1. Ino nceebonshi cimwi ciindi mpashi inga twaloonda?

 SOONSE cimwi ciindi tulaloonda. Sombi ceebo cakwaamba ayi tulicishi Baibo nshoyaamba, tatuloondi bafu, shibanda na sheenga shacitika kunembo. Nacibi boobo, tutokala munshiku ndyekutoocitika “shintu shiloondesha” mbuli nkoondo, bukapondo amalwashi. (Luka 21:11) Alimwi inga twaloonda bantu mbuli beendeleshi batupensha nabi bamumukwashi batasuni ayi tunolambila Yehova. Bamwi balalisukama ayi teshi bakacikonshe kuliyumya mulipenshi ndyebatokwiindaamo na mpashi ndyeenga beendaamo kunembo.

2. Ino nshiinshi shakacitikila Defedi ndyaakalinga ku Gati?

² Paciindi cimwi Defedi wakaloonda. Kucakubonenaako, paciindi Mwaami Saulo ndyaakalinga kumutandaanya kwaamba ayi amucaaye, Defedi wakacicila kundabala ya bene Filisiti ya Gati. Akishi mwaami waku Gati wakesa mukushiba ayi Defedi ngo shilumamba ucite nkusu uyo ngobakalinga kwiimbila ayi wacaya bene Filisiti “makumi amakumi a shuulu.” Defedi ‘wakaloonda abuumbi.’ (1 Samwe. 21:​10-12) Wakalisukama ceebo cakuyeeya Akishi nsheshi acite kuli nguwe. Ino nshiinshi shakacafwa Defedi kwaamba ayi acileeke kuloonda?

3. Kweelana a Kulumbaisha 56:​1-3, 11, ino Defedi wakacita buyani kwaamba ayi acileeke kuloonda?

³ Mu Kulumbaisha 56, Defedi wakaamba mbwaakalinga kulinyumfwa ndyaakalinga ku Gati. Mulilembo ili, wakaamba cakuteenda mweela cakapa kwaamba ayi aloonde sombi wakaamba ashakamucafwa kwaamba ayi acileeke kuloonda. Defedi ndyaakaloonda, wakacinka manungo muli Yehova. (Amubelenge Kulumbaisha 56:​1-3, 11.) Kuli sheebo shibotu shakapa Defedi kucinka manungo muli  Yehova. Kwiinda mulucafwo lwakwe Yehova, Defedi wakacita cintu cimwi cikankamika. Wakalipanga anga wacinkuka alimwi muyeeyo wakwe wakasebensa! Muciindi cakwaamba ayi Akishi acaye Defedi, wakalinga kusuni ayi asweemo mundabala. Aboobo Defedi wakaloboka.—1 Samwe. 21:13–22:1.

4. Ino nshiinshi nsheenga twaciita kwaamba ayi twiiye kunoocinka manungo abuumbi muli Yehova? Amwaambe cakubonenaako.

⁴ Aswebo inga twacileka kuloonda kwiinda mukucinka manungo muli Yehova. Ano ino nshiinshi nsheenga twaciita kwaamba ayi twiiye kunoocinka manungo abuumbi muli Yehova, bunene bunene na twaloonda? Amuyeeye pacakubonenaako ici. Na bamucana abulwashi bunene, mpashi pakutaanguna inga mwaloonda. Nacibi boobo, inga mwacileka kuloonda bunene na mulamushoma dokota. Mpashi wakashilikawo kale bantu baanji bakaciswawo bulwashi ubo. Inga wamukutika cakubikila maano ndyemutomusansulwiita citoomupa kuloonda alimwi mwalinyumfwa ayi atomubikilako maano. Alimwi mpashi inga wamulwiita ayi atoomupa musamu wakacafwa bamwi koola, abo bakalinga baciswawo bulwashi ubo. Aswebo inga tweeya kunoocinka manungo abuumbi muli Yehova na katuyeeya pashintu nshaakacitawo kale, nshaatoocita pacecino ciindi ansheshi akatucitile kunembo. Ishi Defedi nshaakacita. Ndyetutokwiiya maswi amwi ngaakalemba ngotucana mu Kulumbaisha 56, munooyeeya nsheenga amwebo mwaciita kwaamba ayi munoocinka manungo abuumbi muli Yehova alimwi akutolelela kukalika moyo na mwaloonda.

