XTUUTYUM ARTIKEL 1
LIIT 38 Yeehoowa halt tich xtark
Wëns tuu pang kriist, trau uf Yeehoowa
UNSER YOERS TEKST FER 2024: “Wën ich pang kriin, traue ich uf tich.” (PSALM 56:3)
WAS TUUN MER SIIN?
Lërn wiis tuu khanst noch mee uf Yeehoowa traue un torich tayn pang triwer wech khome.
1. Warom khene mer als mool pang kriin?
MEYER al tuun als mool pang kriin. Kewis, wayl mer wise was ti Piipel saat, hon mer khee pang fon te toote, ti temoone orer was im futuer mit te mënxe pasiirt. Awer meyer leepe in xlime tsayte. Tes weeche, khene mer pang kriin weeche ti kriiche, kriime un krankheete. (Luk. 21:11) Un meyer khene aach pang fon te mënxe kriin — soo wii ti autoriteete woo uns unertrike orer soo kaar fon parente woo sich keeche ti woerheet xtele. Etliche frooe sich ep se aus hale khene ti proope woo se hayt mit mache orer ti proope woo fiilaycht noch khome.
2. Was fer waar Tawi sayn situatsyoon in Kat?
2 Tawi hot als mool pang kriit. Tsum payxpiil: wii te kheenich Saul Tawi am yachte waar fer tëm um pringe, hot Tawi ëntxlist tsu te filiistix xtat fon Kat aus rayse. Te kheenich fon Kat, Akis, hot tsum wise kriit tas Tawi te kriichsman waar woo “fiile tausente” filiistixe mëner um keprung hat. Too hot Tawi “fiil pang” kriit. (1 Sam. 21:10-12) Tee hot sich kefroot was Akis tëm mache khent. Wii is Tawi torich sayn pang triwer wech khom?
3. Tëm noo Psalm 56:1-3, 11, wii is Tawi torich sayn pang triwer wech khom?
3 Im Psalm 56, xprecht Tawi iwer sayn xpiirunge wii eyer in Kat waar. In tiise Psalm, hot Tawi taytlich aus keleet warom eyer pang hat. Awer tee hot aach kesaat was tëm keholef hot noo lose pang xpiire: uf Yeehoowa traue. (Lees Psalm 56:1-3, a 11. b) Tawi hat kuute uersache fer uf Kot traue. Mit Yeehoowa sayn hilef, hot Tawi ëntxlist was unkeweenliches mache: tee hot sich ferikt aan kextelt. Sayn plaan hot pariirt: Akis wolt net mee Tawi um pringe; tee wolt hon tas eyer faart keengt un soo is Tawi aus keris. (1 Sam. 21:13–22:1)
4. Wii khene mer noch mee uf Kot traue? Mach een ferklaychung.
4 Wën mer uf Yeehoowa traue, khene mer aach torich unser pang triwer wech khome. Awer wii khene mer noch mee uf Kot traue, hauptseechlich wën mer pang hon? Kuk mool een ferklaychung. Wëns tuu tsum wise kriist tas tuu een krankheet host, am aanfang fiilaycht kriist tuu pang. Awer wëns tuu uf tayn tokter traust, khanst tuu tayn pang laychter lose. Im xtant hot eyer xon fiile pasyente keholef woo eenliche krankheete hate. Tee horicht tich wiis tuu aus leye tuust warom tuu pang xpiirst. Tee lost tich sicher tas eyer tich ferxteet un xprecht iwer een tratament woo xon fer anere funtsyoniirt hot. Kraat soo, traue mer noch mee uf Yeehoowa wën mer noo kuke was eyer xon kemacht hot, was eyer hayt am mache is un was eyer im futuer uns mache tuut. Tawi hot kraat tas kemacht. Soo lang wii mer etliche fon sayn inspiriirte wërter im Psalm 56 noo kuke, tenk wiis tuu khanst tayn fertraung uf Kot aach ferxtërke un wiis tuu torich tayn pang triwer wech khome khanst.
WAS HOT YEEHOOWA XON KEMACHT?
