1. Dhilobo gani dhiganittukuleli wova?

 ATTU otene dila dhina anowova. Enoziweya wi sabwa ya omusunza Bibilia nihifuruleya wova okwa, muya dhabure makaga na dhina dholaddanana obe wova dhinapadduwe musogorho. Masiki dhawene iyo ninkalawo masaka dhimpadduwa dhilobo “dhintxutxa,” ninga koddo, opanga vina maredda. (Lk. 21:11) Iyo vina ninowawova attu, ninga motagiha alamuleli annipuja vina anamudhi annidda sabwa ya omwebedha Yehova. Ena anowova obuwelaga wi kanawodhe opemberha makattamiho anwananina masaka abano obe anagumanena awene musogorho.

2. Txini empadduweli Davidi valiye o Gat?

² Davidi vina wannova. Motagiha, vafwara-fwariwiye na Mwene Saul afunaga ompa, Davidi wahittawela o Gat, elabo ya akadda Filisti. Akis mwene w’o Gat wahizinddiyela wi Davidi ddi munyakoddo oddule wa guru webeliwaga na attu wi, watatile anyakoddo matxikwi kumi a akadda Filisti. Davidi muziweliye ejuwene wahova vaddiddi. (1 Sam. 21:​10-12) Davidi wahizuzuma vaddiddi sabwa ya ejile egamukosilena Akis. Txini ekosiliye wi apemberhe wova oku?

3. Mowiwanana na Masalmo 56:​1-3, 11, txini ekosile Davidi wi apemberhe wova?

³ Va Masalmo 56 Davidi onologa mukalelo oviwaliyemo mudhidhi waliye o Gat. Va masalmuni oddu iyene onologa mukalelo woviliye vina ejile ekosiliye wi apemberhe wova. Mudhidhi woviye, Davidi wamukuluvelile Yehova. (Kengesa Masalmo 56:​1-3, 11.) Sabwa ya okosa ejuwene iyene katxinuwile. Na mareliho a Yehova Davidi wahiwodha ofuruleya na mukalelo wahajedheliye: Iyene wahivikosiha ninga taduwa! Ottiya ompa Davidi, Akis wahigana ovifurula mwa taduwa ole,  dhahene Davidi pawodhiliye ovuneya.—1 Sam. 21:13–22:1.

4. Ninalibihe dhavi omukuluvela wehu Yehova? Kaladdaniha.

⁴ Iyo vina ninele owodha opemberha wova nigamukuluvela Yehova. Kito ninawodhe dhavi olibiha omukuluvela wehu Yehova, ttabwattabwa akala ninotxutxiwa obe ninowova? Kobuwela yoladdaniha eji. Weyo kozinddiyela wi ohikana eredda, vamaromo ogahova, mbwenyi ogahivugula wova oku kologa na mediku onimukuluveliwe. Iyene txino ohavulumutxa aredda enjene apattiwe eredda yakene enna weyo. Iyene onowuvuruwana nofwasa vina weyo onononelamo wi iyeneyá onoziwa pama makattamiho anupatta. Txino onowuwaddela mukalelo wa osasanyiwa vina murobwe wavulumutxile attu ena. Na mukalelo wakakene, iyo ninonuwihe omukuluvela wehu Yehova nigatamela mudhidhi wi nitanalele dhilobo dhotene dhikosile Yehova, dhinkosiye ovanene vina dhinanikoseliye musogorho. Jijene ekosile Davidi. Nigengesaga mazu alogile Davidi va Masalmo 56, kobuwela mukalelo onawodhiwe omukuluvela Yehova vina opemberha wova.

TXINI EKOSILE YEHOVA?

