1. Ki biten ki pé fè-nou pè ?

 NOUTOUT pé rivé a pè on biten. Sé vré kè konm nou konnèt sa Labib ka anségné, nou pa pè lanmò, nou pa pè sé démon-la é nou pa pè sa dèmen ké pòté. Men Labib té ja anonsé kè a épòk an nou, té’é ni dé ‘biten ki té’é fè-nou pè’ kon lagè, moun ki té’é tchouyé moun oben maladi (Lik 21:11). Nou pé rivé a pè moun osi. Sé pé lè gouvènman-la oben moun an fanmi an nou bizwen mèt baton an wou an nou pou anpéché-nou sèvi Jéova. É délè osi, ni sèwten moun ki ka jwenn sèwten difikilté é yo pè pou yo pa rivé andiré sé difikilté-lasa. É lè yo ka sonjé difikilté kè yo pé rivé a jwenn dèmen, sa ka fè-yo pè osi.

2. Lèwvwè David té Gat, adan ki sitiyasyon i touvé-y ?

² David osi touvé-y pè é a pa onsèl fwa sa rivé-y. On jou, lè wa Sayil té ka kouri dèyè-y pou tchouyé-y, David ay kaché adan on vil yo ka kriyé Gat. Vil-lasa té ka touvé-y adan téritwa a sé Filisten-la. Men Akich, wa a Gat, vin sav kè David sé té on vayan sòlda é kè i té ja tchouyé plizyè milyé Filisten. Kifè, lafrous pran David (1 Sam. 21:10-12). I té ka mandé-y ka Akich té’é fè-y é sa té ka pran tèt a-y. Ka ki édé David ni kouraj ?

3. Dapré Sòm 56:1-3, 11, kijan David rivé about a sa ki té ka fè-y pè ?

³ David palé dè sa i rèsanti lèwvwè i té Gat adan Sòm 56 la. David té pè é i pa kaché sa. Men i di osi ka i fè pou i pa té pè ankò. Lèwvwè i té pè, David té ka mèt konfyans a-y an Jéova (li Sòm 56:1-3, 11). É i té byen fèt fè Bondyé konfyans ! Grasa Jéova, i mèt on plan si pyé. I mété-y ka fè konsi i té fou. Sa té on ti jan bizaw men sa maché. Lè Akich vwè sa, olyé i té tchouyé David i lésé-y pati é sé konsa David rivé chapé kò a-y (1 Sam. 21:13 – 22:1).

4. Ka nou pé fè pou nou fè Jéova konfyans plis ankò ? Bay on ègzanp.

 ⁴ Nou osi, nou pé rivé about a sa ki ka fè-nou pè si nou ka fè Jéova konfyans. Men ka nou pé fè pou nou fè Jéova konfyans plis ankò, siwtou lèwvwè nou pè ? An-nou pran on ègzanp. Imajiné yo di-w kè ou ni on maladi. Odépa, sèten ou ké pè. Men si ou ka fè mèdsen a-w konfyans, piti-a-piti lèspri a-w ké on ti jan pli trankil. Pétèt kè mèdsen-la ja géri onlo moun ki té ni maladi-lasa é ou okouran a sa. Lè ou ka palé ba mèdsen-la i ka pran tan kouté-w é i ka konprann sa ou ka rèsanti. Anplisdisa ou pé’é pè kon avan si i ka ba-w on médikaman é kè ou ka vin sav kè lè i ba dòt moun médikaman-lasa, sa maché pou yo. Menmjan-la osi, nou ké rivé fè Jéova konfyans plis ankò si nou ka pran tan sonjé sa i ja ni lokazyon fè, sa i ka fè jòdijou é sa i ké fè dèmen. Sé sa David té ka fè. Toupannan nou ké ègzaminé sèwten adan sé pawòl-la Jéova fè-y maké la adan Sòm 56 la, pran tan réfléchi asi sa voumenm a-w pé fè pou ou pé sa fè Jéova konfyans plis ankò é pou-w pa lésé lapè pran lanmen asi-w.