5. Fer torich sayn pang triwer wech khome, aan was hot Tawi triwer noo ketenkt? (Psalm 56:12, 13)
5 Opwool Tawi in een kefeerlich situatsyoon waar, hot eyer triwer noo ketenkt aan tas kuutes woo Yeehoowa xon friier kemacht hat. (Lees Psalm 56:12, 13.) c Tawi hot tas torich sayn kanse leepe kemacht. Tsum payxpiil: als mool, hot eyer triwer noo ketenkt aan Yeehoowa sayn kriatsyoon. Tas hot tëm erinert wii mechtich Yeehoowa is un wii fiil Eyer ti mënxe liipt. (Psal. 65:6-9) Tawi hot aach triwer noo ketenkt aan was Kot xon fer ti anere kemacht hat. (Psal. 31:19; 37:25, 26) Un tee hot hauptseechlich triwer noo ketenkt aan was Yeehoowa xon fer tëm kemacht hat. Yeehoowa hot Tawi fon kleen aan kexitst un keholef. (Psal. 22:9, 10) Sicher, too triwer noo tenke, hot Tawi keholef noch mee uf Kot traue!
Tawi hot noch mee uf Kot ketraut wii eyer triwer noo ketenkt hot aan was Yeehoowa xon kemacht hat, am mache waar un noch mache teet (Kuk ti apsetse 5, 8, 12.) j
6. Wën mer pang kriin, was tuut uns helfe uf Yeehoowa traue?
6 Wëns tuu pang kriist, froo tich: ‘Was hot Yeehoowa xon kemacht?’ Tenk iwer sayn kriatsyoon. Meyer khene, tsum payxpiil, mit acht kuke wii Yeehoowa ti feechel un ti pluume uf phast, opwool se net kemacht kep sin mit tëm sayn kwaliteete un tëm net aan peete khene. Too triwer noo tenke, khan unser fertraung ferxtërke tas Yeehoowa uns aach uf phase tuut. (Mat. 6:25-32) Tenk aach triwer noo aan was Yeehoowa xon fer sayn tiiner kemacht hot. Tuu khanst ti piiplixe payxpiile xtutiire fon layt woo een xtarke klaape ketsaycht hon orer ti speryense leese fon Yeehoowa sayn tiiner hayt tsu taach. d Tuu khanst aach tenke aan wii Yeehoowa tich xon uf kephast hot. Wii hot eyer tich keholef tëm khëne lërne? (Yoo. 6:44) Wii hot eyer tayn kepeete keantwort? (1 Yo. 5:14) Was fer nutse kriist tuu yeete taach weeche tas opfer fon Sayn liipe Soon? (Ëfe. 1:7; Hep. 4:14-16)
Meyer lërne noch mee uf Kot traue wën mer triwer noo tenke aan was eyer xon kemacht hot, am mache is un noch mache tuut (Kuk ti apsetse 6, 9-10, 13-14.) k
7. Wii hot Tanyël sayn payxpiil Vanessa keholef torich sayn pang triwer wech khome?
7 Een xwester fon Haytii, woo Vanessa e heest, hot een xreklich situatsyoon mit kemacht. Eene man fon sayn nochperxaft hot se yeete taach aan keruuft un mensagens kexikt; tee wolt se tswinge sayn xetsye wëre. Vanessa hot taytlich ketsaycht tas se niks wise wolt. Awer te man is imer kroper kep un hot aan kefang se saan tas eyer was xlechtes mit tëne mache teet. “Ich hat pang” — saat se. Wii is Vanessa torich sayn pang triwer wech khom? Tii hot kemacht was se khont fer sich selepst xitse. Een elteste hot se keholef mit te autoriteete xpreche. Awer tii hot sich aach traan kehal aan wii Yeehoowa sayn tiiner friier kexitst hat. “Ich hon mich eyerst fom profeet Tanyël traan ketenkt — saat Vanessa. — Opwool eyer unxultich waar, waar eyer in een loch fol hungriche leepe kexmis kep. Noch soo, hot Yeehoowa tëm uf kephast. Soo hon ich aach kepeet tas Yeehoowa mayn situatsyoon uf phase solt. Nochter, hat ich khee mee pang.” (Tan. 6:12-22)
WAS IS YEEHOOWA YETS AM MACHE?
8. Was fer sicherheet hat Tawi? (Psalm 56:8)
8 Opwool Tawi sayn situatsyoon in Kat kefeerlich waar, hot eyer sich net traan kehal aan te tinge woo tëm pang kep hon. Xtats tas, hot eyer ëntxlist sich traan hale aan te tinge woo Yeehoowa fer tëm in tëne tsayt am mache waar. Tawi khont taytlich siin tas Yeehoowa tëm am lenke un xitse waar un tas Eyer sayn xpiirunge ferxtan hot. (Lees Psalm 56:8.) f Tawi hat aach kuute fraaynte, soo wii Yoonatan un te hooche priister Aymelëk, woo tëm uf kemuut un keholef hon. (1 Sam. 20:41, 42; 21:6, 8, 9) Un opwool te kheenich Saul tëm um pringe wolt, hot Tawi es hin kriit aus rayse. Tawi hat ti sicherheet tas Yeehoowa kenau wust was mit tëm am pasiire waar un wii eyer sich kexpiirt hot.