5. Wi awodhe opemberha wova dhilobo gani dhatananela Davidi? (Masalmo 56:​12, 13)

⁵ Masiki egumi yaye vakalani vangovini, Davidi wazuzumela wang’ana esile dhakosile Yehova. (Kengesa Masalmo 56:​12, 13.) Eji elemelelo yanna Davidi egumi yaye yotene. Motagiha, iyene wantamela mudhidhi w’otanalela dhottandda dha Yehova, eji yannimubutxedha wi Yehova namawodha-wodha vina onokwela nlogo na attu. (Masal. 65:​6-9) Davidi vina wantanalela esile dhàkoseli Yehova attu ena. (Masal. 31:19; 37:​25, 26) Iyene wantanalela makamaka esile dhakoseliwiye na Yehova. Yehova ohimukoya vina ohimbarela Davidi oromana muhimani mwaye. (Masal. 22:​9, 10) Otanalela esi dhotene dhimukamihedha Davidi omukuluvela Yehova!

6. Ogattiddiwa wova, txini enaukamihedhe omukuluvela Yehova?

⁶ Ogattiddiwa wova, karoma ovivuza, ‘Txini ekosile Yehova?’ katamela mudhidhi wi  otanalele dhottanddiwa. Motagiha, “[kafwaseyela] wang’ana” mukalelo onzuzumela Yehova balame vina folori—masiki vahittanddiwani moladdana na Yehova vina vahinimwebedhani—eji kinoniha wi iyene ononizuzumela vottabwa? Otanalela ejuwene enele wunuwiha omukuluvela wawo. (Mt. 6:​25-32) Katanalela vina mukalelo wakamihedhile Yehova alabeli aye. Enowodheya vina weyo osunza yotagiha ya muttu onlogiwa mBibiliani wanna nroromelo noliba, obe kengesa mapadduwo a mwigumini a Anamoona a Yehova a masaka abano. a Ottiya ejo, katanalela mukalelo onuzuzumela Yehova. Txini ekosiliye wi weyo oziwe ebaribari? (Jo. 6:44) Iyene wakulile dhavi malobelo awo? (1 Jo. 5:14) Dhilobo gani dhapama dhimpadduwa mwigumini mwawo dhinwodheya sabwa ya mukutto wa yobolo oniperhekeli Mwanaye?—Ef. 1:7; Aheb. 4:​14-16.

7. Yotagiha ya namavuhulela Daniyel emukamihedhile dhavi Vanessa opemberha wova?

⁷ Murogora w’o Haiti onkuweliwa Vanessa, b ohigumanana makattamiho orutxa vaddiddi. Mulobwana mmodha wa mmuruddani mwaye wanimuligarela vina wanimandarela mensagem malabo otene, iyene wela omudidela wi amugonena. Vanessa kamvubeli wahimwaddela wi kagarumelile. Mbwenyi mulobwana oddule wahidhowavi attabwagavi vina wahimutxutxa. Vanessa onologa wi “wahova vaddiddi.” Iyene owodhile dhavi opemberha wova oku? Wahikosa mwili mwetemwene wi avibarele. Munddimuwa mmodha wa mulogo wahimukamihedha Vanessa wi awaddele makaniya anamattonga. Ottiya ejo iyene wahitanalela mukalelo wakamihedhile Yehova alabeli aye a masaka a mundduni. Vanessa onologa dhahi: “Muttu woroma omubuwelimi ddi namavuhulela Daniyel, iyene kanna muladdu mbwenyi wahigumanana makattamiho orutxa vaddiddi, wahiponyedhiwa mulejeni mwali apoddogoma owopiha. Masiki dhawene Yehova wahimbarela. Ddahimukumbirha Yehova wi addikamihedhe sabwa ya makattamiho agumanana miyo, mmalelimi olobela, kaddova vina.”—Dan. 6:​12-22.

TXINI ENKOSA YEHOVA OVANENE?

