1. Bezẹle nin ofẹn ha da sabọ ha mun mhan ẹgheso?

 OFẸN mun mhan rebhe ẹgheso. Ọkpakinọn, nin mhan ki rẹ dọ luẹ Baibo, ofẹn eria ne yu, ofẹn ẹlinmhin ebe, ẹhi nesọle, bi ebi ẹghe odalo ha diayẹ i yẹ mun mhan. Ọrẹyiriọ ẹghe ọkakale mhan da nyẹnlẹn, bhiriọ, okhọnlẹn, ugbele bi emianmhẹn sabọ rẹ re ofẹn ha mun mhan. (Luk 21:11) Mhan sabọ rẹ ha mun ofẹn eria, bọsi, ene gbẹloghe ne kpokpo mhan, la eria bhi azagba-uwa nọnsẹmhan ne bha ji egbe da fu mhan re ranmhude ebi mhan rẹọ i. Ẹbho eso sabọ rẹ ha kpokpo egbe ghe, ele i da sabọ ziẹngbe ọkakale nin ele kuẹlo da nian, la ọnọn da zegbere bhi ẹghe odalo.

2. Tẹmhọn idia nin Devid ha ye beji ọle ribhi Gat.

² Ẹghe ribhọ nin Devid yẹ rẹ ha mun ofẹn. Bhi ọsi ijiẹmhin, ẹghe nin Sọl nin Ojie rẹ ha ho nin ọle gbe Devid a, ọle da nẹ diọbhi eji a tiọle Gat bhi agbaẹbho ọsi Filistia. Ọ bha bue gbe, ojie ọsi Gat natiọle Ekish da lẹn sẹbhọ ghe, Devid hi ọne ọkakulo nan re illo ha gẹn ghe, ọ gbono ibhokhan Filistia ne bunbun an. Ọnan da re ofẹn manman ha mun Devid. (1 Sam. 21:10-12) Ọle da ha kpokpo egbe ba ebi Ekish ha lu ọle yẹ. Be rẹkpa Devid rẹ sabọ khọn ofẹn nọn ha mun ọlẹn?

3. Beji Psalm 56:1-3, 11 rẹman, be Devid rẹ sabọ khọn ofẹn nọn ha mun ọlẹn yẹ?

³ Bhi Psalm 56, Devid da tẹmhọn ebi egbe dia ọle yẹ beji ọle ribhi Gat. Enin wo tẹmhọn ebi ofẹn rẹ ha mun Devid yẹ, bi ebi ọle rẹ sabọ khọn emhin ne re ofẹn ha mun ọlẹn. Beji ofẹn ha mun Devid, ọle da mun udu nyan Jehova. (Tie Psalm 56:1-3, 11.) Emhin esili ne bunbun wo ribhọ ne re Devid mun udu nyan Jehova. Ranmhude urẹkpa nọnsi Jehova, Devid da sabọ lu ojiemhin nọn wẹnna nanlẹn. Ọle da man ha lu bii ọria nọn mhẹnmhẹn, bhiriọ Ekish  da re ẹlo si ọle bhi egbe re, yẹ ha guanọ nin ọle sibhi agbaẹbho nọnsọle re. Ọnan da re otọ nin Devid rẹ sabọ nẹgbe.—1 Sam. 21:13–22:1.

