1. Bwabiny tudy mwa kumvw mooy mu biisang bikwaabw?

 KUDYAAKAL biisang bidy muut woos umvw mooy. Nook, bu mutudy bamanyik myand yidy Bibl ulongweesh, katwiin tuciin bafw, tuciin bademoh eecy myand yiikal mwa kulongek mu mafuk miiyiiy. Ki bu mutudy mu ciisang cidy “myand yikwaakwaat mooy,” yilongek, tudy mwa kumvw mooy bwa diivit, bwa myand ya cikis ni bwa lubeel. (Luuk 21:11) Misang yikwaabw tudy mwa kumvw mooy bwa baafumw ba mbul-matady bitukaakabish, eecy biin mu cisak ciitut balwiilwiish bahaahambidil Mawej biin-biin. Bakwaabw bady ni mooy wa neey, kabaakumanoh bend bwa kutaatameen makab makwaabw miikalobw mwa kumon kaabaak eecy mu mafuk miiyiiy.

2. Umvwiij shikacil a Davih haakadyey ku Kat.

² Kwaakady biisang byaakady Davih mumvw mooy. Cileejel, haakady Mukaleng Sawul muteet bwa kumulondakany, Davih uyiil lubil ku Kat cibunj cya Baafilisiteh. Akish mukaleng a cibunj cya Kat umanyikil musang umw neey Davih waakady cilobw cizuhil baafilisiteh “binun diikumy.” Davih ‘umvwiil mooy i mwiin.’ (1 Sam. 21:10-12, NWT) Umvwiil mooy bwa cyaakady Akish mwa kwiiy kumulongel. I biny byaakady byambulwiish Davih bwa kuhetey mucim mukasakan?

3. Bilondeshel Misambw 56:1-3, 11, i mushind kaay waakady Davih mucim mooy?

³ Mu Musambw 56, Davih uleeleej mwaakadyey mwiiyumvw haakadyey muy ku Kat. Mu Musambw oow, Davih uleeleeb hatook bwaabiny umvwiil mooy ni uleeleej cikwaabw cyaakady cimukwanjok bwa kuman mooy. Haakady Davih mumvw mooy, uteekel Yehow micim. (Bal Misambw 56:1-3, 11, NWT.) Davih waakady ni kabingil ka kuteekel Yehow micim. Kudyambulwiish dya Yehow Davih wangaciil dihangadik dya meej bwa kulongey bwaal kaahand bukeekemesh bikasakan. Umb waatang kulong myand bu mubeel a  lubangul! Akish umutadil bu ciluby hamut ha kumutaley bu mulwiish, nook Davih uhetel mushind a kuyey lubil.—1 Sam. 21:13–22:1.

4. I mushind kaay utudy mwa kukashish kuteekel kwiitut kwa Yehow micim? Umvwiij.

⁴ Tut byeet tudy mwa kuman mooy hatuteetekel Yehow micim. Ki i mushind kaay utudy mwa kukashish kuteekel kwiitut kwa Yehow micim, nang-nang hady mooy wiitukwaat? Twangat cileejel. Hawumamanyik neey udy ni lubeel kaahand, udy mwa kumvw cyaakuuhal-hal mooy. Ki udy mwa kwiiy kubatamij micim uw muteekel dokteer iibuh micim. Udy mwa kwiikal muman kondahok baat bavul lubeel lwaakaabumw oolw. Udy mwa kukukun mat ni meej moos, ni ukujaadikil neey umvumvw biin-biin muwiiyumvumvw. Cikwaabw udy mwa kukwambil bwa kukondahey ni londah lwaakady lwambulwiish bakwaabw. Bya mushind aakaabumw, tukaakashish kuteekel kwiitut kwa Yehow micim hakutal myand yiikaadyey mulong, yidyey ulong kaabaak, ni yiiyey kwiitulongel mafuk kuuhal. I cicy cilongel Davih. Hatwendend ni kukontonon mamw may mafundish ku spiriit mujilang mady mu Misambw 56, iikal wend ni kulangil ha mushind uwudy byeeb mwa kukashish kuteekel kwiibuh kwa Yehow micim hakulek kwiikal ni mooy.

I MYAND KAAY YIKAADY YEHOW MULONG?

