1. Beni n sɔi ti saŋa ase’a dabeem ni tara tɔ?

 SAŊA ase’a, dabeem ta’an tara tɔ. Ge ton zamesɛ Baabule la zuo, dabeem ka le tara tɔ la kum, la kolekpabɛ’ɛsi la sɛla n wan eŋɛ beere sa’am. To kɔ’ɔn bɔna la sansɛka ti ‘yɛla n tari dabeem’ bɔna, maɣesɛ wuu zaberɛ, tuunfɛ’ɛsa la bã’asi. (Lu. 21:11) To ta’an tara dabeem la kpɛ’ɛndoma n wan mɛlesa tɔ bii to yidoma sɛba n yaɛ tɔ yelemɛŋɛrɛ pu’usegɔ zuo. Nɛreba basɛba fabeli ti ba kan ta’an ŋmibe yelese’a n paari ba nananawa bii yelese’a n wan ta paɛ ba beere sa’am la.

2. Tɔɣɛ pa’alɛ lan yuun ani David se’em eŋa n yuun boi Gat tiŋa la.

² Dabeem yuun tari David mɛ saŋa ase’a. Makerɛ, Naba Saul yuun eeri la David ti a ku ge a yuun zɔ keŋɛ la Gat tiŋa n boi Filisti. Gat naba Akis yuun baŋɛ ti David yuun dela zabezabera ti ba pɛɣera en ti a ku la Filistidoma ‘tusa pia.’ Bala n yuun basɛ ti ‘dabeem tara’ David. (1 Sa. 21:​10-12) A yuun fabeli la naba Akis n wan eŋɛ en se’em. David yuun eŋɛ la wani nyaŋɛ a dabeem la?

3. Wuu Yooma 56:​1-3, 11 n pa’alɛ se’em la, David yuun eŋɛ la wani nyaŋɛ a dabeem la?

³ Yooma 56 tɔɣɛ pa’alɛ lan yuun ani David se’em eŋa n yuun boi Gat tiŋa la. Bilam pa’alɛ la dabeem n yuun tari David se’em la eŋa n yuun eŋɛ sɛla ta’an nyaŋɛ a dabeem la. Dabeem n yuun tari David la, a yuun dekɛ amea delum la Yehowa. (Kaalɛ Yooma 56:1-3, 11.) A sakerɛ la yuun ka basɛ yoo. Yehowa yuun boi David la yɛm ti a eŋɛ sɛla n boi de to’ore. A yuun eŋɛ wuu a zalɛ mɛ la ti la me  yuun soŋɛ en! Naba Akis yuun nyaa baŋɛ ti David kan ta’an eŋɛ en sɛsɛla. Bala zuo a yuun basɛ David mɛ.—1 Sa. 21:13–22:1.

4. To wan eŋɛ la wani ta’an dekɛ tomea delum Yehowa soŋa? Bo makerɛ.

⁴ Tomam me san dekɛ tomea delum Yehowa, to wan ta’an nyaŋɛ to dabeem la. Ge to wan eŋɛ la wani ta’an dekɛ tomea delum Yehowa soŋa yele yele wuu dabeem san tara tɔ? Geele makerɛ wa bisɛ. Ho san ta baŋɛ ti ho tari la bã’a, pɔsega la dabeem ta’an tara hɔ. Ge ho san mina ti ho dɔgeta la wan ta’an tibɛ hɔ, la wan ana ho la mama. Daanse’ere a tabelɛ tibɛ nɛresɛba n tari bãkaŋa taaba mɛ. A kelese ho la soŋa ti ho bɔkɛ ti a sirum mi lan ani ho se’em mɛ. A me ta’an pa’alɛ hɔ tisebo n nyaŋɛ tibɛ basɛba. Bala mea, to san ti’isa Yehowa n puɣum eŋɛ sɛla, eŋa n kelum ita sɛla nananawa la eŋa n wan ta eŋɛ sɛla beere sa’am, la wan basɛ ti to dekɛ tomea delum en soŋa. David yuun eŋɛ la bala. To san gɛɛla yelese’a ti a yuun gulesɛ ti la bɔna Yooma 56 la, ti’isɛ bisɛ hon wan eŋɛ se’em dekɛ homea delum Yehowa soŋa ta’an nyaŋɛ ho dabeem la.

YEHOWA PUƔUM EŊƐ LA BEM?

