1. Aˬ htoꞈ ma te teˇ pawˆ pawˆ kʼo ngaˬ hui kawˆ ve le?

 Ngaˬ hui teˇ gʼaˇ le le kawˆ ve lehˬ a hkʼe leˇ ceh hpehꞈ ve yoˬ. Yaꞈ hkʼaˇ, ngaˬ hui Liꞈ hpu gʼa henˇ˗oˬ htaˇ, ngaˬ hui laiˉ ceuˬ htaꞈ maˇ kawˆ˗o ve yoˬ. Tawˇ pa haˉ te kʼo, chaw suh taˍ ve, neˇ, leh awˬ gʼuˇ suhˍ hpawˇ hpehꞈ la tuˬ ve awˬ ceuˬ, chi teˇ hpaˍ htaꞈ maˇ kawˆ˗o ve yoˬ. Chi hkʼe hpehꞈ ve htawˇ, ngaˬ hui lehˬ “kawˆ tuˬ uiˍ jaˇ ve” laiˉ ceuˬ ve awˬ yanˇ hkʼaw chehˇ taˍ ve tehꞈ Liꞈ hpu hkʼaw kʼoˆ taˍ ve yoˬ. Tawˇ pa haˉ te kʼo, maꞈ te daꞈ ve, haiˬ ve te daꞈ ve, leh naˬ beuꞈ a naˍ chi ve teˇ hpaˍ hpehꞈ ve yoˬ. (Luˉkaꞈ 21:11) Mvuhˇ miˬ uˉ peunˍ paˍ maˇ heˆ leh, yehˬ kʼa hkʼaw ve chaw awˬ tehˬ ve htaꞈ tawˍ laˇ ve ngaˬ hui kawˆ ve yoˬ hehˉ. Chaw teˇ hpaˍ kʼo, chi teˇ hkui beˬ ve lawˇ ve maˇ heˆ leh awˬ gʼuˇ suhˍ hpawˇ beˬ ve lawˇ ve htaꞈ yeunˇ hkanˍ maˇ gʼaˇ la ve htaꞈ kawˆ ve yoˬ.

2. Daˍviˆ Gaˍtaˆ venˇ lo chehˇ htaˇ yawˇ aˬ htoꞈ ma gʼa hpuˇ ve le?

² Daˍviˆ kaꞈ teˇ pawˆ pawˆ kʼo kawˆ ve yoˬ. Tawˇ pa haˉ te kʼo, Sawˉluꞈ Daˍviˆ htaꞈ gʼaꞈ tiˇ pehˍ piˇ htaˇ, yawˇ kawˆ jaˇ leh Hpiˇliˇtiˆ mvuhˇ miˬ Gaˍtaˆ venˇ lo hpaw˗e ve yoˬ. Gaˍtaˆ venˇ lo chehˇ ve jawˇ mawˇ Aˍhkiˆ Daˍviˆ lehˬ maꞈ bawˆ cheuˬ jaˇ leh Hpiˇliˇtiˆ chaw htaꞈ “awˬ meunˍ awˬ meunˍ gʼaˇ” htaꞈ tiˇ pehˍ gʼa ve yawˇ shiˍ la htaˇ, chi Daˍ viˆ dawˇ haˍ tuˬ te piˇ ve yoˬ. Hkʼe te leh, “yawˇ jawˇ mawˇ Aˍhkiˆ htaꞈ kawˆ jaˇ ve yoˬ.” (1 Saˍmo˗eˍlaˆ 21:10-12) Hkʼe kʼo Daˍviˆ kawˆ ve htaꞈ hkʼaˬ hkʼe te gʼaˇ ve le?

3. Chiˇ mvuh ve liꞈ 56:1-3, 11 hkʼaw kʼoˆ taˍ ve hkʼe, Daˍviˆ kawˆ ve htaꞈ hkʼaˬ hkʼe te gʼaˇ ve le?

³ Chiˇ mvuh ve liꞈ kaˇ nanˉ uiˍ 56 hkʼaw Daˍviˆ Gaˍtaˆ venˇ lo chehˇ htaˇ ve awˬ lawn yawˇ hkʼaˬ hkʼe dawˇ ve htaꞈ kʼoˆ maˍ laˇ taˍ ve yoˬ. Chiˇ mvuh ve liꞈ chi hkʼaw Daˍviˆ hkʼaˬ hkʼe taw kawˆ ve ngaˬ hui shiˍ tuˬ te laˇ ve yoˬ. Yaꞈ hkʼaˇ, Daˍviˆ kawˆ ve htaꞈ hkʼaˬ hkʼe te gʼaˇ ve shiˍ tuˬ kaꞈ te laˇ ve yoˬ. Daˍviˆ kawˆ htaˇ yawˇ Yaˬhoˉvaˬ htaꞈ gʼaˇ va ve yoˬ. (Chiˇ mvuh ve 56:1-3, 11 gʼaw sheˍ.) Leh Yaˬhoˉvaˬ kaꞈ Daˍviˆ htaꞈ awˬ tehˬ ga piˇ ve yoˬ. Yaˬhoˉvaˬ Daˍviˆ htaꞈ ga piˇ ve teˇ pawˆ le le maˇ shuˍ ve htawˇ, awˬ bon cawˬ ve yoˬ. Daˍviˆ chaw gʼuˇ hkʼe te ve pa taw, jawˇ mawˇ Aˍhkiˆ Daˍviˆ htaꞈ maˇ tiˇ pehˍ leh gʼaꞈ kʼoˬ piˇ ve yoˬ.—1 Saˍmo˗eˍlaˆ 21:13–22:1.

