1. Le yɛɛ siooŋnde bii yɛ naa lepum?

 NAA kpou, lepum mi siooŋnde bii naa. I cho tonya maa, le mɛɛ naŋ sina nyɛ Baabuiyo pɛɛku wo yɛ, ŋ nɔ lɛ isiooŋ le waŋvilɛiya, nyinaa wɔɔŋnda, ɔɔ nyɛ cho yɔŋnɔŋ o chilaŋ niŋndo le. Kɛ le mɛɛ naŋ cho o palɛi mɛɛlɛi niŋ yɛ, lepum mi “sɔɔŋ ŋsiooŋndoŋ” yɔŋnuŋ, mɛɛ chɔulaŋ, kpundɛlaŋ, vɛlɛ a naala wɔɔŋ wɔɔŋndaŋ la cho nuaa yɛ. (Luku 21:11) Naapum mi siooŋnde bii naa le waŋndachieeya, masɛi cho naa nyɛpalaa tusioo choo ve, ɔɔ wanaa naŋ cho o yuŋgu pilɔɔ niŋ ma simul piɛile tonyaleŋ nda. Mi apum buulaŋ maa, a nɔla niŋ tɔɔndaŋnda cho nda choo laŋ, ɔɔ la komal niŋ nda o chilaŋ niŋndaŋ biuwɔŋndo le.

2. Tɛɛsiaawɔ nyɛ yɔŋnuŋ Deeve teleŋ o wa Kaati chiee wo.

² Teleŋndaŋ lapum, mi siooŋnde ndii bii Deeve tau. Le tamaseliiyo, teleŋ Masaa Sɔɔl wa ndu nyaanɔŋndo kɔɔli le ndu diyɔɔ wo, mbo kɛɛsiaa le mbo nyaanuŋ o chiee bɛndu Filitiaŋnda Kaati. Nduyɛ mi Akisi, Masaa le Kaati tuɛi o chondei niŋ maa, Deeve dii puaa chɔuwaa Filitiaŋnda “waalaŋ o tɔ tɔ laŋ niŋ.” Le hei, mi ‘siooŋnde bii Deeve tau.’ (1 Saam. 21:​10-12) Mbo buulaŋ tau le nyɛ Masaa Akisi wa ndu tosallo. Vɛɛ Deeve ndoo tiu yɛ siooŋii nduɛi ba?

3. A mɛɛ Sam 56:​1-3, 11 dimi yɛ, vɛɛ Deeve soliŋ yɛ siooŋnde o kɔl?

³ O Sam bolle 56 niŋ, mi Deeve tɛɛsiaa mɛɛ o wa sinaŋndo yɛ teleŋ o wa Kaati chiee wo. Mbo chɔm le sabu o wa a siooŋnde wo, nduyɛ a mɛɛ o soliŋ siooŋii keŋ o kɔllɛ. Te siooŋnde ndii bii Deeve pɛ, mi ndoo dɔu tiindaŋndo o Chɛhowa niŋ. (Nuawɔ Sam 56:​1-3, 11.) Deeve ndoo nɔ sabula kɛndɛlaŋ tau le tiindaŋndo dɔwɔɔ o Chɛhowa niŋ. A mala Chɛhowaa, mbo nuuviaa nɛiyo o mala ndu le mbo hɛluŋ Masaa Akisi wo. Mbo kandu sɔɔŋ tosaa maa wana seemɛi. Le hei, mi che bɛɛ Akisi ndoo yeema Deeve diyɔɔ, kɛ le sɔɔŋ o wa tosaa woŋ, mbo mal ndu le mbo kuɛŋnuŋ.—1 Saam. 21:13–22:1.