AMUYEEYE PASHINTU YEHOVA NSHAAKACITAWO KALE

5. Ino nshiinshi Defedi nshaakalinga kukutumana kuyeeyawo na waloonda? (Kulumbaisha 56:​12, 13)

⁵ Nabi kwaamba ayi Defedi wakalinga mubukaalo buloondesha, wakatolelela kuyeeya pashintu shibotu Yehova nshaakacita kale kale. (Amubelenge Kulumbaisha 56:​12, 13.) Ici Defedi ncaakalinga kucita mubuumi bwakwe boonse. Kucakubonenaako, paciindi cimwi wakalinga kukutumana kuyeeya pashintu Yehova nshaakalenga, isho shakamucafwa kushiba ayi Yehova alicite nkusu shiinditeewo alimwi ayi alibasuni bantu. (Kulu. 65:​6-9) Alimwi Defedi wakalinga kukutumana kuyeeya Yehova nshaakacitila bamwi. (Kulu. 31:19; 37:​25, 26) Kwiilikaawo, wakalinga kukutumana kuyeeya bunene pashintu Yehova nshaakamucitila. Yehova wakalinga kucafwa akushitilisha Defedi kuswabo ciindi ndyaakalinga kateta. (Kulu. 22:​9, 10) Ncakutatoonsha kwaamba ayi kukutumana  kuyeeya pashintu ishi, kwakacafwa Defedi kunoocinka manungo abuumbi muli Yehova!

6. Ino nshiinshi sheshi shikatucaafwe kucinka manungo muli Yehova na twaloonda?

⁶ Na mwaloonda, amuliipushe ayi, ‘Ino nshiinshi Yehova nshaakacitawo kale?’ Amukutumane kuyeeya pashintu nshaakalenga. Kucakubonenaako, na twabona Yehova mbwaabikila maano tuyuni amaluba—isho shitana kulengwa mucikoshanyo cakwe alimwi sheenga tashimulambili—tulashoma cakutatoonsha ayi ananotubikilako maano. (Mate. 6:​25-32) Alimwi amuyeeye Yehova nshaakacitila basebenshi bakwe. Inga mweeya pamuntu umwi waambwa mu Baibo uyo wakatondesha lushomo luyumu, na mpashi kubelenga makani aamba pamusebenshi umwi wakwe Yehova wa munshiku shino. a Kwiilikaawo, inga mwakutumana kuyeeya pashintu Yehova nshaakamucitila kutondesha ayi alamubikilako maano. Ino wakamucafwa buyani kwaamba ayi mwiiye cancine? (Joni 6:44) Ino mipailo yanu wakaikumbula buyani? (1 Joni 5:14) Ino mulafubilaamo buyani mumulambu wacilubula ca Mwanaakwe ngwaasuni abuumbi?—Efe. 1:7; Ebu. 4:​14-16.

7. Ino shakacitikila mushinshimi Danyelo shakamucafwa buyani Vanessa kucileka kuloonda?

⁷ Nankashi waliina lya Vanessa, b uyo ukala ku Haiti, wakeenda mubukaalo buloondesha abuumbi. Musankwa umwi wa mumushi mwaakalinga kukala wakalinga kumutumina fooni amameseji bushiku abushiku, kumukakatisha kwaamba ayi akumanaakwe. Vanessa wakakaka cakushinisha. Sombi musankwa uyo wakakalala abuumbi akumukonga ayi atoomuuma. Vanessa wakaamba ayi, “Ndakaloonda.” Ino nshiinshi Vanessa nshaakacita kwaamba ayi acileeke kuloonda? Wakacitawo comwi kwaamba ayi alishitilishe. Munene umwi mulibungano wakamuyuminisha kwaamba ayi atumine bakapokola. Alimwi wakabikila maano kuyeeya Yehova mbwaakashitilisha basebenshi bakwe kale kale. Vanessa wakaamba ayi: “Muntu ngondakataanguna kuyeeyawo ngu mushinshimi Danyelo. Bakamuwaala mucilindi ca nkalamu shakalinga kufwite nsala nabi kwaamba ayi taakalinga kucitewo mulandu. Nacibi boobo, Yehova wakamushitilisha. Anebo ndakapaila kuli Yehova kwaamba ayi ancaafwe mubukaalo ubu. Pesule lyakucita boobo, ndakacileka kuloonda.”—Danye. 6:​12-22.