5. Bilondeshel Misambw 56:12, 13, Davih ulangil ha biny bwa kucimun mooy waakadyey nend?

⁵ Hacyaakady shikacil a Davih mwiikal mu buuhund, utumin meej mindiy ku myand yaakady Yehow muman kulong. (Bal Misambw 56:12, 13.) I cicy cyaakady Davih mulong mu shikacil indiy mutuutul. Cileejel, misang yikwaabw haakadyey ulangil ha biit bihangil Yehow, bimuvulwiijil neey Yehow udy ni bukash buvul ni i mukat cikwaabw baat bikasakan. (Mis. 65:6-9) Davih waakady ulangil cikwaabw ha myand yaakady Yehow mulongel baat bakwaabw. (Mis. 31:19; 37:25, 26) Ni ulangil nang-nang ha myand yaakady Yehow muman kumulongel. Yehow umwambulwiishil ni waakady mumulam kutangil teng ku diib dimulelelobw. (Mis. 22:9, 10) Biin-biin, kulangil ha myand eey kwambulwiishil Davih bwa kukashish mushind waakadyey muteekel Yehow micim!

6. Hatudy ni mooy, i biny biikal mwa kwiitwambulwiish bwiitut kuteekel Yehow micim?

⁶ Uw umvw mooy, iyihanguj neey: ‘I myand  kaay yikaady Yehow muman kulong?’ Langil ha biit bidyey muhang. Cileejel, “hatutaatal ni tulangil bikasakan” ha mushind udy Yehow utacil toony ni bilong—biit byaakadyey kay muhang mu ciifwaany cindiy ni bikiish ni mushind a kumuhambidil—bikaakashish diitabij diitut hakwiikal bajaadik neey wiiyiiy kwiitutacil byeet. (Mat. 6:25-32) Tukontonon cikwabw myand yaakady Yehow mulongel bahambidil bindiy. Udy mwa kulong habitaatal muut a mu Bibl uleejel diitabij dya habwaah, eecy udy mwa kubal bwaal bulong kudy mwiin mudimw a Yehow wa mu ciisang ciitut eecy. a cikwaabw, langil ha mushind udy Yehow muman kukwambulwiish. I mushind kaay waakadyey mukwambulwiish bwiibuh kumumanyik? (Jah 6:44) I mushind kaay waalabwiiley masambil miibuh? (1 Jah 5:14) I mabenesh kaay mawuheehet diifuk dyoos kuhicil ku mulambw utwaadil Mwaan indiy udyey mukat bikasakan?— Ef. 1:7; Ebr. 4:14-16.

7. I mushind kaay waakady myand yaakady yifikil muprofet Danyel yambulwiish vanessa bwa kucimuney mooy?

⁷ Mwiin-kweet mwaan-mukaj Vanessa b wa mu Haiti, waakady mutwiilangan ni shikacil waakady mumumvwiij mooy. Muut kaahand wa ha cyaab cyaakadyobw bashikat waakady umubiikan ni umufundil mesaaj diifuk dyoos, waakady umusak bwa kwend nend. Vanessa ulekeel ni mucim aakaabumw. Ki muut aaw wiiyiil kwiikal kaabaak ni cikis civul ni waakady cikwaabw umuleeb may mabiih. Uleeleeb neey: “numvwiil mooy.” I mushind kaay waakady Vanessa mutaatameen mooy waakadyey nend? Wangacil dihangadik dya kulong cyaakadyey mwa kulong bwa kwiilamey. Mukul mukwaabw umwambulwiishil bwa kuy katalanganey ni banen ba mbul-matady. Ki utumin meej ha mushind waakady Yehow mulam biin mudimw bindiy ba kal. Vanessa uleeleeb neey; “Muut a kuuhal uuyiiyil mu meej bwa mim kulangil ha diitabij dindiy, waakady muprofet Danyel. Baakady bamumb mu ciind cileeh mwaakady tambw ning mwaakadyey kay ni bwaal. Cikwaabw, Yehow umwambulwiishil. Nambiil Yehow bwa along bwa muut aaw aful meej kunady ni bwa yiiy kuuyambulwiish habitaatal cilumbw eecy. Kuunyim kwa bwaal oobw, cyaakadyoh bend mumvw cikwaabw mooy.”—Dan. 6:12-22.

MYAND KAAY YILOOLONG YEHOW KAABAAK?

