ບົດຄວາມສຶກສາທີ 1
ເພງທີ 38 ພະອົງຈະເຮັດໃຫ້ເຈົ້າເຂັ້ມແຂງ
ເອົາຊະນະຄວາມຢ້ານໂດຍໄວ້ໃຈພະເຢໂຫວາ
ຂໍ້ພະຄຳພີປະຈຳປີ 2024:“ເມື່ອລູກຢ້ານ ລູກກໍໄວ້ໃຈພະອົງ.”—ເພງ. 56:3, ລ.ມ
ຈຸດສຳຄັນ
ຮຽນຮູ້ວິທີທີ່ຈະໄວ້ໃຈພະເຢໂຫວາຫຼາຍຂຶ້ນ ແລະວິທີເອົາຊະນະຄວາມຢ້ານ.
1. ເປັນຫຍັງບາງເທື່ອເຮົາອາດຮູ້ສຶກຢ້ານ?
ເປັນເລື່ອງທຳມະດາທີ່ເຮົາທຸກຄົນຈະຮູ້ສຶກຢ້ານ. ແຕ່ເມື່ອເຮົາໄດ້ຮຽນຄຳພີໄບເບິນ ເຮົາກໍເຊົາຢ້ານຫຼາຍຢ່າງ ເຊັ່ນ: ເຊົາຢ້ານຄົນຕາຍ ເຊົາຢ້ານພວກປີສາດ ແລະບໍ່ຢ້ານສິ່ງທີ່ຈະເກີດຂຶ້ນໃນອະນາຄົດ. ແຕ່ກໍມີບາງຢ່າງທີ່ເຮົາຍັງຢ້ານຢູ່ຍ້ອນເຮົາມີຊີວິດໃນໄລຍະທີ່ຄຳພີໄບເບິນບອກວ່າຈະເກີດ “ປາກົດການທີ່ໜ້າຢ້ານ” ເຊັ່ນ: ສົງຄາມ ອາດຊະຍາກຳ ແລະໂລກລະບາດ. (ລກ. 21:11) ເຮົາອາດຢ້ານຄົນນຳ ເຊິ່ງລວມເຖິງອຳນາດການປົກຄອງຫຼືຄົນໃນຄອບຄົວທີ່ຕໍ່ຕ້ານຄວາມເຊື່ອຂອງເຮົາ. ບາງຄົນກໍອາດຢ້ານວ່າເຂົາເຈົ້າຈະອົດທົນກັບການທົດສອບທີ່ເຈິໃນຕອນນີ້ຫຼືການທົດສອບທີ່ຈະເຈິໃນອະນາຄົດບໍ່ໄຫວ.
2. ຕອນທີ່ຢູ່ເມືອງກັດ ດາວິດຢ້ານຫຍັງ?
2 ບາງເທື່ອດາວິດກໍຮູ້ສຶກຢ້ານຄືກັນ. ຕົວຢ່າງເຊັ່ນ: ຕອນທີ່ຊາອູນໄລ່ລ່າລາວ ລາວກໍໄດ້ໜີໄປເມືອງກັດທີ່ຢູ່ຟີລິດສະຕີນ. ອາກີເຊທີ່ເປັນກະສັດຂອງເມືອງກັດຮູ້ວ່າດາວິດເປັນນັກຮົບທີ່ເກັ່ງຫຼາຍທີ່ຂ້າພວກຟີລິດສະຕີນ “ເປັນໝື່ນໆ.” ເລື່ອງນີ້ເຮັດໃຫ້ດາວິດອຸກໃຈແລະ “ຢ້ານອາກີເຊກະສັດຂອງເມືອງກັດຫຼາຍ.” (1ຊມ. 21:10-12) ດາວິດເອົາຊະນະຄວາມຢ້ານໄດ້ແນວໃດ?
3. ຕາມຄຳເພງ 56:1-3, 11 ດາວິດເອົາຊະນະຄວາມຢ້ານໄດ້ແນວໃດ?
3 ໃນຄຳເພງບົດ 56 ດາວິດເວົ້າເຖິງຄວາມຮູ້ສຶກຕອນທີ່ລາວຢູ່ເມືອງກັດ. ໃນຄຳເພງບົດນັ້ນເຮັດໃຫ້ເຮົາຮູ້ວ່າດາວິດຢ້ານຫຼາຍສ່ຳໃດ ແລະກໍເຮັດໃຫ້ເຮົາຮູ້ນຳວ່າດາວິດເອົາຊະນະຄວາມຢ້ານໄດ້ແນວໃດ. ຕອນທີ່ດາວິດຢ້ານ ລາວໄວ້ໃຈພະເຢໂຫວາ. (ອ່ານຄຳເພງ 56:1-3, 11) ດາວິດມີເຫດຜົນແທ້ໆທີ່ຈະໄວ້ໃຈພະເຢໂຫວາ ຍ້ອນເພິ່ນຊ່ວຍລາວໃຫ້ສາມາດຄິດແຜນການທີ່ແປກໆແຕ່ໃຊ້ໄດ້ຜົນ. ດາວິດທຳທ່າເຮັດເປັນຜີບ້າ ອາກີເຊຈຶ່ງຢາກໄລ່ລາວໜີແທນທີ່ຈະຂ້າລາວ. ດັ່ງນັ້ນ ດາວິດຈຶ່ງລອດຊີວິດ.—1ຊມ. 21:13–22:1
4. ເຮົາຈະໄວ້ໃຈພະເຢໂຫວາຫຼາຍຂຶ້ນໄດ້ແນວໃດ? ຂໍໃຫ້ຍົກຕົວຢ່າງ.