4. Vɛɛ naŋ kindi yɛ tiindaŋ naa o Chɛhowa niŋ? Chɔmndɔ tamaseliiyo.

 ⁴ Naa bɛɛ ŋ nɔla miŋ soliŋ siooŋnde o kɔl, te ŋ dɔu pɛ tiindaŋ naa o Chɛhowa niŋ. Kɛ, vɛɛ naŋ chɔɔlu yɛ tiindaŋ naa kindi o Chɛhowa niŋ, taama taama te siooŋnde wa naa pɛ? Ŋ tofaŋndɔ tamaseliiyo hoo. Te o yɔŋ pɛ mi wana chiɔuwaa dimul num maa a nɔ naa opum, naapum mi siooŋnde bii num. Kɛ te o yɔŋ pɛ ma tiindaŋ wana chiɔuwaa numndo, mi keŋ tosa ma pɔlul tiŋ kɔllo. Naapum o chiɔu niŋ wanaa bɔɔbɔɔ a ndaa nɔ naa waa lende wa. Mbo yaŋ num nilaŋ yekeŋ, nduyɛ mi keŋ ke num tiindaŋndo maa o bii bila mɛɛ ŋ cho sinaŋndo yɛ. Naapum mbo chɔm num danda suu mala acheleŋnda ma sɔla batiuwaa wo. O nɛi pilɛ koŋ choo, ŋ nɔla miŋ kindi tiindaŋ naa o Chɛhowa niŋ, te o yɔŋ pɛ miŋ wa yiyaŋndo o nyɛ o tosal niŋ naa paandu wo choo, nyɛ o cho tosaa suŋ suŋndo, a nyɛ o cho hunɔɔ naa tosal o chilaŋ niŋndo. Nyɛ pilɛ koŋ kpe Deeve tosa ni. Te ŋ wa pɛ yaasiaa a diomnda o poonyiaa o Sam bolle 56 niŋndaŋ okɔɔ, yiyaŋ a mɛɛ ŋ kindi tiindaŋ numndo o Chɛhowa niŋ, nduyɛ ma soliŋ siooŋnde o kɔllɛ.

YƐƐ CHƐHOWA TOSA YƐ NIŊ?

5. Le siooŋnde soliŋndo o kɔl, a yɛɛ okɔɔ Deeve ndoo yiyaŋ yɛ? (Sam 56:​12, 13)

⁵ Mi che bɛɛ yoomu Deeve wo wa wɔ o kpundɔɔ niŋ, kɛ mbo handu kɔllo o sɔɔŋ kɛndɛŋ Chɛhowa ndoo tosal ndu niŋndoŋ choo. (Nuawɔ Sam 56:​12, 13.) Yiyaŋndo o sɔɔŋ waa nuaa choo mala Deeve o yoomu ndɔɔ niŋ ni. Le tamaseliiyo, lepum mi ndoo yiyaŋ a nyɛm Chɛhowa toosiaa woŋ okɔɔ. Nduyɛ mi keŋ ndii loonuŋ ndu a mɛɛ Chɛhowa nɔ kpaayaa yɛ, vɛlɛ a mɛɛ o buulaŋ le waŋndachieeya yɛ. (Sam 65:​6-9) Mi ndoo yiyaŋ vɛlɛ a nyɛ Chɛhowa tosal niŋ acheleŋnda wo okɔɔ. (Sam 31:19; 37:​25, 26) Nduyɛ teleŋ o teleŋ, mi ndoo yiyaŋ a nyɛ Chɛhowa tosal ndu niŋndo okɔɔ. Chɛhowa ndoo mala ndu niŋ, vɛlɛ mbo manda ndu chɔŋ a teleŋ o wa o pɔmbɔ wo. (Sam 22:​9, 10) Yiyaŋndɔ mɛɛ hei ndii kindi tiindaŋ ndɔɔ o Chɛhowa niŋ yɛ.

6. Te ŋ wa pɛ a siooŋnde, yɛɛ mala yɛ naa miŋ dɔu tiindaŋndo o Chɛhowa niŋ?

⁶ Te siooŋnde wa num pɛ, nyunaŋndɔ aa, ‘Yɛɛ Chɛhowa tosa yɛ niŋ?’ Yiyaŋ a nyɛm o toosiaa woŋ okɔɔ. Le tamaseliiyo, mi che  bɛɛ Chɛhowa toosiaa youwa a bil lapeeŋgoo o velaŋ ndɔɔ niŋ te, kɛ te ŋ “mɛɛndaŋ pɛ nyɛkɛndɛi” mɛɛ o buulaŋ le nda yɛ, mi che bɛɛ a nɔla ma piɛi ndu le, mi keŋ chɔɔlu tiindaŋ naa kindi o ndu niŋ poŋ. (Maa. 6:​25-32) Yiyaŋndɔ vɛlɛ a nyɛ Chɛhowa tosal niŋ buɛiyaa nduaa wo okɔɔ. Naapum a pɛɛku a waŋndo opilɛ o Baabuiyo niŋ okɔɔ, o dɔu laalaŋndo o Chɛhowa niŋndo. Ɔɔ naapum a veelu diomndaŋ a suɛi yɔŋnaŋii buɛi Chɛhowaa okɔɔ o palɛi nɛi niŋ. a Le handɔɔ lechoo, yiyaŋ a mɛɛ Chɛhowa chɔm niŋ maa o buulaŋ a num yɛ okɔɔ. Vɛɛ o looku yɛ hunɔɔ a num o tonyaa niŋ? (Chɔŋ 6:44) Vɛɛ o muli yɛ niŋ piɛile numndeŋ? (1 Chɔŋ 5:14) Vɛɛ ŋ cho yɛ tɔnɔɔ sɔlaa lepaa o lepaa o sala soliaŋ Po ndɔ kaalaa niŋ?—Ɛfi. 1:7; Hibu. 4:​14-16.

