1. ¿Ñobätä ruäre ngwane kä jürä raba nemen nibätä?

 NI JÖKRÄBÄTÄ ruäre ngwane kä jüräta nemen. Akwa, Biblia tä mike gare nie nikwe ñaka nitre krütanina, chokalitre o kä ja känenkäre ye jürä ngwandre jabätä. Akwa, nita nüne jondron krubäre rabai nakainkä näire. Ye medenbätä, kukwe ne kwrere tuin nie: rü, ja nuainta tare aune bren krubäte (Luc. 21:11). Nitre ruärebätä abokän gobran, mräkätre o nitre mada käkwe ja mikadre rüere tätre kukwe metre mike täte yebätä, ye jürä bätätre. Mada abokän, kukwe tare ben ja tuai kwetre gwäune o ja känenkäre ye ben kä rükai ietre o ño ye jüräta nemen bätätre.

2. ¿David namani kä Gat yekänti ngwane, dre namani bare?

² Ni iti Ngöbö mikaka täte bätä kä jürä namani yebätä ani töbike. Ye abokän David. Rei Saúl nämäne näin niara jiebiti murie ketakäre ye ngwane, ngitiani kä nitre filisteokwe kädekata Gat yete. David ye abokän ni rükä dite krubäte aune nitre kwati filisteo murie ketani kwe niebare rei Akís, kä Gat ie, namaninta gare David ie ngwane, “kä jürä namani krubäte” Davidbätä (1 Sam. 21:​10-12). Rei raba dre nuainnebätä yebätä nämäne töbike krubäte. Akwa, ¿Davidkwe dre nuainbare kä jürä ye ganainkäre?

3. ¿Dre David dimikani kä jürä ganainne mikata gare Salmo 56:​1-3, 11 yebätä?

³ David nämäne juta Gat yekänti ngwane, ja namani ruin ño ie ye mikani gare kwe Salmo 56 yete. Salmo yete ñobätä kä jürä namanibätä aune drekwe dimikani kä jürä ye ganainne ye mikani gare metre ta kwe. Niarakwe tö ngwani kwatibe Jehovai (ñäkädre Salmo 56:​1-3, 11 yebätä). a Kukwe diani nuaindre Davidkwe  ye namani kwin krubäte. Jehová köböire, Davidkwe ja töi mikani kukwe ñan nuainbare kwe kwrere nuainne. Ye abokän, kä ngwarbe niara dokwäbiti ye kwrere ja bämikani kwe, ye köböire kukwe kwin namani bare. Yebätä niara jürä namani krubäte rei Akisbätä, akwa biti mada niara ja bämikani yebätä ngwarbe nämäne nike kwrere mikani tuin kwe jai. Ye käkwe David dimikani ngitie (1 Sam. 21:​13–22:1).

4. ¿Nita tö ngwen Jehovai ye mika raba ño bäri dite? Mä raba mike gare kukwe keteitibiti.

⁴ Nita tö ngwen Jehovai ye raba ni dimike kä jürä ye ganainne arato. Akwa nita tö ngwen Jehovai, ¿ye ni raba mike ño bäri dite kä jüräta nemen nibätä ye ngwane? Ani bämike kukwe keteitibiti. Bren tare kwandre nibätä ye mikadre gare nie ngwane, bengwairebe kä jürä raba nemen nibätä. Akwa nitre bren ne kwrere ye doctorkwe dimikanina rabadre gare nie ngwane raba ni töi mike jäme. Aune nengwane, tä ni kukwe nuin kwekebe aune ja ruin ño nie ye nüke gare ie raba nüke gare nie. Aune kräkä biandi kwe nie ye abokän käkwe nitre mada mikaninanta räre ye niedre kwe nie. Bäsi ye erere, Jehová tä nuainne: nikwe töbikadre dre nuainbare Jehovakwe, dre nuainta kwe aune dre nuaindi kwe ni kräke yebätä ngwane, tödeka nikwe rabai bäri dite. Ye erere nuainbare Davidkwe tä tikani Salmo 56 yebätä. Nikwe ja kitai bersikulo ruärebätä ngwane, kukwe ye raba tödeka nikwe mike ño bäri dite Jehovabiti aune kä jürä ye ganainne yebätä nikwe töbikadre.

