1. Mwomwo ika shimbu jimwe tweji kwivwilanga woma?

 VATU vosena veji kwivwanga woma shimbu jimwe. Chipwe ngocho, kulinangula Mbimbiliya cheji kutukafwanga tuhone kwivwa woma vafu, navyuma vyakutalisa kukupanda, nawoma wavyuma navikasoloka kulutwe. Kaha nawa hakuwana nge tuli nakuyoyela mumakumbi amakalu, ngocho kuli “vyuma vyakwivwisa vatu woma” vyakufwana nge jijita, naulyanyi namisongo. (Luka 21:11) Tunahase nawa kwivwa vatu woma, kuhakilako vene navaka-fulumende vaze veji kutuyanjisanga, chipwe vausoko wetu vaze veji kwimanyinanga nakole kulemesa chamuchano. Vamwe nawa vanahase kulizakamina ngwavo kaveshi kuhasa kumika vyeseko viliko oholyapwa chipwe vize vili nakwiza kulutweko.

2. Lumbununenu ukalu apwile nawo Ndavichi omu apwile muNgata.

² Shimbu jimwe Ndavichi evwilenga woma. Chakutalilaho, omu Mwangana Saulu apwile nakumuhangasana mangana amujihe, ikiye achinyinyine kunganda yaNgata muFwilishite. Mwangana Akishe wakuNgata awanyine unjiho nge Ndavichi apwile muka-kwasa jita wangolo uze vembilenga namumwaso mwomwo ajihile “tununu natununu” twavaFwilishite. Ngocho Ndavichi “evwile chikuma woma.” (Samwe. 1, 21:​10-12) Evwile woma hakushinganyeka vyuma mwalinga mwangana Akishe. Vyuma muka vyamukafwile ahonese woma?

3. Kweseka naSamu 56:​1-3, 11, Ndavichi ahonesele ngachilihi woma?

³ Hali Samu 56, Ndavichi ahanjikile omwo evwile halwola apwile muNgata. Hasamu kana, Ndavichi ahanjikile hatoma woma evwile nomwo ahonesele woma kana. Ndavichi afwelelele Yehova omu evwile woma. (Tangenu Samu 56:​1-3, 11.) Afwelelele Yehova namuchima wenyi wosena. Yehova akafwile Ndavichi alingile  chuma chize kavavula kulinga vatuko. Alyongele kuzaluka. Akishe amwene ngwenyi Ndavichi apwile nakumwivwisa chipekete, ngocho kasakile kupwa nenyi mwakamwihiko, kahechi chalingishile Ndavichi ahase kuchina.—Samwe. 1, 21:13–22:1.

4. Vyuma muka navitukafwa tufwelele chikuma Yehova? Hanenu chakutalilaho.

⁴ Nayetu tunahase kuhonesa woma hakufwelela Yehova. Uno tunahase kufwelela ngachilihi chikuma Yehova, chikumanyi nge tunevu woma? Achishinganyekenu hachakutalilaho chino. Kachi nge vanamiwane namusongo, hakavanga munahase kwivwa woma. Chipwe ngocho, munahase kuunda kachi nge mwafwelela ndotolo yenu. Pamo ou ndotolo nokunga vatu vakwechi musongo kana. Nahase kwivwilila kanawa kuvyuma namuhanjika, nakufwelela ngwenyi natachikiza omwo muli nakwivwa. Kaha nahase kumilweza jila yakumyukilamo yize yinazatenga kanawa nakuli vakwenu. Chochimwe nawa, tweji kufwelelanga chikuma Yehova hakushinganyeka havyuma natulingila lyehi, navize ali nakutulingila oholyapwa, navize mwakatulingila kulutwe. Omu mukiko alingile Ndavichi. Omu natushimutwila hamazu enyi amwe vahwima aze atwama hali Samu 56, shinganyekenu omwo nayenu munahase kufwelela chikuma Yehova nakuhonesa woma.

VYUMA MUKA VIZE YEHOVA NATULINGILA LYEHI?