4. Ngaˬ hui Yaˬhoˉvaˬ htaꞈ hkʼaˬ hkʼe te gʼaˇ hkʼa dehꞈ va gʼa tuˬ le? Tawˇ pa haˉ kʼoˆ maˍ laˇ sheˍ.

 ⁴ Ngaˬ hui Yaˬhoˉvaˬ htaꞈ gʼaˇ va ve kʼo, kawˆ ve htaꞈ gʼaˇ tuˬ yoˬ. Yaꞈ hkʼaˇ, ngaˬ hui kawˆ htaˇ Yaˬhoˉvaˬ htaꞈ hkʼaˬ hkʼe te gʼaˇ va gʼa tuˬ le? Awˬ lawn chi htaꞈ dawˇ nyi sheˍ. Nawˬ a naˍ teˇ ceuˬ ceuˬ hpehꞈ ve kʼo, awˉ lawˉ htaˇ nawˬ kawˆ jaˇ ve yoˬ hehˉ. Yaꞈ hkʼaˇ, nawˬ saˍ laꞈ gʼonˍ geh kʼai peuˬ hkʼawˬ nawˉ nyi ma sha la ve yoˬ. Saˍ laꞈ gʼonˍ chi teˇ gʼaˇ a naˍ chi hkʼe ve htaꞈ haꞈ shaˉ ve cheuˬ jaˇ tehꞈ nawˬ gʼa kaˇ jaw ve yoˬ. Leh nawˬ naˬ ve saˍ laꞈ gʼonˍ htaꞈ kʼoˆ maˍ piˇ htaˇ, nawˬ kʼoˆ maˍ piˇ ve htaꞈ yawˇ hkʼa dehꞈ na leh nawˬ hkʼaˬ hkʼe dawˇ ve htaꞈ kaꞈ yawˇ shiˍ ve yoˬ. Hkʼe te leh, nawˬ nyi ma sha la ve yoˬ. Awˬ nu ve chaw htaꞈ kaꞈ haꞈ shaˉ piˇ gʼa˗oˬ ve hkʼa shuˍ, nawˬ htaꞈ kaꞈ haꞈ shaˉ laˇ˗a tehꞈ kʼoˆ laˇ ve yoˬ. Nawˬ chi hkʼe gʼa kaˇ htaˇ saˍ laꞈ gʼonˍ chi teˇ gʼaˇ htaꞈ hkʼa dehꞈ yonˍ gʼa ve maˇ heˆ laˇ? Chi ve hkʼa shuˍ shuˍ, Yaˬhoˉvaˬ yawˇ aˬ htoꞈ ma te laˬ jaw˗oˬ ve htaꞈ ngaˬ hui nyi htaˇ, ngaˬ hui kaꞈ yawˇ htaꞈ yonˍ gʼa ve yoˬ. Chi teˇ hkui yawˇ ngaˬ hui awˬ pon aˬ htoꞈ ma te chehˇ ve leh awˬ gʼuˇ suhˍ hpawˇ aˬ htoꞈ ma te chehˇ ve htaꞈ Daˍviˆ dawˇ nyi chehˇ ve yoˬ. Chi htaꞈ pa taw, Chiˇ mvuh ve liꞈ kaˇ nanˉ uiˍ 56 hkʼaw Daˍviˆ kʼoˆ ve tawˇ hkawˇ htaꞈ ngaˬ hui dawˇ nyi htaˇ, ngaˬ hui Yaˬhoˉvaˬ htaꞈ gʼaˇ va leh, kawˆ ve htaꞈ hkʼaˬ hkʼe te gʼaˇ tuˬ kaꞈ dawˇ nyi sheˍ.

YAˬHOˉVAˬ Aˬ HTOꞈ MA TE˗Oˬ VE LE?

5. Daˍviˆ kawˆ ve htaꞈ gʼaˇ tuˬ aˬ htoꞈ ma awˬ lawn htaꞈ hkʼa dehꞈ dawˇ nyi ve le? (Chiˇ mvuh ve 56:12, 13)

⁵ Daˍviˆ kawˆ tuˬ gʼa hpuˇ ve htawˇ, yawˇ Yaˬhoˉvaˬ daꞈ ve awˬ ceuˬ te laˇ jaw˗oˬ ve htaꞈ a yeˇ yuˬ chehˇ sheˍ ve yoˬ. (Chiˇ mvuh ve 56:12, 13 g’aw sheˍ.) Daˍviˆ a shaꞈ teꞈ chehˇ htaˇ awˬ lawn chi htaꞈ hkʼaˬ htaˆ kaꞈ dawˇ nyi ve yoˬ. Tawˇ pa haˉ te kʼo, yawˇ Yaˬhoˉvaˬ hpanˍ taˍ ve awˬ ceuˬ htaꞈ dawˇ nyi ve yoˬ. Yaˬhoˉvaˬ ve kanˇ paˆ leh chaw yaˇ teˇ gʼaˇ leh teˇ gʼaˇ htaꞈ yawˇ a yeˇ yuˬ ve tehꞈ Daˍviˆ hkʼa dehꞈ yonˍ gʼa tuˬ ga piˇ ve yoˬ. (Chiˇ mvuh ve 65:6-9) Chi hkʼoˆ kaꞈ, Yaˬhoˉvaˬ awˬ nu ve chaw htaꞈ te piˇ ve awˬ ceuˬ htaꞈ caˉ daꞈ ve kaꞈ Daˍviˆ dawˇ nyi ve yoˬ. (Chiˇ mvuh ve 31:19; 37:25, 26) Leh Yaˬhoˉvaˬ yawˇ awˬ pon aˬ htoꞈ ma te laˇ ve htaꞈ kaꞈ dawˇ nyi ve yoˬ. Yaˬhoˉvaˬ Daˍviˆ yaˇ ehˉ htaˇ kaꞈ awˬ gʼaˇ peꞈ laˇ leh hkʼa dehꞈ nyi haꞈ shaˉ laˇ ve tehꞈ yawˇ shiˍ ve yoˬ. (Chiˇ mvuh ve 22:9, 10) Awˬ lawn chi teˇ hpaˍ htaꞈ Daˍviˆ dawˇ nyi htaˇ, yawˇ Yaˬhoˉvaˬ htaꞈ hkʼa dehꞈ yonˍ gʼa tuˬ te piˇ ve yoˬ.