AMUYEEYE PASHINTU YEHOVA NSHAATOOCITA

8. Ino nciinshi Defedi ncaakalinga kushomete cakutatoonsha? (Kulumbaisha 56:8)

⁸ Nabi kwaamba ayi Defedi wakalinga mubukaalo buloondesha ndyaakalinga ku Gati, taakwe kubikila maano kushintu shakalinga kumupa kuloonda. Muciindi cakucita boobo, wakasalawo kuyeeya pashintu Yehova nshaakalinga kumucitila paciindi cilya. Defedi wakabona ayi Yehova wakalinga kumutanjilila akumushitilisha alimwi wakalinga kucishi mbwaakalinga kulinyumfwa. (Amubelenge Kulumbaisha 56:8.) Alimwi Yehova wakapa Defedi beshicibusa bali kabotu mbuli Jonasani a Aimeleki Mupailishi Munene, abo bakalinga kumuyuminisha akumucafwa. (1 Samwe. 20:​41, 42; 21:​6, 8, 9) Alimwi nabi kwaamba ayi Mwaami Saulo wakalinga kusuni kumucaya, Defedi wakapuluka. Wakalinga kushomete cakutatoonsha ayi Yehova wakalinga kucishi shakalinga kumucitikila alimwi ambwaakalinga kulinyumfwa.

9. Ino nshiinshi Yehova nshacishi palindiswe?

⁹ Amwebo na mweenda mulipenshi litoomupa kuloonda, munokwiibaluka ayi Yehova alicishi lipenshi ndyemutokwiindaamo ambomutolinyumfwa. Kucakubonenaako, Yehova taakwe kubonabo shintu shitaluleme bene Isilaeli nshobakalinga kucitilwa mu Ijipiti, sombi wakabona a “kupenshekwa kwabo koonse.” (Kulo. 3:7) Defedi wakalemba ayi Yehova wakalinga kubona “mapensho” akwe ‘akupenga kwa moyo wakwe.’ (Kulu. 31:7) Alimwi bantu bakwe Lesa ndyebakalinga kupenga nabi kwaamba ayi cimwi ciindi nceebo cakutasala  kabotu kwabo beene, mu “mapensho abo oonse alakwe wakapeengaako.” (Isa. 63:9) Yehova alanyumfwisha mbomulinyumfwa na mwaloonda alimwi alisunishishi kumucafwa kwaamba ayi mucileeke kuloonda.

10. Ino nceebonshi mulishomete cakutatoonsha ayi Yehova alamubikilako maano alimwi ayi alaakumucafwa kuliyumya mulipenshi lili lyoonse ndyeshi mukeendeemo?

¹⁰ Na mutokwiinda mulipenshi liloondesha, mpashi inga tamuboni Yehova mbwaatomucafwa. Ino nshiinshi nsheenga mwaciita? Amupaile kwaamba ayi mubone mbwaatomucafwa. (2 Baam. 6:​15-17) Lyalo amuyeeye pamiipusho iyi: Sa kuli likani lyakamuyuminisha na cikumbulo umwi ncaakaamba kumabungano? Sa kuli makani akalinga mulibuku, muvidyo, na mulwiimbo lulibetele akamuyuminisha? Sa kuli umwi wakamulwiitawo maswi na kumubelengela lilembo lyakamuyuminisha? Mpashi inga twalubaako lusuno bamakwesu abenankashi ndobatutondesha akuyuminishikwa nkotucana mu Maswi akwe Lesa mboshatucafwa. Nacibi boobo, ishi nshipo shilibetele Yehova nshaatupa. (Isa. 65:13; Maako 10:​29, 30) Shilatondesha ayi alamubikilako maano. (Isa. 49:​14-16) Alimwi shilatondesha ayi inga mwacinka manungo muli nguwe.