7. Vɛɛ nyɛ yɔŋnuŋ Daaniɛɛ, wana ndoo suaa le Mɛlɛka wo mala yɛ Vɛnɛsa le siooŋnde soliŋndo o kɔl?

⁷ Mɛɛ bahawɛi kala kalaa komal ndepilɛnɔ pilɛ o lɛŋnde Heti leŋ niŋ diolaŋ Vɛnɛsa, b mi siooŋnde bii ndu tau. Mi po pilɛ o fondaŋ o wa wo ndoo poonyial ndu yooŋgulaŋ o foŋndo choo, vɛlɛ mi ndoo veelu ndu lepaa o lepaa. Mi po koŋ ndoo kindila ndu le mbo hini a ndu. Kɛ teleŋ o teleŋ, mi Vɛnɛsa ndoo kɛɛ. Le hei, mi po koŋ kandu ndu diomnda wɔɔŋndaŋ dimullo vɛlɛ a ndu kɔŋgɔliaŋndaŋ. Mi Vɛnɛsa dimi aa, “Mi siooŋnde bii ya tau.” Yɛɛ mala yɛ Vɛnɛsa le siooŋii po koŋ soliŋndo o kɔl? Mbo tosa nyɛ ndoo tiuba wo le ndupila mandaa. Mi bɛndu kundaa mala ndu le mbo soo o masaa waa lo. Nduyɛ mbo kɛsi kɔllo a mɛɛ Chɛhowa manda niŋ buɛiyaa nduaa o paandoo niŋ yɛ choo. Mbo chɔɔlu dimi aa, “Wana tase ya yiyaŋ a ndu okɔɔ wo wa Daaniɛɛ, wana ndoo suaa le Mɛlɛka wo ni. Ma wou ndu o sooŋ kpɔkuŋnda niŋ mi che bɛɛ ndoo tosa nyɛ o nyɛ le. Nduyɛ kpɔkuŋaa kaŋ wa a yiaaŋ. A koŋ kpou, mi Chɛhowa manda ndu. Le hei, ya bɛɛ mi mal Chɛhowa nyɛ o nyɛ o ba. Nduyɛ okoŋ kɔɔli, siooŋii ve lɛ ya le.”—Daan. 6:​12-22.

YƐƐ CHƐHOWA CHO YƐ TOSAA SUŊ SUŊ?

8. Tiindaŋ yɛɛ Deeve ndoo nɔ yɛ? (Sam 56:8)

⁸ Mi che bɛɛ yoomu Deeve wo wa wɔ o kpundɔɔ niŋ teleŋ o wa Kaati chiee wo, kɛ o hendu kɔllo o sɔɔŋ muŋ tosa mi siooŋnde bii ndu woŋ choo le. Mbo handu kɔllo o nyɛ Chɛhowa wa ndu tosallo a teleŋ koŋ ndo choo. Mbo sina kɛsɛ maa, Chɛhowa wa ndu mandaa, nduyɛ ndoo sina mɛɛ o wa sinaŋndo yɛ. (Nuawɔ Sam 56:8.) Deeve ndoo nɔ vɛlɛ chaŋyaŋ kɛndɔŋ, mɛɛ Chonataŋ, a wana bɛndu wanaa soliaa lasalaa Ahimɛlɛki cho nuaa yɛ. Mi chaaŋaa nduaa haa ndaa chɔm ndu lo lechoo wo, nduyɛ mi ndaa mala ndu tau. (1 Saam. 20:​41, 42; 21:​6, 8, 9) Mi che bɛɛ Masaa Sɔɔl wa ndu kiltaŋ kɔɔli le ndu diyɔɔ, kɛ mbo nyaanuŋ le yoomu ndɔɔ. Ndoo nɔ tiindaŋndo kɛsɛ maa Chɛhowa ndoo sina bahawɛi o wa niŋndo, vɛlɛ a mɛɛ o wa sinaŋndo yɛ.

