1. Morwasinke nampo natu karera nowoma poyiruwo yimwe?

 NKENYE gumwe kukara nowoma poyiruwo yimwe. Mokumona asi twa diva eyi za uyunga Bibeli, ose kapi atu tjira vafe, nompepo donondona ndi eyi ngayi horokera vantu komeho. Nye ose kuna kuparuka moyiruwo yoyidigu, yipo nye ose kuvhura tu kare nowoma woyita, ukorokotji ntani uvera. (Ruk. 21:11) Kuvhura hena tu tjire vantu kukwatera mo epangero eli ali tu hepeke ndi vekoro lyetu ava ava rwanesa ukareli wousili. Vamwe kuvhura va kare nosinka asi kapi tava vhuru kulididimikira udigu ou vana kuligwanekera nawo ngesi ndi ou ngava ligwanekera nawo komeho.

2. Moukaro musinke ga kere Ndafita apa ga kere moGata?

² Poyiruwo yimwe Ndafita nga kara nowoma. Pasihonena, apa hompa Sauru ga here kumudipaga, Ndafita kwa dukilire kositata saGata, hompa gwaGata Akisi ga ya dimbwilire asi Ndafita kwa kere mukwayita gomunene ogu ga dipagere “mayovi nomurongo” goVafilisiti. Ndafita kwa kere ‘noutjirwe wounene.’ (1 Sam. 21:​10-12) Age kwa kere nosinka kweyi na mu rugana Akisi. Ngapi omu Ndafita ga fundire po utjirwe?

3. Kuliza nEpisarome 56:​1-3, 11, ngapi omu Ndafita ga fundire po utjirwe?

³ MoMapisarome 56, Ndafita kwa tjenge omu ga lizuvhire apa ga kere moGata. MoMapisarome 56, Ndafita kwa fatwilire konda zeyi ga karerere nowoma, nye hena ga fatwilire eyi ya mu vaterere yipo a dire kukara nowoma. Apa Ndafita ga kere noutjirwe, age kwa huguvarere mwaJehova. (Resa Episarome 56:​1-3, 11.) Ndafita kwa kere nokonda zongwa zeyi na huguvarera mwaJehova. Nevatero lyaJehova, Ndafita kwa tokwere kurugana yininke eyi ya monekere ngwendi kapisi yininke yoyiwa. Age kwa lininkisire ngwendi asi ana zaruka. Ano ayo ya mu tompokere. Mevango lyokuhara kudipaga Ndafita, Akisi kwa harerere Ndafita a ze. Ano Ndafita ya mu tompokere kutjwayuka.—1 Sam. 21:13–22:1.

4. Yisinke natu rugana yipo tu huguvare unene mwaJehova? Yifanekesa.

 ⁴ Nose kuvhura tu funde po utjirwe pokuhuguvara mwaJehova. Yisinke natu rugana yipo tu huguvare unene mwaJehova nsene tuna kara noutjirwe? Koneka sifanekeso esi. Nsene o dimburura asi ono kara nouvera, pomuhowo ove kuvhura o kare nowoma. Nye nsene o huguvara mwandokotora, ayo ngayi kuvatera o liture. Age nampo ga vatera vantu wovanzi ava va vera uvera owo. Age kuvhura a purakene nelituromo nokukulikida asi ana kwata egano malizuvho goge. Ntani kuvhura a ku pe uhaku ou wa vatera wopeke. Mokulifana, ose kuhuguvara unene mwaJehova pokugazadara ko eyi ga rugana nare ntani neyi nga ka rugana komeho. Eyi yiyo ga rugene Ndafita. Ngomu natu ka zogera nonkango edi da kara Mepisarome 56, gazadara ko eyi no rugana yipo o huguvare unene mwaJehova nokufunda po utjirwe ou wa kara nawo.

YISINKE GA SIKISIRE MO NARE JEHOVA?

