1. Kisa ki pouvé fè nou pè ?

 TOUT moun ka pè. Sa vré, kou nou étidyé Labib-a, nou pa pè moun mouri-ya, nou pa pè démon-yan é nou pa pè sa dimen ké poté. Mé nou ka viv annan roun lépòk koté nou ka wè ‘bagaj ki ka fè nou pè’, kou lagèr, moun ka tchwé moun ké maladi (Luc 21:11). Nou pouvé pè moun osi. Parèkzanp, nou pouvé pè lò gouvèrnman-yan ka malmennen nou ouben lò nou fanmi pa lé nou adoré Jéova. Épi i gen roun ran ki pè yé pa rivé tchenbé douvan roun problèm yé ka jwenn jòdla ouben roun problèm yé ké pitèt jwenn pita.

2. Di annan ki sitiasyon David té fika lò i té annan vil Gat.

² David trapé problèm ki fè l’ pè. Parèkzanp, lò rwa Sayil té ka kouri dèyè li é té lé tchwé l’, David alé séré annan vil Gat, roun vil ki té di filisten-yan. Mé Akich, rwa sa vil-a, anprann ki sa David-a ki té ka maché ké yé, a té li ki té tchwé « roun patché milyé » Filisten. « A pa ti pè [David] koumansé pè » (1 Sam. 21:10-12). I té pè sa Akich té pouvé fè l’. Kisa ki idé David gen kouraj ?

3. Dapré Psaume 56:1-3 ké 11, kisa ki idé David arété pè ?

³ Annan Psaume 56, David ka di kouman i té ka santi so kò lò i té annan vil Gat. Annan sa Psaume-an, i ka byen èspliké poukisa i té pè. Mé i ka di osi kisa ki idé l’ arété pè. Lò David té pè, i té ka fè Jéova konfyans (li Psaume 56:1-3, 11). É i té gen rézon fè Jéova konfyans ! Jéova idé l’. David désidé fè roun bagaj ki té dròl mé ki byen maché : i fè kousidiré i té vin fou. Lò Akich wè sa, i pa menm té lé tchwé David ankò, i fè l’ pati. A konsa David rivé chapé so lapo (1 Sam. 21:13 – 22:1).

4. Kisa nou pouvé fè pou nou fè Jéova konfyans ankò plis ? Bay roun èkzanp.

 ⁴ Nou menm osi, nou pouvé rété kalm épi aji ké sajès lò nou pè si nou ka fè Jéova konfyans. Mé kouman nou pouvé fè Jéova konfyans ankò plis, èspésyalman lò nou pè ? Annou pran roun èkzanp. Si to dòktèr ka di to ki to gen roun maladi, o koumansman to ké pè. Mé to ké pouvé santi to kò pi byen si to ka fè to dòktèr konfyans. Pitèt to savé ki i ja idé roun patché moun ki té gen menm maladi-a. I ka pran tan byen kouté to é to ka wè ki i ka konprann sa to ka rousanti. Épi i ka propozé to roun trètman ki byen maché ké ròt moun. Menm fason-an, nou ké pouvé fè Jéova konfyans ankò plis si nou ka gadé sa i ja fè, sa i ka fè é sa i ké fè pou nou. A sa David té ka fè. Toupannan nou ké gadé déztrwa bagaj Bondjé fè li ékri annan Psaume 56, réfléchi asou sa to pouvé fè pou to fè Jéova plis konfyans é pou to rété kalm lò to pè.

SA JÉOVA JA FÈ

5. Lò David té pè, asou kisa i té ka pran tan réfléchi ? (Psaume 56:12, 13).

⁵ Lò so lavi té an danjé, David té ka mété so lidé asou sa Jéova té ja fè (li Psaume 56:12, 13). A sa i fè pannan tout so lavi. Parèkzanp, détan, i té ka pran tan réfléchi asou sa Jéova té kréyé, é sa té ka idé l’ sonjé ki Jéova tou-pwisan, é ki i kontan moun bokou (Ps. 65:6-9). David té ka pran tan réfléchi asou sa Jéova té fè pou ròt moun (Ps. 31:19 ; 37:25, 26). É i té ka pran tan réfléchi èspésyalman asou sa Jéova té ja fè pou li. Jéova té protéjé l’ é té idé l’ dipi i té ti bébé (Ps. 22:9, 10).  Sa kalité lidé-ya dèt idé David fè Jéova konfyans ankò plis !