SA JÉOVA JA NI LOKAZYON FÈ

5. Pou lapè pa té pran lanmen asi David, asi ki biten i té ka médité ? (Sòm 56:12, 13).

⁵ Magré vi a David té andanjé toujou, i té ka konsantré-y asi sé bon biten-la Jéova té ja ni lokazyon fè la (li Sòm 56:12, 13). Sé konsa i aji tout vi a-y. Pa ègzanp, délè, i té ka pran tan réfléchi asi sa Jéova kréyé. Sa té ka édé-y sonjé kantité fòs Jéova ni é jan i enmé lézimen (Sòm 65:6-9). David té ka médité asi sa Jéova té ja fè pou dòt moun osi (Sòm 31:19 ; 37:25, 26). Men sa i té ka sonjé plis la menm, sé sa Jéova té ja fè ba-y. Dépi lè i fèt, Jéova té ka pwotéjé-y é i té ka soutyenn-li (Sòm 22:9, 10). Lè David té ka médité asi dé biten konsa, ou ka imajiné jan sa édé-y fè Jéova konfyans plis ankò !

6. Lèwvwè nou pè, ka ki pé édé-nou fè Jéova konfyans ?

⁶ Lèwvwè ni on biten ki ka fè-w pè, mi sa pou-w mandé-w : « Ka Jéova ja ni lokazyon fè ? » Médité asi sé biten-la i kréyé la.  An-nou pran on ègzanp : sé zozyo-la é sé flè-la, a pa dé biten Jéova kréyé pòtré a-y é a pa dé biten ki pé adoré-y nonplis. Poutan, i ka pran swen a sé biten-lasa. Si ou ka « pran tan gadé » jan i ka pran swen a sé 2 biten-lasa, sa ké édé-w pou-w pli sèten kè i ké pran swen a-w osi (Mat. 6:25-32). Médité osi asi sa Jéova ja fè pou sèwvitè a-y. Pétèt ou té’é pé étidyé vi a on moun ki viv an tan a Labib é ki montré kè i té ni onlo fwa. Oben ou pé étidyé vi a on sèwvitè a Bondyé ki ka viv a épòk an nou a. É médité osi asi jan Jéova ja pran swen a-w. Kijan i fè-w vin a lavérité ? (Jan 6:44). Kijan i réponn a priyè a-w ? (1 Jan 5:14). Jéova sakrifyé Gason-la i té pi enmé la. Ki byenfé sakrifis-lasa ka pwokiré-w chak jou Bondyé fè jou ? (Éféz. 1:7 ; Ébr. 4:14-16).

7. Kijan sa pwofèt Danyèl viv édé Vanessa trankilizé lèspri a-y ?

⁷ Vanessa b sé on sè ki ka viv an Ayiti. I touvé-y adan on sitiyasyon ki mèt bon angwas asi-y. On misyé ki té ka rété owa kaz a-y koumansé kriyé-y é voyé mésaj ba-y touléjou. I té ka mèt bon présyon asi-y pou yo kouché ansanm. Konm Vanessa di-y non, misyé-la koumansé vougaré-y é i koumansé mennasé-y. Mi sa Vanessa ka di : « Mésyé, an té pè ! » Alò ka Vanessa fè ? I fè tousa i té pé pou pwotéjé-y. Lè i ay lapolis pou palé-yo dè sa, on ansyen vin èvè-y. Men anplisdisa, i fè éfò pou konsantré-y asi jan Jéova édé sèwvitè a-y an tan lontan. Mi sa i ka èspliké : « Prèmyé moun an sonjé, sé pwofèt Danyèl. Yo jété-y adan on tou èvè enpé liyon ki té byen fen alòskè pwofèt-lasa pa té fè ayen. Men Jéova pran swen a-y. Alò an mandé Jéova okipé-y dè pwoblèm-lasa ban mwen é an lésé tout biten-la an men a-y. Fin an té fin fè sa, an pa té pè ankò » (Dan. 6:12-22).

