1. Akoz parfwa nou per?

 PARFWA nou tou nou per. Byensir apre ki nou’n etidye Labib, nou nepli per bann dimoun mor, bann demon oubyen sa ki pou arive dan lavenir. Me nou pe viv dan en letan kot i annan “bann keksoz efreyan” parey lager, krim ek maladi. (Lik 21:11) I kapab ki nou annan lafreyer pour zonm. Par egzanp, i kapab ki nou per gouvernman ki persekit nou oubyen bann manm nou fanmir ki opoz vre ladorasyon. Serten i enkyet ki zot pa pou kapab andir en problenm ki zot pe deza fer fas avek oubyen en problenm ki zot kapab fer fas avek dan lavenir.

2. Ki mannyer sityasyon David ti ete ler i ti dan lavil Gat? Eksplike.

² I annan letan kot David ti per. Par egzanp, ler Lerwa Sail ti pe tay avek David pour touy li, David ti sov dan lavil Gat, ki ti en lavil Filisten. I pa ti pran bokou letan pour Akis, lerwa Gat, konnen ki David ti sa gerye pwisan ki ti’n touy “plizyer dizenn milye” Filisten e ki bann dimoun ti’n konpoz en sanson lo li. Sa sityasyon ti fer David “konmans per.” (1 Sam. 21:​10-12) I ti per sa ki Akis ti pou fer li. Ki mannyer David ti sirmont son lafreyer?

3. Dapre Psonm 56:​1-3, 11, ki mannyer David ti sirmont son lafreyer?

³ Dan Psonm 56, David i koz lo lafason ki i ti santi ler i ti dan lavil Gat. Dan sa psonm, David i eksplike akoz i ti per me i osi eksplike kwa ki ti ed li sirmont son lafreyer. Ler David ti per, i ti met konfyans dan Zeova. (Lir Psonm 56:​1-3, 11.) I ti annan bann bon rezon pour annan konfyans dan Zeova. Avek led Zeova, David ti deside pour fer en keksoz vreman drol. I ti fer krwar i fou e son plan ti marse. Akis pa ti anvi touy David me i ti anvi ki David i ale e sa ti fer ki David ti kapab sove.—1 Sam. 21:13–22:1.

4. Ki mannyer nou kapab devlop plis konfyans dan Zeova? Donn en legzanp.

 ⁴ Nou osi nou kapab sirmont nou lafreyer par met konfyans dan Zeova. Me ki mannyer nou kapab devlop plis konfyans dan Zeova sirtou ler nou per? Annou vwar en legzanp. Si ou aprann ki ou annan en maladi, petet o konmansman ou per. Me si ou annan konfyans dan ou dokter, sa i kapab fer ou santi ou pli kalm. Petet sa dokter in ed plizyer pasyan ki ti annan sa maladi. Petet sa dokter i ekout ou atantivman e sa i fer ou asire ki i vreman konpran ou santiman. Petet i sizere ki ou pran en tretman ki’n marse pour lezot dimoun. Pareyman, ler nou reflesir lo sa ki Zeova in fer dan lepase, lo sa ki i pe fer la konmela e sa ki i pou fer pour nou dan lavenir, sa i fer nou annan plis konfyans dan Zeova. I sanmenm ki David ti fer. Anmezir nou diskit lo serten keksoz ki David i dir dan Psonm 56, reflesir lo ki mannyer ou osi ou kapab devlop plis konfyans dan Zeova e reste kalm ler ou per.

KI ZEOVA IN FER DAN LEPASE?

5. Ki David ti reflesir lo la pour ed li sirmont son lafreyer? (Psonm 56:​12, 13)

⁵ Menm si David ti ankor dan en sityasyon danzere, i ti reflesir lo sa ki Zeova ti’n fer dan lepase. (Lir Psonm 56:​12, 13.) Sa ti en keksoz ki David ti fer tou dilon son lavi. Par egzanp, parfwa i ti reflesir lo bann keksoz ki Zeova ti’n kree. Sa ti fer li rapel ki Zeova i tou pwisan e i kontan bann imen en kantite. (Ps. 65:​6-9) David ti osi medit lo sa ki Zeova ti’n fer pour lezot. (Ps. 31:19; 37:​25, 26) I ti sirtou medit lo sa ki Zeova ti’n fer pour li dan lepase. Zeova ti’n ed e protez David depi ler i ti ankor en pti baba. (Ps. 22:​9, 10) Nou kapab asire ki ler David ti reflesir lo sa bann keksoz sa ti ed li pour annan plis konfyans dan Zeova!

