1. Apay nga adda dagiti tiempo a mabutengtayo?

 ADDA dagiti tiempo a mabutengtayo amin. Siempre, gapu ta ammotayo ti isursuro ti Biblia, saantayon a mabuteng kadagiti natay, kadagiti demonio, ken kadagiti mapasamak iti masanguanan. Ngem agbibiagtayo pay laeng iti tiempo nga adda “dagiti nakabutbuteng a buya,” kas iti gubat, krimen, ken sakit. (Luc. 21:11) Baka mabutengtayo met kadagiti tattao, kas kadagiti agtuturay iti gobierno a mangidaddadanes kadatayo wenno uray kadagiti kapamiliatayo a bumusbusor iti pudno a panagdaydayaw. Adda met dagiti madanagan di la ket ta didanto maibturan ti agdama a pakasuotanda wenno dagiti posible a mapasamak kadakuada iti masanguanan.

2. Ania ti situasion ni David bayat nga adda idiay Gat?

² Adda dagiti tiempo a nagbuteng ni David. Kas pagarigan, idi kamkamaten ni Ari Saul tapno patayenna, nagkamang ni David iti Gat a siudad dagiti Filisteo. Di nagbayag, naammuan ti ari ti Gat a ni Akis a ni David ti nadakamat iti maysa a kanta a nangpapatay iti “pinullo a ribu” a Filisteo isu a “napalalo ti buteng [ni David].” (1 Sam. 21:​10-12) Nagdanag iti mabalin nga aramiden kenkuana ni Akis. Kasano a naparmek ni David ti butengna?

3. Sigun iti Salmo 56:​1-3, 11, kasano a naparmek ni David ti butengna?

³ Iti Salmo 56, imbaga ni David dagiti nariknana idi adda isuna idiay Gat. Iti dayta a salmo, imbagana no apay a mabuteng. Ngem imbagana met dagiti nakatulong kenkuana tapno maparmekna ti butengna. Idi mabuteng ni David, nagtalek ken Jehova. (Basaen ti Salmo 56:​1-3, 11.) Adda dagiti nasayaat a rason a nagtalek ni David ken Jehova. Iti tulong ni Jehova, nakapanunot  ni David iti karkarna ngem epektibo nga estratehia: Nagimbabagtit! Isu nga imbes a patayen isuna ni Akis, nasuron ken kayatna laengen a papanawen. Gapu iti dayta, nakalibas ni David.—1 Sam. 21:13–22:1.

4. Kasano a mapabilegtayo ti panagtalektayo ken Jehova? Iyilustrar.

⁴ Maparmektayo met ti butengtayo no agtalektayo ken Jehova. Ngem kasanotayo a mapabileg ti panagtalektayo ken Jehova, nangruna no mabutbutengtayo? Kitaentayo daytoy nga ilustrasion. No naammuam nga adda sakitmo, mabalin a mabutengka iti damo. Ngem maksayan ti butengmo no agtalekka iti doktormo. Baka adun ti napaimbagna a kasta ti sakitda. Bayat nga ibagbagam kenkuana dagiti pakadanagam, dengdenggennaka a naimbag. Mariknam a maawatannaka. Ken baka adda irekomendana a pamay-an ti panangagas a nangpaimbagen iti dadduma. Iti umasping a pamay-an, mapabilegtayo met ti panagtalektayo ken Jehova no utobentayo dagiti naaramidanna, ar-aramidenna, ken aramidennanto pay para kadatayo. Kasta ti inaramid idi ni David. Bayat nga us-usigentayo ti dadduma nga imbagana nga impaisurat ti Dios iti Salmo 56, panunotem no kasano met a mapabileg ti panagtalekmo ken Jehova tapno maparmekmo ti butengmo.

ANIA DAGITI NAARAMIDANEN NI JEHOVA?

5. Ania ti pinampanunot ni David tapno maparmekna ti butengna? (Salmo 56:​12, 13)

⁵ Nupay agpegpeggad pay laeng idi ti biag ni David, nagpokus kadagiti naaramidanen ni Jehova. (Basaen ti Salmo 56:​12, 13.) Dayta ti inaramid ni David iti intero a panagbiagna. Kas pagarigan, adda dagiti tiempo nga inutobna dagiti parsua ni Jehova a mangipalagip kenkuana iti kasta unay a pannakabalin ken panagayat ni Jehova kadagiti tattao. (Sal. 65:​6-9) Inutob met ni David dagiti naaramidanen ni Jehova para iti sabsabali. (Sal. 31:19; 37:​25, 26) Ken nangnangruna nga inutobna dagiti naaramidanen ni Jehova kenkuana a mismo. Tinulongan ken prinotektaran ni Jehova ni David sipud kinamaladagana. (Sal. 22:​9, 10) Sigurado a bimmileg ti panagtalek ni David ken Jehova gapu ta kanayon a dagita ti inutobna!

