1. Ka uagu anihein lubéi dan wasandirun anufudei?

 ANIHEIN dan súngubei wagía sanditiwa anufudei. Furanguti, arufuda tani Bíbülia woun moun lumuti lan wanufudedun hawéi hilaaña, hawéi sífirigu wuribatiña ni luéi le lunbei liabin. Íbini ítara, wawinwanduña lidan aban dan le buinbei lau saragu “katei hanufunati”, kéiburi wuribu, anarimeni luma burí sandi (Luk. 21:11). Másiñati hanufude wamá hawéi gumadimatiña, waduheñu o amu burí gürigia ha múaranbaña tuma relihión inarünitu. Añahein gürigia nidiheritiña luagu siñabei lan hawanduni óuchawaguni le gádanbaliña guentó o le gayaraabei hásügürüni ámuñegü.

2. Ka asuseredubei dan le lachülürünbei Dawidi uburugu Gatü?

² Samina wamá luagu Dawidi, aban lubúein Bungiu le asandirubei anufudei luagu aban dan. Dan le léibaahanbalin urúei Saulu lun láfaruni hilagubei, aba lanurahan lidoun aban uburugu gíriti Gatü. Dan le líchugunbei Akisü le lurúeite Gatü fe luagun aban lan wügüri gawuribuhati Dawidi ani áfara lan meha “diisi-milu” filistéana, “aba lanufudedun” Dawidi saragu (1 Sam. 21:​10-12). Nidiheriti meha saragu luagu le gayaraabei ladügüni urúei ligía lun. Ka ladügübei Dawidi lun ganigi lan?

3. Según Sálumu 56:​1-3, 11, ka íderagubalin Dawidi lun manufudedun lan?

³ Lidan Sálumu 56, abahüdahati Dawidi furangu ida liña lan lasandiragun lungua dan le ñein lubéi lidan uburugu ligía. Afuranguagüda lumuti giñe luagu ka lan uagu hanufude lubéi ani ka lan íderagubalin lun lagidarun anufudei luéi: lafiñen luagu Heowá (aliiha huméi Sálumu 56:​1-3, 11). Ani buiti lidin lun lau katei le lanúadirubei ladügün. Lau lídehan Heowá, adügati Dawidi lun hasaminarun amu lǘlühali lan lau, ani buiti lasalirun sun katei. Lau larihini Akisü katei le, mabusenrunhali láfaruni Dawidi, lubaragiñe lira, busenrügüti lun ladisedun luéi. Ligíati, aba lanurahan Dawidi (1 Sam. 21:​13–22:1).

4. Ida luba gayara lan wederebudagüdüni wafiñen luagu Heowá? Ru humá aban hénpulu.

 ⁴ Gayaraati giñe líderaguniwa afiñeni le wasandirubei luagu Heowá lun manufudedun wamá. Gama lumoun, ida luba gayara lan wederebudagüdüni wafiñen luagu Heowá, dántima le wasandirun anufudei? Ru wamá aban hénpulu. Anhein adarirúa aban sandi wawagu, másiñati wanufudedun saragu. Gama lumoun, dan le lúhaburuguñadiwa lan aban surusia le buiti, chóuruti líderagubadiwa lan le lun darangilu wamá. Háfuga íderaguaali surusia ligía saragu gürigia ha gasandibalin ligiaméme sandi le wawagubei. Aganba lumuti le wariñagubei lun ani bereseti saragu lau le wasandirubei. Ani másiñati lariñagun woun líchuguba lan árani le íderagubaliña saragu gürigia. Susereti aban katei ítarati luma Heowá: laganwounduba wafiñen luagu ánhawa asaminara luagu le adüga láalibei, luagu le ladügübei guentó luma luagu le lunbei ladügüni ámuñegü wawagu. Ligía ladügübei Dawidi lidan Sálumu 56. Lidan awanha lan akutiha fiu bérusu lídangiñe Sálumu 56, samina wamá ida luba lan wederebudagüdüni wafiñen luagu Heowá luma lun manufudedun wamá.

KA MEHA LADÜGÜBEI HEOWÁ LIDAN DAN LE SÜGÜHALIBEI?

