1. Porque kita posible ta sinti miedo tiene vez?

 TODO kita ta sinti miedo tiene vez. Pero siempre cay ya estudia kita con el Biblia, gendeh mas kita ta tiene miedo na maga muerto, na maga demonio y si cosa sucede kanaton na futuro. Maskin pa ansina, ta vivi siempre kita na un tiempo donde ta puede kita mira “maga cosa-cosa bien maca-miedo,” igual na guerra, crimen y enfermedad. (Luc. 21:11) Posible tambien que ta tiene kita miedo na maga gente, igual na maga autoridad que ta persigui kanaton o maga miembro na familia quien tan contra con el diaton adoranza. El cuanto posible tan lingasa que baka gendeh sila puede aguanta na probanza que ta enfrenta sila ahora o na cosa sila hay experiencia na futuro.

2. Dale detalle acerca na situacion de David na Gat.

² De antes, ya tiene tambien miedo si David. Por ejemplo, cuando ta busca con ele si Rey Saul para mata con ele, ya anda si David na Gat, un ciudad del maga Filisteo. Ya sabe el rey de Gat, si Akis, que si David el ya mata con el miles de maga Filisteo. “Ya tiene gayot [si David] miedo.” (1 Sam. 21:10-12) Yan lingasa le si cosa con ele hace si Akis. Cosa ya hace si David para perde el de suyu miedo?

3. Asegun na Salmo 56:1-3, 11, cosa ya hace si David para perde el de suyu miedo?

³ Na Salmo 56, ya habla si David si cosa le ya sinti cuando talla le na Gat. Na ese salmo, nuay lang habla si David si porque le ya tiene miedo sino ya habla tambien le si paquemodo le ya puede ganá con ese. Ta confia si David con Jehova cada vez le ta tiene miedo. (Le con el Salmo 56:1-3, a 11. b) Nuay gayot le man kamali  cay ya confia le con Dios. Na ayuda de Jehova, ya puede pensa si David un estrategia que efectivo y nuay otro quien puede pensa: Ya pretende le como un loco! Poreso en vez de mata con David, mas quierre ya si Akis que manda sale con este. Como resulta, ya puede escapa si David.—1 Sam. 21:13–22:1.

4. Paquemodo kita puede hace fuerte con el diaton confianza con Jehova? Ilustra.

⁴ Hay perde tambien el diaton miedo si confia kita con Jehova. Pero paquemodo kita hace fuerte con el diaton confianza con Jehova, especialmente si ta tiene kita miedo? Considera un ilustracion. Si ya sabe tu que tiene tu un enfermedad, posible na primero hay tene tu miedo. Pero si ta confia tu con el de tuyu doctor, puede se ayuda para menora el de tuyu miedo. Posible, ya puede ya le ayuda manada paciente que igual de tuyu el enfermedad. Posible hay oi gayot le enbuenamente con el cosa tu habla y convinci se contigo que ta entende le si cosa tu ta sinti. Y na uliji, baka menciona le contigo un curada que ya puede ayuda con otro. Na igual manera, hay queda mas fuerte el diaton confianza con Jehova si considera kita si cosa ya le ya puede hace, si cosa le ta hace ahora y si cosa le hay hace na futuro para kanaton. Ese el cosa ya hace si David. Mientras considera kita con el cuanto del de suyu maga palabra na Salmo 56, pensa si paquemodo tambien tu puede hace mas fuerte con el de tuyu confianza con Jehova y ganá con el de tuyu miedo.

COSA YA EL YA PUEDE HACE SI JEHOVA?

5. Para perde el de suyu miedo, na cosa ya medita si David? (Salmo 56:12, 13)

⁵ Cuando na peligro el vida de David, yan focus le na cosa ya puede ya hace si Jehova. (Le con el Salmo 56:12, 13. c) Ese el pirmi cosa ta hace si David. Por ejemplo, tiene vez ta medita le acerca na maga creacion de Jehova y ya hace se con ele acorda que bien poderoso y bien interesao si Jehova na maga gente. (Sal. 65:6-9) Ya medita tambien le si cosa ya puede hace si Jehova para con otro. (Sal. 31:19; 37:25, 26) Y ya medita le si cosa ya puede ya hace si Jehova para  con ele personalmente. Desde bata pa si David, ya suporta y ya protege con ele si Jehova. (Sal. 22:9, 10) Asigurao que ese maga meditacion ya puede gayot hace fuerte con el confianza de David con Jehova!

