1. ¿Mbaʼérepa sapyʼánte ikatu jakyhyje?

 ENTEROVE ningo jakyhyje sapyʼánte. Péro jastudia rupi la Biblia ndajakyhyjevéima umi omano vaʼekuégui, umi demóniogui, térã umi mbaʼe oikótavagui amo gotyove. Upéicharamo jepe ñande jaiko hína peteĩ tiémpo jahechatahápe “heta mbaʼe oporomongyhyjéva”, umíva apytépe gérra, violénsia ha mbaʼasy (Luc. 21:11). Ikatu avei oime jakyhyje ñande rapichakuéragui. Por ehémplo, pe goviérnogui térã ñane parientekuéra oñemoĩvagui Jehová organisasiónre. Oĩ avei umi okyhyjetereíva ndaikatúiramo g̃uarã ogueropuʼaka umi provléma oguerekóva koʼág̃a térã umi mbaʼe ikatúvagui oñepresenta chupe amo gotyove.

2. Emombeʼu mbaʼépa ohasa rakaʼe David oĩrõ guare Gátpe.

² David okyhyje vaʼekue avei. Por ehémplo rréi Saúl opersegi ha ojukaséramo guare chupe, David odipara ha oho umi filisteokuéra siuda héravape Gat. Og̃uahẽrõ guare upe siudápe, ensegída pe rréi Akís oikuaáma David haʼeha pe gerréro ojegueropurahéiva ‘ojuka haguére mas de 10.000 filistéope voi’. Upévare David “okyhyjeterei rréi Akísgui” (1 Sam. 21:​10-12). Chupe oipyʼapyeterei vaʼekue la ikatúva ojapo hese rréi Akís. ¿Péro mbaʼépa oipytyvõ Davídpe ipyʼaguapy hag̃ua okyhyjéramo jepe?

3. ¿Mbaʼépa ojapo David ipyʼaguapy hag̃ua okyhyjéramo jepe asegún heʼi pe Salmo 56:​1-3 ha 11?

³ Pe Salmo 56-pe, David omombeʼu vaʼekue mbaʼéichapa oñeñandu oĩramo guare Gátpe. Upe Sálmope David omombeʼu porã vaʼekue mbaʼépa la omongyhyjéva chupe. Péro avei omombeʼu mbaʼépa la oipytyvõva chupe anivéma hag̃ua okyhyje. David heʼi okyhyjéramo guare osegi hague ojerovia Jehováre (elee Salmo 56:​1-3, 11). Haʼe oikuaa porã Jehová katuete  oipytyvõtaha chupe. Upémarõ David odesidi ojapo peteĩ mbaʼe irraroitereíva: Haʼe oñembotavyrai guaʼu. Ha osẽ porã chupe upe ojapo vaʼekue, pórke Jehová ovendesi chupe. Upévare rréi Akís ohechávo péicha Davídpe, ojukase rangue chupe, haʼe oipotántema oho upégui. Péicha David ojesalva (1 Sam. 21:13–22:1).   

4. ¿Mbaʼéichapa ñande ikatu jajerovia Jehováre? Emoĩ peteĩ ehémplo.

⁴ Jajeroviáramo Jehováre ñanepytyvõta ñandepyʼaguapy hag̃ua jakyhyje jave. ¿Péro mbaʼéichapa ikatu ñamombarete ñande jerovia Jehováre koʼýte jakyhyje jave? Epensami ko ehémplore. Ñamoĩ chupe ojeʼeha ndéve erekoha peteĩ mbaʼasy ivaietereíva. Katuete ningo eñemondýita. Péro upéi ndepyʼaguapy pórke eikuaa la nde doktór ivaleha ha oipytyvõma hague heta persóna orekóvape peichagua mbaʼasy. Haʼe oiméne ojapysaka porã nderehe, ha ehechakuaa hese ojepyʼapyha nderehe. Ha ikatu heʼi ndéve esegi hag̃ua peteĩ tratamiénto oipytyvõma vaʼekue hetápe. Péicha avei jajeroviavéta Jehováre: Ñapensáramo umi mbaʼe ojapóma vaʼekuére, mbaʼépa ojapo hína koʼág̃a ha mbaʼépa koʼẽrõite ojapóta ñanderehehápe. Péva voi oipytyvõ kuri Davídpe. Ñahesaʼỹijóramo Salmo 56 jahecháta mbaʼépa ikatu ñanepytyvõ ñamombarete hag̃ua ñande jerovia Jehováre ha ñandepuʼaka hag̃ua umi mbaʼe ñanemongyhyjévare.

