1. Wari urukamtai sapijmiamniaitiaj?

 Urutainsha sapijmiakminiaitji. Jakaru ainiana nu tura iwianchi suntarisha nuyasha warinkisha uruma nui nankaamastincha ashamkashtiniaitji tawai Yuusa chichame. Tumaitkiusha ju nunkanmanka maaniamu, mankartamu, sunkursha nuyasha ti ashammai nankaama asamtai sapijmiakminiaitji (Ruk. 21:11). Uunt naamka eketainiana nu ii shuarkesha turutskesha chikich aentskesha kajertamainia asakrin sapijmiamniaitji. Yamai itiurchat nankaamana nui enentaimkiur tura ukunmatai itiurchat nankaamasminiana nuisha enentaimiakur sapijmiamniaitji.

2. David Gat nunkanam jea urukamia?

² David sapijmiakmiania nuna aujmattsattaji. Saúl maataj tutai Gat nunkanam pisarmiayi. Akís naartinkia Gat nunka uuntriyayi. Davidkia ii shuarin maaiti tusar Akís naartinian ujakarmatai Davidkia ti sapijmiakmiayi (1 Sa. 21:​10-15). David sapijmia asa warinia turamia?

3. Yus Kanta 56:​1-3, 11 nui tana aintsan Davidsha urukamtai kakarmia?

³ Yus Kanta akankamu 56 nuinkia David urukamtaiya sapijmiakmia tura Jehová yainkiattawai tu enentaimias kakarmiania nuna aujmateawai (Yus Kanta 56:​1-3, 11 aujsata). Davidkia mantuawarain tusa waurka  nuke ajasmiayi. Akiska waurkaiti tusa Davidtian pachischamiayi tuma asamtai David pisarmiayi. Jehová ainis turatniun Davidtian yainmiayi (1 Sa. 21:10–22:5).

4. Jehová yainkiattawai tu enentaimsatai tusarsha itiurkamniaitiaj?

⁴ Jehová yainkiattawai tu enentaimiakrikia sapijmiakchattaji. Jehová yainkiattawai tu enentaimsatai tusarsha itiurkamniaitiaj? Watskea enentaimsatai doctor sunkur achiakeame takui yama nankamtaikkia kuntuts enentaimsamniaitji tumaitkiusha chikich aents nu sunkuran achiakun tsuaru asamtai winiasha aitkiasan tsuaramniaiti tu enentaimsamniaitji Jehovasha ainis enentaimtusminiaitji. Jehová yaunchuksha itiura yainkratkamia tura yamaisha itiura yainmaj nuyasha ukunmataisha itiura yainmaktataj nui enentaimkiurkia kakartatji. David ainis najanamiayi. Yus Kanta akankamu 56 nui tana nu unuimiatkur sapijmiakrisha itiur kakarminiaitiaj nu nekaattaji.

JEHOVÁ YAUNCHUKSHA ITIURA YAINKRATKAMIA?

5. Sapijmia pujuij tusa David warinma enentaimsamia? (Yus Kanta 56:​12, 13).

⁵ David ni itiurchatrin enentaimiu pujutsuk Jehová najanamiania nui enentaimniuyayi (Yus Kanta 56:​12, 13 aujsata). Yuus warinkish najankauyania nui enentaimmiayi. Ainis enentaimiak Yuuska kakarmaiti tura anenkratniuiti tu enentaimniuyayi (YKan. 65:​6-9). Chikich aentsnasha itiura yainkiuya nuisha enentaimniuyayi. (YKan. 31:19; 37:​25, 26). Tura aintsan uchichinmayan nincha itiura yainkiuya nuisha enentaimniuyayi (YKan. 22:​9, 10). Ainis turak Davidkia Jehová nekas yainkiattawai tu enentaimniuyayi.

