1. How come we sked sometimes?

 ERYBODY get sked sometimes. But cuz we know wat da Bible teach, we not sked of da guys who wen mahke, da demons, o wat going happen bumbye. Still yet, da time we stay living is hard cuz get wars, crime, an peopo getting sick. (Luk 21:11) Maybe we sked of guys inside da govament dat presha us, o even oua ohana who no like us serve Jehovah. Some peopo worry dey no going be able fo hando dea problems now, o da kine dey might get layta on.

2. Wat wen happen to David wen he was in Gat?

² Had times wen David was sked. Like wen King Saul was trying fo hunt um down an wanted fo kill um, David wen dig out to Gat, da city of da Filisha peopo. Akish, da Gat king, wen find out dat David was da warrior who wen “wack down ten tousans” of da Filisha guys. Dass why David “wen come plenny sked.” (1 Sam 21:10-12) He was stressing about wat Akish was going do to him. Wat wen help David fo no be sked?

3. From wat Songs Fo God 56:1-3, 11 say, how David wen get ova being sked?

³ In Songs chapta 56 David wen tell how he wen feel wen he was in Gat. David wen say in dat song how come he was sked an wat wen help him get ova being sked. David wen trus Jehovah wen he was feeling lidat. (Read um Songs Fo God 56:1-3, 11.) He had plenny reasons fo trus Jehovah. Jehovah wen bless David’s plan dat wen  seem kinda off, he wen ack like he was pupule! Afta dat had happen, Akish neva like kill David, he jus wanted um fo get los. Dass how David was able fo get outa dea.​—1 Sam 21:13–22:1.

4. How we can make oua trus in Jehovah moa strong? Try tell one exampo.

⁴ If we trus Jehovah, us too can get ova being sked. But how we make oua trus in Jehovah moa strong, speshly wen we sked? Try picha dis. If you find out you real sick, ony natural fo be sked at firs. But if you trus yoa docta, you going feel litto bit moa betta. Maybe he wen help plenny guys befoa dat wen have da same kine sick az you. He lissen to you good an dat make you feel like he full on undastan how you feel. An he tell you about doing someting dat wen help plenny odda peopo. Same ting lidat, we can make oua trus in Jehovah moa strong wen we tink about all da stuff he wen do befoa, wat he stay doing now, an wat he going do bumbye. Dass wat David wen do. Wen we check out some of da words dat stay in Songs Fo God 56, try tink about how you can make yoa trus in Jehovah moa strong an how you can get ova da stuff you sked of.

WAT JEHOVAH WEN DO BEFOA?

5. Wat David wen tink about wen he was sked? (Songs Fo God 56:12, 13)

⁵ Wen David’s life was still yet on da line, he wen tink about wat Jehovah wen do befoa. (Read um Songs Fo God 56:12, 13.) Dass how David had tink his whole life. Like wen he had tink about all da tings Jehovah wen make, he wen see how much powa Jehovah get an how much he kea about peopo. (Songs 65:6-9) Anodda ting David wen tink about was wat Jehovah wen do fo oddas. (Songs 31:19; 37:25, 26) An he speshly wen tink about wat Jehovah wen do fo him befoa. Jehovah wen keep David safe an take kea him since he was one small bebe. (Songs 22:9, 10) Garuntee, tinking about all dat wen make David’s trus in Jehovah moa strong!

6. Wat going help us fo trus Jehovah wen we sked?

 ⁶ Wen you sked, try tink about da tings Jehovah wen do befoa. Tink about all da stuff he wen make. Like, “try look” how Jehovah take kea da birds an da flowas. He neva make dem fo have qualities like him, an dey no can worship him. But if he take kea dem, he going take kea us way moa (Mat 6:25-32, New World Translation.) Den try tink about wat Jehovah wen do fo his followas. Can study about somebody in da Bible who wen show unreal faith, o about somebody oua time who serve Jehovah. a On top of dat, try tink hard about how Jehovah wen awready take kea you. How he wen help you fo come in da trut? (John 6:44) How he wen ansa yoa prayers? (1 John 5:14) An cuz He wen sacrifice His Boy, how you benefit from dat eryday?​—Efe 1:7; Heb 4:14-16.

