1. Engkai maka mon-mon mbiar kita?

 MON-MON, kerina kalak pasti mbiar. Memang perban kita enggo erlajar Pustaka, lanai kita mbiar man kalak mate, begu-begu, ntah pe kerna kai si terjadi bas wari si pepagi. Tapi kita nggeluh bas wari-wari pendungi denga, janah banci saja siidah “kejadin-kejadin si erban mbiar,” bagi perang, kejahaten, ras penakit. (Luk. 21:11) Mon-mon kita pe mbiar man jelma, bagi pemerentah si nganiaya kita ntah pe anggota keluargata si nentang ibadatta. Lit ka si kuatir la banci setia ngadapi tentangen, la soal gundari ntah pe bas wari si pepagi.

2. Kai si iadapi Daud sanga ia i Gat?

² Daud pe pernah mbiar. Bas sada wari, usahaken Raja Saul munuh Daud, kiam Daud ku Gat, kota kalak Pilisti. Tapi ibegi Akis, raja Gat, maka Daud eme pejuang si hebat si pernah munuh “puluhen ribu” kalak Pilisti seh ngasa rende kalak muji ia. “Mbiar kel” Daud perban ukurina kai kari si banci ilakoken Akis man bana. (1 Sam. 21:​10-12) Uga Daud naluken kebiarenna?

3. Menurut Masmur 56:​1-3, 11, uga Daud naluken kebiarenna?

³ Bas Masmur 56, iceritaken Daud uga perasanna sanga ia i Gat. Labo saja ijelaskenna engkai maka ia mbiar, tapi turikenna ka uga ia banci naluken kebiarenna e. Sanga mbiar Daud, tek ia man Jahwe janah terbukti maka  Jahwe e terteki. (Baca Masmur 56:​1-3, 11.) Alu penampat Jahwe, igunaken Daud taktik si tempa-tempa aneh. Ban-banna adon! Emaka lanai ianggap Akis ia jadi ancamen janah pangen kapna Daud lawes. Emaka la surung Daud ibunuh.—1 Sam. 21:13–22:1.

4. Uga carana gelah reh tekna kita man Jahwe? Ban perumpamanna.

⁴ Kita pe banci sitaluken kebiarenta adi tek kita man Jahwe. Tapi, uga carana gelah banci reh tekna kita man Jahwe, terlebih sanga mbiar kita? Perdiateken perumpaman enda. Adi ikataken man bandu maka kam kena penakit si mekelek, tangtangna banci saja mbiar kam. Tapi kebiaren e banci urak adi tek kam man dokterndu. Banci saja enggo enterem si ipepalemna si kena penakit si bage. Banci saja begikenna kam alu tutus. Emaka tek kam angkaina perasanndu. Banci saja isarankenna perawaten si enggo berhasil erban enterem kalak malem. Bage ka pe, banci kita reh tekna man Jahwe adi siukuri kai si enggo ilakokenNa, kai si sangana ilakokenNa, ras kai si nandangi ilakokenNa. E me si ukuri Daud. Mari sibahas piga-piga si ikatakenna bas Masmur 56. Janahta mbahas si e, cuba ukuri uga kam banci reh tekna man Jahwe ras naluken kebiarenndu.

KAI SI ENGGO ILAKOKEN JAHWE?

5. Kai saja si ukuri Daud guna naluken kebiarenna? (Masmur 56:​12, 13)

⁵ Amin pe terancam kegeluhen Daud, lalap ukurina kai si enggo ilakoken Jahwe. (Baca Masmur 56:​12, 13.) Si e me si lalap ukuri Daud segedang geluhna. Contohna, mon-mon ukurina kerna ciptan Jahwe. Si e ngingetken ia maka Jahwe e madakuasa janah ermediate kel man jelma. (Ms. 65:​6-9) Ukuri Daud ka kai si enggo ilakoken Jahwe man kalak si deban. (Ms. 31:19; 37:​25, 26) Si pentingna, ukurina kai si enggo ilakoken Jahwe man bana. Mulai kin kitik-kitik nari, lalap idukung Jahwe Daud janah ilindungiNa ia. (Ms. 22:​9, 10) Kerina e pasti erban Daud reh tekna man Jahwe.