5. Yininke musinke ga tedere Ndafita apa ga kere nowoma? (Episarome 56:​12, 13)

⁵ Nampili ngomu Ndafita ga kere mosiponga, age nga demenene koyininke eyi ga sikisa mo nare Jehova. (Resa Episarome 56:​12, 13.) Aso kuna kara sininke simwe esi Ndafita nga gazara eparu lyendi nalinye. Pasihonena, poyiruwo yimwe age nga teda ko koyininke eyi ga sita Jehova, ano eyi kwa mu diworokesere omu Jehova ga kara nononkondo ntani omu ga hara unene vantu. (Epis. 65:​6-9) Ndafita kwa tedere hena eyi Jehova ga ruganena vantu. (Epis. 31:19; 37:​25, 26) Ntani hena unene po age kwa tedere ko kweyi ga mu ruganena Jehova pamundinda. Jehova kwa vaterere Ndafita nokumupopera kutundilira unona wendi. (Epis. 22:​9, 10) Gazadara ko tupu omu yininke eyi ga tedere Ndafita ya mu vaterere a huguvare unene mwaJehova.

6. Yisinke nayi tu vatera tu huguvare unene mwaJehova apa atu lizuvhu woma?

⁶ Nsene ono kara nosinka, lipura nyamoge asi ‘Yisinke ga ruganena nge Jehova?’ Gazadara ko yininke eyi ga sita. Pasihonena, pokugazadara ko nawa omu Jehova a pakere mbili yidira nonombya nampili ngomu va dira kuyisita nevhuliko lyokumuhonena ndi lyokumukarera, ngayi tu vatera tu mu huguvare asi nose nga tu pakera mbili. (Mat. 6:​25-32) Gazadara ko hena eyi Jehova ga ruganena vakareli vendi. Kuvhura o  lirongere ko komuntu gumwe ogu va tumbura moBibeli ogu ga likidire epuro lyenene ndi kuvhura nampo o rese sihorokwa somukareli gumwe gwaJehova gomomazuva getu. a Ntani gazadara ko omu Jehova ga ku pakera mbili. Ngapi omu ga ku vatera yipo o mu dive? (Joh. 6:44) Ngapi omu ga limburura makanderero goge? (1 Joh. 5:14) Ngapi ono ku gwanena mo mauwa nkenye ezuva monzambo zaMunendi?—Efe. 1:7; Heb. 4:​14-16.

7. Ngapi omu sihonena somuporofete Ndaniyera sa vaterere Vanessa a funde po utjirwe ou ga kere nawo?

⁷ Munazinyetu Vanessa b gomoHaiti, kwa ligwanekerere noukaro ou wa mu tjilisire. Mugara gumwe gomomukunda gwawo nga mu bela nokumutjangera nkenye ezuva, age kwa mu sininikire a kare mukadona gwendi. Vanessa kwa mu tanterere kuvyukilira asi kapi ta vhuru kuyirugana. Nye mugara ogo kwa handukire unene ntani kwa mu tjilisire asi ta mu rugana yininke yoyidona. Vanessa kwa uyunga asi: “Ame kwa kere nowoma.” Yisinke ga rugene Vanessa yipo a funde po woma? Age kwa rugene eyi ga vhulire kurugana ko yipo ali popere mwene. Mukuronambunga gumwe kwa mu korangedere a tantere ko vaporosi kuhamena ukaro owo. Nye age hena kwa gazadarere ko omu Jehova ga poperere vakareli vendi mosiruwo sanare. Vanessa kwa tanta asi: “Muntu gokuhova ogu na gazarere kwa kere muporofete Ndaniyera. Age kwa mu zuguminine mekero lyovanyime wonzara, nampili ngomu ga dilire kuzona. Nye nampili ngoso, Jehova kwa mu pakerere mbili. Yipo na pulire Jehova a ninke mugara ogo a hageke kukwama-kwama nge ntani yipo Jehova a kohonone po udigu wange morwa kwato eyi na vhulire kurugana ko. Ano konyima kapi na kere hena nowoma.”—Ndan. 6:​12-22.