4. Be imhan ha rẹ sabọ manman ha mun udu nyan Jehova yẹ? Re ijiẹmhin ọbhọ.

⁴ Mhan dẹ yẹ sabọ khọn emhin ne re ofẹn mun mhan sade mhan mun udu nyan Jehova. Ọkpakinọn, be imhan ha rẹ sabọ manman ha mun udu nyan Jehova yẹ, manman nọn sade ofẹn mun mhan? Fẹ ọne ijiẹmhin nan ghe. Ahamiẹn uwẹ dọ lẹn kere ghe uwẹ mhọn emianmhẹn nọn kaka, ofẹn sabọ rẹ munhẹn ha mun uwẹ. Ọrẹyiriọ, uwẹ dẹ sabọ ku egbe ọi sade uwẹ gbaẹkẹ dọkitọ nọn gbẹloghe ẹ. Asabọmiẹn ọne dọkitọ sẹ wo hinmhin ẹbho ne bunbun bhi emianmhẹn nọn sẹ iriọ. Ọle sabọ rẹ wo ka uwẹ ehọ beji uwẹ rẹ tẹmhọn emhin ne re ofẹn mun uwẹ man ọlẹn, yẹ ji uwẹ lẹn ghe ọle dẹ rẹkpa uwẹ. Ọle bhọ sabọ rẹ tẹmhọn ikhunmhun eso man ẹn nin ọle sẹ ka noo rẹ gbẹloghe ẹbho. Iriọ yẹ nọn, mhan dẹ sabọ manman ha mun udu nyan Jehova sade mhan ria eria nyan ene emhin nin ọle sẹ lu, ene ọle lu nian, bi ene ọle ha lu bhi ẹghe odalo. Ọnan hi emhin nin Devid lu. Beji mhan ha rẹ ha zilo nyan emhin eso nin ọle ta bhi Psalm 56, ria eria nyan ebi uwẹ ha rẹ sabọ manman ha mun udu nyan Jehova yẹ, bi ebi uwẹ ha rẹ sabọ khọn emhin ne re ofẹn mun ẹn.

EMHIN NELA JEHOVA SẸ LU?

5. Be Devid ria eria nyan beji ọle ha da sabọ khọn ofẹn nọn ha mun ọlẹn? (Psalm 56:12, 13)

⁵ Ẹghe nin iẹnlẹn ọsi Devid rẹ ha ribhi okhẹnan, ọle da ria eria nyan emhin nin Jehova sẹ lu. (Tie Psalm 56:12, 13.) Iriọ Devid wo ha lu bhi ẹdagbọn iẹnlẹn nọnsọle. Bhi ọsi ijiẹmhin, ẹgheso ọle ki ria eria nyan ene emhin kẹkẹ nin Jehova man. Ọnan da ye ọle rẹ ghe Jehova manman mhọn ahu, sẹyẹ ọle manman hoẹmhọn eria. (Ps. 65:6-9) Ọle yẹ ria eria nyan ebi Jehova sẹ lu nin ebhọ nekẹle. (Ps. 31:19; 37:25, 26) Rẹ deba ọnin, ọle manman ria eria nyan emhin nin Jehova sẹ lu nanlẹn tobọle. Rẹ na bhi egbe obhokhan Jehova mọn da rẹkpa Devid yẹ gbega ọle. (Ps. 22:9, 10) Bhi ọsi ẹmhọanta, ene emhin nan nin Devid ria eria nyan rẹkpa ọle rẹ manman ha mun udu nyan Jehova!

6. Be ha rẹkpa mhan rẹ sabọ mun udu nyan Jehova sade ofẹn mun mhan?

⁶ Ahamiẹn emhin re ofẹn mun ẹn, nọọn egbe  ẹ, ‘Be Jehova sẹ lu?’ Ria eria nyan emhin nin ọle man. Bhi ọsi ijiẹmhin, ahamiẹn mhan “manman gbẹlokotọ” bhi ebi Jehova rẹ gbẹloghe ene afianmhẹn bi ene aroro yẹ nan bha man bhi arẹkhọkhọ nọnsọle, ne i yẹ ga ọle, ọ ki rẹkpa mhan rẹ ha mhọn ọne izebhude ghe ọle dẹ gbẹloghe mhan. (Mat. 6:25-32) Sẹyẹ, ria eria nyan ebi Jehova sẹ lu nin ẹbho nesọle. Uwẹ sabọ rẹ dọ luẹ ẹmhọn ọria bhi Baibo nọn manman re urẹọbhọ man, la uwẹ sabọ rẹ dọ tie okha ọsi obhio mhan bhi ọne ẹghe nan. a Rẹ deba ọnin, ria eria nyan ebi Jehova sẹ lu nin uwẹ. Bhi ọsi ijiẹmhin, uwẹ sabọ ria eria nyan ebi ọle rẹ rẹkpa uwẹ rẹ dọ lẹn ẹmhọanta yẹ. (Jọni 6:44) Ebi ọle sẹ rẹ wanniẹn erọnmhọn nesẹ yẹ. (1 Jọni 5:14) Ebi uwẹ rẹ ha miẹn elele yẹ bhi izọese nọnsi Jesu ukpẹdẹ-ukpẹdẹ.—Ẹfẹ. 1:7; Hib. 4:14-16.

