1. Busana naki hanganayira ithubaha?

 OBULI mundu, hakanayira iniubaha. Ni kwenene, erigha e Biblia lyabirithulhusya omo bukobe bw’eryubaha abaholi, esyombinga, n’eby’obuthuku obukasa. Aliwe thukine omwa buthuku obulimu ‘ebikubahiriraya,’ ng’obubi, eby’obwithi, n’amalhwere. (Lk. 21:11) Kandi thwangan’ubaha abandu, imwamune n’esyogavumente esikathunubaya kutse nibya n’abahughu abakahakanisaya eriramya ly’okwenene. Abandi bakanayowa nga sibangathoka erighumira ekitsibu ekyabawithe kutse ekyangabasira.

2. Soborera emibere eya Dawudi abyamu iniane e Gati.

² Dawudi mwanubaha. Ng’omughulhu Omwami Saulo aby’akalengaho erimuhambya, Dawudi mwathwamu erithibitha omo muyi we Filistini e Gati. Omwami we Gati, ya Akisi mwalhuaho iniaminya ngoku Dawudi y’omulhwi mbangyi oyuwapipawa omwa lhwimbo ng’oyuwabiritha “amaelfu wiwe makumi” w’Abafilistini. Dawudi “mubaha kutsibu.” (1 Sam. 21:10-12) Mwabulha Akisi ng’akendi mukoleraki. Dawudi mwakinda athi obuba bwiwe?

3. Ngoku kiri omwa Esyonyimbo 56:1-3, 11, Dawudi mwakinda athi obuba?

³ Omwa Esyonyimbo 56, Dawudi mwakangania eriyowa liwe iniane e Gati. Olhwimbo olho lhukakanganaya ndeke-ndeke eriubaha lya Dawudi, aliwe kandi lhukabisulha emibere akindiramu obuba obo. Dawudi abere akubaha, mwayikethera Yehova. (Soma Esyonyimbo 56:1-3, 11.) Aby’ahikire akayikethera Yehova. Omwa buwathikya bwa Yehova, Dawudi mwakolesya enzira eyithe ya buli kiro, aliwe muyakolha: Mwayisosekania  ng’omusire! Neryo Akisi mwalhangira Dawudi ng’ekindu ekikatamisaya butsira ng’enzighu, neryo Dawudi mwathoka eriyibalira.—1 Sam. 21:13–22:1.

4. Thwanga ghumya thuthi eriyikethera lyethu omu Yehova? Iha eky’erileberyako.

⁴ Nethu kuthya thwangana kinda eryubaha omw’iyikethera Yehova. Aliwe thwanga ghumya thuthi eriyikethera lyethu omu Yehova, kwilhabirirya omughulhu thukwire obuba? Thulebaye eky’erileberyako. Wamabiriminya ku wulhwere, okw’itsuka iwanganakwa obuba. Nomwabine, iwangana thekana wamayikethera dokita wawu. Anganabya iniasibwe ng’oyuwasi ndeke erithambira obulhwere obo. Anganakuhulikirira ndeke, erikukakasya ngoku kwenene akayitheghereraya eriyowa lyawu. Kandi anganakuhandikira omubatsi owabiriwathikya ndeke abandi. Kuthya, thwangana ghumya eriyikethera lyethu omu Yehova omw’ilebya eby’abirithathukolera, eby’anemukolha lino, n’eby’akisiya iniathukolera. Ekyo kya Dawudi akolha. Thukalebya ebighuma by’okwa binywe biwe ebyasondolibawa ebiri omo Esyonyimbo 56, nawu lengekanaya nga wanga ghumya wuthi eriyikethera lyawu omu Yehova n’erikinda obuba bwawu.

NI BYAHI EBYO YEHOVA ABIRITHAKOLHA?