4 ເຮົາກໍເອົາຊະນະຄວາມຢ້ານໄດ້ຖ້າເຮົາໄວ້ໃຈພະເຢໂຫວາ. ແຕ່ເຮົາຈະໄວ້ໃຈເພິ່ນໄດ້ແນວໃດໂດຍສະເພາະຕອນທີ່ເຮົາຮູ້ສຶກຢ້ານ? ໃຫ້ເຮົາຄິດເຖິງຕົວຢ່າງນີ້. ສົມມຸດວ່າເຈົ້າບໍ່ສະບາຍແຮງ. ຕອນທຳອິດ ເຈົ້າອາດຮູ້ສຶກຢ້ານຫຼາຍ. ແຕ່ເມື່ອເຈົ້າໄປຫາໝໍ ເຈົ້າກໍເລີ່ມສະບາຍໃຈຂຶ້ນຍ້ອນເຈົ້າໄດ້ຍິນວ່າທ່ານໝໍຜູ້ນີ້ມີຊື່ສຽງວ່າປົວພະຍາດນີ້ເກັ່ງ. ຕອນທີ່ເຈົ້າເລົ່າອາການໃຫ້ລາວຟັງ ລາວກໍຕັ້ງໃຈຟັງແລະເຈົ້າຮູ້ສຶກວ່າລາວເຂົ້າໃຈເຈົ້າແທ້ໆ. ລາວສະເໜີວິທີປົວທີ່ເຄີຍໃຊ້ໄດ້ຜົນດີກັບຄົນອື່ນມາແລ້ວ. ເມື່ອໄດ້ຍິນແບບນີ້ ເຈົ້າກໍໄວ້ໃຈລາວຫຼາຍຂຶ້ນ. ຄ້າຍຄືກັນ ເຮົາຈະໄວ້ໃຈພະເຢໂຫວາຫຼາຍຂຶ້ນໄດ້ໂດຍເບິ່ງວ່າເພິ່ນເຄີຍເຮັດຫຍັງເພື່ອເຮົາມາແດ່ແລ້ວ ເພິ່ນກຳລັງເຮັດຫຍັງໃນຕອນນີ້ ແລະເພິ່ນຈະເຮັດຫຍັງໃນອະນາຄົດ. ນີ້ແມ່ນສິ່ງທີ່ດາວິດເຮັດ. ດັ່ງນັ້ນ ຕອນທີ່ເຮົາເບິ່ງຄຳເວົ້າຂອງດາວິດໃນຄຳເພງບົດ 56 ໃຫ້ເຮົາຄິດນຳວ່າເຮົາຈະໄວ້ໃຈພະເຢໂຫວາຫຼາຍຂຶ້ນແລະເອົາຊະນະຄວາມຢ້ານໄດ້ແນວໃດ.
ພະເຢໂຫວາເຄີຍເຮັດຫຍັງມາແດ່ແລ້ວ?
5. ດາວິດຄິດຕຶກຕອງເລື່ອງຫຍັງແດ່ເພື່ອຈະເອົາຊະນະຄວາມຢ້ານ? (ຄຳເພງ 56:12, 13)
5 ເຖິງວ່າດາວິດກຳລັງຕົກຢູ່ໃນອັນຕະລາຍ ລາວກໍຍັງສົນໃຈໃນສິ່ງທີ່ພະເຢໂຫວາເຄີຍເຮັດມາແລ້ວ. (ອ່ານຄຳເພງ 56:12, 13) ດາວິດຄິດແບບນີ້ຕະຫຼອດຊີວິດຂອງລາວ. ຕົວຢ່າງເຊັ່ນ: ລາວມັກຄິດຕຶກຕອງກ່ຽວກັບສິ່ງທີ່ພະເຢໂຫວາສ້າງ ເຊິ່ງຊ່ວຍລາວໃຫ້ໝັ້ນໃຈໃນລິດເດດຂອງພະເຢໂຫວາແລະໝັ້ນໃຈວ່າເພິ່ນຮັກມະນຸດແຕ່ລະຄົນຫຼາຍ. (ເພງ. 65:6-9) ນອກຈາກນັ້ນ ລາວຍັງຄິດຕຶກຕອງກ່ຽວກັບສິ່ງທີ່ພະເຢໂຫວາເຮັດເພື່ອຄົນອື່ນນຳ. (ເພງ. 31:19; 37:25, 26) ດາວິດຍັງຄິດຕຶກຕອງເປັນພິເສດວ່າພະເຢໂຫວາໄດ້ເຮັດຫຍັງເພື່ອລາວເປັນສ່ວນໂຕ. ລາວຮູ້ວ່າພະເຢໂຫວາສະໜັບສະໜູນແລະປົກປ້ອງລາວຕັ້ງແຕ່ຕອນທີ່ລາວເປັນແອນ້ອຍ. (ເພງ. 22:9, 10) ການຄິດເຖິງເລື່ອງເຫຼົ່ານີ້ຕ້ອງເຮັດໃຫ້ດາວິດໝັ້ນໃຈໃນພະເຢໂຫວາຫຼາຍຂຶ້ນແທ້ໆ
ສິ່ງທີ່ຊ່ວຍດາວິດໃຫ້ໄວ້ໃຈພະເຢໂຫວາຫຼາຍຂຶ້ນແມ່ນການຄິດເຖິງສິ່ງທີ່ເພິ່ນເຄີຍເຮັດເພື່ອລາວມາແລ້ວ ສິ່ງທີ່ເພິ່ນກຳລັງເຮັດໃນຕອນນີ້ ແລະສິ່ງທີ່ເພິ່ນຈະເຮັດໃນອະນາຄົດ (ເບິ່ງຂໍ້ 5, 8, 12) d
6. ເມື່ອເຮົາຮູ້ສຶກຢ້ານ ສິ່ງໃດຈະຊ່ວຍເຮົາໃຫ້ໄວ້ໃຈພະເຢໂຫວາ?
