ZAJ KAWM 1
ZAJ NKAUJ 38 Nws Yuav Hwj Koj Ruaj Khov
Cia Siab Rau Yehauvas
NQE VAJLUGKUB XYOO 2024: “Thaum kuv muaj kev txhawj ntshai, kuv cia siab rau koj xwb.”—PHAU NTAWV NKAUJ 56:3.
LUB NTSIAB RAU ZAJ NO
Peb yuav kawm seb yuav ua li cas peb thiaj cia siab rau Yehauvas thaum muaj kev txhawj ntshai.
1. Vim li cas qee lub sij hawm peb ho txhawj ntshai?
NEEG yeej muaj ntau yam kev txhawj ntshai. Thaum peb los kawm Vajlugkub ces peb kuj tsis nco qab ntshai cov tuag, cov dab, thiab tej yam yuav muaj tshwm sim rau yav tom ntej. Txawm li ntawd los peb haj tseem nyob rau ib lub caij uas “muaj tej yam txaus ntshai heev” xws li muaj tsov rog, tub sab tub nyiag, thiab kab mob kev nkeeg. (Lukas 21:11) Tsis tas li ntawd, kuj muaj ntau yam uas ua rau peb txhawj ntshai xws li tej nom tswv ua nruj ua tsiv rau peb, peb tsev neeg tawm tsam peb txoj kev ntseeg, ntshai tsam peb ho thev tsis dhau tej kev sim siab uas peb tab tom raug, los sis tej kev sim siab uas tseem yuav muaj los yav tom ntej.
2. Piav seb muaj li cas rau Daviv hauv lub nroog Nkas.
2 Muaj qho lub caij Daviv kuj muaj kev txhawj ntshai. Xws li thaum Vaj Ntxwv Xa-ules nrhiav nrhw Daviv tua. Daviv thiaj li khiav mus nkaum hauv cov Filitees lub nroog hu ua Nkas. Tus vaj ntxwv hauv lub nroog ntawd uas yog Akhises, txawm hnov tias Daviv yog tus tub rog uas tua cov Filitees txog “qas vam leej.” Qhov no thiaj ua rau Daviv “ntshai” heev. (1 Xamuyees 21:10-12) Nws tsis paub hais tias yog Akhises ntes tau nws ces yuav zoo li cas. Ua li muaj dab tsi pab tau kom Daviv ua lub siab tawv qhawv?
3. Raws li Phau Ntawv Nkauj 56:1-3, 11, ua cas Daviv thiaj li tsis txhawj ntshai lawm?
3 Nyob rau hauv Phau Ntawv Nkauj 56, Daviv piav tias yam uas pab tau nws yog nws cia siab rau Yehauvas. (Nyeem Phau Ntawv Nkauj 56:1-3, 11.) Vim muaj Yehauvas pab, Daviv thiaj li tawm tau ib lub tswv yim tias nws yuav ua txuj ua ib tug neeg vwm. Thaum Akhises pom tias Daviv yog ib tug neeg vwm, ua rau nws xeeb txob heev, nws thiaj ntiab kom muab Daviv tshem tawm mus.—1 Xamuyees 21:13–22:1.
4. Piav seb yuav ua li cas peb thiaj tsav ntxiv tau peb txoj kev cia siab rau Yehauvas.
4 Thaum peb muaj kev txhawj ntshai, peb yeej tswj tau peb lub siab yog tias peb cia siab rau Yehauvas. Ua li peb yuav cia siab rau Yehauvas li cas? Cia peb muab ua piv txwv li no. Thaum koj paub hais tias koj muaj ib tug mob, koj yeej muaj kev txhawj ntshai. Tiam sis yog koj mus kuaj ib tug kws kho mob uas keej kho cov tib neeg uas muaj mob ib yam li koj ces yuav ua rau koj lub siab tswm. Tus kws kho mob yeej ua tib zoo mloog thaum koj piav thiab nws yeej txhawj xeeb txog koj tiag. Nws kuj qhia rau koj paub txog ib yam kev kho mob uas twb pab tau coob leej ntau tus lawm. Zoo ib yam li ntawd, peb yuav cia siab rau Yehauvas yog tias peb lauj sij hawm los xav txog tej yam nws tau ua yav tag los lawm, nws tseem tab tom ua tam sim no, thiab tej yam nws tseem yuav ua yav tom ntej. Cia peb mus tham txog cov lus nyob rau hauv Phau Ntawv Nkauj 56 seb yuav tsav tau peb txoj kev cia siab rau Yehauvas li cas.
