemsave long ol filing blong hem.

9. ?Jehova i luk wanem long yumi wanwan?

⁹ Taem yu fesem wan trabol we i mekem yu fraet, tingbaot se Jehova i luk mo i kasemsave long filing blong yu. Eksampol, Jehova i luk trabol we ol man Isrel oli fesem long Ijip, mo hem i kasemsave filing blong olgeta se “oli harem nogud tumas.” (Eks. 3:7) Deved i singsing  se Jehova i luk “ol trabol” blong hem mo i save gud ‘samting we i mekem hem i harem nogud bitim mak.’ (Sam 31:7) Mo taem ol man blong God oli safa from ol nogud desisen we oli mekem, “hem i harem nogud from.” (Aes. 63:9) Taem yu fraet, Jehova i kasemsave long filing blong yu mo i wantem tumas blong halpem yu blong winim fraet ya.

10. ?From wanem yu sua se Jehova i kea long yu, mo bambae i halpem yu blong dil wetem eni trabol?

¹⁰ Taem yu fesem wan trabol we i mekem yu fraet, maet yu no luksave we Jehova i stap halpem yu. Taswe i gud yu askem hem blong i givhan long yu blong luksave se hem i stap halpem yu. (2 King 6:​15-17) Biaen, tingbaot se: ?I gat wan tok o wan ansa long miting we i mekem bilif blong yu i strong? ?I gat wan buk, wan video, o wan original singsing blong yumi we i leftemap tingting blong yu? ?I gat wan man i serem wan naesfala vas wetem yu blong leftemap tingting blong yu? Maet i isi blong yumi ting nating long lav blong ol brata mo sista, mo ol kakae long saed blong spirit we yumi kasem. Be hemia ol gudfala presen we i kam long Jehova. (Aes. 65:13; Mak 10:​29, 30) Mo oli pruvum klia se Jehova i kea long yu. (Aes. 49:​14-16) Mo se yumi save trastem hem.

11. ?Wanem i halpem Aida blong winim fraet blong hem?

¹¹ Aida we i laef long Senegal, i luk olsem wanem Jehova i sapotem hem, taem hem i fesem wan traem. From we hem i fasbon, perens blong hem i wantem se hem i winim naf mane blong lukaot long hem wan mo famle. Be afta we hem i mekem laef blong hem i kam simpol blong i save paenia, hem i fesem problem blong mane. Famle blong hem i kros mo oli tok nogud long hem. Hem i se: “Mi mi fraet se bambae mi no naf blong halpem perens blong mi mo se evriwan bambae oli no moa wantem mi. Mo tu, mi blemem Jehova taem ol samting oli kam mowas.” Be biaen Aida i harem wan tok long wan miting. Hem i se: “Brata we i givim tok i rimaenem mifala se Jehova i save gud samting we i mekem yumi wari o fraet. Sloslo advaes we ol elda mo ol narafala oli givim, i mekem mi luksave se Jehova i lavem mi. Taem mi prea, naoia mi stat blong trastem moa se Jehova bambae i halpem mi, mo mi gat pis taem mi luk se hem i stap ansarem ol prea blong mi.” Samtaem biaen, Aida i faenem wan  wok we i naf blong sapotem hem long wok blong paenia mo perens blong hem mo ol narafala. Hem i se: “Mi lanem blong trastem Jehova fulwan. Naoia, afta we mi prea, mi no moa fraet.”

?JEHOVA BAMBAE I MEKEM WANEM LONG FIUJA?

12. Folem Ol Sam 56:​9, ?Deved i sua long wanem?

¹² Ridim Ol Sam 56:9. Vas ya i soemaot wan narafala samting we i halpem Deved blong winim fraet we hem i gat. Nating se laef blong hem i stap yet long denja, be hem i tingting dip long samting we Jehova bambae i mekem yet long hem long fiuja. Deved i save se Jehova bambae i sevem hem long stret taem. Antap long hemia, Jehova i bin talemaot se Deved bambae i kam nekiswan king blong Isrel. (1 Saml. 16:​1, 13) Deved i sua fulwan se wanem samting we Jehova i promes blong mekem bambae i mas kamtru.

13. ?Yumi sua se Jehova i naf blong mekem wanem?

¹³ ?Jehova i promes blong mekem wanem long yu? Yumi save se Jehova bambae i no blokem evri trabol we bambae oli kasem yumi. c Be tingbaot se nomata wanem trabol yu fesem naoia, Jehova bambae i finisim fulwan long niufala wol we i stap kam. (Aes. 25:​7-9) Krieta blong yumi i gat paoa blong mekem ol dedman oli laef bakegen, hilim ol sik, mo tekemaot ol man blong agens.—1 Jon 4:4.

14. ?Yumi save tingting dip long wanem?