5. Uno Ndavichi ashinganyekelenga havyuma muka mangana ahonese woma? (Samu 56:​12, 13)

⁵ Omu Ndavichi apwilenga muponde, ashinganyekelenga havyuma vize amulingililile Yehova. (Tangenu Samu 56:​12, 13.) Omu mukiko Ndavichi ashinganyekelenga mukuyoya chenyi. Chakutalilaho, lwola lumwe ashinganyekelenga havyuma atenga Yehova, vize vyamwanukishilenga ngolo atwama najo Yehova nazangi atwama nayo hali vatu. (Samu 65:​6-9) Ndavichi ashinganyekelenga nawa havyuma vize Yehova alingililile vatu veka. (Samu 31:19; 37:​25, 26) Kaha nawa ashinganyekelenga chikumanyi havyuma vize Yehova amulingililile ikiye. Yehova akafwilenga Ndavichi nakumukinga putu vene kuukemba wenyi. (Samu 22:​9, 10) Chikupu vene, kushinganyeka havyuma kana chakafwile Ndavichi afwelele chikuma Yehova.

6. Vyuma muka navitukafwa tufwelele Yehova nge tunevu woma?

⁶ Nge munevu woma, kaha lihulisenu ngwenu,  ‘Vyuma muka vize Yehova nangulingila?’ Shinganyekenunga havyuma atenga. Chakutalilaho, nge ‘natutalanga kanawa’ omwo Yehova eji kuzakamanga tujila najitemo vize katenga muchifwanyisa chenyiko kaha nawa kavyamulemesako, nachitukafwa tufwelele ngwetu nayetu mwatuzakama. (Mateu 6:​25-32) Shinganyekenunga nawa havyuma vize Yehova nalingila vaka-kumulemesa. Munahase kulinangula mutu umwe vasoneka muMbimbiliya uze asolwele lufwelelo lwakukola, chipwe kutanga mujimbu wangamba yaYehova wamakumbi ano. a Kaha nawa shinganyekenunga omwo Yehova namizakaminangamo. Uno amikokele ngachilihi nakumineha mumuchano? (Yowa. 6:44) Uno nakumbululanga ngachilihi kulomba chenu? (Yowa. 1, 5:14) Mweji kunganyalanga ngachilihi hakumbi hakumbi kuwana wachimuna wakuvatula waMwanenyi azanga?—Efwe. 1:7; Hepe. 4:​14-16.

7. Uno mujimbu wakapolofweto Ndanyele wakafwile ngachilihi Vanessa ahonese woma?

⁷ Ndumbwetu Vanessa b wamuHaiti apwile muukalu uze wamwivwishilenga woma. Lunga umwe mungalila yavo amutuminyinyinenga shinga nakumutumina mijimbu hakumbi hakumbi, nakumushinjila vaputuke kulisesembwa. Vanessa akanyine. Oloze uze lunga apihililile chikuma nakuputuka kumwivwisa woma. Ou ndumbwetu ambile ngwenyi: “Ngwevwile woma chikuma.” Uno Vanessa ahonesele ngachilihi woma? Alingile vyuma vize navimukinga. Mukulwane muchikungulwilo amulwezele atwale chihande chenyi kuvilolo vafulumende. Oloze ashinganyekelenga nawa omwo Yehova akingilenga vangamba jenyi kunyima. Vanessa ambile ngwenyi: “Mutu watete ngwashinganyekelengaho shina kapolofweto Ndanyele. Ou kapolofweto vamumbilile muwina wavandumba vaze vapwile nazala, numba tuhu kapwile namulongako. Chipwe ngocho, Yehova amukingile. Shikaho ngwalombele Yehova atale hachihande chami. Kufuma vene haze, woma wangukumine.”—Ndanye. 6:​12-22.

VYUMA MUKA ALI NAKULINGA YEHOVA OHOLYAPWA?

