1. Nama kebuah kitai kekadang engka berasai takut?

 SEMUA orang kekadang berasai takut. Suba kitai engka takutka orang ke udah mati, bala melikat ti jai, sereta utai ke deka nyadi jemah ila. Tang pengudah belajarka Bup Kudus, kitai enda takutka utai tu agi. Kitai mega idup ba maya ti tusah. Nyadi, kitai engka berasai takut laban bisi perang, jenayah, enggau penyakit. (Luk. 21:11) Kitai mega engka takutka mensia, baka piak ti bekuasa ke nekan kitai, tauka diri sebilik ke nyakal pengarap ti bendar. Ke bukai engka irau enti sida enda ulih tan napi penanggul ke dikembuan sida diatu, tauka penanggul ke deka ditapi sida dudi hari.

2. Terangka situasi David lebuh iya ba Gat.

² Bisi maya iya, David berasai takut. Bisi sekali, lebuh Raja Saul begagaika iya lalu deka munuh iya, David ngerarika diri ngagai kuta orang Pilistin ba Gat. Raja Akis, ke merintah Gat, nyau nemu David meh ke udah munuh “bepuluh ribu iku” orang Pilistin. Ketegal nya, David berasai “takut amat.” (1 Sam. 21:​10-12) Iya takut enggau utai ti deka dikereja Akis ngagai iya. Nama nulung David nyadi berani taja pan iya berasai takut?

3. Nitihka Masmur 56:​1-3, 11, nama nulung David nyadi berani taja pan iya berasai takut?

³ Ba Masmur 56, David madahka asai ati iya lebuh iya ba Gat. Dalam masmur nya, David enggau terang madahka kebuah iya berasai takut. Tang, iya mega nerangka utai ke nulung iya badu agi berasai takut. Lebuh David berasai takut, iya arapka Jehovah. (Bacha Masmur 56:​1-3, 11.) David bisi kebuah ti manah  arapka Jehovah. Enggau tulung ari Jehovah, David ngaga siti pelan ti nyelai. Iya pepura nyadi gila, lalu pelan nya mujur. Ketegal nya, Raja Akis enggai agi munuh David, tang iya muru David! Nya alai, David ulih ngerarika diri.—1 Sam. 21:13–22:1.

4. Baka ni kitai ulih arap agi ke Jehovah? Padahka siti chunto.

⁴ Kitai mega ulih mutarka asai takut enti kitai arapka Jehovah. Tang baka ni kitai ulih arap agi ngagai Jehovah, kelebih agi lebuh kitai berasai takut? Peratika siti chunto. Enti nuan nemu nuan bisi penyakit, keterubah iya nuan engka berasai takut. Tang, nuan deka berasai tenang agi enti nuan arapka lutur nuan. Iya udah ngeraika mayuh pesakit ke bisi penyakit ti sama. Iya ninga enggau manah lebuh nuan madahka asai ati nuan. Lalu, nuan ulih ngasaika pengibuh iya ngagai nuan. Iya mega engka ngasuh nuan nitihka siti chara berubat ke udah ngeraika mayuh orang. Baka nya mega, kitai ulih arap agi ke Jehovah lebuh kitai beratika utai ke udah dikereja Iya, utai ke benung dikereja Iya diatu, sereta utai ke deka dikereja Iya ke kitai jemah ila. Nya meh utai ke dikereja David. Seraya kitai beratika sekeda utai ti dipadah iya ba Masmur 56, perundingka chara nuan mega ulih arap agi ke Jehovah sereta mengkang tenang lebuh nuan berasai takut.

NAMA UTAI KE UDAH DIKEREJA JEHOVAH?

5. Lebuh David berasai takut, nama utai ti diperundingka iya? (Masmur 56:​12, 13)

⁵ Taja pan David napi situasi ti bahaya, tang iya terus berundingka utai ti manah ke udah dikereja Jehovah. (Bacha Masmur 56:​12, 13.) Nya meh utai ti dikereja David sepemanjai pengidup iya. Ambika chunto, kekadang iya berundingka utai ti udah digaga Jehovah. Tu ngingatka iya, Jehovah amat bekuasa lalu Jehovah amat rinduka mensia. (Mas. 65:​6-9) David mega belematika utai ti udah dikereja Jehovah ke orang bukai. (Mas. 31:19; 37:​25, 26) Lalu iya mega belematika utai ti udah dikereja Jehovah ke iya. Jehovah udah nulung sereta nyaga David kenyau ari maya David agi mit. (Mas. 22:​9, 10) Endang amat, lebuh David berunding pasal semua utai tu, nya nulung iya arap agi ke Jehovah!