EYI ANA KU RUGANA JEHOVA NGESI

8. Yisinke ga pulire nawa-nawa Ndafita? (Episarome 56:8)

⁸ Nampili ngomu Ndafita ga kere mosiponga sosinene apa ga kere moGata, age kapi ga demenene koyininke eyi ya mu ninkisire a kare nowoma. Mevango lyokuyirugana oyo, age kwa gazadarere koyininke eyi ga mu ruganene Jehova posiruwo oso. Ndafita gayi divire asi Jehova ga mu pitisilire nokumupopera ntani gayi divire asi Jehova ga kwete egano omu ga lizuvhire. (Resa Episarome 56:8.) Ndafita ga kere hena novakaume vendi wovawa ngwendi Jonatana ntani mupristeli gomunene Ahimereki, ava va mu korangedere nokumuvatera. (1 Sam. 20:​41, 42; 21:​6, 8, 9) Nampili ngomu hompa Sauru ga here kumudipaga, Ndafita ya mu tompokere kutjwayuka yipo a popere eparu lyendi. Ndafita gayi pulire nawa-nawa asi Jehova ga divire udigu ou ga pitire ntani nomu ga lizuvhire kuhamena udigu owo.

9. Yisinke ga diva Jehova kuhamena nkenye gumwe gwetu?

⁹ Nsene kuna kuligwanekera noudigu ou au kuninkisa o kare nosinka, diworoka asi Jehova ga diva udigu owo nomu o lizuvhu apa o kara noudigu owo. Pasihonena, Jehova kapi tupu ga mwene omu Vaisraeli va va hepekere moEgipite nye age hena ga mwene kukora oku va ligwanekerere nako. (Ex. 3:7) Ndafita kwa dimbire asi Jehova ga mwene ‘runyando rwendi ntani noudigu wendi.’ (Epis. 31:7) Ntani apa vantu vaKarunga va hepere morwa matokoro gawo gomadona, ayo kwa guvisire Jehova. (Jes. 63:9) Apa o kara nosinka, Jehova kukwata egano omu o lizuvhu ntani ga liwapaikira mokukuvatera yipo o dire kukara nosinka.

10. Morwasinke wa yi pulira nawa-nawa asi Jehova kukupakera mbili ntani nga ku vatera yipo o lididimikire nkenye udigu?

 ¹⁰ Ove nampo kuvhura o lipure omu Jehova ana kukuvatera ngomu ono kuligwanekera noudigu wokutjilisa. Yipo nye, mupura a ku vatere yipo o dimburure omu ana kukuvatera. (2 Vah. 6:​15-17) Makura gazadara ko komapuro aga. Kosili siuyungwa ndi elimbururo eli va geve komapongo eli lya ku korangedere ndi? Kosili simbapiratjangwa ndi vidiyo ndi rusumo romoBroadcasting oru rwa ku korangedere ndi? Kweli gumwe ga ku pere ko egano lyewa ndi etjangwa lyokukorangeda ndi? Ose nampo kuvhura tu divare usimbu eharo eli ava tu likida vanavazinyetu ntani nomu lya tu vatera nekorangedo eli atu gwana moBibeli. Yininke oyo kuna kara mauhwi gokutunda kwaJehova. (Jes. 65:13; Mar. 10:​29, 30) Ayo kulikida asi Jehova kukupakera mbili. (Jes. 49:​14-16) Ntani ayo kulikida asi kuvhura o huguvare Jehova.

