1. Eli pwata sia niwokkus fán ekkóch?

 ARAMAS meinisin ra meefi niwokkus fán ekkóch. Pwúngún, ach káé ewe Paipel a álisikich ach sisap niweiti ekkewe mi máló, chónláng mi ngaw, are minne epwe fis lón mwachkkan. Nge sia chúen nóm lón ewe fansoun mi uren mettóch mi ‘eniwokkus,’ áwewe chék ren maun, atai allúk, me semmwen. (Luk 21:11) Eli sia pwal niwokkusiti aramas áwewe chék ren mwúún aramas iir mi eriáfféúkich are pwal mwo nge chón ach famili mi ú ngeni fel mi enlet. Ekkóch ra lólilen iká repwe tongeni likiitú fán pwisin ar weires iei are eú weires repwe kúna lón mwachkkan.

2. Áweweei nónnómun Tafit atun a nóm Kat.

² Tafit a meefi niwokkus. Áwewe chék, atun King Saul a cheei me mochen nieló, Tafit a sú ngeni Kat, eú telinimwen chón Filistia. Ekiseló mwirin ewe kingen Kat itan Akis, a silei pwe Tafit i emén soufiu mi pwora aramas ra mwareiti lón kél pwe a nieló “lap seni engol ngeröü” chón Filistia. Tafit a ‘fokun niuokus.’ (1 Sam. 21:​10-12) A lólilen ren met Akis epwe ffér ngeni. Ifa ussun Tafit a okkufu an niwokkus?

3. Me ren Kölfel 56:​1-3, 11, ifa ussun Tafit a okkufu an niwokkus?

³ Lón Kölfel 56, Tafit a pwáraawu enletin meefian atun a nóm Kat. Lón na kél mi pin, Tafit a affata pwata a niwokkus nge a pwal áweweei met a álisi an esap chúen niwokkus. Atun  Tafit a meefi niwokkus, a ápilúkúlúkú Jiowa. (Álleani Kölfel 56:​1-3, 11.) A wor popun mi pwúng an epwe lúkúlúk wóón Jiowa. Ren án Jiowa álillis, Tafit a akkóta an epwe féri och mettóch, ina an pwomweni pwe ussun a umwes, iwe a sópwéch! Akis ese chúen mochen nieló Tafit, nge a fen mochen epwe ló seni leenian we, iwe Tafit a sú.—1 Sam. 21:13–22:1.

4. Ifa ussun ka tongeni alapaaló óm ápilúkúlúk are lúkúlúk wóón Jiowa? Áweweei.

⁴ Sia pwal tongeni okkufu niwokkus ren ach ápilúkúlúk are lúkúlúk wóón Jiowa. Nge ifa ussun sipwe alapaaló ach lúkúlúk wóón Jiowa, ákkáeúin lón ekkewe atun sia niwokkus? Ekieki ei kapas áwewe. Iká a uruk eú semmwen, eli me akkomwan, ka niwokkus. Iwe nge, a tongeni kisikisiló óm niwokkus iká ka lúkúlúk wóón noum we tokter. Eli a álisi chómmóng mi úriir ewe esin semmwen a uruk. A aúselingéch ngonuk atun ka ereni óm lólilen me ka meefi pwe a chúnguk. Me eli a erenuk ussun och sókkun minen álillisin pioing a álisi ekkewe ekkóch. Pwal ina chék ussun, sia alapaaló ach lúkúlúk wóón Jiowa ren ach ekieki ussun met a fen féri, met a féfféri iei, me met epwap féri fán itach lón mwachkkan. Ina met Tafit a féri. Atun sipwele káé ekkóch alon keei lón Kölfel 56, ekieki ifa ussun ka pwal tongeni alapaaló óm lúkúlúk wóón Jiowa me okkufu óm niwokkus.

MET JIOWA A FEN FÉRI?