7. Be okha ọsi Daniẹl nin akhasẹ rẹ rẹkpa Vanessa rẹ khọn ofẹn nọn ha mun ọlẹn yẹ?

⁷ Obhio mhan nin okhuo natiọle Vanessa b nọn nyẹnlẹn bhi Haiti da ha ribhi idia nọn re ofẹn ha mun ọlẹn. Okpea ọkpa bhi idunmhun nin ọle ye da ha gbẹn ebe ji ọle ukpẹdẹ-ukpẹdẹ rẹ taman ọlẹn nin ọle zẹ ọle bhi ọshọ. Vanessa bha ka. Ọnan da manman rẹ ẹkẹ ha khọ ọne okpea, rẹ sẹbhọ ghe, ọle da yọle ọle dẹ gbanọn ọlẹn ẹlo a. Vanessa da yọle: “Ofẹn da wo ha mun mẹn.” Ọkpakinọn, be rẹkpa ọle rẹ sabọ khọn ọne ofẹn nan nọn ha mun ọlẹn? Ọle da lu ebi ọle ha sabọ lu rẹ gbega egbe. Ọwanlẹn ọkpa bhi agbotu da rẹkpa ọle rẹ dọ re ọne ẹmhọn ka man ekhẹn unakpa. Rẹ deba ọnan, ọle da ria eria nyan ebi Jehova rẹ gbega ẹbho nesọle yẹ bhi ẹghe nọn gbera. Vanessa da yọle: “Daniẹl nin akhasẹ hi ọria ọhẹnhẹn nọn vae mẹn bhi ọkhọle. A da mun ọlẹn ọbhi uhio ọsi oduma arẹmiẹn ọle bha lu emhin soso. Ọkpakinọn, Jehova da gbega ọle. Mẹn da bhii Jehova nọn rẹkpa mẹn bhi ọne ẹmhọn nan. Mẹn ki lu iriọ fo, ofẹn bha yẹ ha mun mẹn.”—Dan. 6:12-22.

BE JEHOVA LU NIAN?

8. Be Devid lẹn? (Psalm 56:8)

⁸ Arẹmiẹn iẹnlẹn ọsi Devid wo ha ribhi okhẹnan beji ọle ribhi Gat, ọle bha denọ ẹlo ọbhi emhin ne re ofẹn ha mun ọlẹn. Ọkpakinọn, ọle da zẹ nin ọle rẹ ria eria nyan ebi Jehova ha lu nanlẹn bhi ọne ẹghe. Devid lẹn sẹbhọ ghe Jehova wo ha dia ọle, gbega ọle, yẹ lẹn ebi emhin dia ọle yẹ bhi egbe. (Tie Psalm 56:8.) Devid yẹ wo ha mhọn imọẹ ne sun rẹkhan ọlẹn, ne yẹ re iyobọ nanlẹn. Imọẹ bii Jonatan bi Ahimẹlẹk nin Ojohẹn. (1 Sam. 20:41, 42; 21:6, 8, 9) Arẹmiẹn Sọl nin Ojie wo ha guanọ nin ọle gbe Devid a, Devid da sabọ nẹgbe. Devid lẹn sẹbhọ ghe, Jehova daghe ọkakale nin ọle kuẹlo da, bi ebi ọne ọkakale rẹ ha rẹso ọle yẹ.