11. Ino nshiinshi shakacafwa ba Aida kucileka kulisukama abuumbi?

¹¹ Ba Aida abo bakala ku Senegal, bakabikila maano kubona Yehova mbwakabacafwa ndyebakalinga kwiinda mulipenshi limwi. Mukwiinga ba Aida ngomwaana munene paŋanda, bashali babo bakalinga kubalangila ayi bananoocana maali akwene kulilama beene akunoobacafwa. Sombi ndyebakacileka kusebensa, tabakalinga kubaawo amaali aanji. Bamumukwashi wabo bakakalala akutalika kwaamba shibiibi pali mbabo. Ba Aida bakaamba ayi: “Ndakalisukama ayi teshi ncikoonshe kucafwa bashali bangu alimwi boonse mumukwashi batotalika kwaamba shibiibi pali ndime. Alimwi ndakatalika akupa mulandu Yehova ceebo cakwaamba ayi shintu shakabica abuumbi mubuumi bwangu.” Lyalo bushiku bumwi ndyebakalinga kumabungano, bakakutika ku likani lya Baibo. Bakaamba ayi: “Mwaambi wakatwiibalusha ayi Yehova alicishi shintu shipa kwaamba ayi muntu womwi awomwi anoolisukama na kuloonda. Kwiinda mulucafwo lwa bamanene alimwi abamwi, ndakesa mukushiba ayi Yehova alinsuni. Na ndapaila kuli Yehova ndakalinga kushoma cakutatoonsha ayi atooncafwa alimwi ndakalinga kuba aluumuno ceebo cakubona mbwaakalinga  kukumbula mipailo yangu.” Mukuya kwaciindi, ba Aida bakacana ncito yakabacafwa kutolelela kusebensa bupainiya akunocafwako bashali babo. Bakaamba ayi: “Ndakeeya kucinka manungo muli Yehova cakumaninina. Pacecino ciindi na ndapaila, liinji ndacileka kuloonda.”

AMUYEEYE PASHINTU YEHOVA NSHESHI AKACITE KUNEMBO

12. Kweelana a Kulumbaisha 56:​9, ino nciinshi Defedi ncaakalinga kushomete cakutatoonsha?

¹² Amubelenge Kulumbaisha 56:9. Lilembo ili lilaamba cintu acimwi cakacafwa Defedi kucileka kuloonda. Nabi kwaamba ayi wakalinga kunoocili mubukaalo buloondesha, wakakutumana kuyeeya pashintu Yehova nshaakalinga kusa mukumucitila. Defedi wakalinga kucishi kwaamba ayi Yehova alaakumupulusha paciindi ceelete, mukwiinga Yehova wakamushomesha ayi alaakuba mwaami wabene Isilaeli. (1 Samwe. 16:​1, 13) Defedi wakalinga kushomete cakutatoonsha ayi Yehova alaakukumanisha ncaakamushomesha.

13. Ino nshiinshi Yehova nsheshi akacite nsheenga twashoma cakutatoonsha?

¹³ Ino nshiinshi Yehova nshaakashomesha kumucitila? Tatulangili ayi inga watushitilisha kumapensho oonse ngotwiindaamo pacecino ciindi. c Sombi munokwiibaluka ayi mapensho ali oonse ngeenga mweendaamo mucishi cino, Yehova alaakwakushaawo mucishi cipya. (Isa. 25:​7-9) Mulengi wesu alicite nkusu shakubusha bafu, kutushilika kumalwashi, kukushawo shintu shitupa kulinyumfwa cibiibi alimwi akunyonyoola baabo boonse batupikisha.—1 Joni 4:4.

14. Ino nshiinshi nsheenga twakutumana kuyeeyawo?

¹⁴ Na mwaloonda, amukutumane kuyeeya Yehova nsheshi akamucitile kunembo. Amuyeeyebo mbweshi mukalinyumfwe na Satana akanyonyoolwe, bamucita shibiibi bakanyonyoolwe lyalo pacishi pakacaalebo baluleme alimwi abantu ndyeshi bakanoya ciba bamaninite paniini paniini. Mucitondesho ncotwakeebela pakubungana kunene kwamu 2014, cakatondesha mbweenga twakutumana kuyeeya pakulangila kwesu. Mushali musankwa wakalinga kubandika amukwashi wakwe mbweenga lilembo lya 2 Timoti 3:​1-5 lyabelengwa munshila ipuseneeko naakwiinga shaambwa mumavesi aya shilaamba pasheshi shikacitike mu Paladaiso. Wakaamba ayi: “Ono shiba kwaamba ayi mucishi cipya, kulaakuba shiindi shisangalasha abuumbi. Mukwiinga bantu balaakuba basuni bamwi, basuni cancine, balibombya, baliceesha, balumbaisha Lesa, banyumfwila bashali, balumba, bashomeka, basuni mikwashi yabo abuumbi, basuni shipangano, lyoonse baamba shibotu pabamwi, balitibuka, bacata moyo, basuni shintu shibotu, batabeci, balwiitikwa, babona bamwi ayi balabeendaawo, basuni Lesa kwiinda kusuna shakulikondelesha, basuni kusebensela Lesa kuswa paanshi lyamoyo; bantu bamushobo wooyo utapansaani ambabo.” Sa mulabandika abamumukwashi wanu na bashominyinaanu pa buumi mbweshi bukabe mucishi cipya?