8. Nikuluvelo gani nanna Davidi? (Masalmo 56:8)

⁸ Masiki egumi ya Davidi valani vangovini o Gat, iyene kattiyile ogonjihiwa na wova. Ottiya ejo, wahiroma otanalela ejile yamukosela Yehova mudhidhene obule. Davidi wahona nibarelo, osogorhela wa Yehova vina wahinonelamo wi Yehova wanziwa mukalelo waviwiyemo. (Kengesa Masalmo 56:8.) Davidi wahikana akwaye ninga Jónata, vina Namakutta Munddimuwa Aimelek amulibihile vina anvahile nikamihedho nafuniye. (1 Sam. 20:​41, 42; 21:​6, 8, 9) Masiki afwara-fwariwaga na Mwene Saul, Davidi wahiwodha ovuna egumi yaye. Iyene wahikana nikuluvelo wi Yehova onononelamo wila makattamiho amugwela ali orutxa vaddiddi vina ejo yampatta venjene mukalelo wobuweliye.

9. Txini enziwa Yehova mwaha wa muttu-muttu wa iyo?

⁹ Ogagumanagana makattamiho anuttukulela wova kudduwale, Yehova onononelamo pama makattamiho anupatta vina mukalelo oniviwamo weyo. Motagiha, nsaka nali ana Izrayel w’Ejipitu, ottiya bahi wonavi makattamiho ottabwa agumananina Yehova ohiloga wi “txibarene ddinoziwa goyi dhawa.” (Obud. 3:7) Jibo yibile Davidi wahiloga wi Yehova wahona “[dhowawa]” dhaye vina “segedho dha mmurimani” mwaye. (Masal. 31:7)  Vina nsaka natabuwa ana Izrayel—dila dhina sabwa ya dhosakula dhawa dhohifwanyelela—Yehova vina wankubanya. (Iza. 63:9) Ogattiddiwa wova, kudduwale wi Yehova onononelamo mukalelo oniviwamo weyo vina iyene onofuna wukamihedha opemberha wova.

10. Onfwanyelela nni okuluvela wi Yehova onononelamo dhinupadduwela vina onele wukamihedha opemberha makattamiho-makattamihovi?

¹⁰ Dila dhina onovivuzaga mukalelo onukamihedha Yehova okwaranya dhoweha? Onkoddelani omulobelela omukumbirhaga wi auwodhihe woona mukalelo onukamihedhiye? (2 Amwe. 6:​15-17) Karoma otanalela: Wahiromaga olibihiwa na diskursu obe yowakula evahile muttu mmatugumanoni? Wahiromaga opangarhazeya na vidiyu, jibo obe publikasau yina? Muttu wahiromaga wuwaddela elobo-txilobo obe nlebo na Bibilia nidhile wupangarhaza? Dila dhina ninodhaga odduwala mukalelo onnikwela abalihu vina nipangarhazo nakelilehu modhela Bibilia. Mbwenyi esi mivaho dhamakamaka dhinnivaha Yehova. (Iza. 65:13; Mk. 10:​29, 30) Esi vizinddiyelo dhinoniha wi Yehova ononitanala. (Iza. 49:​14-16) Vina dhinoniha wi ninofwanyela omukuluvela Yehova.