5. Luagu ka katei lararamagua Dawidi asaminara lun manufudedun lan? (Sálumu 56:​12, 13).

⁵ Íbini dencha lan libagari Dawidi, téniti Dawidi lun katei buiti le meha adüga láalibei Heowá lidan dan le sügühalibei (aliiha huméi Sálumu 56:​12, 13). Saminati meha Dawidi saragu luagu katei burí le lidan sun libagari. Kei hénpulu, anihein dan ráramaguati asaminara luagu le adüga láalibei Heowá, ani adügati katei le lun laritagun gabafu lan Heowá ani hínsiñe hamá sun gürigia lun (Sal. 65:​6-9). Ráramaguati meha giñe asaminara luagu le adüga láalibei hawagu amu (Sal. 31:19; 37:​25, 26). Ani díreiti dan lun lasaminarun luagu sun katei le adüga láalibei Heowá luagu lufulesein. Íderagua lumuti ani góunigi lumuti lúmagiñe ñǘraügili (Sal. 22:​9, 10). Chóuruti, lau lan lararamagun Dawidi asaminara luagu katei le, íderagua lani lun lafiñerun tídangiñe sun lanigi luagu Heowá.

6. Dan le wasandirun anufudei, kaba íderaguawa afiñera luagu Heowá?

⁶ Danme le hasandirun anufudei, álügüdagua humá hungua: “Ka meha ladügübei Heowá lidan  dan le sügühalibei?”. Luagu aban oubaü, samina humá luagu katei le adüga láalibei Heowá. Kei hénpulu, dan le wetenirun lun ida liña lan lóunigiruniña Heowá dunuru luma burí fuluri —íbini marufudun hamani ligaburi Heowá ani máhuduragun hagía lun—, aba lederebugudun wafiñen luagu lóunigirubadiwa lan giñe (Mat. 6:​25-32). Luagu amu oubaü, samina humá luagu le adüga láalibei Heowá hawagu lubúeingu. Másiñati gayara lan hakutihan aban hénpulu lánina afiñeni luagu aban hádangiñe lubúeingu Heowá ha lánina tidaani Bíbülia o haliihan aban sügǘ lani aban lubúein Heowá le lídangiñeti wadaani. a Lanwoun lira, samina humá luagu ida liña lan lóunigirunün Heowá darí guentó. Ida liña líderagunün asubudirei inarüni? (Huan 6:44). Ida liña lóunabuni hafurieidun? (1 Huan 5:14). Ida liña hasagarun buiti sagü weyu lídangiñe sákürifisiu le ladügübei Heowá lau lederegeruni Lisaani le hínsiñetimabei lun? (Efe. 1:7; Ebü. 4:​14-16).

7. Ida liña líderagunu le lásügürübei profeta Danieli Vanessa?

⁷ Samina wamá tuagu aban íbiri gíritu Vanessa, b to awinwanduboun Aití, to ásügürüboun lídangiñe aban sügǘ le adügübei lun tadiheridun saragu. Lidan fulasu le ñein lubéi tawinwanda, abürühati ani agúahati aban wügüri tun sagü weyu adügüdara tuagu lun tánharun lun lun ladariboun lan. Aba tariñagun furangu lun uá, gama lumoun, ábatima lagañidun darí lun lasiadirunu ladügüba lan wuribani tun. Ka tadügübei Vanessa lun manufudedun tan luéi? Adüga tumuti sun tiyaraati lun tóunigiragun tungua, ani aba líderagunu aban wéiyaali lidan afiñeni lun tayanuhan hama lúrudugu. Haritaguatu giñe ida liña lan lóunigiruniña Heowá lubúeingu lidan binadu dan. Ariñagatu: “Furumiñeti gürigia le ñǘbuinbei lidan nisaminan, profeta Danieli. Íbini madügün lan ni kata wuribati, aba háguruni lidoun aban fusu le buinbei hau liñún, lau sun lira sefu lumuti meha Heowá. Ariñaga numuti lun Heowá adüga naali lan sun niyaraati ani amuriahatina giñe luma lun líderagunina. Lárigiñe, aba manufudedunhadina lan” (Dan. 6:​12-22).

KA LADÜGÜBEI HEOWÁ GUENTÓ?