8. Uno Ndavichi akunyukile havyuma muka? (Samu 56:8)

⁸ Numba tuhu Ndavichi apwile muponde omu apwile muNgata, oloze kevwile womako. Ashinganyekelenga havyuma amulingililile Yehova halwola kana. Ndavichi atachikijile ngwenyi Yehova apwile nakumutwaminyina nakumukinga, kaha nawa atachikijile omwo apwile nakwivwa. (Tangenu Samu 56:8.) Ndavichi apwilenga namasepa vakushishika, vakufwana nge Yonatane naKapilishitu Wakulitulaho Ahimeleke, vaze vamukundwijilenga nakumukafwa. (Samwe. 1, 20:​41, 42; 21:​6, 8, 9) Numba tuhu vamufunyinyinyine kumujiha kuli Mwangana Saulu, oloze achinyine mangana ayovole mwono wenyi. Akunyukile ngwenyi Yehova atachikijile ukalu apwile nakuhitamo, nomwo nawa ukalu kana wapwile nakumwivwisa woma.

9. Yehova atachikiza vyuma muka hali etu mutu himutu?

⁹ Nge namuhita muukalu uze naumivwisa woma, kaha tachikizenu ngwenu Yehova mwatachikiza ukalu kana nomwo namwivwa mwomwo yaukalu kana. Chakutalilaho, Yehova amwene omwo vaIsalele vapwile nakuvayanjisa kuli vaEjipitu ‘navihuli vapwile nakuhitamo.’ (Kulo. 3:7) Ndavichi embile ngwenyi Yehova amwene “luyando” lwenyi “[na]kulyonyinga” chenyi. (Samu 31:7) Yehova “evwilenga kupihya” nahalwola vaIsalele vayanjilenga mwomwo yakulisakwila vavene kulinga vyuma vyakuhenga. (Isa. 63:9) Shikaho, nge munevu woma, tachikizenu ngwenu Yehova natachikiza omwo muli nakwivwa, kaha mwafwila kumikafwa muhonese woma kana.

10. Mwomwo ika munakunyukila ngwenu Yehova amizakama, kaha mwamikafwa mumike hakuhita mukala ukalu?

 ¹⁰ Munahase kulikomokela hakutachikiza omwo Yehova eji kutukafwanga nge tuli muukalu uze uli nakutwivwisa woma. Shikaho mulombenu amikafwe mumone omwo ali nakumikafwilamo. (Vamya. 2, 6:​15-17) Kufumaho shinganyekenu hachumechi: Kutala kuliko chihande chimwe hakukunguluka chipwe vyuma vakumbulwile vandumbwetu vize vyamikolezezele tahi? Uno kuliko mukanda umwe, chipwe vindiyo, chipwe mwaso ukwavo wamuliuka unamikolezeza tahi? Kutala kuliko ndumbwetu umwe uze amikolezezaho lyehi namazu amwaza chipwe chisoneka tahi? Nge katwazangamineko, tunahase kulelesa vandumbwetu chipwe kulya chakushipilitu chize tweji kutambulanga. Oloze tachikizenu ngwenu vyuma kana vyapwa wana waulemu wakufuma kuli Yehova. (Isa. 65:13; Mako 10:​29, 30) Kaha vyasolola nge Yehova atuzakama. (Isa. 49:​14-16) Vyasolola nawa nge atamo kumufwelela.

11. Vyuma muka vyakafwile Aida ahonese woma?

¹¹ Aida, uze atwama muSenegal amwene omu Yehova amukafwilenga muukalu wenyi. Hakuwana nge ikiye apwile mwana watwatwa, ngocho visemi jenyi vashinganyekele ngwavo mwawananga jimbongo jajivulu jakulizakama ivene nakuzakama visemi jenyi. Oloze omu Aida ashiwishileko chiyoyelo chenyi mangana azate upayiniya, kapwilenga najimbongo jakutamoko. Vatanga jenyi vamuhungile nakumwamba mwamupi. Ambile ngwenyi: “Ngwalizakaminyine ngwami pamo kangweshi kuhasa kuzakama visemi jamiko, kaha nawa vakwetu navanguhunga. Ngwahanyinenga Yehova mulonga hakwechelela vyuma vipihileko.” Kaha ou ndumbwetu evwililile kuchihande hakukunguluka. Ambile ngwenyi: “Muka-kuhanjika chihande ahanjikile ngwenyi kala kukola natwivwa kumuchima Yehova mwachitachikiza. Kaha kutwala muze, vakulwane navakwetu vangukafwile, kahechi changulingishile ngumone ngwami Yehova anguzanga. Ngwaputukile kulomba kuli Yehova nakuputuka cheka kupendamina hali ikiye. Ngwaunjilenga muchima, omu kulomba chami vachikumbulwilenga.” Mukuhita chalwola, Aida awanyine milimo yize yamukafwile apwenga najimbongo jakulikafwa najo yivene hakupwa payiniya nakuzakama nawa visemi jenyi navakwavo. Ambile nawa ngwenyi: “Ngunalinangula jino kufwelela  chikuma Yehova, kaha nge ngunalombo kuli Yehova, kangwevwa cheka woma.”

