1. Kalang lang hpa majaw hkrit chye ai kun?

 ANHTE yawng hkrit ai aten ni nga chye ai. Chyum Laika tengman lam chye wa ai majaw, si hkrung si htan, nhkru ai nat, htawm hpang hte seng nna anhte n hkrit ai. Raitim, majan, dawsa ai lam, ana zinli zawn re ai “hkrit hpa” lam ni hte hpring nga ai aten hta anhte asak hkrung nga ai. (Luk 21:11) Jet ai nawku dawjau lam hpe ninghkap ai asuya ni, nta masha ni hpe anhte hkrit na re. Ya hkrum nga ai mayak mahkak (sh) htawm hpang hta hkrum wa chye ai mayak mahkak ni hpe n lu hkamjan na hpe nkau mi hkrit ma ai.

2. Gat mare hta Dawi hpa hkrum wa ai kun?

² Dawi mung hkrit ai aten ni nga ai. Ga shadawn, Hkawhkam Shawlu hkan sat ai majaw, Hpilisti mung na Gat mare de hprawng ai. “Mun” hku law ai Hpilisti masha ni hpe sat ai wa gaw, Dawi re ai hpe Gat hkawhkam Ahkisha chye mat ai. Dai majaw, Ahkisha lama ma galaw na hpe Dawi “grai hkrit” wa ai. (1 Sa 21:10-12) Hkrit myit hpe Dawi gara hku tawt lai wa ai kun?

3. Shakawn 56:1-3, 11 hku nga yang, hkrit myit hpe Dawi gara hku tawt lai wa ai kun?

³ Gat mare hta nga nga ai shaloi, hkrit tsang wa ai lam Shakawn 56 hta Dawi tsun da ai. Hkrit myit hpe gara hku tawt lai wa ai lam hpe mung tsun da ai. Gara hku tawt lai lu wa ai kun? Hkrit tsang wa ai aten hta, Yehowa hpe kamhpa ai hku nna re. (Shakawn 56:1-3, 11 hpe hti u.) Dawi kamhpa ai gaw jaw mat ai. Yehowa karum ya ai majaw, hpa galaw ra na hpe chye mat ai. Myit n gring ai masha zawn mana masu na matu re. Mana masu ai gaw bungli byin mat ai. Mana re ai Dawi hpe yu nna,  Ahkisha sat mayu ai myit mat mat ai. Hkawhkam wang kaw na gawt shapraw kau ai majaw, Dawi asak lawt mat ai.—1 Sa 21:13–22:1.

4. Yehowa hpe grau nna gara hku kamhpa lu ai kun? Ga shadawn jaw u.

⁴ Anhte mung, Yehowa hpe kamhpa ai hku nna hkrit myit hpe tawt lai lu ai. Raitim, hkrit ai aten hta Yehowa hpe grau nna gara hku kamhpa mai na kun? Tinang hta yawga nga taw ai lam chye mat ai ngu saga. Shawng nnan chye dat ai shaloi hkrit na re. Dai majaw, sarawun hpe sa madun ai. Dai zawn yawga nga ai machyi masha law law hpe, dai sarawun tsi ga ai. Tinang a hkamsha lam hpe shi atsawm madat ya ai. Kaga ni hpe tsi ya ai shaloi, awng dang wa ai tsi tsi ai ladat hpe tsun dan ai. Grai kaja ai sarawun re ngu hkamsha ai. Sarawun hpe kam ai majaw, hkrit myit yawm wa ai. Dai zawn sha, anhte a matu Yehowa galaw ya wa ai lam ni, galaw ya nga ai lam ni, galaw ya na lam ni hpe myit dat ai shaloi grau kamhpa wa na re. Dawi dai zawn sha myit wa ai. Ya, Shakawn 56 hta lawm ai Dawi a ga nkau hpe bawngban yu ga. Tinang mung Yehowa hpe kamhpa ai hku nna, hkrit myit hpe gara hku awng dang lu ai lam myit yu u.