TEJ YEHAUVAS UA YAV TAG LOS LAWM
5. Thaum Daviv txhawj ntshai, nws xav txog dab tsi? (Phau Ntawv Nkauj 56:12, 13)
5 Txawm tias phom sij heev rau Daviv lub neej tam sim ntawd los nws tsuas xav ntsoov txog tej yam Yehauvas tau ua yav tag los lawm. (Nyeem Phau Ntawv Nkauj 56:12, 13.) Tag nrho Daviv lub neej, nws yeej ib txwm xav li ntawd. Xws li nws xav txog tej yam Yehauvas tau tsim ua rau nws xam pom tias Yehauvas muaj hwj chim heev thiab nws hlub tshua tib neeg tshaj plaws li. (Phau Ntawv Nkauj 65:6-9) Tsis tas li ntawd, nws kuj xav txog tej yam Yehauvas tau ua rau lwm tus thiab. (Phau Ntawv Nkauj 31:19; 37:25, 26) Ntxiv ntawd nws kuj xav txog tej yam uas Yehauvas tau ua los pab nws tus kheej kiag. Yehauvas yeej tsom kwm thiab tiv thaiv Daviv puag thaum nws tseem yog me nyuam mos liab los. (Phau Ntawv Nkauj 22:9, 10) Ntshe qhov uas Daviv ua li no tsav tau nws txoj kev cia siab rau Yehauvas heev!
Daviv cia siab rau Yehauvas vim nws xav txog tej Yehauvas tau ua yav tos los, ua tam sim ntawd, thiab tej Nws yuav ua yav tom hauv ntej (Saib nqe 5, 8, 12) d
6. Thaum peb ntshai, muaj dab tsi pab tau kom peb cia siab rau Yehauvas?
6 Thaum koj muaj kev txhawj ntshai, ua zoo tshuaj koj tus kheej li no tias, ‘Yehauvas tau ua dab tsi lawm?’ Xav txog tej yam Yehauvas tau tsim. Xws li “tsa muag ntsia” seb Yehauvas saib xyuas tej noog thiab tej paj hmab paj ntoos uas nws tau tsim li cas tab txawm tej no tsis muaj nws tej yeeb yam thiab teev tiam tsis tau nws. Yog Yehauvas saib xyuas tej ntawd ces cia li cia siab tias Yehauvas yuav yim huab saib xyuas peb. (Mathais 6:25-32) Tsis tas li ntawd, ua zoo tshuaj tej yam Yehauvas twb tau ua rau cov uas teev tiam nws yav tag los lawm. Tej zaum koj kuj nyeem txog tej tug uas tuav rawv kev ntseeg hauv phau Vajlugkub los sis koj kuj nyeem txog tej tug uas teev tiam Yehauvas niaj hnub nim no. a Txuas ntxiv ntawd, ua zoo xav seb Yehauvas tau tsom kwm koj li cas rau li cas. Nws tau pab koj li cas xwv koj thiaj los paub tau nws? (Yauhas 6:44) Nws tau teb koj tej lus thov li cas? (1 Yauhas 5:14) Thiab qhov uas nws tus Tub los tuag theej txhoj pab tau koj li cas?—Efexus 1:7; Henplais 4:14-16.