5. Atun Tafit a niwokkus met a ekilonei ussun? (Kölfel 56:​12, 13)

⁵ Atun manawen Tafit a chúen nóm lón feiengaw a nefótófót wóón met Jiowa a fen féri. (Álleani Kölfel 56:​12, 13.) Ina och mettóch Tafit a féri lón ánein manawan. Áwewe chék, fán ekkóch a ekilonei férien Jiowa kewe, ina met a áchchema ngeni ussun úkúúkún án Jiowa manaman me an fókkun tongei aramas. (Kölf. 65:​6-9) Tafit a pwal ekilon wóón met Jiowa a fen féri fán iten ekkewe ekkóch. (Kölf. 31:19; 37:​25, 26) Me a ákkáeúin ekilon wóón met Jiowa a fen féri fán itan pwisin. Jiowa a álisi me túmúnú seni leuputiwan. (Kölf. 22:​9, 10) Anchangei úkúúkún lapólóón án Tafit lúkúlúk wóón Jiowa pokiten an eáni ekkena esin ekilon!

6. Met epwe álisikich le lúkúlúk wóón Jiowa atun sia niwokkus?

 ⁶ Atun ka meefi niwokkus, pwisin eisinuk, ‘Met Jiowa a fen féri?’ Ekieki ussun férian kewe. Áwewe chék, “attolafichi” ifa ussun Jiowa a túmúnú ekkewe machchang me péénirá inaamwo iká rese ffér lón napanapan me rese tongeni fel ngeni. Epwele fen ifan án Jiowa mochen túmúnúkich! Ach ekilon wóón ena a tongeni alapaaló ach lúkúlúk wóón. (Mat. 6:​25-32) Pwal ekieki met Jiowa a fen féri fán iten chókkewe mi fel ngeni. Eli ka káé pwóróusen emén lón ewe Paipel mi pwáári watteen an lúkú, are eli ka álleani pwóróusen emén néún Jiowa chón angang lón ei fansoun. a Pwal och, ekilon wóón ifa ussun Jiowa a fen túmúnuk. Ifa ussun a paanuk ngeni ewe enlet? (Jon 6:44) Ifa ussun a pélúweni óm kewe iótek? (1 Jon 5:14) Ikkefa ekkewe feiéch ka kúna iteiten rán seni án Néún we mi áchengicheng asoresini manawan?—Efi. 1:7; Ipru 4:​14-16.

7. Ifa ussun pwóróusen ewe soufós Taniel a álisi Vanessa le okkufu an niwokkus?

⁷ A fis ngeni emén Chón Kraist fefin seni Haiti itan Vanessa, b och mettóch mi eniwokkus. Emén mwán seni sóópwun we a kan soun kéri me mak ngeni, a echchimwa ar repwe kammwet. Vanessa a affata ngeni pwe ese fókkun mochen. Iwe nge a lallapoló án ena mwán oumwesi me pwal mwo nge eniwa. Vanessa a erá, “Úa niwokkus.” Ifa ussun a okkufu an niwokkus? A féri úkúúkún met a tongeni féri pwe epwe túmúnú i. Emén mwán mi ásimaw a álisi le kéri ekkewe polis. Nge a pwal nefótófót wóón ifa ussun Jiowa a túmúnú néún kewe chón angang me lóóm. Vanessa a erá, “Ewe áeménún aramas úa ekieki ussun, ina ewe soufós Taniel. Inaamwo iká ese wor tipisin, nge a kóturulong lón ewe pwangen laion, ikewe ekkena laion ra fókkun echik ie. Nge Jiowa a túmúnú ren an esipaaló awen ekkena laion. Iwe úa tingorei Jiowa an epwe angolong lón ái na osukosuk me efisi án ena mwán esap chúen ekieki usi, pún ese chúen wor met úa tongeni féri. Mwirin ena, úse chúen niwokkus.”—Tan. 6:​12-22.

MET JIOWA A FÉFFÉRI IEI?