Yehowa Galaw Ya Wa Ai Lam Ni

5. Hkrit myit hpe tawt lai na matu Dawi hpa ni myit ai kun? (Shakawn 56:12, 13)

⁵ Asak shoihpa hkrum nga ai aten hta, moi Yehowa galaw ya wa ai lam ni hpe myit ai. (Shakawn 56:12, 13 hpe hti u.) Prat ting Dawi dai hku galaw wa ai. Ga shadawn, hpan da lam ni hpe myit ai. Dai majaw, Yehowa a n-gun atsam kaba ai lam, masha ni hpe lanu lahku ai lam ni hpe bai dum wa ai. (Shk 65:6-9) Dai hta n-ga, kaga ni a matu Yehowa galaw ya wa ai lam ni hpe myit ai. (Shk 31:19; 37:25, 26) Grau nna gaw, tinang a matu galaw ya wa ai lam ni hpe myit ai. Shangai ai aten kaw na Yehowa makawp maga ya wa ai, madi shadaw ya wa ai lam ni hpe re. (Shk 22:9, 10) Dai zawn myit ai majaw, Yehowa hpe Dawi grau kamhpa wa ai.

6. Hkrit ai aten ni hta Yehowa hpe kamhpa na matu hpa gaw karum ya lu ai kun?

⁶ Hkrit wa yang, Yehowa galaw ya wa ai lam ni hpe myit yu u. Hpan da lam ni hpe myit yu  u. Ga shadawn, ntsa malen u ni, nampan ni hpe “mada yu” u. Dai ni gaw, Karai a hkrang bung sumla hte maren hpan da n hkrum ai. Karai hpe n nawku lu ai. Raitim, shanhte hpe Karai Kasang lanu lahku ai. Rai yang, anhte hpe grau nna lanu lahku na re. Dai zawn myit ai gaw, Yehowa hpe grau kamhpa wa shangun ai. (Mat 6:25-32) Shi hpe nawku ai ni a matu, Yehowa galaw ya wa ai lam ni hpe mung myit yu u. Chyum Laika hta lawm ai, makam masham madun wa ai marai langai ngai a lam hkaja mai ai. Dai ni aten na Karai a mayam langai ngai a mahkrum madup hpe hti mai ai. a Nang hpe mung Yehowa gara hku lanu lahku ya nga ai lam, tengman ai tara de gara hku lau la wa ai lam hpe myit yu u. (Yhn 6:44) Na a akyu hpyi ga ni hpe mung gara hku htai ya ai kun? (1 Yh 5:14) Tsawra ai kasha a shagu hkungga a majaw, shani shagu nang gara hku akyu lu nga ai kun?—Ehp 1:7; Heb 4:14-16.

7. Hkrit myit hpe tawt lai na matu, myihtoi Daniela a mahkrum madup gaw Banesa hpe gara hku karum ya ai kun?

⁷ Heti mungdan kaw na nauna Banesa b gaw, hkrit hpa masa langai hpe hkrum wa ai. La langai shi hpe hkan ra ai. Shani shagu phone shaga ai, laika sa ai. N ra ai ngu nyet kau tim, dai wa gaw grau sawng wa ai. Jahkrit shama ai lam ni pyi galaw wa ai. “Ngai hkrit ai” ngu Banesa tsun ai. Hkrit myit hpe gara hku tawt lai wa ai kun? Tinang hkum tinang makawp maga na matu, galaw lu ai lam ni hpe galaw ai. Ahkang aya nga ai ni hpe sa shana na matu, myitsu salang langai karum ya ai. Moi na mayam ni hpe Yehowa gara hku makawp maga ya wa ai lam, myit maju jung ai. “Shawng nnan ngai myit hkrup ai gaw, myihtoi Daniela a lam re. Mara n nga tim, hkanghkyi nhkun de jahkrat bang kau hkrum ai. Raitim, hkanghkyi ni a n-gup hpe Yehowa pat da ya ai. Ngai mung, nye a masa ni hpe Yehowa kaw akyu hpyi nna ap kau ai. Dai hpang, ngai n hkrit sai.”—Dan 6:12-22.