9. Was mërkt Yeehoowa iwer yeete eene fon uns?
9 Wëns tuu een proop mit machst woo tich pang kept, say tich sicher tas Yeehoowa mërkt was tuu mit machst un wiis tuu tich too triwer xpiirst. Yeehoowa hot, tsum payxpiil, kemërkt wii ti israeliiter im Ejipt xlecht pehantelt waare. Awer es waar net ploos tas: tee hot aach kemërkt “wii se [am] layte” waare. (Eeks. 3:7) Tawi hot kesung tas Yeehoowa sayn “xwiirichkheet [un] tiif ëngstlichkheet” kemërkt hot. (Psal. 31:7) Un wën Kot sayn folek kelit hot — als mool weeche sayn aychne tume ëntxlise — “hot [Yeehoowa] sich petriklich kexpiirt”. (Isa. 63:9) Wëns tuu pang host, Yeehoowa ferxteet tayn xpiirunge un tee wil wërklich fiil tich helfe too triwer wech khome.
10. Warom pist tuu tich sicher tas Yeehoowa tich mërkt un tas eyer tich helft mit kwalkee proop um keen?
10 Wëns tuu een proop mit machst woo tich pang kept, fiilaycht siist tuu net wii Yeehoowa tich am helfe is. Was khanst tuu mache? Ferlang in kepeet tas Kot tich helft se siin wii eyer tich unerxtitst. (2 Khe. 6:15-17) Tan froo tich: ‘Hot een reet orer komentaar in te fersamlung mich ferxtërkt? Hot een puplikatsyoon, wiiteo orer liit fom site jw.org mich uf kemuut? Hot yemant mich was kesaat orer een tekst ketsaycht woo mich uf kemuut hot?’ Es is laycht uns ferkese wii fiil unser liiplich pruuterxaft un tas kaystlich esmitel uns xon keholef hon. Awer tii sin wunerliche kexenke fon Yeehoowa. (Isa. 65:13; Mar. 10:29, 30) Tii pewayse tas Yeehoowa sich mit tich khimert un tas tuu uf tëm traue khanst. (Isa. 49:14-16)
11. Was hot Aida keholef torich sayn pang triwer wech khome?
11 Aida, een xwester woo in Senekaal leept, hot kemërkt wii Yeehoowa se keholef hot torich een proop. Wayl Aida tas elste khint is, hon sayn eltere kewaart tas se kenuuch kelt fertiine teet fer sich selepst un tëne uf phase. Awer noo Aida sayn leepe keweenlicher kelos hot fer pyoneerin sin, hat se weenicher kelt. Sayn familye is pees kep un hot se kritikiirt. Aida saat: “Ich hat pang tas ich net mayn eltere keholef kreecht un tas ti anere xlecht iwer mich xpreche teete. Ich hon soo kaar Yeehoowa ti xult kep weeche mayn xlim situatsyoon.” Tan hot Aida een reet in een fersamlung keheert. “Ti reet hot uns erinert tas Yeehoowa wees was uns mit pang un ëngstlich lost — saat Aida. — Mit te hilef fon te elteste un anere, hon ich xrit noo xrit ti sicherheet kriit tas Yeehoowa mich liipt. Wii ich tsu Yeehoowa kepeet hon, hon ich mich sicher wii noch nii kexpiirt tas eyer mich helfe teet. Ich hon aach een tiif friit kexpiirt wii eyer mayn kepeete keantwort hot.” Mit te tsayt, hot Aida een aarwayt kefun woo se kenuuch kelt fertiint hot fer wayter pyoneerin sin un sayn eltere uf phase. “Ich hon kelërnt kans uf Yeehoowa traue — saat se. — Yets, noo een kepeet, tuut ofts mayn pang kans ferxwiine.”
WAS MACHT YEEHOOWA IM FUTUER?
12. Tëm noo Psalm 56:9, fon was waar Tawi sich sicher?
12 Lees Psalm 56:9. g Tiise tekst tsaycht was aneres woo Tawi keholef hot torich sayn pang triwer wech khome. Opwool sayn leepe noch ins kefoer waar, hot Tawi triwer noo ketenkt aan was Yeehoowa fer tëm im futuer mache teet. Tawi wust tas Yeehoowa teet tëm in te richtich tsayt rete; tas is soo wayl Kot kesaat hat tas Tawi te neekste kheenich fon Israël wëre teet. (1 Sam. 16:1, 13) Fer Tawi, ekaal was Yeehoowa ferxproch hat, es teet sich sicher erfiile.
