1. Mun na an be siran tuma dɔw la?

 AN KELEN kelen bɛɛ be siran tuma dɔw la. Tiɲɛn lo ko an tɛ siran saya, jinaw ani sinikow ɲɛ sabu an b’a lɔn Bibulu be min fɔ u koo la. Nka, an be wagati min na, “jatigɛkow” ka ca, i n’a fɔ kɛlɛw, fariyakow ani banaw (Luka 21:11). N’a sɔrɔ an be siran fana mɔgɔw ɲɛ i n’a fɔ faaman minw b’an tɔɔrɔla wala an somɔgɔw yɛrɛ, minw b’an kɛlɛ tiɲɛn batoli kosɔn. Dɔw be siran ko u tɛna se k’u ka bi gwɛlɛya wala gwɛlɛya nata dɔ muɲu.

2. A lakali min ye Dawuda sɔrɔ tuma min na a tun be Gati dugu la.

² Siranya ye Dawuda minɛ tuma dɔw la. Misali la, tuma min na masacɛ Sayuli tun b’a ɲinina k’a faga, a bolila ka taga Gati, Filisitikaw ka dugu dɔ la. A ma mɛɛn, Gati masacɛ Akisi bɔra a kala ma ko Dawuda ye kɛlɛkɛla ŋana ye, u tun be dɔnkili lara ka min tando ko a ye Filisitika “waa tan tan faga.” Dawuda “siranna . . . kosɔbɛ.” (1 Sam. 21:11-13). Akisi tun bena min kɛ a la, a tun be siranna o lo ɲɛ. Dawuda ye see sɔrɔ a ka siranya kan cogo di?

3. Ka kɛɲɛ ni Zaburuw 56:2-4, 12 ye, Dawuda ye see sɔrɔ a ka siranya kan cogo di?

³ Dawuda dusukunnakow tun ye min ye k’a to Gati dugu la, a y’o fɔ an ye Zaburuw 56nan kɔnɔ. A y’a ɲɛfɔ yen ka gwɛ fɛɛn min kama a tun sirannin lo ani min y’a dɛmɛ ka see sɔrɔ o siranya kan. Tuma min na Dawuda tun sirannin lo, a y’a jigi la Jehova kan (Zaburuw 56:2-4, 12 kalan). Ani Jehova m’a jigi tigɛ. A ka dɛmɛ barika la, Dawuda y’a latigɛ ka koo kabakoman dɔ kɛ. A y’a yɛrɛ kɛ fatɔ ye ani mɔgɔw lara o la! Sisan, masacɛ Akisi tun t’a fɛ ka Dawuda faga tugun, nka a tun b’a fɛ a ka taga ka bɔ ale ɲɛɛ kɔrɔ. O  la, Dawuda sera ka boli.—1 Sam. 21:14–22:1.

4. An be se k’an jigi la kosɔbɛ Jehova kan cogo di? Misali dɔ fɔ.

⁴ N’an fana b’an jigi la Jehova kan, an bena see sɔrɔ an ka siranya kan. Nka, an be se k’an jigi la kosɔbɛ Jehova kan cogo di, sanko n’an sirannin lo? An ka misali dɔ lajɛ. N’i y’a mɛn ko bana dɔ b’i la, n’a sɔrɔ i bena siran a daminɛ na. Nka n’i lanin lo i ka dɔgɔtɔrɔ la, dɔ bena bɔ i ka siranya la. N’a sɔrɔ o bana ɲɔgɔn tun be mɔgɔ minw na, a sera k’u caaman furakɛ. A be i lamɛn koɲuman ani k’a to i be la a la ko a be i dusukunnakow faamu sɔbɛ la. A be se ka furakɛcogo dɔ kofɔ i ye fana, a ye mɔgɔ caaman furakɛ ni min ye. O cogo kelen na, n’an be miiri k’a filɛ Jehova ye min kɛ ka ban, a be min kɛra ani a bena min kɛ, an bena an jigi la a kan kosɔbɛ. Dawuda y’o lo kɛ. A ye kuma minw sɛbɛ Zaburuw 56nan kɔnɔ hakili senu barika la, an k’u dɔw lajɛ. U lajɛtɔ, miiri k’a filɛ ele fana be se k’i jigi la kosɔbɛ Jehova kan cogo min na ani ka see sɔrɔ i ka siranya kan.