6. Ngaˬ hui kawˆ ve cawˬ htaˇ Yaˬhoˉvaˬ htaꞈ gʼaˇ va tuˬ, aˬ htoꞈ ma ga laˇ ve le?

⁶ Nawˬ kawˆ htaˇ a shu yawˇ awˬ to htaꞈ na nyi cawˇ ve, ‘Yaˬhoˉvaˬ aˬ htoꞈ ma te jaw˗oˬ ve le?’ Yaˬhoˉvaˬ hpanˍ taˍ ve awˬ ceuˬ ngaˆ leh suhˉ veˆ teˇ hpaˍ htaꞈ hkʼaˬ hkʼe te nyi haꞈ shaˉ piˇ ve htaꞈ dawˇ nyi sheˍ. Awˬ ceuˬ chi teˇ hpaˍ Yaˬhoˉvaˬ ve awˬ hoꞈ awˬ han hkʼe maˇ hpanˍ  taˍ leh yawˇ htaꞈ oˉ kʼoˍ maˇ pui gʼa ve htawˇ, Yaˬhoˉvaˬ kaꞈ awˬ ceuˬ chi teˇ hpaˍ htaꞈ hkʼa dehꞈ nyi haꞈ shaˉ piˇ ve yoˬ. Chi htaꞈ pa taw, yawˇ lehˬ awˬ ceuˬ chi teˇ hpaˍ aꞈ kehˉ ngaˬ hui htaꞈ a yeˇ yuˬ leh nyi haꞈ shaˉ laˇ gaˇ ve maˇ heˆ laˇ? (Maꞈhtehˍ 6:25-32) Awˬ lawn chi ve teˇ hpaˍ htaꞈ dawˇ nyi htaˇ, ngaˬ hui Yaˬhoˉvaˬ htaꞈ gʼaˇ hkʼa dehꞈ va tuˬ te laˇ ve yoˬ. Chi hkʼoˆ kaꞈ, Yaˬhoˉvaˬ yawˇ ve kanˉ te ve chaw awˬ pon te piˇ ve htaꞈ kaꞈ dawˇ nyi sheˍ. Liꞈ hpu hkʼaw ve chaw yonˍ yeˬ ve awˬ lawn htaꞈ hpfuhˆ nyi ve maˇ heˆ leh, chi beuꞈ teˇ co˗e Yaˬhoˉvaˬ ve kanˉ te ve chaw awˬ lawn gʼaw nyi sheˍ. a Nawˬ te gʼa ve teˇ ceuˬ lehˬ, Yaˬhoˉvaˬ nawˬ htaꞈ hkʼaˬ hkʼe te nyi haꞈ shaˉ laˇ ve, leh nawˬ awˬ tehˬ ve htaꞈ hkʼaˬ hkʼe te shiˍ la tuˬ yawˇ ga laˇ ve htaꞈ kaꞈ dawˇ nyi sheˍ. (Yoˇhanˬ 6:44) Yaˬhoˉvaˬ nawˬ ve bon lawˬ hkawˇ htaꞈ hkʼaˬ hkʼe hkʼawꞈ laˇ ve le? (1 Yoˇhanˬ 5:14) Yaˬhoˉvaˬ yawˇ haꞈ jaˇ ve Yaˇ paˍ htaiˍ hkʼawꞈ tcuh laˇ ve nawˬ teˇ nyi leh teˇ nyi awˬ bon hkʼaˬ hkʼe gʼa ve le?—Eˇfeˇsuꞈ 1:7; Heˍbrehˇ 4:14-16.

7. Tcuh kaˍ paˍ Daˍyeˍlaˆ ve awˬ lawn Vaˬnehˇsaˍ kawˆ ve htaꞈ gʼaˇ tuˬ hkʼaˬ hkʼe ga piˇ ve le?

⁷ Heˬtiˬ mvuhˇ miˬ lo chehˇ ve awˬ viˉ awˬ nyi yaˇ miˇ Vaˬnehˇsaˍ b kawˆ tuˬ cawˬ ve awˬ lawn gʼa hpuˇ ve yoˬ. Yawˇ awˬ paˇ awˬ kui lo chehˇ ve hawˉ hkʼaˆ teˇ gʼaˇ yawˇ geh zuhꞈ la tuˬ nyiˉ piˇ ve yoˬ. Yawˇ teˇ nyi le le tawˇ yaw tuˬ awˬ hkʼeun hkʼaw te laˬ leh liꞈ kaꞈ bvuhꞈ feu laˇ ve htawˇ, Vaˬnehˇsaˍ maˇ haꞈ yuˬ ve yoˬ. Yaꞈ hkʼaˇ, hawˉ hkʼaˆ chi teˇ gʼaˇ gʼaˇ hteꞈ kʼawꞈ te la leh yawˇ htaꞈ kaꞈ te luˬ laˇ˗a tehꞈ kawˆ ho piˇ ve yoˬ. Vaˬnehˇsaˍ kʼoˆ ve, “ngaˬ kawˆ jaˇ.” Hkʼe kʼo, Vaˬnehˇsaˍ kawˆ ve htaꞈ hkʼaˬ hkʼe te gʼaˇ ve le? Yawˇ awˬ to htaꞈ haꞈ shaˉ tuˬ te gʼa ve hkʼe teˇ ceuˬ le le te leh, nyi haꞈ shaˉ paˍ kaꞈ mvuhˇ miˬ kanˉ te paˍ htaꞈ caˉ daꞈ piˇ ve yoˬ. Oˇ htaˇ teˇ co˗e Yaˬhoˉvaˬ yawˇ ve kanˉ te ve chaw htaꞈ hkʼaˬ hkʼe nyi haꞈ shaˉ piˇ ve htaꞈ kaꞈ yawˇ dawˇ nyi ve yoˬ. Vaˬnehˇsaˍ kʼawꞈ kʼoˆ ve, “ngaˬ dawˇ mawˬ ve awˉ lawˉ teˇ gʼaˇ lehˬ tcuh kaˍ paˍ Daˍyeˍlaˆ hpehꞈ ve yoˬ. Yawˇ teꞈ chiˉ maˇ gʼa te yaꞈ ve kaꞈ laˇ caˬ shiˉ hkawˆ hkʼaw baˬ keu piˇ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ nyi haꞈ shaˉ piˇ ve pa taw, ngaˬ htaꞈ kaꞈ Daˍyeˍlaˆ hkʼa shuˍ ga laˇ tuˬ lawˬ leh ngaˬ dawˇ haˍ dawˇ hkiˉ ve hkʼa peu˗eˬ Yaˬhoˉvaˬ htaꞈ chiˇ aꞈ piˇ ve yoˬ. Peuˬ hkʼawꞈ nawˉ, ngaˬ kaꞈ maˇ kawˆ˗o ve yoˬ.”—Daˍyeˍlaˆ 6:12-22.