Peb txoj kev cia siab rau Yehauvas yuav ruaj zuj zus ntxiv yog tias peb xav txog tej nws tau ua yav tas los, tej nws ua tam sim no, thiab tej nws yuav ua yav tom hauv ntej (Saib nqe 6, 9-10, 13-14) e
7. Daniyees tus yam ntxwv pab tau Vab kom tsis txhob ntshai li cas?
7 Nyob hauv teb chaws Hedis (Haiti), muaj ib tug muam npe hu ua Vab. b Nws ntshai kawg li vim muaj ib tug txiv neej nyob rau hauv zos pheej hu nws thiab ntaus ntawv rau nws txhua txhua hnub, yuam kom nws tham tus txiv neej ntawd. Vab tsis kam ua li ntawd ces tus txiv neej txawm huab yam ua heev thiab hem tias nws yuav ua phem rau Vab. Vab hais tias, “Kuv ntshai kawg li.” Vab thiaj mus hais qhia rau ib tug txwj laus paub. Tus txwj laus thiaj pab nws hais rau tub ceev xwm. Tsis tas li ntawd, Vab kuj xav txog tej uas Yehauvas tau ua los mus pab nws cov tib neeg yav thaum ub. Vab hais ntxiv tias, “Thawj tug uas kuv xav txog yog Daniyees. Luag muab nws pov rau hauv lub qhov tsov ntxhuav tab txawm nws tsis tau ua txhaum dab tsi los Yehauvas yeej saib xyuas nws. Yog li ntawd, kuv thiaj thov Yehauvas kom pab ua rau tus txiv neej ntawd tsis txhob xav txog kuv, thiab pab kho qhov teeb meem no. Tom qab ntawd, kuv tsis ntshai ntxiv lawm.”—Daniyees 6:12-22.
TEJ YEHAUVAS TSEEM TAB TOM UA
8. Daviv paub zoo txog li cas? (Phau Ntawv Nkauj 56:8)
8 Thaum Daviv nyob rau hauv lub nroog Nkas, nws tsuas xav txog tej uas Yehauvas ua pab nws tam sim ntawd dua li nws nyob twj ywm ntshai tshee hnyo. Nws paub ntsoov tias Yehauvas yeej tsom kwm, tiv thaiv, thiab nkag siab nws. (Nyeem Phau Ntawv Nkauj 56:8.) Daviv kuj muaj tej phooj ywg kwv luag zoo zoo xws li Yaunathas thiab tus Pov Thawj Hlob Ahimelej uas pab thiab txhawb nws lub zog. (1 Xamuyees 20:41, 42; 21:6, 8, 9) Txawm tias Vaj Ntxwv Xa-ules nrhiav nrhw Daviv tua los txog thaum kawg Daviv kuj dim tsis tuag. Yog li ntawd, Daviv thiaj paub ntsoov tias Yehauvas yeej paub txhua yam los raug rau nws thiab paub tej uas nyob nraim nkoos hauv nws nruab siab.
9. Yehauvas pom li cas txog peb ib tug zuj zus?
9 Thaum koj raug ib txoj kev sim siab twg es ua rau koj ntshai, nco ntsoov tias Yehauvas yeej pom thaum koj raug kev sim siab thiab tej ntawd ua rau koj ntxhov siab npaum li cas. Xws li Yehauvas yeej pom thaum cov neeg Iyiv tsim txom cov Ixayees thiab “paub lawv raug kev txomnyem kawg nkaus li.” (Khiav Dim 3:7) Daviv thiaj hu ib zaj nkauj tias Yehauvas pom nws “tej kev txomnyem” thiab nws “tej kev ntxhov siab huv tibsi.” (Phau Ntawv Nkauj 31:7) Thaum Yehauvas cov tib neeg tsis mloog lus es raug kev txom nyem, “nws kuj nrog lawv raug” kev nyuaj siab thiab. (Yaxayas 63:9) Yog li ntawd, thaum koj muaj kev txhawj ntshai, Yehauvas yeej nkag siab thiab xav cev tes pab koj.
10. Vim li cas koj ho paub tias Yehauvas yeej txhawj xeeb txog koj tiag thiab nws yuav pab koj thev dhau koj tej kev sim siab?