6. Lebuh kitai berasai takut, nama deka nulung kitai arapka Jehovah?

 ⁶ Lebuh nuan berasai takut, tanya diri empu, ‘Nama utai ke udah dikereja Jehovah?’ Kena nyaut tanya nya, belematika meh utai ke udah digaga Iya. Ambika chunto, “peratika” burung enggau bungai ke digaga Jehovah. Taja pan sida enda digaga enggau sifat Petara, lalu enda ulih nyembah Iya, tang Jehovah agi nyaga sida. Enti pia, Jehovah tentu deka nyaga kitai. Lebuh kitai belematika tu, nya deka meransang kitai arap agi ke Jehovah. (Mat. 6:​25-32) Perundingka mega utai ti udah dikereja Jehovah ke bala penyembah Iya. Nuan engka bisi belajarka siti watak Bup Kudus ke ngayanka pengarap ti besai. Tauka, nuan engka bisi macha pengalaman siku nembiak Jehovah kemayaharitu. a Kelimpah ari nya, belematika meh chara Jehovah udah nyaga nuan. Baka ni Jehovah udah nulung nuan ngelala Iya? (Jhn. 6:44) Baka ni Jehovah udah nyaut sampi nuan? (1 Jhn. 5:14) Nama penguntung ke diulih nuan ninting hari ketegal genselan tebus Anak ti dikerinduka Iya?—Eps. 1:7; Heb. 4:​14-16.

7. Baka ni pengalaman Nabi Daniel nulung Vanessa badu agi berasai takut?

⁷ Vanessa, b siku menyadi indu ba Haiti, napi situasi ti amat ngenakutka. Siku lelaki ba kandang endur iya diau, nelefon sereta nganjung mesej ngagai iya ninting hari. Lelaki nya ngansak Vanessa nyadi pangan iya. Vanessa enggau terang madahka diri enggai ngereja nya. Taja pia, lelaki nya nyadi majak kasar. Iya indah ngugut deka ngemediska Vanessa. Ku Vanessa: “Aku berasai amat takut.” Nama utai ke dikereja Vanessa? Iya ngereja semua utai ke ulih iya kena nyaga diri empu. Siku tuai gempuru nulung iya ngiga piak ti bekuasa. Tang ba maya ti sama, Vanessa mega betumpu ba chara Jehovah udah nyaga bala nembiak Iya kelia. Ku Vanessa ngenang baru: “Orang keterubah ti diperundingka aku nya Nabi Daniel. Taja pan iya enda besalah, tang iya dibuai ngagai lubang singa. Dalam lubang singa nya, bisi mayuh singa ti lapar. Tang Jehovah nutup mulut semua singa nya. Nyadi, aku minta Jehovah ngasuh lelaki nya badu agi berunding pasal aku, lalu mutarka penanggul nya ke aku laban nadai utai ke ulih dikereja aku agi. Pengudah nya, aku enda agi berasai takut.”—Dan. 6:​12-22.

NAMA UTAI KE BENUNG DIKEREJA JEHOVAH DIATU?

8. Nama utai ti dikeandalka David? (Masmur 56:8)

⁸ Taja pan David napi situasi ti bahaya maya iya ba Gat, tang iya enda betumpu ba utai ke ngenakutka iya. Iya berundingka utai ke benung dikereja Jehovah ke iya ba maya nya. David ulih ngasaika iring sereta jaga ari Jehovah. Lalu iya mega nemu, Jehovah meretika asai ati iya. (Bacha Masmur 56:8.) David mega bisi bala kaban ti manah, baka Jonatan enggau Imam Besai Ahimelek, ke meransang sereta nulung iya. (1 Sam. 20:​41, 42; 21:​6, 8, 9) Taja pan Raja Saul deka munuh iya, tang David ulih ngerarika diri. Iya andal, Jehovah nemu utai ke benung nyadi ba iya sereta asai ati iya.

9. Nama utai ti diperatika Jehovah pasal tiap iku kitai?

⁹ Lebuh nuan napi penguji ke ngasuh nuan berasai takut, kingatka meh, Jehovah ukai aja beratika penguji nya, tang Iya mega beratika asai ati nuan lebuh nuan napi penguji nya. Ambika chunto, lebuh orang Israel napi utai ti enda lurus ba Ejip, Jehovah ukai aja beratika utai nya, tang Iya mega beratika “pemedis ke ditapi sida.” (P-sut. 3:7) David madahka, Jehovah  meda “pemerinsa” enggau “penusah” iya. (Mas. 31:7) Lalu lebuh nembiak Petara merinsa, indah ketegal pemutus ti beli ke digaga sida, Jehovah “ninga sida lebuh sida nyabak, lalu Iya ibuhka penusah sida.” (Mas. 106:44) Amat, Jehovah nemu asai ati nuan lebuh nuan berasai takut. Lalu Iya keran deka nulung nuan ngambika nuan ulih mutarka asai takut nya.