9. Yɛɛ Chɛhowa sina yɛ o naa pilɛŋ pilɛŋnda niŋ?

⁹ Te suɛi kala kalɛi luei num siooŋnde ve komal num pɛ, loonuŋ maa Chɛhowa sina a ndi okɔɔ, vɛlɛ a mɛɛ ŋ cho sinaŋndo yɛ. Le tamaseliiyo, Chɛhowa ndoo sina ko a mɛɛ nda wa Isɔluɛiya biyɔɔ wɔɔŋndo o Ichipi niŋ yɛ okɔɔ le, kɛ ndoo sina vɛlɛ “nyɛpalaa nda wa niŋndo.” (Ɛsɔ. 3:7) Mi Deeve soli chondei maa, mi Chɛhowa cha “nyɛ ndɔ kindilaa” vɛlɛ a “dɛnɛ ndɔ palaa.” (Sam 31:7) Nduyɛ te wanaa Mɛlɛkaa ndaa tosa pɛ kɛɛsiaa wɔɔŋndo mi saŋgaa tol nda choo, mi ndoo chɛl le ma “saŋga nda ndaa latulu.” (Aisaya 63:9) Te siooŋnde wa num pɛ, mi Chɛhowa bii bila mɛɛ ŋ cho sinaŋndo yɛ, nduyɛ mbo wa chɔ chɔ le num malaa ma soliŋ siooŋii keŋ o kɔl.

10. Le yɛɛ ŋ laalaŋ yɛ maa mi Chɛhowa che sɔɔŋ palaŋ komal num ndoŋ, nduyɛ maa o cho num mala ma biunuŋ muŋ?

 ¹⁰ Te o yɔŋ pɛ ma wa o nyɛkindilaa luei num siooŋnde wo bɛŋgu, naapum a chi mɛɛ Chɛhowa cho num malaa yɛ le. Yɛɛ ŋ nɔ yɛ ma tosa? Nyuna ndu le mbo mala num ma che mɛɛ o cho num tooloo yɛ. (2 Masaa. 6:​15-17) Okoŋ ma yiyaŋ a hei okɔɔ: Baa suɛi ɔɔ muli ŋ tuei o bɔŋaŋndo wo luei num niŋ pa yoomuaŋ? Baa yaula naalaŋ, vidueila naalaŋ, ɔɔ chonduŋ kpeekpeiyoŋ dɛɛniaa num niŋ pa kɔllo? Baa waŋndo dimul num niŋ pa diomnda luei num yoomuaŋ ɔɔ bolle Baabuile ke num tiindaŋndo leŋ? Lepum, haupa miŋ puɛɛnuŋ a kaala puaapiliaa a ndepiliaa chɔm naa wo, vɛlɛ a mɛɛ kɔl dɛɛniaa naŋ sɔla o Diom Mɛlɛkaa niŋndo mala naa yɛ. Kɛ loonuŋ maa, ke sɔvɛ fula Chɛhowa o ba wo nda cho ni. (Aisaya 65:13; Maki 10:​29, 30) Mi puaapiliaa haa chɔm kɛsɛ maa Chɛhowa buulaŋ a num. (Aisaya 49:​14-16) Nduyɛ ma chɔm vɛlɛ maa a tiuba ma dɔu tiindaŋ numndo o ndu niŋ.

