1. Sooq annilaangasarsin­naavugut?

 TAMATTA annilaangasarpugut. Soorunami Biibili misissoratsigu toqusimasut anersaapiluillu ersigisarun­naarpagut siunissarlu aarlerigiun­naarlugu. Ullutsinnili ‘annilaarnartut’, soorlu sorsunnerit, pinerlut­tuliornerit nappaatillu, pisarput. (Luk 21:11) Aamma imaassinnaavoq inunnut, soorlu oqartus­saasunut uagutsinnik malersuisunut imaluunniit allaat ilaquttatsinnut guutisiornermut ilumoortumut akerliusunut, qunusartugut. Ilaasa aamma maanna siunissamiluunniit misilin­neqarnermi aalajaallutik pinertusaarsin­naanerlutik ernumas­sutigisarpaat.

2. Gatimi qanoq pisoqarnersoq oqaluttuariuk.

² Daavi annilaangasarpoq. Assersuutigalugu kunngimit Saulimit toqunniar­neqarami filisterit illoqarfiannut Gatimut qimaavoq. Gatip kunngiata Akiship paasivaa Daavi filisterinik 10.000-nik toqutsisimasoq. Daavillu “Gatip kunngia ersigingaalerpaa”. (Sam 1. 21:11-13) Qanoq pineqas­sanerluni ernumas­sutigaa. Daavip sapiittuar­nissaminut suna iluaqutigaa?

3. Tussiaat 56:2-4, 12-milu allaatigineqartutut Daavip annilaanganermini suna iluaqutigaa?

³ Daavip Gatimiin­nermini misigis­sutsini Tussiaat 56-imi allaatigai. Annilaanganini ammasumik allaatigaa aamma suna iluaqutigisimanerlugu nassuiarlugu. Siooranermini Jehova tatigisarpaa. (Tussiaat 56:2-4, 12 atuakkit). Jehovallu tatiginissaanut pissutis­saqarluarpoq. Jehova ikiortigalugu Daavi eqquumiip­pasissin­naasumik iliuuseqarpoq, tassa silaarut­tuusaarpoq.  Taamaaliormallu Akiship Daavi toqukkusuk­kunnaarlugu peqqusivoq ingerlassasoq. Taamaalilluni Daavi aniguivoq. – Sam 1. 21:14–22:1.

4. Jehovamik qanoq tatigin­ninnerulersin­naavugut? Assersuuteqarit.

⁴ Uaguttaaq Jehova tatigigutsigu annilaanganitsinni silatusaarsin­naavugut. Qanorli Jehovamik tatigin­ninnerulersin­naavugut, ingammik annilaanganitsinni? Assersuuteqariarta: Nappaateqarlutit paasigukku ernumalersin­naavutit. Nakorsarli tatigigukku ernumaval­laassan­ngilatit. Imaassinnaavoq inuppassuit allat taamatut nappaatillit ikiorluarsimagai. Immaqa tusarnaaq­qissaarpaatit ersersillugulu ilumut misigis­sutsitit paasilluarlugit. Immaqalu katsorsaariaaseq allat iluaqutigisimasaat siunnersuutigaa. Taamatuttaaq Jehovap iliuuserisimasai, maannakkut iliuuserisai siunissamilu iliuuserisassai eqqarsaatigisarutsigit taassuminnga tatigin­ninnerulersin­naavugut. Taamatorpiaq Daavi iliorpoq. Oqaasiisa ilaasa isumassarsiarititaasut Tussiaat 56-imi allassimasut misissor­neranni illit Jehovamik qanoq tatigin­ninnerulersin­naanerlutit qanorlu annilaangajun­naarsin­naanerlutit eqqarsaatigikkit.

JEHOVA QANOQ ILIORSIMAVA?