6. Ler nou per, kwa ki pou ed nou annan konfyans dan Zeova?

⁶ Ler ou per, demann ou lekor, ‘Ki Zeova in fer dan lepase?’ Reflesir lo bann keksoz ki Zeova in kree. Par egzanp, ler nou “get byen” lafason ki Zeova i pran swen  avek bann zwazo ek bann fler, menm si i pa’n kree zot avek sa abilite pour demontre son bann kalite e pour ador li, sa pou fer nou annan plis konfyans ki Zeova pou pran swen avek nou osi. (Mat. 6:​25-32) Reflesir osi lo ki Zeova in fer pour son bann serviter. Ou kapab etidye lo en dimoun dan Labib ki’n demontre lafwa oubyen ou kapab lir leksperyans en serviter Zeova dan nou letan. a Osi medit lo lafason ki Zeova in pran swen avek ou. Ki mannyer Zeova in atir ou ver laverite? (Zan 6:44) Ki mannyer in reponn ou bann lapriyer? (1 Zan 5:14) Ki byenfe ou gannyen sak zour atraver sakrifis son Garson?—Efe. 1:7; Ebr. 4:​14-16.

7. Ki mannyer legzanp profet Danyel ti ed Vanessa pour sirmont son lafreyer?

⁷ En ser ki apel Vanessa, b ki reste Ayti ti fer fas avek en sityasyon ki ti fer li per. En zonm dan son vwazinaz ti telefonn li e anvoy li mesaz toulezour. Sa zonm ti pe met presyon lo li pour annan en relasyon avek li. Vanessa ti fer li byen konpran ki i pa ti enterese me sa zonm ti vin pli agresiv e i ti menas li. Vanessa i dir: “Mon ti per.” Ki mannyer Vanessa ti sirmont son lafreyer? I ti fer sa ki i ti kapab pour protez son lekor. En ansyen ti ed li pour kontakte lapolis. Vanessa ti osi reflesir lo lafason ki Zeova ti protez son bann serviter dan lepase. Vanessa i dir: “Sa premye dimoun ki mon ti mazinen i profet Danyel. Menm si i ti inosan, i ti ganny zete dan en trou kot i ti annan bann lyon ki ti lafen. Me Zeova ti pran swen avek li. Mon ti demann Zeova pour ed mwan dan sa sityasyon. Apre sa, mon ti nepli per.”—Dan. 6:​12-22.

KI ZEOVA PE FER LA KONMELA?

8. Ki David ti asire? (Psonm 56:8)

⁸ Menm si David ti an danze ler i ti dan lavil Gat, i pa ti konsantre lo sa ki ti fer li per. O kontrer i ti swazir pour reflesir lo sa ki Zeova ti pe fer pour li sa moman. David ti santi ki Zeova ti pe gid e protez li e ki Zeova ti konpran son bann santiman. (Lir Psonm 56:8.) David ti osi annan bann bon zanmi parey Zonatan e Granpret Aimelek, ki ti ankouraz li e ed li. (1 Sam. 20:​41, 42; 21:​6, 8, 9) Menm si Lerwa Sail ti anvi touy li, David ti ganny sans sove. I ti asire ki Zeova ti konn byen sa ki ti pe arive avek li e lafason ki i ti pe santi.

9. Ki Zeova i vwar konsernan sakenn parmi nou?

⁹ Ler ou pe pas dan en problenm ki fer ou per, rapel ki Zeova i vwar sa ki ou pe pas ladan e i konnen ki mannyer sa pe fer ou santi. Par egzanp, ler bann Izraelit ti Lezip, Zeova pa ti zis vwar ki zot ti pe ganny trete dan en move fason me i ti osi remark zot “soufrans.” (Egz. 3:7) Dan en sanson, David ti dir ki Zeova ti vwar son “problenm” e osi lafason ki i ti pe “soufer en kantite.” (Ps. 31:7) Ler pep Bondye ti soufer, parfwa menm akoz zot in fer bann desizyon bet, “sa ti fer [Bondye] soufer.” (Iza. 63:9) Ler ou per, Zeova i konpran ki mannyer ou pe santi e i vreman anvi ed ou sirmont ou lafreyer.