Yehowa Galaw Ya Nga Ai Lam Ni

8. Dawi hpa hpe kam ai kun? (Shakawn 56:8)

⁸ Gat mare hta Dawi asak shoihpa hkrum tim, hkrit myit a majaw kajawng kaja n byin mat ai. Dai aten hta, Yehowa hpa galaw ya nga ai lam myit dat ai. Yehowa lam madun ai, makawp maga ai, tinang a hkamsha lam hpe chye na ya ai lam hkamsha lu wa ai. (Shakawn 56:8 hpe hti u.) Dai hta n-ga, Yonahtan hte Hkinjawng Agyi Ahimelek zawn re ai manang ni mung nga ai. Shanhte gaw, sadi dung let madi shadaw ya ai, tatut karum ya ai. (1 Sa 20:41, 42; 21:6, 8, 9) Hkawhkam Shawlu sat na matu shakut nga tim, Dawi asak lawt mat ai. Tinang hpa ni hkrum nga ai, gara hku hkamsha nga ai hpe Yehowa atsawm chye ai lam, Dawi kam mat ai.

9. Anhte langai hpra hte seng nna Yehowa hpa chye ai kun?

⁹ Nang mung hkrit hpa masa ni hkrum ai shaloi, nang hpa ni hkrum nga ai, gara hku hkamsha nga ai hpe Yehowa chye ai lam dum u. Ga shadawn, Egutu mung hta Israela ni n tara ai lam hkrum ai hpe sha n-ga, “shanhte hkrum ai nni nkri [mayak mahkak] hpe” Yehowa atsawm chye ai. (Pru 3:7) Tinang “nni nkri” hkrum ai hpe mung, “ru tsang ai hpe” mung, Yehowa mu ai lam Dawi mahkawn hte shakawn wa ai. (Shk 31:7) Shi a amyu masha ni shanhte a mara a majaw jamjau hkrum tim pyi, Karai Kasang “nni nkri” hkamsha ai.  (Esa 63:9) Nang hkrit ai aten hta, na a hkamsha lam hpe Yehowa chye na ya ai, hkrit myit hpe tawt lai lu na matu grai karum ya mayu ai.

10. Yehowa lanu lahku na, mayak mahkak ni hpe hkamjan lu hkra karum ya na ngu ai hpe nang hpa majaw kam ai kun?

¹⁰ Hkrit hpa masa hkrum yang, tinang hpe Karai Kasang gara hku karum ya nga ai hpe chye na matu yak ai. Dai majaw, Karai Kasang gara hku karum ya nga ai hpe chye hkra akyu hpyi u. (2 Hk 6:15-17) Dai hpang, ndai hku myit yu u: Zuphpawng hta na lu ai mungga, mahtai a majaw ngai n-gun lu mat ai kun? Laili laika langai, video langai, JW mahkawn langai a majaw n-gun lu mat ai kun? N-gun lu hpa ga, chyum daw langai hpe marai langai ngai tsun dan ai kun? Hpunau nauna ni madun ai tsawra myit, Chyum Laika kaw na lu la ai n-gun jaw lam hpe, kalang lang n sadi hkrup chye ai. Dai ni gaw Yehowa kaw na lu la ai grai kaja ai kumhpa ni re. (Esa 65:13; Mrk 10:29, 30) Tinang hpe Karai Kasang lanu lahku ai, Karai Kasang hpe kamhpa mai ai ngu ai madi madun lam ni re.—Esa 49:14-16.