6 ຕອນທີ່ເຈົ້າຮູ້ສຶກຢ້ານໃຫ້ຖາມໂຕເອງວ່າ ‘ພະເຢໂຫວາເຄີຍເຮັດຫຍັງມາແລ້ວ?’ ໃຫ້ເຈົ້າຄິດກ່ຽວກັບສິ່ງທີ່ເພິ່ນສ້າງ. ຕົວຢ່າງເຊັ່ນ: ໃຫ້ເບິ່ງວ່າພະເຢໂຫວາເບິ່ງແຍງນົກແລະດອກໄມ້ແນວໃດ. ເຖິງວ່າສິ່ງເຫຼົ່ານີ້ບໍ່ໄດ້ຖືກສ້າງໃຫ້ຄ້າຍຄືກັບເພິ່ນແລະບໍ່ສາມາດນະມັດສະການເພິ່ນໄດ້ ແຕ່ພະເຢໂຫວາຍັງເບິ່ງແຍງພວກມັນຢ່າງດີ. ດັ່ງນັ້ນ ເພິ່ນກໍແຮ່ງສົນໃຈແລະຢາກເບິ່ງແຍງເຮົາຫຼາຍກວ່ານັ້ນອີກບໍ່ແມ່ນບໍ? (ມທ. 6:25-32) ການຄິດຕຶກຕອງກ່ຽວກັບເລື່ອງນີ້ຈະເຮັດໃຫ້ເຮົາໄວ້ໃຈພະເຢໂຫວາຫຼາຍຂຶ້ນ. ນອກຈາກນັ້ນ ໃຫ້ຄິດເຖິງສິ່ງທີ່ພະເຢໂຫວາເຮັດເພື່ອຜູ້ຮັບໃຊ້ຂອງເພິ່ນນຳ. ເຈົ້າອາດສຶກສາຄົ້ນຄວ້າເລື່ອງຂອງຄົນທີ່ຢູ່ໃນຄຳພີໄບເບິນທີ່ມີຄວາມເຊື່ອເຂັ້ມແຂງ ຫຼືເຈົ້າອາດລອງອ່ານປະສົບການຂອງຜູ້ຮັບໃຊ້ພະເຢໂຫວາໃນປັດຈຸບັນ. a ອີກສິ່ງໜຶ່ງທີ່ເຈົ້າເຮັດໄດ້ແມ່ນໃຫ້ຄິດເບິ່ງວ່າພະເຢໂຫວາໄດ້ເບິ່ງແຍງເຈົ້າແນວໃດແລະເພິ່ນຊ່ວຍເຈົ້າຈັ່ງໃດໃຫ້ມາຮູ້ຈັກຄວາມຈິງ. (ຢຮ. 6:44) ເພິ່ນຕອບຄຳອະທິດຖານຂອງເຈົ້າແນວໃດແດ່? (1ຢຮ. 5:14) ໃນແຕ່ລະມື້ ເຈົ້າໄດ້ຮັບປະໂຫຍດຫຍັງຈາກການທີ່ພະເຢໂຫວາໃຫ້ລູກຊາຍທີ່ເພິ່ນຮັກມາຕາຍເປັນຄ່າໄຖ່?—ອຟຊ. 1:7; ຮຣ. 4:14-16
ເຮົາໄວ້ໃຈພະເຢໂຫວາຫຼາຍຂຶ້ນໄດ້ໂດຍຄິດເຖິງສິ່ງທີ່ເພິ່ນເຄີຍເຮັດເພື່ອເຮົາມາແລ້ວ ສິ່ງທີ່ເພິ່ນກຳລັງເຮັດໃນຕອນນີ້ ແລະສິ່ງທີ່ເພິ່ນຈະເຮັດໃນອະນາຄົດ (ເບິ່ງຂໍ້ 6, 9-10, 13-14) e
7. ເລື່ອງຂອງຜູ້ພະຍາກອນດານີເອນຊ່ວຍວາເນັດຊ້າແນວໃດໃຫ້ເອົາຊະນະຄວາມຢ້ານໄດ້?
7 ພີ່ນ້ອງຍິງຄົນໜຶ່ງຊື່ວາເນັດຊ້າ bຢູ່ໄຮຕິເຈິກັບສະຖານະການທີ່ເປັນຕາຢ້ານຫຼາຍ. ມີຜູ້ຊາຍຄົນໜຶ່ງທີ່ຢູ່ໃນເຂດບ້ານຂອງວາເນັດຊ້າໄດ້ສົ່ງຂໍ້ຄວາມແລະໂທຫາທຸກມື້ເພື່ອກົດດັນໃຫ້ໄປນອນນຳ. ວາເນັດຊ້າປະຕິເສດລາວແບບກົງໆແຕ່ຜູ້ຊາຍຄົນນີ້ກໍແຮ່ງຕື້ຫຼາຍກວ່າເກົ່າອີກແລະເຖິງຂັ້ນຂູ່ວ່າຈະທຳຮ້າຍລາວ. ວາເນັດຊ້າເວົ້າວ່າ “ຂ້ອຍຢ້ານຫຼາຍ.” ວາເນັດຊ້າເອົາຊະນະຄວາມຢ້ານໄດ້ແນວໃດ? ລາວພະຍາຍາມເຮັດທຸກສິ່ງທີ່ເຮັດໄດ້ເພື່ອປົກປ້ອງໂຕເອງ ແລະຜູ້ດູແລໃນປະຊາຄົມກໍຊ່ວຍລາວຕິດຕໍ່ກັບອຳນາດການປົກຄອງ. ນອກຈາກນັ້ນ ລາວຍັງໄດ້ຄິດເຖິງເລື່ອງທີ່ພະເຢໂຫວາປົກປ້ອງຜູ້ຮັບໃຊ້ຂອງເພິ່ນໃນສະໄໝແຕ່ກີ້. ວາເນັດຊ້າເລົ່າວ່າ: “ຄົນທຳອິດທີ່ຂ້ອຍຄິດເຖິງແມ່ນຜູ້ພະຍາກອນດານີເອນ. ລາວຖືກໂຍນລົງໃນຂຸມທີ່ມີໂຕສິງທີ່ຫິວຫຼາຍທັງໆທີ່ລາວບໍ່ໄດ້ເຮັດຫຍັງຜິດ. ແຕ່ພະເຢໂຫວາກໍປົກປ້ອງລາວ. ຂ້ອຍຈຶ່ງຂໍໃຫ້ພະເຢໂຫວາຊ່ວຍຂ້ອຍຄືກັນ. ຫຼັງຈາກນັ້ນ ຂ້ອຍກໍບໍ່ຢ້ານອີກຕໍ່ໄປ.”—ດນອ. 6:12-22
ພະເຢໂຫວາກຳລັງເຮັດຫຍັງໃນຕອນນີ້
8. ດາວິດໝັ້ນໃຈໃນເລື່ອງໃດ? (ຄຳເພງ 56:8)
8 ເຖິງວ່າດາວິດຕົກຢູ່ໃນອັນຕະລາຍຕອນທີ່ຢູ່ເມືອງກັດ ແຕ່ລາວກໍບໍ່ໄດ້ຄິດເຖິງແຕ່ສິ່ງທີ່ເຮັດໃຫ້ລາວຢ້ານ. ດາວິດຄິດເຖິງສິ່ງທີ່ພະເຢໂຫວາກຳລັງເຮັດເພື່ອລາວໃນຕອນນັ້ນ. ດາວິດຮູ້ເລີຍວ່າພະເຢໂຫວາກຳລັງຊ່ວຍແລະປົກປ້ອງລາວ ແລະຮູ້ວ່າເພິ່ນເຂົ້າໃຈຄວາມຮູ້ສຶກຂອງລາວແທ້ໆ. (ອ່ານຄຳເພງ 56:8) ນອກຈາກນັ້ນ ດາວິດຍັງໄດ້ຮັບຄວາມຊ່ວຍເຫຼືອຈາກໝູ່ທີ່ດີຂອງລາວ ເຊັ່ນ ໂຢນາທານແລະປະໂລຫິດໃຫຍ່ອາຮີເມເລັກ. (1ຊມ. 20:41, 42; 21:6, 8, 9) ເຖິງວ່າດາວິດຍັງຕ້ອງໜີຈາກການໄລ່ລ່າຂອງຊາອູນ ແຕ່ລາວໝັ້ນໃຈວ່າພະເຢໂຫວາຮູ້ດີວ່າລາວຕ້ອງເຈິກັບບັນຫາຫຍັງແດ່ ແລະເພິ່ນຮູ້ວ່າບັນຫານັ້ນເຮັດໃຫ້ລາວຮູ້ສຶກແນວໃດ.
9. ພະເຢໂຫວາສັງເກດເຫັນຫຍັງກ່ຽວກັບເຮົາແຕ່ລະຄົນ?
9 ເມື່ອເຈົ້າເຈິບັນຫາທີ່ເຮັດໃຫ້ຮູ້ສຶກຢ້ານ ຂໍໃຫ້ຈື່ໄວ້ວ່າພະເຢໂຫວາຮູ້ວ່າເຈົ້າກຳລັງເຈິກັບບັນຫາຫຍັງແດ່ ແລະເພິ່ນກໍເຂົ້າໃຈຄວາມຮູ້ສຶກຂອງເຈົ້ານຳ. ຕົວຢ່າງເຊັ່ນ: ຕອນທີ່ພວກອິດສະຣາເອນຢູ່ເອຢິບ ພະເຢໂຫວາບໍ່ພຽງແຕ່ເຫັນວ່າເຂົາເຈົ້າເຈິກັບຄວາມລຳບາກຫຍັງແດ່ ແຕ່ເພິ່ນຍັງຮູ້ວ່າ “ເຂົາເຈົ້າເຈັບປວດຫຼາຍແທ້ໆ.” (ອພຍ. 3:7) ໃນເພງທີ່ດາວິດແຕ່ງ ລາວບອກວ່າພະເຢໂຫວາເຫັນ “ຄວາມທຸກ” ແລະຮູ້ວ່າລາວ “ເຈັບປວດ.” (ເພງ. 31:7, ລ.ມ) ເມື່ອພະເຢໂຫວາເຫັນປະຊາຊົນຂອງເພິ່ນເຈິຄວາມທຸກລຳບາກ ເຖິງວ່າຈະເປັນຍ້ອນການຕັດສິນໃຈທີ່ຜິດພາດຂອງເຂົາເຈົ້າເອງ “ພະເຈົ້າກໍທຸກໃຈນຳ.” (ອຊຢ. 63:9) ດັ່ງນັ້ນ ເມື່ອເຈົ້າຮູ້ສຶກຢ້ານ ຂໍໃຫ້ຮູ້ວ່າພະເຢໂຫວາເຂົ້າໃຈຄວາມຮູ້ສຶກຂອງເຈົ້າແລະເພິ່ນຢາກຊ່ວຍເຈົ້າໃຫ້ເອົາຊະນະຄວາມຢ້ານ.
10. ເປັນຫຍັງເຈົ້າໝັ້ນໃຈວ່າພະເຢໂຫວາຮັກເຈົ້າຫຼາຍແລະເພິ່ນຈະຊ່ວຍເຈົ້າໃຫ້ຮັບມືກັບບັນຫາທຸກຢ່າງໄດ້?
