1. Aniwú xɛsi ka sixú ɖi mǐ hweɖélɛ́nu?

 MǏ MƐ bǐ wɛ nɔ ɖi xɛsi hweɖélɛ́nu. É ɖo wɛn ɖɔ Biblu e mǐ kplɔ́n é zɔ́n bɔ mǐ gosín xɛsi ɖi nú kú, xɛsi ɖi nú nǔ e zɛ hlɔ̌nhlɔ́n gbɛtɔ́ tɔn wú lɛ́ é kpó xɛsi ɖi nú sɔgúdo kpó kannu. Amɔ̌, mǐ kpo ɖo gbɛ nɔ wɛ ɖo hwenu vɛ́ wǔ lɛ́ mɛ, énɛ́ wú ɔ, mǐ sixú ɖi xɛsi nú ahwan, dǎkaxixo kpó azɔn kpó. (Luk. 21:11) Mǐ sixú lɛ́ ɖi xɛsi nú gbɛtɔ́ lɛ́, ɖi mɛ e ɖo tɛn acɛkpikpa tɔn mɛ, bo nɔ gbídí kɔ nú mǐ lɛ́ é, alǒ mɛ e tlɛ ɖo xwédo mǐtɔn mɛ bo nɔ klán gbe xá nǔgbó ɔ lɛ́ é. Xɛsi nɔ ɖi mɛɖé lɛ́ ɖɔ yě kún ná kpé wú bo dɛ ɖo mɛtɛ́nkpɔ́n din tɔn lɛ́, alǒ éé sixú wá xwetɔ́n ɖo sɔgúdo lɛ́ é nu ó.

2. Tínmɛ ninɔmɛ e mɛ Davídi byɔ́ hwenu e é ɖo Gati é.

² Xɛsi ɖi Davídi hweɖélɛ́nu. Ði kpɔ́ndéwú ɔ, hwenu e axɔ́sú Sawúlu ɖo Davídi gbé nya wɛ, bá hu i é ɔ, é wá gbeta ɔ kɔn bo hɔn yi toxo Filisitɛ́ɛn lɛ́ tɔn e nɔ nyí Gati é mɛ. É lín ǎ bɔ, axɔ́sú Gati tɔn Akíci se ɖɔ Davídi wɛ nyí ahwanfuntɔ́ hlɔ̌nhlɔ́nnɔ e è kpa susu ná ɖo han mɛ ɖɔ é hu Filisitɛ́ɛn “děgba we afɔwó” é. Énɛ́ wú ɔ, Davídi “jɛ xɛsi ɖi . . . jí tawun.” (1 Sam. 21:11-13) Ado hu i dó nǔ e Akíci ná wa n’i é wú. Nɛ̌ Davídi ka ɖu ɖo xɛsi tɔn jí gbɔn?

3. Sɔgbe xá Ðɛhan 56:2-4, 12 ɔ, nɛ̌ Davídi ka ɖu ɖo xɛsi tɔn lɛ́ jí gbɔn?

³ Ðo Ðɛhan 56​gɔ́ ɔ mɛ ɔ, Davídi ɖɔ lěe nǔ cí n’i hwenu e é ɖo Gati é. Ðo Ðɛhan énɛ́ mɛ ɔ, Davídi tín nǔ e wú é ɖi xɛsi é mɛ nyi wɛn, bo ka lɛ́ tín nǔ e d’alɔ ɛ bɔ é ɖu ɖo xɛsi tɔn lɛ́ jí é mɛ nyi wɛn. Hwenu e Davídi ɖi xɛsi é ɔ, é gán jɛ Jexóva wú. (Xa  Ðɛhan 56:2-4, 12.) Davídi ɖó hwɛjijɔ ɖagbe e wú é ná gán jɛ Jexóva wú lɛ́ é. Kpó alɔdó Jexóva tɔn kpó ɔ, Davídi wa nǔ e kpácá mɛ tawun é ɖé: É vlɛ́ nǔwanǔmɔnɔ alǒ taɖunɔ bɔ é ka kpa ɛ. Akíci sɔ́ jló ná hu Davídi ǎ, é nyɔ́ wa ɔ, é ba ɖɔ é ní yi, énɛ́ wú ɔ, Davídi kpé wú bo hɔn yi.—1 Sam. 21:14–22:1.

4. Nɛ̌ mǐ ka sixú ná hlɔ̌nhlɔ́n jiɖe e mǐ ɖó dó Jexóva wú é gbɔn? Jlɛ̌ dó nǔɖé wú.

⁴ Mǐ lɔ sixú ɖu ɖo xɛsi mǐtɔn jí, gbɔn Jexóva wú gíngánjɛ gblamɛ. Bɔ nɛ̌ mǐ ka nɔ ná hlɔ̌nhlɔ́n jiɖe e mǐ ɖó dó Jexóva wú é, tají ɔ, hwenu e mǐ ɖo xɛsi ɖi wɛ é gbɔn lo? Lin tamɛ dó nǔjlɛ́dónǔwú élɔ́ jí. Ényí a se ɖɔ émí ɖo azɔn jɛ wɛ ɔ, xɛsi sixú ɖi wɛ ɖo bǐbɛ́mɛ. Amɔ̌, ényí a ɖeji dó dotóo towe wú ɔ, xɛsi towe sixú ɖe kpo. É sixú ko d’alɔ mɛ e jɛ azɔn mɔ̌hun é gěgé kpɔ́n. É sixú ɖótó we kpó sɔxwixwe kpó bo ná we gǎnjɛwú ɖɔ émí mɔ nukúnnú jɛ lěe nǔ cí nú we é mɛ ganjí. Gɔ́ ná ɔ, é sixú xwlé nukúnkpédómɛwú e w’azɔ̌ ganjí nú mɛ ɖěvo lɛ́ é we. Ðo ali ɖokpó ɔ nu ɔ, mǐ nɔ ná hlɔ̌nhlɔ́n jiɖe e mǐ ɖó dó Jexóva wú é gbɔn nǔ e é ko wa lɛ́ é, nǔ e wa wɛ é ɖe lɛ́ é kpó nǔ e é ná wá wa nú mǐ lɛ́ é kpó gblamɛ. Nǔ e Davídi wa é nɛ́. Ée mǐ ná ɖo xó ɖěɖěe Mawu sɔ́ d’ayi mɛ n’i bɔ é wlán dó Ðɛhan 56​gɔ́ ɔ mɛ é ɖé lɛ́ jí ɖɔ xó dó wɛ é ɔ, lin tamɛ dó lěe hwi lɔ sixú ná hlɔ̌nhlɔ́n jiɖe e a ɖó dó Jexóva wú é, bo ɖu ɖo xɛsi towe lɛ́ jí gbɔn é jí.

ÉTƐ́ LƐ́ JEXÓVA KA KO WA?

5. Bónú Davídi ná dó ɖu ɖo xɛsi tɔn lɛ́ jí ɔ, étɛ́ lɛ́ jí é ka lin tamɛ dó? (Ðɛhan 56:13, 14)

⁵ Davídi sín gbɛ kpo ɖo axɔ́ nu có, é sɔ́ ayi tɔn ɖó nǔ e Jexóva ko wa lɛ́ é jí. (Xa Ðɛhan 56:13, 14.) Nǔ e Davídi wa ɖo gbɛzán tɔn bǐ mɛ é nɛ́. Ði kpɔ́ndéwú ɔ, é nɔ lin tamɛ dó nǔɖíɖó Jexóva tɔn lɛ́ jí hweɖélɛ́nu, bɔ énɛ́ nɔ flín i ɖɔ hlɔ̌nhlɔ́n Jexóva tɔn d’agba, bɔ nǔ gbɛtɔ́ lɛ́ tɔn nɔ lɛ́ ɖu ayi mɛ n’i tawun. (Ðɛh. 65:7-10) Davídi lɛ́ lin tamɛ dó nǔ e Jexóva ko wa nú mɛ ɖěvo lɛ́ é jí. (Ðɛh. 31:20; 37:25, 26) Gɔ́ ná ɔ, nǔ tají e jí é lin tamɛ dó é wɛ nyí nǔ e Jexóva ko wa nú éɖésúnɔ mɛtún ɔ é. Jexóva d’alɔ Davídi, bo lɛ́ cyɔ́n alɔ jǐ tɔn sín hwenu e é ɖo vǔ é. (Ðɛh. 22:10, 11) Dǒ nukún lěe tamɛ linlin dó nǔ énɛ́ lɛ́ jí sixú ko ná hlɔ̌nhlɔ́n jiɖe e Davídi ɖó dó Jexóva wú é gbɔn é mɛ kpɔ́n!