5. Erithoka erikinda obuba bwiwe, Dawudi mwaghanirya okuki? (Esyonyimbo 56:12, 13)

⁵ Dawudi iniane omwa kabi, mwahwerya amalengekania wiwe oko ebyo Yehova abirithakolha. (Soma Esyonyimbo 56:12, 13.) Ekyo kya Dawudi aby’akakolha omwa ngebe yiwe yosi. Ng’eky’erileberyako, ihakanayira iniaghanirya okwa bihangikwa bya Yehova, ebyabya bikamw’ibukya ngoku Yehova awithe amaaka manene kandi kw’atsomene abandu. (Esy. 65:6-9) Kandi Dawudi iniakaghaniraya oko ebyo Yehova abirikolera abandi. (Esy. 31:19; 37:25, 26) Kandi kutsibu-tsibu iniakaghaniraya oko ebyo Yehova abirimukolera ahabwiwe. Yehova abya iniabiriwathikya Dawudi n’erimutheya eritsuka bulere. (Esy. 22:9, 10) Thalengekania erighanirya ng’eryo nga litholere eribya imulyawathikya Dawudi ya bungahi erighumya eriyikethera liwe omu Yehova!

6. Thwamakwa obuba, ni byahi ebikendi thuwathikya eriyikethera Yehova?

 ⁶ Wamubaha, yibulhaye, ‘Ni byahi ebyo Yehova abirithakolha?’ Ghaniraya okwa ebyo abirihangika. Ng’eky’erileberyako, ‘thwamasamalira ndeke’ ngoku Yehova akatsomana esyonyonyi n’ebimole—ebithahangikawa omo kisosekanio kiwe kandi ebithe byangamuramya—thukongera eriyikethera ngoku nethu akendi thutsomana. (Mt. 6:25-32) Kandi lengekanaya okwa ebyo Yehova abirikolera abaramya biwe. Iwangana yeghesya okwa mundu mulebe oyukanibweko omo Biblia oyuwakanganaya erikirirya linene, kutse iwangana soma okwa kyalholirweko eky’omughombe wa Yehova owamunabwire. a Eryongera okw’ekyo, ghaniraya okwa mibere Yehova abirikutsomaniramo. Mwakuletha athi omo kwenene? (Yn. 6:44) Abirisubirya athi emisabe yawu? (1 Yn. 5:14) Wunemughasirwa wuthi buli kiro omo kihongo kya Mughalha wiwe mwanzwa?—Efe. 1:7; Ebr. 4:14-16.

7. Ebya omuminyereri Danieli alhabamo mubyawathikya bithi Vanessa erikinda obuba bwiwe?

⁷ Vanessa, b mwali wethu owe Haiti, mwabya omwa mibere eyikitha obuba. Omulhume omwa butaka bwabu iniakamutherera n’eribera erimuthumira esyomeseji obuli kiro, erimuhathikana athi babye banywani. Vanessa mwaghanira ighuma. Aliwe omulhume oyo mwahithana kutsibu nibya n’erimuhayira. Vanessa akabugha athi: “Munubaha.” Mwakinda athi obuba bwiwe? Mwayira eky’akakolha eriyitheya. Omusyakulhu w’ekithunga mwamubwira athi ahike okwa b’obuthoki. Aliwe Vanessa kandi mwahwerya obulengekania okwa mibere Yehova athegherayamo abaghombe biwe abakera. Akabugha athi: “Omundu w’erimbere oyo nalengekanayako abya iyo muminyereri Danieli. Mwaghuswa omwa kyuna ky’esyondale esikwire nzalha nomwakine indi sy’abyako lhubanza. Aliwe, Yehova mwamutheya. Munasaba Yehova indi angwathikaye omwa mibere eyo ngalimu. Enyuma waho, munabya isingakikwire obuba.”—Dan. 6:12-22.

NI BYAHI EBYO YEHOVA ANEMUKOLHA LINO?