CHI TEˇ HKUI YAˬHOˉVAˬ Aˬ HTOꞈ MA TE CHEHˇ VE LE?

8. Daˍviˆ aˬ htoꞈ ma awˬ lawn htaꞈ yonˍ gʼa ve le? (Chiˇ mvuh ve 56:8)

⁸ Daˍviˆ Gaˍtaˆ venˇ lo chehˇ htaˇ kawˆ tuˬ cawˬ ve htawˇ, yawˇ kawˆ tuˬ cawˬ ve awˬ ceuˬ htaꞈ ceh tiˉ maˇ dawˇ nyi chehˇ. Oˇ ve teˇ yanˇ Yaˬhoˉvaˬ yawˇ awˬ pon te laˇ ve awˬ ceuˬ htaꞈ ceh dawˇ nyi ve yoˬ. Yaˬhoˉvaˬ yawˇ htaꞈ ga laˇ leh nyi haꞈ shaˉ laˇ chehˇ ve tehꞈ yawˇ shiˍ ve yoˬ. Leh yawˇ ve dawˇ hkʼaˇ htaꞈ Yaˬhoˉvaˬ hkʼa dehꞈ na gʼa ve tehꞈ Daˍviˆ shiˍ ve yoˬ. (Chiˇ mvuh ve 56:8 gʼaw sheˍ.) Chi hkʼoˆ kaꞈ, Daˍviˆ yawˇ ve awˬ chawˇ Yawˇnaˆtanˍ leh paw hkuˇ lonˉ Aˍbiˆmaˍlehˆ yawˇ htaꞈ ga piˇ ve yoˬ. (1 Saˍmo˗eˍlaˆ 20:41, 42; 21:6, 8, 9) Jawˇ mawˇ Sawˉluꞈ Daˍviˆ htaꞈ gʼaꞈ tiˇ pehˍ piˇ ve htawˇ, yawˇ shoꞈ shaꞈ ve aˬ htoꞈ ma gʼa hpuˇ ve htaꞈ Yaˬhoˉvaˬ hkʼa dehꞈ shiˍ ve tehꞈ yawˇ yonˍ gʼa ve yoˬ. Chi yawˇ hkʼaˬ hkʼe dawˇ ve htaꞈ Yaˬhoˉvaˬ hkʼa dehꞈ shiˍ ve yoˬ.

9. Ngaˬ hui teˇ gʼaˇ leh teˇ gʼaˇ htaꞈ Yaˬhoˉvaˬ aˬ htoꞈ ma mawˬ ve le?

⁹ Nawˬ shoꞈ shaꞈ ve gʼa hpuˇ htaˇ kawˆ tuˬ te laˇ ve yoˬ. Nawˬ shoꞈ shaꞈ ve aˬ htoꞈ ma gʼa hpuˇ ve, leh nawˬ hkʼaˬ hkʼe dawˇ ve htaꞈ kaꞈ Yaˬhoˉvaˬ na gʼa ve tehꞈ tawnˇ taˍ sheˍ. Tawˇ pa haˉ te kʼo, Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw chehˇ htaˇ, yawˇ hui tuꞈ ve hkanˍ ve aˬ htoꞈ ma gʼa hpuˇ chehˇ ve htaꞈ ceh Yaˬhoˉvaˬ mawˬ ve maˇ heˆ. Yaꞈ hkʼaˇ, yawˇ hui “hkʼaˬ ma gʼa tuꞈ gʼa hkanˍ chehˇ ve htaꞈ” yawˇ gʼa shiˍ ve yoˬ. (Tawˆ kʼai ve 3:7) Chi hkʼoˆ kaꞈ, Daˍviˆ ve kʼa muiˬ hkawˇ hkʼaw yawˇ kʼoˆ ve, yawˇ “tuꞈ hkanˍ chehˇ ve” leh “dawˇ haˍ” chehˇ ve htaꞈ Yaˬhoˉvaˬ mawˬ ve yoˬ. (Chiˇ mvuh ve 31:7) Yaˬhoˉvaˬ ve chaw dawˇ cheˆ ve maˇ cawˇ ve pa taw, tuꞈ hkanˍ ve maˇ heˆ leh shoꞈ shaꞈ ve gʼa hpuˇ htaˇ, Yaˬhoˉvaˬ mawˬ leh nyi ma luˬ ve yoˬ. (Iˉsaˍyaˆ 63:9) Chi htaꞈ pa taw nawˬ kawˆ htaˇ, Yaˬhoˉvaˬ nawˬ ve dawˇ hkʼaˇ htaꞈ na gʼa leh nawˬ kawˆ ve htaꞈ gʼaˇ tuˬ kaꞈ yawˇ ga laˇ gaˇ ve tehꞈ tawnˇ taˍ sheˍ.

10. Yaˬhoˉvaˬ nawˬ htaꞈ haꞈ jaˇ leh nawˬ shoꞈ shaꞈ ve teˇ ceuˬ le le htaꞈ yeunˇ hkanˍ gʼaˇ tuˬ ga laˇ tuˬ yoˬ tehꞈ hkʼaˬ hkʼe te yonˍ gʼa ve le?