8. Bilondeshel Misambw 56:8, i kutwiishibw kaay kwaakady naak Davih?

⁸ Ning mwaakady Davih mukaam kufw ku Kat, kaakadyoh bend utum meej mindiy ku myand yaakady yimukwaacish mooy. Ki utumin meej mindiy ku myand yaakady Yehow umulongel ha ciisang aacy. Davih waakady mwa kumvw neey, Yehow umuloolombol ni umulaalam ni umvw milang yindiy. (Bal Misambw 56:8.) Davih waakady cikwaabw ni balund bu mudy Jonatan ni mutam a balambul ba milambw ya Mawej Ahimelek baakady bamukashish ni bamwambulwiish. (1 Sam. 20:​41, 42; 21:​6, 8, 9) Ning haakady Mukaleng Sawul, ukaam kumuzuh, Davih uyiil lubil. Waakady mutwiishibw neey, Yehow waakady mumanyik biin-biin myand yaakady yimulongekel ni mushind waakadyey wiiyumvw.

9. I biny bidy Yehow mumanyik hadyey utal muut woos wa kutudy?

⁹ Hawuheehet makab makuloolong mooy, vuluk neey Yehow i mumanyik makab miibuh aam ni mushind uwiiyumvumvw bwa makab aam. Cileejel, Yehow katadil teng mwaakadyobw bakabish biin Izaleel mu Ejipit, ki cikwaabw ’umvwiil mwaakadyobw [bakab].’ (Cim. 3:7) Davih umbil musambw uleeb neey Yehow i mutal “mal” mindiy ni i ’mumanyik mudyey ukab.’ (Mus. 31:7) Ni haakady baat ba Mawej bakab—byaakady cikwaabw mahangadik maabab ma buuciluby ni—“ukengel byend.” (Ye. 63:9) Hawumvumw  mooy, Yehow i mumanyik muwiiyuuyumvw ni i mukat bwa kukwambulwiish bwa kaay wiikal umvw mooy.

10. Bwabiny udy mutwiishibw neey Yehow i mumanyik myand yiwudy naay ni wiiyiiy kukwambulwiish bwa kutaataamen mateet moos?

¹⁰ Nook, udy mwa kwiihanguj neey: i mushind kaay udy Yehow ukwambulwiish hawutaatatameen lutat lukuukumvwiij mooy. Nook, mwambil bwa atal mudyey mwa kukwambulwiish. (2 Bak. 6:15-17) Kuunyim kontonon majooj aam: I mushind kaay udy mwiisamb kaahand eecy ni dyaalabul kaahand bikukashish mu mu cisangil cya cisumbw? Kudyok mukand kaahand, film, eecy musambw a habwaah mukukashishok eeny? Kudyok muut udy mukukashishok ni bwaal kaahand eecy ni verseh kaahand wa mu Bibl eeny? Tudy mwa kuvulamin biheehel mushind udy biin-kweek biituleej lukat luvul ni mudy malongweesh ma mu Diiy dya Mawej miitwambulwiish. Biineeby i bya bukish bya habwaah bya kudy Yehow. (Ye. 65:13; Mark 10:29, 30) Bileeleej neey ukutaatacil. (Ye. 49:14-16) Ni bileeleej neey i muwaakanyin bwiibuh kumuteekel micim.

11. I biny byambulwiishil Aida bwa kutaataameney mooy waakadyey nend?

¹¹ Aida, wa mu cibunj cya Senegal, utadil mwaakady Yehow mumwambulwiish mu cisang cyaakadyey ni lutat. Bu mwaakadyey mwaan a kuuhal, balel bindiy baakady batakamin neey wiiyiiy kuhet makut makumban miikal mwa kumwambulwiish yiy ni bab. Ki kuunyim wangacil dihangadik dya kwiikaley ni shikacil muheehel ni kiihacil ka kushaaley seb’aa njil, Aida uhetel lutat bwa myand ya fwalang. Biin mu cisak cyaababw bamufulwiil mund ni baakady bamuleeb bibiih. Uleeleeb neey: “Numvwiil mooy hakulang neey cya kwiikaloh bend mukumban bwa kwambulwiish balel baam ni mwaakady baat boos mwa kwiiy kuulek.” “Ni naleebel bibiih bwa Yehow bwa mwaakadyey mulek myand yiy bibiih menmen.” Nook, wiiyil kumvw cikwaabw mwiisamb mu cisangil. “Mulong a mwiisamb wiituvulwiijil neey ning tut biikal ni kaakunying, Yehow i mumanyik. Teng ku bikeeh ku bikeeh, ku dyambulwiish dya mibel ya bakul ni baat bakwaabw, naakady mwiiy kujaadik neey Yehow udy ni lukat. Natangil kulomb Yehow hakumuteekel micim, ni numvwiil diitalal diidiin haakadyey mwaalabul masambil maam.” Ciisang aacy, Aida uhetel mudimw waakady mumwambulwiish kiin teng bwa kulongey mudimw a bukajaady, ki cikwaabw bwa kwambulwiish balel bindiy ni baat bakwaabw. Uleeleeb neey: “Nady mulong bwa  kweeyeleel Yehow ni mucim aakaabumw.” “Kaabaak, mim muman kusambil, cidyaakaloh bend cikwaabw numvw mooy.”

