1. Wa mek wi mait-a fiil fried som a di taim?

 EVRIBADI fiil fried somtaim. Bot wi we a sorv Jeuova, kaa wi nuo wa di Baibl se, wi no fried a ded piipl, ar Sietan an im diiman dem, ar bout wa a-go gwaan iina di fyuucha. Bot kaaz a di taim we wi a liv iina rait ya nou, we so moch waar an kilin an dem ting de a gwaan an wol iip a siknis a go roun, piipl a-go fried. (Luuk 21:11) An wi mait-a aal fried a piipl tu. Laik wi mait-a fried a di govament dem we a mek tingz aad fi wi, ar wi mait-a aal fried a wi uona fambili tu we a fait gens wi kaa wi a worship Jeuova. An som piipl mait-a a fret an wori se dem kyaahn go diil wid di prablem dem we dem a go chuu ya nou ar di prablem dem we dem mait-a afi go chuu iina di fyuucha.

2. Tel wi ou Dievid did fiil wen im did de a Gat an wa mek im did fiil so.

² Som a di taim Dievid did fried. Laik wan a di taim wen im did a ron fram Saal, im did ron go a wan plies niem Gat we di Filistiin dem did kanchuol. Likl afta Dievid did riich de, Iekish, we a did di king fain out se di Izrel piipl dem yuus tu sing bout ou Dievid kyan fait gud an ou im kil aaf uol iip a touzn a di Filistiin dem. So kaa di king did fain out bout dis, Dievid did get fried bad. (1 Sam. 21:10-12) An Dievid staat fi wori an fret bout wa Iekish wuda du wid im. Bot wa Dievid did du so das im no fried agen?

3. Azkaadn tu Saam 56:1-3, 11, wa did mek Dievid no fried agen?

³ Dievid did tel wi wa mek im did fiil fried iina Saam 56, an im tel wi wa im did du we mek im no so fried agen. Dievid neehn fried agen kaa im did chos iina Jeuova. (Riid Saam 56:1-3, 11.) An kaa im did du dat, Jeuova elp im an bles wa im du wen im did gwaan laik se im mad. An a so kom Iekish neva fiil laik se im did afi fried a Dievid agen  kaa im did fiil se Dievid a jos wan mad man. An dat mek Dievid kuda get we fram im.​—1 Sam. 21:13–22:1.

4. Tel wi wa kyan elp wi fi chos iina Jeuova muor, an tel wi wa it mait-a komiin laik.

⁴ Wen wi chos iina Jeuova it a-go elp wi fi no fried. Bot wen wi fried bad, wa kyan elp wi fi chos iina Jeuova muor? Tingk bout it da wie ya: Ef yu fain out se yu sik bad, yu a-go fiil fried. Bot ef yu fain wan dakta we yu chos an yu fain out se im elp uol iip a piipl we av da siknis de fi get beta, yu naa go so fried agen. An chuu im lisn tu yu, it shuo se im kier bout ou yu fiil. An im mait-a tel yu bout som dakta chriitment we ada piipl du we elp dem. A siem so wen yu tingk bout aal a di sitn dem we Jeuova du aredi, an di sitn dem we im a du nou, an di sitn dem we im a-go du iina di fyuucha, it kyan elp yu fi chos iina im muor. A dat Dievid did du. Mek wi luk pan som a di sitn dem we im se iina Saam 56, an wen wi a luk pan it, tingk bout wa yu kyan du fi chos iina Jeuova muor an no fried.

WA A SOM A DI SITN DEM WE JEUOVA DU AREDI?

5. Wa a som a di sitn dem we Dievid did tingk bout fi mek im no so fried agen? (Saam 56:12, 13)

⁵ Wen Dievid did stil fried se dem mait-a kil im, im tingk bout di sitn dem we Jeuova did du fi im aredi. (Riid Saam 56:12, 13.) A dat Dievid did eva a du. Laik som a di taim im tingk bout di sitn dem we Jeuova mek we mek im memba se Jeuova av aal a di powa an se Im lov wi. (Sa. 65:6-9) An im aal tingk bout ada tingz we Jeuova du fi ada piipl tu. (Sa. 31:19; 37:25, 26) Bot di bigis ting we im du a tingk bout wa Jeuova du fi im aredi kaa fram im a pikni Jeuova did de de fi im. (Sa. 22:9, 10) So wen im tingk bout aal a dem sitn de, it mos did mek im no so fried an mek im chos iina Jeuova muor.