JEHOVA YE MIN KƐ KA BAN

5. Walisa ka see sɔrɔ a ka siranya kan, Dawuda tun be miiri mun lo la? (Zaburuw 56:13, 14).

⁵ Tuma min na Dawuda niin tun be farati la, Jehova ye min kɛ ka ban, a tora ka miiri o la (Zaburuw 56:13, 14 kalan). Dawuda tun be koow kɛ o cogo lo la a ka ɲɛnamaya kuru bɛɛ la. Misali la tuma dɔw la, a miirila Jehova ka danfɛnw koo la, o min y’a hakili jigi ko Jehova ye Sebagayabɛɛtigi Ala ye ani ko a b’a janto kosɔbɛ adamadenw na (Zab. 65:7-10). Jehova ye min kɛ mɔgɔ wɛrɛw ye, Dawuda tun be miiri o fana na (Zab. 31:20; 37:25, 26). Jehova tun ye min kɛ ale Dawuda yɛrɛ ye, a tun be miiri o yɛrɛ lo la kosɔbɛ. Jehova y’a dɛmɛ ani k’a latanga kabi a denɲɛnin tuma (Zab. 22:10, 11). Dawuda kɛtɔ ka miiri o koow la, miiri k’a filɛ o y’a to a y’a jigi la kosɔbɛ Jehova kan cogo min na!

6. N’an sirannin lo, mun lo bena an dɛmɛ an k’an jigi la Jehova kan?

⁶ N’i sirannin lo, i yɛrɛ ɲininga ko: “Jehova ye mun lo kɛ ka ban?” Miiri a  ka danfɛnw koo la. Misali la, Jehova ma kɔnɔw ni filɛruw dan a yɛrɛ jaa la ani u tɛ se k’a bato. Nka, a b’a janto u la. N’an miirila koɲuman o la, an bena la a la kosɔbɛ ko a b’a janto an fana na (Mat. 6:25-32). Jehova ye min kɛ a sagokɛlaw ye, miiri o la fana. I be se ka Jehova sagokɛla dɔ ka maana kalan Bibulu kɔnɔ min y’a yira ko a limaniyanin lo kosɔbɛ. Wala Jehova sagokɛla minw ye ɲɛnamaya kɛ an ka wagati la, i be se k’olu dɔ ka ɲɛnamaya lakali kalan. a Ka fara o kan, Jehova y’a janto ele yɛrɛ la cogo min na, miiri o la. A y’i dɛmɛ cogo di i ye tiɲɛn lɔn? (Zan 6:44). A y’i ka deliliw jaabi cogo di? (1 Zan 5:14). A Dencɛ kanulen ka kunmabɔsara b’i nafara loon o loon cogo di?—Efɛz. 1:7; Eburuw 4:14-16.

7. Kira Daniyɛli ka koo ye Vanessa dɛmɛ cogo di a ye see sɔrɔ a ka siranya kan?

⁷ An balimamuso Vanessa b be Ayiti jamana na ani siranyako dɔ y’a sɔrɔ. A ka dugu la, cɛɛ dɔ tun be to k’a weele ani ka mesaziw ci a ma loon o loon. A tun be to k’a lasun a ka la n’ale ye. Vanessa banna pewu! Nka, o cɛɛ y’a daminɛ ka fariya a ma ani k’a bagabaga yɛrɛ. Vanessa ko: “N’ tun sirannin lo kosɔbɛ.” A ye see sɔrɔ o siranya kan cogo di? A ye koo tigitigi dɔw kɛ k’a yɛrɛ latanga. Diinan mɔgɔkɔrɔ dɔ y’a dɛmɛ a y’o koo fɔ faamanw ye. Jehova y’a sagokɛlaw dɛmɛ cogo min na galen, a miirila o fana na. Vanessa ko: “N’ miirila mɔgɔ fɔlɔ min na, o ye kira Daniyɛli lo ye. U bagara a ma k’a fili jara kɔngɔtɔw ka dingɛ kɔnɔ. Nka, Jehova y’a janto a la. N’ ye Jehova deli ani ka n’ ka koo bɛɛ to a bolo. O kɔ, n’ tun sirannin tɛ tugun.”—Dan. 6:13-23.