6. Lò nou pè, kisa ki pouvé idé nou fè Jéova konfyans ankò plis ?

⁶ Lò to pè, doumandé to kò : « Kisa Jéova ja fè ? » Réfléchi asou sa i kréyé. Parèkzanp, « byen gadé » kouman Jéova ka pran swen di zozo-ya ké flèr-ya menm si yé pa pouvé ni imité so kalité ni adoré l’. Si to ka réfléchi asou sa, sa ké fè to vin ankò plis sir ki i ké pran swen di to osi (Mat. 6:25-32). Réfléchi osi asou sa Jéova fè pou so sèrvitèr-ya. Pitèt to pouvé étidyé lavi roun moun annan Labib-a ki montré ki i té gen bokou lafwa, ouben to pouvé li istwè roun sèrvitèr Bondjé di nou lépòk a. Anplis di sa, réfléchi asou sa Jéova ja fè pou pran swen di to. Doumandé to kò : « Kouman i idé to anprann konnèt li ? (Jean 6:44). Kouman i réponn to lapriyè ? (1 Jean 5:14). Ki bénédiksyon to ka jwenn chak jou gras a sakrifis so pitit i kontan-an ? (Éph. 1:7 ; Héb. 4:14-16). ».

7. Kouman sa ki rivé profèt Danyèl idé Vanessa arété pè ?

⁷ Vanessa b, roun sò ki ka rété Ayiti, té annan roun sitiasyon koté i té pè toubonnman. Roun mouché té ka aplé l’, té ka voyé l’ mésaj touléjou. I té ka mété présyon asou li pou i sa so djal. Vanessa té ka byen di li non. Mé mouché-a vin pi mové ankò é i jis ménasé l’. Vanessa ka di : « Mo té pè ». Kisa Vanessa fè pou i rété kalm menm si i té pè ? I fè sa i té pouvé pou i protéjé so kò. Roun ansyen idé l’ alé wè lapolis. Mé Vanessa réfléchi osi asou sa Jéova té fè pou protéjé so sèrvitèr-ya tan lontan. I ka di : « Prémyé moun mo sonjé, a té profèt Danyèl. Menm si i pa té fè anyen, yé jité l’ annan roun trou koté i té gen lyon ki té fen. Mé Jéova fronmen djòl lyon-yan. Donk, mo doumandé Jéova fè mouché-a arété sonjé mo, épi réglé problèm-an pou mo. Apré sa, mo pa té pè ankò » (Dan. 6:12-22).

SA JÉOVA KA FÈ JÒDLA

8. Di kisa David té sir ? (Psaume 56:8).

⁸ Menm si David té ka riské mouri lò i té Gat, i pa paniké. Pasé i fè sa, i désidé mété so lidé asou sa Jéova té ka fè pou li. David té ka santi ki Jéova té ka gidé l’, té ka protéjé l’ é ki i té ka konprann sa i té ka rousanti (li Psaume 56:8). I té gen plizyèr zanmi osi, kou Jonatan ké gran prèt Ayimélèk. Yé té ka soutni l’ ké idé l’ (1 Sam. 20:41, 42 ; 21:6, 8, 9). É menm si Sayil té lé tchwé l’, i rivé chapé so lapo. I té sir ki Jéova té byen savé sa ki té ka rivé l’, é kouman i té ka santi so kò.

9. Kisa Jéova ka wè lò i ka gadé nou chak ?

⁹ Lò to annan roun problèm ki ka fè to pè, sonjé ki Jéova ka wè ki problèm to gen, é i ka wè kouman to ka santi to kò akoz di sa. Parèkzanp, Jéova té wè kouman yé té ka fè Israyélit-ya wè mizè an Éjip, mé i té byen konnèt « yé doulò » osi (Ex. 3:7). Annan roun chanté, David di ki Jéova té ka wè ki i té gen ‘bokou chagren’ é ki ‘a soufri i té ka soufri’ (Ps. 31:7). É lò so pèp té ka soufri, menm lò a té di yé fot, Bondjé « té ka soufri » (Is. 63:9). Lò to pè, Jéova ka konprann sa to ka rousanti, é i lé idé to pou to pa pè ankò.