5. David yuun ti’isɛ taɣesɛ la bem ta’an nyaŋɛ a dabeem la? (Yooma 56:​12, 13)

⁵ La boi bim ti David vom yuun kelum bɔna la dɛŋa poan ge a yuun ti’iseri la Yehowa n yuun puɣum eŋɛ sɛla. (Kaalɛ Yooma 56:12, 13.) David yuun kɔ’ɔn ti’isa la bala saŋa woo. Makerɛ, saŋa ase’a a yuun ni ti’isa taɣesa la Yehowa naaŋɔ lɔɣɔrɔ. Bala yuun tiɛ en ti a baŋɛ ti Yehowa tari la paŋa n ka tari makerɛ ge me ti’isa asaaleba yele. (Ym. 65:6-9) David me yuun le ti’isa taɣesa la Yehowa n puɣum eŋɛ sɛla bo nɛreba. (Ym. 31:19; 37:25, 26) A me yuun kɔ’ɔn ti’isa taɣesa la yelese’a ti Yehowa puɣum eŋɛ bo eŋa mea la. Kɔ’ɔn pɔsɛ David bunbilemen ti Yehowa yuun tɛ’ɛla ge soŋera en. (Ym. 22:9, 10) Yeen bisɛ David n yuun ti’isɛ taɣesɛ la, n yuun basɛ ti a dekɛ amea delum Yehowa soŋa se’em!

6. Dabeem san tara tɔ, bem n wan soŋɛ tɔ ti to dekɛ tomea delum Yehowa?

 ⁶ Dabeem san tara hɔ, soke homea yeti, ‘Yehowa puɣum eŋɛ la bem?’ Ti’isɛ taɣesɛ a naaŋɔ lɔɣɔrɔ la. Makerɛ, Yehowa ka naam niisi la mɔpuuro a wɔ̃nɛ poan, a me ka naam ba ti ba pu’usa en. Ge to san ti’isa taɣesa Yehowa n biseri ba se’em la, la basɛ ti to me tara sakerɛ ti Yehowa me wan bisa tɔ. (Mt. 6:25-32) Le ti’isɛ bisɛ Yehowa n puɣum eŋɛ sɛla bo a yamesi. Ho ta’an kaalɛ Baabule poan nɛreba basɛba n yuun eŋɛ pa’alɛ ti ba tari sakerɛ bii zina beere wa mabiisi n pu’usɛ Yehowa se’em yele. a Leyɛ’ɛsa, ti’isɛ taɣesa Yehowa n puɣum bisa ho se’em. A eŋɛ la wani basɛ ti ho baŋɛ yelemɛŋɛrɛ la? (Yon 6:44) A lebese ho zusega la wani? (1 Yo. 5:14) A Dayɔba’arɛ la lua bunɔ la soŋeri hon la wani dabeserɛ woo poan?—Ep. 1:7; Heb. 4:​14-16.

7. Nɔdɛ’ɛsa Daniel yele la yuun soŋɛ Vanessa la wani ti a ta’an nyaŋɛ a dabeem la?

⁷ Yele n yuun paɛ mabipɔka Vanessa b n ze’ele Haiti ti dabeem yuun tara en. Buraa ayima n yuun boi ba gingilega la poan ni kɔ’ɔn yi’ira en ge tɛɣesera en ti a boti en mɛ. Ge Vanessa ni kɔ’ɔn zaɣesɛ mɛ. Ge buraa la sunsɔa yuun nyie mɛ ti a yele en yeti a san ka sakɛ a wan baŋɛ. Vanessa yeti, “Mam paleŋa n yuun ɛ̃kɛ.” A yuun eŋɛ la wani ta’an nyaŋɛ a dabeem la? A yuun tiregɛ bisɛ la eŋa n wan eŋɛ se’em ta’an gu amea. Keema ayima n yuun soŋɛ en ti a keŋɛ ta yele pulesi. Ge a me yuun ti’isɛ taɣesɛ la Yehowa n yuun soŋɛ a yamesi se’em diimi sa. Vanessa yeti, “Mam yuun kɔ’ɔn ti’isa la nɔdɛ’ɛsa Daniel yele. Ba yuun lobe en basɛ la gbeɣema boko poan la boi bim ti a yuun ka tum be’em. Ge Yehowa yuun te’ele en mɛ. Mam yuun le yele Yehowa ti a soŋɛ mam yele wa poan. Mam n yuun zusɛ ba’asɛ la, dabeem yuun ka le tara mam.“—Da. 6:​12-22.

YEHOWA ITI LA BEM NANANAWA?