6. No mabutengtayo, ania dagiti makatulong kadatayo nga agtalek ken Jehova?

 ⁶ No mabutbutengka, isaludsodmo iti bagim, ‘Ania dagiti naaramidanen ni Jehova?’ Panunotem dagiti pinarsuana. Kas pagarigan, no “paliiwen[tayo]” no kasano nga ay-aywanan ni Jehova dagiti billit ken sabong—a saan a naparsua a kaladladawanna ken saanda a makapagdaydayaw kenkuana—bumileg ti panagtalektayo nga aywanannatayo met. (Mat. 6:​25-32) Panunotem met dagiti naaramidanen ni Jehova para kadagiti agdaydayaw kenkuana. Mabalinmo nga adalen ti maysa a karakter iti Biblia a naisangsangayan ti pammatina. Wenno mabalin a basaem ti kapadasan ti maysa nga agserserbi ken Jehova iti panawentayo. a Mabalinmo met nga utoben no kasano nga inaywanannaka ni Jehova. Kasanonaka a tinulongan tapno maammuam ti kinapudno? (Juan 6:44) Kasanona a sinungbatan dagiti kararagmo? (1 Juan 5:14) Kasano nga inaldaw a magunggonaanka iti subbot ti dungdungnguenna nga Anak?—Efe. 1:7; Heb. 4:​14-16.

7. Kasano a nakatulong ti kapadasan ni propeta Daniel tapno maparmek ni Vanessa ti butengna?

⁷ Nakabutbuteng ti kapadasan ti maysa a sister idiay Haiti a ni Vanessa. b Adda kalugaranna a lalaki nga inaldaw a tumawag ken agteks kenkuana. Pilpiliten dayta a lalaki a makiseks kenkuana. Ngem saan a kayat ni Vanessa. Isu a lalo a nagbalin nga agresibo dayta a lalaki ken pinangtaanna pay ketdi ni Vanessa. “Permi idi ti butengko,” imbagana. Ania ti inaramid ni Vanessa? Impamuspusanna a salakniban ti bagina. Tinulongan ti maysa a panglakayen a mangkontak iti autoridad. Ngem nagpokus met ni Vanessa no kasano a prinotektaran ni Jehova dagiti nagkauna nga adipenna. “Ti immuna a nalagipko ket ni propeta Daniel,” imbaga ni Vanessa. “Naitapuak iti rukib dagiti mabisin a leon uray awan basolna. Ngem sinalakniban ni Jehova. Kiniddawko ken Jehova nga isunan ti makaammo iti situasionko. Kalpasan dayta, saanakon a mabuteng.”—Dan. 6:​12-22.

ANIA DAGITI AR-ARAMIDEN NI JEHOVA?

8. Iti ania a kombinsido ni David? (Salmo 56:8)

⁸ Nakadeldelikado ti situasion idi ni David idiay Gat, ngem saan a nagpaabak iti buteng. Imbes ketdi, kanayonna a pinanunot dagiti ar-aramiden ni Jehova para kenkuana iti dayta a gundaway. Narikna ni David nga iwanwanwan, protprotektaran, ken maawatan ni Jehova ti marikriknana. (Basaen ti Salmo 56:8.) Impaayan met ni Jehova ni David kadagiti napudno a gagayyem a kas ken Jonatan ken ti Nangato a Padi a ni Ahimelec a nangpabileg ken timmulong kenkuana. (1 Sam. 20:​41, 42; 21:​6, 8, 9) Ken uray no kayat ni Ari Saul a papatayen ni David, isu ket nakalibas. Kombinsido isuna nga ammo ni Jehova ti eksakto a mapaspasamak kenkuana ken ti marikriknana.

9. Ania ti makitkita ni Jehova iti tunggal maysa kadatayo?

⁹ No mabutbutengka gapu iti maysa a pakasuotan, laglagipem a makitkita dayta ni Jehova ken ammona ti marikriknam gapu iti dayta. Kas pagarigan, saan laeng a nakita ni Jehova ti pannakamaltrato dagiti Israelita idi addada idiay Egipto, no di ket uray met “dagiti panagrigrigatda.” (Ex. 3:7) Inkanta ni David a nakita ni Jehova ti “panagrigrigat[na]” ken ti “nakaro a panagladingit[na].” (Sal. 31:7) Isu a no maparigatan dagiti adipen ti Dios—uray no resulta  dayta ti kamali a desisionda—‘maparigatan met.’ (Isa. 63:9) Isu a no mabutbutengka, maawatan ni Jehova ti marikriknam ken magagaran a tumulong kenka tapno maparmekmo ti butengmo.