13. Was fer sicherheet khene mer iwer Yeehoowa hon?
13 Was hot Yeehoowa ferxproch fer tich mache? Meyer waarte net tas eyer uns fon al unser propleeme xitst. h Awer eriner tich: ekaal te propleem woos tuu hayt mit machst, Yeehoowa tuut tas in te nay welt wech xafe. (Isa. 25:7-9) Sicher, is unser Kriatoer xtark kenuuch fer ti toote uf ruufe, fer unser krankheete un emotsyonaale wee heele un fer ti keechner fernichte. (1 Yo. 4:4)
14. Aan was khene mer triwer noo tenke?
14 Wëns tuu pang host, tenk triwer noo aan was Yeehoowa im futuer macht. Tenk wiis tuu tich xpiire tuust wën Satanaas un ti xlechte layt fernicht wëre, wën ploos kerechte layt uf te eyert leepe un ti imperfektsyoon yeete taach kleener wërt. Een foerxtelung im Rechyonaal Konkrës fon 2014 hot ketsaycht wii mer khene aan unser hofnung triwer noo tenke. Een papa hot mit sayn familye kexproch iwer wii 2 Timoteus 3:1-5 anerste weyer wën tiise wersikele iwer tas Paratiis xpreche teete: “In te nay welt, khome ti peste tsayte woo xon khom sin. Wayl ti mënxe tuun ti anere liipe, tuun kaystliche tinge liipe, tuun sayn krënse erkhëne, wëre teemuutich, tuun Kot loope, tuun ti eltere aan heere, wëre petanklich, troy. Tii tuun sayn familye fiil liipe, wëre wilich fer mit te anere xtime, tuun imer kuut iwer ti anere xpreche, tuun selepst kontrol, tsaamheet un liip fer ti kuutheet hon. Tii wëre layt woo ma traue khan; tii tuun noo kepe un sich selepst kleen siin. Tii tuun Kot eerlich liipe, net ti luste. Hal tich ticht tsu tiise layt.” Tuust tuu mit tayn familye un priiter fertseele iwer wii tas leepe in te nay welt wërt?
15. Opwool Tanja pang hat, was hot se keholef too triwer wech khome?
15 Kuk mool ti speryens fon een xwester in Nort Matsetoonya woo Tanja heest. Wii se aan kefang hot ti Piipel xtutiire, hon sayn eltere sich keeche tëne kextelt. Awer tii is torich sayn pang triwer wech khom wii se triwer noo ketenkt hot iwer ti seechen woo se im futuer kriit. Tii saat: “Ich hat pang tas etliche tinge pasiire teete… un tii sin wërklich pasiirt. Noo yeete fersamlung, hot mayn mama mich kehaut. Mayn eltere hon kesaat tas se mich um pringe teete wën ich Yeehoowa sayn Tsayer wëre teet.” Mit te tsayt, hon Tanja sayn eltere se fon sayn haus faart kexikt. Wii hot Tanja sich aan kextelt? Tii saat: “Ich hon mich traan kehal aan te frooheet woo ich fer ti kans eewichkheet xpiire tuun wayl ich ëntxlist hon mich troy hale. Ich hon aach ketenkt aan wii Yeehoowa mich in te nay welt peloont weeche kwalkee tings woo ich in tiise sisteem ferliire un aach aan wii ich al ti xlechte tinge ferkese tuun.” Tanja is troy keplip un, mit Yeehoowa sayn hilef, hot se een plats fer se leepe kefun. Hayt, is Tanja mit een troye pruuter ferhayrat un tii xafe froo in te fol tsayt tiinst.
FERXTËRK TAYN FERTRAUNG HAYT
16. Was tuut uns helfe koraajich sin wën mer ti ewënte in Lukas 21:26-28 siin?
16 Torich ti kroos tripulatsyoon, tuun ti meyerste layt “samer fale weeche ti pang”. Awer Kot sayn folek tuut fest un koraajich plaype. (Lees Lukas 21:26-28.) i Warom wëre mer koraajich? Wayl wën tiise tsayt khomt, hon mer xon kelërnt uf Yeehoowa traue. Tanja, iwer weem mer foner traan kexproch hon, saat tas was se xon mit keleept hot, helft se mit anere xweyere situatsyoone um keen. “Ich hon kelërnt — saat se —, tas Yeehoowa khan uns helfe kwalkee situatsyoon aus hale un tas eyer uns seechent. Als mool khan es aus siin tas ti anere ti situatsyoon kontroliire. Awer ti woerheet is tas se soo fiil kontrol hon wii Yeehoowa se erlaupt. Un opwool een proop khan xweyer sin, es khomt tsum ën.”