6. Ényí xɛsi ɖi mǐ ɔ, étɛ́ ka ná d’alɔ mǐ bɔ mǐ ná gán jɛ Jexóva wú?

 ⁶ Ényí xɛsi ɖi we hǔn, kanbyɔ́ hwiɖée ɖɔ: ‘Étɛ́ lɛ́ Jexóva ka ko wa?’ Lin tamɛ dó nǔ e é dá lɛ́ é jí. Ði kpɔ́ndéwú ɔ, xwe sɔ bo “kpɔ́n” lěe Jexóva nɔ kpé nukún dó xɛ lɛ́ kpó folówa lɛ́ kpó e é ma tlɛ dá ɖó akpajlɛ́ tɔn mɛ ǎ, bɔ yě ma sixú lɛ́ kpé wú bo sɛn ɛ ǎ lɛ́ é wú gbɔn é. É ɖo wɛn ɖɔ é ná kpé nukún mǐ wú hú mɔ̌. Tamɛ linlin dó énɛ́ jí sixú ná hlɔ̌nhlɔ́n jiɖe e mǐ ɖó dó Jexóva wú é hú gǎn. (Mat. 6:25-32) Lɛ̌ lin tamɛ dó nǔ e Jexóva ko wa nú mɛsɛntɔ́ tɔn lɛ́ é jí. A sixú kplɔ́n nǔ dó mɛ e xó Biblu ɖɔ, bɔ é ɖe nǔɖiɖi adodwé xlɛ́ é ɖé wú, alǒ a sixú xa tan mɛsɛntɔ́ Jexóva tɔn hwe mǐtɔn nu tɔn ɖé tɔn. a Gɔ́ ná ɔ, lin tamɛ dó lěe Jexóva ko kpé nukún dó wǔ we gbɔn é jí. Nɛ̌ é ka dɔn we wá nǔgbó ɔ mɛ gbɔn? (Jaan 6:44) Nɛ̌ é ka ko ná sin nú ɖɛ towe lɛ́ gbɔn? (1 Jaan 5:14) Nɛ̌ a ka ɖo vɔ̌ e Vǐ vívɛ́ná tɔn sá é sín le ɖu wɛ gbe bǐ gbe gbɔn?—Efɛ́. 1:7; Ebl. 4:14-16.

7. Nɛ̌ nǔ e gbo gbeyíɖɔ Daniyɛ́li é ka d’alɔ Vanessa bɔ é ɖu ɖo xɛsi tɔn jí gbɔn?

⁷ Ninɔmɛ e dó xɛsi mɛ é ɖé kpan nukɔn nɔví nyɔ̌nu e nɔ nyí Vanessa, b bo nɔ nɔ Haïti é. Nya ɖé ɖo xá tɔn mɛ, bo nɔ ylɔ́ ɛ, bo nɔ lɛ́ wlán nǔ sɛ́dó è gbe bǐ gbe, bo nɔ ɖo jɔngwínjɔngwín dó n’i wɛ ɖɔ é ní tɔ́n xá émí. Vanessa ɖɔ n’i nyi wɛn ɖɔ émí kún sixú ó. Amɔ̌, nya ɔ jɛ hun nylá d’è jí hú gǎn, bo tlɛ gblɔ́n adǎn n’i. Vanessa ɖɔ: “Xɛsi ɖi mì.” Nɛ̌ Vanessa ka ɖu ɖo xɛsi tɔn jí gbɔn? É ɖe afɔ tawun tawun ɖé lɛ́, bo ná dó cyɔ́n alɔ éɖée jí. Mɛxó agun tɔn ɖé dó wǔsyɛ́n lanmɛ n’i ɖɔ é ní ylɔ́ kponɔ lɛ́. Amɔ̌, é lɛ́ sɔ́ ayi ɖó lěe Jexóva ko nya xɛ ɖo mɛsɛntɔ́ tɔn lɛ́ jí ɖo hwexónu gbɔn é jí. Vanessa ɖɔ: “Mɛ nukɔntɔn e jí ayi ce yi é wɛ nyí gbeyíɖɔ Daniyɛ́li. Xomɛvɔ́ wɛ é ɖe có, è nyi i dó kinnikínní e ɖo xovɛ́ lɛ́ é sín do mɛ. É ɖo mɔ̌ có, Jexóva kpé nukún dó wǔ tɔn. Un byɔ́ Jexóva ɖɔ é ní kpé nukún dó ninɔmɛ ɔ blěbú wú. Énɛ́ gúdo ɔ, xɛsi sɔ́ ɖi mì ɖě ǎ.”—Dan. 6:13-23.