10 ຕອນທີ່ເຈົ້າເຈິບັນຫາໜັກ ເຈົ້າອາດສົງໄສວ່າພະເຢໂຫວາກຳລັງຊ່ວຍເຈົ້າຢູ່ບໍ? ຖ້າເປັນແນວນັ້ນ ໃຫ້ເຈົ້າອະທິດຖານຂໍພະເຢໂຫວາຊ່ວຍເຈົ້າໃຫ້ເບິ່ງໃຫ້ອອກວ່າເພິ່ນກຳລັງຊ່ວຍເຈົ້າ. (2ກສ. 6:15-17) ຈາກນັ້ນ ໃຫ້ຖາມໂຕເອງວ່າ ມີຄຳບັນລະຍາຍຫຼືຄຳຄິດເຫັນຂອງພີ່ນ້ອງຢູ່ການປະຊຸມທີ່ໃຫ້ກຳລັງໃຈເຈົ້າບໍ? ມີປຶ້ມ ວິດີໂອ ຫຼືເພງຈາກມິວສິກວິດີໂອທີ່ໃຫ້ກຳລັງໃຈເຈົ້າບໍ? ມີໃຜເວົ້າຫຼືອ່ານຂໍ້ຄຳພີທີ່ໃຫ້ກຳລັງໃຈເຈົ້າບໍ? ຕອນທີ່ເຈົ້າເຈິບັນຫາໜັກ ອາດເປັນເລື່ອງງ່າຍທີ່ເຈົ້າຈະເບິ່ງຂ້າມຄວາມຮັກຂອງພີ່ນ້ອງແລະຄວາມຮູ້ທີ່ອົງການຂອງພະເຢໂຫວາຈັດກຽມໃຫ້. ທີ່ຈິງ ສິ່ງເຫຼົ່ານີ້ເປັນຂອງຂວັນທີ່ພິເສດຈາກພະເຢໂຫວາ. (ອຊຢ. 65:13; ມຣກ. 10:29, 30) ມັນສະແດງໃຫ້ເຫັນວ່າເພິ່ນຮັກເຈົ້າຫຼາຍແລະເຮັດໃຫ້ເຈົ້າໄວ້ໃຈເພິ່ນໄດ້.—ອຊຢ. 49:14-16
11. ສິ່ງໃດຊ່ວຍໄອດ້າໃຫ້ເອົາຊະນະຄວາມຢ້ານໄດ້?
11 ພີ່ນ້ອງຍິງຊື່ໄອດ້າທີ່ຢູ່ເຊເນການໄດ້ເຫັນວ່າພະເຢໂຫວາຊ່ວຍລາວໃຫ້ຮັບມືກັບບັນຫາໄດ້. ລາວເປັນລູກກົກ ພໍ່ແມ່ຈຶ່ງຄາດໝາຍໃຫ້ລາວຫາເງິນມາລ້ຽງຄອບຄົວ. ແຕ່ຫຼັງຈາກທີ່ໄອດ້າເລືອກທີ່ຈະໃຊ້ຊີວິດແບບຮຽບງ່າຍເພື່ອຈະເປັນໄພໂອເນຍ ລາວກໍມີບັນຫາເລື່ອງເງິນ. ຄອບຄົວຂອງລາວໃຈຮ້າຍໃຫ້ລາວຫຼາຍແລະເວົ້າໃຫ້ລາວ. ໄອດ້າເວົ້າວ່າ: “ຂ້ອຍຢ້ານວ່າຈະຊ່ວຍພໍ່ແມ່ບໍ່ໄດ້ ແລະທຸກຄົນຈະຖິ້ມຂ້ອຍ. ຂ້ອຍເຖິງຂັ້ນໂທດພະເຢໂຫວາວ່າເປັນຫຍັງຈຶ່ງປ່ອຍໃຫ້ເລື່ອງມັນຮ້າຍແຮງປານນີ້.” ຕໍ່ມາ ລາວໄດ້ຟັງຄຳບັນລະຍາຍໜຶ່ງຢູ່ການປະຊຸມ. ຜູ້ບັນລະຍາຍບອກວ່າພະເຢໂຫວາຮູ້ທຸກຢ່າງທີ່ເຮັດໃຫ້ເຮົາຮູ້ສຶກຢ້ານແລະອຸກໃຈ. ຄຳແນະນຳຂອງຜູ້ດູແລກັບພີ່ນ້ອງເຮັດໃຫ້ຂ້ອຍຄ່ອຍໆໝັ້ນໃຈໃນຄວາມຮັກຂອງພະເຢໂຫວາ. ເມື່ອຂ້ອຍອະທິດຖານຫາພະເຢໂຫວາ ຂ້ອຍໝັ້ນໃຈຫຼາຍຂຶ້ນວ່າເພິ່ນຈະຊ່ວຍຂ້ອຍ ແລະເມື່ອຂ້ອຍເຫັນວ່າເພິ່ນໄດ້ຕອບຄຳອະທິດຖານຂອງຂ້ອຍ ຂ້ອຍກໍຮູ້ສຶກສະຫງົບໃຈແທ້ໆ.” ຕໍ່ມາ ໄອດ້າໄດ້ວຽກທີ່ຊ່ວຍລາວໃຫ້ເປັນໄພໂອເນຍໄດ້ແລະຍັງມີເງິນຊ່ວຍພໍ່ແມ່ແລະຄົນອື່ນໄດ້ນຳອີກ. ໄອດ້າເວົ້າວ່າ: “ຂ້ອຍໄດ້ຮຽນຮູ້ທີ່ຈະໄວ້ໃຈພະເຢໂຫວາສຸດຫົວໃຈ. ຕອນນີ້ເມື່ອຂ້ອຍຮູ້ສຶກຢ້ານ ຂ້ອຍກໍອະທິດຖານ ແລ້ວຂ້ອຍກໍບໍ່ຮູ້ສຶກຢ້ານອີກເລີຍ.”
ພະເຢໂຫວາຈະເຮັດຫຍັງໃນອະນາຄົດ
12. ຕາມຄຳເພງ 56:9 ດາວິດໝັ້ນໃຈໃນເລື່ອງຫຍັງ?