VYUMA MUKA MWAKALINGA YEHOVA KULUTWE?

12. Vyuma muka afwelelele Ndavichi kweseka naSamu 56:9?

¹² Tangenu Samu 56:9. Eyi vesi yasolola nawa jila yikwavo yize Ndavichi ahoneselelemo woma, numba tuhu kuyoya chenyi chapwilenga lika muponde. Ashinganyekelenga havyuma Yehova mwakamulingila kulutwe. Ndavichi atachikijile ngwenyi Yehova mwakamuyovola halwola lwakutamo. Chipwe ngocho, Yehova ahanjikile ngwenyi Ndavichi ikiye mwakashisa hawangana wavaIsalele. (Samwe. 1, 16:​1, 13) Ndavichi amwenenga kala chuma chize amushikile Yehova kwijiva nge chinatesamo lyehi.

13. Twatela kufwelela ngwetu Yehova mwakalinga vyuma muka?

¹³ Vyuma muka Yehova ashika kumilingila? Katwatela kufwelela ngwetu Yehova mwatukinga muvyeseko vyosena natumonako. c Chipwe ngocho, kala ukalu uze namumona mukatwamino kamyaka yino Yehova mwakaufumisako mukaye kakahya kaze kali nakwiza. (Isa. 25:​7-9) Tachikizenu ngwenu Tengi yetu atwama nangolo jakusangula vafu, nakuka misongo yetu, nakufumisako vaka-kutufumbukila.—Yowa. 1, 4:4.

14. Vyuma muka tunahase kushinganyekaho?

¹⁴ Nge munevu woma, kaha shinganyekenu havyuma mwakalinga Yehova kulutwe. Shinganyekenu omu namukevwa nge Satana vanamufumisako, kaha nawa nge vatu vakuhuka vanavashishi kuli vatu vakwoloka, nomu nawa kuhona kukupuka nachikafumangako chindende chindende hakumbi hakumbi. Kukukunguluka changalila cha 2014 kwapwile chimweso chize chasolwele omu tunahase kushinganyeka havyuma twatalilila kulutwe. Muchimweso kana, chisemi walunga apwile nakushimutwila natanga yenyi omwo chisoneka chaWaChimoteu 2, 3:​1-5 vanahase kuchitanga mujila yeka yakulihandununa, kachi nge jivesi kana japwile nakuhanjika omwo chiyoyelo nachikapwa mupalachise ngwavo: “Mupalachise nakukapwa lwola lwamwaza. Mwomwo vatu navakalizanganga navakwavo, navakazanganga vyuma vyakushipilitu, navakapwa namuchima wakulikehesa, nakulinyisa, navakalisanga Kalunga, nakwononoka visemi, nakupwa namuchima wakusakwilila, vakushishika, navakazanganga jitanga javo, nakwitavila vivwasano, nakuhanjikanga vyuma vyamwaza hali vakwavo, vakwechi muchima wakulikanyisa vavene, vavavwovu, navakazanganga vyuma vyamwaza, navakalifwelelanga umwe namukwavo, navakevwililanga vakwavo, vaka-kuzanga Kalunga, nakuhona kuzanga viseke vaze veji kusololanga ngwavo vakwechi vilinga vyakumwivwa Kalunga woma, nakwitavila ngolo jacho. Vatu vangocho kanda kuvatalisa nyimako.” Kutala mweji kushimutwilanga natanga yenu chipwe navakwenu vaka-kwitava omwo chiyoyelo chenu nachikapwa tahi?