ÉTƐ́ LƐ́ WA WƐ JEXÓVA KA ÐE DIN?

8. Étɛ́ jí Davídi ka kú dó? (Ðɛhan 56:9)

⁸ Davídi gbɔn ninɔmɛ e sɔ́ gbɛ tɔn ɖ’axɔ́ nu tawun é ɖé mɛ ɖo Gati có, é ka ɖi xɛsi ǎ. É nyɔ́ wa ɔ, é wá gbeta ɔ kɔn, bá sɔ́ ayi ɖó nǔ e Jexóva ɖo wiwa n’i wɛ ɖo hwe ɔ nu é jí. Davídi sixú ko mɔ ɖɔ Jexóva ɖo ali xlɛ́ émí wɛ, ɖo xɛ nya ɖo émí jí wɛ, lobo lɛ́ mɔ nǔ jɛ lěe nǔ cí nú émí é wú. (Xa Ðɛhan 56:9.) Davídi lɛ́ ɖó xɔ́ntɔn lɛ́, ɖi Jonatáan kpó vɔ̌sánúxwlémawutɔ́ ɖaxó Aximɛlɛ́ki kpó, bɔ yě nɔ gǔdo n’i kpó gbejíninɔ kpó, bo lɛ́ d’alɔ ɛ ɖo ali tawun tawun ɖé lɛ́ nu. (1 Sam. 20:41, 42; 21:7, 9, 10) Gɔ́ ná ɔ, axɔ́sú Sawúlu ɖo biba ná hu Davídi wɛ, amɔ̌, é hɔn dó gbɛ tɔn jí. É kú d’é jí ɖɔ Jexóva mɔ nǔ jɛ mɛtɛ́nkpɔ́n e mɛ gbɔn wɛ é ɖe é wú céɖécéɖé, bo lɛ́ tuun lěe é ɖo nǔ wa dó lěe nǔ nɔ cí n’i é wú wɛ gbɔn é.

9. Étɛ́ wú Jexóva ka nɔ ɖ’ayi ɖo mǐ mɛ ɖokpó ɖokpó wú?

⁹ Ényí a ɖo mɛtɛ́nkpɔ́n ɖé mɛ gbɔn wɛ, bɔ é ɖo xɛsi dó nú we wɛ hǔn, flín ɖɔ Jexóva nɔ ɖ’ayi wú, bo lɛ́ tuun lěe mɛtɛ́nkpɔ́n ɔ zɔ́n bɔ nǔ cí nú we é. Ði kpɔ́ndéwú ɔ, ényí dǎka e è xo Izlayɛ́li ví lɛ́ wú ɖo Ejípu é kɛ́ɖɛ́ wú wɛ Jexóva ɖ’ayi ǎ, loɔ, é lɛ́ ɖ’ayi ‘wǔvɛ́ e yě mɔ lɛ́ é wú.’ (Tín. 3:7) Davídi ji han ɖɔ Jexóva mɔ “ya” e émí ji é, bo lɛ́ tuun “adǎn” e gbo émí é. (Ðɛh. 31:8) Gɔ́ ná ɔ, é ná bo tlɛ nyí hwenu e togun Mawu tɔn se wǔvɛ́ ɖó xlonɔnú e é wa é wú é ɔ, Mawu “nɔ aluwɛ mɛ xá yě.” (Eza. 63:9) Ényí xɛsi ɖi we hǔn, tuun ɖɔ Jexóva mɔ  nǔ jɛ lěe nǔ cí nú we é wú, bɔ akpakpa ɖo sísɔ́ ɛ wɛ bónú é ná d’alɔ we bɔ a ná ɖu ɖo xɛsi towe lɛ́ jí.

10. Étɛ́wú a ka kú d’é jí ɖɔ Jexóva nɔ ɖ’ayi wǔ we, bo ná lɛ́ d’alɔ we bɔ a ná ɖí xwi xá mɛtɛ́nkpɔ́n ɖěbǔ?