10. Apay a kombinsidoka a makitkitanaka ni Jehova ken tulongannaka tapno mapagballigiam ti aniaman a pakasuotan?

¹⁰ No maipasangoka iti nakabutbuteng a pakasuotan, baka saanmo a makita no kasano a tultulongannaka ni Jehova. Ania ti aramidem? Ikararagmo a tulongannaka tapno makitam ti tulongna. (2 Ar. 6:​15-17) Kalpasanna, panunotem: Adda kadi palawag wenno komento iti gimong a nakaparegtaak? Naparegtaak kadi iti maysa a publikasion, video, wenno orihinal a kanta? Adda kadi nangiranud kaniak iti makaliwliwa a punto wenno teksto? Baka nalakatay la a malipatan ti ayat dagiti nadungngo a kakabsattayo ken ti maaw-awattayo a naespirituan a taraon. Ngem dagita ket espesial a regalo ni Jehova. (Isa. 65:13; Mar. 10:​29, 30) Pammaneknek dagita a maseknan kenka. (Isa. 49:​14-16) Ebidensia met dagita a maikari isuna a pagtalkam.

11. Ania ti nakatulong ken Aida a mangparmek iti butengna?

¹¹ Nakita ni Aida a taga-Senegal no kasano a tinulongan ni Jehova bayat ti maysa a pakasuotan. Gapu ta isu ti inauna, ekspektaren dagiti nagannakna nga isu ti agsapul iti kuarta para kadakuada ken para iti bagina. Ngem gapu ta pinasimple ni Aida ti biagna tapno makapagpayunir, nagproblema iti pinansial. Permi ti unget kenkuana ti pamiliana isu nga inuyawda. Imbagana: “Mabutengak amangan no saanko a matulongan dagiti nagannakko ken tallikudandakon ti amin. Pinabasolko pay ketdi ni Jehova gapu ta impalubosna a kumaro unay ti situasionko.” Idi kuan, adda nangngegna a palawag iti gimong. “Impalagip ti ispiker nga ammo ni Jehova dagiti rason a nasugatan ti pusotayo. Gapu iti balakad dagiti panglakayen ken ti dadduma, in-inut a nariknak manen ti ayat ni Jehova. Idi nagkararagak ken Jehova, nataltalgeden ti riknak a tulongannak ken kimmalma ti riknak ta nakitak a masungsungbatan dagiti kararagko.” Idi agangay, nakasarak ni Aida iti trabaho nga umdas a mangsuporta iti kinapayunirna, kadagiti nagannakna, ken iti  sabsabali. “Nasursurok ti naan-anay nga agtalek ken Jehova,” kunana. “Ita, kada malpasak nga agkararag, masansan a mapukawen dagiti pagbutbutngak.”

ANIANTO PAY TI ARAMIDEN NI JEHOVA?

12. Sigun iti Salmo 56:​9, ania ti masigurado ni David?

¹² Basaen ti Salmo 56:9. Ipakita daytoy a bersikulo ti sabali pay a nakatulong ken David tapno malabananna ti butengna. Uray no agpegpeggad idi ti biagna, inut-utobna dagiti aramidento pay ni Jehova para kenkuana. Ammo ni David nga isalakan isuna ni Jehova iti umiso a tiempo. Ngamin, indeklaran ni Jehova a ni David ti sumaruno nga agari iti Israel. (1 Sam. 16:​1, 13) Para kenkuana, aniaman nga inkari ni Jehova ket sigurado a matungpal.

13. Ania ti masiguradotayo nga aramiden ni Jehova para kadatayo?

¹³ Ania ti inkari ni Jehova nga aramidenna para kenka? Saantayo a namnamaen nga isalakannatayo iti amin a problema. c Ngem aniaman a pakasuotan ti pakaipasanguam iti daytoy a sistema ti bambanag, ikkatento dagita ni Jehova inton umay ti baro a lubong. (Isa. 25:​7-9) Sigurado a kabaelan ti Namarsua kadatayo a pagungaren dagiti natay, paimbagen ti amin a sakit ken saem a marikriknatayo, ken pukawen ti amin a bumusbusor.—1 Juan 4:4.