6. Sanga mbiar kita, kai si banci nampati kita gelah tek man Jahwe?

 ⁶ Sanga kam mbiar, cuba ukuri kai si enggo ilakoken Jahwe. Banci ukurindu kerna ciptanNa. Contohna, “perdiateken” uga Jahwe ngurus keperlun perik-perik ras bunga-bunga, padahal perik ntah pe bunga e labo banci ngusih sipat-sipatNa ntah pe nembah Ia. Alu ngukuri si e, banci kita reh tekna man Jahwe maka pasti berekenNa keperlunta. (Mat. 6:​25-32) Ukuri ka kai si enggo lakoken Jahwe man umatNa. Banci pelajarindu salah sada tokoh bas Pustaka si kinitekenna luar biasa, ntah mbaca pengalamen salah sada umat Jahwe bas jaman gundari. a Selain si e, ukuri uga Jahwe enggo nampati kam sedekah enda. Contohna, uga nge Jahwe narik kam ku kebenaren? (Joh. 6:44) Uga Jahwe njawap totondu? (1 Joh. 5:14) Manpaat kai saja si gejapkenndu tiap wari arah pengorbanen AnakNa si keleng ateNa?—Ep. 1:7; Heb. 4:​14-16.

7. Uga pengalamen Nabi Daniel nampati Vanessa naluken kebiarenna?

⁷ Vanessa, b sekalak turang senina i Haiti, pernah ngadapi situasi si erban ia mbiar. Sekalak dilaki bas daerah inganna tading nelpon ia ras ngirim pesan man bana tiap wari. Lalap ipaksa dilaki e ia gelah erhubungen seks. Enggo itulak Vanessa ia alu tegas, tapi reh tutusna ate dilaki e maksa ia janah ancamna ia. Nina Vanessa, “Mbiar kel aku.” Uga Vanessa naluken kebiarenna? Usahakenna ngelindungi dirina. Contohna, alu penampat pertua, hubungina polisi. Ukurina ka uga Jahwe ngelindungi umatNa bas jaman si mbarenda. Nina Vanessa, “Mis kuinget kerna Nabi Daniel. Amin pe la ia ersalah, ibenterken ia ku lubang si mbages, si melala i je singa si melihe. Bas situasi si bage, ilindungi Jahwe ia. Emaka ertoto aku janah kubenterken masalah e man Jahwe. Kenca si e, lanai aku mbiar.”—Dan. 6:​12-22.

KAI SI SANGANA ILAKOKEN JAHWE?

8. Kerna kai nge Daud tek? (Masmur 56:8)

⁸ Amin pe iadapi Daud situasi si bahaya i Gat, la ia nggit italuken kebiarenna e. Lalap ukurina kai si sangana ilakoken Jahwe paksa si e. Banci gejapken Daud pengarak-ngarak Jahwe ras perlindungenNa. Itehna ka maka angkai Jahwe perasanna. (Baca Masmur 56:8.) Lit ka teman Daud bagi Jonatan ras Imam si Mbelin Ahimelek, si lalap mpegegehi ia ras nampati ia. (1 Sam. 20:​41, 42; 21:​6, 8, 9) Amin pe Daud iayak-ayak Raja Saul, tapi berhasil ia kiam. Tek ia maka iteh Jahwe kel uga kesusahenna e janah uga si e mpengaruhi perasanna.

9. Kai nge si iteh Jahwe kerna kita sekalak-sekalak?

⁹ Sanga adapindu kesusahen janah mbiar kam, ingetlah maka teh Jahwe kai si sangana iadapindu janah uga perasanndu. Labo saja merhat Jahwe meteh uga kalak Israel itindas i Mesir, tapi itehNa ka “uga suina akap kalak e.” (Kel. 3:7) Rende Daud kerna Jahwe nina, “IdahNdu kesusahenku, itehNdu uga latihna ukurku.” (Ms. 31:7) Selain si e, sanga adapi umat Dibata kesusahen perban  kesalahen kalak e, “Ia pe susah akapNa.” (Jes. 63:9) Jelas me, sanga mbiar kam, angkai Jahwe perasanndu janah merhat kel Ia nampati kam naluken kebiarenndu.