6. Urutainsha sapijmiakrisha warinma enentaimsamniaitiaj?

⁶ Urutainsha sapijmiakmeka Jehová aentsun itiura yainkiarmia tura ni warinkish najankana nuisha enentaimsata. Nui enentaimsar iincha Jehová penker waitmaktatji tu enentaimsattaji (Mat. 6: 25-32). Tura aintsan nin umirainiansha itiur yainkiaruit nuisha enentaimsata. a Nuyasha amincha Jehová itiura yainmakuit nuisha enentaimsata. Jehová penker nekarat tusa itiura yainmakma nuisha enentaimsata (Juaṉ 6:44). Ame seam warinia anturtamkama nuisha enentaimsata (1 Juaṉ 5:14). Jesús jarutramka asakrin Jehová yamaiya juisha itiura yainmaj nuisha enentaimsata (Ipi. 1:7; Isr. 4:​14-16).

7. Daniel nankaamasmiania nui enentaimias ii umaisha urukamia?

⁷ Ii umai Vanessa b Haití nunkanmayan aishman untsu wemiayi tura mensajencha akuptu wemiayi tura nu aishman nin wakerutkat tusa ti apapemiayi. Turamsha aminkia nakitiajme timiayi. Nakitiam nu aishmanka ti kajekmiayi. Vanessa ti sapijmiak ni umain uuntri anaikiamun ujakmiayi nuna turam uuntri anaikiamu chichama iwiarniun junis nankaamawai tusa chichaman awasmiayi. Tura ii umainkia yaunchuksha Jehová nin umirin armiania nuna itiura ayamprukmia nuisha enentaimsamiayi. Ii umai chichaak Daniel warinkish najanachu ain uunt yawa matsatmanum shitia nankimiawarmataisha Jehová ewemtikramiayi. Tuma asamtai Yuusan seakun warinkish najanancha tujinkiajai ame yainkiata tusa iniaitiusmajai nuna tinia shiir enentaimpramjai tu timiayi (Tan. 6:​12-22).

YAMAIYA JUISHA JEHOVÁ ITIUR YAINMAJ?

8. David itiurchat nankaamaksha warintia enentaimniuya? (Yus Kanta 56:8).

⁸ Davidkia mantamnamniaitiat ti sapijmiaksha Jehová yainmiania nui enentaimmiayi. Jehová yaintiawai tura wi itiur nekapeaj nuna ninkia nekawai tu enentaimniuyayi (Yus Kanta 56:8 aujsata). Tura ni amikri Jonatán tura Ahimelecsha ikiakainiam ti kakarmiayi (1 Sa. 20:​35-42; 21:​6-9). Tura aintsan Saúl maataj takusha Davidniaka maatniun tujinkiamiayi. Jehovaka wi itiur nankaamaj tura wi itiur nekapeaj nunasha mash nekawai tu enentaimmiayi.

9. Itiurchat nankaamakrincha Jehová warinia neka?

⁹ Itiurchat nankaamakum sapijmiakmeka ju kajinmatkip Jehová ame itiur enentaimiam nunaka nekawai. Israel aents armiania nu Egiptonam pujusar waitiarmiania nuna Jehová nekaamiayi (Jiin. 3:7). Tura waitiu pujai tura jakamnia nekapu pujaisha nekartuitme David Jehovan ainis timiayi (YKan. 31:7). Israel aents ninki tunaa najanawaru asar waitiainiakuisha Jehovasha waitmiayi (Is. 63:9 TNM). Sapijmiakur itiur nekapeaj nuna Jehová nekawai nuya yainkratkattsa wakerawai, nu neka asar shiir enentaimiaji.

10. Yamaiya jui Jehovasha itiura yainmaj?

¹⁰ Itiurchat nankaamakur sapijmiakrikia Jehová itiur yainmaj nu kajinmatkimniaitji. Wari najanamniaitiaj? Ni itiur yainmaj nu nekaamatin yainkiat tusar seatniuitji (2 Ak. 6:​15-17). Tura nuyasha Yuusa chichame jintinkratma antakur tura ii yachi ii umainsha iruntainiam  ewejen takuiyar aujmataiyamu antakur nujaisha Jehová yainmajnia nui enentaimsartai. Ii yachi ii umainsha ikiakatmararuitji nuyasha video iiyakur tura papii Yuusna aujmateamu aujeakur turutskesha nampet Yuusna ainiana nu antakur kakaruitji, Jehová ainis yamaiya jui yainmaji (Isa. 65:13; Mar. 10:​29, 30). Ninkia iin yainkrateana nu kajinmatkishtiniaitji tuma asa tuke yainmaktatji (Isa. 49:​14-16).