¹⁰ Amɔ̌, a sixú nɔ kanbyɔ́ hwiɖée ɖɔ: Nɛ̌ Jexóva ka nɔ nɔ gǔdo nú mì hwenu e un ɖo ninɔmɛ e dó xɛsi mɛ lɛ́ é mɛ gbɔn wɛ é gbɔn? Énɛ́ wú ɔ, byɔ̌ ɛ ɖɔ é ní d’alɔ we, bónú a ní mɔ gǔdo e nɔ nú we wɛ é ɖe é. (2 Axɔ́. 6:15-17) Énɛ́ gúdo hǔn, lin tamɛ dó nǔ élɔ́ lɛ́ jí: Xóɖiɖɔ ɖé, alǒ xósin e è ná ɖo kplé agun tɔn ɖé hwenu é ka dó wǔsyɛ́n lanmɛ nú we a? Wěma ɖé, video ɖé alǒ han bǔnɔ ɖé ka dó wǔsyɛ́n lanmɛ nú we a? Mɛɖé ka ko má linlin, alǒ wěmafɔ Biblu tɔn e dó wǔsyɛ́n lanmɛ nú mɛ é ɖé xá we kpɔ́n a? É bɔ wǔ ɖɔ mǐ ní mɔ ɖɔ wǎnyíyí e kplékplé nɔví lɛ́ tɔn mǐtɔn nɔ ɖe xlɛ́ mǐ é kpó nǔɖuɖu gbigbɔ tɔn e mǐ nɔ mɔ é kpó nyí nǔ e mǐ ɖó acɛ tɔn lɛ́ é. Amɔ̌, nǔníná jí wǔ lɛ́ wɛ yě nyí bo gosín Jexóva gɔ́n. (Eza. 65:13; Mak. 10:29, 30) Nǔ énɛ́ lɛ́ wɛ nɔ xlɛ́ ɖɔ é nɔ kpé nukún dó mǐ wú. (Eza. 49:14-16) Yě nɔ lɛ́ xlɛ́ ɖɔ é jɛxá ɖɔ mǐ ní ɖeji dó wǔ tɔn.

11. Étɛ́ ka d’alɔ Aida bɔ é ɖu ɖo xɛsi tɔn lɛ́ jí?

¹¹ Aida e nɔ nɔ Sénégal é ɖ’ayi lěe Jexóva nɔ gǔdo n’i ɖo mɛtɛ́nkpɔ́n ɖé hwenu gbɔn é wú. Ðó é wɛ nyí vǐɖaxó ɔ wútu ɔ, mɛjitɔ́ tɔn lɛ́ nɔ ɖó nukún ɖɔ é ní ba akwɛ́ gěgé, bo ná kpé nukún dó éɖésúnɔ kpó yě kpó wú. Amɔ̌, ɖó Aida zán gbɛ e bɔkun é bo ná dó nyí gběxosín-alijítɔ́ wútu ɔ, é ɖí xwi xá akwɛ́yózo. Xwédo tɔn sin xomɛ d’è, bo mɔ xó ɖɔ dó wǔ tɔn. É ɖɔ: “Xɛsi ɖi mì ɖɔ un kún ná kpé wú bo ná d’alɔ mɛjitɔ́ ce lɛ́ ó, bɔ mɛ lɛ́ bǐ ná lɛ́ gbɛ́ mì. Un tlɛ dó hwɛ Jexóva ɖɔ é yí gbe bɔ ninɔmɛ lɛ́ nylá sɔmɔ̌.” Énɛ́ gúdo ɔ, é se xóɖiɖɔ nú mɛ bǐ ɖé ɖo kplé ɖé jí. É ɖɔ: “Xóɖɔtɔ́ ɔ flín nǔ mǐ ɖɔ Jexóva tuun nǔ e wú ado sixú hu mǐ mɛ ɖokpó ɖokpó, alǒ xɛsi sixú ɖi mǐ é. Wěɖexámɛ mɛxó agun tɔn lɛ́ tɔn kpó mɛ ɖěvo lɛ́ tɔn kpó zɔ́n bɔ kpɛɖé kpɛɖé ɔ, un lɛ́vɔ́ wá ɖó gǎnjɛwú ɔ ɖɔ Jexóva yí wǎn nú mì. Un jɛ ɖɛ xo sɛ́dó Jexóva jí kpó jiɖiɖe kpó, bɔ ée un mɔ sin nú ɖɛ ce lɛ́ é ɔ, un lɛ́ ɖó fífá ayi mɛ tɔn.” É wá yá é ɔ, Aida mɔ azɔ̌, bɔ é d’alɔ ɛ bɔ é nyí gběxosín-alijítɔ́, bo nɔ kpé nukún dó hudó éɖésúnɔ tɔn lɛ́ wú, bo nɔ lɛ́ d’alɔ mɛjitɔ́ tɔn lɛ́.  É ɖɔ: “Un kplɔ́n bo nɔ ɖeji dó Jexóva wú bǐ mlɛ́mlɛ́. Din ɔ, ényí un xo ɖɛ gúdo ɔ, xɛsi ce lɛ́ bǐ nɔ blí bú.”