6. Si ta tiene kita miedo, cosa puede ayuda kanaton para confia con Jehova?

⁶ Si ta tiene tu miedo, pregunta con el de tuyu mismo cuerpo, ‘Cosa ya el ya puede hace si Jehova?’ Pensa con el maga cosas que ya crea le. Por ejemplo, si mira kita si paquemodo si Jehova ta cuida con el maga pajaro y flores—que nuay le crea na de suyu mismo imagen y no puede adora con ele—hay queda fuerte el diaton confianza que hay cuida tambien le kanaton. (Mat. 6:25-32) Considera tambien si cosa ya el ya puede hace si Jehova para con el de suyu maga siervo. Puede tu estudia un caracter na Biblia quien ya dale mira grande fe o le un experiencia del un siervo de Jehova na moderno tiempo. d Mas pa, medita si paquemodo si Jehova ya puede ya dale mira que ta ama le contigo. Paquemodo le contigo ya guia na verdad? (Juan 6:44) Paquemodo le ya contesta con el de tuyu maga rezo? (1 Juan 5:14) Paquemodo tu ta beneficia cada dia na sacrificio del de suyu Anak?—Ef. 1:7; Heb. 4:14-16.

7. Paquemodo el experiencia de profeta Daniel ya ayuda con Vanessa para ganá con el de suyu miedo?

⁷ Si Vanessa, e un hermana na Haiti, ya enfrenta un maka-miedo situacion. El un hombre na diila lugar ta llama y ta imbia con ele mensaje cada dia y tan pressure con Vanessa que tene relacion con ele. Nuay gayot conforma si Vanessa pero ya queda mas agresivo el hombre y ya amenaza pa con ele. “Ya tiene yo miedo,” ya habla si Vanessa. Cosa le ya hace? Ya hace le manera para protege con el de suyu mismo cuerpo. El un anciano ya ayuda con ele para pidi ayuda na maga autoridad. Puera con ese, ya medita tambien si Vanessa si paquemodo si Jehova ya protege con el De Suyu maga siervo de antes. “El primer persona que ya pensa yo amo si profeta Daniel,” ya habla si Vanessa. “Maskin pa inocente le, ya buta con ele na un cueva donde tiene manada con hambre leon. Pero, ya protege con ele si Jehova. Ya habla yo con Jehova que ele ya lang cuidao conmigo. Despues quel, nuay mas yo tiene miedo.”—Dan. 6:12-22.

COSA SI JEHOVA TA HACE AHORA?

8. Na cosa convincido si David? (Salmo 56:8)

⁸ Maskin pa na peligro el vida de David cuando na Gat le, nuay le permiti que controla con ele el de suyu miedo. Sino, ya considera le si cosa si Jehova ta hace para con ele na aquel tiempo. Ya puede sinti si David que ta guia y ta protege con ele si Jehova y que ta entende Le si cosa le ta sinti. (Le con el Salmo 56:8. f) Tiene tambien si David maga amigo, igual con Jonatan y con el alto sacerdote que si Ahimelec, quien ya anima y ya ayuda con ele. (1 Sam. 20:41, 42; 21:6, 8, 9) Y maskin pa ya pricura con ele mata si Rey Saul, ya puede siempre escapa si David. Convincido le que ta puede mira si Jehova con el probanza que ta experiencia le y si paquemodo se ta afecta con ele.

9. Cosa ta observa si Jehova na cada uno kanaton?

⁹ Si ta tiene tu miedo por causa na un probanza, acorda que ta puede mira si Jehova con ese y si cosa tu ta sinti por causa con ese. Por ejemplo, ya puede nota si Jehova gendeh lang el maltratamiento na maga Israelita na Egipto sino pati “el dolor que [ya] sinti sila.” (Ex. 3:7) Na cancion de David, ya menciona le que ya puede mira si Jehova con el de suyu “sufrimiento”  y “grabe lingasa.” (Sal. 31:7) Y cuando ya sufri el maga siervo del Dios—maskin pa por causa quel na diila maga gendeh justo decision—“ya sinti le duele.” (Isa. 63:9) Si ta tiene tu miedo, ta entende si Jehova si cosa tu ta sinti y bien quierre le ayuda contigo que ganá con el de tuyu miedo.