8. Met Tafit a fókkun lúkú? (Kölfel 56:8)

⁸ Inaamwo iká Tafit a nóm fán watteen feiengaw atun a nóm Kat, nge ese nefótófót wóón ekkewe mettóch mi eniwokkusu. A fen filaatá le ekieki ussun ekkewe mettóch Jiowa a féfféri fán itan lón ena fansoun. A mirititi pwe Jiowa a ekkemmweni me túttúmúnú me weweiti meefian. (Álleani Kölfel 56:8.) Tafit a pwal kúna álillis seni chienan kewe mi túppwél ngeni, áwewe chék ren Jonatan me ewe Souasor mi Lapalap Ahimelek, ewe mi túppwél le apéchékkúla me álisi. (1 Sam. 20:​41, 42; 21:​6, 8, 9) Me inaamwo iká Tafit i án King Saul féúnen oput, nge a chúen kúna manaw. A fókkun lúkú pwe Jiowa a silefichi met a fiffis ngeni me a pwal silei meefian.

9. Met Jiowa a kúna me silei ussun emén me emén kich?

⁹ Atun ka nóm fán eú sóssót mi eniwokkusuk, chemeni pwe Jiowa a silei met a fiffis ngonuk me met ka kan meefi. Áwewe chék, Jiowa ese chék kúna féfféringawen ekkewe chón Isip ngeni chón Israel, nge a pwal “silei ar weires meinisin.” (Eks. 3:7) Tafit a kélú lón eché kél pwe Jiowa a kúna an “riaföü” me an “kewe weires.” (Kölf. 31:7) Me atun néún Kot kewe aramas ra nóm fán riáfféú, pwal mwo nge pokiten pwisin tipisiir “a pwal meefi  riáfféú.” (Ais. 63:​9, NW) Atun ka niwokkus, Jiowa a weweiti meefiom me a mochen álisuk le okkufu óm niwokkus.

10. Pwata ka lúkú pwe Jiowa a kúnók me epwe álisuk le likiitú fán ese lifilifil weires?

¹⁰ Nge eli kopwe ekieki iká ifa ussun Jiowa a álisuk lupwen ka nóm fán eú sóssót mi eniwokkus. Tingorei an epwe álisuk le kúna an álillis. (2 King 6:​15-17) Mwirin ekieki ekkeei: Ka péchékkúletá ren eú afalafal are memmeef lón mwiich? Ka péchékkúletá ren eú puk, eché video, are eché original song? Emén a fen erenuk och pwóróus are állea ngonuk eú wokisin mi apéchékkúlok? Eli sipwe namanaaló úkúúkún ewe álillis sia angei seni án chienach kewe tongekich me ewe apéchékkúl sia meefi seni án Kot we Kapas. Nge, iir liffang mi amwarar seni Jiowa. (Ais. 65:13; Mark 10:​29, 30) Iir pisekin ánnet pwe a tongekich. (Ais. 49:​14-16) Me ra ánnetatá pwe a fich ngeni ach sipwe lúkúlúkú.