12 ອ່ານຄຳເພງ 56:9. ໃນຂໍ້ນີ້ເວົ້າເຖິງອີກວິທີໜຶ່ງທີ່ຊ່ວຍດາວິດໃຫ້ເອົາຊະນະຄວາມຢ້ານໄດ້. ເຖິງວ່າຊີວິດຂອງດາວິດຍັງຕົກຢູ່ໃນອັນຕະລາຍ ແຕ່ລາວກໍໃຊ້ເວລາຄິດຕຶກຕອງເຖິງສິ່ງທີ່ພະເຢໂຫວາຈະເຮັດເພື່ອລາວໃນອະນາຄົດ. ດາວິດຮູ້ວ່າເມື່ອຮອດເວລາ ພະເຢໂຫວາຈະຊ່ວຍລາວແນ່ນອນຍ້ອນເພິ່ນສັນຍາວ່າລາວຈະໄດ້ເປັນກະສັດອົງຕໍ່ໄປຂອງອິດສະຣາເອນ. (1ຊມ. 16:1, 13) ສຳລັບດາວິດ ລາວໝັ້ນໃຈວ່າທຸກສິ່ງທີ່ພະເຢໂຫວາສັນຍາໄວ້ຈະເກີດຂຶ້ນແທ້.
13. ເຮົາໝັ້ນໃຈວ່າພະເຢໂຫວາຈະເຮັດຫຍັງ?
13 ພະເຢໂຫວາສັນຍາວ່າຈະເຮັດຫຍັງເພື່ອເຈົ້າແດ່? ເຮົາບໍ່ໄດ້ຄາດໝາຍວ່າພະເຢໂຫວາຈະປົກປ້ອງເຮົາບໍ່ໃຫ້ເຈິກັບບັນຫາຫຍັງເລີຍ. c ແຕ່ໃນສະໄໝສຸດທ້າຍນີ້ ບໍ່ວ່າເຮົາຈະເຈິກັບບັນຫາແບບໃດກໍຕາມ ພະເຢໂຫວາຈະກຳຈັດສິ່ງເຫຼົ່ານີ້ໃຫ້ໝົດໄປໃນໂລກໃໝ່. (ອຊຢ. 25:7-9) ພະເຢໂຫວາມີລິດເດດຫຼາຍພໍທີ່ຈະປຸກຄົນຕາຍໃຫ້ຟື້ນຄືນມາ ປົວຄວາມເຈັບປ່ວຍທຸກຢ່າງ ແລະທຳລາຍທຸກຄົນທີ່ຂົ່ມເຫງເຮົາ.—1ຢຮ. 4:4
14. ເຮົາອາດຄິດເຖິງເລື່ອງຫຍັງແດ່?
14 ຕອນທີ່ເຈົ້າຮູ້ສຶກຢ້ານ ໃຫ້ຄິດເຖິງສິ່ງທີ່ພະເຢໂຫວາຈະເຮັດໃນອະນາຄົດ. ໃຫ້ຄິດເບິ່ງວ່າໃນໂລກໃໝ່ເຈົ້າຈະຮູ້ສຶກແນວໃດເມື່ອບໍ່ມີຊາຕານແລ້ວ. ຕອນນັ້ນຈະບໍ່ມີຄົນຊົ່ວ ມີແຕ່ຄົນດີ ແລະໃນແຕ່ລະມື້ເຈົ້າຈະຄ່ອຍໆກາຍເປັນຄົນສົມບູນແບບ. ໃນການປະຊຸມພາກປີ 2014 ມີການສາທິດໜຶ່ງທີ່ຊ່ວຍເຮົາໃຫ້ຮູ້ວິທີທີ່ຈະຄິດເຖິງຄວາມຫວັງຂອງເຮົາ. ໃນການສາທິດນັ້ນ ຜູ້ເປັນພໍ່ລົມກັບຄົນໃນຄອບຄົວວ່າໃຫ້ລອງປ່ຽນຄຳເວົ້າທີ່ຢູ່ໃນ 2 ຕີໂມທຽວ 3:1-5 ໃຫ້ເປັນສິ່ງທີ່ຈະເກີດຂຶ້ນໃນໂລກໃໝ່. ລາວເວົ້າວ່າ: “ໃນໂລກໃໝ່ຈະເປັນເວລາທີ່ມີແຕ່ຄວາມສຸກຍ້ອນທຸກຄົນໃນໂລກຈະຮັກກັນ ຮັກຄວາມຈິງ ຈຽມໂຕ ຖ່ອມໂຕ ຍ້ອງຍໍສັນລະເສີນພະເຈົ້າ ເຊື່ອຟັງພໍ່ແມ່ ສຳນຶກບຸນຄຸນ ພັກດີ ຮັກຍາດຕິພີ່ນ້ອງ ຍອມກັນແລະກັນ ຊົມເຊີຍຄົນອື່ນ ຄວບຄຸມໂຕເອງໄດ້ ອ່ອນໂຍນ ຮັກສິ່ງທີ່ດີ ສັດຊື່ ບໍ່ຫົວແຂງ ບໍ່ອວດດີ ບໍ່ເປັນຄົນຮັກຄວາມມ່ວນຊື່ນແຕ່ຮັກພະເຈົ້າ ບໍ່ເປັນຄົນເຄັ່ງສາສະໜາແຕ່ທາງນອກ. ຂໍໃຫ້ເຈົ້າໃກ້ຊິດກັບຄົນແບບນີ້.” ເຈົ້າເດ? ເຈົ້າຢາກລົມກັບຄົນໃນຄອບຄົວຫຼືໝູ່ບໍວ່າຊີວິດໃນໂລກໃໝ່ຈະເປັນແນວໃດ?
15. ເຖິງວ່າທັນຢ້າຮູ້ສຶກຢ້ານ ແຕ່ສິ່ງໃດຊ່ວຍລາວໃຫ້ເອົາຊະນະຄວາມຢ້ານໄດ້?