8. Ka lachoururubei Dawidi? (Sálumu 56:8).

⁸ Íbini lídanñein lan meha denchaü libagari Dawidi sun dan le laubei uburugu Gatü, mígiraguagüdünti lungua lun anufudei. Lubaragiñe lanufudedun, aba letenirun lun le ladügübei Heowá luagu lufulesein lidan dan ligía. Aba líchugun fe ladundehañein lan Heowá, lóunigiruñein lan ani gunfuranda lani le lasandirubei (aliiha huméi Sálumu 56:8). Resibiti giñe ídemuei luma gurasu hámagiñe lumadagu, kei burí lúmagiñe Yónatan luma lúmagiñe Aimelekü, fádiri le íñugutimati (1 Sam. 20:​41, 42; 21:​6, 8, 9). Íbini busén lan meha urúei Saulu láfaruni hilagubei, aba lanurahan Dawidi luéi. Chouru lumuti subudi lani Heowá sun le lásügürübei luma ida liña lan lasandiragun lungua.

9. Ka lasubudirubei Heowá luagu kada aban wádangiñe?

⁹ Anhein hagagibudaguña lubéi luma aban sügǘ hénrenguti ani sanditün anufudei, haritagua huméi mama lan ariharügü lumuti Heowá le hásügürübei, subudi lumuti giñe ida liña lan hasandiragun hungua. Kei hénpulu, dan le idamuni habéi lubúeingu Heowá Ehiptu, ariha lumuti Heowá “hasufurirun” (Afu. 3:7). Lidan aban uremu, ariñagati Dawidi ariha lumuti lan Heowá lasufurirun luma ‘lidiheri’ (Sal. 31:7). Íbini dan le hasufurirunbei lubúeingu Bungiu ladüga luriban hanúadahan, “aba ladiheridun Heowá” (Isa. 63:​9, TNM). Ruti dǘgüdaguaü wasubudiruni  dan le lan wasandirun anufudei, gunfuranda lumutiwa Heowá ani busenti líderaguniwa lun lagidarun anufudei wawéi.

10. Ka achoururagüdübalin hun berese lan Bungiu hau ani ñeinbei lan huma súnwandan lun líderagunün?

¹⁰ Anhein wásügürüña lubéi lídangiñe aban sügǘ hénrenguti le adügübei lun wanufudedun, másiñati hénrengu lan woun warihini líderaguñadiwa lan Heowá. Ka gayaraabei wadügüni? Amuriaha wamá luma Heowá lun líderaguniwa arihei ka lan ladügübei wawagu (2 Uru. 6:​15-17). Lárigiñe, samina wamá: Rúhali san somu yanu o aban óunabagülei le aganba wamaalibei lidan aban adamuridaguni dǘgüdaguaü woun? Rúharu san aban agumeiraguagüdüni, aban bidéu o aban uremu gurasu woun? Aliihali san aban íbiri somu bérusu o ariñagaali fiu dimurei le íchugubei gurasu woun? Anihein dan ménrengun lan woun wabulieiduni aba lan idewesei gebegiti lúmagiñeti Heowá sun ariñahani le weresibirubei tídangiñe Lererun luma ínsiñeni le weresibirubei hámagiñe wábirigu (Isa. 65:13; Mar. 10:​29, 30). Arufudati idewesei burí le, berese lan Bungiu wau ani garicha lan lun wafiñerun luagu (Isa. 49:​14-16).