6. Wen wi fiil fried, wa a som sitn we wi kyan du we a-go elp wi fi chos iina Jeuova?

⁶ Wen taim wi fiil fried wi kyan aks wiself da kwestiyan ya, ‘Wa’a som sitn we Jeuova du aredi?’ Den wi kyan tingk bout  di sitn dem we im mek, laik wi kyan sidong an tek iin ou im tek kier a di bod dem an di flowaz dem we no av di siem wiez dem laik we im av an we kyaahn worship im. An wen wi du dat, it a-go mek wi chos Jeuova muor an nuo se im a-go tek kier a wi tu. (Mat. 6:25-32) Wi kyan tingk bout di sitn dem we Jeuova du fi di piipl dem we worship im tu. An wi kyan stodi bout sumadi we di Baibl tel wi bout we chos iina Jeuova. Ar wi kyan riid wan a di tuori dem bout sumadi laif we iina wi buk an pamplet dem. a Pan tap a dat, yu kyan tingk bout di sitn dem we Jeuova du fi yu aredi, laik wa im du fi yu so dat yu kuda lorn di chuut. (Jan 6:44) Yu kyan aal tingk bout ou yu si se im a ansa yu prieya dem. (1 Jan 5:14) An kaa im sen im bwai pikni fi kom ded fi wi, ou dat a elp yu evridie?​—Ifii. 1:7; Iib. 4:14-16.

7. Ou wa Daniyel did go chuu did elp Vanessa fi no fried?

⁷ Sitn did apm we mek wan sista we niem Vanessa b we kom fram Ieti fried bad. Wan man we iina ar komyuuniti did a luk ar. Im kaal ar an sen mesij tu ar evridie. Shi mek im nuo se shi no iina notn wid im, bot di man chretn ar, an shi se: “Mi did fried bad.” Bot shi du tingz we mek ar no so fried agen. Laik shi mek wan a di elda dem iina di kanggrigieshan elp ar fi go taak tu di poliis dem, an shi tingk bout ou Jeuova elp im piipl dem bifuo. Shi se: “Di fos sumadi mi tingk bout a Daniyel. Aalduo im neehn du notn rang, dem did fling im iina di plies we dem did kip di onggri beli laiyan dem, bot Jeuova stil elp im. So dat elp mi fi si se mi av Jeuova fi elp mi tu, an afta dat mi neehn fried agen.”​—Dan. 6:12-22.

WA A SOM A DI SITN DEM WE JEUOVA A DU NOU?

8. Wa Dievid did nuo fi shuor se? (Saam 56:8)

⁸ Aalduo wen Dievid did de iina Gat im did fried se dem a-go kil im, im stil did a chos iina Jeuova an a tingk bout di sitn dem we Jeuova did a du fi im dem taim de. Dievid kuda si se Jeuova did a tek kier a im an a mek im nuo wa fi du, an se Jeuova did nuo ou im fiil bout wa did a gwaan. (Riid Saam 56:8.) An Dievid did av som fren laik Janatan an di Liida fi di Priis dem we did niem A’imelek we did a elp im. (1 Sam. 20:41, 42; 21:6, 8, 9) Aalduo Saal did waahn fi kil Dievid, im neehn get fi kil im, an dat did mek Dievid nuo fi shuor se Jeuova did nuo wa a gwaan wid im an se Jeuova did nuo wa di sitn dem we im a go chuu did a du tu im.

9. Wa Jeuova a si, an wa im nuo bout evri wan a wi?

⁹ Wen yu a go chuu sopm we mek yu fiil fried tu, jos memba se Jeuova si wa yu a go chuu, an im nuo ou wa yu a go chuu mek yu fiil. Laik wen di Izrelait dem did de dong a Iijip, Jeuova did “si an nuo aal a di torbl sitn dem we dem a go chuu.” (Ek.3:7) Dievid did aal sing an se: “Yu si umoch mi a sofa, an yu nuo aal a di schres we mi a go chuu.” (Sa. 31:7) Aal wen Jeuova piipl dem did a sofa kaaz a aal a di sitn dem we dem did du, im mek wi nuo se it did a ort im tu. (Aiz. 63:9) So wen sitn mek yu fried, jos memba se Jeuova nuo ou yu fiil an im wel waahn fi elp yu fi no fried.