9. Be Jehova daghe bhi egbe ọdeọde bhi ẹwẹ mhan?

⁹ Ahamiẹn uwẹ kuẹlo da ọkakale nọn rẹ ofẹn ha mun uwẹ, ha mhọnlẹn bhi ọkhọle ghe Jehova daghe ọne ọkakale nin uwẹ ye, bi ebi ọ rẹ ha rẹso uwẹ yẹ. Bhi ọsi ijiẹmhin, ọ i yi obọ oya nan rẹ ha mun ibhokhan Izrẹl bhi otọ Ijipt ọkpa Jehova daghe, sokpan ọle yẹ daghe “ọbalọ nin ele ye.” (Ex. 3:7) Devid da yọle ghe, Jehova daghe “ọbalọ” bi “ọnọghọ” nin ọle ye. (Ps. 31:7) Sẹyẹ, ẹghe nin ibhokhan Izrẹl rẹ ha loya ranmhude emhin uuki nin ele zẹ rẹ lu, “ọ da yẹ ha ba [Jehova] bhi egbe.” (Isa. 63:9) Ahamiẹn ofẹn mun uwẹ, lẹn sẹbhọ ghe Jehova lẹn otọ ebi emhin dia uwẹ yẹ, sẹyẹ ọle muegbe nin ọle rẹ rẹkpa uwẹ rẹ khọn ele.

10. Be re uwẹ rẹọbhọ ghe ẹmhọn uwẹ rẹtẹ Jehova, sẹyẹ ọle dẹ rẹkpa uwẹ rẹ sabọ ziẹngbe ọkakale nọn hi ki rẹ khin?

¹⁰ Be uwẹ ha lu yẹ sade uwẹ bha daghe uwedẹ nin Jehova rẹ ha rẹkpa uwẹ bhi ẹkẹ ọkakale nin  uwẹ ye? Uwẹ sabọ rẹ bhii ọle nọn rẹkpa uwẹ rẹ daghe uwedẹ nin ọle rẹ ha rẹkpa uwẹ. (2 Ki. 6:15-17) Uwẹ ha lu iriọ fo, uwẹ sabọ rẹ nọọn egbe ẹ ene inọnta nan: Ọta nin obhio mhan rẹman la ewanniẹn nin obhio mhan re ọbhi inọnta bhi ikolo oga sẹ ka ziẹn mẹn udu khẹ? Ebe, ividio la illo ikẹ nan zẹ ele egbe dagbare sẹ ka ko mẹn udu re khẹ? Ọria sẹ ka ta ọta izebhudu man mẹn khẹ, la re Baibo rẹ ko mẹn udu re? Ọ dẹ sabọ sunu ghe, mhan bha zẹwẹ gbẹlokotọ bhi oyẹẹ nin ibhio mhan rẹman mhan, bi ọta ikoudure nin mhan miẹn bhi Ọta nọnsi Osẹnobulua. Bhi ọsi ẹmhọanta ẹsele ne na obọ Osẹnobulua vae ene emhin nan khin. (Isa. 65:13; Mak 10:29, 30) Ene emhin nan rẹman ghe ẹmhọn uwẹ rẹtẹ Jehova. (Isa. 49:14-16) Sẹyẹ ele rẹman ghe uwẹ dẹ sabọ mun udu nyan ọlẹn.