ÉTƐ́ LƐ́ JEXÓVA KA NÁ WÁ WA?

12. Sɔgbe xá Ðɛhan 56:10 ɔ, jiɖe tɛ́ Davídi ka ɖó?

¹² Xa Ðɛhan 56:10. Wěmafɔ énɛ́ xlɛ́ ali ɖěvo e nu Davídi ɖu ɖo xɛsi tɔn lɛ́ jí ɖe é. Gbɛ tɔn kpo ɖo axɔ́ nu có, é lin tamɛ dó nǔ e Jexóva ná wá wa n’i lɛ́ é jí. Davídi tuun ɖɔ Jexóva ná hwlɛ́n émí ɖo hwetɔnnu. È ná ɖɔ ɔ, Jexóva ko ɖɔ ɖɔ Davídi wɛ ná nyí axɔ́sú e ná bɔ dó axɔ́sú e ɖo acɛ kpa wɛ ɖo Izlayɛ́li hwenɛ́nu é wú é. (1 Sam. 16:1, 13) Nú Davídi ɔ, nǔ ɖěbǔ e sín akpá Jexóva dó é nɔ jɛnu dandan.

13. Gǎnjɛwú tɛ́ mǐ ka sixú ɖó dó Jexóva wú?

¹³ Akpá tɛ́ Jexóva ka dó nú we? Mǐ nɔ ɖó nukún ɖɔ Jexóva ní ɖe mǐ sín wǔvɛ́ mǐtɔn lɛ́ bǐ mɛ ǎ. c É ɖo mɔ̌ có, ényí mǐ ná bo tlɛ ɖo mɛtɛ́nkpɔ́n ɖěbǔ mɛ gbɔn wɛ ɖo gbɛ élɔ́ mɛ ɔ, Jexóva ná ɖe yě bǐ síin ɖo gbɛ yɔ̌yɔ́ e ja é mɛ. (Eza. 25:7-9) Agbɔ̌n ɖo Gbɛɖótɔ́ mǐtɔn wú sɔmɔ̌ bɔ é ná fɔ́n mɛkúkú lɛ́, gbɔ azɔn nú mǐ, lobo sú gbeklánxámɛtɔ́ mǐtɔn lɛ́ bǐ sín kún dó.—1 Jaan 4:4.

14. Étɛ́ jí mǐ ka sixú nɔ lin tamɛ dó?