¿MBAʼÉPA JEHOVÁ OJAPÓMA RAKAʼE?

5. ¿Mbaʼépa ojapo David ipuʼaka hag̃ua umi mbaʼe omongyhyjévare chupe? (Salmo 56:​12, 13).

⁵ Rréi David ojapeligrárõ guare oikóvo, oñekonsentra meme kuri umi mbaʼe Jehová ojapóma vaʼekuére (elee Salmo 56:​12, 13). Upéva ningo David ojapo vaʼekue oikove aja entéro. Por ehémplo, haʼe sapyʼánte ojesareko Jehová kreasión rehe ha péva rupive ohechakuaa mbaʼeichaitépa Jehová ipoderóso ha ñanderayhu (Sal. 65:​6-9). Avei David ojepyʼamongeta umi mbaʼe Jehová ojapóma vaʼekuére isiervokuéra rehehápe (Sal. 31:19; 37:​25, 26). Ha koʼýte haʼe opensa meme vaʼekue umi mbaʼe Jehová ojapóma vaʼekuére hesehápe. Jehová ningo okuida vaʼekue David rehe ha oprotehe chupe imichĩete guive (Sal. 22:​9, 10). ¡Ñañeimahinamína mbaʼeichaitépa oiméne David ojeroviave raʼe Jehováre ojepyʼamongeta rire péicha!

6. Oiméramo jakyhyje hína, ¿mbaʼépa ñanepytyvõta jajerovia hag̃ua Jehováre?

 ⁶ Oiméramo ekyhyje hína, ¿mbaʼépa Jehová ojapóma raʼe nderehehápe? Tuicha nepytyvõta ‘emaña porãramo’ umi mbaʼe Jehová okrea vaʼekuére. Por ehémplo, jajesarekóramo umi yvoty ha guyrakuéra rehe jahecháta mbaʼéichapa Jehová okuida ha oprotehe chupekuéra. Koʼãvape haʼe ndojapói vaʼekue ijoguaháramo ha ndorekói pe kapasida oadora hag̃ua chupe. Upévare ñapensávo ko mbaʼére jahechakuaáta mbaʼeichaitépa Jehová okuidáta avei ñanderehe (Mat. 6:​25-32). Iporãta avei jajepyʼamongetáramo mbaʼépa Jehová ojapóma isiervokuéra rehehápe. Por ehémplo, ñahesaʼỹijóramo peteĩ personáhe bíblico, jahecháta mbaʼéichapa Jehová oñangareko vaʼekue umi isiervokuéra iñeʼẽrendúvare. Avei ikatu jalee umi ermanokuéra experiénsia ko tiempopegua. a Ñapensakuaa avei mbaʼéichapa Jehová okuidáma ñanderehe ha ñañeporandu: ¿Mbaʼéichapa Jehová chepytyvõ kuri aikuaa hag̃ua chupe? (Juan 6:44). ¿Mbaʼéichapa haʼe okontestáma che ñemboʼe? (1 Juan 5:14). ¿Mbaʼéichapa káda día chepytyvõ Jesús sakrifísio porãite? (Efes. 1:7; Heb. 4:​14-16, nóta).

7. ¿Mbaʼéichapa proféta Daniel experiénsia omombarete raʼe Vanéssape anivéma hag̃ua okyhyje?