¿JEHOVAKWE DRE NUAINBARE KIRA?

5. ¿Drebätä David töbikataribare kä jürä ganainkäre? (Salmo 56:​12, 13).

⁵ Ja nire Davidkwe ye nämäne kukwe kri te, akwa niarakwe ja töi mikani Jehovakwe dre nuainbarera yebätä (ñäkädre Salmo 56:​12, 13 yebätä). b Niara nünanbare ye ngwane, ne erere nuainbare bä kabre kwe. Ñodre, jondron dätebare Jehovakwe yebätä töbikataribare kwe ye ngwane Jehová dite aune ni tare kwe, nämäne nüke törö ie (Sal. 65:​6-9). Jehovakwe dre nuainbarera nitre mada kräke yebätä David  töbikataribare (Sal. 31:19; 37:​25, 26). Ne madakäre, Jehovakwe dre nuainbare kräke yebätä kä dianinkä kwe jai töbikatarikäre. David dimikani kwe aune kriemikani kwe nämäne chi ye ngwane (Sal. 22:​9, 10). David töbikataribare kukwe jökrä nebätä ye käkwe niara dimikani tö ngwen ja brukwä tätebiti Jehovai.

6. Kä jürä rabai nibätä ye ngwane, ¿dre käkwe ni dimikai tö ngwen Jehovai?

⁶ Kä jürä raba mäbätä ngwane, mäkwe kukwe ne ngwantari jai “¿Jehová dre nuainbarera kirabe?”. Aune mäkwe töbikatari jondron dätebare kwe yebätä. Ñodre, nikwe töbikadretari nukwä aune kriblü ye ñan niara erere aune ñan raba mike täte, akwa niarata ngübare yebätä ngwane, Jehová ni ngübadi ye ie nikwe tö ngwain bäri (Mat. 6:​25-32). Ne madakäre, nitre kädekateta Bibliabätä kirabe tö ngwanka ie ye dimikani ño kwe yebätä mäkwe töbikatari. Aune kä nengwane nitre niara mikaka täte ye tä ngübare ño yebätä arato. c Aune kirabe nükebe kä nengwane, niara tä mä ngübare ño yebätä mä töbikatari. Kukwe metre namani gare mäi, ¿ye mä dimikanina ño? (Juan 6:44). ¿Jehovakwe orasion mäkwe kukwe nuanina ño? (1 Juan 5:14). ¿Jehová Monso kwe juani ja nire bien ni kräke kä nebätä ye köböire dre kwin tä nemen mäkwe köbö kwatire kwatire? (Efes. 1:​7, TNM; Heb. 4:​14-16).

7. ¿Kukwe namani bare Ngöbö kukwe niekä Danielbätä yekwe Vanessa dimikani ño?

⁷ Meri testiko iti nünanka Haití kädekata Vanessa d ye nämäne ja tuin kukwe tare ben abokän nämäne kä jürä mikebätä. Ye abokän ni brare iti nünanka niara kenta nämäne kukwe tike ie aune kärere celularte ta aune niebare kwe ie rabadre nemen ja kukwe mukore ben. Akwa Vanessa käkwe ñakare niebare ie töi kwatibebiti. Ye medenbätä, niara namani bäri rubun aune Vanessa rä ötani kwe. ¿Dre käkwe Vanessa dimikani kä jürä ye ganainne? Niara ja töi mikani kukwe ruäre nuainne ja kriemikakäre aune ni umbre iti käkwe dimikani blite policía ben. Arato Jehovakwe nitre niara mikaka täte kira dimikani aune kriemikani yebätä ja töi mikani kwe. Niara tä niere: “Ni Ngöbö kukwei niekä kädekata Daniel ye rükaba käne ti töite. Daniel ñaka kukwe blo nuainbare, akwa niara kitani kwra lion nämäne mröi ye ngätäite, akwa ñaka kukwe tare namani bare bätä ñobätä ñan aune Jehovakwe kriemikani. Yebätä ti ja töi mikaba niere Jehovai: Jehová tikwe dre nuaindre ye erere tikwe nuainbarera yebätä ti dimike. Yete ja käne kä jürä ñan rababara tibätä mada” (Dan. 6:​12-22).