5. Daavi annilaangagaangami suut eqqarsaatigisarpai? (Tussiaat 56:13, 14)

⁵ Daavip inuunermini navianar­torsior­tilluni Jehovap iliuuserisimasai eqqarsaatigisarpai. (Tussiaat 56:13, 14 atuakkit). Inuunini tamaat taamatut eqqarsar­tariaaseqarpoq. Assersuutigalugu Jehovap pinngor­titaanik eqqarsaatigin­neqqissaar­tarnini Jehovap killeqan­ngitsumik pissaaneqar­neranik inunnillu soqutigin­ningaar­neranik eqqaasin­neqaatigisarpaa. (Tuss 65:7-10) Aamma Jehovap inunnik allanik ikiuisarnera Daavip eqqarsaatigeq­qissaartarpaa. (Tuss 31:20; 37:25, 26) Aamma pingaarnertut eqqarsaatigeq­qissaartarpaa nammineq pilluni Jehovap iliuuserisimasai. Jehovammi Daavi inunngor­neraniilli isumassorlugulu illersortarpaa. (Tuss 22:10, 11) Taamatut eqqarsaatigin­neqqissaartarami Daavip Jehova tatiginerulersimassavaa!

6. Annilaangagaangatta Jehovamik tatigin­ninneruler­nissatsinnut suna iluaqutigisin­naavarput?

 ⁶ Annilaangasutut misigigaangavit Jehovap iliuuserisimasai eqqarsaatigisakkit. Pinngortitai eqqarsaatigeq­qissaartakkit. Assersuutigalugu timmissat naasullu, Jehova assilillugu pinngor­titaanngik­kaluartut taassumunngalu guutisiorsin­naanngik­kaluartut, Jehovap qanoq isumagisarnerai ‘qimerloorsinnaavat’. (Mat 6:25-32) Taamaalillutit Jehovamit isumassor­neqarnissat upperinerulersinnaavat. Aamma Jehovap kiffani qanoq ikiortarsimagai eqqarsaatigisarsinnaavat. Immaqa Biibilimi inuk oqaluttuarineqartoq upperluarnermik ersersitsisimasoq pillugu misissuinikuuvutit imaluunniit nalitsinni Jehovap kiffaasa ilaat pillugu atuarnikuullutit. a Aamma Jehovap ilinnik isumassuisareernera eqqarsaatigisaruk. Ilisarisimaler­niassagakku qanoq ikiorsimavaatit? (Joh 6:44) Qinnutitit qanoq akisarsimavai? (Joh 1. 5:14) Aamma ernerata asasaata pilliutaa ullut tamaasa qanoq iluaqutigisarpiuk? – Ef 1:7; Hebr 4:14-16.

7. Pruffiitimik Daanialimik oqaluttuaq Vanessap annilaangajun­naarnis­saminut qanoq iluaqutigaa?

⁷ Qatanngut arnaq Vanessamik atilik, b Haitimi najugalik, annilaangalis­sutigisaminik misigisaqarpoq. Illoqarfigisamini angutip atoqatigerusullugu sianerfigisarlugulu attavigisaqat­taarpaa. Vanessap itigartil­luinnarpaa. Persaraluguli angut kimigiiser­nerulerpoq allaallu sioorasaarlugu. Vanessa oqarpoq annilaangalluni. Qanoq iliorpa? Imminut illersor­niarluni iliuuseqarpoq. Oqartus­saasunut attaveqar­niassagami utoqqaanertamit ikiorneqarpoq. Aammali Jehovap itsaq kiffani qanoq illersorsimanerai eqqarsaatigisarpaa. Ima oqaluttuarpoq: “Pruffiiti Daaniali siullertut eqqaavara. Pisuussuteqan­ngikkaluarluni løvit perlilersut inaannut iginneqarpoq. Jehovamilli illersor­neqarpoq. Allamik iliorsin­naannginnama Jehova qinnuigaara ajornar­torsiutiga aaqqeqqullugu, aamma qinnutigaara angutip taassuma uanga eqqarsaatigiun­naassagaanga. Qinoreerlunga annilaangajun­naarpunga.” – Dan 6:13-23.

JEHOVA MAANNAKKUT QANOQ ILIORPA?