SA JÉOVA KA FÈ KONNYÉLA

8. Dè kibiten David té sèten ? (Sòm 56:8).

⁸ Menmsi vi a David té andanjé lèwvwè i té Gat, i pa lésé lapè pran lanmen asi-y. I désidé konsantré-y asi sa Jéova té ka fè pou-y. I té ka santi kè Jéova té ka gidonné-y, kè i té ka pwotéjé-y é kè i té ka konprann sa i té ka rèsanti (li Sòm 56:8). Anplisdisa, David té ni dé bon bon zanmi kon Jonatan é Ayimélèk, gran prèt-la. Yo ankourajé-y é yo édé-y (1 Sam. 20:41, 42 ; 21:6, 8, 9). É menmsi wa Sayil té ka kouri dèyè David pou tchouyé-y, i rivé chapé kò a-y. I té sèten Jéova té sav ègzaktèman sa i té ka viv é sa i té ka rèsanti.

9. Ka Jéova konnèt asi nou ?

⁹ Lèwvwè ou ka jwenn on difikilté é kè ou pè, sonjé kè Jéova sav sa ou ka viv é kè i sav sa ou ka rèsanti. Pa ègzanp, non sèlman Jéova té sav jan yo té ka maltrété sé Izraélit-la lè yo té an Éjipt, men anplisdisa, i té konnèt byen ‘kijan yo té ka soufè’ (Ègz. 3:7). Adan on chanson David maké, i di kè Jéova té ka vwè ‘jan i té tris toubònman’ é ‘soufè i té ka soufè’ (Sòm 31:7). É lèwvwè sèwvitè a Jéova té ka soufè, ‘sa té ka fè Jéova soufè osi’ menmsi sé parapòt a mové désizyon yo pran yo té ka soufè (Iz. 63:9). Lèwvwè ou pè, Jéova ka konprann sa ou ka rèsanti é i vé édé-w pou-w pa pè ankò.

10. Poukwa ou sèten kè Jéova ka enkyété-y pou-w é kè i ké édé-w kèlkèswa difikilté-la ou ka jwenn la ?

¹⁰ Pétèt kè ou ka viv on sitiyasyon ki ka angwasé-w bon angwasé la é ou pa’a vwè ka  Jéova ka fè pou soutyenn-vou. A moman-lasa, ka pou-w fè ? Ében mandé Jéova ba-w bon jijman pou ou pé sa vwè tousa i ka fè pou édé-w (2 Wa 6:15-17). Aprésa, pran on tan pou réfléchi asi sa : Ès ou tann on biten ki ankourajé-w adan on diskou oben adan on komantè pannan on réinyon ? Adan tousa lòwganizasyon ka pwodui, ès ni on piblikasyon, on vidéo oben on chanson ki ankourajé-w ? Ès on moun pawtajé on vèwsé èvè-w oben on lidé ki ba-w fòs ? Nou pé rivé a oubliyé jan frè é sè an nou enmé-nou é jan Pawòl a Bondyé pé ankourajé-nou é pé édé-nou. Poutan, tousa sé dé bèl kado Jéova ka fè-nou (Iz. 65:13 ; Mawk 10:29, 30). Sa ka montré jan Jéova ka enkyété-y pou nou é jan i mérité kè nou fè-y konfyans (Iz. 49:14-16).

11. Ka ki édé Aida ni plis kouraj ?

¹¹ Aida sé on sè ki ka viv o Sénégal é pannan i té anba on éprèv, i gadé pou vwè kijan Jéova té ka édé-y. Konm sé-y ki té pi gran, fanmi a-y té bizwen i touvé on travay pou i okipé dè yo é pou limenm a-y pé sa ni on dèkwa. Men konm i té anvi vin pyonyé, i òwganizé-y pou ni on vi ki senp é i pa té ni onlo lajan. Fanmi a-y pa té kontan é yo té ka kritiké-y. Mi sa Aida ka di : « An té ka mandé-mwen si an té’é rivé soutyenn fanmi an mwen é si yo pa té’é lagé-mwen. Kifè an té pè. An jous di Jéova sé fòt a-y si sitiyasyon-la vin konsa. » Aprésa, pannan on réinyon, Aida tann on diskou ki touché-y toubònman. Mi sa i ka rakonté : « Frè-la fè-nou sonjé kè Jéova sav tout penn é péripési nou ka jwenn. » Mi sa i ka di ankò : « Piti-a-piti, sé konsèy-la sé ansyen-la é dòt frè é sè ban-mwen la rasiré-mwen. An té ka vwè on mannyè ki klè kè Jéova enmé-mwen. Aprésa, lè an té ka priyé-y, an té pi sèten ankò kè i té’é édé-mwen. An vwè i réponn a priyè an mwen kifè sa trankilizé-mwen. » Aprésa Aida touvé on travay ki pèwmèt-li rété pyonyé é grasa travay-lasa i té pé édé fanmi a-y osi. Mi sa i ka di : « An aprann fè Jéova konfyans a san pou san. Konnyéla, lèwvwè an pè é kè an ka priyé, souvantfwa an ka santi-mwen byen apré. »

