1. Ahabw’enki obumwe turi kubasa kuhurira twagira obwoba?

 TWENA hine obu turi kuhurira twine obwoba. Ni amazima ku twayegire amazima bikatuma tutagumizamu kutina abafire, ba dayimoni ninga ebirije kutuhikaho omu biro by’omu misho. Konka tucatwire omu nsi erimu ebintu ‘ebiri kutinisa’ nk’entaro, obugomi n’endwara. (Luk 21:11) Nambwenu nitubasa kutina abantu harimu nk’abategeki abari kutukandamiza, ninga abanyabuzare abari kuhiganisa okuramya kw’amazima. Abamwe nibabasa kuhurira batinire ku batarije kwehanganira ekigezo eki barije kubugana na co omuri obu bwire ninga omu biro by’omu misho.

2. Shoborora embera ezi Dawudi yabire arimu obu yabire ari omuri Gati.

² Dawudi na we akagira obwoba. Ecokureberaho: Omugabe Sawulo ku yabire ari kugezaho kuhiga Dawudi, Dawudi akasharamu kuhungira omu tawuni y’Abafilisitiya ya Gati. Bwanyima y’obwire buce omugabe Akishi wa Gati akamanya ku Dawudi yabire ari omugabe w’amani owu bayeshongwire bari kugamba ku yayisire ‘obukumi’ bw’Abafilisitiya kandi eco kikatuma Dawudi ‘yatina munonga.’ (1 Sam 21:10-12) Akaba ari kutina eki Akishi yabire arije kumukorera. Ni bata oku Dawudi yasingwire obwoba bweye?

3. Tukuratize ebiri omuri Zaburi ya 56:1-3, 11, ni bata oku Dawudi yabasize kusingura obwoba?

³ Omuri Zaburi ya 56, Dawudi akagamba oku yabire ari kwehurira obu yabire ari omuri Gati. Eyo Zaburi neyereka obwoba obu Dawudi yabire ayine; konka nenayereka oku yasingwire  obwo bwoba. N’obu Dawudi yabire ayine obwoba akaba nayesiga Yehova. (Shoma omuri Zaburi ya 56:1-3, 11.) Tihine ekintu na kimwe ecatumire atayesiga Yehova. Ahabw’obuyambi bwa Yehova, Dawudi akakoresa oburyo obwabire butashangirwe obwatumire yarokoka: Akegira omushazi! Eco kikatuma Akishi yareba Dawudi nk’omuntu owabire atari kubasa kubagirira kubi rero byatuma Dawudi yayegendera.—1 Sam 21:13–22:1.

4. Ni bata oku turi kubasa kukizaho kwesiga Yehova? Gamba ecokureberaho.

⁴ N’itwe nitusingura obwoba twayesiga Yehova. Konka shi ni bata oku turi kubasa kukizaho kwesiga Yehova namunonga twaba twine obwoba? Reba ecokureberaho: Wamanya ku oyine endwara omu kubanza nohurira oyine obwoba. Konka nohurira watuza waba ori kwesiga omudokita. Nabasa kuba yatambire abandi barwire ababire barwire nk’eyi orwire. Nakuhurikiza ayetonzire kandi nakuhamiza ku ari kumanya oku ori kwehurira. Nambwenu nabasa kukugambira oburyo bw’okutambirwa obwakwasize abandi. Ni co kimwe nitukizaho kwesiga Yehova turi kutecereza aha bi yatukorire, aha bi ari kutukorera hati n’ebi arije kutukorera omu biro by’omu misho. Eco ni co eki Dawudi yakozire. Twaba turi kushwijuma bimwe omu biri omuri Zaburi ya 56, otecereze aha ku n’iwe ori kubasa kukizaho kwesiga Yehova kandi okasingura obwoba.

NI BIHA BINTU EBI YEHOVA YATUKORIRE?