11. Met a álisi Aida le okkufu an niwokkus?

¹¹ Aida, seni Senegal, a fókkun kúna án Jiowa álisi atun a nóm fán eú sóssót. Pokiten i ewe finichi, seman kewe me inan ra mochen epwe angang pwe epwe naf tufichiir me an we famili lón pekin áion. Nge mwirin án Aida ámecheresi nónnómun manawan pwe epwe tongeni pioneer, a nafangaw néún moni. Chón an we famili ra song ren me esiita. Iei met a erá, “Úa lólilen ren ái úsapw tongeni álisi semei kewe me inei me meinisin repwe oputaei. Úa pwal mwo nge tipi ngeni Jiowa úkúúkún ngawolóón nónnómun manawei.” Mwirin a rong eú afalafal lón mwiich. A erá, “Ewe chón afalafal a áchchema ngenikem pwe Jiowa a silei met a efisi án emén me emén epwe aúrek are niwokkus. Iwe ekis me ekis, úa lúkúsefálli pwe Jiowa a tongeei ren álillisin án ekkewe mwán mi ásimaw me ekkewe ekkóch kapasen emmwen. Atun úa iótek ngeni Jiowa, a lapóló ái lúkúlúk wóón pwe epwe álisiei, me úa meefi enletin kinamwe atun úa kúna pélúwen ái kewe iótek.” Ló, ló, ló, Aida a kúnékún an angangen moni mi atufichi le pioneer me a kan awora álillis ngeni seman kewe me inan me ekkewe ekkóch. Aida a erá, “Úa káé ái úpwe unusen lúkúlúk wóón Jiowa. Iwe atun úa iótek iei, fán chómmóng a móróló ái niwokkus.”

 MET JIOWA EPWAP FÉRI?

12. Met Tafit a fókkun lúkúlúkú me ren Kölfel 56:9?

¹² Álleani Kölfel 56:9. Ena wokisin a pwáári pwal eú alen án Tafit okkufu an niwokkus: Inaamwo iká manawan a chúen nóm lón feiengaw, a ekilonei met Jiowa epwap féri fán itan. Tafit a silei pwe Jiowa epwe seláni lón ewe fansoun mi fich, pokiten a fen erá pwe Tafit epwele wiseni ewe wis king lón Israel. (1 Sam. 16:​1, 13) Me ren Tafit, minne Jiowa a fen pwonei epwe fókkun pwénútá.

13. Met sia tongeni fókkun lúkú Jiowa epwe féri?

¹³ Met Jiowa a pwonei epwe féri fán itom? Sisap ekieki pwe epwe eppeti senikich meinisin osukosuk. c Nge chemeni, ese lifilifil osukosuk kopwe kúna lón ei ótót, Jiowa epwe arosereló lón ewe ótót séfé epwele war. (Ais. 25:​7-9) Ese wor tipemwárámwár pwe ach we Chón Féraatá a fókkun tufichin amanawaatá ekkewe mi máló, echikarakich, me arosaaló meinisin chón ú ngenikich.—1 Jon 4:4.

14. Met sia tongeni ekilon wóón?

¹⁴ Atun ka meefi niwokkus, ekilonei met Jiowa epwe féri lón mwachkkan. Ekieki met kopwe meefi atun Setan ese chúen nóm, aramas mi ngaw ra fen móróló, nge aramas mi múrinné chék ra nóm me iteiten rán repwe ukkunuséchúló. Lón eú pwoomw lón ewe 2014 mwichelap a áiti ngenikich ifa ussun sia tongeni ekilonei ach we ápilúkúlúk. Lón ena pwoomw, emén sam a pwóróus ngeni chón an we famili ifa ussun 2 Timoty 3:​1-5 epwe tongeni ekkesiwil kapasan iká a oesini met epwe fis lón ewe Paratis: “Lón ewe ótót séfé epwe war ewe fansoun mi fókkun apwapwa. Pún aramas repwe tongei aramas, aúcheani pwóróus mi enlet, tipetekison, chón mwareiti Kot, álleasochis semer me iner, sile kilisou, túppwél, tongei chón ar famili, tipemecheres, fóséch ussun ekkewe ekkóch fansoun meinisin, nemeni pwisin mocheniir, mosonoson, sani minne mi múrinné, repwe chón alúkúlúk, rongosich, tekisosson, repwe tongei Kot nge resap aúcheani pwapwaan letiper, repwe manaweni eú manaw mi fich ngeni Kot; iwe kopwe chiechiéch ngeni ekkeei sókkun aramas.” Ka kan pwóppwóróus ngeni chón óm famili are chiechiom kewe chón lúkú epwe ifa ussun manaw lón ewe ótót séfé?