8. Daavip suna qularinngilaa? (Tussiaat 56:9)

⁸ Daavi Gatimi toqussutigisin­naasaminik navianar­torsioraluarluni annilaanganini sapilis­sutiginngilaa. Jehovalli pisumi tamatumani ikiorniarluni iliuuserisai eqqarsaatigineruai. Daavip nalunngilaa Jehovamit siulersor­neqarluni, illersor­neqarluni misigis­sutsinilu paasineqartut. (Tussiaat 56:9 atuaruk). Daavi aamma ikinngutiminit ilumoorfigin­nittumit, soorlu Jonatanimit palasiunermillu Akimelekimit, tapersersor­neqarlunilu ikiorser­neqarpoq. (Sam 1. 20:41, 42; 21:7, 9, 10) Kunngimillu Saulimit toqunniar­neqaraluarluni Daavi aniguivoq. Daavip qularin­ngilluinnarpaa qanoq misiginerluni misigis­suseqar­nerlunilu Jehovap ilisimalluaraa.

9. Jehovap uagut pilluta suna maluginiartarpaa?

⁹ Annilaangas­sutigisannik misilin­neqaraangavit eqqarsaatigisaruk Jehovap misilin­neqaatit misigis­sutsitillu maluginiartarai. Assersuutigalugu Jehovap Israalikkut Egyptenimi ajortumik pineqarnerat maluginiar­tarlugulu “erloqissutaat” ilisimavai. (Mos 2. 3:7) Daavi taalliorpoq ‘annikil­liornini’ aliasungaarninilu Jehovap takusarai. (Tuss 31:8) Aamma Guutip innuttai allaat namminneq pisuussutigisaminnik aalajangiinerluk­kaangata, taakku ‘annikil­liorneranni isumassortarpai nillianerallu tusaallugu’. (Tuss 106:44) Annilaangagaangavit  Jehovap misigis­sutsitit paasisarpai annilaangajun­naarnias­sagavillu ikiorusungaarlutit.

10. Sooq Jehovap asagaatit misilin­neqarnermilu ikiussagaatit qularin­ngiliuk?

¹⁰ Annilaangas­sutigisannik misilin­neqaruit immaqa Jehovamit ikiorneqarnerit maluginian­ngitsoorpat. Taava susinnaavit? Qanoq tapersersor­neraatit takusin­naaqqullugu qinnuigiuk. (Kng 2. 6:15-17) Taava uku eqqarsaatigisin­naavatit: Ataatsimiinnermi oqalugiaat imaluunniit akissut nakussatsis­sutigisimavara? Biibililersaarut, video immikkul­luunniit erinniaq tuppallersaatiginikuuara? Imaluunniit arlaata eqqarsaammik allassimaf­fimmilluunniit nuannersumik avitseqatiginikuuaanga? Qatanngutigiissuit asaqatigiittut anersaakkullu inuussutissat pisartakkagut taamaat­tussaannartut isigilersoorsin­naavagut. Eqqaamajuartiguli taakku Jehovamit tunissutaasut immikkut ittut. (Es 65:13; Mak 10:29, 30) Ilinnut asannin­neranik uppernarsaataapput. (Es 49:14-16) Aamma ersersippaat Jehova tatigisinnaagit.