10. Nama kebuah nuan pechaya Jehovah ibuhka nuan sereta deka nulung nuan napi sebarang penguji?

¹⁰ Enti nuan benung napi siti penguji ti ngenakutka, nuan engka enda sedar Jehovah benung nulung nuan. Nyadi, nama ulih digaga nuan? Besampi minta tulung ari Iya ngambika nuan ulih meda chara Iya nyukung nuan. (2 Raj. 6:​15-17) Udah nya, perundingka tu: Kati bisi cheramah tauka komen ba gempuru ke udah ngeringka nuan? Kati bisi litaricha, video, tauka lagu asal ke udah meransang nuan? Kati bisi bala menyadi ke meransang nuan tauka bekunsika ayat Bup Kudus ti negapka nuan? Kitai engka enda sedar pengerindu ari bala menyadi Kristian sereta peransang ari Jaku Petara udah mayuh nulung kitai. Tang semua nya pemeri ti spesial ari Jehovah. (Isa. 65:13; Mrk. 10:​29, 30) Tu nunjukka Jehovah ibuhka nuan. (Isa. 49:​14-16) Lalu tu mega nunjukka kitai ulih pechayaka Jehovah.

11. Nama nulung Aida mutarka asai ati iya ti takut?

¹¹ Aida, ke diau ba Senegal, bisi beratika chara Jehovah nyukung iya lebuh iya napi siti penguji. Ketegal iya anak tuai, apai indai iya ngarapka iya bulih kereja ti manah ngambika iya ulih ngintu diri empu sereta apai indai iya. Tang pengudah iya ngaga ubah ba pengidup iya ngambika ulih nyadi pengerintis, Aida bisi penanggul ba duit. Tu ngasuh diri sebilik iya ringat enggau iya sereta bejaika iya. Ku Aida madahka: “Aku takut enti aku enda ulih nulung apai indai aku lalu semua orang deka bejaika aku. Aku indah nyalahka Jehovah laban situasi aku majak balat.” Tang udah nya, iya bisi ninga siti cheramah ba gempuru. Ku Aida: “Pencheramah nya ngingatka kami, Jehovah nemu utai ti ngasuh kitai takut tauka irau. Belubah-lubah, nengah nasihat ari bala tuai gempuru sereta orang bukai, aku ulih ngasaika baru pengerindu Jehovah. Lebuh aku besampi ngagai Jehovah, aku andal agi Iya deka nulung  aku. Lalu aku berasai lantang lebuh aku meda sampi aku disaut.” Nyau kelama, Aida tetemuka kereja ti manah ke ulih nulung iya terus nyadi pengerintis sereta nulung apai indai iya ari segi kewangan. Ku Aida baru: “Aku belajar aku ulih pechayaka Jehovah enggau pengabis ati. Diatu, pengudah aku besampi, asai ati ti takut kesuah iya nadai agi.”

NAMA DEKA DIKEREJA JEHOVAH JEMAH ILA?

12. Nitihka Masmur 56:​9, nama utai ti dikeandalka David?

¹² Bacha Masmur 56:9. Ayat tu madahka siti agi utai ke nulung David lebuh iya berasai takut. Taja pan nyawa iya dalam bahaya, tang iya belematika utai ke deka dikereja Jehovah ke iya jemah ila. David nemu Jehovah deka nyelamatka iya ba maya ti ngena, laban Jehovah madah David deka nyadi raja orang Israel. (1 Sam. 16:​1, 13) Ba David, semua utai ti disemayaka Jehovah tentu deka nyadi.

13. Nama utai ti ulih dikeandalka kitai ba Jehovah?

¹³ Nama utai ke udah disemayaka Jehovah ke nuan? Endang amat, kitai enda ngarapka Jehovah ngelindung kitai ari semua penusah. c Tang kingatka meh, sebarang penguji ke ditapi nuan ba dunya tu deka nadai agi ba dunya baru. Jehovah deka muai iya. (Isa. 25:​7-9) Petara ke ngaga kitai tentu ulih ngidupka baru orang ke udah mati, ngeraika kitai ari semua macham penyakit, muai semua utai ke ngasuh kitai tusah ati, sereta ngemunaska semua orang ke nyakal Iya.—1 Jhn. 4:4.