10. Porque tu convincido que ta puede contigo mira si Jehova y que hay ayuda le contigo enfrenta con el maskin cosa probanza?

¹⁰ Pero posible, no sabe tu si paquemodo si Jehova ta suporta contigo si ta enfrenta tu un probanza. Poreso, pidi con ele que ayuda contigo mira con el de suyu suporta. (2 Rey 6:15-17) Despues, considera con este: Tiene ba un talk o comento na un miting na congregacion que ya puede hace fuerte contigo? Ya puede ba anima contigo el un publicacion, un video o un original cancion? Tiene ba contigo quien ya puede man share un bonito punto o texto? Posible, bien facil lang para kanaton que gendeh puede nota con el amor del maga hermano y hermana y con el espiritual comida que tiene kita. Pero, acorda que maga bonito regalo sila estaba con Jehova. (Isa. 65:13; Mar. 10:29, 30) Maga prueba este que ta ama le contigo. (Isa. 49:14-16) Y ta dale este mira que puede gayot tu confia con ele.

11. Cosa ya ayuda con Aida para ganá con el de suyu maga miedo?

¹¹ Si Aida, quien ta queda na Senegal, ya puede mira si paquemodo si Jehova ya suporta con ele na de suyu probanza. Ciendo ele el mayor anak, ta expecta el de suyu mayores que puede le hace bastante sen para suporta con el de suyu mismo cuerpo y kanila. Pero despues le hace simple con el de suyu vida para puede man pioneer, yan dificil na financial si Aida. Por causa con ese, ya rabia con ele el de suyu familia. “Ya tiene yo miedo cay baka gendeh yo puede ayuda con el de mio mayores y rabia sila conmigo todo,” ya habla le. “Ya disculpa pa gane yo con Jehova si porque le ya permiti que queda bien grabe el situacion.” Despues de ese, ya puede le oi un talk na miting. “Ya hace acorda el speaker que maskin cosa el dolor na diaton corazon, ta puede se mira si Jehova. Hinay-hinay y por medio na consejo del maga anciano y del otro, ya puede yo mira que ta ama conmigo si Jehova. Si ta reza yo con Jehova, mas tiene ya yo confianza que hay ayuda le conmigo. Y ya tiene yo  paz na pensamiento cuando ya mira yo que ta contesta le con el de mio maga rezo.” Despues de cuanto tiempo, ya puede incuntra trabajo si Aida que ya puede suporta con ele na pioneering y ya puede ayuda con el de suyu mayores y con otro. “Ya puede yo aprende confia con Jehova completamente,” ya habla le. “Ahora despues yo reza, ta perde ya el de mio maga miedo.”

COSA HACE SI JEHOVA NA FUTURO?

12. Asegun na Salmo 56:9, na cosa asigurao si David?

¹² Le con el Salmo 56:9. g Este versiculo ta menciona otro manera que ya hace si David para ganá con el de suyu miedo. Maskin pa na peligro siempre el de suyu vida, ya medita le si cosa hace si Jehova para con ele na futuro. Sabe si David que hay salva con ele si Jehova na justo tiempo. Porque? Cay ya declara si Jehova que si David el quien queda sunod rey de Israel. (1 Sam. 16:1, 13) Para con David, asigurao gayot sucede el todo cosa ya promete si Jehova.

13. Cosa kita puede asigura acerca con Jehova?

¹³ Cosa ya promete si Jehova que hace para contigo? Sabe kita que gendeh le ta sangga con el todo diaton maga problema. h Pero, acorda que maskin cosa probanza tu hay enfrenta na este sistema de maga cosas, hay quita con ese si Jehova na nuevo mundo. (Isa. 25:7-9) Asigurao gayot que poderoso el diaton Creador poreso puede le resucita con el maga muerto, cura kanaton y quita con el diaton maga enemigo.—1 Juan 4:4.