15 ໃຫ້ເບິ່ງປະສົບການຂອງພີ່ນ້ອງຍິງຄົນໜຶ່ງຊື່ທັນຢ້າທີ່ຢູ່ມາຊິໂດເນຍເໜືອ. ພໍ່ແມ່ຂອງລາວຕໍ່ຕ້ານໜັກຫຼາຍຕອນທີ່ລາວຮຽນຄຳພີໄບເບິນ. ແຕ່ການຄິດເຖິງສິ່ງດີໆທີ່ພະເຢໂຫວາຈະເຮັດໃນອະນາຄົດຊ່ວຍລາວໃຫ້ຮັກສາຄວາມສັດຊື່ຕໍ່ໆໄປເມື່ອລາວຮູ້ສຶກຢ້ານ. ທັນຢ້າເລົ່າວ່າ: “ສິ່ງທີ່ຂ້ອຍຢ້ານໄດ້ເກີດຂຶ້ນແທ້ໆ. ແມ່ຕີຂ້ອຍທຸກເທື່ອທີ່ກັບມາຈາກການປະຊຸມ. ພໍ່ແມ່ຂູ່ວ່າຈະຂ້າຂ້ອຍຖ້າຂ້ອຍເປັນພະຍານພະເຢໂຫວາ.” ໃນທີ່ສຸດ ພໍ່ແມ່ຂອງທັນຢ້າກໍໄລ່ລາວອອກຈາກເຮືອນ. ລາວເຮັດແນວໃດ? ທັນຢ້າເລົ່າວ່າ: “ຂ້ອຍພະຍາຍາມຄິດວ່າຖ້າຂ້ອຍສັດຊື່ຕໍ່ພະເຢໂຫວາ ເພິ່ນຈະເຮັດໃຫ້ຂ້ອຍມີຄວາມສຸກຕະຫຼອດໄປ. ຂ້ອຍຍັງຄິດວ່າທຸກສິ່ງທີ່ຂ້ອຍສູນເສຍໃນຕອນນີ້ ພະເຢໂຫວາຈະໃຫ້ຂ້ອຍໃນໂລກໃໝ່ ແລະຂ້ອຍຈະລືມເລື່ອງທີ່ບໍ່ດີທັງໝົດ.” ທັນຢ້າຮັກສາຄວາມສັດຊື່ຕໍ່ພະເຢໂຫວາໄດ້ແທ້ໆ. ພະເຢໂຫວາຊ່ວຍທັນຢ້າໃຫ້ຊອກຫາບ່ອນຢູ່ໃໝ່ໄດ້. ຕອນນີ້ ທັນຢ້າແຕ່ງດອງກັບພີ່ນ້ອງຊາຍທີ່ສັດຊື່ແລະຮັບໃຊ້ເຕັມເວລານຳກັນຢ່າງມີຄວາມສຸກ.
ໄວ້ໃຈພະເຢໂຫວາຫຼາຍຂຶ້ນຕັ້ງແຕ່ຕອນນີ້
16. ເມື່ອເຫດການທີ່ຢູ່ໃນລູກາ 21:26-28 ເກີດຂຶ້ນ ສິ່ງໃດຈະຊ່ວຍເຮົາໃຫ້ກ້າຫານຕໍ່ໆໄປແລະບໍ່ຢ້ານ?
16 ໃນໄລຍະຄວາມທຸກລຳບາກຄັ້ງໃຫຍ່ ຄົນໃນໂລກ “ຈະຢ້ານຈົນສະຫຼົບ.” ແຕ່ປະຊາຊົນຂອງພະເຢໂຫວາຈະກ້າຫານແລະບໍ່ຢ້ານ. (ອ່ານລູກາ 21:26-28) ເປັນຫຍັງເຮົາຈຶ່ງບໍ່ຢ້ານ? ຍ້ອນເຮົາໄດ້ຮຽນຮູ້ທີ່ຈະໄວ້ໃຈພະເຢໂຫວາມາແລ້ວ. ທັນຢ້າທີ່ເວົ້າເຖິງກ່ອນໜ້ານີ້ບອກວ່າ ປະສົບການທີ່ຜ່ານມາຊ່ວຍລາວໃຫ້ຮູ້ວິທີທີ່ຈະຮັບມືກັບບັນຫາຕ່າງໆໄດ້. ລາວເວົ້າວ່າ: “ຂ້ອຍໄດ້ຮຽນຮູ້ວ່າພະເຢໂຫວາສາມາດຊ່ວຍເຮົາໃຫ້ອົດທົນກັບບັນຫາຕ່າງໆໄດ້ ແລະໃຫ້ສິ່ງທີ່ດີກັບເຮົາ. ບາງເທື່ອເຮົາອາດຮູ້ສຶກວ່າເຮົາກຳລັງຢູ່ໃນສະຖານະການທີ່ຄົນອື່ນຄວບຄຸມ. ແຕ່ທີ່ຈິງແລ້ວ ເຂົາເຈົ້າບໍ່ມີອຳນາດເກີນກວ່າທີ່ພະເຢໂຫວາຍອມໃຫ້ມີ. ພະເຢໂຫວາມີອຳນາດຫຼາຍທີ່ສຸດ. ເຖິງວ່າບັນຫາບາງຢ່າງເບິ່ງຄືວ່າບໍ່ມີທາງອອກ ແຕ່ມື້ໜຶ່ງມັນຈະໝົດໄປ.”