10. Akoz ou asire ki Zeova i vwar ou problenm e i pou ed ou fer fas avek ou problenm?

¹⁰ Si ou pe fer fas avek en problenm ki fer ou per, petet ou pe demann ou lekor  ki mannyer Zeova pe ed ou. Alor demann Zeova pour ed ou vwar ki mannyer i pe ed ou. (2 Rwa. 6:​15-17) Apre reflesir lo sa bann kestyon: Eski i annan en diskour oubyen komanter dan renyon ki’n ankouraz ou? Eski i annan en piblikasyon baze lo Labib, en video oubyen en original song ki’n ankouraz ou? Eski en dimoun in dir ou en parol ankourazan oubyen in servi en verse pour ankouraz ou? Nou kapab fasilman oubliye ki mannyer sa lanmour ki nou bann frer ek ser i demontre anver nou e sa lankourazman ki nou’n gannyen dan Parol Bondye i ed nou. Tousala i bann kado ekstraordiner ki Zeova i donn nou. (Iza. 65:13; Mark 10:​29, 30) Sa bann keksoz i montre ki Zeova i kontan ou. (Iza. 49:​14-16) Zot osi montre ki Zeova i merit ou konfyans.

11. Kwa ki ti ed Aida pour sirmont son lafreyer?

¹¹ En ser ki apel Aida, ki reste Senegal ti vwar ki mannyer Zeova ti ed li ler i ti pe pas dan problenm. Vi ki Aida i premye zanfan, son paran ti ekspekte ki i travay pour fer ase larzan pour pran swen avek zot e avek son lekor. Me apre ki i ti’n senplifye son lavi pour li kapab fer pionye, Aida ti napa en kantite larzan. Sa ti fer son fanmir ankoler avek li e zot ti kritik li. I dir: “Mon ti per ki mon pa ti pou kapab ed mon paran e ki zot tou zot ti pou rezet mwan. Mon ti menm blanm Zeova parski mon ti krwar ki i ti’n les keksoz ariv sitan mal.” Pli tar, Aida ti tann en diskour dan renyon. Aida i dir: “Sa orater ti fer nou rapel ki Zeova i konnen kwa ki fer sakenn parmi nou per oubyen enkyet. Mon ti ganny konsey avek bann ansyen ek lezot e ptitapti sa ti fer mwan asire ki Zeova i kontan mwan. Sa ti fer ki ler mon ti priy Zeova, mon ti annan plis konfyans ki i ti pou ed mwan e anmezir mon ti vwar ki i reponn mon lapriyer, mon ti annan lape lespri.” Avek letan, Aida ti ganny en travay kot i ti ganny ase larzan pour kontinyen fer pionye e pour ed son paran ek lezot. I dir: “Mon’n aprann pour depan  lo Zeova konpletman. Aprezan, apre ki mon priye, mon nepli per.”

KI ZEOVA POU FER DAN LAVENIR?

12. Dapre Psonm 56:​9, ki David ti konnen?

¹² Lir Psonm 56:9. Dan sa verse nou vwar en lot keksoz ki ti ed David sirmont son lafreyer. Menm si son lavi ti ankor an danze, i ti medit lo sa ki Zeova pou fer pour li dan lavenir. David ti konnen ki Zeova ti pou sov li dan sa bon moman. Apre tou, Zeova ti’n dir ki David ti pou vin prosen lerwa Izrael. (1 Sam. 16:​1, 13) David ti konnen ki nenport keksoz ki Zeova i promet pou vin vre.

13. Ki nou asire Zeova pou fer?

¹³ Ki Zeova in promet pour fer pour ou? Nou pa ekspekte ki Zeova i protez nou kont tou problenm. c Me nenport problenm ki ou fer fas avek dan sa lemonn, Zeova pou tir sa bann problenm dan nouvo lemonn. (Iza. 25:​7-9) Nou asire ki nou Kreater i for e i pou kapab resisit bann dimoun ki’n mor, geri nou e detri tou bann ki opoz nou.—1 Zan 4:4.