11. Be rẹkpa Aida rẹ sabọ khọn ofẹn nọn ha mun ọlẹn?

¹¹ Obhio mhan nin okhuo nin Aida nọn nyẹnlẹn bhi Senegal wo gbẹlokotọ bhi ebi Jehova rẹ rẹkpa ọle yẹ bhi ẹghe ọkakale. Beji a miẹn ọle ọmọn ọdiọn, ene biẹ ọle da ha guanọ nin ọle ha wẹnna kaka beji ọle ha da miẹn igho rẹ ha gbẹloghe egbe, yẹ rẹ ha gbẹloghe ele. Ọkpakinọn, ọle ki deobọre fo bhi iẹnlẹn beji ọle ha da sabọ ha lu iwẹnna ọkanẹfan ọsi ẹghe rebhe, emhin da wo manman kaka mun ọlẹn. Ẹkẹ ọle da wo ha khọ azagba-uwa nọnsọle, sẹyẹ ele da ha re unun riia ọle a. Aida da yọle: “Ofẹn da ha mun mẹn ghe mẹn i da yẹ sabọ rẹkpa ene biẹ mẹn, sẹyẹ ọrebhe dẹ wo he mẹn. Mẹn bhọ da dọ ha khọẹkẹ Jehova nin ọle rẹ ji emhin da khọ sẹ iriọ.” Bhi ọne ẹghe nan, ọle da kaehọ ọta ọkpa bhi ikolo oga. Ọle da yọle: “Obhio mhan nọn re ọne ọta man da ye ọrebhe re ghe, Jehova lẹn ọkakale nọn hi ki rẹ khin nin mhan ye. Adia nin ene ewanlẹn bi ibhio mhan bhi agbotu ha re nin mẹn da rẹkpa mẹn rẹ fẹkẹ kie dọ rẹbhọ ghe Jehova hoẹmhọn mẹn. Mẹn da wo kie dọ ha mhọn ọne izebhudu ghe Jehova dẹ wanniẹn erọnmhọn nesẹmhẹn. Sẹyẹ, mẹn da dọ ha mhọn ọkhọle nọn lọre beji mẹn rẹ ha daghe uwedẹ nin ọle rẹ ha wanniẹn erọnmhọn nesẹmhẹn.” Akizẹbue, Aida da miẹn iwẹnna nọn rẹkpa ọle rẹ miẹn ebi ọle ha rẹ ha gbẹloghe egbe bhi iwẹnna ọkanẹfan nin ọle ha lu, yẹ rẹ sabọ ha re iyobọ nin ene biẹ ọle bi ẹbho ebhebhe. Ọle da yẹ yọle: “Mẹn wo dọ luẹ rẹ ha re ọkhọle rebhe mun udu nyan Jehova. Bhi ejayenan nian, mẹn ha ki nan erọnmhọn fo ofẹn i yẹ zẹwẹ mun mẹn.”

 BE JEHOVA HA LU BHI ẸGHE ODALO?

12. Beji Psalm 56:9 rẹman, izebhudu nela Devid ha mhọnlẹn?

¹² Tie Psalm 56:9. Ọne ulọnlẹn nan da tẹmhọn emhin ọbhebhe nọn rẹkpa Devid rẹ sabọ khọn emhin nọn re ofẹn ha mun ọlẹn. Iẹnlẹn nọnsọle rẹ ribhi okhẹnan, ọle da ria eria nyan ebi Jehova da lu nanlẹn bhi ẹghe odalo. Devid lẹnmhin ghe, Jehova dẹ miẹn ọlẹn fan bhi ẹghe nọn khẹke. Jehova bhọ ki ka taman Devid ghe, ọle hi ọnọn ki sẹ ọle bhi egbe rẹ gbẹloghe bhi otọ Izrẹl. (1 Sam. 16:1, 13) Bhi ẹlo nọnsi Devid, inian emhin nin Jehova ve ive ọle diabe emhin nọn ki sunu fo.

13. Emhin nela mhan ha sabọ ha mhọn bhi ọkhọle ghe Jehova dẹ lu nin mhan?

¹³ Be Jehova ve ghe ọle dẹ lu nin uwẹ? Mhan lẹnmhin ghe Jehova i da lu ọle nin ọkakale soso hẹi sẹ mhan bhi egbe. c Ọrẹyiriọ, Jehova dẹ ne ọkakale nọn hi ki rẹ khin nin uwẹ kuẹlo da nian kie bhi agbọn ọsọgbọn. (Isa. 25:7-9) Aman nọn man mhan mhọn ọne ahu nin ọle rẹ riọ ene yu kpanọ, re egbe dan mhan sẹsẹsẹ, yẹ fuẹn eghian mhan rebhe a.—1 Jọni 4:4.