11. Ii umai Aida sapijmiak kakartasa itiurkamia?

¹¹ Ii umai Aida naartin Senegalnumia junis timiayi yaunchukka nukap kuit akirainiamunam takakma wemiajai tuma asamtai wii shuarnasha kuitjiai yaya wearmiajai. Tumaitkiusha Jehovanun nukap yainkiattsan nu takatnumianka jinkimiajai nuna turan kuitniaka penke warumchiniak waitma wemiajai. Ainis turamtai wii shuarka kajertukaru asarmatai ti kuntuts nekap wemiajai ainis nankaamakun Jehovan kajerkan pujumiajai. Tumaitkiusha Yuusa chichame jintinkratmasha yainkiamiayi. Nui jintinkratman antukmiajna nu ikiakatramiayi. Ninkia Jehová ii itiur nankaamaj nuna nekawai tuma asa yainmaktatji tu jintinkratman antukmiajai nuna antukan kakarmiajai. Nuyasha uuntri anaikiamu ainia tura umar kaersha ikiakatrarmiayi. Tura Jehovancha aru arumen sea wemiajai. Wi seamun antan nekaaman kakarmiajai. Tura arum chikich takatan waitmakmiajai nuinkia penker akirainia asarmatai wii shuarnasha kuitjiai yaya wearmiajai. Ainis asamtai Jehová nekas yainkratniuiti tu enentaimiajai. Yamaikia Yuusan seakun wampu nekapniuitjiai ii umai tu timiayi.

JEHOVÁ UKUNMATAISHA WARINIAK NAJANAT?

12. Yus Kanta 56:9 nui tana aintsan Davidcha warintia enentaimniuya?

¹² (Yus Kanta 56:9 aujsata). Maataj tiarmiania nui Davidkia Jehová ukunmatai turatniuyania nui enentaimsamiayi. Urutainsha Jehová uwemtikrurtatui tu enentaimmiayi. Ninkia Jehovaka  ukunmatai ame uunt anaikiamu ajastatme Jehová timiania nuna nekaamiayi (1 Sa. 16:​1, 13). Nuna tiniu asa imiatrusan umiktatui Davidkia tu enentaimmiayi.

13. Ukunmatai Jehovasha warinia turatta?

¹³ Yamai itiurchat wainiajnia nuka ukunmatainkia amukattawai. c Jehová ju nunka iwiarnarmanum pujuttarme turameaji (Isa. 25:​7-9). Jakaru ainia nunash iniankiartatui sunkursha atsuttawai. Aents kajertamainiajnia nusha atsuartatui (1 Juaṉ 4:4).

14. Urutainsha sapijmiakur warinma enentaimsatniuitiaj?

¹⁴ Urutainsha sapijmiakmeka uruma nui penker pujuttajnia nui enentaimsata. Watskea iwianch atsa asamtai penker pujuttajnia nui enentaimsamniaitme. Aents yajauch ainiana nu atsuinia asarmatai penker pujuttajnia nui enentaimsamniaitme. Tura aintsan tunaartincha ajaki wetatajnia nuisha enentaimsamniaitme. 2014 uwitin uunt tuakmanum nakumsar iniakmamainiak uruma nui penker pujuttajnia nui itiura enentaimsamniaitiaj nuna jintintramawarmaji. Ii yachi 2 Timiutéun 3:​1-5 nuna ni shuarijiai aujmatuk junis timiayi: shiiram nunkanmanka penker pujamu atatui, aentska anenkratin artatui, Yuusnan nekaatniun wakerin artatui, mash neka nuke enentaimchartatui, Yuusan umirin tura ni aparincha umirin artatui, yuminsajme tiniu artatui, penkesha ikiukratcha artatui, ni shuarincha aneasartatui, aujmattsar iwiarin artatui, chikich aentsnasha tuke penker aujmatin artatui, katsuntin artatui, warik kajechu artatui, tura penkera nuna turin artatui, anankartichu artatui, nuyasha chikich aentsnasha anturin artatui, penkesha nankaamantu enentaimin achartatui, ni wakeramunak enentaimtsuk Yuusan aneasartatui, Yuusnasha nekas umirkartatui, nu aentsjai tuke shiir amajnaisata ii yachi aini aujsamiayi. Shiiram nunkanam pujustin uruku atata nuna ii shuarjai tura ii yachijiaisha aujmatniukaitiaj?