10. Engkai maka tek kam Jahwe ermediate man bandu janah lalap kam idukungNa?

¹⁰ Sanga adapindu situasi si erban kam mbiar, banci saja la idahndu uga Jahwe nampati kam. Emaka pindolah gelah sampatiNa kam ngidah penampatNa. (2 Raj. 6:​15-17) Kenca si e, cuba ukuri penungkunen enda: Lit nge khotbah ntah pe komentar bas perpulungen si mpegegehi kam? Lit nge publikasi, video, ntah pe lagu-lagu rohani si ngapuli kam? Lit nge turang senina si mereken ayat ntah pe kata-kata si mpegegehi kam? Banci jadi biasa saja siakap penampat arah turang senina ras pangan rohani si enggo sialoken. Tapi situhuna, kerina e eme pemere si luar biasa arah Jahwe. (Jes. 65:13; Mrk. 10:​29, 30) Si e mbuktiken maka ermediate Jahwe man bandu. (Jes. 49:​14-16) Si e pe mbuktiken maka Jahwe terteki.

11. Kai si nampati Aida naluken kebiarenna?

¹¹ Aida, si tading i Senegal, tehna maka Jahwe ndukung ia bas masa si susah. Ia anak sintua janah arapken orang tuana gelah biayaina bana bage pe orang tuana. Tapi kenca sederhanakenna geluhna gelah banci merintis, sitik ngenca senna. Emaka merawa keluargana man bana janah pandangina ia. Nina Aida, “Mbiar kel aku la banci nampati orang tuaku. Mbiar ka aku icakapken kalak. Kusalahken ka Jahwe perban pediatNa situasi e bage parahna.” Tapi kenca si e, ibegi Aida sada khotbah bas perpulungen. Nina, “Ingetken turang senina e aku maka iteh Jahwe kai pe si erban luka pusuhta. Dungna, perban nasehat arah pertua-pertua ras si debanna, mulihi aku tek maka keleng ate Jahwe aku. Sanga aku ertoto, tek aku maka begiken Jahwe aku. Kugejapken kedamen si luar biasa sanga kuidah totoku ijawap  Jahwe.” Bas pudi wari, idat Aida pendahin si erban banci ia terus merintis janah mbiayai orang tuana ras si debanna. Nina, “Enggo erlajar aku gelah tuhu-tuhu tek man Jahwe. Gundari kenca ertoto aku, biasana lanai aku mbiar.”

KAI SI NANDANGI ILAKOKEN JAHWE?

12. Menurut Masmur 56:​9, tek Daud kerna kai?

¹² Baca Masmur 56:9. Ayat enda ncidahken kai deba nari si nampati Daud naluken kebiarenna. Amin pe terancam denga geluhna, ukurina kai si nandangi ilakoken Jahwe man bana. Itehna maka selamatken Jahwe pagi ia bas waktu si tepat. Selain si e, enggo erjanji Jahwe maka Daud pagi si jadi raja bas Israel. (1 Sam. 16:​1, 13) Tek Daud maka kai pe si ijanjiken Jahwe pasti terjadi.

13. Kai si pasti ilakoken Jahwe?

¹³ Kai janji Jahwe man bandu? Labo lit ijanjiken Jahwe guna ngelindungi kita arah kerina masalahta. c Tapi, la soal kesusahen kai si adapindu bas doni si jahat enda, pasti masapken Jahwe pagi kerina bas doni si mbaru. (Jes. 25:​7-9) Pasti ipekeke Penciptata pagi kalak si enggo mate, pepalemNa penakitta, imasapkenNa kerina luka bas pusuhta, janah ikernepkenNa kerina kalak si nentang.—1 Joh. 4:4.