 SA JÉOVA NI LENTANSYON FÈ

12. Dapré Sòm 56:9, dè kibiten David té sèten ?

¹² (Li Sòm 56:9.) Vèwsé-lasa ka palé dè ondòt biten David té ka fè pou lafrous pa té pran lanmen asi-y : menmsi vi a-y té andanjé toujou, i té ka médité asi sa Jéova té ké fè ba-y plita. I té sav kè Bondyé a-y té’é sové-y é kè i té’é fè sa o bon moman pas i té pwomèt-li kè pwochen moun ki té’é vin wa a Izrayèl sé té li (1 Sam. 16:1, 13). É pou David, lèwvwè Jéova té ka di kè i ké fè on biten, sé konsi biten-lasa té ja fèt.

13. Dè kibiten ou pé sèten ?

¹³ Ka Jéova pwomèt kè i ké fè ba-w ? Nou pa ka mèt an tèt an nou kè i ké baré tout difikilté pou ayen pa rivé-nou c. Men on biten pou ou sonjé sé kè kèlkèswa penn é péripési ou ka jwenn, Jéova ké fè ansòt pou sa disparèt adan nouvo mond-la (Iz. 25:7-9). Jéova kapab résisité moun ki mò, i pé géri-nou é i pé fè lènmi an nou fè pach. Nou sèten dè sa pas Jéova sé Kréyatè an nou é a pa puisans ka manké-y pou fè sa (1 Jan 4:4).

14. Asi kibiten ou té’é pé médité ?

¹⁴ Lèwvwè ou ka santi kè lapè ka pran lanmen asi-w, pran tan réfléchi asi sa Jéova ké fè dèmen. Pa ègzanp, sonjé sa ou ké rèsanti lè Satan pé ké la ankò. Pé’é ni moun méchan ankò, sé enki moun ki enmé Jéova ki ké la é nou ké vin pawfè piti-a-piti. Pannan lasanblé réjyonal a 2014, adan on sijé, on fanmi té ka fè on ti kozé asi èstrad-la pou montré kijan nou pé médité asi èspérans an nou. Papa-la té ka palé dè 2 Timoté 3:1-5 èvè fanmi a-y é yo imajiné ka sé vèwsé-lasa té’é di si yo té ka palé dè paradi-la. Mi sa vèwsé-lasa té’é di : « Adan nouvo mond-la nou ké adoumanman. Pas sé moun-la ké chèché entéré a lézòt, yo ké enmé trézò èspirityèl, yo ké sav rèkonnèt limit a yo, yo ké ni imilité, yo ké ba Bondyé onlo valè, yo ké kouté fanmi a yo, yo ké ni rèkonésans, yo ké fidèl, yo ké ni onlo lanmou pou lézòt, yo ké paré a viv byen èvè toutmoun, yo ké toujou paré a di vérité si lézòt, yo ké métrizé-yo, yo ké aji èvè dousè, yo ké enmé sa ki byen, yo ké mérité ou fè-yo konfyans, yo ké plen bonté, yo pé’é ni pon òwgèy, yo ké pi enmé Bondyé ki yo enmé plézi é yo ké enmé Bondyé poudèbon. Sé èvè sé moun-lasa pou ou maché. » Ès délè ou ka palé dè jan lavi ké yé adan nouvo mond-la èvè fanmi a-w é èvè zanmi a-w ?