15. Inaamwo iká Tanja a meefi niwokkus, met a álisi le likiitú?

¹⁵ Emén Chón Kraist fefin itan Tanja seni North Macedonia a okkufu an niwokkus ren an ekilonei ekkewe feiéch lón mwachkkan. Seman kewe me inan ra fókkun oput an káé ewe Paipel. Iei met a erá: “Ekkóch mettóch úa niweiti ar repwe fis, iei ra fis. Inei we a kan soun awataei iteiten sárin mwiich. Semei kewe me inei ra erá repwe nieiló iká úa wiliiti emén Chón Pwáraatá Jiowa.” Ló, ló, ló, ra asúoló Tanja me lón imwer we. Met a féri? A erá: “Úa ekkekieki epwele ifa me watteen ái pwapwafóchófóch ren ái filaatá le akkamwéchú ái túppwél ngeni Jiowa. Úa pwal ekieki ifa ussun Jiowa epwe efeiéchúei lón ewe ótót séfé ren ekkewe mettóch a péút seniei lón ei ótót me ifa ussun sisap chúen chechchemeni ekkewe mettóch mi ngaw.” Tanja a akkamwéchú an túppwél. Me ren án Jiowa álillis, a kúnékún leenian. Lón ei fansoun, Tanja a pwúpwúlú ngeni emén Chón Kraist mi túppwél me ra fiti ewe angangen afalafal full-time.

APÉCHÉKKÚLA ÓM LÚKÚLÚK LÓN EI FANSOUN

16. Met epwe álisikich le chék tipepwora atun sipwe kúna pwénútáán ewe oesini lón Luk 21:​26-28?

¹⁶ Atun ewe riáfféú mi lapalap aramas repwe “mammasaroch ren ar niwokkus.” Nge néún  Kot kewe aramas repwe chék núkúchar me tipepwora. (Álleani Luk 21:​26-28.) Pwata sisap mut ngeni niwokkus an epwe okkufukich? Pokiten sia fen káé ach sipwe lúkúlúk wóón Jiowa. Tanja ewe sia fen fósun me mwan a erá pwe minne a fen fis ngeni me lóóm a álisi le likiitú fán ekkewe pwal ekkóch weires a kúna. A erá: “Úa káé pwe Jiowa a tongeni álisikich le likiitú fán ese lifilifil sóssót epwe torikich me epwe efeiéchúkich. Fán ekkóch ussun itá sipwe meefi pwe aramas ra nennemeni met a kan fiffis, nge ren enletin Jiowa a fókkun péchékkúl lap seniir. Me inaamwo iká eli epwe áweires ach sóssót, nge epwe wor mwúúchún.”

17. Ifa ussun ach we lesenin ier fán iten 2024 epwe álisikich? (Ppii ewe sasing wóón péén.)

¹⁷ Lón ei fansoun a chómmóng mettóch a tongeni efisi ach sipwe meefi niwokkus. Nge sia tongeni ussun Tafit, sisap mut ngeni niwokkus an epwe nemenikich. Ach we lesenin ier fán iten 2024 ina eú án Tafit iótek ngeni Jiowa, a erá: “Lupwen üa niuokus, üa chök isetä ai apilükülük womw.” (Kölf. 56:3) Iei alon emén soukáé Paipel ussun ena wokisin: “Tafit ese ekkekieki ussun ekkewe mettóch mi efisi an epwe niwokkus, are ussun an kewe osukosuk. Nge a fen lúkúlúk wóón ewe Emén epwe angasaaló i.” Ekieki ussun ach we lesenin ier lón ekkeei maram repwe feito, ákkáeúin atun ka kúna ekkewe mettóch epwe alólilenuk. Awora fansoun le ekilonei féfférún Jiowa kewe lón fansoun lóóm, lón ei fansoun, me lón fansoun mwach. Iwe mwirin, kopwe ussun chék Tafit le apasa: “Üa apilükülükü Kot, nge üsap niuokus.”—Kölf. 56:4.