8. Dawudi aby’ayikethereki? (Esyonyimbo 56:8)

⁸ Nomwakine indi Dawudi abya omwa kabi iniane e Gati, mwathubaha. Omwakanya k’ekyo, mwathwamu erilengekania okwa ebyo Yehova abya inianemumukolera oko buthuku obo. Dawudi mwalhangira ngoku Yehova anemumusondolha n’erimutheya kandi ngoku akayitheghereraya eriyowa liwe. (Soma Esyonyimbo 56:8.) Kandi Dawudi aby’awithe abanywani, nga Yonatana n’Omuhereri Mukulhu ya Ahimeleki, abamusighika buthaleghulha n’erimuwathikya. (1 Sam. 20:41, 42; 21:6, 8, 9) Kandi nomwakine indi Omwami Saulo aby’anzire erimwitha, Dawudi mwabalya engebe yiwe. Dawudi abya inianayikethere ngoku Yehova anasi ndeke ekitsibu kiwe kandi ekitsibu ekyo nga kikahamba kithi okw’iyowa liwe.

9. Ni byahi ebya Yehova akalhangira okwa buli mughuma w’okw’ithwe?

⁹ Wamabana ekitsibu ekikaleka iwubaha, ibuka ngoku Yehova analhangire ekitsibu ekyo kandi nga kikaleka iwayowa wuthi. Ngahathya, Yehova mwathasubulira okw’ilhangira erinubibwa ly’Abaisraeli e Misiri aliwe kandi mwalhangira “amaligho wabo.” (Eri. 3:7) Dawudi mw’imba athi Yehova mwalhangira “obulighe” “n’omunubo” wiwe. (Esy. 31:7) Kandi abandu ba Nyamuhanga babere baghalhwa—nibya busana n’erithwamu lyabu  ly’obukiru—“nayu mwaghalhwa.” (Isa. 63:9) Omughulhu wukubaha, Yehova akayitheghereraya eriyowa lyawu kandi anzire kutsibu erikuwathikya erikinda obuba bwawu.

10. Busana naki iwayikethera ngoku Yehova anakutsomene kandi kw’akendi kuwathikya erighumira ekitsibu ekyosi-kyosi?

¹⁰ Aliwe, wanganabulha Yehova ng’anemukuwathikya athi omughulhu wuwithe ekitsibu ekikubahisaya. Neryo musabe akuwathikaye wulhangire obuwathikya bwiwe. (2 Bam. 6:15-17) Neryo thakilengekaniako: Mbwino omukania kutse erisubirya lirebe okwa mihindano, lyanakughumirye? Mbwino ekitabu, evidiyo, kutse olhwimbo lhw’embaghane lhwanakughumirye? Mbwino omundu mulebe anakubwire omwatsi mulebe kutse erisako eryakuhumulikanaya? Kyangana thwolhobera erithendi lhangira olhwanzo lhw’abalikyethu n’ebyalya by’obunyakirimu ebyo thukahebawa. Nomwabine, ni bihembo by’obughuli bunene erilhua oku Yehova. (Isa. 65:13; Mk. 10:29, 30) Bikakanganaya ngoku Yehova athutsomene. (Isa. 49:14-16) Kandi bikakanganaya ngoku ya wutholere iwayikethera.

11. Ni kyahi ekyawathikaya Aida erikinda obuba bwiwe?

¹¹ Aida, oyuwikere e Senegal, mwalhangira emibere Yehova amuwathikirayamo omughulhu abya omwa kitsibu. Kundi iyo y’omwana mukulhu, ababuthi biwe ibakamuyithaghako erikolha esyosente esikaghunza iyo eriyisighika kuthya nabo. Aliwe Aida abere abiryolhobya engebe yiwe nuku akole obutemburi, mukyamukalira eribana esyosente. Ab’efamile yabu mubamupona n’erimutsweba. Akabugha athi: “Munubaha indi singendi thoka eriwathikya ababuthi baghe kandi indi obuli mundu akendi nyighana. Nibya munatsweba Yehova busana n’erilighira emyatsi eritsandira ighuma.” Neryo Aida mwowa omukania akalhabibwa okwa mihindano. “Embuyi muyathw’ibukya ngoku nomuthwangabya ithuwithe ebironda bingahi okwa muthima, Yehova anabyasi. Lyolho-lyolho, erilhabira omw’ihabulha ly’abasyakulhu n’abandi, munakakasibwa ngoku Yehova anyanzire. Munatsuka erisaba Yehova ingabirithasyongera erimuyikethera, kandi munabana obuholho emisabe yaghe yikasubwamu.” Endambi muyahika Aida amabana  omubiiri owamusighika erikolha obutemburi n’erisighika ababuthi biwe n’abandi omwa by’akasente. Akabugha athi: “Nabir’igha eriyikethera ighuma Yehova. Lino namabirisaba, mughulhu mungyi obuba bwaghe bukahwa.”