 ¹⁰ Nawˬ shoꞈ shaꞈ ve gʼa hpuˇ jaˇ htaˇ, Yaˬhoˉvaˬ nawˬ htaꞈ hkʼaˬ hkʼe ga laˇ chehˇ ve, htawˇ dawˇ nawˬ dawˇ cawˬ ve yoˬ. Chi hkʼe hpehꞈ ve kʼo, Yaˬhoˉvaˬ nawˬ htaꞈ hkʼaˬ hkʼe ga laˇ chehˇ ve nawˬ mawˬ tuˬ yawˇ geh bon lawˬ sheˍ. (2 Jawˇmawˇ 6:15-17) Peuˬ hkʼawꞈ nawˉ a shu yawˇ awˬ to htaꞈ na nyi cawˇ ve, ‘hpawnˬ daꞈ kuiˬ hkʼaw awˬ viˉ awˬ nyi hkʼawꞈ ve maˇ heˆ leh, bon maˍ ve hkʼaˬ ve teˇ lawn nawˬ awˬ gʼaˇ gʼa jaˇ tuˬ te laˇ ve le? Liꞈ teˇ hpaˍ, VDO, maˇ heˆ leh VDO hkʼaw ve liꞈ hkawˇ, nawˬ caˉ leh yonˍ yeˬ tuˬ te laˇ ve hkʼaˬ ve teˇ maˬ cawˬ ve le? Nawˬ awˬ gʼaˇ gʼa tuˬ Liꞈ hpu awˬ tawn peꞈ laˇ ve chaw cawˬ˗aw laˇ?’ Nawˬ shoꞈ shaꞈ ve gʼa hpuˇ jaˇ htaˇ, awˬ viˉ awˬ nyi haꞈ pehnˇ ve leh Yaˬhoˉvaˬ ve kanˉ hkʼaˇ gu laˇ ve awˬ ceuˬ htaꞈ awˬ hpfuhˇ maˇ shiˍ la ve yoˬ hehˉ. Awˬ ceuˬ chi ve teˇ hpaˍ Yaˬhoˉvaˬ geh gʼa ve daꞈ jaˇ ve laꞈ shawnˍ hkʼe hpehꞈ ve yoˬ. (Iˉsaˍyaˆ 65:13; Maˍkuˆ 10:29, 30) Chi ve Yaˬhoˉvaˬ nawˬ htaꞈ haꞈ ve tehꞈ shiˍ tuˬ te laˇ leh nawˬ yawˇ htaꞈ yonˍ gʼa tuˬ kaꞈ te laˇ ve yoˬ.—Iˉsaˍyaˆ 49:14-16.

11. Ai˗daˇ kawˆ ve htaꞈ gʼaˇ tuˬ aˬ htoꞈ ma ga piˇ ve le?

¹¹ Siˬniˬgawˇ mvuhˇ miˬ lo chehˇ ve awˬ viˉ awˬ nyi yaˇ miˇ Ai˗daˇ yawˇ shoꞈ shaꞈ ve awˬ lawn htaꞈ yeunˇ hkanˍ gʼaˇ tuˬ Yaˬhoˉvaˬ ga laˇ ve htaꞈ gʼa mawˬ ve yoˬ. Yawˇ lehˬ yaˇ uiˍ hpehꞈ ve pa taw, awˬ pa awˬ e yawˇ yehˬ kʼa hkʼaw ve chaw htaꞈ nyi haꞈ shaˉ tuˬ dawˇ law ve yoˬ. Yaꞈ hkʼaˇ, Ai˗daˇ gʼuˇ suhˍ peuˍ ve te tuˬ a shaꞈ teꞈ kuiˬ hkʼaw hkʼa sha sha˗ehˬ te tuˬ leuˆ yuˬ peuˬ hkʼawꞈ nawˉ, yawˇ hpu yehˇ maˇ lawꞈ ve yoˬ. Yawˇ ve yehˬ kʼa hkʼaw ve chaw beuꞈ jaˇ leh yawˇ htaꞈ laiˉ ceuˬ kʼoˆ deˇ piˇ ve yoˬ. Ai˗daˇ kʼoˆ ve, “ngaˬ pa ngaˬ e htaꞈ ga piˇ maˇ gʼa la ve ngaˬ kawˆ leh, yehˬ kʼa hkʼaw ve chaw ngaˬ htaꞈ baˬ taˉ laˇ ve htaꞈ kaꞈ kawˆ ve yoˬ. Aˬ htoꞈ ma te ngaˬ chi hkʼe gʼa hpuˇ ve le tehꞈ Yaˬhoˉvaˬ htaꞈ venˇ baˆ taˍ ve yoˬ.” Peuˬ leh hpawnˬ daꞈ kuiˬ hkʼaw bon maˍ hkawˇ teˇ lawn htaꞈ yawˇ gʼa kaˇ ve yoˬ. Bon maˍ paˍ kʼoˆ ve, “aˬ htoꞈ ma awˬ lawn ngaˬ hui kawˆ tuˬ te laˇ ve, dawˇ haˍ tuˬ te laˇ ve, maˇ heˆ leh nyi ma naˬ tuˬ te laˇ ve htawˇ maˇ kʼoˆ, Yaˬhoˉvaˬ teˇ ceuˬ le le htaꞈ shiˍ ve yoˬ. Nyi haꞈ shaˉ paˍ leh awˬ nu ve awˬ viˉ awˬ nyi beˆ maˍ laˇ ve pa taw, Yaˬhoˉvaˬ haꞈ pehnˇ ve htaꞈ ngaˬ awˬ meu˗eˇ awˬ meu˗eˇ yonˍ gʼa tuˬ te laˇ ve yoˬ. Ngaˬ Yaˬhoˉvaˬ geh yonˍ gʼa ve hkʼaw bon teˇ pawˆ kʼawꞈ lawˬ ve yoˬ. Leh ngaˬ bon lawˬ ve htaꞈ yawˇ hkʼawꞈ laˇ ve gʼa mawˬ ve yoˬ. Chi ngaˬ nyi ma gawˬ lehˍ cawˬ tuˬ te laˇ ve yoˬ.” Peuˬ leh Ai˗daˇ yawˇ gʼuˇ suhˍ peuˍ ve te gʼa tuˬ kanˉ gʼa leh, yehˬ kʼa hkʼaw ve chaw htaꞈ hpu yehˇ tuˬ feu piˇ gʼa leh awˬ nu ve chaw htaꞈ kaꞈ ga piˇ gʼa ve yoˬ. Ai˗daˇ kʼawꞈ kʼoˆ ve, “ngaˬ Yaˬhoˉvaˬ htaꞈ nyi ma awˬ tawˬ hkʼa gaˬ gʼaˇ va tuˬ shiˍ la ve yoˬ. Chi teˇ hkui ngaˬ hkʼaˬ hkʼe htaˇ kawˆ ve kʼo, ngaˬ bon lawˬ˗oˬ htaˇ maˇ kawˆ˗o.”