14. Na cosa kita puede medita?

¹⁴ Si ta tiene tu miedo, medita si cosa hace si Jehova na futuro. Pensa si cosa tu sinti si perde ya si Satanas, si nuay mas el maga malo y si hinay-hinay ya kita ta queda perfecto. El un demonstracion na 2014 asemblea de region ya dale mira si paquemodo kita puede medita con el diaton esperanza. Ya discuti el tata na de suyu familia si cosa posible puede le na 2 Timoteo 3:1-5 si discuti este acerca na Paraiso. Ele ya habla: “Na nuevo mundo, hay queda tu bien alegre. Cay el maga gente ta ama con otro, ta aprecia maga espiritual cosas, humilde, ta alaba con Dios, obediente na mayores, ta rindi gracias, leal, ta ama gayot na diila familia, ta hace si cosa yan sabut, ta habla maga buen cosas acerca con otro, tiene control na cuerpo, calmao, ta ama si cosa el bueno, puede confia, ta somete, gendeh orgulloso, ta ama con Dios contra na alegria y deverasan devoto con Dios. Man junto tu con este clase de maga gente.” Tan cuento ba tu con el de tuyu familia o con el maga hermano y hermana acerca si cosa el vida na nuevo mundo?

15. Maskin pa ya tiene miedo si Tanja, cosa ya puede ayuda para perde el de suyu miedo?

¹⁵ El un hermana na North Macedonia que si Tanja ya puede ganá con el de suyu miedo cuando ya medita le acerca na maga bendicion na futuro. Yan contra gayot con ele el de suyu mayores cuando ya estudia le con el Biblia. Ele ya habla: “Ya sucede el cuanto cosas que ta tiene yo miedo que sucede. Ta hace conmigo sinti duele el de mio nana despues del cada miting. Ya amenaza conmigo el de mio mayores que mata sila conmigo si queda yo uno del maga Testigo de Jehova.” Na uliji, ya arria con Tanja el de suyu mayores. Cosa le ya hace? Ele ya habla: “Ya pensa yo que hay queda yo bien alegre hasta para cuando si mentena yo con el de mio integridad. Ya medita tambien yo que maskin cosa pa perde conmigo na este sistema, hay bendici conmigo si Jehova na nuevo mundo y ayuda le conmigo ulvida el maga mal cosas que ya sucede.” Ya puede mentena si Tanja con el de suyu integridad. Y na ayuda de Jehova, ya puede le incuntra un lugar onde puede esta. Ahora, casao si Tanja na un fiel hermano y alegre sila ta sirvi full-time na ministerio.

 HACE FUERTE CON EL DE TUYU CONFIANZA AHORA

16. Cosa puede ayuda kanaton para continua tene coraje si mira kita con el maga suceso na Lucas 21:26-28?

¹⁶ Durante el grande tribulacion, mayoria del maga gente “ay muri de miedo.” Pero el maga siervo del Dios hay para duro y tiene coraje. (Le con el Lucas 21:26-28.) Porque kita gendeh tene miedo? Cay ya aprende ya kita confia con Jehova. Si Tanja que ya menciona enante ya habla que el cosa le ya experiencia de antes ya puede ayuda con ele para enfrenta con el maga dificil situacion. “Ya puede yo aprende que nuay ni un situacion el dificil para con Jehova que extende ayuda kanaton,” ele ya habla. “Tiene vez, ta sale que dol el otro el ta controla con el situacion pero el deverasan, mas poderoso si Jehova contra kanila. Y maskin pa dificil el un probanza, hay termina siempre se.”

17. Paquemodo kanaton puede ayuda el texto para na año 2024? (Mira con el letrato na cover.)

¹⁷ Normal lang para na maga gente que tene miedo. Pero igual con David, tiene kita cosa puede hace para gendeh ganá kanaton el diaton miedo. El rezo de David con Jehova amo el diaton texto para na año 2024: “Si ta tiene yo miedo, contigo yo ta confia.” (Sal. 56:3) El un referencia na Biblia ya habla acerca con ese texto: “Gendeh si David pirmi ta pensa acerca na maga cosas que ta causa con ele miedo o na de suyu maga problema sino ta confia le con el de suyu Rescatador quien hay salva con ele.” Pensa acerca con el diaton texto na maga venedero meses, especialmente si ta enfrenta tu maga maka-miedo situacion. Dale tiempo para medita con el maga cosas que ya hace si Jehova de antes, ahora y na futuro. Como resulta, igual con David, puede tu habla: “Con Dios yo ta confia; gendeh yo ta tiene miedo.”—Sal. 56:4.