⁷ Peteĩ ermána oikóva Haitípe hérava Vanessa ohasa peteĩ situasión ijetuʼuetereíva. b Peteĩ díape, peteĩ karai ivarriopegua ohenói ha omensahea chupe káda día heʼívo chupe oipotaha oiko chugui inóvia. Vanessa katu heʼi porã chupe ndoaseptamoʼãiha upéva. Péro pe karai ipochy ha oamenasa voi chupe ojapotaha hese álgo ivaíva. Vanessa heʼi okyhyjeterei hague. ¿Mbaʼépa oipytyvõ raʼe chupe anivéma hag̃ua okyhyje? Haʼe ojapo la ikatumíva entéro ojekuida hag̃ua. Avei peteĩ ansiáno oipytyvõ chupe oñekontakta hag̃ua umi polisiándi. Avei Vanessa opensa mbaʼéichapa Jehová okuidáma kuri isiervokuéra yma guarére. Haʼe omombeʼu: “Primeroite voi ou chéve che akãme proféta Daniel rembiasakue. Haʼe ningo ndojapói vaʼekue ivaíva, upéicharõ jepe oñemombo chupe peteĩ yvykua guasúpe, umi león vareʼa apytépe. Péro Jehová okuida kuri hese. Upévare añemboʼe Jehovápe haʼete tosolusiona upe provléma ahasáva hína. Upe rire ndakyhyjevéima” (Dan. 6:​12-22).

¿MBAʼÉPA OJAPO KOʼÁG̃A JEHOVÁ?

8. ¿Mbaʼépa David oikuaa porã kuri? (Salmo 56:8).

⁸ David ojapeligra kuri oĩrõ guare Gátpe. Upéicharõ jepe, ndohejái vaʼekue ipuʼaka hese umi mbaʼe omongyhyjéva chupe. ¿Mbaʼérepa? Pórke haʼe ojesareko umi mbaʼe Jehová ojapóvare hína hesehápe upe moméntope. David avei oñandu mbaʼéichapa Jehová ogia ha oprotehe kuri chupe, ha oikuaaha mbaʼéichapa haʼe oñeñandu (elee Salmo 56:8). Davídpe avei oipytyvõiterei ha omokyreʼỹ vaʼekue iñamígo Jonatán ha pe súmo saserdóte Ahimélec (1 Sam. 20:​41, 42; 21:​6, 8, 9). Ha jepe rréi Saúl ojukase kuri oikóvo chupe, David ojesalva chugui. Upévare haʼe opilla porã Jehová ontendeha umi mbaʼe haʼe ohasáva ha mbaʼéichapa oñeñandu.

9. ¿Mbaʼépa ohecha ha oñandu Jehová ñanderehe?

⁹ Oiméramo jahasa hína peteĩ situasión ijetuʼúva ha upéva káusare ñañepyrũ jakyhyje, ñanemanduʼákena Jehová ohechapaiteha la jahasáva ha oikuaaha mbaʼéichapa ñañeñandu. Por ehémplo, Jehová ndahaʼéi oikuaánteva umi israelita oñemaltrata hague Egíptope, síno oñandu avei “mbaʼeichaite pevépa ohasa asy” hikuái (Éx. 3:7). David katu opurahéi vaʼekue heʼívo Jehová ohecha hague ‘mbaʼeichaitépa haʼe ohasa asy’ ha ‘oiko oñelamenta’ (Sal. 31:7).  Ha Jehová ohechárõ guare mbaʼéichapa ipuévlo osufri hembiapo vaikuére, “haʼete voi haʼe la osufríva” (Is. 63:9). Upéicharõ, oiméramo jakyhyje hína, ñanemanduʼákena Jehová ontendeha mbaʼéichapa ñañeñandu ha oĩha ñanepytyvõ hag̃uáicha anivéma hag̃ua jakyhyje.

10. ¿Mbaʼérepa ñaimekuaa segúro Jehová ojepyʼapyha ñanderehe ha añetehápe ñanepytyvõseha hína?