11. Txini emukamihedhile Aida opemberha wova?

¹¹ Murogora mmodha onkala o Senegal onkuweliwa Aida, ohiwodha ozinddiyela mukalelo wamukamihedha Yehova mudhidhi wagumaniyena dhorutxa. Vowi iyene wali mwana munddimuwaya wa vatakulu, amambali aye ajeedhela wi agumelege kobiri dhinjidhene wi awodhe ovisapela vina àsapelege amudhaye. Mbwenyi muvevutxeliye egumi yaye wi arome mabasa a opionero, ddabuno Aida wakana kobiri eng’onovi, amudhaye ahisilidhiwa venjene na iyene vina ahiroma omusadduwela. Iyene onologa. “Miyo ddahova sabwa ya ohiwodha wasapela amudhaga vina ologiwa bure na attu ena; ddahiroma ompwatteliha Yehova muladdu sabwa ya dhotene dhapadduwa.” Vasogorhova Aida wahiwa diskursu mmulogoni, iyene ohiloga dhahi: “Namakosa diskursuya wahinubutxedha wi kintanala dila ngasi dhinsuveya murima wehu, Yehova onononelamo vina ononitanala. Mwa ovira wa mudhidhi, na nikamihedho na anddimuwa a mmulogoni vamodha na abali ena  ddahiroma ononelamo oddikwela wa Yehova, vina ddahiroma omulobelela na nikuluvelo, venevo vonimi wi Yehova onowakula malobelo aga ddankana murenddele mwinjene mmurimani.” Mwa ovira wa mudhidhi Aida wahifwanya mabasa agamukamihedhile odhowavi alabaga ninga Pionera, oku akamihedhaga amudhaye na attu ena. Iyene onopuliha alogaga dhahi: “Ddihisunza kakamwe omukuluvela Yehova, ovano ddigalobelaga esile dhova miyo dhinorimela.”

TXINI ENAKOSE YEHOVA MUSOGORHO?

12. Mowiwanana na Masalmo 56:​9, txini yakuluvela Davidi?

¹² Kengesa Masalmo 56:9. Versu eji enowoniha elobo yina emukamihedhile Davidi mudhidhi woviye. Masiki egumi yaye valani vangovini iyene wantanalela esile dhigamukoseli Yehova. Davidi wanziwa wi mudhidhi wofwanyelela Yehova agahinvuna. Mwebaribari, Yehova wahimpikirhela Davidi wi agahimuhaba Saul mpaddo womwene. (1 Sam. 16:​1, 13) Ddhilobo dhotene dhapikirheliwiye na Yehova, Davidi wona ninga dhamalile wakwanihedheya.

13. Nikuluvelo gani ninfwanyelihu okana na Yehova?

¹³ Txini epikirheli Yehova wukosela? Iyo kaninjeedhela wi Yehova onele onibarela mwa makattamiho otene. c Masiki dhawene makattamiho-makattamihovi angumanihuna mwilaboni mpuno, ninokana nikuluvelo wi iyene onele ogomiha mwilaboni eswa. (Iza. 25:​7-9) Txibarene, Muttanddi wehu ohikana owodha wowavenyiha amarafula, ogomiha maredda vina watolotxa amwiddani ehu otene.—1 Jo. 4:4.

14. Txini enfwanyelihu otanalela?

¹⁴ Ogattiddiwa wova katanalela ejile enakose Yehova musogorho. Kobuwela mukalelo onaviwemo weyo Satana agamala otolotxiwa, attu abure agamala otolotxiwa, mwilaboni bamukala attu apama vina venevo vanadhowigihu siku na siku nikalaga attu oligana. Nlagiho noniwe va porogaramani ya Kongeresu ya 2014, nihoniha marhe apama a otanalela njeedhelo nehu. Anamudhi a murala mmodha ele otanalela mukalelo onakale egumi mParaizu. Vina awene ahubuwela mukalelo onakane nlebo na 2 Timóteo 3:​1-5 mazu ottiyana addiwagana mwilaboni eswa: “Ziwa wi mwilaboni eswa munele okala ohagalala. Vowi attu anelege okwelana muttu na mukwaye, anajiwe murima na mafumo omuyani, ovipimelela, oviyeviha, anerege omuttittimiha Mulugu, anawiwelela amambali awa, otamalela, oweddeyana, anatanalege amudhawa, awiwananeyana, ànalogege pama mudhidhi wotene attu ena, anelege owodha ovyang’anela, okurumuwa, ankwela dhilobo dhapama, okuluveleya, ofewa murima, ofwasa, animukwela Mulugu ottiya dhifunelo dhabure, aneddihiwa n’ekalelo ya omulabela mulugu nororomeleya; weyo tamelá wandana na attu aba.” Weyo onologa na amudhawo obe na abali a mmulogoni sabwa ya egumi enakanihu mwilaboni eswa?