14. Ania dagiti mabalintayo nga utoben?

¹⁴ No mabutengka, utobem dagiti aramidento ni Jehova iti masanguanan. Panunotem ti mariknam inton awanen ni Satanas, inton masuktanen dagiti dakes a tattao kadagiti nalinteg a tattao, ken inton inaldaw nga in-inut a mapukawen ti kinaimperpekto. Iti maysa a demostrasion iti 2014 a rehional a kombension, naipakita no kasano a mabalintayo nga utoben ti namnamatayo. Inlawlawag ti maysa nga ama iti pamiliana no kasano ti sabalin a pannakaibaga ti 2 Timoteo 3:​1-5 no kas pagarigan ta mausar dagitoy a naipakpakauna a bersikulo a tumukoy kadagiti mapasamakto iti Paraiso: “Iti baro a lubong dumtengto dagiti kararagsakan a tiempo. Ta dagiti tattao managayatdanto iti sabsabali, managayat iti naespirituan a kinabaknang, naemma, napakumbaba, managdaydayaw iti Dios, natulnog kadagiti nagannak, managyaman, napudno, addaan iti dakkel a panagayat kadagiti pamiliada, sidadaan iti tulagan, kanayon a nasayaat ti ibagbagada maipapan iti sabsabali, managteppel, naalumamay, managayat iti kinaimbag, mapagtalkan, managpabus-oy, napakumbaba, managayat iti Dios imbes a managayat iti ragragsak, nga addaanda iti pudpudno a nadiosan a debosion; ket agtalinaedka a nasinged kadagitoy a tattao.” Pagiinnestoriaanyo kadi a sangapamiliaan wenno kadagiti kakabsat no kasanonto ti biag iti baro a lubong?

15. Uray mabutbuteng ni Tanja, ania ti nakatulong kenkuana a mangparmek iti butengna?

¹⁵ Ni Tanja a sister a taga-North Macedonia nalabananna dagiti pagbutbutnganna ta pinampanunotna dagiti bendision iti masanguanan. Nakaro ti panangbusor dagiti nagannakna iti panagadalna iti Biblia. Inyestoriana: “Dadduma kadagiti pagbutbutngak a mapasamak ket napasamak. Kabilennak ni Nanang kada agawidak kalpasan ti gimong. Pinangtaandak pay dagiti nagannakko a patayendak no agbalinak a Saksi ni Jehova.” Idi agangay, pinapanawda ni Tanja iti balayda. Ania ti reaksionna? Imbagana: “Nagpokusak no kasanoakto karagsak iti agnanayon gapu ta pinilik ti agtalinaed a matalek. Pinampanunotko met no kasano a suktan ni Jehova inton baro a lubong ti amin a nalabit mapukawko iti daytoy a sistema, ken ditayton malagip dagiti dakes a  napasamak.” Talaga a nagtalinaed a matalek ni Tanja. Ken iti tulong ni Jehova, nakasarak iti pagyananna. Ita, naragsaken ni Tanja nga agserserbi iti amin-tiempo a ministerio a kadua ti matalek nga asawana.

PATIBKEREM ITAN TI PANAGTALEKMO

16. Ania ti makatulong kadatayo nga agtalinaed a natured bayat a makitkitatayo a matungtungpal dagiti naipadto iti Lucas 21:​26-28?

¹⁶ Bayat ti dakkel a rigat, “matalimudawto [ti kaaduan a] tattao gapu iti buteng.” Ngem ti ili ti Dios ket agtalinaed a kalmado ken natured. (Basaen ti Lucas 21:​26-28.) Apay a ditayto maabak iti buteng? Gapu ta nasursurotayon ti agtalek ken Jehova. Imbaga ti nadakamaten a ni Tanja a makatultulong kenkuana dagiti napadasanna a mangsango kadagiti narigat a situasion. “Nasursurok a kabaelannatayo a tulongan ni Jehova nga agibtur iti aniaman a situasion ken bendisionannatayo,” imbagana. “No dadduma, kasla kaya ti dadduma a kontrolen dagiti bambanag. Ngem ti agpayso, adayo a nabilbileg ni Jehova ngem kadakuada. Ken uray no narigat ti maysa a pakasuotan, agpatingganto met laeng dayta.”

17. Kasano a makatulong kadatayo ti tekstotayo iti tawen 2024? (Kitaen ti ladawan iti akkub.)

¹⁷ Normal laeng ti makarikna iti buteng ita. Ngem kas ken David, kabaelantayo ti saan nga agpakontrol iti buteng. Ti tekstotayo iti tawen 2024 ket kararag ni David ken Jehova: “No mabutengak, sika ti pagtalkak.” (Sal. 56:3) Kitaentayo ti imbaga ti maysa nga eskolar ti Biblia maipapan iti daytoy a bersikulo. ‘Saan a pinadakkel ni David ti butengna wenno kimmita kadagiti problemana no di ket nagpokus iti Daydiay mangsubbot ken mangisalakan kenkuana.’ Panunotem ti tekstotayo ita a tawen kadagiti sumaruno a bulbulan, nangruna no maipasangoka kadagiti nakabutbuteng a situasion. Iwayaam a panunoten dagiti inaramid ni Jehova iti napalabas, dagiti ar-aramidenna ita, ken dagiti aramidennanto iti masanguanan. Ket kas ken David, maibagam met: “Agtalekak iti Dios; saanak a mabuteng.”—Sal. 56:4.