¹⁴ Ényí xɛsi ɖi we hǔn, lin tamɛ dó nǔ e Jexóva ná wa nú we ɖo sɔgúdo lɛ́ é jí. Lin tamɛ dó lěe nǔ ná cí nú we hwenu e è ná ko sú kún dó nú Satáan, bɔ nǔjlɔ́jlɔ́watɔ́ lɛ́ ná jɛ nǔnyanyawatɔ́ lɛ́ tɛnmɛ, lobɔ ayǐhɔ́ngbe ayǐhɔ́ngbe ɔ, hwɛhuhu ná ɖo bǔbú wɛ kpɛɖé kpɛɖé é jí. Kpléɖókpɔ́ ɖaxó 2014 tɔn sín wǎzéxlɛ́ ɖokpó xlɛ́ lěe mǐ sixú lin tamɛ dó nukúnɖíɖó mǐtɔn jí gbɔn é. Tɔ́ ɖé ɖɔ xó ɖó kpɔ́ xá xwédo tɔn dó 2 Timɔtée 3:1-5 jí, bo ɖɔ ɖɔ xógbe e gbɔn vo lɛ́ é wɛ è ná ko zán, ényí wěmafɔ énɛ́ lɛ́ ɖo lěe palaɖísi ɔ ná wá cí é ɖɔ ɖ’ayǐ wɛ ɔ nɛ́; é ɖɔ: “Gbɛ yɔ̌yɔ́ ɔ mɛ ɔ, hwenu e víví hú gǎn lɛ́ é ná tíin. Gbɛtɔ́ lɛ́ ná nɔ ba ɖɔ mɛ ɖěvo lɛ́ tɔn ní nyɔ́, yě ná nɔ yí wǎn nú dɔkun gbigbɔ tɔn lɛ́, yě ná nɔ nɔ jlɛ̌ jí, yě ná nɔ sɔ́ yěɖée hwe, yě ná nɔ kpa susu nú Mawu, yě ná nɔ se tónú nú mɛjitɔ́ yětɔn lɛ́, yě ná tuun ɖagbe nú mɛ, yě ná nɔ nɔ gbejí, yě ná nɔ ɖó wǎnyíyí jɔwámɔ tɔn, yě ná nɔ ɖó gbe kpɔ́, yě ná nɔ ɖɔ ɖagbe mɛ ɖěvo lɛ́ tɔn hwebǐnu, yě ná nɔ ɖu ɖo yěɖée jí, yě ná nɔ fá xomɛ, yě ná nɔ yí wǎn nú ɖagbewiwa, yě ná nyí mɛ ɖejidéwú, yě ná nɔ se tónú, yě ná nɔ hwíhwɛ́ yěɖée tawun, yě ná yí wǎn nú Mawu hú ɖɔ yě ná yí wǎn nú gbɛɖuɖu, yě ná nyí gbejínɔnúmawutɔ́ ɖo nukúnta bo ka ná nɔ lɛ́ yí gbe nú hlɔ̌nhlɔ́n gbejí nɔ nú Mawu tɔn ɔ; xwedó mɛ mɔ̌hun lɛ́.” A ka nɔ ɖɔ xó ɖó kpɔ́ xá xwédo towe, alǒ nǔɖitɔ́ hǎtɔ́ towe dó lěe gbɛ ná cí ɖo gbɛ yɔ̌yɔ́ ɔ mɛ é jí a?

15. Tanja ɖi xɛsi có, étɛ́ ka d’alɔ ɛ bɔ é ɖu ɖo xɛsi tɔn lɛ́ jí?

¹⁵ Nɔví nyɔ̌nu ɖé nɔ nɔ totaligbé Macédoine tɔn, bo nɔ nyí Tanja bo ɖu ɖo xɛsi tɔn lɛ́ jí gbɔn tamɛ linlin dó nyɔ̌ná sɔgúdo tɔn lɛ́ jí gblamɛ. Mɛjitɔ́ tɔn lɛ́ klán gbe xá ɛ syɛ́nsyɛ́n ɖó Biblu e kplɔ́n wɛ é ɖe é wú. É ɖɔ: “Nǔ e ɖi xɛsi ná wɛ un ɖe ɖɔ é ná jɛ é ɖé lɛ́ wá jɛ. Mǐ yi kplé bo lɛ́ kɔ wá hweɖébǔnu ɔ, nɔ ce nɔ xo mì. Mɛjitɔ́ ce lɛ́ gblɔ́n adǎn nú mì ɖɔ ényí un húzú Kúnnuɖetɔ́ Jexóva tɔn ɔ, émí ná hu mì.” Wǎgbɔ tɔn ɔ, è nya Tanja sín xwégbe. Nɛ̌ é ka wa nǔ gbɔn? É ɖɔ: “Un sɔ́ ayi ce ɖó awǎjijɛ mavɔmavɔ e un ná ɖó, ɖó gbeta ɔ kɔn e un wá bá nɔ gbejí é jí. Un lɛ́ lin tamɛ dó lěe Jexóva ná d’ajɔ mì ɖo gbɛ yɔ̌yɔ́ ɔ mɛ ɖó nǔ ɖěbǔ e un hɛn bú ɖo gbɛ élɔ́ mɛ lɛ́ é wú gbɔn é jí, bo lɛ́ lin tamɛ dó lěe è ná wɔn nǔ nyanya lɛ́ bǐ gbɔn é jí.” Tanja kpo ɖo gbejí. Bɔ kpó alɔdó Jexóva tɔn kpó ɔ, é mɔ fí e é ná nɔ é. Égbé ɔ, Tanja ko wlí alɔ kpó nɔví súnnu gbejínɔtɔ́ ɖé kpó, bɔ yě ɖo sinsɛnzɔ́ hwebǐnu tɔn wa ɖó kpɔ́ wɛ kpó awǎjijɛ kpó.