NI BYAHI EBYA YEHOVA AKISIYA INIAKOLHA?

12. Ngoku kiri omwa Esyonyimbo 56:9, Dawudi aby’ayikethereki?

¹² Soma Esyonyimbo 56:9. Omulhondo oyu akabisulha eyindi nzira eyo Dawudi akindiramu obuba bwiwe. Nomwakine indi engebe yiwe yabya iyikine omwa kabi, mwaghanirya okwa ebya Yehova abya iniakisiya iniamukolera. Dawudi mwaminya ngoku Yehova angamulhamirye okwa buthuku obutholere. Kundi nibya, Yehova abya iniabiribugha athi Dawudi yuwangabere mwami oyukakwamako owe Israeli. (1 Sam. 16:1, 13) Oku Dawudi, ekyosi-kyosi ekyo Yehova alhaghanisaya kyabya ng’ekyabiribya.

13. Ni yikethera lyahi eryo thwanga thunga omu Yehova?

¹³ Ni byahi ebyo Yehova abiriyilhagha erikukolera? Thunasi kw’athe angakakirya ebitsibu ebyosi erithuhikako. c Nomwabine, mbulha wamabana bitsibuki omwa mughulhu mubi ono, Yehova akendi syabighunzaho omwa kihugho kihya ekikasa. (Isa. 25:7-9) Omo kwenene, Omuhangiki wethu awithe amaaka manene aw’erilhubukya abaholi, erithulhamya, n’erighunzaho abahakani abosi.—1 Yn. 4:4.

14. Ni byahi ebyo thwanga ghaniryako?

¹⁴ Wamakwa obuba, ghaniraya okwa ebyo Yehova akendi syakolha obuthuku obukasa. Thalengekania nga wukendi syayowa wuthi omughulhu Sitani akendisyabya isyakiriho, ababuya ibabirisuba omwa mwanya w’ababi, n’obuthahikana bukaghenda bukahwaho lyolho-lyolho. Eky’erilhangirirako ekyabya omwa lhuhindano lhw’erijoni olhwa 2014 mukyakangania ngoku thwanga ghanirya okw’amaha wethu. Thatha mwakanirania n’ab’efamile yiwe okwa mibere 2 Timoteo 3:1-5 hangabuwa omwa yindi nzira emilhondo eyo yiryabya iyikakanaya okwa mibere eyangabere omwa paradiso: “Omwa kihugho kihya-kihya hasyabya emighulhu y’etseme. Kusangwa abandu basyanza abandi, basyanza ebindu by’obunyakirimu, erithendi yipipa, abakayikehaya, abakapipa Nyamuhanga, abakowa ababuthi, abakasima, abayisiwa, abanzire ab’eka yabu ba kutsibu, abakaghanyira, abakakanaya ndeke okwa bandi, abathawithe omwagha, abolho, abanzire ekibuya, abayiketherwa, abakayolhobeka, abanzire Nyamuhanga isibanzire eriyitsemesya, abayihereyo ndeke oku Nyamuhanga; kandi wubye bughuma ndeke n’abandu ng’aba.” Wukanakaniranaya n’ab’efamile yawu kutse balikyenyu okwa bihambire okwa ngebe nga yikendi syabya yithi omwa kihugho kihya-kihya?