11. Yisinke ya vaterere Aida a dire kukara nosinka unene?

¹¹ Aida ogu ga tunga moSenegal, kwa dimbwilire omu Jehova ga mu vaterere apa ga kere noudigu. Mokumona asi age mbeli, vakurona vendi kwa ndindilire ko kwendi a rugane nokugwana yimaliwa yoyinzi yipo a lirere mwene kumwe novakondi vendi. Nye konyima zapa ga rerupikire eparu lyendi yipo a kare muzuvhisi gokukarerera, age kwa ya kere noyimaliwa yoyisesu. Ekoro lyendi kwa mu handukilire ntani kwa mu rwanesere. Age kwa tanta asi: “Ame kwa kere nosinka asi kapi tani vhuru kupakera mbili vakondi vange ntani nkenye gumwe kapi nga hafera nge. Ame kwa pere Jehova usima kweyi ga sigilire ukaro wange u dide.” Ano ezuva limwe, age kwa purakenene kosiuyungwa esi va geve mepongo. “Munazinyetu kwa geve siuyungwa asi Jehova ga diva nayinye eyi ayi tu koresa komutjima. Ano kanunu-kanunu, magano aga va pere nge vakuronambunga ntani wopeke, kwa ninkisire nge ni yi pure asi Jehova ga hara nge. Apa na kanderere kwaJehova, ame naya tamekere kuyipura nawa-nawa asi Jehova nga vatera nge. Ame kwa kere nombili ngomu na mwene omu ga limbwilire makanderero gange.” Ano konyima, Aida ga gwene yirugana eyi ya mu vaterere a twikire nouzuvhisi wokukarerera ntani nokuvatera vakondi vendi ntani wopeke. Age hena kwa tanta asi: “Ame kwaya  lironga kuhuguvara unene mwaJehova. Ngesi, konyima zapa ani kanderere, kapi ani kara hena noutjirwe.”

YISINKE NGA KA RUGANA JEHOVA KOMEHO?

12. Kuliza nEpisarome 56:​9, yisinke ga pulire nawa-nawa Ndafita?

¹² Resa Episarome 56:9. Velise ezi kulikida nkedi zimwe omu Ndafita ga fundire po utjirwe. Nampili ngomu Ndafita ga kere simpe moudigu, age kwa tedere ko kweyi nga ka muruganena Jehova komeho. Ndafita gayi divire asi Jehova nga mu popera posiruwo souhunga. Nye nampili ngoso, Jehova kwa tanterere Ndafita asi yige nga kara hompa gokukwama ko gwaIsraeli. (1 Sam. 16:​1, 13) Kwanayinye eyi ga tumbwidilire Jehova, Ndafita gayi divire nawa-nawa asi ngayi sika mo.

13. Yisinke twa hepa kupura nawa-nawa eyi nga ka rugana Jehova komeho?

¹³ Yisinke ga ku tumbwidira Jehova eyi nga ku ruganena? Kapi tatu ndindire Jehova a vhure kugusa po maudigu getu nagenye. c Nye nampili ngoso, yikare asi maudigu musinke tuna kuligwanekera nago ngesi, Jehova nga ka ga gusa po mouzuni woupe. (Jes. 25:​7-9) Musiti gwetu ga kara nononkondo dokukavhumbura vafe, dokukagusa po mauvera nagenye ntani nokukora oku atu lizuvhu, nokukagusa po vantu ava ava turwanesa.—1 Joh. 4:4.

14. Yininke musinke natu vhura kuteda?

¹⁴ Apa o kara noutjirwe, teda ko kweyi Jehova nga ka rugana komeho. Gazadara ko omu ngo lizuvha apa ngava ka gusa po Satana. Ntani apa vantu wovadona ngava ka va zonagura po nokukakara po vantu wovawa ntani apa kudira kusikilira mo ngaku ka dongonoka po kanunu-kanunu nkenye ezuva. Elikido limwe lyoposigongi simwe somazuva gatatu somo-2014, kwa likidire omu natu vhura kuteda kehuguvaro lyetu. Guhya kwa zogerere nepata lyendi nonkango dakara mwa-2 Timoteusa 3:​1-5, omu nadi vhura kulitjindja nsene asi ado kwa pumba omu paradisa nga zi ka kara: “Mouzuni woupe nga mu kara yiruwo yokuhafesa. Vantu ngava hara wopeke, ngava hara usili, ngava linunupika, ngava hamberera Karunga, ngava limburukwa vakurona vawo, ngava kara norupandu, ngava kara novakwawo, ngava hara unene vekoro lyawo, ngava lizuvha novakwawo, ngava uyunga wopeke momuwa, ngava lipangera, ngava hara yoyiwa, ngava kara wokuhuguvara, ngava kara nougomoki, ngava hafesa Karunga mevango lyokulihafesa vene, ngava tjira Karunga ntani likara pepi novantu owo.” Ove kuzogera nava vemepata lyoge ndi novanavazinyetu kuhamena omu ngali ka kara eparu moparadisa ndi?