11. Ka íderagubarun Aida lun manufudedun tan?

¹¹ Sügütu giñe aban íbiri gíritu Aida to awinwanduboun Senegáli, lídangiñe sügǘ hénrenguti ani ariha tumuti giñe ida liña lan líderagunu Heowá. Agurabatiña tagübürigu lun tagañeirun saragu seinsu lun tanuriagun tungua ani lun giñe tetenirun houn, ladüga tuguya íbugañouboun. Lau sun lira, aba tanúadirun lun mibe lan tumegegun lun teseriwidun kei prekursora, ligíati, murusunrügüñein lubéi seinsu tagañeirun. Aba hagañidun tiduheñu tuma ani aba hayanuhan wuriba tuagu. Abahüdahatu Aida ida liña lan meha tasandiragun tungua: “Hanufudetina meha siñabei lan níderaguniña nagübürigu, hanufudetina meha giñe mínsiñebadina lan houn gürigia. Aba níchugun duru luagu Heowá lau ladügün lun hénrengutima lan katei”. Lau sun lira, aban weyu aba taganbun aban yanu le íderagubarun saragu: “Haritaguagüda lumutina íbiri luagu subudi lani Heowá sun tigarigu wanigi. Lanwoun lira, íderagua lumutina giñe katei le hariñagubei wéiyaaña lidan afiñeni hama amu íbirigu nun lun narihini hínsiñe nan lun Heowá, ani lau lásügürün dan aba nasandiragun nungua buidu. Aba nagumeserun afurieida lun Heowá  gabügürügua ani lau saragu ichouruni, ani lau narihin óunaba lani Heowá nafurieidun, aba nasandirun darangilaü”. Lau lásügürün dan, aba tadarirun Aida aban wadagimanu le íderagubarun mámarügü lun teseriwidun kei prekursora, gayaraati giñe tíderaguniña tagübürigu ani gayaraati tíderagun amu gürigia. Abahüdaguatu: “Furendeihadina lun nafiñerun luagu Heowá sunsuinagubei. Íderagua lumutina nafurieidun lun Heowá lun manufudedun nan”.

KABA LADÜGA HEOWÁ ÁMUÑEGÜ?

12. Según Sálumu 56:​9, ka lachoururubei Dawidi?

¹² (Aliiha huméi Sálumu 56:9). Arufudati bérusu le ábaya katei le íderagubalin Dawidi lun manufudedun lan: aba lararamagun asaminara luagu le lunbei ladügüni Heowá luagu ámuñegü. Subudi lumuti meha lesefurubei lan Heowá lidan dan le buídutimabei. Ladüga füramasei laali meha Heowá Dawidiba lan leweñegua urúei lidan ageiraü Ísüraeli (1 Sam. 16:​1, 13). Ani subudi lumuti meha giñe Dawidi, anhein füramase laali lubéi Heowá katei le lagunfulirubei lan.

13. Ka uagu chouru wabalin le lunbei ladügüni Heowá ámuñegü?

¹³ Ka füramase láalibei Bungiu woun? Le linarün katei, úati füramase lan Heowá woun wawinwanduba lan aban ibagari maturobulinga guentó. c Gama lumoun, meberesenga le wásügürübei lidan ubóu le, füramase laali Heowá woun lagumuchuba lan lau sun turobuli lidan iseri ubóu (Isa. 25:​7-9). Chóuruti gabafu lan Heowá lun láguyuguagüdüniña hilaaña, lun lareidaguagüdǘniwa luma lun lagünrinchaguniña sun láganigu (1 Huan 4:4).

14. Luagu ka katei gayaraabei wararamagun asaminara?

¹⁴ Danme le hasandirun anufudei, samina humá luagu le lunbei ladügüni Heowá ámuñegü. Samina humá ida luba lan ibagari danme le úaali Satanási, danme le úaaña gürigia wuribatiña ani gürigiarügübaña ha buítiña awinwanda ubouagu, gidawa ligíame figóu murusun murusun. Lidan adamurini wéiriti le adügǘbei lidan irumu 2014, arufudúati aban sügǘ le gayaraabei líderaguniwa asaminara luagu wemenigin. Lidan sügǘ ligía, ayanuhati aban íbiri hama liduheñu luagu kaba lan hariñaga luagu 2 Timotéu 3:​1-5, anhein aban lubéi profesía luagu ibagari lidan Paraísu: “Lidan iseri ubóu, harufuduba gürigia ínsiñeni houn gürigia háledigu, hínsiñebei katei lánina Bungiu houn, mapantabaña ani ǘnabugubaña, híchuguba uéiriguni lun Bungiu, gaganbadibaña houn hagübürigu, geteingiradibaña ani úaraguabaña, hínsiñebaña haduheñu houn, aranseñu haba lun hebelurun lidan úarani hama amu, hayanuhaba súnwandan buidu hawagu amu, hárügüdaguba houngua, darangilubei hagaburi, hínsiñebei le buídubei houn, gayaraabei lafiñerúniwa hawagu ani richaguabaña, hínsiñebei Bungiu houn sügǘ luéi háluahani hagundan guánarügü ani gúnfulibaña tídangiñe sun hanigi luma Bungiu. Óundaraba hamá gürigia hagía súnwandan”. Héchutiwa san ayanuha hama waduheñu o hama wábirigu luagu ida luba lan ibagari lidan iseri ubóu?