14. Nama utai ke ulih dibelematika kitai?

¹⁴ Lebuh nuan berasai takut, belematika meh utai ke deka dikereja Jehovah jemah ila. Maya nya, Sitan deka nadai agi. Orang ti jai deka dirusak, lalu semina orang ti lurus aja ke diau ba dunya tu. Lalu, kitai mega belubah-lubah nyadi sempurna. Gambarka meh asai ati nuan ba maya nya. Ba program konvensyen 2014, bisi siti lakun ke nunjukka chara kitai ulih belematika harapan kitai. Ba lakun nya, siku apai berandau enggau diri sebilik iya pasal 2 Timoti 3:​1-5. Iya ngubah ayat nya kena nunjukka utai ti deka nyadi ba dunya Paradais. Ku iya madahka: “Ba dunya baru, maya ti amat ngagaka ati deka datai. Orang deka rinduka orang bukai, rinduka pekara ti bekaul enggau sembah ngagai Petara, baruh ati, muji Petara, ngasika apai indai, beterima kasih, setia, ngembuan penyayau ti dalam ngagai diri sebilik, deka ninga penemu orang bukai, seruran nyebut utai ti manah pasal orang bukai, ulih nagang diri, nelap, rinduka utai ti manah, tau dikearap, nemu ngalahka diri, enda sumbung, rinduka Petara lebih agi ari ngelantangka ati diri, nyembah Petara enggau pengabis ati. Terus meh semak enggau orang ke baka nya.” Au, berandau meh enggau diri sebilik tauka bala menyadi Kristian ke bukai pasal gaya pengidup ba dunya Paradais.

15. Taja pan Tanja berasai takut, nama utai ke nulung iya mengkang tetap ati?

¹⁵ Tanja, siku menyadi indu ba Masedonia Utara, mutarka asai ati iya ti takut lebuh iya belematika berekat ti deka diterima iya jemah ila. Apai indai iya balat nyakal iya ketegal iya belajarka Bup Kudus. Ku iya ngenang baru: “Sekeda utai ke dikenangika aku amat nyadi. Indai aku malu aku tiap kali pengudah gempuru. Apai indai aku ngugut deka munuh aku enti aku nyadi siku Saksi.” Ke pengujung iya, Tanja mega diburu ari rumah iya. Nama reaksi iya? Iya madah: “Aku fokus ngagai pengaga ati ti deka diasaika aku belama iya enti aku tetap ati. Aku mega berundingka upah ti deka diberi Jehovah ngagai aku ba dunya baru ketegal semua utai ke engka dilengkaka aku diatu. Lalu semua utai ti jai ke ditapi aku diatu enda dikingatka  agi.” Tanja mujur ngetanka penetap ati iya ngagai Jehovah. Lalu enggau tulung ari Jehovah, iya ulih tetemuka endur diau. Diatu, Tanja udah kawin enggau siku menyadi lelaki ti tetap ati, lalu seduai iya gaga ati gawa penuh jam ke Jehovah.

MAJAK AGI ARAPKA JEHOVAH ARI DIATU

16. Nama deka nulung kitai mengkang berani seraya kitai meda utai ba Luke 21:​26-28 dikeamatka?

¹⁶ Maya Penusah ti Besai, orang “deka luput laban takut.” Tang bala nembiak Petara deka mengkang tegap sereta berani. (Bacha Luke 21:​26-28.) Nama kebuah kitai enda takut? Laban kitai udah belajar arapka Jehovah. Tanja, ke disebut tadi madahka, utai ke ditapi iya suba nulung iya napi situasi bukai ti tusah. Ku Tanja: “Aku belajar Jehovah ulih nulung kitai tan napi sebarang situasi, lalu Iya mega deka merekatka kitai. Kekadang kitai engka ngumbai orang bukai bekuasa, tang Jehovah bekuasa agi ari sida. Lalu, taja pan sesiti penguji nya tusah, tang iya deka abis.”

17. Baka ni ayat taun 2024 deka nulung kitai? (Peda gambar ba kulit majalah.)

¹⁷ Kemayaharitu, bisi mayuh utai ke ulih ngasuh kitai berasai takut. Tang baka David, kitai enggai nejuka asai ati ti takut ngawal kitai. Ayat taun 2024 kitai nya sampi David ngagai Jehovah: ‘Lebuh aku takut, aku manggaika pengarap aku ba Nuan.’ (Mas. 56:3) Ku siku pakar Bup Kudus madah pasal ayat tu: “David enda terus berunding pasal utai ke ngasuh iya takut, tauka pasal penanggul iya. Tang iya bepanggai ba Petara ti deka nyelamatka iya.” Terus meh berundingka ayat taun kitai, kelebih agi lebuh nuan benung napi situasi ti ngenakutka. Kena meh awak belematika utai ke udah dikereja Jehovah suba, utai ke benung dikereja Iya diatu, sereta utai ke deka dikereja Iya jemah ila. Lalu baka David, nuan mega ulih madah: ‘Aku manggaika pengarap aku ba Petara, lalu aku enda takut.’—Mas. 56:4.