15. Ka ki édé Tanja rété fidèl magré sé biten-la ki té ka fè-y pè la ?

¹⁵ On sè non a-y sé Tanja é ki ka viv an Masédwàn di Nò pa lésé sé biten-la i té pè la pran lanmen asi-y. Pou sa, i médité asi sèwten bénédisyon ki ka atann-nou. Lè i koumansé étidyé Labib, paran a-y pa té dakò èvè sa menm é yo mèt bon présyon asi-y. Mi sa i ka rakonté : « Lè an té ka sonjé sèwten biten ki té’é pé rivé, sa té ka fan’an pè. Lèwgadé, sé sa ki fèt. Manman-mwen té ka ban’an kou apré chak réinyon. É paran an mwen di-mwen siwvwè an té ka vin Témwen a Jéova yo té’é tchouyé-mwen. » Anfinaldikont, fanmi a Tanja mété-y déwò. Ka i fè ? Mi sa i ka réponn : « Toutlè an té ka sonjé jan an té’é ni tchè-kontan pou touttan siwvwè an té ka rété fidèl a san pou san. An té ka médité asi tout sé rékonpans-la Jéova té’é ban-mwen la adan nouvo mond-la, menmsi an té ka pèd sèwten biten adan mond-lasa. An té ka éséyé vwè osi kijan lavi ké yé lèwvwè nou pé’é ka sonjé tout sé biten-la ki ka fè-nou lapenn la. » Tanja rété fidèl a san pou san. É grasa Jéova, i touvé on koté pou i rété. Jòdila,  i mayé èvè on frè ki fidèl a Jéova é yo toulédé kontan davwa yo pé travay ansanm pou Jéova aplentan.

FÈ ANSÒT POU OU FÈ JÉOVA KONFYANS PLIS ANKÒ

16. Lèwvwè sa ki maké adan Lik 21:26-28 ké réyalizé, ka ki ké édé-nou ni kouraj ?

¹⁶ Pannan gwo tribilasyon-la, lamajorité a « sé moun-la ké bigidi tèlman yo ké pè ». Men sèwvitè a Jéova ké doubout pikan é yo ké ni kouraj (li Lik 21:26-28). Poukwa nou pé’é lésé lapè pran lanmen asi nou ? Pas nou ké ja aprann fè Jéova konfyans. Nou palé dè Tanja talè la é i di kè sa i viv la préparé-y pou dé biten ki té’é pi rèd ankò. Mi sa i ka di : « Sa an aprann sé kè kèlkèswa sitiyasyon-la nou té’é pé jwenn la, Jéova pé édé-nou é i pé béni-nou. Délè, adan sèwten sitiyasyon, nou pé ni lenprésyon kè sé dé moun ki ka menné men an réyalité, sé moun-lasa pa ayen koté Jéova. É menmsi nou ka pran bon gaz parapòt a on sitiyasyon nou ka viv, talè sa ké fin. »

17. Kijan tèks a lanné 2024 pé édé-nou ? (gadé imaj-la ki anlè po a jounal-la).

¹⁷ Jòdijou, ni onlo biten ki pé fè-nou pè. Men kon David, fò pa nou lésé lapè pran lanmen asi nou. Dayè mi sa i di Jéova adan on priyè : « Lè an pè, sé adan-w an ka mèt konfyans an mwen » (Sòm 56:3). An 2024, sé sé pawòl-lasa ki ké tèks a lanné-la. Mi sa on èspésyalis a Labib di anrapò èvè vèwsé-lasa : « David pa rété ka sonjé sé biten-la ki té ka fè-y pè la oben sé pwoblèm-la i té ni la men i té ka fèfon asi Moun-la ki té pé sové-y la. » Pannan sé mwa-la ki ka vin la, pran tan sonjé tèks-lasa siwtou siwvwè ou ka viv on sitiyasyon ki ka fè-w pè toubònman. Pran tan réfléchi asi sa Jéova ja fè, asi sa i ka fè é asi sa i ké fè. Alò, kon David ou ké pé di : « An ka mèt konfyans an mwen adan Bondyé [...] an pa pè » (Sòm 56:4).