14. Emhin eso nela mhan ha sabọ ha ria eria nyan?

¹⁴ Ahamiẹn ofẹn mun ẹn, ria eria nyan ebi Jehova da lu nin mhan bhi ẹghe odalo. Ria ẹmhọn ebi egbe da dia uwẹ yẹ bhi ẹghe nan ha rẹ gbe Esu khuelo, ẹghe nan ha rẹ fuẹn eria ọbe a, ẹghe nin eria ne mhẹn ọkpa ha rẹ ha ribhi ọne otọ nan, bi ẹghe nin egbe ha rẹ ha gba nin mhan beji ẹdẹ rẹ ha gbera. Ọkpa bhi arẹman nan rẹman bhi usikoko nọn nẹ nan do bhi ukpe 2014, da tẹmhọn ebi mhan ha rẹ sabọ ha ria eria nyan ikhuaẹloghe nin mhan mhọn yẹ. Bhi ọne arẹman, aba ọkpa da deba azagba-uwa nọnsọle ha zilo ẹmhọn uwedẹ ikẹ nan ha rẹ sabọ tie ẹmhọn nọn ribhi 2 Timoti 3:1-5, sade a rẹ ọle tẹmhọn ebi iẹnlẹn ha diayẹ bhi agbọn ọsọgbọn. Ọle da yọle: “Bhi agbọn ọsọgbọn, eghọnghọn nan bha sẹ miẹn egbe ọle khẹ ki wo ha ribhọ. Eria ki wo hoẹmhọn ibo ele, ele ki hoẹmhọn emhin oriọn, ele ki ha lu emhin ọbhi oleghe, ele ki ha mhọn idegbere yẹ re ogẹn ji Osẹnobulua, imọn ki ha hẹnmhọn nin ene biẹ ele, ẹbho i da yẹ ha gbe ibo ele bhi ẹse, ele ki ha mhọn asun-rẹkhan, ele ki ha mhọn ẹkẹ-ẹjẹjẹ da azagba-uwa nọnsele, ele ki ha deba ibo ele tẹmhọn ọbhi ekpẹn, ele ki ha tẹmhọn ibo ele nọnsẹn, ele ki ha mun egbe ọbhi ibẹẹ, ele ki ha mhọn ẹkẹ nọn fu, emhin esili ki ha yẹẹ ele, ele ki ha yi ẹbho nan sabọ gbaẹkẹ ọle, a ki sabọ ha ne ele talọ, ele i da ha tẹngbe mun, ele ki hoẹmhọn Osẹnobulua gbera ọlẹnlẹn-bhi-egbe, ele ki ha re ẹkẹata rẹ ga Osẹnobulua; manman ha sikẹ ẹbho ne sẹ inian.” Uwẹ be deba azagba-uwa nọnsẹ la ibhio mhan nin mhan ko ga zilo ẹmhọn ebi agbọn ọsọgbọn da diayẹ?

15. Arẹmiẹn ofẹn mun Tanja, be rẹkpa ọle rẹ sabọ sun rẹkhan Jehova?

¹⁵ Obhio mhan nin okhuo natiọle Tanja nọn nyẹnlẹn bhi North Macedonia, da sabọ khọn ofẹn nọn ha mun ọlẹn nin ọle rẹ ha ria eria nyan emhin esili kẹkẹ nin mhan ha miẹn bhi ẹghe odalo. Ene biẹ ọle da wo ha kpokpo ọle ranmhude ọle luẹ Baibo. Ọle da yọle: “Eso bhi emhin nin mẹn ha mun ofẹn ọlẹn da gene sunu. Ẹghe-ẹghe nọn hi ki rẹ khin nin mẹn rẹ na bhi ikolo oga vae, inẹn mẹn ki re obọ mun mẹn. Ene biẹ mẹn da yọle ghe ele dẹ gbe mẹn an sade mẹn dọ kiẹn ọkpa bhi Esali Jehova.” Bhi ọkike ọle ene biẹ ọle da khu ọle sibhi uwa re. Be Tanja ki rẹ lu emhin yẹ? Ọle da yọle: “Mẹn da ha ria eria nyan ebi mẹn ha rẹ ha ghọnghọn yẹ rẹ dọ sẹbhi ighegheghe ranmhude nin mẹn rẹ zẹ rẹ sun rẹkhan Jehova. Sẹyẹ mẹn da ria eria nyan ebi Jehova ha rẹ re ihaosa nin mẹn yẹ bhi emhin nọn hi ki rẹ khin nọn yulu mẹn bhi ọne agbọn nan, bi ebi ọle ha rẹ rẹkpa mẹn rẹ ne emhin ne imhẹn ne sunu ji mẹn sibhi ọkhọle re.” Tanja da wo gene sun rẹkhan Jehova. Jehova da rẹkpa ọle rẹ miẹn uwa dia. Ẹlẹnan nian, Tanja bọ obhio  mhan nọn lu nọnsẹn bhi oga, ele veva wo ko re eghọnghọn ha lu iwẹnna oga ọsi ẹghe rebhe.