I MYAND KAAY YIKWAABW YIIYIIY KULONG YEHOW?

12. Bilondeshel Misambw 56:9, I biny byaakady Davih mujaadik?

¹² Bal Misambw 56:9. Verseh oow uleeleej mushind mukwaabw waakady Davih mucimun mooy. Ning mwaakady buumy bwindiy bwiikal mu buuhund, waakady ulangil ha myand yaakady Yehow mwa kwiiy kumulongel cikwaabw. Davih waakady mujaadik neey, Yehow wiiyiiy kumulam ha ciisang cilengel. Kuunyim kwa byoos, Yehow uleejel neey Davih wiiyiiy kwiikal mukaleng a Izaleel. (1 Sam. 16:1, 13) Bwa Davih, ciit cyoos cilayil Yehow cikumbeen bilengel.

13. I kutwiishibw kaay kutudy mwa kwiikal naak kudy Yehow?

¹³ I biny bidy Yehow mulay bwa kwiiy kukulongel? Katwiinoh bend tutakamin bwa iitulam ku myand yoos yitufiifikil. c Cikwaabw, ning uw mwa kuhet makab ma mushind kaay mu bulongolody oobw, iikal mujaadik neey Yehow wiiyiiy kuful myand eey yoos mu bulongolody buhyaabuhy bwiikal mwa kwiiy. (Ye. 25:7-9) Cyakahang iitut udy biin-biin ni bukash bwa kusangul bafw, bwa kwiitondah, ni bwa kuful balwiish bindiy boos.—1 Jah 4:4.

14. Tudy mwa kulangil ha myand kaay?

¹⁴ Diib diwumvumvw mooy, langil ha myand yiiyiiy kulong Yehow kuuhal ook. Langil ha mushind uwiikal mwa kwiiyumvw diib diikal Sataan kaciyok, diib diikaley mwa kufuloh baat babiih ni kuhingijoh bawaakan, ni diib diikal baat bakiish bawaakan mwa kushaalobw bikeeh-bikeeh bawaakan diifuk dyoos. Diizab dilongelobw mu cihwiil cya rejon mu muvw a 2014, dileejel mutudy mwa kulangil ha kutakamin kutudy naak. Taat mukwaabw wiisambil ni biin mu cisak cindiy ha mushind udyobw mwa kumvwiij mukand a 2 Timoteh 3:1-5 mu mushind mukwaabw, biby biikal neey verseh eey yileeleeb bwa mushind wiikal baat mu Paradiiz. Uleebel neey: “Mu bulongolody buhyaabuhy, i biisang bya musangal iimwiin weeh biiyiiy kwiikalok. Bwaal baat biiyiiy kukat baat bakwaabw, biiyiiy kwiikal bakat myand ya mu spirit, biiyiiy kwiikal kabay biitumbish ni biikal ni kwiihweekesh, biiyiiy kwaakish Mawej lutumb, biiyiiy kuneemek baataataabw ni baamaamaabw, biiyiiy kwiikal baat biikal ni micim ya kufwiijanganok, biikal baneemek biit bijilang, biiyiiy kukat bikasakan biin mu bisak byaababw, biiyiiy kwiikal bahetangan, biikaakal baleeb teng bilengel bwa bakwaabw, biikaakal biikand, balengel myand, biikaakal bakat myand yilengel, baat ba kuteekel micim, kabay biin mut mukasakan, kabay biiyumb mwiiwul, biiyiiy kukat Mawej hamut a musangal, biikal ni bilong bileeleej mudyobw biitabij Mawej; naak lamat baat aab.” Kanwiinokoh mwa kwiisambilok ni biin mu bisak biinun eecy biin-kween mu lwiitabij bwa mwiikal shikacil mu bulab buhyaabuhy eeny?