 AWˬ GʼUˇ SUHˍ HPAWˇ YAˬHOˉVAˬ Aˬ HTOꞈ MA TE TUˬ LE?

12. Chiˇ mvuh ve liꞈ 56:9 hkʼaw kʼoˆ taˍ ve hkʼe, Daˍviˆ aˬ htoꞈ ma awˬ lawn htaꞈ yonˍ gʼa ve le?

¹² Chiˇ mvuh ve liꞈ 56:9 gʼaw sheˍ. Chi teˇ tawn hkʼaw Daˍviˆ kawˆ ve htaꞈ gʼaˇ ve teˇ hkʼaˇ htaꞈ kʼoˆ taˍ ve yoˬ. Daˍviˆ ve a shaꞈ teꞈ kuiˬ hkʼaw kawˆ tuˬ cawˬ ve htawˇ, Yaˬhoˉvaˬ yawˇ awˬ pon te laˇ ve awˬ ceuˬ htaꞈ awˬ yanˇ yehˇ leh hkʼa dehꞈ dawˇ nyi ve yoˬ. Daˍviˆ Iˉsaˍreˍlaˆ chaw ve jawˇ mawˇ gʼa te tuˬ Yaˬhoˉvaˬ yawˇ htaꞈ ka tiꞈ te piˇ ve pa taw, awˬ yanˇ gaˬ kʼo Yaˬhoˉvaˬ Daˍviˆ htaꞈ ga laˇ tuˬ yoˬ tehꞈ shiˍ ve yoˬ. (1 Saˍmo˗eˍlaˆ 16:1, 13) Daˍviˆ awˬ pon kʼo, Yaˬhoˉvaˬ aˬ htoꞈ ma ve awˬ lawn ka tiꞈ te taˍ laˇ ve htawˇ maˇ kʼoˆ, awˬ tehˬ hpehꞈ la tuˬ yoˬ tehꞈ yawˇ yonˍ gʼa ve yoˬ.

13. Ngaˬ hui Yaˬhoˉvaˬ htaꞈ aˬ htoꞈ ma awˬ lawn yonˍ gʼa ve le?

¹³ Nawˬ awˬ pon Yaˬhoˉvaˬ aˬ htoꞈ ma te tuˬ ka tiꞈ te taˍ laˇ ve le? Ngaˬ hui shoꞈ shaꞈ ve maˇ gʼa hpuˇ tuˬ, Yaˬhoˉvaˬ haꞈ shaˉ laˇ tuˬ yoˬ tehꞈ maˇ dawˇ law cawˇ. c Yaꞈ hkʼaˇ, awˬ leh meuˇ ve awˬ yanˇ hkʼaw ngaˬ hui shoꞈ shaꞈ ve maˇ heˆ leh tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, miˬ guiˬ awˬ suhˉ hkʼaw awˬ ceuˬ chi ve hkʼa peu˗eˬ maˇ cawˬ˗o tehꞈ ka tiꞈ te taˍ laˇ ve yoˬ. (Iˉsaˍyaˆ 25:7-9) Yaˬhoˉvaˬ lehˬ hpanˍ shehˍ hpaˇ Gʼuiˬ sha hpehꞈ ve pa taw, suh taˍ ve chaw htaꞈ kʼawꞈ teꞈ tu la piˇ gʼa tuˬ, leh naˬ ve gawˬ ve teˇ ceuˬ le le htaꞈ gu na˗e piˇ gʼa tuˬ, leh ngaˬ hui htaꞈ fawˉ mehˍ laˇ ve chaw teˇ gʼaˇ le le htaꞈ te luˬ piˇ gʼa tuˬ kanˇ paˆ cawˬ ve yoˬ.—1 Yoˇhanˬ 4:4.