15. Yisinke ya vaterere Tanja a funde po utjirwe ou ga kere nawo?

¹⁵ Munazinyetu gomukadi Tanja ogu ga kara komuzogo gwaMacedonia kwa fundire po utjirwe pokuteda ko komauwa gokomeho. Apa ga tamekere kulironga Bibeli, vakondi vendi kwa mu rwanesere. Age kwa uyunga asi: “Yininke yimwe eyi na tjilire asi ngayi horoka, ya horokere. Nkenye apa ngani tundu kepongo, oyina ngava toona nge. Vakondi vange kwa tjilisire nge asi nsene ngani kara Mbangi zaJehova, ngava dipaga nge.” Ano konyima, Tanja kwa mu tjidire mo membo. Ngapi omu ga lizuvhire? Age kwa tanta asi: “Ame kwa demenene koruhafo oru ngani vhura kukara naro nsene ngani twikira kulimburukwa. Ntani ame kugazadara ko omu Jehova nga vhura kufuta nge mouzuni woupe koyininke nayinye eyi na ku zumbanesa ngesi ntani omu ngatu ka divara yininke nayinye yoyidona yomouzuni ou.” Tanja ga twikilire kulimburukwa ntani nevatero lyaJehova, age ga gwene evango oku ga vhulire kukara. Tanja ngesi ga kwara ntani age kurugana kumwe  namugara gwendi mosirugana sosiruwo nasinye.

HUGUVARA UNENE MWAJEHOVA

16. Yisinke nayi tu vatera yipo tu kare nouradi nsene kuna kumona yihorokwa eyi va pumbire eyi ya kara mwaRukasa 21:​26-28?

¹⁶ Posiruwo soudigu wounene, “vantu ngava kara nowoma wounene.” Nye vantu vaKarunga kapi ngava kara noutjirwe ntani ngava kara nouradi. (Resa Rukasa 21:​26-28.) Morwasinke ngatu dilira kukara noutjirwe? Morwa twa lironga nare kuhuguvara mwaJehova. Tanja ogu katu tumbura pomuhowo kwa tanta asi maudigu aga ga ligwanekerere nago, kuna kumuvatera yipo a pite hena momaudigu gapeke aga ana kuligwanekera nago. Age kwa uyunga asi: “Ame kwaya dimburura asi kwato udigu ou Jehova na dira kutuvatera. Poyiruwo yimwe, ayo kuvhura yi moneke ngwendi asi wopeke kuna kuvatompoka mokurugana nkenye eyi vana hara kuturugana. Nye Jehova ga kara nononkondo kuvapitakana. Nampili ukaro ou tuna kupita u moneke ngwendi udigu unene, awo ngau haga tupu.”

17. Ngapi etjangwa lyetu lyomvhura 2024 ngali tu vatera? (Tara efano lyopontunda.)

¹⁷ Ayo kapisi epuko kukara nowoma. Nye kuvhura tu nyokere po kukara nowoma ngwendi Ndafita. Etjangwa lyetu lyomvhura 2024, kuna kara ekanderero lyaNdafita eli ga kanderere kwaJehova asi: ‘Apa ani tukuka, ame kuhuguvara moge.’ (Epis. 56:3) Koneka eyi ga uyunga mulirongi gumwe goBibeli kuhamena velise ezi. Age kwa tanta asi: “Ndafita kapi ga gazadarere yininke eyi ya mu ninkisire a kare noutjirwe ndi kuhamena maudigu gendi. Nye age kwa huguvarere mwaJehova ogu ga mu poperere.” Gazadara ko etjangwa lyetu lyomvhura momakwedi gokomeho, unene po apa ngo ligwanekera nomaukaro gokutjilisa. Li tulira po siruwo sokugazadara ko eyi ga rugana Jehova nare, neyi ana kurugana ngesi ntani neyi ngaka rugana komeho. Makura ngwendi Ndafita, ove kuvhura ngo uyunge asi: “Ame kwa huguvara Karunga . . . kapi ani tjira.”—Epis. 56:4.