MANMAN HA MUN UDU NYAN JEHOVA NIAN

16. Be ha rẹkpa mhan rẹ miẹn ghe mhan bha beghe sade mhan daghe ọta akhasẹ ne ribhi Luk 21:26-28 munhẹn ha munsẹ?

¹⁶ Bhi ẹghe ekpokpo nọn khua, ofẹn dẹ ha mun ẹbho rẹ sẹbhọ ghe ahu ki fo ele bhọ. Ọkpakinọn ẹbho nesi Osẹnobulua i da beghe. (Tie Luk 21:26-28.) Ofẹn i da ha mun mhan ranmhude mhan ki ka luẹ ebi a rẹ mun udu nyan Jehova yẹ. Tanja nin mhan ka tẹmhọnlẹn da yọle ghe, uwedẹ nin Jehova ka rẹ rẹkpa ọle bhi ẹghe nọn gbera rẹkpa ọle rẹ ha kuẹlo da ọkakale nin ọle miẹn nian. Ọle da yọle: “Mẹn dọ kere ghe, Jehova dẹ sabọ rẹkpa mhan rẹ ziẹngbe bhi idia nọn hi ki rẹ khin yẹ nan erọnmhọn nin mhan. Ẹgheso, ọ sabọ rẹ diabe ghe ẹbho gene wo ha khọn miotọ bhi egbe mhan, ọkpakinọn Jehova mhọn ahu nẹ ele. Sẹyẹ, ebi ọkakale nin mhan ye hi ki rẹ khọ sẹ yẹ, ọ dẹ fo ẹdọkpa.”

17. Be uhọnmhọn-ọta ọsi ukpe 2024 ha rẹ rẹkpa mhan yẹ? (Fẹ adudu nọn ribhi odalo ọle ghe.)

¹⁷ Ẹlẹnan nian, emhin ne bunbun wo ribhọ ne ha sabọ re mhan ha mun ofẹn. Ọkpakinọn, bọsi Devid, mhan dẹ sabọ khọn ele miotọ. Erọnmhọn nin Devid nan ji Jehova bhi Psalm 56:3, ọle a da re uhọnmhọn-ọta ọsi ukpe 2024 nọn yọle: “Uwẹ hi ọne imẹn mun udu nyan sade ofẹn mun mẹn.” Ghe ebi ọria ọkpa nọn fẹ otọ Baibo ghe tale rẹji ọne ulọnlẹn nan. Ọle da yọle: “Devid bha dọ ha ria ẹmhọn ene emhin ne re ofẹn ha mun ọlẹn la ọkakale nin ọle ha ye, ọkpakinọn ọle da mun udu nyan Ọnọn ha sabọ miẹn ọlẹn fan.” Wo ha ria eria nyan uhọnmhọn-ọta ọsi ukpe 2024, manman nọn sade uwẹ ribhi idia nọn re ofẹn ha mun uwẹ. Re ẹghe ọbhi otọ rẹ ria eria nyan emhin nin Jehova lu bhi ẹghe nọn gbera, ene nin ọle lu nian, bi ene ọle ha lu bhi ẹghe odalo. Ẹghenin bọsi Devid, uwẹ ki sabọ yọle: “Osẹnobulua mẹn mun udu nyan, ofẹn i mun mẹn.”—Ps. 56:4.