11. Aidap ernumas­suteqarun­naarnis­saminut suna iluaqutigaa?

¹¹ Aidap, Senegalimi najugallip, misilin­neqarnermini Jehovamit ikiorneqarnini maluginiarsimavaa. Angajul­lersaammat angajoq­qaavisa naatsorsuutigaat aningaasaqar­niarnikkut pilersus­sagaatik. Pionerin­ngorniarlunili pisariil­lisaagami aningaasatigut ajornar­torsiulerpoq. Ilaqutaasa kamaatilerlugulu isornar­torsiulerpaat. Ima oqarpoq: “Angajoqqaama ikiornissaat qularaara ajattor­neqarnissaralu ernumas­sutigalugu. Atukkakka taama ajortigilermata allaat Jehova pisuutippara.” Ataatsimiin­nermili oqalugiaat iluaqutigaa. “Oqalugiartup eqqaasip­paatigut qanorluunniit ernumas­suteqaraluarutta Jehovap ilisimagai. Piffissap ingerlanerani aamma utoqqaanertanit allanillu siunnersor­neqarama Jehovamit asaneqarnera qulariun­naarpara. Jehovamut qinugaangama taassumannga ikiorneqar­nissara qulariun­naariar­tulerpara. Qinnutikkalu akineqarmata qamuuna eqqissineq misigaara.” Aida kingusin­nerusukkut suliffit­taarami imminut pioneritut  pilersorsin­naallunilu angajoq­qaaminik allanillu aningaasatigut ikiuisin­naalerpoq. Ima oqarpoq: “Jehovap tatigil­luinnarnissaa ilinniarpara. Maanna qinugaangama amerlanertigut ernumas­sutaarut­tarpunga.”

JEHOVA SIUNISSAMI QANOQ ILIORUMAARPA?

12. Tussiaat 56:10 naapertorlugu Daavip suna qularinngilaa?

¹² Tussiaat 56:10 atuaruk. Versimi tamatumani ersersin­neqarpoq Daavip siooranermini aamma suna iluaqutigisimaneraa. Inuunini navianar­torsioraluartoq imminut pilluni Jehovap iliuuseriumaagai eqqarsaatigeq­qissaarpai. Daavip nalunngilaa Jehovap piffissaq eqqorlugu annaakkumaaraani, Jehovami neriorsuivoq Daavi Israalimi kunngin­ngorumaartoq. (Sam 1. 16:1, 13) Daavip qularinngilaa Jehovap neriorsuutini eqquutitissagai.

13. Jehovap iliuuserisassai suut ilimagaagut?

¹³ Jehovap ilinnut iliuuseriumaakkani suut neriorsuutigai? Naatsorsuutigin­ngilarput ajornar­torsiutigut qanorluunniit ittut maanna pinngitsoor­tissagai. c Qanorluunniilli misilin­neqaraluarutta paratiisissami Jehovap ajornar­torsiutit tamaasa atuukkun­naarsissavai. (Es 25:7-9) Pinngor­titsisitta soorunami toqusimasut makitis­sinnaavai, ajorunnaarsis­sinnaavaatigut akerlilersuisullu tamaasa piuneerus­sinnaallugit. – Joh 1. 4:4.

14. Suna eqqarsaatigisas­savarput?

¹⁴ Annilaangagaangavit Jehovap siunissami iliuuseqarumaarnera eqqarsaatigisaruk. Saatani piuneerun­neqarpat, inuit ajortut naapertuil­luartunik taarser­neqarpata ajortiliunerlu atuukkun­naariartorpat qanoq misigis­sanerlutit takorlooruk. 2014-imi ataatsimeersuarnermi takutitsinermi ersersin­neqarpoq neriuuterput qanoq eqqarsaatigeq­qissaarsin­naagipput. Ataataasup ilaquttanilu Timuutiusimut allakkat aappaat 3:1-5 inuit paratiisimiittut allaatigineqaraluarpata qanoq issanersut eqqartorpaat: “Paratiisissami pissutsit ima nuanner­tigissapput: Inuimmi tassaalerumaarput asannittut, anersaakkut ittunik pingaar­titsisut, anneruniajuitsut, maniguuttut, Guutimik unnersiutiginnittut, angajoqqaanut naalattut, qujamasuttut, ilumoorfiginnittut, ilaquttaminnut tunniusimasut, isumaqatigiik­kumasut, allat pillugit ajunngitsuinnarnik oqaaseqartartut, imminut aqussinnaasut, saamasut, ajunngitsunik nuannarisaqartut, tatiginartut, uteriitsuun­ngitsut, makitanatik pingaakujun­ngitsut, Guutimik asannillutik nuannaar­niutinik pingaar­titsinngitsut, Guutimut tunniusimal­luinnartut. Inuit taamaattut ilagisas­savatit.” Ilaquttatillu imaluunniit uppeqatitillu paratiisissami inuuneq qanoq issanersoq eqqartor­tarpisiuk?