 NǍ HLƆ̌NHLƆ́N JIÐE E A ÐÓ DÓ JEXÓVA WÚ É ÐO ÉGBÉ

16. Étɛ́ ka ná d’alɔ mǐ bɔ mǐ ná kpo ɖo akɔ́nkpinkpan ɖó wɛ hwenu e mǐ ná mɔ nǔ e xó è ɖɔ ɖ’ayǐ ɖo Luki 21:26-28 mɛ lɛ́ é?

¹⁶ Ðo wǔvɛ́ ɖaxó ɔ hwenu ɔ, “gbɛtɔ́ lɛ́ ná kú dó te, ɖó xɛsi” wú. Amɔ̌, togun Mawu tɔn ná gbí dɔn, bo ná lɛ́ kpankɔ́n. (Xa Luki 21:26-28.) Étɛ́wú mǐ ma ka ná ɖi xɛsi ǎ? Ðó mǐ ko kplɔ́n, bo nɔ ɖeji dó Jexóva wú. Tanja e xó mǐ ɖɔ wá yi é ɖɔ ɖɔ nǔ e gbo émí wá yi lɛ́ é ɖo alɔ dó émí wɛ bɔ émí ɖo xwi ɖí xá ninɔmɛ vɛ́ wǔ ɖěvo lɛ́ wɛ. É ɖɔ: “Un kplɔ́n ɖɔ Jexóva sixú d’alɔ mǐ, bɔ mǐ ná dɛ ɖo ninɔmɛ ɖěbǔ nu, bo lɛ́ kɔn nyɔ̌ná dó mǐ jí. Hweɖélɛ́nu ɔ, é sixú cí ɖɔ mɛ ɖěvo lɛ́ wɛ ɖ’acɛ dó nǔ lɛ́ jí ɖɔhun, amɔ̌, nú è ná ɖɔ xójɔxó ɔ, nǔ e Jexóva yí gbe ná lɛ́ é kɛ́ɖɛ́ jí wɛ yě ɖ’acɛ dó. Bɔ ényí mɛtɛ́nkpɔ́n ɔ ná bo tlɛ syɛ́n gbɔn ɖěbǔ ɔ, é ná wá fó.”

17. Nɛ̌ xwe 2024 tɔn sín xóta flínflín ka ná d’alɔ mǐ gbɔn? (Kpɔ́n ɖiɖe e ɖo akpa ɔ jí é.)

¹⁷ Mǐ sixú ɖi xɛsi ɖo égbé. Amɔ̌, Davídi ɖɔhun ɔ, mǐ sixú gbɛ́ ɖɔ xɛsi kún ná kp’acɛ nú mǐ ó. Ðɛ e Davídi xo sɛ́dó Jexóva é wɛ nyí xóta xwe 2024 tɔn mǐtɔn: ‘Xɛsi jɛ jǐ ce gbeɖé ɔ, hwi wú wɛ un nɔ gán jɛ.’ (Ðɛh. 56:4) Nǔ e alɔdlɛ́ndónǔ Biblu tɔn ɖé ɖɔ dó wěmafɔ énɛ́ wú é wɛ nyí ɖɔ, Davídi “kún nɔ fɔ́n bo nɔ ɖo tamɛ lin dó nǔ e dó xɛsi i lɛ́ é, alǒ tagba tɔn lɛ́ jí wɛ ó. É nyɔ́ wa ɔ, é gán jɛ mɛ e ná hwlɛ́n ɛ gán é wú.” Lin tamɛ dó xóta xwe ɔ tɔn jí ɖo sun e ja lɛ́ é mɛ, tají ɔ, hwenu e a ná wá mɔ hwiɖée ɖo ninɔmɛ e dó xɛsi nú we lɛ́ é mɛ é. Ba hwenu bo lin tamɛ dó nǔ e Jexóva ko wa wá yi, ɖo wiwa wɛ din, bo ná lɛ́ wa ɖo sɔgúdo lɛ́ é jí. Énɛ́ gúdo ɔ, Davídi ɖɔhun ɔ, a sixú ɖɔ: “Mawu wú wɛ un gán jɛ; nǔɖé nɔ dó xɛsi nú mì ǎ.”—Ðɛh. 56:5.