10. Kisa ki ka pèrmèt to sir ki Jéova ka gadé pou to é ki i ké idé to tchenbé annan nenpòrt ki éprèv ?

¹⁰ Mé si to annan roun sitiasyon ki ka fè to pè, pitèt to pa ka rivé wè kouman Jéova ka idé to. Atò, kisa to pouvé fè ?  Doumandé l’ idé to wè sa i ka fè pou to (2 Rois 6:15-17). Épi réfléchi asou sa : Ès roun moun fè roun diskour ouben bay roun répons pannan roun réinyon ki bay to fòrs ? Ès roun piblikasyon, roun vidéyo ouben roun chanté ankourajé to ? Ès roun moun pran roun vèrsé ouben di to roun bagaj ki annan Labib-a pou rasiré to ? Si nou pa ka fè atansyon, nou pouvé bliyé ki lanmou nou frè ké sò-ya ké ankourajman Labib-a ka bay nou, idé nou. Pourtan, sa bagaj-ya, a bèl kado di Jéova ! (Is. 65:13 ; Marc 10:29, 30). Sa ka montré ki i ka gadé pou to, é ki i mérité ki to fè l’ konfyans (Is. 49:14-16).

11. Kisa ki idé Aïda gen kouraj ?

¹¹ Aïda, ki ka rété Sénégal, byen gadé kouman Jéova idé l’ annan roun éprèv. Kou a li ki pi gran, so papa ké so manman té lé i ganyen asé soumaké pou i gen sa i té bézwen pou viv é pou i okipé di yé osi. Mé pou i divini pyonyé, i chanjé plizyèr bagaj annan so lavi, é akoz di sa, i té gen mwens soumaké. So fanmi té kòlè, é yé té ka kritiké l’. Aïda ka di : « Mo té pè pa rivé idé mo papa ké mo manman, é mo té pè tout moun mété mo asou koté. Mo jis doumandé Jéova poukisa i té lésé bagaj-ya gaté konsa ? » Mé, pannan roun réinyon, Aïda tandé roun diskour ki touché l’. I ka di : « Frè-a ki té ka fè diskour-a fè nou sonjé ki Jéova ka wè lò nou tchò krazé. » É i ka di osi : « Piti piti, konsèy ansyen-yan ké ròt frè ké sò-ya bay mo idé mo wè ki Jéova té kontan mo, é sa rasiré mo. Mo koumansé priyè Jéova ké plis konfyans ankò. Mo wè li réponn mo lapriyè, é mo koumansé santi lapè annan mo tchò. » Finalman, Aïda trapé roun travay ki té ka pèrmèt li gen sa i té bézwen pou viv, rété annan sèrvis pyonyé-a, épi an menm tan, idé so papa ké so manman. Men sa i ka di : « Mo anprann fè Jéova konfyans ké tout mo tchò. Aprézan, lò mo ka fin priyè, souvan, mo pa pè ankò. »

 SA JÉOVA KÉ FÈ DIMEN

12. Dapré Psaume 56:9, di kisa David té sir ?

¹² (Li Psaume 56:9.) Sa vèrsé-a ka palé di rounòt bagaj David té ka fè lò i té pè : menm si i té ka riské mouri toujou, i té ka pran tan réfléchi asou sa Jéova té ké fè pou li pita. I té savé ki so Bondjé té ké idé l’ o bon moman paské i té promèt li fè l’ divini rwa Israyèl (1 Sam. 16:1, 13). É pou li, lò Jéova té ka di ki i té ké fè roun bagaj, a kousidiré i té ja fè l’.

13. Di kisa to pouvé sir ?

¹³ Kisa Jéova promèt fè pou to ? Nou savé ki Jéova pa ké anpéché nou trapé problèm é nou pa ka antann i fè sa c. Mé kèlkéswa éprèv to ké jwenn jòdla, Jéova ké fè yé tout disparèt annan monn nouvo-a (Is. 25:7-9). Nou Kréyatèr ké résisité moun mouri-ya, i ké géri nou, é i ké krazé tout nou lèlmi. I pwisan, i pouvé fè tousa, asiré pa pitèt ! (1 Jean 4:4).