11. Yɛɛ mala yɛ Aida le mbo soliŋ siooŋnde o kɔl?

¹¹ Mi ndepilɛnɔ pilɛ o Sinikal niŋ diolaŋ Aida, cha mɛɛ Chɛhowa mala ndu yɛ teleŋ o wa o nyɛkindilaa bɛŋgu wo. Le mɛɛ o cho kaasoŋnɔɔ o yuŋgu ndɔɔ niŋ yɛ, wanaa velu ndu wa wa ndu kɔl le mbo tosa wallo tau le halikpeŋ mbo sɔla kaniei mbo manda nda a ndupila. Kɛ mɛɛ o tosa yoomu ndɔɔ tɛtɛlɛ le mbo tosa kɔɔfaleŋ, mi bahawɛi nyɛsɔlaa komal ndu. Mi yuŋgu ndɔɔ tuulu kɔllo tau a kɛɛsiaa o tosa koŋ ndo okɔɔ, nduyɛ ma pɛɛsa ndu. Mbo dimi aa: “Mi siooŋnde bii ya, nduyɛ mi yiyaŋ maa I nɔla niŋ mi mala wanaa velu ya wa le, vɛlɛ maa wana o wana cho ya fafaŋ. Mi bii pɛŋ Chɛhowa tɔɔyaŋ le mɛɛ o chɛl mi sɔɔŋ chɔɔlu lewɔu le ya yɛ.” Okoŋ kɔɔli, mɛɛ o kuɛ o bɔŋaŋndo, mbo yaŋ nilaŋ o suɛi puaapilɛnɔɔ wa yɔŋgoo ve. Mbo dimi aa: “Mi puaapilɛnɔ wa suɛi yɔŋgoo wo loonuŋ naa maa, mɛɛ mɛɛ buulaŋndaŋ la wa naa o kɔllo niŋ, Chɛhowa sina a laŋ okɔɔ kpou. O pɔmpɔmbɔ, mi sila bɛnduaa kundaa a acheleŋnda ke ya wo mala ya mi cha maa, Chɛhowa kaala ya tau. Le hei, mi kandu piɛileŋ o ndulo a tiindaŋ sɛnɛiyo maa o cho ya mala. Nduyɛ mi pɔlul kɔllo mɛɛ ya che mɛɛ o wa piɛile nileŋ mulioo yɛ.” Mɛɛ teleŋ tiŋ hiou, mi Aida sɔla wallo. Mi wali koŋ mala ndu le mbo hiou lachi a kɔɔfaleŋ tosaa, vɛlɛ a wanaa velu ndu wa nyɛm nda hauba woŋ kioo, a wanaa cheleŋnda  malaa. Mbo chɔɔlu dimi aa, “I pɛɛku niŋ le tiindaŋ nuu kpou dɔwɔɔ o Chɛhowa niŋ. Suŋ suŋ niŋ, te I piɛi pɛ o ndulo, lepum mi siooŋii ya nɔ ve kpou fula ya o kɔl.”

YƐƐ CHƐHOWA CHO YƐ TOSA O CHILAŊ NIŊ?

12. A mɛɛ Sam 56:9 dimi yɛ, tiindaŋ yɛɛ Deeve ndoo nɔ yɛ?

¹² Nuawɔ Sam 56:9. Bolle Baabuileŋ ndeŋ le chɔm nyɛ cheleŋ mala Deeve le mbo soliŋ siooŋnde o kɔllo. Mi che bɛɛ yoomu ndɔɔ wa wɔ o kpundɔɔ niŋ, kɛ mbo yiyaŋ a nyɛ Chɛhowa tosal ndu niŋ o chilaŋ niŋndo. Ndoo sina maa Chɛhowa wa ndu piŋi a teleŋ bɛnda wo. I hiou kpou ve, Chɛhowa ndoo dimi niŋ maa, te Sɔɔl faŋaŋ o lemasa pɛ, Deeve cho miiŋgu o foofo ndɔɔ ni. (1 Saam. 16:​1, 13) Le Deeve, nyɛ o nyɛ Chɛhowa ndoo chuel ndu pɛ ibuŋga, i wa ko maa ndoo chii ndi niŋ peelu.

13. Tiindaŋ yɛɛ naŋ nɔ yɛ o Chɛhowa niŋ?

¹³ Yɛɛ Chɛhowa mɛi yɛ lediom le num tosallo? Ŋ nɔ miŋ wa ndu kɔl maa o cho bahawɛilaŋ kuuna naa komallo le. c Kɛ loonuŋ maa, sɔɔŋ palaŋ kɛ kɛ komal num pɛ o chieeŋ dɛnɛ wɔɔŋndo hoo niŋ, o cho muŋ hunɔɔ faŋa kpou o chieeŋ sɛnɛiyo niŋ. (Aisaya 25:​7-9) Wana Naa Toosiaa nɔ kpaayaa le waŋvilɛiya miŋgioo yoomu, mbo siŋgi wanaa lanaa, vɛlɛ mbo tɛɛmbuu wanaa simul naa wa kpou.—1 Chɔŋ 4:4.