10 Thaum koj raug ib yam kev sim siab twg, tej zaum koj yuav xam tsis pom tias Yehauvas twb pab koj lawm. Tsis txhob ua siab deb, kav tsij thov kom Yehauvas pab koj pom tias nws twb cev tes los pab koj lawm. (2 Vajntxwv 6:15-17) Tom qab ntawd, xav txog tej no: Puas tau muaj ib zaj lus qhuab qhia twg los sis ib tug twg teb tom kev sib txoos uas txhawb tau koj lub zog? Puas tau muaj ib phau ntawv, yeeb yaj kiab los sis ib zaj nkauj txhawb siab twg txhawb tau koj lub zog? Puas tau muaj ib tug twg tau hais los sis nyeem ib nqe Vajlugkub los txhawb koj? Yog peb tsis ua tib zoo xav ces peb yuav tsis ras txog tej yam cov kwv tij nkauj muam ua los pab peb thiab Vajtswv Txoj Lus txhawb tau peb lub zog npaum li cas. Txhua yam no puav leej yog Yehauvas muab los txhawb peb. (Yaxayas 65:13; Malakaus 10:29, 30) Tej no qhia tias Yehauvas yeej txhawj xeeb txog peb tiag. (Yaxayas 49:14-16) Yog li ntawd, yeej tsim nyog peb cia siab rau Yehauvas.
11. Muaj dab tsi pab kom Iab tsis txhob ntshai?
11 Nyob hauv teb chaws Xenenkos (Senegal), muaj ib tug muam npe hu ua Iab xam pom tias Yehauvas pab nws. Vim nws yog tus me nyuam uas hlob, nws niam thiab nws txiv xav kom nws khwv tau nyiaj los koob lawv tsev neeg. Tiam sis tom qab no, nws ua ib tug tho kev thiab tsuas ua me ntsis hauj lwm lawm xwb ces nws tsis tshua muaj nyiaj pes tsawg. Nws tsev neeg thiaj tsis txaus siab rau nws thiab lawv thuam nws heev. Iab hais tias, “Kuv ntshai tsam kuv pab tsis tau kuv niam thiab kuv txiv nkawd ces sawv daws tsis nyiam kuv lawm. Kuv liam Yehauvas tias ua cas nws cia tej no los raug kuv.” Iab thiaj li hnov ib zaj lus qhuab qhia. Nws hais tias, “Tus kwv tij piav tias txawm peb muaj kev nyuaj siab los sis ntshai ib yam dab tsi, Yehauvas yeej pom tag. Cov txwj laus thiab lwm tus ua siab ntev pab kuv, kuv thiaj pom tias Yehauvas hlub kuv heev. Kuv thiaj li thov Yehauvas thiab cia siab tias Yehauvas yeej yuav pab kuv. Thaum Yehauvas teb kuv tej lus thov, ua rau kuv muaj lub siab tus.” Ntev mus ntev tuaj, Iab kuj nrhiav tau ib txoj hauj lwm uas pab tau nws tho kev, pab nws niam nws txiv, thiab lwm tus. Iab hais tias, “Qhov uas kuv xyaum tau yog tso siab plhuav rau Yehauvas. Niaj hnub nim no tom qab kuv thov Yehauvas tag, kuv tej kev txhawj xeeb kuj ploj tag lawm.”
TEJ YEHAUVAS TSEEM YUAV UA YAV TOM NTEJ
12. Raws li Phau Ntawv Nkauj 56:9, Daviv cia siab li cas?
12 Nyeem Phau Ntawv Nkauj 56:9. Nqe no qhia tau tias thaum Daviv txhawj ntshai, yam uas pab tau nws yog ua tib zoo xav txog tej yam uas Yehauvas tseem yuav ua rau nws yav tom ntej. Daviv paub tias Yehauvas yeej yuav pab nws raws caij raws nyoog. Tsis tas li ntawd, Yehauvas twb xaiv Daviv ua cov neeg Ixayees tus vaj ntxwv uas yuav tuaj tom ntej lawm. (1 Xamuyees 16:1, 13) Yog li ntawd, txhua yam uas Yehauvas tau cog lus tseg, Daviv yeej suav yam li twb muab tiav lawm.
13. Peb cia siab tias Yehauvas yuav ua dab tsi?
13 Yehauvas yuav tsis tshem txhua yam teeb meem uas peb raug tiam sis tej kev sim siab uas peb ntsib, nws yuav muab tshem huv tib si mus thaum txog lub qab ntuj tshiab. c (Yaxayas 25:7-9) Yehauvas twb yog tus tsim ib puas tsav yam ces nws yeej muaj peev xwm tsa tau cov uas tau tas sim neej lawm kom rov muaj sia dua, tshem txhua yam kab mob kev nkeeg mus, thiab tshem txhua tus uas tawm tsam peb.—1 Yauhas 4:4.