7. How tinking about Daniel wen help Vanessa no be sked?

⁷ One sistah in Haiti name Vanessa, b wen go thru someting real skery. One guy dat live by her wen try presha her fo get wit him, so he wen call an send her messages eryday. Vanessa wen straight up shut um down. But da guy wen start fo get agro, an even wen threaten fo hurt her. She wen say, “I was sked.” So wat Vanessa wen do? She wen do wat she could do fo proteck herself. An one elda wen help her fo get in touch wit da authorities. Anodda ting she wen do was look how Jehovah wen proteck his guys befoa. Vanessa wen say, “Da firs guy I wen tink about was Daniel. He wen get thrown inside da hole wea da lions stay even tho he neva do notting wrong. But Jehovah wen take kea him. I wen ask Jehovah fo make da guy stop tinking about me, cuz neva have notting else I could do awready. Afta dat, I wasn’t sked anymoa.”​—Dan 6:12-22.

WAT JEHOVAH DOING NOW?

8. Wat David wen know fo shua? (Songs Fo God 56:8)

⁸ Wen David’s life was on da line wen he was in Gat, he neva get sked an panic. Wat he wen do was tink about wat Jehovah was doing fo him dat time. David knew dat Jehovah was showing him wat fo do, was keeping um safe, an wen undastan how he wen feel. (Read um Songs Fo God 56:8.) An David had good frenz dat was backing him up, like Jonathan, an da Main Pries Ahimelek wen help him too. (1 Sam 20:41, 42; 21:6, 8, 9) An even wen King Saul was trying fo kill David, he wen get away. He wen know fo shua dat Jehovah had see eryting dat was going on an how he wen feel.

9. Wat Jehovah see about ery one of us?

⁹ Wen you going thru one hard time, someting dat make you sked, rememba Jehovah know wat you going thru an how da ting make you feel. One exampo of dat is how Jehovah wen see da Israel peopo in Egypt, how dey was being treated bad, an “how plenny dey suffa.” (Egypt 3:7) David wen sing dat Jehovah had see da “hard times” he wen get an how he “stay all sore inside.” (Songs  31:7) An wen God’s peopo wen suffa, even cuz was dea own fault cuz da stupid choices dey wen make, “He suffa too.” (Isa 63:9) Wen you sked, Jehovah undastan how you feel an He no can wait fo help you so dat you not going be sked anymoa.

10. How you know fo shua Jehovah kea about you an dat he going help you hando?

¹⁰ Wen you going thru someting skery, maybe you no see how Jehovah helping you. Go ask him fo help you see wat he stay doing fo you. (2 Ki 6:15-17) Den try tink, somebody wen give one talk o make one comment at da meeting dat wen build you up? Get one Bible tool, one video, o one original song dat wen make you feel good? Somebody wen share one scripcha dat wen make you feel betta? Sometimes easy fo take fo granted all da love an aloha oua braddahs an sistahs show us, an da spiritual food we get. But all dat is awesome gifs from Jehovah. (Isa 65:13; Mar 10:29, 30) Dey show dat he really kea about you. (Isa 49:14-16) All dis prove dat you can trus him.

11. Wat wen help Aida fo get ova da stuff she was sked of?

¹¹ Aida, one sistah who live Senegal, wen see how Jehovah wen malama her wen she was going thru someting hard. Cuz she was da oldes kid in her family, her parents wen expeck her fo make nuff money fo take kea her an dem. Afta she wen make her life moa simpo fo pionea, Aida was broke. Her ohana was mad at her an wen put her down. She wen say, “I was sked dat I couldn’t take kea my parents an dat erybody was going turn dea back on me. I wen even blame Jehovah fo letting tings get so bad.” Den she wen hear one talk at da meeting. “Da braddah wen remind me dat wateva we go thru, Jehovah can see um. Afta a while, cuz of wat da eldas an oddas wen tell me, I wen know dat Jehovah wen love me. Wen I wen pray, I knew Jehovah was  going help me, an I wen feel peace, an I wen see how he wen ansa my prayers.” Layta on, Aida wen find one job dat wen help her take kea herself, her parents, an oddas. She wen say, “I wen learn fo trus in Jehovah full on. Now wen I pray, all da stuff I stay sked of is gone.”

WAT JEHOVAH GOING DO BUMBYE?

