1. Amkam thodde pavtti bhirant kiteak disot?

 BIBLE xiklolean ami meloleanchi, noxttea dutanchi ani fuddarak amkam kitem zatolem hea vixim amchi bhirant pois korunk pavlim. Tori astana, atam pasun kednam-na-kednam amkam bhirant disonk xokta. Karonn zhuzam, kirmi ani duensam osleo “bhirankull ghoddnneo” ghoddttat, toslea eka vellar ami jietat. (Luk. 21:11) Toxench, khore bhoktecho virodh kortat te sorkar ani familintlea vangddeanchi amkam bhirant disonk xokta. Tea bhair, amkam atam asat vo fuddarak ieunk xoktat tea oddchonneancho ami fuddo korunk pavtolim vo na mhunn, amkam bhirant disonk xokta.

2. David Gatant aslo tednam kitem ghoddlem?

² Davidak pasun thodde pavtti bhirant disli. Udharonnak, Raza Saulu taka marunk sodhtalo tednam, to Gatachea Filistin xarant pollon gelo. Gatacho raza Akishak, David ek bollvont zhuzari ani tannem “hozaramnim” Filistevkarank marun uddoilʼle mhunn kollon ailem. Tea vellar raza Akish apleak kitem kortolo mhunn chintun Davidak “borich bhirant disonk lagli.” (1 Sam. 21:10-12, NW) Tor Davidak apli bhirant pois korunk koxi modot zali?

3. Stotr 56:1-3, 11 pormonnem, David apli bhirant koxi pois korunk pavlo?

³ Stotr 56-ant, David Gat xarant aslo tednam taka koxem bhoglem tea vixim tannem sanglem. Taka bhirant disli, punn ti bhirant to koso pois korunk pavlo tem pasun tantunt sanglolem asa. David bhielʼlo tednam tannem Jehovacher visvas dovorlo. (Stotr 56:1-3, 11 vachat.) Ani oxem korun tannem borem kelem. Karonn Jehovachea modotin to apli tokli uzar korunk pavlo. Raza Akisha mukhar apunn ek piso mhunn tannem dhong kelem. Hea pasot Razan taka soddun dilo, ani hea toren Davidacho jiv vanchlo.—1 Sam. 21:13–22:1.

4. Ami Jehovacher amcho visvas koso vaddounk zata? Ek udharonn diat.

⁴ Davida bhaxen ami pasun Jehovacher visvas dovrun amchi  bhirant pois korunk zata. Punn amkam bhirant dista zalear kitem korunk zata? Tea vellar Jehovacher amcho visvas koso vaddounk zata? Hea udharonna vixim chintat. Tumkam ek duens asa mhunn tumkam kolltta, ani tumi bhietat. Punn uprant tumi tumchea dotorak mellttat. Tannem zaiteank borim keleant mhunn tumi aikolam, toxench to tumchem pasun dhean diun aikota ani taka tumchi kallji asa mhunn tumkam kollon ieta. Tea bhair, dusreank faideak poddlolo umkoch ilaz tumkam-i boreak poddttolo mhunn to tumkam sangta. Tor tumkam tea dotoracher visvas asa zalearuch tumchi bhirant matxi pois zatoli. Teach bhaxen, Jehovan amche pasot kitem kelam, to atam kitem korta ani fuddarak kitem kortolo tea vixim chintlear, tacher amcho visvas vaddttolo. Davidan pasun toxench kelʼlem. Tor Stotr 56-ant, Davidan boroilʼlea utrancher ami dhean dium-ia. Ani oxem kortana tumi tumcho visvas koso vaddounk zata ani tumchi bhirant koxi pois korunk zata tea vixim chintat.

JEHOVAN KITEM KELAM?