15. Nomwakine indi Tanja mubaha, ni kyahi ekya muwathikaya erikinda obuba bwiwe?

¹⁵ Mwali wethu ya Tanja owe North Macedonia mwakinda obuba bwiwe omw’ighanirya okwa mighisa y’obuthuku obukasa. Ababuthi biwe mubamuhakanisya kutsibu ak’igha e Biblia. Akabugha athi: “Ebighuma by’okwa ebyo nasagha indi byanganabya mubyabya. Mama iniakanyiswiraya obuli erilhua okwa mihindano. Ababuthi baghe mubanyihayira bathi ibakendi nyitha namabya Mwema wa Yehova.” Erighunzerera, Tanja mwathibithwako ewabu. Mwakolhaki? Akabugha athi: “Munahwerya amalengekania w’okwa tseme eyanangabya nayu kera na kera namathwamu erisighalha muthaleghulha. Kandi munalengekania okwa mighisa eyo Yehova akendisyamba omwa kihugho kihya-kihya busana n’ekyosi-kyosi ekyo  nangaherya omwa mughulhu mubi ono kandi ngoku ebindu bibi ebyosi bikendisy’ibiriranwa.” Tanja mwasighalha muthaleghulha. Kandi omwa buwathikya bwa Yehova, mwabana ah’erikalha. Munabwire, Tanja abirithahibwa na mughalha wethu omuthaleghulha kandi banemukolha haghuma omubiiri w’omughulhu wosi ibanatsemire.

GHUMAYA ERIYIKETHERA LYAWU OMU YEHOVA MUNABWIRE

16. Ni kyahi ekikendi thuwathikya erisighalha bathubaha thukalhangira emyatsi eyalhaghulhawa omu Luka 21:26-28?

¹⁶ Omwa bulighe bunene, abandu abosi “basyalembera [erilhuhirira] busana n’eryubaha.” Aliwe abandu ba Nyamuhanga bakendi syasighalha ibanasikire kandi ibane bathubaha. (Soma Luka 21:26-28.) Busana naki sithwendi syubaha? Kundi thukendi syabya ithwabir’igha eriyikethera Yehova. Tanja, oyukanibweko okw’itsuka, akabugha athi ebyo alhabamu kera binemumuwathikya erighumira ebindi bitsibu. Akabugha athi: “Nabiriminya ngoku sihali kitsibu ekyosi-kyosi ekyo Yehova athe angathuwathikya erighumira. Okwa bundi buthuku, kyangana sond’ilhangirika abandi nga banemuthoka erisingura ebitsibu byabu, aliwe okwenene kuli kuthi Yehova yubalengirye amaaka. Kandi ekitsibu nomukyangakalha bungahi, kikendisyahwa.”

17. Erisako lyethu erya 2024 likendi thuwathikya lithi? (Lebaya ekisasani ky’okwa kidipa.)

¹⁷ Munabwire, ni kya buli kiro eryubaha. Aliwe nga Dawudi, thwangana ghana eriwa omwa kithegho eky’eryubaha. Erisako lyethu ery’omwaka owa 2024 abya musabe wa Dawudi oku Yehova: “Omughulhu ngubaha, ngayiketherawe.” (Esy. 56:3) Ngoku ekitabu kighuma ekikakanaya okwa Biblia kyabugha okwa mulhondo oyu, Dawudi “syalilholha embere eryubaha kutse erithungerera ebitsibu biwe aliwe akasamalira Omusabuli wiwe oyukendi syamulhamya.” Omwa mezi awakasa, lengekanaya okw’isako lyethu ery’omwaka, kutsibu-tsibu omughulhu wuli omwa mibere eyikubahisaya. Bana endambi y’erighanirya okwa ebya Yehova abirikolha, eby’anemukolha, n’eby’obuthuku obukasa. Neryo nga Dawudi, iwangana bugha wuthi: “Ngayikethera Nyamuhanga, sinendi syubaha.”—Esy. 56:4.