14. Ngaˬ hui aˬ htoꞈ ma awˬ lawn htaꞈ hkʼa dehꞈ dawˇ nyi gʼa ve le?

¹⁴ Nawˬ hkʼaˬ hkʼe htaˇ kawˆ ve kʼo, Yaˬhoˉvaˬ awˬ gʼuˇ suhˍ hpawˇ te tuˬ ve awˬ ceuˬ htaꞈ dawˇ nyi sheˍ. Miˬ guiˬ awˬ suhˉ hkʼaw Saˍtanˍ maˇ cawˬ˗o htaˇ, hkʼaˬ hkʼe hpehꞈ tuˬ ve htaꞈ nawˬ dawˇ nyi sheˍ. Oˇ ve teˇ yanˇ haiˬ ve chaw maˇ cawˬ˗o ve pa taw, hteˇ ve cawˇ ve chaw tiˉ cawˬ leh nawˬ teˇ nyi le le mvuhˇ shawˉ tu la htaˇ, nawˬ awˬ meu˗eˇ awˬ meu˗eˇ biˇ ve chaw hpehꞈ la tuˬ ve htaꞈ dawˇ nyi sheˍ. 2014 hkʼawꞈ hpawnˬ daꞈ lonˉ 3 nyi hkʼaw ngaˬ hui shiˍ tuˬ te maˍ laˇ ve teˇ lawn, ngaˬ hui ve dawˇ law kuiˬ htaꞈ hkʼa dehꞈ dawˇ nyi tuˬ ga laˇ ve yoˬ. Te maˍ laˇ ve chi awˬ pa hpehꞈ ve chaw yehˬ kʼa hkʼaw ve chaw teˇ gʼaˇ le le geh tawˇ yaw daꞈ ve, 2 Tiˆmoˉseˍ liꞈ 3:1-5 hkʼaw kʼoˆ daꞈ ve aꞈ kehˉ, miˬ guiˬ awˬ suhˉ hkʼaw ve a shaꞈ teꞈ hkʼaˇ hkʼaˬ hkʼe hpehꞈ tuˬ kʼoˆ daꞈ ve yoˬ. “Miˬ guiˬ awˬ suhˉ hkʼaw ha lehˬ ve ceh tiˉ cawˬ ve yoˬ. Awˬ lawn kʼo, teˇ gʼaˇ le le haꞈ daꞈ ve, awˬ tehˬ ve htaꞈ haꞈ ve, nyi ma taˍ nehˬ ve, nyi ma nuˇ nehˬ ve, Yaˬhoˉvaˬ htaꞈ chiˇ mvuh ve ceh tiˉ cawˬ tuˬ yoˬ. Yaˇ awˬ pa awˬ e hkawˇ na ve, awˬ bon uiˍ hkawˇ shiˍ ve, ka tiꞈ yeˬ ve, awˬ viˉ awˬ nyi htaꞈ haꞈ ve, teˇ gʼaˇ leh teˇ gʼaˇ yawˆ yan daꞈ ve, shu htaꞈ chiˇ mvuh piˇ ve, a shu yawˇ awˬ to htaꞈ yuˬ tiˍ gʼaˇ ve, nuˇ nehˬ ve, daꞈ ve awˬ ceuˬ htaꞈ haꞈ ve, ka tiꞈ yeˬ ve chaw hpehꞈ ve, na yuˬ puiˉ ve, nyi ma uiˍ ve mvuh ve maˇ cawˬ ve, Gʼuiˬ sha htaꞈ haꞈ leh miˬ guiˬ ha lehˬ tuˬ teˇ hpaˍ htaꞈ maˇ te ve chaw hpehꞈ ve yoˬ. Leh Gʼuiˬ sha htaꞈ nyi ma awˬ tawˬ hkʼa gaˬ yawˆ yan ve chaw hpehꞈ ve yoˬ. Nawˬ chaw chi teˇ hpaˍ htaꞈ awˬ chawˇ te sheˍ.” Nawˬ awˬ pon kʼo, miˬ guiˬ awˬ suhˉ hkʼaw ve a shaꞈ teꞈ hkʼaˇ hkʼaˬ hkʼe hpehꞈ ve, nawˬ ve yehˬ kʼa hkʼaw ve chaw maˇ heˆ leh awˬ chawˇ geh yaw daꞈ gaˇ˗aw laˇ?

15. Hta˗yaˇ kawˆ ve htawˇ, yawˇ kawˆ ve htaꞈ gʼaˇ tuˬ aˬ htoꞈ ma ga piˇ ve le?

¹⁵ Maˬkeˬdawˇniˆ mvuhˇ miˬ awˬ na hpawˇ lo chehˇ ve awˬ viˉ awˬ nyi Hta˗yaˇ kʼoˆ ve, awˬ gʼuˇ suhˍ hpawˇ daꞈ ve awˬ ceuˬ teˇ hpaˍ htaꞈ yawˇ dawˇ nyi ve lehˬ, kawˆ ve awˬ ceuˬ htaꞈ gʼaˇ tuˬ ga laˇ gʼa ve yoˬ. Hta˗yaˇ Liꞈ hpu henˇ htaˇ, awˬ pa awˬ e maˇ dawˇ cawˇ leh tawˍ piˇ jaˇ. Hta˗yaˇ kʼawꞈ kʼoˆ ve, “ngaˬ hpawnˬ daꞈ taˉ leh kʼawꞈ la ve teˇ pawˆ le le ngaˬ kawˆ jaˇ ve teˇ ceuˬ awˬ tehˬ hpehꞈ la ve yoˬ. Chi ve lehˬ ngaˬ e ngaˬ htaꞈ dawˆ laˇ leh, ngaˬ shaˉhkiˆhkanˍ ve chaw hpehꞈ ve kʼo, ngaˬ htaꞈ tiˇ pehˍ˗a tehˬ ngaˬ e kawˆ ho laˇ ve yoˬ.” Peuˬ leh Hta˗yaˇ htaꞈ awˬ pa awˬ e aˉ hkʼaw lo maˇ chehˇ tcuh ve yoˬ. Leh yawˇ hkʼaˬ hkʼe te ve le? Hta˗yaˇ kʼawꞈ kʼoˆ ve, “ngaˬ Yaˬhoˉvaˬ htaꞈ ka tiꞈ yeˬ ve kʼo, yawˇ ngaˬ htaꞈ co co taiˍ taiˍ ha lehˬ ve cawˬ tcuh laˇ tuˬ yoˬ tehꞈ ngaˬ dawˇ ve yoˬ. Leh oˇ ve teˇ yanˇ maˇ gaˬ sheˍ htaˇ, ngaˬ aˬ htoꞈ ma gʼa yuˬ shonˇ ve htawˇ, miˬ guiˬ awˬ suhˉ hkʼaw chi aꞈ kehˉ daꞈ ve awˬ ceuˬ maˇ maˇ Yaˬhoˉvaˬ ngaˬ htaꞈ peꞈ laˇ tuˬ yoˬ tehꞈ dawˇ ve yoˬ. Leh oˇ ve teˇ yanˇ maˇ daꞈ ve awˬ ceuˬ ngaˬ gʼa hpuˇ ve htaꞈ maˇ dawˇ nyi˗o ve yoˬ.” Hta˗yaˇ Yaˬhoˉvaˬ geh ka tiꞈ yeˬ ve htaꞈ haꞈ shaˉ gʼa ve  yoˬ. Yaˬhoˉvaˬ yawˇ htaꞈ ga piˇ ve pa taw, chehˇ kuiˬ awˬ suhˉ kʼawꞈ ca gʼa ve yoˬ. Chi teˇ hkui Hta˗yaˇ ka tiꞈ yeˬ ve awˬ viˉ awˬ nyi hawˉ hkʼaˆ htaꞈ heuˆ daꞈ leh, Gʼuiˬ sha ve kanˉ awˬ yanˇ hkʼa biˇ teˇ geh te ve yoˬ.