15. Txini emukamihedhile Tanja opemberha wova?

¹⁵ Murogora dhahi onkala o Macedónia do Norte onkuweliwa Tanja, ohiwodha opemberha wova waye sabwa ya otanalela maruriho anakeliye musogorho. Amambali aye kafuna wi iyene amusunze Bibilia vina ahinfwara-fwara venjene. Iyene ohiloga: “dhilobo dhina dhovetxa miyo dhahidha opadduwa. Dila dhotene dhadhowa miyo o matugumanoni ddigeyela mmani wanddibubudda. Amambali aga ahidditxutxa alogaga wi agahiddipa miyo kokala Munamoona wa Yehova.” Omamalelowa Tanja ohittamagihiwa vatakulu. Iyene okosile eni? Onodhowavi alogaga: “Miyo  ddanzuzumela wagalala wa mukalakala ogakanile miyo kokalavi wororomeleya. Miyo vina ddihitanalela wi mukalelo onaddirelihe Yehova mwilaboni eswa, onopitta dhilobo dhotene txino dhiyelelimi mwilaboni mpuno, vina dhilobo dhotene dhabure kadhinobuweliwe vina.” Tanja onodhowavi akalaga wororomeleya vina na nikamihedho na Yehova ofwanya mburo vokala. Ddabuno Tanja ohiteliwa na mbali wororomeleya vina na nikamihedho na Yehova onodhowavi amulabelaga iyene nororomeleya mmabasani a mudhidhi wotene.

OLIBIHE OMUKULUVELA WAWO YEHOVA OVANENE

16. Mazu a Luka 21:​26-28, agakwanihedheya, txini enanikamihedhe oliba murima?

¹⁶ Goyi enddimuwa egaroma attu “anere ohileya [na wova].” Mbwenyi nlogo na Mulugu ninele okala noliba-nene vina kaninove elo. (Kengesa Luka 21:​26-28.) Txini enanittukulele ohova? Sabwani iyo nihimala osunza omukuluvela Yehova. Tanja, ologiwe mundduni ohiloga wi makattamiho agumaniliyena mundduni anomukamihedha okwaranya dhorutxa dhina. Iyene ohiloga: “Miyo ddisunza wi kuli makattamiho ahinimuwodhiha Yehova onikamihedha obe onireliha. Dila dhina enodhaga woneya ninga attu ena anowodha okosa dhotedhene dhinfunani, mbwenyi ebaribariya jawi awene anwodha okosa dhilobo esuwene dhinattiya Yehova bahi okosa vina masiki makattamihoya akale orutxa vaddiddi anele ogoma.”

17. Nlebo nehu na yaka ya 2024 ninanikamihedhe dhavi? (Koona foto ya kapa.)

¹⁷ Masaka abano dhikalawo dhilobo dhiganittukuleli wova. Mbwenyi, dhahene ninga Davidi, iyo kaninfuna wi wova onipemberhe. Nlebo nehu na yaka ya 2024, nlobelo nikosile Davidi, iyene ohiloga dhahi: “Wova ogaddithidda, ddinthamagela vali nyuwo.” (Masal. 56:3) Addagana nlebo ntti, nivuru dhahi ninologa, Davidi “kakala wubuwelavi mwaha wa dhilobo dhamuttukulela wova, nne vina kobuwela makattamiho aye. Ottiya ejo iyene wannimukuluvela Ole aganvunile.” Kadhowagavi wubuwelaga nlebo nehu na yaka, makamaka ogapattiwa makattamiho agawuttukuleli wova. Katamela mudhidhi wi otanalele dhikosile Yehova, dhinkosiye ovanene, vina dhinakosiye musogorho. Dhahene ninga Davidi weyo onele ologa: “Ddinomukuluvela iyene [Mulugu], kaddinova elo.”—Masal. 56:4.