¹⁰ Ikatu hína jahasa peteĩ situasión ijetuʼúva ha upéva káusare ndajahechái mbaʼéichapa Jehová ñanepytyvõ. ¿Mbaʼépa ikatu jajapo? Jajerurekuaa chupe tohechauka ñandéve mbaʼéichapa Haʼe ñanepytyvõ hína (2 Rey. 6:​15-17). Upéi ikatu jajepyʼamongeta: ¿Oĩpa peteĩ diskúrso térã peteĩ komentário chemombarete vaʼekue? Térã jaleévo peteĩ puvlikasión, ñahendúvo peteĩ kántiko o jahechávo peteĩ vidéo, ¿mbaʼéichapa upéva ñanepytyvõ raʼe? Ikatu voi peteĩ ermáno omeʼẽ ñandéve peteĩ konsého térã ñanekonsola umi mbaʼe heʼíva rupive, ¿mbaʼéichapa ñanepytyvõ avei raʼe upéva? Koʼã mbaʼégui ningo ndahasyiete la ñanderesarái hag̃ua, upéva oikóramo ndajahechamoʼãi mbaʼeichaitépa ñanderayhu ñane ermanokuéra ha Jehová. Péro añetehápe koʼã rregálo porãite ou hína Jehovágui (Is. 65:13; Mar. 10:​29, 30). Umíva añetehápe ohechauka Jehová ojepreokupaitereiha ñanderehe ha ikatuha jajerovia hese (Is. 49:​14-16).

11. ¿Mbaʼépa oipytyvõ Áidape anivéma hag̃ua okyhyje?

¹¹ Aida ningo oiko Senegálpe, ha haʼe ohechakuaa mbaʼéichapa Jehová oipytyvõma kuri oikóvo chupe. Haʼe rupi la majór, ituakuéra oipota ogana heta pláta ikatu hag̃uáicha oñemantene ijupe ha avei chupekuéra. Péro upéi haʼe oiko sensillomie ikatu hag̃uáicha ojapo iprekursorádo, ha ou saʼivéma ohupyty la pláta. Upeichakue ifamília ou ipochy ha oñeʼẽ vai hese. Haʼe omombeʼu: “Añepyrũ akyhyje ndaikatumoʼãvéima haguére aipytyvõ che tuakuérape ha oñeñeʼẽ vaipárõ g̃uarã cherehe. Avei akulpa voi Jehovápe ivai haguére la situasión”. Péro upéi Aida ohendu peteĩ diskúrso rreunionhápe, ha heʼi: “Pe diskursánte oremomanduʼa ha oreanima heʼívo oimeraẽ mbaʼe jahasáva ha ñandejopýva, Jehová oikuaapaiteha. Mbeguekatúpe, umi ansiáno ha ermanokuéra ajúda rupive, añandu Jehová cherayhuha. Upévare añemboʼévo Jehovápe ajeroviavéntema chepytyvõtaha, ha apyta tuichaiterei chepyʼaguapy ahechávo oñekontestaha che  ñemboʼe”. Tiémpo rire, Aida okonsegi itraváho oipytyvõva chupe osegi hag̃ua kómo prekursóra, péro ndahaʼéi upévante, síno ikatútava avei opermiti chupe omantene ituakuérape ha oipytyvõ ótrope. Haʼe heʼi: “Koʼág̃a aaprendéma ajerovia mbarete hag̃ua Jehováre, ha añemboʼe rire chupe, opa jepi umi mbaʼe chemongyhyjéva”.

¿MBAʼÉPA JEHOVÁ OJAPÓTA KOʼẼRÕITE ÑANDEREHEHÁPE?