¹⁴ Taem yu fraet, tingbaot samting we Jehova bambae i mekem long fiuja. Tingbaot filing we bambae yu gat taem Setan i no moa stap, ol gudfala man nomo oli stap, mo evri dei sin i stap lus sloslo. Wan pleplei long bigfala asembli blong 2014, i soemaot olsem wanem yumi save tingting dip long hop blong yumi. Wan papa i ridim vas blong 2 Timoti 3:​1-5 long famle blong hem long wan defren wei, mo i mekem oli tingbaot se laef long Paradaes bambae i olsem wanem. Hem i ridim vas ya olsem: “Long niufala wol, laef bambae i gud tumas. Bambae ol man oli tingbaot ol narafala, mo bambae oli laekem trutok, oli no tok flas, tingting blong olgeta i stap daon, oli no tok nogud long ol man, oli obei long papa mo mama blong olgeta, oli gat tangkiu, oli holemstrong long ol narafala, oli lavem famle blong olgeta, oli gat wan tingting, oli no spolem nem blong narafala, oli bos long tingting, oli kwaet man, mo oli laekem ol gudfala fasin. Narafala i save trastem olgeta, oli kea, oli rere blong lego prapa tingting blong olgeta, tingting i no go antap, oli lavem God i bitim ol samting we oli save harem gud long olgeta, mo God i gat paoa long laef blong olgeta. Bambae yu mas go klosap long ol man olsem.” ?Yu yu tokbaot wetem famle blong yu o ol brata mo sista se laef bambae i olsem wanem long niufala wol?

15. ?Wanem i halpem Tanja blong winim fraet blong hem?

¹⁵ Wan sista long Not Masedonia we nem blong hem Tanja, i winim fraet we hem i gat, taem i tingting dip long ol blesing blong fiuja. Perens blong hem i agensem hem bigwan from we hem i stap stadi Baebol. Hem i talem se: “Sam long ol samting we mi fraet se bambae oli hapen long mi, oli hapen. Evritaem we mi kambak long miting, mama i stap kilim mi. Mo oli talem se bambae oli kilim ded mi sipos mi kam wan Witnes blong Jehova.” Biaen, oli ronemaot Tanja long haos. ?Long taem ya hem i mekem wanem? Hem i se: “Mi tingbaot moa glad we bambae mi kasem blong olwe, taem mi jusum blong holemstrong long Jehova. Mo mi tingbaot se Jehova bambae i blesem mi long niufala wol from ol samting we maet mi lego naoia, mo bambae mi no moa tingbaot ol nogud samting we i hapen.” Yes, Tanja i gohed blong holemstrong. Mo wetem help blong  Jehova, hem i faenem wan ples blong stap long hem. Tede, Tanja i maredem wan gudfala brata mo tufala i glad blong mekem wok blong Jehova fultaem tugeta.

TRASTEM JEHOVA MOA

16. ?Wanem bambae i halpem yumi blong no fraet taem yumi luk ol samting we Luk 21:​26-28 i tokbaot?

¹⁶ Long taem blong bigfala trabol, ol man bambae “oli hafded from we oli fraet tumas.” Be ol man blong God bambae oli stanap strong mo oli no fraet. (Ridim Luk 21:​26-28.) ?From wanem? From we yumi lanem finis blong trastem Jehova. Tanja we yumi tokbaot hem finis, i talem se ol trabol we hem i bin fesem bifo, oli halpem hem blong fesem ol trabol we oli had moa. Hem i talem se: “Mi lanem se Jehova bambae i halpem yumi blong stanap strong long eni trabol, mo bambae hem i blesem yumi. Maet samtaem i luk olsem se ol narafala oli gat paoa i bitim yumi, be Jehova i gat moa paoa i bitim olgeta. Mo nating se maet wan trabol i had, be bambae i finis.”

17. ?Olsem wanem stamba vas blong yia 2024 i save halpem yumi? (Yu luk pija long fran pej.)

¹⁷ Tede i nomol blong fraet. Be olsem Deved, yumi save blokem fraet blong i no kontrolem yumi. Stamba vas blong yia 2024 i wan prea we Deved i mekem long Jehova we i se: “Taem mi fraet, mi trastem yu.” (Sam 56:3) Wan Baebol skola i tokbaot vas ya se, Deved “i no gohed blong tingbaot ol samting we i mekem hem i fraet, o ol problem blong hem, be hem i dipen long Man ya we bambae i sevem hem.” Long ol manis we i kam, i gud yu gohed blong tingbaot stamba vas blong yia ya, speseli taem yu fesem ol situesen we i mekem yu fraet. Tekem taem blong tingbaot ol samting we Jehova i mekem bifo, naoia, mo long fiuja. Long rod ya, yu save talem olsem Deved se: “God ya, mi mi trastem hem, mo mi no fraet.”—Sam 56:4.