5. Apli bhirant pois korunk David kitea vixim niallttalo? (Stotr 56:12, 13)

⁵ Davidacho jiv dhokeant aslo tednam pasun, Jehovan adim kel’lea borea kamam vixim tannem niall kelo. (Stotr 56:12, 13 vachat.) Ani oxem korchi taka sonvoim asli. Udharonnak, thodde pavtti Jehovachea rochnne vixim to niallttalo, jea vorvim Jehovak bhorpur xokti asa, ani to munxancho khub mog korta mhunn tachi khatri vaddli. (St. 65:6-9) Toxench, Jehovan dusream pasot kitem kelam tea vixim to chintʼtalo. (St. 31:19; 37:25, 26) Ani khas korun Jehovan tachea pasot kitem kelam tem to niallttalo. Toxench to avoichea kusveant aslo tednam thaun, Jehovan koxi tachi rakhonn keli ani taka modot keli tem to ugddasak haddttalo. (St. 22:9, 10) Oxem kelʼlean Jehovacher tacho visvas anikui ghott zalo.

6. Amkam bhirant dista tednam Jehovacher visvas dovrunk koxi modot zatoli?

⁶ Tor amkam bhirant dista tednam, ami amkanch vicharunk zata, ‘Jehovan atam porian mhojea pasot kitem kelam?’ Ami Jehovachea rochnne vixim chintunk zata. Udharonnak, Jehova suknneanchi ani fulanchi koxi kallji gheta tacher ami ‘dhean diunk’ zata. Tankam Jehova sarke gunn nant ani tim tachi bhokti korunk xokonant. Tori astana, Jehova tanchi itle bore toren kallji gheta. Hea vixim chintʼtana, Jehova  amchi-i kallji ghetolo mhunn tacher amcho visvas ghott zata. (Mt. 6:25-32) Toxench, Jehovan aplea sevokam pasot kitem kelam tea vixim ami chintunk zata. Jehovacher ghott bhavarth aslolea eka sevoka vixim ami Bible-ant vachunk zata, vo amchea kalla voilea eka Jehovachea Sakxeacho onnbhov ami vachunk zata. a Tea bhair, Jehovan amchi koxi kallji ghetlea tacher ami niall korunk zata. Zoxem, aplea vixim zannam zaunk tannem amkam koxi modot keli, tannem amchea magnneancho zobab koso dila, ani tachea Putachea bolidanak lagon dor disa amkam koso faido zata, tea vixim ami chintunk zata.—Ju. 6:44; 1 Ju. 5:14; Ef. 1:7; Heb. 4:14-16.

7. Provadi Danielachea udharonnantlean, bhoinn Vanessa-k tichi bhirant pois korunk koxi modot zali?

⁷ Vanessa b nanvache eke bhoinnik Jehovacher visvas dovorlolean, tichi bhirant pois korunk koxi modot zali tem polloum-ia. Haiti-ntlea hea bhoinnik ek bhirankull poristhiticho fuddo korunk poddlo. Tichea vaddeavoilo ek munis dor disa tika fon kortalo, ani tika message-o dhaddttalo. Ani tachea sangata natem dovrunk ticher dobhav ghaltalo. Punn bhoinnin taka saf nakarlo tednam to challvolo ani tika dhomkaunk laglo. Vanessa sangta: “Hanv ekdom bhiel’lem.” Tor ti apli bhirant koxi pois korunk pavli? Svotachi rakhonn korunk tichean zata tem tinnem kelem. Ani eka vhoddilachea modotin tinnem pulisank sompork kelo. Toxench, Jehovan adlea kalla voilea sevokank koxi modot kelʼli tea vixim pasun tinnem niall kelo. Ti sangta: “Mhojea monant ailo to sogleam-von poilo munis mhunnttlear provadi Daniel. Tachi kainch chuk nasli, tori astana taka bhukelʼlea xinvanchea dholint uddoilo. Punn Jehovan tea xinvanchim tonddam bond kelim, ani taka salvar kelo. Tor mhoji oddchonn suttavi kor mhunn hanvem Jehova lagim magnnem kelem. Karonn tea vixim hanv kainch korunk xokonaslem. Tea uprant mhoji bhirant pois zali.”—Dan. 6:12-22.

JEHOVA ATAM KITEM KORTA?