17. Wii tuut unser yoers tekst fer 2024 uns helfe? (Kuk tas pilt am aanfang fom piichelche.)
17 Hayt, kepts fiile tinge woo uns pang kepe khene. Awer soo wii Tawi, lose mer net tas ti pang uns kontroliirt. Unser yoers tekst fer 2024 is Tawi sayn kepeet tsu Yeehoowa: “Wën ich pang kriin, traue ich uf tich.” (Psal. 56:3) Mërk mool was een Piipel leerer iwer tiise wersikel saat: “Tawi tuut net wayter tenke iwer sayn propleeme orer ti tinge woo tëm pang kepe. Xtats tas, traut eyer uf Kot, woo tëm rete tuut.” In te neekste moonate, tenk iwer unser yoers tekst, hauptseechlich wëns tuu xrekliche situatsyoone mit machst. Hool tich tsayt fer se tenke aan Yeehoowa sayn aktsyoone in te ferkangne yoore, hayt un im futuer. Tan, soo wii Tawi, khanst tuu aus xpreche: “Ich traue uf Kot; ich hon khee pang.” (Psal. 56:4)
In te mite fon een unklik, een xwester tenkt am yoers tekst (Kuk te apsats 17.)
WII KHANST TUU TORICH TI PANG TRIWER WECH KHOME WËNS TUU TRIWER NOO TENKST AAN…
-
was Yeehoowa xon kemacht hot?
-
was Yeehoowa hayt am mache is?
-
was Yeehoowa im futuer macht?
LIIT 33 ‘Xmays tayn laste uf Yeehoowa’
a (Psalm 56:1-3) Helf mich, oo Kot, wayl te xtërpliche mënx mich atakiirt. Te kanse taach, tuun se keeche mich khëmpfe un mich unertrike. 2 Mayn faynte atakiire mich te kanse taach; mit hoochmuut, tuun fiile keeche mich khëmpfe. 3 Wën ich pang kriin, traue ich uf tich.
b (Psalm 56:11) Ich traue uf Kot; ich hon khee pang. Was khan een keweenliche mënx keeche mich mache?
c (Psalm 56:12, 13) Ich sin unich te juramente woo ich tich kemacht hon, oo Kot. Ich tuun tich mayn petanklichkheet tsayche. 13 Wayl tuu host mich fom toot keret un tuu host net kelos mayn fiis ap ritxe, soo tas ich foer Kot keen khan im licht fon te lepeentiche.
d Tuu khanst ufmuutiche informatsyoone im site jw.org fine; xrayp “imite a sua fé” orer “relatos da vida de Testemunhas de Jeová” im unersuuchung khaste. In te aplikatiiw JW Library®, kuk ti sekwëns fon artikele “Imite a Sua Fé” orer “Histórias de Vida de Testemunhas de Jeová”.
e Etliche naame waare keënert.
f (Psalm 56:8) Tuu keest mit mich wën ich hiner un heyer keen. Samel mayn treene in tayn leter sak. Sin se net aan tayne puuch uf kexrip?
g (Psalm 56:9) Am taach woo ich noo hilef aan hale, tuun mayn faynte tsurik treete; ich sin mich sicher: Kot is pay mich.
h Kuk tas puuch Achegue-se a Jeová, kapitel 7, apsetse 13-22.
i (Lukas 21:26-28) Ti layt tuun samer fale weeche ti pang un ëngstlichkheet weeche ti tinge woo uf te pewoont eyert pasiire tuun, wayl ti krafte fom himel wëre kexiitelt. 27 Tan, siin se te Mënxe Soon uf een wolk khome, mit macht un kroos hërlichkheet. 28 Awer wën tas aan fangt se pasiire, xtelt aych uf un tuut ayre khop uf heepe, wayl ayre retung is ticht.”
j PILT AUSLEYUNG: Tawi hot triwer noo ketenkt aan wii Yeehoowa tëm kraft kep hat fer keeche een pëer khëmpfe, tëm am helfe waar torich Aymelëk un tëm noch wii kheenich in xtele teet.
k PILT AUSLEYUNG: Een pruuter, woo inkexpërt is weeche sayn klaape, tenkt triwer noo aan wii Yeehoowa tëm keholef hot noo lose se rauche, tëm am uf muute is torich priife fon sayn liipe fraaynte, un tëm noch eewiche leepe im Paratiis kepe tuut.