17. ຂໍ້ພະຄຳພີປະຈຳປີ 2024 ຈະຊ່ວຍເຮົາແນວໃດ? (ເບິ່ງຮູບໜ້າປົກ)
17 ໃນທຸກມື້ນີ້ມີຫຼາຍສິ່ງທີ່ເຮັດໃຫ້ເຮົາຢ້ານ ແຕ່ໃຫ້ເຮົາເປັນຄືກັບດາວິດທີ່ບໍ່ຍອມໃຫ້ຄວາມຢ້ານຄວບຄຸມເຮົາໄດ້. ຂໍ້ພະຄຳພີປະຈຳປີ 2024 ເປັນຄຳອະທິດຖານທີ່ດາວິດອະທິດຖານຫາພະເຢໂຫວາ. ລາວເວົ້າວ່າ: “ເມື່ອລູກຢ້ານ ລູກກໍໄວ້ໃຈພະອົງ.” (ເພງ. 56:3, ລ.ມ) ປຶ້ມອ້າງອີງຫົວໜຶ່ງກ່ຽວກັບຄຳພີໄບເບິນອະທິບາຍຂໍ້ນີ້ວ່າ ດາວິດ “ບໍ່ໄດ້ຄິດເຖິງແຕ່ເລື່ອງທີ່ເຮັດໃຫ້ລາວຢ້ານຫຼືຄິດເຖິງແຕ່ບັນຫາຂອງໂຕເອງ ແຕ່ລາວເພິ່ງພະເຈົ້າຜູ້ຊ່ວຍໃຫ້ລອດ. ຂໍໃຫ້ເຈົ້າຄິດເຖິງຂໍ້ຄຳພີນີ້ຕະຫຼອດປີ ໂດຍສະເພາະຕອນທີ່ເຈົ້າເຈິບັນຫາທີ່ເຮັດໃຫ້ຢ້ານ. ໃຫ້ຄິດເຖິງສິ່ງທີ່ພະເຢໂຫວາເຮັດເພື່ອເຈົ້າມາແລ້ວ ສິ່ງທີ່ເພິ່ນກຳລັງເຮັດເພື່ອເຈົ້າໃນຕອນນີ້ ແລະສິ່ງທີ່ເພິ່ນຈະເຮັດໃນອະນາຄົດ. ແລ້ວເຈົ້າກໍຈະສາມາດເວົ້າໄດ້ຄືກັບດາວິດທີ່ວ່າ “ພະເຈົ້າເອີ້ຍ ລູກໄວ້ໃຈພະອົງ . . . ລູກບໍ່ຮູ້ສຶກຢ້ານ.”—ເພງ. 56:4, ລ.ມ
ພີ່ນ້ອງຍິງທີ່ເຈິໄພທຳມະຊາດກຳລັງຄິດເຖິງຂໍ້ພະຄຳພີປະຈຳປີ 2024 (ເບິ່ງຂໍ້ 17)
ເຈົ້າຈະຕອບແນວໃດ?
-
ການຄິດເຖິງສິ່ງທີ່ພະເຢໂຫວາໄດ້ເຮັດມາແລ້ວຊ່ວຍເຈົ້າແນວໃດໃຫ້ເອົາຊະນະຄວາມຢ້ານ?
-
ການຄິດເຖິງສິ່ງທີ່ພະເຢໂຫວາກຳລັງເຮັດໃນຕອນນີ້ຊ່ວຍເຈົ້າແນວໃດໃຫ້ເອົາຊະນະຄວາມຢ້ານ?
-
ການຄິດເຖິງສິ່ງທີ່ພະເຢໂຫວາຈະເຮັດໃນອະນາຄົດຊ່ວຍເຈົ້າແນວໃດໃຫ້ເອົາຊະນະຄວາມຢ້ານ?
ເພງທີ 33 ມອບພາລະຂອງເຈົ້າໄວ້ກັບພະເຢໂຫວາ
a ເຈົ້າສາມາດເບິ່ງບົດຄວາມທີ່ຊ່ວຍເຈົ້າໃຫ້ມີຄວາມເຊື່ອເຂັ້ມແຂງໄດ້ໃນເວັບໄຊ jw.org ໂດຍພິມ “ຮຽນແບບຄວາມເຊື່ອຂອງເຂົາ” ຫຼື “ປະສົບການ” ໃນປ່ອງຄົ້ນຫາ. ໃນແອັບ JW Library® ໃຫ້ເບິ່ງບົດຄວາມຊຸດ “ຮຽນແບບຄວາມເຊື່ອຂອງເຂົາ” ຫຼື “ເລື່ອງຊີວິດຈິງຂອງພະຍານພະເຢໂຫວາ.” (ພາສາໄທ)
b ຊື່ສົມມຸດ.
c ເບິ່ງປຶ້ມຫຍັບເຂົ້າໃກ້ພະເຢໂຫວາ ບົດ 7 ຂໍ້ 13-22.
d ຄຳອະທິບາຍຮູບ: ດາວິດຄິດເຖິງຕອນທີ່ພະເຢໂຫວາໃຫ້ກຳລັງລາວເພື່ອຂ້າໝີ ຄິດເຖິງຕອນທີ່ເພິ່ນໃຊ້ອາຮີເມເລັກຊ່ວຍລາວ ແລະຄິດເຖິງຕອນທີ່ເພິ່ນແຕ່ງຕັ້ງລາວໃຫ້ເປັນກະສັດໃນອະນາຄົດ.
e ຄຳອະທິບາຍຮູບ: ພີ່ນ້ອງຊາຍທີ່ຕິດຄຸກຍ້ອນຄວາມເຊື່ອຄິດເຖິງຕອນທີ່ພະເຢໂຫວາຊ່ວຍລາວໃຫ້ເຊົາສູບຢາໄດ້ ຄິດເຖິງຕອນທີ່ເພິ່ນໃຫ້ກຳລັງໃຈລາວຕອນທີ່ອ່ານຈົດໝາຍຂອງພີ່ນ້ອງ ແລະຄິດເຖິງຕອນທີ່ເພິ່ນໃຫ້ລາວມີຊີວິດຕະຫຼອດໄປໃນໂລກໃໝ່.