11. Hkrit myit hpe tawt lai na matu Aida hpe hpa gaw karum ya ai kun?

¹¹ Yakhkak ai aten hta Yehowa gara hku karum ya ai hpe, Sinigaw mungdan kaw na nauna Aida sadi hkrup ai. Kaba htum re ai majaw, dinghku hpe madi shadaw na matu kanu kawa ni myit mada ai. Raitim, Aida ningshawng galaw ai majaw, ja gumhpraw yak wa ai. Nta masha ni masin pawt nna, shi hpe mara shagun ai. “Kanu kawa ni hpe n lu madi shadaw na, nta masha ni n ra na hpe hkrit ai. Dai zawn masa de du hkra, Yehowa hpa majaw ahkang jaw ai kun? ngu nna pyi, ngai mara shagun hkrup ai” ngu Aida tsun ai. Dai hpang, zuphpawng hta mungga langai na lu ai. “Anhte a myit hkra machyi ai lam ni hpe Yehowa chye ai ngu, mungga htawn ai wa tsun ai. Tinang hpe Yehowa tsawra ai lam, myitsu salang ni, kaga ni a hpaji jaw ga a majaw angwi ngwi bai kam wa ai. Karai Kasang karum ya na ngu ai kamhpa myit hte akyu bai hpyi ai. Akyu hpyi ga ni hpe Karai Kasang mahtai jaw ai hpe mu lu ai majaw, myit simsa mat ai” ngu tsun ai. Hpang de, Aida bungli nnan lu mat ai majaw, ningshawng matut galaw lu ai. Kanu kawa ni  hte kaga ni hpe madi shadaw lu ai. “Yehowa hpe ngai grau kamhpa chye wa ai. Ya nga yang, akyu hpyi dat ai hte hkrit myit ni mat mat ai” ngu tsun ai.

Yehowa Galaw Ya Na Lam Ni

12. Shakawn 56:9 hku nga yang Dawi hpa hpe kam ai kun?

¹² Shakawn 56:9 hpe hti u. Hkrit myit hpe Dawi tawt lai lu na matu karum ya ai lam langai hpe, dai chyum daw hta tsun da ai. Asak shoihpa hkrum nga tim, Yehowa galaw ya na lam hpe myit ai re. Aten hkrak Yehowa hkye la na hpe Dawi chye ai. Tinang gaw, Israela ni a bai lung na hkawhkam re ai lam, Yehowa tsun ngut chyalu re. (1 Sa 16:1, 13) Yehowa a ga sadi yawng hpring tsup wa na hpe Dawi kam ai.

13. Yehowa hte seng nna hpa hpe kam mai ai kun?

¹³ Nang hpe mung hpa ni galaw ya na ngu, Yehowa ga sadi jaw da ai kun? Mayak mahkak ni kaw nna gaw n hkye la ai. c Ndai nhkru ai mungkan hta hpa ni hkrum tim, mungkan nnan hta gaw hkrum sana n re. Yakhkak jamjau lam yawng hpe, Karai Kasang yeng seng kau ya sana re. (Esa 25:7-9) Hpan Madu re ai majaw, si mat ai ni hpe bai jahkrung ya lu ai atsam nga ai, ana ahkya ni hpe shamai shatsai ya lu ai, ninghkap ai ni yawng hpe yeng seng kau ya lu ai.—1 Yh 4:4.

14. Hpa ni hpe myit ra ai kun?

¹⁴ Hkrit myit nga wa yang, htawm hpang hta Yehowa galaw ya na lam ni hpe myit dat u. Satan n nga mat sana aten, nhkru ai masha ni jahten hkrum nna masha kaja ni sha ngam nga na aten, lani hte lani grau hkum tsup wa na aten hpe myit yu u. Htawm hpang a lam gara hku myit yu mai ai hpe, 2014, ginwang zuphpawng a hkrang shala langai hta madun da ai. 2 Timohti 3:1-5 hta lawm ai chyum ga ni gaw, Hparadisu a lam tau hkrau tsun da ai nga yang, gara hku byin nga na kun? ngu nna, dai hkrang shala hta lawm ai dinghku zawn myit yu mai ai. “Mungkan nnan asak aprat gaw, grai ngwi pyaw na ngu ai hpe chye nga u. Kaning rai nme law, masha ni gaw kaga ni hpe tsawra ai ni, wenyi lam hpe manu shadan ai ni, lata npu taw ai ni, shagrit shanem ai ni, Karai Kasang hpe shakawn ai ni, kanu kawa ga hpe madat ai ni, chyeju dum chye ai ni, chyoi pra ai ni, nja nhpra myit rawng ai ni, myit hpe hkang chye ai ni, kam mai ai ni, marai rawng ai ni, sumnung ai ni, kaja ai lam hpe ra sharawng ai ni, asum jaw chye ai ni, sadi dung ai ni, myit tsaw myit dap n nga ai ni, pyaw daw lam hta na Karai Kasang hpe grau tsawra ai ni rai na mara ai. Shanhte gaw tara hkungga ai htung hkan ma ai. Dai zawn re ai ni hte hku hku hkau hkau kanawn mazum u” ngu hti ra ai. Mungkan nnan asak aprat hpe nta masha ni, hpunau nauna ni hte nang bawngban ai kun?