15. Tanjap annilaanganermini aalajaat­tuarnis­saminut suna iluaqutigaa?

¹⁵ Qatanngut arnaq Tanjamik atilik, Makedoniami Avannarlermi najugalik, siunissami pilluaq­qussutissat eqqarsaatigeq­qissaaramigit aalajaat­tuarsimavoq. Biibilimik misissueqateqarami angajoq­qaaminit sakkortuumik akerlilersor­neqarpoq. Ima oqaluttuarpoq: “Sioorassutima ilaat piviusun­ngorput. Tamatigut ataatsimeereersimagaangama anaanama unatartarpaanga. Angajoqqaama sioorasaarpaannga Nalunaajaasun­ngoruma toqunniarlunga.” Naggataatigut Tanja angerlarsimaf­fimminit anisitaavoq. Qanoq piva? Ima oqarpoq: “Aalajaat­tuaruma naassaan­ngitsumik pilluar­nissara eqqarsaatigineruara. Aamma eqqarsaatigaakka maanna annaasimasakka paratiisissami Jehovap taarsissagai aamma pisut ajortut eqqaamaneerutissasut.”  Tanja aalajaat­tuarpoq. Jehovallu ikiuineratigut inissarsivoq. Maanna Tanja qatanngummik angummik aalajaatsumik ueqarpoq, pilluarlutillu piffissartik tamaat atorlugu Jehovamut kiffartorput.

JEHOVAMIK TATIGIN­NINNERULERIT

16. Siulittuutit eqquuttut takugutsigit sapiittuar­nissatsinnut suna iluaqutigis­savarput? (Lukkarsi 21:26-28)

¹⁶ Annikil­liornar­tussarsuarmi inuit amerlanersaat ‘ersinermit ilisimajun­naassapput’. Guutilli innuttai aalajaal­lutillu sapiittuassapput. (Lukkarsi 21:26-28 atuakkit). Sooq taamaas­sinnaavugut? Jehovap tatiginissaa ilinniareersimagatsigu. Tanja, eqqaariigarput, oqarpoq nalaassimasani qaangerluarsimagamigit maanna eqqissiun­naarnartunik nalaataqaraangami aalajaat­tuarsin­naalluni. Ima oqarpoq: “Paasivara qanorluunniit pisoqaraluarpat Jehovap pinertusaarsin­naaqqulluta ikiorsin­naagaatigut pilluaq­qullutalu. Ilaannikkut ima isikkoqarpasis­sinnaavoq allat pissutsit aqukkaat. Kisianni Jehovap akuersineratiguinnaq aqutsisin­naasarput. Misilin­neqarnerlu artornaraluartoq killissaqarpoq.”

17. 2024-mi ukiumut allassimaffik qanoq iluaqutigis­savarput? (Saqqaani asseq takuuk).

¹⁷ Nalitsinni annilaangas­sutigisin­naasagut amerlaqaat. Kisianni Daavitut annilaanganeq pissutigalugu sapiler­niarnata aalajangersin­naavugut. 2024-mi ukiumut allassimaffimmi allassimasutut Daavi Jehovamut ima qinuvoq: “Siooraleraangama tatigisarpakkit.” (Tuss 56:4) Biibilimik ilisimatuup versi tamanna pillugu allaatigisaa una maluginiaruk: “Daavip annilaangas­sutigisani ajornar­torsiutiniluunniit eqqarsaatigiuaan­nanngilai. Aniguisitsisinili tatigaa.” Qaammatini tulliuttuni, ingammik siooras­sutigisannik nalaataqaraangavit ukiumut allassimaffik eqqarsaatigisaruk. Jehovap iliuuserisimasaasa, maanna iliuuserisaasa siunissamilu iliuuseriumaagaasa eqqarsaatiginis­saannut piffissaqartarit. Taava Daavitut ima oqarsin­naassaatit: “Guuti tatigigakku siooran­ngilanga.” – Tuss 56:5.