12. Heʼiháicha Salmo 56:​9, ¿mbaʼe rehepa oĩ kuri segúro David?

¹² (Elee Salmo 56:9). Ko versíkulo ohechauka mbaʼépa oipytyvõ avei kuri Davídpe anivéma hag̃ua okyhyje. Jepe haʼe osegi gueteri ojapeligra kuri, ojepyʼamongeta mbaʼépa Jehová ojapóta hesehápe koʼẽrõite. David oikuaa porã Jehová orreskatataha chupe itiempoitépe. Hiʼarive Jehová heʼíma voi Davídpe haʼe haʼetaha pe sigiénte rréi de Israel (1 Sam. 16:​1, 13). Upéicha rupi Davídpe g̃uarã umi mbaʼe Jehová heʼíva katuete oñekumplíta.

13. ¿Mbaʼérepa jajeroviakuaa umi mbaʼe Jehová heʼívare?

¹³ ¿Mbaʼépa opromete ojapotaha Jehová ñanderehehápe? Añetehápe nañahaʼarõi ñandeprotehe entéro provlémagui. c Péro tahaʼe haʼéva umi provléma jahasáva ko múndope, Jehová koʼẽrõite oipeʼapaitéta umíva pe múndo pyahúpe (Is. 25:​7-9). Ñande Ru ñanderayhuetéva ningo ipoderosoiterei. Haʼe koʼẽrõite oipeʼáta opaichagua mbaʼasy, omoingove jeýta umi omano vaʼekuépe ha ohundíta umi mbaʼe vai apohápe (1 Juan 4:4).

14. ¿Mbaʼe rehepa ikatu jajepyʼamongeta?

¹⁴ Oiméramo ñañepyrũ jakyhyje, iporãta jajepyʼamongeta umi mbaʼe Jehová ojapótavare koʼẽrõite. Ñañeimahinamína mbaʼeichaitépa jaikóta koʼẽrõite Satanás ndaiporivéi vove, ndaiporivéi vove hénte iñañáva ha oĩ vove umi hénte ipyʼaporãva añoite, ha jahecha vove káda día ñandeperfektoha jahávo. Peteĩ aty guasu tres diaguápe, oiko vaʼekuépe áño 2014-pe, ojehechauka peteĩ demostrasiónpe mbaʼéichapa ikatu jajepyʼamongeta ñane esperánsare. Peteĩ túa oñemongeta ifamíliandi mbaʼéichapa jaikóta pe paraísope oñekambiáramo umi mbaʼe ojeʼéva 2 Timoteo 3:​1-5-pe. Upépe heʼíta: “Pe múndo pyahúpe siémpre ojevyʼaitereíta. Pórke umi hénte ojepyʼapýta ojuehe, omombaʼéta pe añetegua, noñembotuichamoʼãi, iñumíldeta, omombaʼeguasúta Ñandejárape, iñeʼẽrendúta ituakuérape, ijagradesídota, nombotavymoʼãi hapichápe, ohayhuetereíta ihéntepe, oiko porãséta ótrondi, oñeʼẽ porãta ótrore, ojejokokuaáta, ivuénota, ohayhúta umi mbaʼe iporãva, ikatúta ojejerovia hese, oñeñeʼẽkuaáta hendive, nopensamoʼãi haʼe iñimportanteveha ótrogui, ohayhúta Ñandejárape ojapo rangue chupe ogustávante, añetehápe oservíta Ñandejárape, ha esegíkena ejeheʼa koʼãichagua héntere”. ¿Ndépa reñemongetámava ne famíliandi térã ermanokuérandi mbaʼéichapa jaikóta pe múndo pyahúpe?

15. ¿Mbaʼépa oipytyvõ ermána Tániape anivéma hag̃ua okyhyje?