10. Wa mek yu nuo fi shuor se Jeuova si yu an a-go elp yu fi diil wid yu prablem dem?

 ¹⁰ Wen yu a go chuu yu prablem dem, yu mait-a no si se Jeuova de de fi yu. So yu kyan aks im fi shuo yu di sitn dem we im a du fi yu fi mek yu si se im de de fi yu. (2 Ki. 6:15-17) Den aks yuself dem kwestiyan ya: Sumadi gi wan taak ar ansa wan kwestiyan a di miitn we mek mi si se Jeuova de de fi mi? Ar sitn iina wan a di buk an pamplet dem ar wan vidiyo ar wan a di nyuu sang dem we mek mi fiil beta? Ar sumadi riid wan skripcha ar se sopm tu mi we mek mi fiil beta tu? Ef wi no main shaap, wi mait-a no si di nais sitn dem we wi breda an sista dem a du fi wi an di gud sitn dem we Jeuova a gi wi fi kip wi kluos tu im. Wi fi memba se dem ya a som big sitn we Jeuova gi wi fi elp wi fi go chuu wi prablem dem. (Aiz. 65:13; Maak 10:29, 30) Dem sitn ya mek wi si se Jeuova kier bout wi. (Aiz. 49:14-16) An dem mek wi si se wi kyan chos im tu.

11. Wa did elp Aida fi no fried agen?

¹¹ Aida we liv iina Senigal did si se Jeuova did tek kier a ar wen shi did a go chuu wan rof taim. Kaa shi did a dem fos pikni, ar mada an faada did ekspek se a shi wuda main dem. Bot afta shi staat fi paiyanier an na’av so moch moni agen, ar fambili neehn laik dat, so dem did beks wid ar. Shi se: “Mi did fried se mi wudn kyan tek kier a mi mada an faada, an mi fambili wudn waahn mi de.” An shi se, “Mi aal bliem Jeuova fi mek tingz get so rof wid wi.” Den wan a di taim shi go a miitn an ier wan taak. Shi se, “Di breda we gi di taak mek wi memba se Jeuova si wi an nuo wa wi a go chuu. An di elda dem an di ada breda an sista dem iina di kanggrigieshan elp mi fi si likl bai likl se Jeuova riili lov mi. So mi staat fi prie tu Jeuova an nuo fi shuor se im a-go elp mi. An wen mi du dat, mi fiil wan piis iina mi aat an main, an mi si se im did a ansa mi prieya dem.” Afta dat Aida get wan wok we mek ar kuda gwaan paiyanier an elp out ar mada an faada an ada piipl tu. Shi se, “Mi lorn se mi fi chos iina Jeuova no mata wa.” An shi se, “Nou wen taim mi don prie, mi no fried agen.”

 WA A SOM A DI SITN DEM WE JEUOVA A-GO DU?

12. Azkaadn tu Saam 56:9, wa Dievid did nuo se wuda apm fi chuu?

¹² Riid Saam 56:9. Da vors ya elp wi fi si sitn els we did mek Dievid no fried agen. Aalduo dem did stil waahn fi kil Dievid, im did stil a tingk bout di sitn dem we Jeuova a-go du fi im. Dievid did nuo se Jeuova wuda siev im a di rait taim. An memba se ino, Jeuova did tel Dievid se a im wuda bi di neks king iina Izrel. (1 Sam. 16:1, 13) Dievid did nuo se eniting we Jeuova pramis im se im a-go du did a-go apm fi chuu.

13. Wa wi kyan nuo fi shuor se Jeuova a-go du?

¹³ Wa Jeuova pramis yu se im a-go du fi yu? Yu tingk se im a-go mek yu na’av no muor prablem ya nou? c Nuo sa, bot wa yu fi memba a se eni prablem we yu av iina da worl ya, Jeuova a-go get rid a aal a dem iina di nyuu worl. (Aiz. 25:7-9) Im av di powa fi mek ded piipl kom bak alaiv, an fi iil wi, an fi get rid a evribadi we a mek tingz aad fi wi kaa wi a sorv im.​—1 Jan 4:4.