14. Peb yuav tau ua tib zoo xav txog tej yam twg?
14 Thaum koj txhawj ntshai, cia li ua tib zoo xav txog tej yam Yehauvas yuav ua rau yav tom ntej. Xws li thaum tsis muaj Xatas es tsuas pom muaj tej neeg ncaj ncees lawm xwb, thiab ib hnub dhau ib hnub los kev txhaum yuav ploj zuj zus mus. Nyob rau lub rooj sib txoos xyoo 2014, ua piv txwv qhia txog peb txoj kev vam kev cia siab rau yav tom ntej. Muaj ib leej txiv qhia rau nws tsev neeg txog 2 Timautes 3:1-5 tias thaum txog lub Vaj Kaj Siab, cov lus ntawd yuav hloov li no: “Thaum txog lub qab ntuj tshiab yuav muaj kev kaj siab. Rau qhov tej neeg yuav xav txog lwm tus, lawv yuav nyiam qhov tseeb, yuav coj zoo, txo hwj chim, qhuas Vajtswv, mloog niam txiv lus, ris luag txiaj ntsig, saib taus Vajtswv txoj kev cai, hlub tshua lawv tsev neeg, zam txim rau lwm tus, hais zoo txog lwm tus, tswj lawv lub siab, ua siab mos siab muag, nyiam ua zoo, tso siab tau rau, zam luag, nyiam Vajtswv heev dua kev lom zem, ua raws li Vajtswv txoj kev cai. Cia li nrog cov neeg uas zoo li no ua ke.” Ua li koj puas tau nrog koj tsev neeg los sis cov kwv tij nkauj muam tham txog lub neej uas nyob rau hauv lub qab ntuj tshiab?
15. Txawm tias Nkauj Ntsa ntshai heev los muaj dab tsi pab tau nws?
15 Nyob teb chaws Nauj Maxedaunias (North Macedonia), muaj ib tug muam npe hu ua Nkauj Ntsa xav txog tej yam zoo zoo yav tom ntej, nws thiaj tsis ntshai. Nws niam thiab nws txiv nkawd tawm tsam nws heev thaum nws pib kawm Vajlugkub. Nws hais tias: “Tej yam kuv ntshai tsam muaj, txawm muaj raws nkaus li ntawd tiag. Kuv niam ntaus kuv txhua txhua zaus tom qab kev sib txoos. Kuv niam thiab kuv txiv nkawd hem tias nkawd yuav muab kuv tua pov tseg yog tias kuv haj tseem mus ua Yehauvas ib tug Tim Khawv.” Tsis ntev tom qab ntawd, Nkauj Ntsa niam thiab txiv muab nws ncaws tawm tsev. Nws hais tias: “Yog kuv tsis tso Yehauvas tseg ces kuv paub tias kuv yuav muaj kev zoo siab mus ib txhis. Tab txawm kuv poob ib puas tsav yam hauv lub qab ntuj no lawm los kuv paub tias thaum txog lub qab ntuj tshiab, Yehauvas yuav muab ntau yam zoo pub rau kuv. Tsis tas li ntawd, tej uas kuv niaj hnub raug kuv yuav tsis nco qab lawm.” Nkauj Ntsa kuj tuav rawv nws txoj kev ntseeg. Yog li ntawd, Yehauvas kuj pab nws nrhiav tau ib qho chaw nyob. Niaj hnub nim no Nkauj Ntsa yuav tau ib tug txiv uas muaj kev ntseeg heev thiab nkawd ob leeg puav leej ua hauj lwm puv ntoob rau Yehauvas.