JEHOVA BE MIN KƐRA

8. Dawuda tun lanin be mun lo la? (Zaburuw 56:9).

⁸ Hali ni Dawuda niin tun be farati la Gati dugu la, koo minw tun be siranya bila a la, a ma to ka miiri o la. Nka, Jehova tun be min kɛra a ye o wagati yɛrɛ la, a tora ka miiri o lo la. Dawuda y’a ye ko Jehova b’ale ɲɛminɛna, a b’a latangara ani ko a b’ale dusukunnakow faamu (Zaburuw 56:9 kalan). Dawuda tun be ni teri sɔbɛ dɔw ye i n’a fɔ Zonatan ani sarakalasebagaw kuntigi Ayimelɛki. Olu tun b’a jija ani k’a dɛmɛ (1 Sam. 20:41, 42; 21:7, 9, 10). Dawuda niin kisira fana, k’a sɔrɔ masacɛ Sayuli tun b’a ɲinina k’a faga. A tun lanin b’a la ko Jehova b’ale ka gwɛlɛyaw kala ma ani o gwɛlɛyaw be min kɛra ale la.

9. Jehova be mun lo kɔrɔsi an kelen kelen bɛɛ koo la?

⁹ Ni gwɛlɛya dɔ b’i kan min be siranya bila i la, kana ɲinɛ ko Jehova b’o kala ma ani a b’a lɔn o gwɛlɛya be min kɛra i la. Misali la, Ezipitikaw tun be sɛgɛn min lara Israɛldenw kan, Jehova y’o ye. A yɛrɛ ko ale be “u ka tɔɔrɔkow kala ma.” (Ɛkiz. 3:7). Dawuda y’a la dɔnkili la ko Jehova ɲɛɛ be ale ka “sɛgɛn na” ani ko a be ale ka “dusukasi lɔn.” (Zab. 31:8). “Degu tun bɛ [Jehova] yɛrɛ kan” Israɛldenw ka degun wagatiw bɛɛ la, hali n’u yɛrɛ ka desizɔn juguw kosɔn tun lo (Ezayi 63:9, Biblu Ala ta Kuma). Ni siranya b’i la, Jehova b’i dusukunnakow faamu ani a b’a fɛ k’i dɛmɛ i ka see sɔrɔ o siranya kan.

10. Mun na i lanin b’a la ko Jehova b’a janto i la ani ko a bena i dɛmɛ i ka gwɛlɛyaw bɛɛ la?

 ¹⁰ Ni kɔrɔbɔli dɔ b’i kan, n’a sɔrɔ i ɲɛɛ t’a la Jehova b’i dɛmɛna cogo min na. I be se ka mun lo kɛ do? A deli a k’a to i k’a faamu a b’i dɛmɛna cogo min na (2 Mas. 6:15-17). O kɔ, miiri nin na: Kafo ka lajɛn dɔ la, yala kalan dɔ wala lakalita dɔ m’i ka limaniya barika bonya wa? Yala an ka sɛbɛ, videwo wala an ka dɔnkili diiman dɔ m’i jija wa? Yala mɔgɔ dɔ ma hakilisigi kuma dɔ fɔ i ye wala ka vɛrise dɔ kofɔ i ye wa? An balimaw be kanuya wale minw yira an na ani an be jijali minw sɔrɔ Ala ka Kuma kɔnɔ, o b’an dɛmɛ cogo min na, n’an ma farati, an be se ka ɲinɛ o kɔ. Nka, u ye Jehova ka nilifɛn kabakomanw lo ye (Ezayi 65:13; Mariki 10:29, 30). U b’a yira ko a b’a janto i la ani ko i ka ɲi k’i jigi la a kan.—Ezayi 49:14-16.