¿JEHOVATA DRE NUAINNE NENGWANE?

8. ¿Dre nämäne gare metre David ie? (Salmo 56:8).

⁸ David nämäne juta Gat ye ngwane, ja nire kwe ye nämäne kukwe tare te, akwa ye ñan aibätä kä jürä ngwani kwe jabätä. Ñakare aune ja töi mikani kwe Jehová nämäne niara ngübare ño yebätä. Jehová nämäne jie ngwen aune nämäne ngübare yebätä ja nämäne nemen ruin ño ie ye nämäne gare Jehovai ye nükani gare ie (ñäkädre Salmo 56:8 yebätä). e Ne madakäre, ja ketamuko kwe Jonatán aune sacerdote Ahimélec ye nämäne niara dimike yebätä ja töi mikani kwe metrere (1 Sam. 20:​41, 42; 21:​6, 8, 9). David kämika tö namani Saulkwe, akwa mrä mada niara ngitiani. Ja nämäne nemen ruin ño David ie, drebe nämäne ja tuin ye nämäne gare kwin Jehovai ye nükani gare ie.

9. ¿Ni itire itire yebätä dre gare kwin Jehovai?

 ⁹ Mätä ja tuin kukwe tare ben yebätä kä jüräta nemen mäbätä, akwa mäta ja tuin drebe aune ja ruin ño mäi ye nüke gare kwin Jehovai ye mä ngwan törö jai. Ñodre, nitre israelita nämäne Egipto yete, nämäne ja tuin kukwe tare aune ja tare nike ye nämäne gare kwin Jehovai (Éx. 3:7). David kansion keteiti tikabare yete niebare kwe “nita ja tare nike aune ja töibikare krubäte ye gare kwin Jehová ie” (Sal. 31:7). Ne madakäre, juta Ngöbökwe käkwe kukwe blo diani nuaindre jai yebätä nämäne ja tare nike krubäte, köböite nämänentre ulire krubäte ye ngwane Jehová “nämäne ulire arato” (Is. 63:9). Nita ja tare nike aune ja ruin ño nie ye nüke gare kwin Jehovai aune töita ni dimikabätä ye gare nie, ye tä ni töi mike jäme.

10. ¿Jehová töita mäbätä aune tä juto mä dimikakäre ye ñobätä mäta tö ngwen kwatibe ie?

¹⁰ Ne madakäre, nita ja tuin kukwe tare ben ye ngwane, kä jürä raba nemen nibätä aune Jehová tä ni dimike ño ye ñaka raba tuin nie. Ye ngwane, ¿nikwe dre nuaindre? Jehovata ni dimike ño ye mikadre tuin kwe nie ye ribedre ie (2 Rey. 6:​15-17). Biti kukwe ne ngwandretari jai: ¿Kukwe kädrieta o comentario bianta ye meden käkwe ti dimikanina? ¿Täräkwata, video o kansion käkwe ti dimikanina? ¿Ja mräkätre käkwe ti dimikanina texto ruärebiti aune kukwe niebare kwe tie ni töi mikakäre jäme? Mrö jökrä ja üaire bianta nie Jehovakwe aune ja mräkätre tä ja tare bämike nie ye metrere regalo ütiäte kite Jehovakri ruäre ngwane, nuäre käi kwitakakäre jabiti (Is. 65:13; Mar. 10:​29, 30, NGT). Regalo ütiäte bianta Jehovakwe nie ne tä bämike niara ye töita nibätä aune ni rabadre tö ngwen niara ie (Is. 49:​14-16).

11. ¿Dre Aida dimikani kä jürä ganainne?