14. Wa a som a di sitn dem we wi kyan tingk bout?

¹⁴ Wen yu fiil fried, tingk bout wa Jeuova a-go du fi wi iina di fyuucha. Yu kyan tingk bout ou yu a-go fiil wen Sietan an aal a di wikid piipl dem no de bout agen, an a onggl piipl we a du wa Jeuova waahn dem fi du a-go de bout. An yu kyan tingk bout ou wi a-go get porfek likl bai likl evridie tu. A di kanvenshan we dem did kip iina 2014, sumadi did ak out ou wi kyan tingk bout di sitn dem we Jeuova a-go du fi wi iina di fyuucha. Yu did av wan faada we a taak wid im fambili bout wa 2 Timoti 3:1-5 wuda se ef it did a taak bout wa a-go gwaan iina Paradais, im se: “Iina di nyuu worl, tingz a-go nais kyaahn don kaa piipl a-go lov dem wan aneda an dem a-go lov aal a di sitn dem we Jeuova Gad gi dem. Dem naa go buosi buosi, dem a-go ombl. Piipl a-go se nais tingz tu ada piipl an chriit dem gud tu, an di pikni dem a-go lisn wa dem mada an faada se. Piipl a-go gi tangks fi evriting, an dem a-go big op Gad fi aal a wa im du. Dem a-go lov dem wan aneda an dem a-go lov eniting we gud. An dem naa go taak notn bad bout dem wan aneda niida. Iina dem taim de, piipl a-go nuo ou fi kanchuol demself an dem naa go gwaan laik dem a wail daag. Dem a-go kyan chos dem wan aneda, an no kielis sumadi naa go de de. Piipl naa go gwaan laik dem beta dan nobadi els, an dem a-go lov fi du di sitn dem we Gad waahn dem fi du, no di sitn dem we dem tingk a fon. Aal a di piipl dem we de de a piipl we riili biliiv iina Gad kaa non a dem a no ipokrit. A dem piipl ya yu fi aalwiez av roun yu.” Yu lov fi taak tu yu fambili an yu breda an yu sista dem iina yu kanggrigieshan bout di sitn dem we a-go apm iina di nyuu worl?

15. Aalduo Tanja did fried, wa did elp ar fi no so fried agen?

¹⁵ Wan sista we niem Tanja we liv iina Naat Masiduoniya did fried bad kaaz ar mada an faada neehn waahn ar fi stodi di Baibl. Bot wa elp ar fi no fried, a dat shi tingk bout di gud sitn dem we a-go apm iina di fyuucha. Shi se: “Som a di sitn dem we mi fried se wuda apm apm fi chuu. Afta mi kom uom fram evri miitn mi mada biit mi. An dem se ef mi ton wan Jeuova Witnis dem a-go kil mi.” Den dem kik ar outa di ous. Bot wa shi du afta  dat? Shi se: “Mi tingk bout ou mi a-go api fi eva ef mi tan op chrang an du wa Jeuova waahn mi fi du. An mi tingk bout aal a di gud sitn dem we Jeuova a-go gi mi iina di nyuu worl. Eniting we mi gi op iina da worl ya an no mata ou bad tingz get, mi naa go memba it iina di nyuu worl.” Tanja did stik tu Jeuova an du wa im waahn ar fi du, an im elp ar fi fain somwe fi liv. Rait ya nou shi marid tu wan breda an di tuu a dem a yuuz muos a dem taim fi du nof fi Jeuova an dem api.

WA A SOM A DI SITN DEM WE YU KYAN DU FI GWAAN CHOS IINA JEUOVA?

16. Wen wi si di sitn dem we Luuk 21:26-28 tel wi se a-go apm apm, wa a-go elp wi fi no fried an fi gwaan tan op chrang?

¹⁶ Wen di wos sofarieshan a gwaan, “piipl a-go kech dem fried an kin uova.” Bot Jeuova piipl naa go friedi-friedi, dem a-go tan op chrang. (Riid Luuk 21:26-28.) Dem naa go fried kaa dem nuo ou fi chos iina Jeuova. Tanja we wi did taak bout aredi se di ting dem we shi go chuu elp ar fi go chuu som ada prablem we neehn so iizi. Shi se “Mi get fi si se notn naa go apm we Jeuova kyaahn elp wi fi go chuu an mek it wok out gud.” An shi se: “It mait-a luk laik se a ada piipl av di anggl an Jeuova av di blied. Bot a Jeuova av di anggl. So aalduo wi mait-a a go chuu wan rof taim, wi kyan nuo fi shuor se it a-go don wan die.”

17. Ou di skripcha we fi gaid wi fi 2024 kyan elp wi? (Luk pan di picha pan di kova.)

¹⁷ Wol iip a tingz a apm we kyan mek wi fiil fried. Bot jos laka Dievid, wi naa go mek kaa wi fried wi no du wa wi fi du. Di skripcha we a gaid wi fi 2024 a wen Dievid did prie tu Jeuova an se: “A yu mi a-go luk tu fi elp mi wen mi fiil fried.” (Sa. 56:3) Sumadi we stodi nof bout di Baibl taak bout da vors ya we Dievid did rait an se: “Dievid neehn sidong an tingk bout di sitn dem we mek im fried, insted-a dat, im tingk bout ou im Gad wuda siev im.” Gwaan tingk bout da skripcha ya we fi gaid wi fi da ier ya, speshali wen yu a go chuu som sitn we mek yu fried bad. Tingk bout di sitn dem we Jeuova du aredi, wa im a du nou, an wa im a-go du iina di fyuucha. An den yu a-go kyan du laik Dievid an se: “A Gad mi chos iina, mi no fried a notn.”​—Sa. 56:4.