5. Ni biha bintu ebi Dawudi yatecerizeho bikatuma yasingura obwoba? (Zaburi 56:12, 13)

⁵ N’obu Dawudi yabire ari omu mbera zigumire akaguma atire omutima aha bi Yehova yamukorire. (Shoma omuri Zaburi ya 56:12, 13.) Eco ni co eki Dawudi yabire nakora omu kubaho kweye. Ecokureberaho: Hine obu yabire natecereza aha bi Yehova yahangire, kimwijusa ku Yehova ayine Amani kandi ku ari kufa aha bantu. (Zab 65:6-9) Nambwenu Dawudi akatecereza aha bi Yehova yabire yakorire abandi. (Zab 31:19; 37:25, 26) Kandi ekiri kukira byona akaba natecereza aha bi Yehova yamukorire we aha bweye. Yehova akakwasa Dawudi kandi yamurinda kwiha acari muto. (Zab 22:9, 10) Tecereza oku ebyo byatumire Dawudi yakizaho kwesiga Yehova!

6. Twahurira twine obwoba ni enki ekiri kubasa kutukwasa kwesiga Yehova?

 ⁶ Wahurira wagira obwoba guma oyebuze ngu: ‘Ni biha bintu ebi Yehova yankorire?’ Guma otecereze aha bi yahangire. Ecokureberaho: Ku turi ‘kwetegereza’ aha ku Yehova ari kufa aha bimuri n’enyonyi ebitarahangirwe omu kishushani ceye kandi ebitari kubasa kumuramya, nikija kutuma twayikiriza tutari kubanganisa ku n’itwe arije kutufaho. (Mat 6:25-32) Nambwenu tecereza aha bi Yehova ari kukorera abari kumuramya. Nobasa kwega ebiri kukwata aha muhereza wa Yehova owayerekire okwikiriza ori kugambwa omuri Bibuli ninga oshoma enkuru z’ebyabireho z’abahereza ba Yehova b’omuri obu bwire. a Nambwenu nobasa n’okutecereza aha ku Yehova ari kukufaho hati. Ni bata oku Yehova yatumire wamanya amazima? (Yoh 6:44) Ni bata oku ari kugarukamu eshara zawe? (1 Yoh 5:14) Ni bata oku Ekitambo c’Omwana weye kiri kukugasira burizoba?—Efe 1:7; Heb 4:14-16.

7. Ni bata oku ecokureberaho ca Daniyeli cakwasize Vanessa kusingura obwoba?

⁷ Munyanyazi ori kwetwa Vanessa, b otwire omuri Hayiti, akabugana ebizibu bigumire. Hine omushija w’omu kacweka k’owabo owabire nakira kumweta kandi amusindikira za mesegi buri zoba ari kwenda ngu bakundane. Konka Vanessa akabyanga. Ogo mushija akamutinatinisa kandi yamugira ku arije kumugirira kubi. Vanessa akagamba ngu: “Nkahurira nagira obwoba.” Ni enki ecakwasize Vanessa kusingura obwoba? Akagira ebi yakora kugira ngu ayerinde. Omuzehe w’ekibina akamugambira ngu abigambire abategeki. Konka nambwenu Vanessa akaguma ari kutecereza aha ku Yehova yarinzire abahereza beye b’omu bwire bwa kare. Vanessa akagamba ngu: “Omuntu w’okubanza owu natecerizeho ni omuhanuzi Daniyeli. Bakamunaga omu mwina ogwabire gurimo intare ezabire zine enjara n’obu habire hatine eki yabire akozire. Konka Yehova akamurinda. Obwe rero nanye nkashaba Yehova ngu ankwase omuri ezo mbera zona. Kwiha obwe tindashubire kugira obwoba.”—Dan 6:12-22.

NI BIHA BINTU EBI YEHOVA ARI KUTUKORERA HATI?