15. Ii umai sapijmiaksha kakartasa itiurkamia?

¹⁵ Ii umai Macedonianmaya Tanja naartin Jehová ukunmatai turattana nui enentaimias sapijmiaksha kakarmiayi. Ni Yuusa chichame unuimiartinian juarkimtai apari nukurijiainkia ti kajekarmiayi. Ii umai junis aujmateawai iruntainiam wena tamatainkia nukur asutiu wemiayi tura aintsan apar nukurjainkia testigo de Jehová ajakminkia maa ajapattajme turutiarmiayi. Arum, werumta tusar jiki akupturkarmiayi nuna turutawarmatai Yuusan tuke umireaknaka uruma nuinkia tuke warasan pujuttajai tu enentaimsamjai. Yamaiya jui junik juakuisha Jehová uruma nui warinkisha surustatui tura yamai waitiajna nuna kajinmatkitniuncha yainkiattawai tu enentaimsamiajai ii umai tu timiayi. Jehová yayam jeancha waitmakmiayi, arum testigo de Jehovajai iniurtukmiayi tura yamaikia maimtaik Jehovanun najanainia asar warainiawai.

JEHOVÁ NEKAS YAINKRATNIUITI TUKE AINIS ENENTAIMSARTAI

16. Rukas 21:​26-28 nui ti waitsatin tsawan atatui tana nu tsawan jeamtaisha urukamtaiya ashamkashtataj?

¹⁶ Ti waitsatin tsawan atatna nuinkia aentska sapijmiainiak “mayái̱ ashinkiartatui”  tumaitkiusha Jehová enentaimtatikia sapijmiakchattaji (Rukas 21:​26-28 aujsata). Urukamtaiya sapijmiakchattaj? Jehová yainkiattawai iikia tu enentaimin asar sapijmiakchattaji. Tanja ni nankaamasmiania nui enentaimias warinkish itiurchat wainiaksha katsunteawai. Ni junis tawai warinkish itiurchat nankaamakuisha Jehovaka tuke yainmaktatji tura warinkisha amastatji ainis tawai. Aents itiurchat amajtamainiakrin tuke ainis itiurchat amajtamsartatji tu enentaimminiaitji tumaitkiusha Jehová aentsjainkia nankaamas ti kakaram asa ii itiurchatrin amuktatui.

17. Yus Kanta 56:3 nui tana nusha ju uwitincha itiur ikiakatmarminiaitiaj? (Ju papiinium juarma nui nakumkamu ana nu iista).

¹⁷ Ju nunkanam warinkish nankaamakui sapijmiamniaitji tumaitkiusha David timiania aintsan aya ii itiurchat nankaamajnia nuin enentaimsar pujatsji. David Jehovan junis timiayi: “Sapijmiajna nu tsawantka wikia Aminiak enentáimtajme” (YKan. 56:3). 2024 uwitinkia nu chichamnum enentaimsattaji. Davidkia ni itiurchatrin aya nuin enentaimiu pujuchmiayi antsu Jehová nekas yainkiattawai tu enentaimniuyayi. Ju uwitin itiurchat nankaamakmeka Yus Kanta 56:3 tana nui enentaimsamniaitme. Nuyasha Jehová yaunchuk warinia turamia, yamaiya juisha warinia tura, ukunmataisha warinia turatta nuisha enentaimsata. Ainis turakmeka ameja David aintsamek “Yúsnak enentáimtusan ashamkashtatjai” tu titiatme (YKan. 56:4).