¹¹ Meri testiko iti nünanka Senegal kädekata Aida ye nämäne ja tuin kukwe tare ben ye ngwane, Jehovakwe dimikani ño ye tuani kwe. Niara umbre ye medenbätä, rün kwe tö namani tuai sribire ja ngübare aune mräkätre kwe ngübakäre. Akwa niara kukwe ükaninte jai nünankäre jondron braibebiti rabakäre prekursora erere, aisete nämäne ngwian ganainne brai. Mräkätre kwe namani rubun kräke aune nämäne ñäkebätä. Niara ie ja namani ruin ño ye tä niere: “Ti ñan raba ti rün ngübare aune nitre jökrä ñaka rabai ti kai ngäbiti  ye jürä rababa tibätä. Kukwe tare aibe raba nemen bare yebätä ti rababa ngite kite Jehovabiti”. Akwa ja mräkä kukwe kädriebare ni jökrä ngwärekri ye käkwe niara dimikani, tä niere: “drebe nita ja tuin, ja ruin ño nie ye gare kwin Jehovai ye ja mräkä käkwe ngwanbata törö tie. Ne madakäre, nitre umbre aune ja mräkätre konkrekasionte ye nämä kukwe niere tie ye käkwe ngwanbätä törö tie Jehovakwe ti tare. Ti nämä orare Jehovai ye nämä kukwe nuin ye jutuaba tie ye käkwe ti dimikaba, bätärekä bätärekä tö ngwenta bäri aune ti töi mikaba jäme kwe”. Ye bitikäre, niara ie sribi kwani ye käkwe dimikani ja mike prekursora, mräkätre kwe dimike aune ja mräkätre mada dimike arato. Niara tä niere: “Bätärekä bätärekä, ti jatabata orare töi jämebiti Jehovai ye käkwe ti dimikaba kä jürä ganainne”.

¿DRE NUAINDI JEHOVAKWE JA KÄNENKÄRE?

12. Salmo 56:9 tä niere erere, ¿dre ie David nämäne tö ngwen metre?

¹² (Ñäkädre Salmo 56:9 yebätä). f Ja nire Davidkwe nämäne kukwe tare te ye ngwane, dre nuainbare kwe kä jürä ganainkäre ye texto ne tä mike gare nie: dre rabai bare ja känenkäre yebätä töbikataribare kwe. Aune Jehovakwe niara mikadi kwäre kä debe näre ye nämäne gare ie. Ne madakäre, Jehovakwe käbämikani niara rabai reire kä Israel känti (1 Sam. 16:​1, 13). Aune Jehová kukwe käbämikani ye mikai nemen bare kwe ye nämäne gare metre David ie.

13. ¿Dre nuaindi Jehovakwe ja känenkäre gare nie?

¹³ ¿Nengwane Jehovata dre käbämike nie? Kukwe tare ben nita ja tuin nengwane ye diainkä kwe ye ñan käbämikata kwe. g Akwa kukwe ñokwa ben nikwe ja tuai, ja känenkäre kä mrä yete kukwe tare ye jökrä diainkä kwe käbämikata kwe (Is. 25:​7-9). Metrere Jehová die tärä nitre mikakäreta nire aune ni bren mikakäreta räre, arato nitre ja mikaka ni rüere ye gaite jökrä kwe ye gare metre nie (1 Juan 4:4).

14. ¿Drebätä ni raba töbiketari?

¹⁴ Kä jürä raba mäbätä ngwane, mäkwe töbika Satana ñan rabaira yebätä, ñakare aune ni töi kwin aibe rabai aune bätärekä bätärekä ni töi jatai metre yebätä. Gätä kri 2014 yete kukwe bämikaba keteiti känti ja mräkä iti nämä blite mräkätre kwe ben 2 Timoteo 3:​1-5 yebätä aune kukwe ye abokän kukwe kwin käbämikata ye kwrere yebätä nämä blite: “Kä mrä ye näire ni jökrä nünain kä jutobiti. Ñobätä ñan aune, nitre rabai ni mada tarere; rabai kukwe ütiäte Bibliabätä tarere, ja töi mikai kwetre bobre, Ngöbö mikai täte kwe, rün kukwei mikai täte kwe, rabai debe bien aune ja ngwen metre, rabai ni mada mada tarere aune mräkätre kwe tarere, kukwe jökrä rabai nükebiti ietre, käre blitai kwin ni madabätä, rabai ja gobraine, ñaka ni madai nuaindi tare kwetre, kukwe kwin taredi kwetre, tö ngwan rabai ietre, ñaka rabai ja dikaire, ñaka rabai kukwe kä nebätä tarere, ñakare aune Ngöbö mikai täte metre kwetre. Ñan kämikaka nitre yebätä”. ¿Kä bä nuäre yete dre rabai bare yebätä mäta blite mä mräkätre yebe käre?