11. Mun lo ye Aida dɛmɛ a ye see sɔrɔ a ka siranya kan?

¹¹ Aida be Sɛnɛgali. Ale y’a kɔrɔsi Jehova y’a dɛmɛ cogo min na ka kɔrɔbɔli dɔ muɲu. Ale lo ye a bangebagaw ka deen fɔlɔ ye minkɛ, u tun b’a fɛ a k’a jija ka wari caaman sɔrɔ walisa k’a janto a yɛrɛ ani olu la. Nka tuma min na Aida y’a latigɛ k’a ka ɲɛnamaya kɛ cogo nɔgɔman na walisa ka kɛ piyɔniye ye, a tun tɛ wari bɛrɛ sɔrɔla. A bangebagaw dimininna a kɔrɔ ani u tun b’a kɔrɔfɔ. Aida ko: “N’ tun sirannin lo ko n’ tɛna se ka n’ bangebagaw dɛmɛ ani ko bɛɛ tun bena ban n’ na. N’ yɛrɛ ye Jehova jalaki ko a b’a tora n’ ka koow be juguyara ka taga.” O kɔ, Aida ye kalan dɔ mɛn lajɛn dɔ la. A ko: “Kalankɛla y’an hakili jigi ko tɔɔrɔ koo o koo b’an kan, Jehova b’o bɛɛ kala ma. Dɔɔni dɔɔni, diinan mɔgɔkɔrɔw ani mɔgɔ wɛrɛw ka ladiliw ye n’ hakili sigi ko Jehova be n’ kanu. Delili kɛtɔ, n’ y’a daminɛ ka la a la kosɔbɛ ko Jehova bena n’ dɛmɛ. Ani n’ dusu lafiyara yɛrɛ le tuma min na n’ y’a ye a be n’ ka deliliw jaabira cogo min na.” Kɔfɛ, Aida ye baara dɔ sɔrɔ min sara tun b’a to a be se k’a mako wasa a ka piyɔniye baara la ani k’a bangebagaw ni mɔgɔ wɛrɛw dɛmɛ wariko ta fan fɛ. A ko: “N’ ye n’ jija ka n’ jigi bɛɛ la Jehova kan.  Sisan, tuma caaman na delili kɛnin kɔ, n’ tɛ siran tugun.”

JEHOVA BENA MIN KƐ

12. Ka kɛɲɛ ni Zaburuw 56:10 ye, Dawuda tun lanin be mun lo la?

¹² Zaburuw 56:10 kalan. O vɛrise b’a yira Dawuda ye see sɔrɔ a ka siranya kan cogo wɛrɛ min na. Hali n’a niin bele tun be farati la, a tun be to ka miiri k’a filɛ Jehova bena min kɛ a ye sini ma. Dawuda tun b’a lɔn ko Jehova tun bena ale kisi wagati bɛnnin na. Jehova yɛrɛ tun y’a fɔ a ye ko ale lo bena kɛ Israɛl masacɛ ye Sayuli nɔɔ na (1 Sam. 16:1, 13). Dawuda tun lanin b’a la ko Jehova mana layidu o layidu ta, o be dafa siga t’o la.

13. An be se ka la a la ko Jehova bena mun lo kɛ?

¹³ Jehova ye layidu juman lo ta ele ye? An b’a lɔn ko a tɛna an tanga gwɛlɛyaw bɛɛ ma. c Nka, a to i hakili la ko gwɛlɛya o gwɛlɛya b’i kan duniɲa nin kɔnɔ, Jehova bena o bɛɛ ban duniɲa kura nata kɔnɔ (Ezayi 25:7-9). Siga t’a la, see barikaman be an Danbaga ye ka suuw lakunu, k’an kɛnɛya ani k’an juguw bɛɛ halaki.—1 Zan 4:4.

14. An be se ka miiri mun lo la?

¹⁴ N’i sirannin lo, miiri k’a filɛ Jehova bena min kɛ sini ma. Miiri k’a filɛ fana i ninsɔn bena diya cogo min na tuma min na koo nunu bena kɛ: Sutana ni mɔgɔ juguw bena halaki, mɔgɔ ɲumanw dama lo bena kɛ yen ani dɔɔni dɔɔni, an bena kɛ mɔgɔ dafaninw ye loon o loon. Saan 2014 ka tile saba lajɛnba la, u tun y’a yira an be se ka miiri an ka jigiya koo la cogo min na. Facɛman dɔ tun ye baro kɛ n’a ka denbayamɔgɔw ye k’a yira cogo min na 2 Timote 3:1-5 kɔnɔkumaw be se ka yɛlɛma ka kɛɲɛ ni duniɲa kura ka koow cogoya ye. A ko: “Duniɲa kura kɔnɔ, ninsɔndiyaba lo be yen. Sabu mɔgɔw be ɲɔgɔn kanu, Alakow ka di u ye, u b’u seko daan lɔn, mɔgɔ majigininw lo, Ala tandobagaw, u be mɛnni kɛ u bangebagaw fɛ, ɲumanlɔnbagaw lo, mɔgɔ kantigiw, u b’u somɔgɔw kanu, bɛɛn ka di u ye, u be mɔgɔ tɔgɔɲuman fɔ tuma bɛɛ, u be ni yɛrɛminɛli ye, mɔgɔ sabalininw lo, ɲumanya ka di u ye, lannamɔgɔw lo, u be sɔn mɔgɔ ta ma, u tɛ kuncɛbaya kɛ, Alako ka di u ye ka tɛmɛ ɲɛnagwɛkow kan ani u masirinin lo Ala la sɔbɛ la. To ka jɛnɲɔgɔnya ɲuman kɛ n’o mɔgɔw ye.” Ɲɛnamaya bena kɛ cogo min na duniɲa kura kɔnɔ, yala i be to ka baro kɛ o koo la n’i ka denbayamɔgɔw wala i kerecɛnɲɔgɔnw ye wa?