8. Ni enki eki Dawudi yabire ari kwesiga atari kubanganisa? (Zaburi 56:8)

⁸ N’obu Dawudi yabire ari omu kabi obu yabire ari omuri Gati, taragizire obwoba munonga. Omu mwanya gw’eco akaguma natecereza aha bi Yehova yabire ari kumukorera omuri obwo bwire. Dawudi akaba namanya ku Yehova yabire ari kumurinda, ari kumuhabura, kandi ku yabire ari kwehuriza embera ezi yabire arimu. (Shoma omuri Zaburi ya 56:8.) Nambwenu Dawudi akaba ayine abanywani harimu Yonatani, n’Omutambi mukuru Ahimeleki, ababire nibamushagika kandi bakamuha obuyambi. (1 Sam 20:41, 42; 21:6, 8, 9) Kandi n’obu Omugabe Sawulo yabire ari kwenda kumwita, Dawudi akakiza amagara geye yahunga. Akaba nayesiga atari kubanganisa ku Yehova yabire ari kumanya ebizibu ebi yabire ari kurabamu, kandi ku yabire namanya n’oku biri kumugiraho engaruka.

9. Ni enki eki Yehova ari kureba ahari buri omwe?

⁹ Wabugana ebizibu ebiri kubasa kutuma watina, guma oyijuke ku Yehova ari kubireba kandi ku ari kumanya n’engaruka ezi biri kukugiraho. Ecokureberaho: Yehova tarabire nareba oku Abisirayeli babire nibatwarizibwa omuri Egiputa kusha, ohobwe akaba nareba n’‘okubonabonesibwa’ okwabire nikubahikaho. (Kur 3:7) Dawudi akeshongora ari kugamba ku Yehova yabire ari kureba ‘obusaasi bweye n’enaku zeye.’ (Zab 31:7) Abahereza beye ku babire nibabonabonesibwa ahabw’ensharamu mbi zabo ‘na we  kikaba nikimushasha.’ (Isa 63:9) Waba oyine obwoba Yehova naba nareba oku ori kwehurira kandi naba ayetegwire kukukwasa kusingura obwo bwoba.

10. Ni enki ekiri kukuhamiza ku Yehova ari kukufaho kandi ku arije kukukwasa kwehanganira ebizibu ebi oyine?

¹⁰ Nobasa kwebuza oku Yehova ari kubasa kukukwasa waba ori omu mbera eziri kutuma wagira obwoba. Obwe rero, guma omushabe kugira ngu akukwase omanye oku ari kukuyamba. (2 Bag 6:15-17) Bwanyima nobasa kwebuza ngu: Mbehi hine toku ninga ekitecerezo eki nahurira omu nterane ecangumya? Mbehi hine ekitabo, vidiyo ninga eceshongoro ecangarwiremu amani? Mbehi hine omuntu owangambira ebigambo ebiri kuhumuriza ninga akanshomera ecahandikirwe? Obumwe nitubasa kutafa munonga ahari rukundo eyi benetata na banyanyazi bari kutwereka ninga aha byokurya by’omwika ebi turi kutunga. Konka ebyo ni ebiconco ebiri kuruga ahari Yehova. (Isa 65:13; Mar 10:29, 30) Ebyo ni ebihamya ebiri kutwereka ku Yehova ari kutufaho. (Isa 49:14-16) Kandi nibyereka ku Yehova ari owokwesigwa.

11. Ni enki ecakwasize Aida kusingura obwoba?

¹¹ Aida, otwire omuri Senego, akerebera oku Yehova yamukwasize obu yabire ari omu mbera zigumire. Ahabw’okuba yabire ari we mwana mukuru omu ka, abazire beye bakaba nibamanya ku yabire ashemerire kuronda esente z’okwefaho n’okubafaho. Konka ku yayorobize embera kugira ngu akore obupayoniya, akabugana embera mbi z’eby’akasente. Ab’omu ka yeye bakatandika kumwanga n’okumuhiganisa. Akagamba ngu: “Nkaba nyine obwoba ku nabire ntarije kubasa kufa aha bagizire eka yange kandi ku buri omwe yabire arije kunyanga. Nkahika n’aha kugamba ku Yehova ari we owatumire ebyo bintu byampikaho.” Bwanyima akahurikiza toku omu nterane. Akagamba ngu: “Mwenetata akatwijusya ku twabugana ebintu ebiri kubasa kutwemereza omutima Yehova naba nabimanya. Mpora mpora ahabw’obuyambi bw’abazehe hamwe n’abandi kikatuma nashuba kukunda Yehova. Ku natandikire kushaba Yehova, nkahurira nakizaho kugira obumanzi kandi natunga obusinge ahabw’okureba oku Yehova ari kugarukamu eshara yange.” Bwanyima y’obwire, Aida akatunga  omurimo ogwamukwasize kwefaho ari omupayoniya konka nambwenu guri kumukwasa kufa n’ah’abazire beye hamwe n’abandi. Akagamba ngu: “Nkega kwesiga Yehova omu bwijwire. Hati naheza kushaba, obwoba obu ndikuba nyine nibuhika nibuhwa.”