8. Davidak kosli khatri asli? (Stotr 56:8)

⁸ Gatant astana Davidacho jiv dhokeant aslo. Tori astana taka bhivoita toslea vostuncher tannem dhean diunk na. Tachea bodlek, Jehova tea vellar tachea pasot kitem kortalo tacher tannem dhean dilem. Jehova taka margdorxon dita, taka rakhta ani tachi bhavnam somzon gheta mhunn David pollounk xoklo. (Stotr 56:8 vachat.) Toxench Davidak, Jonathan ani Mha-iadnik Ahimeleka sarke visvaxi ixtt asle, je taka urba ditale ani taka modot kortale. (1 Sam. 20:41, 42; 21:6, 8, 9) Tea bhair, Raza Saulu Davidak marunk sodhtalo, punn Jehovan tacho jiv vanchoilo. Tor hem soglem polloun, apleak kosle tras sosunk poddttat ani apleak koxem bhogta, tem Jehovak bore bhaxen khobor asa mhunn Davidak khatri asli.

9. Jehova kitem zannam mhunn ami ugddas dovrunk zai?

⁹ Amcher bhirant haddtta toslea eke oddchonnecho amkam fuddo korunk poddtta tednam amchi poristhitich nhoi, punn amkam koxem bhogta tem pasun Jehova zannam mhunn ami ugddas dovrunk zai. Udharonnak, Izraelitkaram Ejipttant aslim tednam Jehovan tanche trasuch nhoi, punn tanche ‘koxtt-dogd vo tankam kitlem dukh bhogtalem’ tem pasun polloilem. (Sutt. 3:7) Toxench Davidan pasun sanglem, ki Jehovan fokot tache ‘trasuch’ nhoi, punn tache ‘tollmolle’ pasun polloile. (St. 31:7, NW) Ani Izraelitkarank tanchea svotachea chukink lagon tras sosunk poddle tednam pasun, tanchi “durdoxa anink sosunk Sorvesporak nozo zalem.” (Fudd. 10:16) Tor amkam bhirant dista tednam amkam koxem bhogta tem Jehova somzota, ani amchi bhirant pois korunk modot diunk to toiar asa mhunn ami khatri dovrunk zata.

10. Jehovak tumchi kallji asa ani koslea-i poristhitint to tumkam modot kortolo mhunn tumkam kiteak khatri asa?

 ¹⁰ Punn ek bhirankull poristhiticho fuddo kortana, Jehova amkam koxi modot korta tem ami pollounk xokonant zalear, ami kitem korunk zata? To amkam koxi modot korta tem dakhoun di mhunn ami magnnem korunk zata. (2 Raz. 6:15-17) Uprant ami hea vixim chintunk zata: Sobhechea mittingentlean, bhaxonnantlean vo eka zobabantlean amkam ghottai mellʼllea kai? Eka prokaxonantlean, video-ntlean vo eka JW gitantlean amkam urba mellʼllea kai? Eka bhavan vo bhoinnin bhuzvonn dita toslo ek mud’do vo ek vers amkam sangla kai? Bhav-bhoinnanchea moga thaun ani Devachea Utrantlean amkam melltta te urbe thaun, amkam kitli modot zata tem thodde pavtti ami visrot. Punn khorem mhunnttlear, him Jehova koddlean moladik dennim zaun asat. (Iz. 65:13; Mk. 10:29, 30) Karonn hantuntlean taka amchi kitli kallji asa, ani ami tacher visvas dovrunk zata mhunn amkam puravo melltta.—Iz. 49:14-16.