15. ¿Drekwe Tanja dimikani kä jürä ye ganainne?

¹⁵ Tanja nünanka Macedonia Ngwitärikri niara töbikataribare kukwe ja känenkäre yebätä ye käkwe dimikani kä jürä ganainne. Niarakwe niebare, jatani ja tötike Bibliabätä ye ngwane, rüntre namani rubun krubäte kräke, dre jürä nämänebätä ye erere namani barebätä: “Ti ñämä niken gätäbätä. Biti ti nämä nüketa gwi ye ngwane, ti meye nämä ti kwata mete. Ti rün aune ti meye käkwe nieba tie, ti ja mikai testiko ye ngwane ti kämikai kwe”. Mrä mada, niara juanintari gwi. ¿Dre nuainbare kwe mada?  Niara tä niere: “Tikwe ja ngwain metre Jehovai aune kä juto rabai kärekäre tikwe yebätä tikwe ja töi mikaba. Ne madakäre, kä nebätä dre riaite tikän akwa kä mrä yete jondron kwin rabai tikwe aune jondron käme tä ti töi nike ti töite ye Jehovakwe diainkä täte ye ti ñämä niere akwle jai”. Tanja ja ngwani metre Jehovai ye köböire kä kwani ie nünankäre. Nengwane ja mäkäninte kwe aune tä sribire muko kwe ben köbö täte te kä jutobiti.

TÖDEKA MIKADRE DITE NGWÄUNE

16. ¿Lucas 21:​26-28 tä kukwe niere ye rabai bare ngwane drekwe ni dimikai ñaka kä jürä ngwen jabätä?

¹⁶ Ja tare nikadi kri ye ngwane, “ni kwati rabadi nekwetekä krubäte amne kä rabadi nötöte bti”. Akwa ni Jehová mikaka täte käkwe ja ngwandi dite (ñäkädre Lucas 21:​26-28 yebätä). ¿Ñobätä ñaka kä jürä rabadi nibätä? Ñobätä ñan aune, käre ni tädi tö ngwen Jehovai. Tanja bätä kukwe namani bare ye tä dimike ja tuin kukwe mada yebe. “Metrere kukwe tare ñaka jire Jehová ketebätä ni dimikakäre aune kukwe kwin mikakäre nemen bare ni kräke ye gare ie. Aune jondron o kukwe jökrä ye gobrainta nitrekwe bä raba tuin akwa metrere Jehová tä tuenmetre kukwe nuainne ye erere tä nuainne. Kukwe tare krubäte ben nita ja tuin raba tuin nie akwa kä debe näre te Jehovakwe mikadi krüte”.

17. ¿Texto kä 2024 kräke ye raba ni dimike ño? (Üai kena täräkwatabätä mikadre ñärärä).

¹⁷ Kukwe tare aibe nemen bare kä tibien nebätä, abokän tä ni ngwen nikenkä, akwa nita ja ngwen David erere aune ñaka ja tuenmetre ganaindre kä jürä ie. Texto kä 2024 kräke ye abokän Davidkwe kukwe niebare Jehovai, känti nieta: “Kä jüräta nemen tibätä ngwane, tita tö ngwen mäi” Jehová (Sal. 56:3). Tärä kukwe känänkäre Bibliabätä käkwe kukwe ne mikani gare bersikulo nebätä: “David ñaka ja töi mikani kukwe nämäne nemen barebätä yebätä aune ñaka töbikabare krubäte kwe kä jürä ngwankäre jabätä, ñakare aune ja töi mikani kwatibe kwe nire raba niara mike kwäre yebätä”. Sö ja känenkäre yebätä mäkwe texto kä 2024 kräke ye ngwan törö jai aune mäta ja tuin kukwe tare ben ye ngwane bärira jire mä ngwan törö jai. Mäkwe kä dianka jai töbikakäre Jehovakwe dre nuainbare, tä dre nuainne aune dre nuaindi kwe yebätä. Ye köböire David erere, mäkwe niedi: “Tita tö ngwen Jehovai aune kä jürä ñaka tibätä” (Sal. 56:4).