15. Ino nciinshi cakacafwa ba Tanja kucileka kuloonda?

¹⁵ Nankashi waliina lya Tanja ukala ku North Macedonia, wakacileka kuloonda ceebo cakuyeeya pashoolwe nsheshi akatambule kunembo. Bashali bakwe tabakalinga kusuniiwo nabi paniini kwaamba ayi anokwiiya Baibo. Wakaamba ayi: “Shintu shimwi nshondakalinga kuloonda ayi inga shacitika, nshoshakacitika. Lyoonse bama bakalinga kunguma na ndaswa kumabungano. Bashali bangu bakalinga kunkonga ayi balaakuncaya na nkabe womwi wa Bakamboni Bakwe Yehova.” Mukuya kwaciindi, ba Tanja bakabataandawo paŋanda. Ino nshiinshi nshobakacita? Bakaamba ayi: “Ndakabikila maano kuyeeya mbweshi nkasangalale kwamuyayaya ceebo cakusalawo kutolelela kushomeka. Alimwi ndakayeeya pashoolwe Yehova nsheshi akampe mucishi cipya pashintu shili shoonse nsheenga ndashiiya mucishi cino ambweshi tukabule kwiibaluka shintu shibiibi shitucitikila.” Ba Tanja bakatolelela kushomeka. Alimwi kwiinda mulucafwo lwakwe Yehova, bakacana kwakukala. Pacecino ciindi, ba Tanja balyeebetwe ku mukwesu  ushomeka alimwi batosebensela pomwi calusangalalo mbuli bapainiya baciindi coonse.

AMWIIYE KUCINKA MANUNGO ABUUMBI MULI YEHOVA PACECINO CIINDI

16. Ino nciinshi ceshi cikatucaafwe kutolelela kuba bataloondi na shaambwa pa Luka 21:​26-28 shikatalike kucitika?

¹⁶ Paciindi ca mapensho anene, bantu ‘balaakunowisuka ceebo ca boowa.’ Sombi bantu bakwe Lesa balaakutolelela kwiimikana cakutatenkaana akuba bataloondi. (Amubelenge Luka 21:​26-28.) Ino nceebonshi teshi tukaloonde? Mukwiinga tulaakunooli twakeeya kale kucinka manungo muli Yehova. Ba Tanja mbotwalinga twaambaawo bakaamba ayi nshebakeendaamo shitobacafwa kuliyumya ndyebatokwiinda mubukaalo buyumu. Bakaamba ayi: “Ndakeeya kwaamba ayi Yehova inga watucafwa kuliyumya mubukaalo buli boonse akutupa shoolwe. Cimwi ciindi inga caboneka anga bamwi mbobatoopa kwaamba ayi tunookwiinda mumapensho, sombi Yehova alicite nkusu kwiinda mbabo. Alimwi nabi kwaamba ayi lipenshi liyume buyani, lilaakumana.”

17. Ino lilembo lya mwaaka wa 2024 lilaakutucafwa buyani? (Amubone cikope cili papeeji yakutaanguna.)

¹⁷ Munshiku shino, kuli shintu shiinji sheenga shatupa kuloonda. Sombi bweenka mbuli Defedi, aswebo inga twacikonsha kucileka kuloonda. Lilembo lya mwaaka wa 2024, ngumupailo Defedi ngwaakapaila kuli Yehova ayi: ‘Na ndanyumfwa boowa, ndacinka manungo muli ndimwe.’ (Kulu. 56:3) Libuku limwi lyaamba pamakani amu Baibo lyakaamba pavesi iyi ayi: “Defedi taakwe kutolelela kuyeeya pashintu shakalinga kumupa kuloonda na mapensho ngaakalinga kwiindaamo. Muciindi cakucita boobo, wakacinka manungo muli Wooyo weenga wamupulusha.” Munoyeeya palilembo lya mwaaka uno mumyeenshi itoosa, bunene bunene na mutokwiinda mubukaalo buloondesha abuumbi. Munoocana ciindi cakuyeeya pashintu Yehova nshaakacitawo kale, nshaatoocita alimwi ansheshi akacite kunembo. Lyalo bweenka mbuli Defedi, amwebo inga mwaamba ayi: “Ndicinkite manungo muli Lesa, aboobo teshi nkaloonde.”—Kulu. 56:4.