14. Asou kisa nou pouvé pran tan réfléchi ?

¹⁴ Lò to pè, réfléchi asou sa Jéova ké fè dimen. Sonjé sa to ké rousanti lò Satan pa ké la ankò, lò méchan-yan ké détrwi é ki a moun ki kontan Jéova rounso ki ké la, é ki piti piti nou ké vin parfè. Pannan asanblé réjyonal 2014-a, nou wè annan roun démonstrasyon kouman nou pouvé fè pou nou réfléchi asou èspwar nou ganyen. Roun papa té ka palé di sa nou té ké pouvé li annan 2 Timothée 3:1-5 si sa vèrsé-ya té ka palé di lavi-a annan paradi-a. Men sa nou té ké li : « Annan monn nouvo-a, a pa ti kontan nou ké kontan, paské moun-yan ké gadé pou yé konpanyen, yé ké kontan trézòr èspirityèl-ya, yé pa ké fè gran larjò, yé pa ké krè yé miyò pasé pyès moun, yé ké rèspèkté bagaj ki sakré, yé ké obéyi yé papa ké yé manman, yé pa ké engra, yé ké fidèl, yé ké kontan yé fanmi, yé ké rivé tonbé dakò ké yé konpanyen, yé ké toujou di bon bagaj asou ròt-ya, yé ké kontrolé yé kò, yé ké dous, yé ké kontan sa ki byen, yé ké sa dé moun nou ké pouvé fè konfyans, yé tèt pa ké rèd, yé pa ké gonflé yé lèstomak, yé ké pi kontan Bondjé pasé plézi, yé ké di yé kontan Bondjé é yé ké lé kouté l’. Maché ké sa kalité moun-yan. » Ès sa ka rivé to di palé di kouman lavi-a ké fika annan monn nouvo-a ké to fanmi ouben ké to zanmi ?

15. Kisa ki idé Tanja rété fidèl menm si i té pè ?

¹⁵ Tanja, roun sò ki ka rété Masédwann di Nòr, rivé rété fidèl menm si i té pè pas i réfléchi asou bénédiksyon nou ké gen pita. Lò i koumansé étidyé Labib-a, so papa ké so manman vin méchan ké li. I ka di : « Mo té pè sèrten bagaj rivé mo, é a sa ki fèt vré. Mo manman té ka bat mo apré chak réinyon. É mo papa ké mo manman té ka ménasé tchwé mo si mo té ka divini Témwen Jéova. » Finalman, papa ké manman Tanja mété l’ dèrò. Kouman i réyaji ? I ka di : « Mo pa té ka arété sonjé bénédiksyon mo té ké trapé pou tout-tan si mo té ka rété fidèl. Mo té ka réfléchi asou bénédiksyon Jéova té ké bay mo annan monn nouvo-a pou ranplasé tousa mo té ké pédi annan sa sistèm-an. É mo té ka réfléchi asou kouman lavi-a ké fika lò tousa ki ka fè nou lapenn  jòdla ké dèyè nou. » Tanja rété fidèl, é gras a Jéova i trapé roun kaz. Jòdla, i maryé ké roun frè ki fidèl é yé kontan sèrvi Jéova ansanm annan sèrvis a plen tan-an.

FÈ JÉOVA KONFYANS ANKÒ PLIS

16. Lò sa ki marké annan Luc 21:26-28 ké fèt, kisa ki ké idé nou gen kouraj ?

¹⁶ Pannan gran tribilasyon-an, ‘latranblad ké pran près tout moun afòrs yé ké pè’. Mé sèrvitèr Bondjé-ya ké rété fò, é yé ké gen kouraj (li Luc 21:26-28). Poukisa nou pa ké pè ? Paské nou ké ja anprann fè Jéova konfyans. Tanja nou palé annan ròt paragraf-a ka di ki sa i viv ka idé l’ sipòrté ròt sitiasyon ki difisil. I ka di : « Mo anprann ki Jéova pouvé idé nou annan nenpòrt ki kalité sitiasyon. Détan, nou pouvé gen lenprésyon ki a roun ran moun ki ka kontrolé sitiasyon-an, mé Jéova pi fò pasé yé. É menm si roun éprèv rèd, i ké fini roun jou. »

17. Kouman tèks pou lannen 2024-a pouvé idé nou ? (gadé zimaj-a ki anlè prémyé paj-a).

¹⁷ Jòdla, roun patché bagaj pouvé fè nou pè. Mé kou David, nou lé rété kalm é kontinyé aji ké sajès menm si nou pè. Men sa David di Jéova annan roun lapriyè : « Lò mo pè, a to mo ka fè konfyans » (Ps. 56:3). A sa ki tèks pou lannen 2024-a. Men sa roun èspésyalis Labib-a èspliké parapòrta sa vèrsé-a : « [David] pa ka kontinyé sonjé sa ki ka fè l’ pè, ni problèm i gen. Pasé i fè sa, i ka konté asou Sa-la ki ka sové li é ki ké délivré l’. » Kontinyé sonjé sa tèks-a sa lannen-an, èspésyalman si to annan roun sitiasyon ki ka fè to pè. Pran tan réfléchi asou sa Jéova fè, sa i ka fè, é sa i ké fè. Atò, kou David, to ké pouvé di : « A Bondjé mo ka fè konfyans, […] mo pa pè » (Ps. 56:4).