11. Aida-k tachi bhirant pois korunk koxi modot zali?

¹¹ Hea vixim Senegal-ant ravpi, Aida nanvache eke bhoinnichea udharonnacher dhean dium-ia. Tika ek kotthin poristhiticho fuddo korunk poddlo tednam, Jehova tika koso modot kortalo tacher tinnem dhean dilem. Tichea bhav-bhoinnam modem ti vhoddli asli dekhun, tichim avoi-bapui chintʼtalim ki tinnem kam korun svotachi toxench tanchi kallji gheunk zai. Punn pioneer seva korunk Aida-n aplem jivit sadem dovorlem ani hea pasot tika poixeanchem unnemponn zaunk laglem. Ani tednam tichi famil ticher khub ragar zali ani tika tomnnem marunk lagli. Aida sangta: “Hanv mhojea avoi-bapaichi kallji gheunk xokchi na, ani soglim mhaka nakartolim mhunn hanv bhielem. Itlench nhoi, hanvem mhojea poristhiti pasot Jehovak zobabdar tharailo.” Uprant tinnem ek mittingent bhaxonn aikolem. Ti sangta: “Jehova amchea kallzantlem dukh zannam mhunn, bhaxonn diupean amchea ugddasak haddlem. Toxench vhoddilamnim ani bhav-bhoinnamnim mhaka bore sol’le dile. Tea vorvim sovkas-sovkas, Jehova mhozo mog korta mhunn mhaka porot khatri mellʼlli. Hanv tache lagim magnnem kortalem tednam to mhaka zobab ditolo mhunn mhozo bhorvonso vaddlo. Ani Jehovan koxe toren mhojea magnneanche zobab dile tem hanvem polloilem tednam, mhaka monachi xanti mellʼlli.” Uprant Aida-k ek kam mellʼllem jea vorvim tem  pioneer seva korit ravonk, toxench tachea avoi-bapaichi kallji gheunk pavlem. Bhoinn sangta: “Hanv Jehovacher purnn toren visvas dovrunk xiklem. Ani atam magnnem kelea uprant choddxe pavtti mhoji bhirant nanch zata.”

JEHOVA KITEM KORTOLO?

12. Stotr 56:9-a pormonnem Davidak kosli khatri asli?

¹² Stotr 56:9 vachat. Davidak tachi bhirant pois korunk anik koxi modot zali tem amkam hea versant sanglam. Tacho jiv dhokeant aslo. Punn Jehova fuddarak kitem kortolo tacher niall kelolean taka modot zali. Jehova taka sarkea vellar salvar kortolo mhunn David zannam aslo. Karonn Izraelacho fuddlo raza, to zatolo mhunn Jehovan taka bhas dilʼli. (1 Sam. 16:1, 13) Ani Jehovan dilʼli bhas ghoddon ailʼlea sarkich asa mhunn Davidak khatri asli.

13. Jehova kitem kortolo mhunn amkam khatri asa?

¹³ Jehovan amkam kosli bhas dilea? Amcher ietole te tras Jehova addaitolo mhunn ami opekxa korinant. c Punn aiz amkam kitle-i tras sosunk poddlear pasun novea sonvsarant te sogle tras Jehova kaddun uddoitolo mhunn tannem bhas dilea. Ani to oxem kortoloch mhunn amkam khatri asa. (Iz. 25:7-9) Karonn amcho Rochnnar khub xoktivont asa. To meloleank jivont korunk xokta, amchim duensam toxench dukh kaddun uddounk xokta, ani soglea dusmanancho nas korun uddounk xokta.—1 Ju. 4:4.

14. Ami kitea vixim niall korunk zata?

¹⁴ Tor amkam bhirant dista tednam, Jehovan fuddara pasot amkam kitem bhasailam tea vixim ami niall korum-ia. Ami oslea vella vixim chintunk zata jednam Soitan aschona, vaitt lok nhoi punn nitivont lok astole, ani sovkas-sovkas korun ami poripurnn zatolim. Hem ami koxem niallunk zata tea vixim 2014-chea pradexik odhivexonak ek dekhavo dakhoilʼlo. Tantunt ek bapui aplea famili sangata, 2 Timotak 3:1-5-a vixim uloitalo. Ani tem vers Sobit Bage vixim aslem zalear tantuntlim utram koxim astolim aslim tem tannem sanglem. Tannem mhunnttlem: “Novea sonvsarant sogleam-von khuxalkaiecho vell astolo. Karonn lok dusreancho mog kortat tosle, sotacho mog kortat tosle, mannsugen vagtat tosle, khalti, Devak vakhannttat tosle, avoi-bapaichem aikotat tosle, upkari, visvaxi, aplea ghorcheancho mog kortat tosle, aikonk kobul zatat tosle, sodanch dusreanchem borem uloitat tosle, svotacher tabo dovortat tosle, movall, boreponnacho mog kortat tosle, visvas dovorpa sarke, dusreanchem aikotat tosle, lhanvik kallzache, moujecho mog korchea poros Devacho mog kortat tosle, khorea kallzan Devachi bhokti kortat tosle. Oslea lokank chittkon ravat.” Tor novo sonvsar koso astolo tea vixim tumi tumchea famili sangata vo bhav-bhoinnam sangata uloitat kai?