12. From Songs Fo God 56:9, wat David wen know was garans?

¹² Read um Songs Fo God 56:9. Dis verse show anodda ting dat wen help David wen he was sked. Even tho his life was still yet on da line, he wen tink about wat Jehovah was going do fo him bumbye. Cuz Jehovah wen say dat David was going be da nex king of Israel, he wen know dat Jehovah was going save him wen da time was right. (1 Sam 16:1, 13) David wen know dat wateva Jehovah wen promise was garans.

13. Wat we know fo shua Jehovah going do?

¹³ Wat Jehovah wen promise fo do fo you? We no expeck him fo proteck us from all oua problems. c But rememba, wateva hard time we get now, Jehovah going hemo all dat in da new world. (Isa 25:7-9) Jehovah is strong enuff fo make da guys who wen mahke come back alive, fo take away oua sick, an fo get rid of da guys who go agains us.​—1 John 4:4.

14. Wat we can tink about?

¹⁴ Wen you start fo feel sked, tink about wat Jehovah going do bumbye. Tink about how you going feel wen no moa Satan, no moa bad peopo, an ony going get good peopo, an slowly we going come moa perfeck eryday. One demo at da 2014 big kine meeting wen show how we can tink about oua hope. One faddah wen talk story wit his ohana about how da words in 2 Fo Timoty 3:1-5 would be diffren if wen talk about how da paradise going be. “In da new world, nobody going presha out. Peopo going tink da odda guy is moa importan den dem, dey going love da trut, know dea limits, be humbo, tell how awesome God stay, lissen to dea maddah an faddah, tell mahalo, be loyal, get love an aloha fo dea ohana, dey going agree, talk good about peopo, control demself, be gentle kine, love wass good, can trus um, dey flexible, dey no going ack big head, dey going love God an do wat he like radda den wat dey like, an dey going do wat God like cuz dey like make him happy. You gotta stay wit dat kine peopo.” You talk story wit yoa ohana an yoa frenz about wat life going be like in da new world?

15. Wat wen help Tanja get ova wat she was sked of an stick to Jehovah?

¹⁵ One sistah in North Macedonia name Tanja wen get ova da stuff she was sked of by tinking about da blessings she going get bumbye. Her parents was full on agains her studying da Bible. She wen tell, “Some of da tings I was sked of, wen happen. My maddah wen lick me afta ery meeting. My parents wen threaten fo kill me if I wen come one Witness Fo Jehovah.” Den, Tanja’s parents wen throw her out da house. Wat she wen do? She say, “I wen tink about how if I stick close to Jehovah, I going be happy foeva. An wateva I lose now, Jehovah going bless  me fo um layta on. An all da bad tings dat wen happen, I not going even rememba dem.” Tanja wen stick wit Jehovah an he wen help her find one place fo live. Today, Tanja stay married to one faithful braddah an dey happy fo serve Jehovah togedda full time.

MAKE YOA TRUS MOA STRONG NOW

16. Wat going help us fo show courage wen we see da stuff in Luke 21:26-28 happen?

¹⁶ Wen da big trouble come, plenny “peopo goin pass out cuz dey so sked.” But God’s peopo going show courage an stay solid. (Read um Luke 21:26-28.) How come dey going be lidat? Cuz dey wen awready learn fo trus Jehovah. Tanja, da sistah we wen talk about earlia, say dat wat she wen go thru befoa help fo face odda hard stuff. She wen say, “No moa notting dat Jehovah no can help us get thru. Sometimes look like odda peopo stay in control, but da trut is dey ony get az much control az Jehovah let um have. An even tho wat we going thru is supa hard, it going pau.”

17. How da 2024 yeartext kokua us? (Go look da picha on da cova.)

¹⁷ Today, az one normal ting fo be sked. But jus like David, we no need let um control us. David’s prayer to Jehovah is da 2024 yeartext, “Any time I stay sked, you da one I trus.” (Songs 56:3) One book dat write about da Bible wen say about dis verse, “David neva keep tinking about da tings dat wen make him sked, o about his pilikia. Radda, he wen trus da One who was going save him.” In da months dass coming up, try tink about oua yeartext, speshly wen you going thru stuff dat make you sked. Make time fo tink about wat Jehovah wen do befoa, wat he doing now, an wat he going do bumbye. Den jus like David, you can say, “I stay trus God. Az why I no stay sked.”​—Songs 56:4.