NI BIHA BINTU EBI YEHOVA ARIJE KUTUKORERA?

12. Tukuratize ebiri omuri Zaburi 56:9, ni enki eki Dawudi yabire ari kwesiga atari kubanganisa?

¹² Shoma omuri Zaburi ya 56:9. Orwo runyiriri nirwereka obundi buryo obu Dawudi yasingwiremu obwoba. N’obu amagara geye gabire gacari omu kabi Dawudi akatecereza aha bi Yehova yabire arije kumukorera. Dawudi akaba namanya ku Yehova yabire arije kumukiza omu bwire obuhikire. Bwanyima Yehova akagamba ku Dawudi yabire arije kusimbura Sawulo akaba omugabe wa Isirayeli. (1 Sam 16:1, 13) Dawudi akaba nayesiga ku ebi Yehova yamuraganisize birije kuhikirira.

13. Ni enki eki turi kwesiga tutari kubanganisa ahari Yehova?

¹³ Ni biha bintu ebi Yehova yakuraganisize? Tituri kubasa kwetega ku Yehova arije kutwihiraho ebizibu byona. c Konka, ebizibu ebi turi kubugana oku byakuba biri kona omuri eyi nsi, nitumanya ku Yehova arije kubyihaho omu nsi esya. (Isa 25:​7-9) Nitwesiga ku Omuhangi witu ayine amani agari kumara g’okuzora abafire, okutukiza, n’okutwihiraho abari kutuhiganisa.—1 Yoh 4:4.

14. Ni ebiki ebi turi kubasa kutecerezaho?

¹⁴ Wahurira wagira obwoba guma otecereze aha bi Yehova arije kutukorera omu biro by’omu misho. Tecereza oku orije kwehurira obu Sitane arije kuba atacariho, ababi barugireho hariho abahikirire bonka, n’oku okutahikirira kurije kugenda kuri kurugaho mpora mpora burizoba. Omu kiterane c’omu mwaka gwa 2014 tukarebamu ecokureberaho ecatwerekire oku turi kubasa kutecereza aha masiko gitu. Omuzire akaganira n’ab’omu ka yeye aha ku ebiri omuri 2 Timoteyo 3:1-5 biri kubasa kuhindurwamu ebirije kubaho omuri paradiso, ari kugamba ngu: “Omu nsi esya nitwija kuba twine okushemererwa kwingi, abantu baryaba nibakundana, bari kukunda ebiri kukwata ahari Ruhanga, bari kutwaza ge kandi bari abacurezi, bari kuhimbisa Ruhanga, bari korobera abazire, bine omucwe g’okusima, bari abesigwa, bari kukunda ab’omu maka gabo munonga, bari kwikirizingana, burijo bari kugamba ge abandi, bari kwerinda, bari abesigwa, batari kwetungura, bari kukunda Ruhanga kukira oku bari kukunda kweshemeza, bari kugendera aha misinge ya Ruhanga, kandi abantu nk’abo ni bo abu turi guma kwehisya.” Mbehi hine obu ori kuganira n’ab’omu ka yawe ninga Abakristo bagenzi bawe aha ku amagara garije kuba gari omu nsi esya?