14. Kai saja si banci siukuri?

¹⁴ Sanga mbiar kam, cuba ukuri kai pagi si ilakoken Jahwe bas masa depan. Cuba bayangken uga pagi perasanndu sanga Setan enggo ikernepken, kalak jahat lanai lit, janah kalak si benar ngenca tading i je, ras manusia reh dekahna reh sempurnana. Bas pertemuan regional tahun 2014, lit sada adegan si ncidahken uga kita banci ngukuri arapenta. Bas adegan e, sekalak perbapan ras keluargana mbahas kira-kira uga nge isi 2 Timotius 3:​1-5 adi ayat e ncakapken kerna Pardis: “Meriah kel pagi bas doni si mbaru. Kerina kalak sikeleng-kelengen, meriah kapna ngelakoken kegiaten rohani, meteh bana, meteruk ukur, nggit muji Dibata, patuh man orang tua, nggit ngata bujur, setia, keleng atena keluargana, la mekeng, lalap cakapkenna si mehuli kerna kalak si deban, ngasup nguasai diri, lembut, ngena atena si mehuli, terteki, nggit talu, pentingen kapna kalak si deban asangken dirina, keleng atena Dibata labo kesenangen, janah tutus atena nembah Dibata. Tetaplah ndeher ras kalak si bage.” Rusur nge bahasndu ras keluargandu ntah pe ras turang senina kerna kegeluhen bas doni si mbaru pagi?

15. Kai si nampati Tania naluken kebiarenna?

¹⁵ Tania, sekalak turang senina arah Makedonia Utara, naluken kebiarenna alu ngukuri pasu-pasu bas wari si pepagi. Merawa kel orang tuana perban ia erlajar Pustaka. Nina, “Piga-piga hal si erban aku mbiar tuhu-tuhu terjadi. Pekpeki Mamak aku tiap mulih perpulungen. Iancam orang tuaku aku maka ibunuhna kari aku adi jadi Saksi Jahwe aku.” Dungna, ipelawes me Tania arah rumah nari. Uga tanggapenna? Nina, “Lalap kuinget maka pasti aku ermeriah ukur adi setia aku. Kuukuri ka uga pagi Jahwe ngupahi aku bas doni si mbaru perban kai si enggo kukorbanken bas doni si gundari. Kuteh maka kerina si la mehuli  pasti pagi ilupaken.” Berhasil Tania tetap setia. Alu penampat Jahwe, banci datna inganna tading. Gundari, enggo erjabu ia ras sekalak turang senina. Ngelayani kalak e bas dinas sepenuh waktu janah meriah ukur kalak e.

REH TEKNALAH MAN JAHWE GUNDARI NARI

16. Engkai maka banci kita tetap pang sanga ngidah kai si inubuatken bas Lukas 21:​26-28 terjadi?

¹⁶ Bas kiniseran si mbelin, “pingsan pagi kalak perban biarna.” Tapi umat Dibata tetap pang janah jurgak kalak e tedis. (Baca Lukas 21:​26-28.) Engkai maka la kita mbiar? Perban enggo erlajar kita guna tek man Jahwe. Tania si ituriken ndai ngataken maka kai si enggo adapina nampati ia ngadapi masalah si debanna. Nina ka, “Enggo kuidah maka la soal uga situasina, lalap isampati Jahwe kita janah ipasu-pasuNa. Mon-mon, tempa-tempa kalak si ngendaliken kita, tapi situhuna Jahwe nge si ngendalikenca, labo kalak e. Ugapa pe beratna kesusahen e, pasti nge pagi bene.”

17. Kai gunana adi siukuri ayat tahunenta tahun 2024? (Nen gambar sampul.)

¹⁷ Wajar nge adi lit kebiarenta. Tapi bali bagi Daud, banci sitaluken kebiarenta e. Ayat tahunenta 2024 ibuat arah toto Daud man Jahwe, nina, “Sanga mbiar aku, tek aku man baNdu.” (Ms. 56:3) Salah sada referensi Pustaka si ngomentari ayat e ngataken maka “labo lalap ukuri Daud kai si erban ia mbiar ntah pe ukurina lalap masalahna, tapi andalkenna Penyelamatna.” Ukurilah ayat tahunenta bas bulan-bulan si reh, terlebih sanga lit situasi si erban kam mbiar. Banlah waktundu guna ngukuri kai si enggo lakoken Jahwe mbarenda, gundari, bage pe bas wari si pepagi. Alu bage, banci ikatakenndu bagi si ikataken Daud, “Tek aku man Dibata, la aku mbiar.”—Ms. 56:4.