8. David yuun mi la bem soŋa soŋa? (Yooma 56:8)

⁸ La boi bim ti se’em ma’a ti David yuun bɔna Gat tiŋa la, a vom yuun boi la dɛŋa poan paa. Ge a yuun ka basɛ ti a puti’irɛ bɔna yelese’a n basɛ ti dabeem tara en poan. Ge a yuun tuɣum ti’isa la yelese’a ti Yehowa ita bɔ’ɔra en sankaŋa la. David yuun baŋɛ ti Yehowa te’ele en mɛ, soŋera en ge me bɔkɛ lan ani en se’em. (Kaalɛ Yooma 56:8.) David zɔsoma n de wuu Yonatan la Malema Nɛŋadaana Ahimelek yuun soŋɛ en mɛ. (1 Sa. 20:​41, 42; 21:​6, 8, 9) La boi bim ti Naba Saul yuun kɔ’ɔn ɛɛra la David ti a ku en ge a yuun zɔ pĩɛ mɛ. A yuun mi soŋa soŋa ti Yehowa mi yelese’a n paari en la ge me mina lan ani en se’em.

9. Yehowa mi to za’a ge bɔkera to la wani?

⁹ Yeledaaaŋɔ san paɛ hɔ ti dabeem tara hɔ, tɛ̃ra ti Yehowa mi yeledaaŋɔ la n basɛ ti la ana ho se’em. Makerɛ, Yehowa yuun ka yeen nyɛ la ban mɛleseri Israeldoma la se’em Egypt tiŋa poan ge a yuun ‘mi ban nameseri se’em mɛ.’ (Yɛh. 3:7) David yuun yuum yeti Yehowa nyɛ lan ‘wuni’ en la a ‘suure n sa’am se’em’ mɛ. (Ym. 31:7) Hali Yehowa yamesi n yuun ka kɔ’ɛ ba puti’irɛ soŋa ti ba yuun namesa la, ‘ba daaŋɔ yuun dela a daaŋɔ.’  (Isa. 63:9) Dabeem san tara hɔ, Yehowa bɔkɛ lan ani hon se’em mɛ ge me kɔ’ɔn bɔta ti a soŋɛ hɔ ti ho nyaŋɛ ho dabeem la.

10. Beni n sɔi ti ho tara puti’irɛ ti Yehowa tɛ̃ri ho yele ge wan soŋɛ hɔ ti ho ŋmibe yeledaaŋɔ poan?

¹⁰ Yeledaaŋɔ san paɛ hɔ, daanse’ere ho paleŋa ta’an ɛɣera ti ho kan baŋɛ Yehowa n soŋeri ho se’em. Bala la, zusɛ en ti a soŋɛ hɔ ti ho baŋɛ eŋa n soŋeri ho se’em. (2 Na. 6:​15-17) Nyaa geele yele ana wa: Ba tabelɛ bo yetɔɣum bii lebesego tansugere zamesegɔ poan ti la kpemese ho giila? To gɔnɔ la, vidiyo bii tigere la yuuma ase’a kpemese hon giila? Nɛra tabelɛ yele ho sɛla bii kaalɛ gulesegɔ ti la buɣelɛ ho suure? To ta’an tamɛ to mabiisi la n nɔŋɛ to se’em, la ton nyɛti giilekpeŋere se’em Baabule la poan la. Ge ba za’a dela bo’olum ti Yehowa dekɛ bo to. (Isa. 65:13; Mr. 10:​29, 30) Bo’olum ana wa pa’alɛ ti Yehowa fabeli to yele mɛ. (Isa. 49:​14-16) La me pa’alɛ ti la nari ti to dekɛ tomea delum en.