14. O yɛɛ choo naŋ nɔ yɛ miŋ wa yiyaŋndo?

¹⁴ Te siooŋnde bii num pɛ, yiyaŋ a nyɛ Chɛhowa cho hunɔɔ tosa o chilaŋ niŋndo. Yiyaŋndɔ mɛɛ ŋ sinaŋ niŋ yɛ, te Setana a wanaa dɛnɛ wɔɔŋnda faŋaŋ pɛ, mi wanaa sakpuaa wa o chieeŋndo choo, nduyɛ mi hakioo wa faŋaŋndo o pɔmpɔmbɔ. Mi tuula naŋ tofa o bɔŋaŋ bɛndoo le wɔsi 2014 wo, chɔm mɛɛ naŋ yiyaŋ a tiindaŋ naa okɔɔ yɛ. Finyaa wa suukaŋndo a yuŋgu ndɔɔ mɛɛ diomnda cho o 2 Timoti 3:​1-5 niŋndaŋ, laa dimiŋ niŋ yɛ, te ndoo yɔŋ pɛ aa a Kpele Hɛnɛkiɔɔ okɔɔ la cho suɛi ni. Mbo dimi aa: “O chieeŋ sɛnɛiyo niŋ, waŋnda cho wa a kɔl kɛndɛ tau. Waŋnda cho acheleŋnda kaalaa chɔm, ma kaala tonyaa, ma sina kpeleŋ ndaa, ma wa wanaa tusiaŋ, ma saŋgala Mɛlɛka, ma ke wanaa velu nda wa bɛɛleŋ, ma nɔ balika melaa, ma chɔm lo lechoo wo, ma nɔ nyiɛɛye le wanaa nda cho o yuŋgoo niŋnda, ma chɛl acheleŋnda diom, nduyɛ a ve niŋ wanaa tɛɛmbuu acheleŋnda tɔɔ le. A tiu niŋ kɔlta ndalaŋ ba, a ve niŋ wanaa kɔl vesɛi le, nduyɛ a tul niŋ nyɛ cho o kɛndɔɔ wo leyɛ le, vɛlɛ a wa niŋ wanaa wana nɔla ma tiindaŋ. A ve niŋ wanaa bolii kala a wanaa hɔlaa heelaa bɛndu le. A kaala niŋ Mɛlɛka mbo hiou yelelaŋndo, nduyɛ ma chɔm maa a cho a yɔŋgaŋ o Mɛlɛka lo. La holnuŋ wanaa waa nuaa.” Baa ma suukaŋ pa a yuŋgu numndo ɔɔ chaaŋaa num aa laalaŋnda a mɛɛ yoomoo wa niŋ o chieeŋ sɛnɛiyo niŋ yɛ okɔɔ?

15. Mi che bɛɛ Tanya wa a siooŋnde, kɛ yɛɛ mala yɛ ndu le ndi soliŋndo o kɔl?

¹⁵ Mi ndepilɛnɔ pilɛ o Masidooniaa Ba Luaŋndo niŋ diolaŋ Tanya, soliŋ siooŋii ndoo nɔ ve o kɔl, mɛɛ o yiyaŋ a salala o sɔla niŋ o chilaŋ niŋndaŋ okɔɔ. Mi wanaa velu ndu wa simul ndu le mɛɛ o wa Baabuiyo pɛɛkoo yɛ. Mbo dimi aa: “Mi sɔɔŋ ŋpum, ŋ ya wa siooŋnde maa ŋ cho ya komal loŋ komalla. Mi kala nuu ndoo lɔɔ ya teleŋ o teleŋ yaa kuɛ pɛ o bɔŋaŋndo. Mi wanaa velu ya wa kɔŋgɔliaŋ ya maa, te I simnuŋ pɛ Sei Chɛhowaa, a cho ya diyɔɔ.” O mɛɛlulaŋ kpɔŋ, ma soli Tanya chiɛiniŋ. Yɛɛ ndoo tosa yɛ? Mbo dimi aa: “Mi handu kɔllo o mɛɛ ya wa niŋ a kɔl kɛndɛ o chilaŋ niŋ lefafɛɛŋ yɛ choo, te I lo pɛ o pimbi ni simiaa choo. Mi yiyaŋ vɛlɛ mɛɛ Chɛhowa duau ya niŋ sala o chieeŋ sɛnɛiyo niŋ, le nyɛ o nyɛ hɛluŋ ya o chieeŋ dɛnɛ wɔɔŋndo hoo niŋ yɛ okɔɔ. O cho ya mala mi puɛɛnuŋ a sɔɔŋ wɔɔŋ wɔɔŋ cho ya yɔŋnɔŋndo woŋ  okɔɔ.” A tonya, mi Tanya lo o pimbi ndɔ simiaa choo. Nduyɛ a mala Chɛhowaa, mbo sɔla chiɛi o tiuba le mbo wa wo. Suŋ suŋ niŋ, o chal puaapilɛnɔ kaala Chɛhowa wo o ba o nɔɔ niŋ, nduyɛ a cho a kɔl kɛndɛ o wali lɔɔlɔɔ Mɛlɛkaa niŋ.