15. Ning mwaakady Tanja mwiikal ni mooy, i biny bimwambuilwiishil bwa kumucimun?

¹⁵ Miin-kweet mwaan-mukaj Tanja wa kuluul kwa Masedwaan waakady mucimun mooy hakulangiley ha mabeenesh maciiyiiy. Balel bindiy bamulwiishil bikasakan haakadyey ulong Bibl. Uleeleeb neey: “Yimw myand yinaakady naciin yiiyil kulongek. Maam waakady uutut kuunyim kwa bisangil byoos. Balel baam baakady baalwiish hakuuyambil teng neey biiyiiy kuuzuh mim mushaal Temw a Yehow.” Ku bulekel kwa byoos, biihacil Tanja ku cibel. Ulongel biny? Uleeleeb neey: “Natumin meej maam ha musangal uniikal mwa kwiikal nend bwa mwendelel mim mulam mucim aam mutook. Nalangil cikwaabw ha mushind udy Yehow mwa kuuyaakish bulang mu bulongolody buhyaabuhy bwa myand yoos yinajijimbaj mu bulongolody oobw ni ha mushind uniikal mwa kwiiy kuvulamin myand yoos yibiih eey.” Tanja utungunukil ni kulam mucim indiy mutook. Cikwaabw, ku dyambulwiish dya Yehow,  i muhet cyaab cya kushikacil. Leeloow, Tanja i bamubak kudy mwiin-kweet mwaan-mulum udy ni lulamat ni bakaakal mudimw haakaabumw biikal ni musangal mu mudimw a ku diib ni ku diib.

KASHISH KUTEEKEL KWIIBUH KWA YEHOW MICIM TENG KAABAAK

16. I biny biikal mwa kwiitwambulwiish bwa kushaal bakasakan micim tut batal kukumban kwa may ma buprofet mady mu Luuk 21:26-28?

¹⁶ Mu ciisang cya mal miimiin, baat boos biiyiiy “kufw ni mooy.” Ki baat ba Mawej biiyiiy kushaal teng ni diitabij ni mucim mukasakan. (Bal Luuk 21:26-28.) Bwabiny katwaakwiikal ni mooy? Bwaal twiiyiiy kwiikal baman kulong mwa kuteekel Yehow micim. Tanja utukaady baman kuteel, uleeleeb neey, myand yaakadyey mutwiilangan naay yimwambambulwiish bwa kutaatatameeney shikacil yikwaabw yikasakan. I mutal neey: “Nady mumanyik neey kakwiinoh bend shikacil udy Yehow mwa kulek kwiitwambulwiish bwiitut kwiikal bilengel.” “Misang yikwaabw myand yikwaabw yidy mwa kwiitufikil yitudy mwa kuman, ki biin-biin bidy neey teng Yehow ki udy ni bukash buvul bwa kuman myand yoos. Cikwaabw, ning makab miikal makasakan bicy, miiyiiy teng kuh.”

17. I mushind kaay wiikal mwa kwiitwambulwiish mufund iitut a ku muvw wa muvw a 2024? (Tal cifwaatul cya ha cizubw.)

¹⁷ Kwiikal ni mooy leeloow i bwaal bwa biin-biin. Teng bu Davih, katwiin mwa kwiitab bwa kulong myand ni mooy. Mufund a ku muvw bwa muvw a 2024 i diisambil dya Davih uloolomb Yehow neey: “Diib dinumvumvw mooy, nateeteek micim ya mim yoos kuwudy.” (Mis. 56:3, NWT) Tal cileeleeb mukand mukwaabw habitaatal verseh wa mu Bibl oow: “Davih kiinoh bend utungunuk ni kulangil ha myand yiloolong bwa iikal ni mooy, eecy habitaatal myand yidy yimutond. Hamut a kulong nook, i mutal teng kudy oow wiikal mwa kwiiy kumukuuloh.” Langil ha mufund a ku muvw mu suuny yiloolond, amanaman hawutwiitwiilangan ni shikacil yikukumvwiij mooy. Iikalok ni diib dya kulangil ha bidy Yehow mulong ha kal, biloolongey leeloow ni biikaley mwa kwiiyey kulong mu mafuk miiyiiy. Teng bu Davih, udy mwa kuleeb byeeb neey: “Nady muteek mucim aam kudy Mawej, ciish naciin.”—Mis. 56:4.