CHI TEˇ HKUI KAꞈ YAˬHOˉVAˬ HTAꞈ GʼAˇ HKʼA DEHꞈ VA SHEˍ

16. Luˉkaꞈ liꞈ 21:26-28 hkʼaw kawˆ tuˬ ve awˬ lawn awˬ tehˬ hpehꞈ la htaˇ, ngaˬ hui haꞈ hanˉ leh maˇ kawˆ tuˬ aˬ htoꞈ ma ga laˇ ve le?

¹⁶ Tuꞈ jaˇ hkanˍ jaˇ ve awˬ yanˇ htaˇ miˬ guiˬ hkʼoˆ lo ve chaw lehˬ, “kawˆ jaˇ ve pa taw maˇ nawˇ maˇ hteh kʼai tuˬ yoˬ.” Yaꞈ hkʼaˇ, Yaˬhoˉvaˬ ve chaw lehˬ yonˍ yeˬ ve pa taw, haꞈ hanˉ leh maˇ kawˆ. (Luˉkaꞈ 21:26-28 gʼaw sheˍ.) Aˬ htoꞈ ma pa taw ngaˬ hui maˇ kawˆ ve le? Awˬ lawn kʼo, ngaˬ hui Yaˬhoˉvaˬ htaꞈ gʼaˇ va tuˬ gʼa henˇ˗oˬ ve yoˬ. Hta˗yaˇ kʼawꞈ kʼoˆ ve, yawˇ gʼa hpuˇ jaw ve awˬ lawn lehˬ awˬ gʼuˇ suhˍ hpawˇ shoꞈ shaꞈ ve awˬ lawn htaꞈ hkʼaˬ hkʼe te yeunˇ hkanˍ gʼaˇ tuˬ kaꞈ ga piˇ ve yoˬ. Yawˇ kʼoˆ ve, “shoꞈ shaꞈ ve leh tuꞈ ve hkanˍ ve Yaˬhoˉvaˬ teˇ ceuˬ˗ehˬ kaꞈ maˇ gu gʼa ve maˇ cawˬ tehꞈ ngaˬ gʼa shiˍ ve yoˬ. Ngaˬ hui teˇ ceuˬ le le htaꞈ ponˬ kʼai gʼa tuˬ Gʼuiˬ sha ga laˇ tuˬ yoˬ.” Yawˇ kʼawꞈ kʼoˆ ve, “teˇ pawˆ pawˆ kʼo awˬ nu ve chaw uˉ peunˍ ve awˬ hawˉ lo ngaˬ hui chehˇ ve tehꞈ dawˇ ve yoˬ. Yaꞈ hkʼaˇ, awˬ tehˬ kʼo maˇ heˆ. Yawˇ kanˇ paˆ cawˬ ve lehˬ, Yaˬhoˉvaˬ cawˬ tcuh taˍ ve yoˬ. Yaˬhoˉvaˬ lehˬ kanˇ paˆ uiˍ jaˇ mvuh jaˇ ve yoˬ. Shoꞈ shaꞈ ve awˬ lawn teˇ hpaˍ hpaˍ nyi˗a kʼo, gu maˇ gʼa tehꞈ dawˇ ve htawˇ, teˇ nyi kʼo awˬ ceuˬ chi teˇ hpaˍ maˇ cawˬ˗o tuˬ yoˬ.”

17. 2024 hkʼawꞈ a yeˇ uiˍ jaˇ ve Liꞈ hpu awˬ tawn ngaˬ hui htaꞈ hkʼaˬ hkʼe ga laˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁷ Chi beuꞈ teˇ co˗e ngaˬ hui kawˆ tuˬ te laˇ ve laiˉ ceuˬ cawˬ ve yoˬ. Daˍviˆ te gʼa ve hkʼa shuˍ, ngaˬ hui kaꞈ kawˆ ve htaꞈ gʼa gʼaˇ tcuh ve yoˬ. 2024 hkʼawꞈ a yeˇ uiˍ jaˇ ve Liꞈ hpu awˬ tawn lehˬ, Daˍviˆ Yaˬhoˉvaˬ geh bon lawˬ hkawˇ hpehꞈ ve yoˬ. Yawˇ kʼoˆ ve, “Ngaˬ kawˆ ve teˇ yanˇ, ngaˬ nawˬ htaꞈ gʼaˇ va ve yoˬ.” (Chiˇ mvuh ve 56:3) Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw awˬ tawn chi htaꞈ kʼoˆ ve, “Daˍviˆ yawˇ kawˆ ve leh tuꞈ ve hkanˍ ve htaꞈ ceh tiˉ maˇ dawˇ nyi ve yoˬ. Yaꞈ hkʼaˇ, yawˇ htaꞈ ponˬ laˇ shehˍ hpaˇ Gʼuiˬ sha htaꞈ gʼaˇ va ve yoˬ.” Nawˬ shoꞈ shaꞈ ve awˬ lawn gʼa hpuˇ leh kawˆ tuˬ te laˇ htaˇ, a yeˇ uiˍ jaˇ ve Liꞈ hpu awˬ tawn htaꞈ hkʼaˬ htaˆ kaꞈ tawnˇ taˍ sheˍ. Yaˬhoˉvaˬ nawˬ awˬ pon te laˇ jaw˗oˬ ve leh chi teˇ hkui te laˇ chehˇ ve awˬ ceuˬ htaꞈ kaꞈ dawˇ nyi sheˍ. Leh awˬ gʼuˇ suhˍ hpawˇ Yaˬhoˉvaˬ te laˇ tuˬ ve awˬ ceuˬ htaꞈ kaꞈ dawˇ nyi sheˍ. Nawˬ kaꞈ Daˍviˆ hkʼa shuˍ kʼoˆ gʼa ve yoˬ. Oˇ kaˬ lo kʼoˆ ve, ‘ngaˬ Gʼuiˬ sha htaꞈ gʼaˇ va leh, ngaˬ gʼa kawˆ tuˬ ve maˇ heˆ.’—Chiˇ mvuh ve 56:4.