15. Hkrit myit hpe tawt lai lu na matu nauna Tan-nya hpe hpa gaw karum ya ai kun?

¹⁵ Dingdung Meksidoniya mungdan kaw na nauna Tan-nya gaw, htawm hpang shaman chyeju ni hpe myit ai hku nna, hkrit myit hpe tawt lai wa ai. Chyum Laika hkaja ai majaw, kanu kawa ni grai ninghkap ai. “Ngai hkrit ai lam nkau gaja wa hkrum wa ai. Zuphpawng ngut shagu, nu gaw ngai hpe kayat ai. Yehowa Sakse galaw yang sat kau na ngu, nu yan wa jahkrit ai” ngu Tan-nya tsun ai. Nta kaw na gawt shapraw hkrum ai. Tan-nya hpa galaw wa ai kun? “Sadi dung yang, prat tup pyaw na hpe myit maju jung dat ai. Ndai nhkru ai mungkan hta sum kau ra ai lam ni a matu, mungkan nnan hta Yehowa kumhpa jaw na, hkrum wa ai n kaja ai lam yawng malap mat na hpe mung myit ai” ngu tsun ai.  Tan-nya teng sha sadi dung wa ai. Yehowa karum ya ai majaw, nga shara mung lu mat ai. Sadi dung ai hpunau langai hte hkungran nna, aten hpring magam hta ngwi pyaw let shang lawm nga ai.

Yehowa Hpe Grau Kamhpa Hkra Ya Galaw Da U

16. Luka 21:26-28 hta tau hkrau tsun da ai hkrit hpa lam ni hpe mu ai shaloi, nden marai nga na matu hpa gaw karum ya na kun?

¹⁶ Ru tsang kaba laman, masha ni “hkrit wa ai majaw, htan mat na” re. Karai a masha ni gaw, nden marai hte ngang ngang tsap nga na re. (Luka 21:26-28 hpe hti u.) Hpa majaw kun? Yehowa hpe kamhpa chye sai majaw re. Hkrum wa ai mayak mahkak ni gaw, hkrum ra na mayak mahkak ni hpe tawt lai na matu karum ya ai ngu, shawng hta lawm ai nauna Tan-nya tsun ai. “Anhte hpe Yehowa n hkye la lu ai mayak mahkak ngu ai gaw n nga ai. Kalang lang, byin nga ai lam ni hpe marai langai ngai hkang da ai zawn hkamsha ai. Yehowa grau atsam kaba ai. Kade daram yak ai mayak mahkak raitim, lani mi hta htum mat na re” ngu tsun ai.

17. 2024 shaning ginchyum chyum daw gaw anhte hpe gara hku karum ya ai kun? (Makawp sumla hpe yu u.)

¹⁷ Dai ni aten, hkrit tsang ra ai lam law law nga ai. Raitim, Dawi zawn, hkrit myit hpe tawt lai lu ai. “Hkrit ang ai nhtoi hta e chyawm gaw, Ngai nang hta hpa nga na nngai” ngu ai Dawi a akyu hpyi ga gaw, 2024 a matu shaning ginchyum chyum daw re. (Shk 56:3) Dawi gaw, “grau hkrit shangun ai hkrit hpa lam ni, manghkang ni hpe myit maju n jung ai. Hkye La Madu hpe myit maju jung ai” ngu, ndai chyum daw hte seng nna lakap da ai laika buk langai hta tsun da ai. Du wa na shata ni, grau nna gaw hkrit hpa masa ni hkrum wa ai shaloi, dai ning na shaning ginchyum chyum daw hpe myit u. Yehowa galaw ya wa ai lam ni, galaw ya nga ai lam ni, galaw ya na lam ni hpe aten la nna myit yu u. Rai yang, “Karai Kasang hta ngai machyu nga nna, hpa mung n hkrit nga nngai” ngu nna, Dawi zawn lu tsun na re.—Shk 56:4.