11. Beni n soŋɛ Aida ti a nyaŋɛ a dabeem la?

¹¹ Aida n ze’ele Senegal yuun baŋɛ Yehowa n soŋɛ en se’em yeledaaŋɔ poan. Eŋa n de a dɔɣereba bikeema la, ba yuun bisɛ ti la nari ti a nyɛ ligeri zo’e zo’e bisa amea la bamam. Ge Aida n yuun basɛ ti a vom ana naana ti a ta’an tum sore ŋmɛ’a tuuma la zuo, a yuun ka tari ligeri zo’e. A yidoma sunsɔa n yuun nyie ti ba zɛregera en. A yeti, “Dabeem n yuun tari mam la mam n yuun ka ta’an bisera n dɔɣereba la ge ti’isa ti nɛra woo kan bɔta mam yele. Hali, mam yuun zɛregɛ Yehowa mɛ la yɛla n yuun ka keni soŋa bɔ’ɔra mam la. A yuun nyaa kelese la yetɔɣum zamesegɔ poan. “Yetɔɣumdaana la yuun tiɛ tɔ, ti to baŋɛ ti Yehowa mi sɛla woo n daani to la mɛ. Keendoma la, la mabiisi n yuun ka’ani mam ti mam ta baŋɛ ti Yehowa nɔŋɛ mam mɛ. Mam yuun zusɛ la Yehowa ge tara puti’irɛ ti a wan soŋɛ mam.” Pooren, Aida yuun nyɛ la tuuma bisera amea la a dɔɣereba la nɛreba basɛba me ge kelum dɛna sore ŋmɛadaana.  A yeti, “Mam nyaa kɔ’ɔn dekɛ n mea delum la Yehowa. Nananawa mam san zusɛ Yehowa, dabeem ka le tara mam.”

YEHOWA WAN TA EŊƐ LA BEM BEERE SA’AM?

12. Wuu Yooma 56:9 n pa’alɛ se’em la, David yuun tari puti’irɛ la bem poan?

¹² Kaalɛ Yooma 56:9. Gulesegɔ wa le basɛ ti to baŋɛ sɛla n yuun le soŋɛ David ti a nyaŋɛ a dabeem la. La boi bim ti a vom yuun boi la dɛŋa poan ge a yuun ti’isɛ taɣesɛ la Yehowa n wan ta eŋɛ sɛla bo en. David yuun mi ti Yehowa wan faaɛ en basɛ sansɛka n nari poan. Yehowa yuun puɣum yeti David n wan ta soe dɛna Israel naba. (1 Sa. 16:​1, 13) David yuun mi soŋa soŋa ti Yehowa pu’ulumbiŋ’a la wan sirum tum.

13. To tari puti’irɛ ti Yehowa wan eŋɛ la bem?

¹³ Yehowa yeti a wan eŋɛ la bem bo ho? To ka eeri ti a te’ele to yeledaaŋɔ woo poan. c Ge yeledaaŋɔ woo n paari hɔ tingɔŋɔ wa poan la, Yehowa wan ta yese a basɛ tinpaalega la poan. (Isa. 25:​7-9) To Naaŋɔdaana la tari paŋa n wan isige sɛba n ki la, tibɛ tɔ ge me sa’am sɛba woo n giisɛ to la.—1 Yo. 4:4.

14. To wan ta’an ti’isa taɣesa la bem?

¹⁴ Dabeem san tara hɔ, ti’isɛ taɣesɛ Yehowa n wan ta eŋɛ sɛla beere sa’am. Ti’isɛ bisɛ lan wan ta ana ho se’em ba san sa’am Sitaana la nɛrebɛ’ɛsi la za’a ti tontɔɔdoma ma’a bɔna ge ti to bɔŋa la tɛɛra fii fii dabeserɛ woo poan ta ana kasi. Yuun 2014 tinkãtɛ laɣesegɔ poan, ba yuun eŋɛ la itipa’alegɔ pa’alɛ ton wan ti’i’sa taɣesa to beere sa’am puti’irɛ la yele se’em. Sɔ la a deodoma yuun sɔsɛ pa’alɛ 2 Timoti 3:​1-5 yelesum la n wan ta tee se’em Paradiisi poan: ‘Tinpaalega la poan wan dɛna la pupeelum ma’a. Nɛreba wan nɔŋɛ ba tadaandoma, nɔŋɛ vo’osum yɛla, dɛna nɛremama, siregera bamea, pɛɣera Naayinɛ, nana dɔɣereba, mina nɛreba guŋerɛ, tara yelemɛŋɛrɛ, tara giile bɔ’ɔra ba suurɔ, nana bɔ’ɔra, pɛɣera nɛreba, nyɔkera bamea, ka ita gbire gbire, nɔŋɛ som, dɛna nɛrezura, kɔ’ɔn ka ze’a kankaŋi, eŋɛ bamea naana, nɔŋɛ Naayinɛ gana sɛla ti ba bɔta, tara pu’usegɔ n di mi’a; nɛreba wan ana tapilapi la yele ana wa.’ Hon la ho deodoma bii mabiisi ni sɔsɛ vom n wan ta ana se’em tinpaalega la poan?