15. Mun lo ye Tanja dɛmɛ ka see sɔrɔ a ka siranya kan?

¹⁵ Balimamuso Tanja be Maseduwani saheli fan fɛ. Ale ye see sɔrɔ a ka siranya kan a kɛtɔ ka miiri a ka duga nataw koo la. A bangebagaw tun b’a kɛlɛ sabu a tun be bibulukalan kɛra. A ko: “N’ tun be siranna koo minw ɲɛ, u dɔw kɛra. Lajɛn kelen kelen bɛɛ bannin kɔ, n’ bamuso tun be n’ bugɔ. N’ bangebagaw y’a fɔ n’ ye ko ni n’ kɛra Jehova Seere ye, u bena n’ faga.” A laban, Tanja bangebagaw y’a gwɛn ka bɔ soo. A y’o koo ta cogo di do? A ko: “Ni n’ tora kantigiya la, n’ bena ninsɔndiya min sɔrɔ fɔɔ abada, n’ tora ka miiri o la. Jehova bena n’ duga cogo min na duniɲa kura kɔnɔ, n’ tora ka miiri o la fana. N’ bɔnɛna fɛɛn minw bɛɛ la duniɲa nin kɔnɔ ani koo jugu minw kɛra n’ na, n’ bena ɲinɛ o bɛɛ kɔ.” Tanja tora kantigiya la ani Jehova ka dɛmɛ barika la, a ye siyɔrɔ sɔrɔ.  Sisan, Tanja furunin lo balimacɛ kantigi dɔ ma ani u ninsɔn ka di kudayi cidenya baara la.

I JIGI LA KOSƆBƐ JEHOVA KAN KABI SISAN

16. Ni Luka 21:26-28 ka kiraya kuma be dafara, mun lo bena an dɛmɛ an kana siran?

¹⁶ Tɔɔrɔba wagati la, mɔgɔw fanba bena kirin “jatigɛkojugu bolo.” Nka, Ala sagokɛlaw bena u jaa gwɛlɛya ka lɔ kelen kan (Luka 21:26-28 kalan). Mun na an tɛna siran do? Sabu an y’an jija k’an jigi la Jehova kan ka ban. An kumana Tanja min koo la, ale ko koo minw y’a sɔrɔ, o b’a dɛmɛna ka see sɔrɔ gwɛlɛya wɛrɛw kan. A ko: “Koo si tɛ yen Jehova tɛ se k’an dɛmɛ ka min muɲu ani o kɔ, a b’an duga. Tuma dɔw la, a be se ka kɛ an ɲɛɛ na ko mɔgɔ tɛ se k’an tɔɔrɔbagaw bali k’u sago kɛ. Nka tiɲɛn fɔ ka di, see be Jehova ye ka tɛmɛ u kan fɔɔ ka taga ka na. Ani kɔrɔbɔli mana gwɛlɛya cogo o cogo, daan b’a la.”

17. Saan 2024 ka kalankun bena an dɛmɛ cogo di? (jaa lajɛ ɲɛɛ fɔlɔ kan).

¹⁷ Bi, koo caaman be se ka siranya bila an na. Nka i ko Dawuda, an man ɲi k’a to siranya ka see sɔrɔ an kan. Saan 2024 ka kalankun ye Dawuda ka delili dɔ lo ye. A y’a fɔ Jehova ye ko: “Ni siranya ye n minɛ, ne be n jigi la ele le kan.” (Zab. 56:4). Bibulu sɛgɛsɛgɛrikɛla dɔ y’a fɔ o vɛrise koo la ko: “Koo minw tun be siranya bila Dawuda la, a ma to ka miiri olu n’a ka gwɛlɛyaw koo la. Nka, a y’a jigi la a Kisibaga lo kan.” Kalo nataw la, miiri saan ka kalankun na, sanko ni siranyako dɔw y’i sɔrɔ. Jehova ye koo minw kɛ ka ban, a be minw kɛra ani a bena koo minw kɛ, to ka wagati ta ka miiri o la. O la, i bena se k’a fɔ i ko Dawuda ko: “Ne jigi be [Ala] kan, n te siran foyi ɲa.”—Zab. 56:5.