CIA SIAB RAU YEHAUVAS ZUJ ZUS
16. Muaj dab tsi pab peb kom tsis txhob ntshai thaum muaj raws li Lukas 21:26-28?
16 Thaum txog lub sij hawm uas muaj kev txom nyem loj kawg nkaus, tib neeg yuav “tsaus muag yoob tas vim ntshai heev.” Tiam sis Vajtswv cov tib neeg yuav sawv nreg nroos thiab tsis ntshai. (Nyeem Lukas 21:26-28.) Peb yuav tsis ntshai vim peb twb cia siab rau Yehauvas lawm. Nkauj Ntsa hais tias tej uas nws raug yav tag los kuj pab nws thev taus tej yam tseem yuav nyuaj rau yav tom ntej. Nws tau hais li no tias, “Kuv paub tias Yehauvas yuav pab peb thev dhau txhua yam uas peb raug thiab yuav foom koob hmoov rau peb xwb xwb li. Muaj tej thaum zoo li lwm tus muaj hwj chim tswj hwm txhua yam tiam sis Yehauvas muaj hwj chim tshaj lawv. Txawm kev sim siab yuav loj npaum twg los yeej yuav muaj hnub xaus.”
17. Nqe Vajlugkub rau xyoo 2024 pab tau peb li cas? (Saib daim duab ntawm lub khaum.)
17 Niaj hnub nim no yeej muaj ntau yam ua rau peb txhawj ntshai tiam sis cia peb xyaum Daviv es tsis txhob cia kev ntshai tswj peb lub neej. Daviv zaj lus thov rau Yehauvas yog nqe Vajlugkub rau xyoo 2024. Nws thov tias: “Thaum kuv muaj kev txhawj ntshai, kuv cia siab rau koj xwb.” (Phau Ntawv Nkauj 56:3) Ib tug neeg tshawb fawb Vajlugkub tau hais txog nqe Vajlugkub no tias: “Daviv tsis tsau tsawv txog tej yam uas yuav ua rau nws txhawj ntshai los sis nws tej teeb meem, tiam sis nws cia siab rau tus yuav cawm tau nws.” Yav tom ntej no, yog muaj tej yam ua rau koj txhawj ntshai, kav tsij xav txog nqe Vajlugkub no los pab koj. Lauj sij hawm los xav txog tej uas Yehauvas tau ua yav tas los, tej nws ua tam sim no, thiab tej nws yuav ua yav tom hauv ntej. Yog koj ua li no ces koj yuav hais tau ib yam li Daviv tias: “Kuv cia siab rau Vajtswv, kuv tsis ntshai li.”—Phau Ntawv Nkauj 56:4.
Thaum muaj xwm txheej, ib tug muam xav txog nqe Vajlugkub rau xyoo 2024 (Saib nqe 17)
KOJ YUAV TSIS TXHAWJ NTSHAI YOG KOJ XAV TXOG . . .
-
tej Yehauvas tau ua yav tag los lawm li cas?
-
tej Yehauvas tseem tab tom ua tam sim no li cas?
-
tej Yehauvas tseem yuav ua yav tom ntej li cas?
ZAJ NKAUJ 33 Muab Koj Tej Kev Nyuaj Siab Tso Rau Yehauvas
a Koj mus nrhiav tau tej yam los tsav tau koj txoj kev ntseeg hauv lub vej xaij jw.org/hmn. Ntaus ntawm qhov nrhiav “xyaum lawv txojkev ntseeg” los sis “tej qauv zoo”. Hauv lub twj JW Library®, mus saib tej zaj ntawm ntu “Imitate Their Faith” los sis “Life Stories of Jehovah’s Witnesses” ua lus Askiv.
b Tau muab cov npe hauv zaj no ib txhia hloov lawm.
c Mus saib phau ntawv Draw Close to Jehovah, tshooj 7, nqe 13-22 ua lus Askiv.
d DAIM DUAB: Daviv xav txog qhov uas Yehauvas pab nws ntaus yeej ib tug dais, Yehauvas siv Ahimelej los pab nws, thiab Yehauvas tseem yuav cia nws ua vaj ntxwv.
e DAIM DUAB: Ib tug kwv tij uas raug kaw vim nws txoj kev ntseeg xav txog qhov uas Yehauvas pab nws txiav luam yeeb, Yehauvas rub cov uas nws paub lub siab kom sau ntawv tuaj txhawb nws lub zog, thiab qhov uas Yehauvas yuav pub txoj sia ntev dhawv mus ib txhis rau nws hauv lub Vaj Kaj Siab.