15. La boi bim ti dabeem n yuun tari Tanja ge beni n yuun soŋɛ en ti a nyaŋɛ a dabeem la?

¹⁵ Mabipɔka Tanja n ze’ele North Macedonia yuun ti’isɛ taɣesɛ la beere sa’am kã’a la ta’an nyaŋɛ a dabeem. A dɔɣereba yuun kɔ’ɔn ze’a la kankaŋi giisa en ti a da zamesɛ Baabule la. A yeti: “Yelese’a ti mam yuun zɔta dabeem ti la wan eŋɛ la, yuun sirum eŋɛ mɛ. Mam yuun san ni keŋɛ zamesegɔ woo, mam ma yuun ni ŋmɛ mam mɛ. Mam dɔɣereba yuun vuuse mam ti n san dɛna Yehowa Sɛɛradaana, ba wan ku mam.” Pooren, ba yuun sa’ɛ Tanja mɛ ba yire. A yuun eŋɛ la wani? A yeti: “Mam yuun ti’isɛ la mam n wan ta tara pupeelum daarewoo se’em la mam n tari n birikinte la. Mam le ti’isɛ la Yehowa n wan kã bo mam se’em tinpaalega la poan ti la gaŋɛ yelese’a woo ti mam wan koŋe tingɔŋɔ wa poan, la Yehowa n wan yese yelebe’ero woo basɛ se’em la.” Tanja yuun kɔ’ɔn tara la birikinte. Yehowa yuun soŋɛ en mɛ ti a nyɛ zɛ’an kɛ̃’ɛra. Nananawa, Tanja ele la mabia ti  ba tuna daarewoo sore ŋmɛ’a tuuma la ti ba puurɛ pee.

BASƐ TI HO SAKERƐ KPE’EM NANANAWA

16. Bem n wan soŋɛ tɔ ti to kelum tara sukpe’ene to san nyɛ ti yelese’a n boi Luke 21:​26-28 la sirum tum tuuma?

¹⁶ Mɛlesekãtɛ la poan, ‘dabeem wan basɛ ti nɛreba lige.’ Ge Naayinɛ nɛreba wan ze’a kankaŋi ge tara sukpe’ene. (Kaalɛ Luke 21:​26-28.) Beni n sɔi ti dabeem kan ta tara tɔ? Se’ere n sɔi la to puɣum zamesɛ baŋɛ ton wan eŋɛ se’em ta’an dekɛ tomea delum Yehowa. Tanja ti to puɣum tɔɣɛ a yele la yeti yelese’a n yuun paɛ en la soŋɛ en mɛ ti a ŋmibera biɣi biɣi poan. A yeti: “Mam zamesɛ baŋɛ ti yele ka boi ti Yehowa kan nyaŋɛ soŋɛ tɔ ti to ŋmibe de poan ge me kã bo to. Saŋa ase’a, la ta’an ana wuu nɛreba n pɛ̃regeri yɛla ge yelemɛŋɛrɛ la dela Yehowa n bo ba yɔ’ɔ ti ba bɔna. La ta’an kpe’em bo to gurebisɛ poan ge la wan ba’asum ba’asɛ.”

17. To yuun 2024 yetɔɣum zuo la wan soŋɛ to la wani? (Bisɛ gɔŋɔ wa nɛŋa foote.)

¹⁷ Tomam n de asaaleba la zuo dabeem ta’an tara tɔ. Ge wuu David la, to kan basɛ ti dabeem nyaŋɛ tɔ. To yuun 2024 yetɔɣum zuo la dela David n yuun zusɛ Yehowa se’em la: ‘Dabeem san tara mam, mam ni dekɛ n mea delum la hon.’ (Ym. 56:3) Baabule gɔnmi’ila ayima yuun tɔɣɛ gulesegɔ wa yele yeti, David “yuun ka ugeri a dabeem la bii a ze bisera yelese’a n paari en la ge a puti’irɛ yuun boi la mina n wan Faaɛ en basɛ la poan.” Ti’isa to yuunɛ wa yetɔɣum zuo la ŋmarese’a n keni na wa, yele yele wuu yɛla san ta paara hɔ ti dabeem tara hɔ. Nyɛ saŋa ti’isa taɣesa Yehowa n yuun eŋɛ sɛla diimi sa, nananawa la beere sa’am. Ho san ita bala, wuu David la ho nyaa wan yeti: ‘Mam dekɛ n mea delum la Naayinɛ ti dabeem ka tara mam.’—Ym. 56:4.