¹⁵ Peteĩ ermána oikóva Macedonia del nórtepe, hérava Tania, ohasa peteĩ situasión ijetuʼúva. Ituakuéra oñemoĩ mbarete hese ostudia rupi la Biblia. Péro haʼe siémpre opensa meme pe Jehová ojapótavare koʼẽrõite hesehápe, ha péva oipytyvõ chupe anivéma hag̃ua okyhyje. Haʼe omombeʼu: “Ajepyʼapy umi mbaʼe ikatúvare oiko cherehe ha oiko voi katu. Che sy chembyepoti aju rire káda rreunionhágui. Hiʼarive che tuakuéra cheamenasa chejukávo oikóramo chehegui testígo de Jehová”. Upéi Tániape oñemosẽ hógagui. ¿Mbaʼéichapa haʼe orreaksiona? Haʼe heʼi: “Añeimahina mbaʼeichaitépa avyʼáta opa árare asegíramo chefiél. Avei apensa  meme mbaʼéichapa Jehová omyengoviapaitéta chéve umi mbaʼe aheja vaʼekue ko múndo añáme, ha koʼẽrõitéma opataha umi mbaʼe ñanembosufríva”. Tania osegi rupi ifiél ha Jehová rupive otopa moõpa ikatu oiko. Koʼág̃a haʼe omendáma peteĩ ermáno ifiélvare ha oñondive vyʼápe oservi Jehovápe de tiémpo kompléto.

EJEROVIA MBARETÉKENA KOʼÁG̃A JEHOVÁRE

16. ¿Mbaʼépa ñanepytyvõta jasegi hag̃ua ñandepyʼaguasu oñekumpli vove pe profesía de Lucas 21:​26-28?

¹⁶ Ñaimévo pe jehasa asy guasúpe, “umi hénte odesmajáta pórke okyhyjeterei”. Péro Ñandejára puévlo osegíta ojepytaso mbarete ha ipyʼaguasu (elee Lucas 21:​26-28). ¿Mbaʼérepa ikatu jaʼe upeichataha? Pórke ñaaprendéma ikatuha ñakonfia Jehováre. Tania, pe ermána ñañeʼẽ hague, omombeʼu umi mbaʼe ohasa vaʼekue osegiha oipytyvõ chupe ogueropuʼaka hag̃ua ótro provléma. Haʼe omombeʼu: “Aaprende ndaiporiha situasión Jehová ndaikatumoʼãiva osolusiona ha oĩha ñanepytyvõ hag̃uáicha”. Haʼe heʼive: “Oiméramo ñapensa umi hénte ko mundopegua oiko porãha ha okontrolaha entéro mbaʼe, ndahaʼéi hína upeichaite. Jehová ipoderosove chuguikuéra. Ha oiméramo jahasa peteĩ pruéva ijetuʼúva, katuete opáta hína”.

17. ¿Mbaʼépepa ñanepytyvõ pe téxto ko áño 2024-pe g̃uarã? (Ehecha pe taʼanga oĩva pe rrevísta apére).

¹⁷ Koʼág̃arupi normál la jakyhyje. Péro ojapo haguéicha David, ndajahejái vaʼerã ipuʼaka ñanderehe umi mbaʼe ñanemongyhyjéva. Pe téxto áño 2024-pe g̃uarã haʼe peteĩ orasión David ojapo vaʼekue Jehovápe, heʼívo: “Sapyʼánte akyhyje, upéicha jave asegínte ajerovia nderehe” (Sal. 56:3). Upévare, peteĩ expérto oñeʼẽvo ko versíkulore heʼi: “David ndoikói vaʼekue opensa umi mbaʼe omongyhyjévare chupe térã iprovlemakuérare. Upéva rangue haʼe ojerovia pe ikatúvare osalva chupe”. Upévare ñapensa memékena pe téxto ko áñope g̃uarãre umi mése oúvape. Jajepyʼamongeta hese, koʼýte oiméramo jahasa peteĩ situasión ijetuʼúva. Ñañemotiémpo jajepyʼamongeta hag̃ua umi mbaʼe Jehová ojapo vaʼekuére yma, ojapóvare hína koʼág̃a ha umi mbaʼe ojapótavare amo gotyove. Péicha ikatúta jaʼe David heʼi haguéicha: ‘Ndakyhyjéi pórke ajerovia Ñandejárare’ (Sal. 56:4).