14. Ki nou kapab medit lo la?

¹⁴ Ler ou per, medit lo sa ki Zeova pou fer dan lavenir. Medit lo ki mannyer ou pou santi ler Satan i nepli la, ler bann move dimoun i ganny detrir e i annan zis bann dimoun ki fer sa ki byen e ler sak zour, ptitapti nou vin parfe. Dan lasanble rezyonal 2014, i ti annan en demonstrasyon ki ti montre ki mannyer nou kapab medit lo nou lespwar. Dan sa demonstrasyon, en papa ti koz avek son fanmir lo ki mannyer 2 Timote 3:​1-5 ti’n kapab ganny ekrir si sa verse ti pe koz lo ki mannyer lavi pou ete dan Paradi. I ti dir: “Dimoun pou kontan kanmarad, kontan bann keksoz spirityel, modes, annan limilite, loue Bondye, obeisan anver zot paran, rekonesan, fidel, annan gran lafeksyon pour zot fanmir, tonm dakor avek kanmarad, toultan koz an byen lo zot prosen, annan kontrol lo zot lekor, annan ladouser, kontan dibyen, diny konfyans, pare pour sede, abes zot lekor, kontan Bondye plito ki plezir, zot pou montre en devosyon senser pour Bondye. Reste pros avek sa bann dimoun.” Eski ou koz avek ou fanmir oubyen bann frer ek ser lo ki mannyer lavi pou ete dan nouvo lemonn?

15. Menm si Tanja ti per, kwa ki ti ed li pour sirmont son lafreyer?

¹⁵ Annou vwar leksperyans en ser ki apel Tanja, ki reste North Macedonia. Ler i ti konmans etidye Labib, son paran ti opoz li. Tanja ti medit lo sa ki Zeova pou fer dan lavenir e sa ti ed li pour reste fidel e pour sirmont son lafreyer. Tanja i dir: “I annan serten keksoz ki mon ti per pangar i arive e sanmenm ki ti arive. Mon manman ti bat mwan apre sak renyon. Mon paran ti dir ki zot pou touy mwan si mon vin en Temwen Zeova.” Pli tar paran Tanja ti pous li e fer li kit zot lakour. Ki Tanja ti fer? I dir: “Mon ti konsantre lo sa kantite lazwa ki mon ti pou annan pour touzour parski mon’n swazir pour reste fidel. Mon ti osi reflesir lo lefet ki dan nouvo lemonn, Zeova pou rekonpans mwan pour bann keksoz ki mon kapab perdi la konmela dan sa lemonn e lo lefet ki nou pa pou mazin bann move keksoz.” Tanja ti reisi reste fidel avek Zeova. Avek led Zeova, i ti trouv en landrwa reste. Ozordi, Tanja in marye e li ansanm avek son msye, i dan servis a plen tan pe servi Zeova dan lazwa.

 DEVLOP PLIS KONFYANS DAN ZEOVA DEPI LA KONMELA

16. Kwa ki pou ed nou kontinyen demontre kouraz ler nou vwar sa ki ganny dir dan Lik 21:​26-28 pe ganny akonplir?

¹⁶ Pandan gran ladetres, laplipar dimoun pou “tonm feb akoz lafreyer.” Me pep Bondye pou reste for e zot pou demontre kouraz. (Lir Lik 21:​26-28.) Akoz nou pa pou per? Parski nou pou’n fini aprann pour annan konfyans dan Zeova. Tanja, ki’n ganny mansyonnen pli boner i dir ki sa ki i’n pas ladan pe ed li fer fas avek lezot sityasyon difisil. I dir: “Mon’n aprann ki Zeova i kapab ed nou fer fas avek nenport sityasyon e i kapab beni nou. Parfwa i paret ki lezot pe kontrol sityasyon me an realite, Zeova i pli pwisan ki zot e li ki pe permet zot annan en serten kantite kontrol e menm si i kapab difisil pour fer fas avek en problenm, sa problenm pou fini en zour.”

17. Ki mannyer nou teks pour lannen 2024 pou ed nou? (Vwar portre lo kouvertir.)

¹⁷ Ozordi i annan en kantite keksoz ki kapab fer nou per. Me parey David, nou kapab swazir pour pa les nou lafreyer kontrol nou. Nou teks pour lannen 2024 i form parti en lapriyer ki David ti fer avek Zeova kot i ti dir: “Ler mon per, mon annan konfyans dan ou.” (Ps. 56:3) En spesyalis Labib i dir ki dan sa verse, David “pa kontinyen mazin lo bann keksoz ki fer li per oubyen konsernan son problenm. O kontrer i depan lo sa enn ki pou sov li.” Mazin lo nou teks pour lannen dan bann mwan ki vini sirtou ler ou fer fas avek en sityasyon ki fer ou per. Pran letan pour reflesir lo sa ki Zeova in fer dan lepase, lo sa ki i pe fer la konmela e lo sa ki i pou fer dan lavenir. Koumsa, parey David, ou pou kapab dir: “Mon annan konfyans dan Bondye, mon pa per.”—Ps. 56:4.