KINDI TIINDAŊ NUMNDO O CHƐHOWA NIŊ

16. Yɛɛ cho yɛ naa mala miŋ nɔ kɔl simulaa, te ŋ che pɛ sɔɔŋ dimiŋ o Luku 21:​26-28 niŋndoŋ peelɔŋndo?

¹⁶ A teleŋ nyɛpalaa bɛndoo, wanaa bɔɔbɔɔ “wou niŋ kpandeŋ.” Kɛ wanaa Mɛlɛkaa lo niŋ isisi yi, nduyɛ ma nɔ kɔl simulaa. (Nuawɔ Luku 21:​26-28.) Le yɛɛ naŋ nɔ yɛ niŋ isiooŋ te? Kanifuule, ŋ pɛɛku niŋ paandu le tiindaŋndo dɔwɔɔ o Chɛhowa niŋ. Mi Tanya naŋ laŋga soo a ndu okɔɔ wo dimi maa, sɔɔŋ yɔŋnuŋ ndu o paandoo niŋndoŋ, cho ndu malaa ni le sɔɔŋ palaŋ cheleŋ komal ndu woŋ biuwɔŋndo. Mbo dimi aa: “I pɛɛku niŋ maa, mi Chɛhowa mala naa miŋ biunuŋ tɔɔndaŋ kɛ kɛ komal naa pɛ, nduyɛ mbo dɔu naa sala. Lepum, mi waŋnda yiyaŋ maa a hiou naa kpaayaa. Kɛ suɛi kulle cho ni maa, Chɛhowa hiou nda kpaayaa poloŋ. Nduyɛ o yɔŋ bɛɛ mi suɛi kala kalɛi komal naa, teleŋ wa niŋ mi i mɛɛlu.”

17. Vɛɛ bolle Baabuile naaleŋ le wɔsi 2024 cho yɛ naa mala? (Tofa fotueiyo o kɔɔ.)

¹⁷ O kpeekpei niŋ, mi wana o wana yɔŋ siooŋnde. Kɛ maa Deeve, ŋ nɔla miŋ kɛɛsiaa le ndi soliŋndo o kɔl. Bolle Baabuile naaleŋ le wɔsi 2024 tɔlnuŋ o piɛile Deeve leŋ choo. Le dimi aa: “Te siooŋnde bii ya pɛ, num ya I tiindaŋ le ya malaa ni.” (Sam 56:3) Mi yau tɛɛsiaa Baabui pilɛ suaa a bolle Baabuileŋ ndeŋ okɔɔ maa, Deeve “hiu lachi a yiyaŋndo o sɔɔŋ muŋ luei ndu siooŋnde woŋ choo, ɔɔ o bahawɛila ndɔlaŋ choo le. Kɛ mbo duau tiindaŋndo o wana ndoo tiuba mbo mala ndu wo niŋ.” O paŋguŋ cho hunɔɔ woŋ niŋ, yiyaŋ a bolle Baabuile naaleŋ le wɔsioo hoo, taama taama te sɔɔŋ luei num siooŋnde woŋ komal num pɛ. Chua teleŋndo le ma yiyaŋ o nyɛ Chɛhowa tosa niŋ o paandoo niŋndo, nyɛ o cho tosaa suŋ suŋndo, a nyɛ o cho hunɔɔ tosa o chilaŋ niŋndo okɔɔ. Te a tosa lende pɛ, maa Deeve, num bɛɛ cho dimi aa: “I dɔu tiindaŋ nuu o Mɛlɛka niŋ, lelaŋ siooŋii bii ya le.”—Sam 56:4.