15. Ka íderagubarun Tanja lun manufude tan?

¹⁵ Ariha waméi le tadügübei íbiri Tanja to awinwanduboun Masedónia le lani Nórute lun lagidarun anufudei tuéi sunsuinagubei lau tararamagun asaminara luagu füramasei le ladügübei Heowá. Abahüdaguatu, dan le tagumeserunbei aturiahoun Bíbülia aba hagañidun tagübürigu saragu: “Aba lasuseredun katei le magurabun nubéi. Sagü nagiribudun lídangiñe adamuridaguni aba tagayuahan núguchu nuagu. Ani siadi hamutina nagübürigu ánhana lan adügagua nungua gefentume luagu Heowá, háfarubadina lan hilagubei”. Lagumuhóun, aba habugunu hábiñegiñe. Ka tadügübei? Ariñagayatu: “Aba nasaminarun ánhana lan úaragua nan lun Heowá guenlé, gúndaabadina lan lun súnwandan. Aba nariñagun núnguarügü, ánhana lan  eferidira katei lidan ubóu le, líchuguba lan Heowá lanwoun nun lidan iseri ubóu ani líderagubadina lun nabulieiduni sun katei wuribati le násügürübei”. Úaraguatu Tanja lun Heowá ani lau lídehan, aba tadarirun aban muna lun tawinwandun ñein. Guentó, maríeitu luma aban íbiri úaraguati ani heseriwiduña biángubei hagía lau ugundani lun Bungiu lidan dan dayarüti.

DEREBUGÜDA WAMÉI WAFIÑEN LUAGU HEOWÁ GUENTÓ

16. Kaba íderaguawa lun ganigi wamá danme le lagunfulirun le lariñagubei Lúkasi 21:​26-28?

¹⁶ Lídanme lidaani óunwenbu asufuriruni ‘ladagaruba falalaü hawagu hiibe-agei gürigia luma anufudei’. Lídanme dan ligía, wagía lubúeingu Heowá, warufuduba ganigi ani úaragua wagíame (aliiha huméi Lúkasi 21:​26-28). Ka uagu? Ladüga héchuhadiwa lanme afiñera luagu Heowá. Ariñagatu Tanja íderagua lanu le meha tawinwandubei lidan dan le sügühalibei lun tagagibudagun luma amu sügǘ le hénrenguti: “Furendei haadina ua lan sügǘ le lásiñarun Heowá lun míderagun lubadiwa lan ani gayara lan labiniruniwa. Anihein dan genege lan gabafu hamá gürigia luagu somu katei ani le linarün katei murusunrügüñein habafu, gabafutimati Heowá hawéi. Ka lan yebe lanarimebei aban óuchawaguni, lagumuchaguba”.

17. Ida luba líderaguniwa bérusu lánina irumu 2024? (Ariha humóun iyawaü to luáguboun tidáü garüdia).

¹⁷ Íbini buin liña lan ubóu lau katei le rubei anufudei, ítara waña kei Dawidi, mígiruntiwa lun lararamuniwa anufudei. Sagawati bérusu lánina irumu 2024 lídangiñe dimurei le lariñagubei Dawidi lun Heowá: “Buagu nemenigida, lidan nanufude” (Sal. 56:3). Ariha waméi le lariñagubei aban wügüri le subudihabúbei tuagu Bíbülia luagu bérusu le: “Meredeti Dawidi asaminara luagu katei le adügübei lun lanufudedun ni luagu liturobulin, lubaragiñe lira aban lafiñerun luagu le asalbarubalin”. Samina humá luagu bérusu le lánina irumu lidan burí hati le lunbei liabin dántima le hásügürüña lan lídangiñe somu sügǘ hénrenguti. Sagá humá dan lun hararamagun asaminara luagu le adüga láalibei Heowá, le ladügübei luma le lunbei ladügüni ámuñegü. Ítara kei Dawidi, gayaraabei hariñagun: “Hemenigitina luagu Bungiu ani manufudetina” (Sal. 56:4).