15. N’obu Tanja yabire ayine obwoba ni enki ecamukwasize kubusingura?

¹⁵ Munyanyazi ori kwetwa Tanja otwire omu matemba ga Makedoniya akabasa kusingura obwoba ahabw’okutecereza aha migisha eyi arije kutunga omu biro by’omu misho. Abazire beye bakamuhiganisa ahabw’okwega Bibuli. Akagamba ngu: “Bimwe omu bintu ebi nabire nintina ni byo ebyampikireho. Mama akaba nantera burijo naruga omu nterane. Abazire bange bakaba nibantinisa ngu nibija kunyita ku ndiba Omuhamya wa Yehova.” Bikahendera Tanja bamubinga omu ka. Ni bata oku yatwarize? Akagamba ngu: “Nkagumizamu kutecereza aha kushemererwa oku nabire ndije kutunga kw’ebiro byona ku ndagumizemu kuba omwesigwa. Kandi nkagumizamu kutecereza aha bintu ebi Yehova yabire arije kumpa omu nsi esya, ahabw’ebintu ebi naferirwe omuri eyi nsi n’oku ndije kwebwa ebintu bibi byona ebi nabugine.” Mazima Tanja akagumizamu kuba omwesigwa. Kandi ahabw’obuyambi  bwa Yehova akatunga ahantu h’okutura. Hati Tanja akatasana na mwenetata w’omwesigwa kandi nashemerererwa kukora omurimo g’obwire bwona bari hamwe.

GUMYA OBWESIGWA BWAWE OMURI OBU BWIRE

16. Ni enki ekirije kutukwasa kuguma twine obumanzi twareba obuhanuzi oburi omuri Luka 21:26-28 buri kugenda buri kuhikirira?

¹⁶ Omu bwire bw’okubonabona kwingi abantu bona nibija ‘kuhahaza emitima ahabw’obwoba.’ Konka abahereza ba Ruhanga bo nibija kuguma bahamire kandi bagire obumanzi. (Shoma omuri Luka 21:26-28.) Ahabw’enki barije kuba batine obwoba? Ni ahabw’okuba nitwija kuba twayegire kwesiga Yehova. Tanja owu twamara kugambaho, akagamba ku ebizibu ebi yabugine biri kumukwasa kwehanganira ebi ari kubugana omuri obu bwire. Akagamba ngu: “Nkamanya ku hatine ekizibu eki ori kurabamu ngu Yehova areke kukukwasa kukisingura. Obumwe hine obu turi kubasa kutecereza ku abantu bine amani g’okutukorera ebi bari kwenda byona, konka tugume twijuke ku Yehova ari kubaciza amani. Kandi ebizibu ebi turi kureba nk’ebigumire nibyija kurugaho.”

17. Ni bata oku ecahandikirwe c’omwaka gwa 2024 kirije kutukwasa? (Reba ekishushani c’aha kishembeso.)

¹⁷ Obwoba ni ekintu ekishangirwe omuri obu bwire. Konka kimwe na Dawudi titushemerire kwikiriza ngu obwoba butusingure. Ecahandikirwe c’omwaka gwa 2024 ni eshara eyi Dawudi yagambire Yehova. Nikigamba ngu: “Ku ndi kuhurira nyine obwoba, ninkwesiga.” (Zab 56:3) Hine omunyabwenge omwe omu bya Bibuli owagambire ahari oru runyiriri ngu: “Dawudi taragumizemu kutecereza aha bintu ebyabire biri kumuteza obwoba ninga aha bizibu ebi yabire ayine, ahobwe akaguma natecereza aha wabire aramucungure.” Guma otecereze aha cahandikirwe kitu c’omwaka omuri aga mezi agaza kukurataho namunonga waguma kuhika omu mbera ezigumire. Guma okwate akire otecereze aha bintu ebi Yehova yakukorire omu bwire bwa kare, ebi ari kukukorera omuri obu bwire n’ebi arije kukukorera omu biro by’omu misho. Kimwe na Dawudi noyija kugamba ngu: ‘Ruhanga ni we ndikwesiga; tinditina.’—Zab 56:4.