15. Tanja-k bhirant disli zalear pasun Jehovak visvaxi ravonk taka koxi modot zali?

¹⁵ North Macedonia-ntlea, Tanja nanvache eke bhoinnicho onnbhov polloum-ia. Tem Bible xikonk laglem tednam, tachim avoi-bapui tacho khub virodh korunk laglim. Punn Jehova fuddarak kitem kortolo tea vixim niall kel’lean, apli bhirant pois korun taka visvaxi ravonk bhoinnik modot zali. Tem sangta: “Jea vixim hanv bhietalem, tench zalem. Dor eke mittinge thaun ghora ailea uprant mhoji mummy mhaka boddoitali. Ani hanv Sakxi zalem zalear mhaka jivexim martolim mhunn mummy-daddy-n mhaka dhomki pasun dili.” Xevottak tannim bhoinnik ghorantlean bhair ghatlem. Tor tea vellar tannem kitem kelem? Tem sangta: “Jehovak visvaxi ravlolean hanv sasnak kitlem khuxal astolem tea vixim hanvem niall kelo. Toxench atam mhaka kitle-i teag korunk poddlear pasun, Jehova mhaka fuddarak besanvam ditolo, ani tea vellar heo vaitt iadi mhojea monant pasun ieuncheo nant mhunn hanvem ugddasak haddlem.” Tanja Jehovak visvaxi ravlem. Ani Jehovachea modotin taka ravonk ek zago mellʼllo. Uprant tem sotant ghott aslolea eka bhava lagim kazar zalem, ani  atam tim dogaim khuxalkaien purnn vellachi seva kortat.

AIZ JEHOVACHER TUMCHO VISVAS GHOTT KORAT

16. Lukas 21:26-28-ant boroilʼleo ghoddnneo ghoddttat tednam dhir dakhounk amkam koxi modot zatoli?

¹⁶ Vhodd sonkoxttachea vellar, “bhieun lokanchea jivant-jiv urcho na.” Punn Devache lok thir ravtole ani dhirvont astole. (Lukas 21:26-28 vachat.) Karonn adinch thaun Jehovacher koso visvas dovrop tem tim xikleant. Ami voilea peregrafant uloilʼli bhoinn Tanja sangta ki adim taka jem onnbhovunk poddlem taka lagon, uprant ail’lea kotthin poristhiticho fuddo korunk taka modot zali. Tem sangta: “Jehova amkam koslea-i poristhiticho fuddo korunk modot korunk xokta mhunn hanv xiklem. Thodde pavtti ti poristhiti dusreanchea tabeant asa oxem amkam disot. Punn khorem mhunnttlear, Jehova sogleam poros bollixtt asa. Ani amchea trasancho fuddo korunk khub kotthin oxem amkam dista zalear pasun ek-na-ek dis te somptolech.”

17. 2024 vorsachea versantlean amkam kitem korunk modot zatoli? (Masikachem fuddlem chitr polloiat.)

¹⁷ Aiz amkam zaitea karonnank lagon bhirant disonk xokta. Punn Davida bhaxen ami amchi bhirant pois korunk zata. 2024 vorsachem vers Davidan Jehovak kelʼlem magnnem zaun aslem. Zoim tannem mhunnttlem: ‘Jednam mhaka odik bhirant dista, tednam odik Tujer visvas dovortam.’ (St. 56:3) Ani Davidan mhunnttlolea hea utram vixim, Bible-achea eka zannaran oxem sanglem: “Apleo oddchonneo vo apleacher bhirant haddtta toslea vostum vixim David chintit ravonk na. Punn taka salvar korunk xokta tea Devacher to patieun ravlo.” Tor ietat tea mhoineamnim, hea vorsachea versa vixim chintit ravat, khas korun tumkam bhirankull poristhiticho fuddo korunk poddtta tednam. Oslea vellar, Jehovan kitem kelam, to kitem korta ani kitem kortolo tacher niall korat. Oxem kelʼlean Davida bhaxen tumi oxem mhunnonk pavtolim: “Hanv . . . Devacher patieun ravtam; koslich mhaka bhirant na!”—St. 56:4.