15. Vyuma muka vyakafwile Tanja ahonese woma?

¹⁵ Ndumbwetu wapwevo Tanja wamuNorth Macedonia, ahonesele woma hakushinganyeka havyuma vyamwaza mwakalivwisa kuwaha kulutwe. Visemi jenyi vamukanyishilenga kulinangula Mbimbiliya. Ambile ngwenyi: “Vyuma vimwe vize ngwalizakaminyine ngwami navingusolokela, vyangusolokelele vene. Mama anguvetelenga nge ngunafumu kukukunguluka. Visemi jami vambile ngwavo navangujiha nge nangupwa nguChinjiho chaYehova.” Kutwala muze, Tanja vamuhangile hembo. Uno alingile ngachilihi? Ambile ngwenyi: “Ngwashinganyekelenga omwo nangukapwa nguwakuwahilila haya myaka mwomwo yakulama kulonga chami. Ngwashinganyekelenga nawa omwo Yehova mwakangufweta mukaye kakahya vyuma vyosena ngunahase kujimbalisa mukaye kano, nomwo nawa nangukavulyama vyuma vyosena vyavipi.” Chikupu  vene, Tanja alamine kulonga chenyi. Kaha nawa Yehova amukafwile awane kwakutwama. Oholyapwa, Tanja asomboka kuli ndumbwetu walunga wakushishika, kaha vali nakuzachila hamwe nakuwahilila mumulimo wakwambulula washimbu yosena.

FWELELENUNGA CHIKUMA YEHOVA

16. Vyuma muka navitukafwa tupwenga vakumika kachi nge tunamono kutesamo chavyuma vavuluka hali Luka 21:​26-28?

¹⁶ Haluyando lwalunene, vatu vamuchivulu “navakalezumuka hakwivwa woma.” Oloze vatu jaKalunga navakatwalaho lika kuzama mbe nakupwa vakumika. (Tangenu Luka 21:​26-28.) Mwomwo ika katweshi kukevwila womako? Mwomwo halwola kana natukapwa hitunalinangula lyehi kufwelela Yehova. Tanja, uze twavulukanga hakavanga, ambile ngwenyi, vyuma ahichilemo kunyima vili nakumukafwa omike muukalu weka ali nakuhitamo. Ahanjikile ngwenyi: “Ngunalinangula jino ngwami Yehova nahase kutukafwa tumike mukala ukalu nakutukisula. Shimbu jimwe chinahase kusoloka nge vatu vamwe vali nangolo chikuma havyuma vimwe, oloze kuhanjika muchano, Yehova atwama nangolo kuhambakana vakiko. Kaha numba ukalu utohwa ngachilihi, naukakuma.”

17. Uno chisoneka chetu chamwaka cha 2024 nachitukafwa ngachilihi? (Talenu muvwimbimbi wahalipapilo lyahelu.)

¹⁷ Makumbi ano kuli vyuma vyavivulu vyakutwivwisa woma. Chipwe ngocho, nayetu tunahase kuhonesa woma ngana muze alingile Ndavichi. Shikaho mazu achisoneka chetu chamwaka cha 2024, himazu aze Ndavichi ahanjikile kuli Yehova mukulomba chenyi ngwenyi: “Ngweji kufwelelanga muli ove kachi nge ngunevu woma.” (Samu 56:3) Mukanda umwe wahanjika haMbimbiliya wahanjika hali eyi vesi ngwawo Ndavichi “kashinganyekelenga havyuma vyamwivwishilenga woma chipwe haukalu wenyiko, oloze apendaminyinenga hali Muka-Kumusokola.” Shinganyekenu hachisoneka chetu chamwaka hatukweji vanakwiza kulutwe, chikumanyi nge munakumona ukalu. Wanenungako lwola lwakushinganyeka havyuma alingile Yehova kunyima, navize ali nakulinga oholyapwa, navize mwakalinga kulutwe. Kaha nayenu namuhanjika mazu aze ahanjikile Ndavichi ngwenyi: “Ngwafwelela Kalunga, shikaho kangweshi kwivwa womako.”—Samu 56:4.